1. Bõe yĩng tɩ tʋm-tʋmd a Poll sagl kiris-neb nins sẽn da yaa zʋɩf-rãmbã tɩ b keng taab raood n yɩɩd pĩndã?

BÕE yĩng tɩ d segd n kengd taab raood masã n yɩɩd pĩndã? Lɛtr ning tʋm-tʋmd a Poll sẽn da gʋls n tool kiris-neb nins sẽn da yaa zʋɩf-rãmbã pʋgẽ, a wilga a võore. Ad a sẽn yeele: ‘Bɩ d ges taab yelle, tɩ d tõe n nek taab ratem tɩ nong taaba la maan tʋʋm-sõamyã. Bɩ d da bas d wẽnd-doogã wa neb kẽer sẽn minim n maandẽ wã ye. Bɩ d sagl taaba, n sagl taab n yɩɩda [ bɩ ‘n keng taab raood n yɩɩda,’ MN] yãmb sẽn ne tɩ daarã kolgdame wã yĩnga.’ (Ebre. 10:24, 25) Ra keta yʋʋm a nu bala, tɩ kiris-neb nins sẽn da be Zerizalɛmmã bãng vẽeneg t’a Zeova “daarã” kolgdame. B na n yãa bãnd ning a Zeezi sẽn kõ a karen-biisã, n yeel tɩ b sã n wa yã rẽ bɩ b zoe n yi tẽngã n paam n põsã. (Tʋʋ. 2:19, 20; Luk 21:20-22) Sɩd me, a Zeova daarã waa yʋʋmd 70 wã, wakat ning Rom sodaasã sẽn sãam Zerizalɛmmã.

2. Bõe yĩng tɩ d segd n bao n keng taab raood masã n yɩɩd pĩndã?

² Rũndã-rũndã me, bʋʋm waoog sẽn kɩt tɩ d segd n kɩs sɩd t’a Zeova “daarã” sẽn yaa ‘ra-kãsenga,’ la sẽn ‘sek yɛɛsg wʋsgã’  ta n saame. (Zow. 2:11) No-rɛɛs a Sofoni ra yeelame yaa: “Sẽn-Ka-Saab daarã sẽn yaa ra-kãsengã kolgame, a kolgame, la a wata tao-tao!” (Sof. 1:14) Yaa keoogr sẽn pak tõnd me rũndã-rũndã. A Zeova daarã sẽn kolgã, d segd n tũu a Poll sẽn yeel tɩ d “ges taab yelle,” n “nek taab ratem tɩ nong taaba la maan tʋʋm-sõamyã.” (Ebre. 10:24) Dẽnd yɩta sõma tɩ d wilgd masã n yɩɩd pĩndã tɩ d tẽed-n-taasã yell pak-d lame. Rẽ, b sã n wa rat raood kengre, d tõogd n kenga b raoodo.

3. Bõe la a Poll wilg-yã? (Ges-y sõsgã sɩngrẽ fotã.)

³ Yel-bũn sebrã yeelame: “Yɩɩr sãamda sũur hal wʋsgo, la gom-noog kõta sũ-noogo.” (Yel. 12:25) Gomdã yaa gõaag zugu! Tõnd fãa rata raood kengr wakat ninga. A Poll wilgame tɩ baa sẽn wɩngd-b ne b taabã raood kengrã me mi n data raood kengre. A ra yeela a tẽed-n-taas nins sẽn be Rommã yaa: “Mam data ne m sũur fãa n yãnd yãmba, tɩ m tõe n taas yãmb Sɩɩgã kũuni, tɩ yãmb tẽebã na paam pãnga, wall tɩ tõnd pʋs n naag taab n paam raood paoosg ne tẽeb a yembr tãa ning yãmb la maam sẽn tarã.” (Rom. 1:11, 12) Dẽnd baa a Poll mengã sẽn da nong n kengd a taabã raoodã ra mi n data “vʋʋsem bilf” a tẽed-n-taasã sʋka, rat n yeel tɩ pɛlg kengre.—Karm-y Rom-dãmb 15:30-32.

4, 5. Ãnd dãmb raood la d segd n kenge, la bõe yĩnga?

⁴ Rũndã-rũndã me, yɩta sõma tɩ d kengd d tẽed-n-taas nins sẽn kẽes b meng zãng a Zeova tʋʋmdã pʋgẽ wã raoodo. Wala makre, so-pakdbã. B wʋsg monga b mens bũmb kẽer sẽn na yɩl n lebg so-pakdba. Yaa woto me ne misioneer-dãmbã, sẽn tʋmd-b Betɛll-dãmbẽ wã, sẽn tʋmd-b sɛbã lebgr zĩisẽ wã, la tigims sul yel-gɛtbã ne b pagbã. B fãa mongda b mens bũmb kẽer sẽn na yɩl n kẽes b sẽkã wʋsg a Zeova tʋʋmdã pʋgẽ. Rẽ n so tɩ d segd n kengd b raoodo. Kẽer me ra kẽesa b meng zãng a Zeova tʋʋmdã pʋgẽ, tɩ wa yɩ tɩlɛ tɩ b base, la b yamã ket n bee tʋʋmdã. Bãmb me sã n paam tɩ d tẽegd n kengd b raoodo, na n yɩ-b-la noog wʋsgo.

⁵ D tẽed-n-taas nins me sẽn nan pa kẽ kãadem, b sẽn dat n tũ Biiblã sẽn yeel tɩ d tog n kẽe kãadem “Zu-soabã pʋgẽ” balã yĩngã toga ne raood kengre. (1 Kor. 7:39) Pagbã me sã n paam tɩ b sɩdbã mi n yeel-b tɩ b nong-b lame, la b mi n pẽg-b b tʋʋmã yĩnga, kengda b raoodo. (Yel. 31:28, 31) Kiris-neb nins me b sẽn namsd b tũudmã yĩnga, wall sẽn maood ne bãasã rata raood kengre. (2 Tes. 1:3-5) A Zeova ne a Zeezi belsda d tẽed-n-ta-kãensã fãa sẽn ket n maand sɩdã.—Karm-y 2 Tesalonik-rãmb 2:16, 17.

6. Wa Ezayi 32:1, 2 sẽn wilgdã, bõe la kãsem-dãmbã maanda?

⁶ Karm-y Ezayi 32:1, 2. D sẽn be toog wakatã kɩtame tɩ d tõe n koms raood nana-nana. La a Zeezi tũnugda ne kãsem-dãmbã, b paama vʋʋsem sõngã zaeeb tɩ b naaga piis a taabã, n kengd tõnd raood la a wilgd-d sore. Yaa bãmb la b sẽn bool tɩ “nanambsã.” Kãsem-dãmbã sẽn datã, pa b ‘modg tõnd d tẽebã pʋgẽ’ ye. B yaa tõnd tʋmd-n-taase, n sõngd tõnd tɩ d ket n tũud Wẽnnaam ne sũ-noogo.—2 Kor. 1:24.

7, 8. No-goamã sẽn yãk a toogo, bõe la kãsem-dãmbã tõe n maan n keng b tẽed-n-taasã raoodo?

⁷ Tʋm-tʋmd a Poll kõo mak-sõng kãsem-dãmbã sẽn tõe n tũ. A ra yeela Tesalonik kiris-nebã b sẽn da namsdã yaa: “Tõnd da nongẽ lame n kõ yãmb Wẽnnaam koe-noogã ne nonglem. La ka rẽ bal ye. Tõnd da nong n kõo d vɩɩmã me yãmb yĩnga, bala, yãmb lebga tõnd nin-nongdse.”—1 Tes. 2:8.

⁸ Kãsem-dãmbã sã n kengd b tẽed-n-taasã raood ne b no-goamã, yaa sõma. La rẽ bal pa sek ye. Sɩd me, a Poll yeela Efɛɛz kãsem- dãmbã yaa: “Zemsame tɩ y tʋm n sõng neb nins sẽn ka pãngã la y tẽeg Zu-soab a Zezi goama, b meng yeelame: Kũun bee barka n yɩɩd reegre.” (Tʋʋ. 20:35, Wẽnnaam Sebre, 1983) Pa ne a no-goamã bal la a Poll ra rat n keng a tẽed-n-taasã raood ye. A yeelame: “Mam na n kɩsa bũmb fãa ne yamleoogo, la m kɩs m mengã fãa yãmb mensã yĩnga.” (2 Kor. 12:15) Woto me, pa ne b no-goamã bal la kãsem-dãmbã segd n bels b tẽed-n-taasã la b keng b raood ye. B tʋʋm-tʋmdɩ wã me segd n wilgame tɩ b tẽed-n-taasã ned kam fãa yell pak-b lame.—1 Kor. 14:3.

9. Bõe la kãsem-dãmbã tõe n maan tɩ b sã n na n kõ ned saglg bɩ keng a raoodo?

⁹ Yɩl n keng b tẽed-n-taasã tẽebo, yaa tɩlɛ tɩ kãsem-dãmbã mi n kõ-b saglse. La sã n wa yaa woto me, b segd n tũu Biiblã sẽn yet rẽ wɛɛngẽ wã, n tõog tɩ b sã n na n kõ ned saglg bɩ keng a raoodo. A Zeezi kõo mak-sõng sẽn ka to zĩ-kãng wɛɛngẽ. A vʋʋgrã zugẽ, a taasa Aazimineer tigimsã koeese, n sagl-ba. A tolg n togsa Efɛɛz tigingã ne Pɛrgam la Tiyatiir tigingã bũmb kẽer b sẽn segd n demse. La a reng n pẽg-b-la b tʋʋm-sõma wã yĩnga. (Vẽn. 2:1-5, 12, 13, 18, 19) A yeela Laodise tigingã yaa: “Mam lengda neb nins fãa mam sẽn nonge, la m sɩbgd-ba. Dẽ wã, bɩ y nang pãng la y tek yam n kos sugri.” (Vẽn. 3:19) Kãsem-dãmbã sã n wa na n sagl b tẽed-n-taaga, b segd n dɩka Kiristã togs-n-taare.

10. Bõe la tõnd ned kam fãa tõe n maan n keng a taabã raoodo?

¹⁰ Pa kãsem-dãmbã bal n segd n kengd b tẽed-n-taasã raood ye. A Poll sagla kiris-nebã fãa tɩ b mao tɩ gomd sã n na n yi b noorẽ bɩ yɩ “gom-sõng sẽn na sõng ned t’a bɩ la a wa ne bark neb nins sẽn wʋmdã zutu.” (Efɛ. 4:29) D ned kam fãa segd n mi n tags n gesa d taabã sẽn dat sõngr ninga, la d sẽn tõe n maan n sõng-bã. No-rɛɛs a Ezayi ra yeela Israyɛll nebã yaa:  “Keng-y nus nins sẽn ka tar pãngã, la paas-y rũm nins sẽn keoosdã pãnga.” (Eza. 35:3; Ebre. 12:12, 13) D yaa kãsem tɩ d yaa biiga, d fãa tõe n kenga d tẽed-n-taasã raood ne d no-goamã.

11. Wãn to la a Mart paam sõngr a zu-loɛɛgã pʋgẽ?

¹¹ Wakat n zĩnd tɩ saam-bi-poak yʋʋr sẽn boond t’a Mart * sũur da sãam hal wʋsgo. Nams-a lame n kaoos bilfu. Ad a sẽn yeele: “Daar a ye, m da pʋʋsa a Zeova n kos-a t’a sõng-m tɩ m paam tɩ b keng m daoodo. Baraar bala, m paamame tɩ saam-bi-poak yʋʋm sẽn vẽsg wilg-m t’a nong-m lame, la t’a kʋmda m nimbãanega. Kell n yaa m sẽn da ratã bal kɛpɩ. A yeela maam tɩ yẽ paama mam zu-loɛɛgã buudu, n togs-m sẽn yɩ to-to wã. Kɩtame tɩ m da neẽ tɩ m pa m yembr ye.” Tõe meng tɩ saam-bi-poakã pa bãng a goamã sẽn keng a Mart raood to-to wã ye.

12, 13. Wãn to la d tõe n tũ bũmb ning b sẽn yeel Filip-rãmb 2:1-4?

¹² A Poll ra yeela Filip kiris-nebã yaa: “Sã n yaa tɩ tũ Kiris wata ne belsgo, sã n yaa tɩ Kiris nonglem yãmb yĩngã paasda yãmb raoodo, sã n yaa tɩ yãmb tara lagem-n-taar ne Sɩɩg-sõngo, la sã n yaa tɩ yãb-taab ne nimbãan-zoeer beeme, bɩ y paam nonglem a yembre, la yam a yembre, la datem a yembre, tɩ mam sũurã yɩ noog zãnga. Da maan-y bũmb baa fɩ ne geesem-geesem wall ne wuk-m-meng ye, la bɩ ned kam fãa paam sik-m-meng yam n tags tɩ neb a taaba yɩɩda yẽnda. Bɩ yãmb ned kam fãa ra ges a meng sõngr yell bal ye, la bɩ a ges neb a taaba sõngr yell me.”—Fili. 2:1-4.

¹³ Sɩd-sɩdã, d fãa segd n baoo d sẽn na n maan to-to n paam n sõngd d taabã. D fãa tara d sẽn tõe n maanega, tɩ d tẽed-n-taasã paam ‘belsg’ la ‘nonglem,’ la b neẽ tɩ “yãb-taab ne nimbãan-zoeer” bee d sʋka.

14. Wilg-y bũmb kẽer sẽn kengd raoodo.

¹⁴ D sã n wʋm tɩ neb d sẽn sõng tɩ b bãng a Zeova ket n tũud-a lame, d sũy yaa noogo. Tʋm-tʋmd a Zã ra yeelame yaa: “Bũmb ka kõt maam sũ-noog n yɩɩd mam sẽn na n wʋm tɩ b gomd tɩ mam kambã kẽnda sɩdã pʋgẽ ye.” (3 Zã 4) So-pakdbã tõe n kõo kaset tɩ b sũur sɩd yaa noog wʋsgo, b sã n wa wʋm tɩ ned b sẽn da sõng yʋʋm a wãn sẽn loog t’a bãng a Zeova ket n tũud-a-la ne a sũur fãa, wall a pʋd n lebga so-pakda. Dẽnd so-pakd ning sã n wa koms raoodo, d tõe n lebg n tẽeg-a-la bũmb nins a sẽn da maan n sõng a taabã.

15. Togs-y bũmb d sẽn tõe n maan n keng neb nins sẽn wɩngd ne a Zeova tʋʋmdã raoodo.

¹⁵ Tigims sull yel-gɛtb wʋsg yeelame tɩ bãmb ne b pagbã sẽn mi n paam tɩ b tẽed-n-taas gʋls lɛtr n pʋʋs-b bark b sẽn wa n kaag b tigingã, kengda b raood wʋsgo. Yaa woto me ne kãsem-dãmbã, misioneer-dãmbã, so-pakdbã, la Betɛllẽ tʋm-tʋmdbã. D sã n tẽegd n pʋʋsd-b bark b sẽn wɩngd ne a Zeova tʋʋmdã baa ne zu-loeesã, kengda b raoodo.

16. Bõe la d tõe n maan n paam n keng ned raoodo?

¹⁶ Nina pa nong goama, n tagsdẽ t’a pa tol n tõe n keng a taabã raood ye. La baa d pa nong goama, d tõe n kenga d taabã raood hal sõma. D sã n dat n keng d to raoodo, pa tɩlɛ tɩ d maan bõn-kãseng ye. D sã n wa pʋʋsd neda, d tõe n yõgemda d noor ne-a. A soab sã n pa yõgemd a noor ne-do, tõe tɩ yaa bũmb n namsd-a, t’a rat ned n togs sẽn be a sũurẽ wã. D sã sak n na n kelg-a, rẽ meng zoe n tõe n yols-a lame.—Zak 1:19.

17. Wãn to la b sõng bi-bɩɩg a ye a zu-loɛɛg pʋgẽ?

¹⁷ Bi-bɩɩg a ye yʋʋr sẽn boond t’a Ãari ba la  a zakã neb a taab n wa n yik n bas a Zeova, tɩ sãam a sũur hal wʋsgo. A ba wã ra yaa kãsem-soab menga. Daar a ye, tigims sull yel-gɛt n yã t’a Ãari sũurã sãama wʋsgo, t’a tall-a tɩ b kẽng kiosg pʋgẽ, n na n tɩ yũ kafe la b sõse. A maaga a yĩng n kelg a Ãari t’a togs-a yellã sẽn namsd-a to-to wã. B sõsgã poore, a Ãari bãngame t’a sã n dat t’a zakã rãmb le wa sɩng a Zeova tũubu, yaa tɩlɛ tɩ yẽ mengã ket n wɩngd ne a Zeova tũubu. A karma Yɩɩn-sõamyã 46, Sofoni 3:17 la Mark 10:29, 30 wã tɩ bels-a hal sõma.

18. a) Bõe la rĩm a Salomo yeel-yã? b) Bõe la a Poll sagl tõnd tɩ d maane?

¹⁸ A Mart kibarã ne a Ãari kibarã wilgdame tɩ d fãa tõe n maana bũmb n sõng d tẽed-n-taag sẽn dat belsgo. Rĩm a Salomo ra yeelame yaa: “Gomd b sẽn leok sẽn zems a wakat kõta sũ-noogo. Ned sã n yõgemd a noor ne foom, a noogda f sũuri, la kiba-noog paasda yĩns keelem.” (Yel. 15:23, 30) Wakat ning me, ned raood sã n koms tɩ d karem Gũusg Gasgã sõsg ninga, wall bũmb sẽn be tõnd sitã pʋgẽ t’a kelge, kengda a raoodo. A Poll yeelame tɩ d sã n naag taab n yɩɩl Rĩungã yɩɩla, rẽ me kengda raoodo. Ad a sẽn yeele: “Zãms-y taab la y keoog taab ne yam meng-menga, ne yɩɩn-sõamyã, la Wẽnnaam yɩɩla, la yɩɩl Sɩɩg-sõng sẽn kõta. Yɩɩl-y bark pʋʋsg yɩɩl ne y sũyã fãa n pẽg Wẽnnaam.”—Kol. 3:16; Tʋʋ. 16:25.

19. Bõe yĩng tɩ na n maneg n yɩ tɩlɛ tɩ d kengd taab raood n yɩɩd pĩndã? La bõe la d segd n maane?

¹⁹ A Zeova “daarã” sẽn tar kolgrã, na n maneg n yɩɩ tɩlɛ tɩ d kengd taab raood n yɩɩd pĩndã. (Ebre. 10:25) A Poll ra kõo a tẽed-n-taasã saglga, tɩ tõnd me sã n tũ bɩ d sũur na n yɩ noogo. A ra yeelame: “Paas-y taab raoodo, la y bɩɩs taab tẽeb wa y sẽn zoe n maandẽ wã.”—1 Tes. 5:11.