1, 2. a) Bõe la nebã maanda, tɩ wilgd tɩ b baooda lohorem? b) Naoor wʋsgo, baasda wãn-wãna?

RŨNDÃ-RŨNDÃ, d nong n wʋmda b sẽn yet zĩig fãa tɩ nebã yaa yembre, la tɩ ned fãa tara lohorem n maan a yam. Neb wʋsg maooda sẽn na yɩl tɩ nin-buiidã paam b meng ne wẽgbã, bak-n-sõngã, wall naongã. Neb kẽer me sẽn dat yaa b bas tɩ ned fãa tõe n togs a sẽn tagsde, n yãk a toorẽ yam, la a vɩɩmd wa a sẽn date. Zĩig fãa, nebã baooda lohorem.

² Sẽn na yɩl n paam lohorem n maand b yam, neb kẽer mi n sũu taab n wilg b sũ-pa-noaanga, tɩ sãnda zabd n dat tɩ b toeem pãn-soaadbã. La woto pa sõngd-b tɩ b paam b sẽn datã ye. Naoor wʋsgo, pʋd n baasda ne yel-beedo, la neb kẽer kũum menga. Hakɩɩka, bũmb ning rĩm a Salomo sẽn yeel tɩ be Koɛɛg soab 8:9 wã sɩd yaa sɩda. A yeela be tɩ “ninsaal tõe a to n maand-a wẽnga.”

3. Bõe la d tog n maane, n paam sũ-noog hakɩɩk la vɩɩm sẽn tar barka?

³ Biiblã wilgda d sẽn tog n maan to-to n paam sũ-noog hakɩɩk la vɩɩm sẽn tar barka. Karen-biig a Zak yeelame: “Ned ning sẽn get tõog sẽn zems zãngã, sẽn yaa lohorem tõogã, la  a maoodẽ, . . . nin-kãng na paam Wẽnnaam bark a sẽn maandã pʋgẽ.” (Zak 1:25) Tõog sẽn zems zãngã yaa a Zeova n kõ ninsaalbã. Yẽ n mi bũmb nins sẽn yaa tɩlɛ ne ãdem-biisã, sẽn na yɩl tɩ b paam sũ-noog hakɩɩk la vɩɩm sẽn tar barka. A naana d yaab a Ãdem ne a Awa n kõ-b lohorem meng-menga, la bũmb nins fãa sẽn da na n kɩt tɩ b vɩɩmd ne sũ-noogã.

4. Bilg-y lohorem ning a Ãdem ne a Awa sẽn da tarã. (Ges-y sõsgã sɩngrẽ fotã.)

⁴ D sã n karem baa yaa Sɩngr sebrã pipi sags a yiibã bala, d bãngdame t’a Ãdem ne a Awa ra tara lohorem ning tõnd sẽn baood rũndã-rũndã n pa tõe n paamã. B ra tara b sẽn datã fãa. B ra pa maand rabeem, ned ra pa maand a to kɛgr me ye. B ra pa maand yɩɩr rɩɩb poorẽ, tʋʋm yĩnga, wall n yɛɛsd bãag bɩ kũum ye. (Sɩng. 1:27-29; 2:8, 9, 15) La rẽ yĩnga, ra yaa bũmb fãa pʋgẽ la a Ãdem ne a Awa ra tar lohorem bɩ? Sok-kãng la d na n leok masã.

5. Bõe n wilgd tɩ sẽn na yɩl tɩ ned fãa tar lohorem, yaa tɩlɛ tɩ b lugl noya?

⁵ Neb wʋsg n tagsd tɩ lohorem hakɩɩkã yaa b sẽn na n bas ned fãa t’a maan a raab bũmb fãa pʋgẽ, baa rẽ sẽn na n wa ne biis ninsã. Sebr a yembr pʋgẽ, b yeelame tɩ lohorem võor yaa “tõog n yãk f toorẽ yam, la f tõog n maan f sẽn yãk yam n na n maanã.” La b paasa sebrã pʋgẽ tɩ yɩlẽ tɩ nin-buiidã paam lohorem, yaa tɩlɛ tɩ noy nins goosneemã sẽn na n luglã ra yɩ noy sẽn wẽgd neda, noy sẽn ka yõodo, wall sẽn loog nug ye. Woto wilgda vẽeneg tɩ sẽn na yɩl tɩ ned fãa tar lohorem, yaa tɩlɛ tɩ b lugl noy kẽere. La ãnd n tar sor n na n wilg noy sã n zemsame, bɩ wẽgda nin-buiidã, wall ka yõodo, bɩ looga nugu?

6. a) Bõe yĩng tɩ yaa a Zeova a ye tãa bal n tõe n maan a raab bũmb fãa pʋgẽ? b) Bõe yĩng tɩ ninsaal sẽn tõe n paam lohorem ningã tar koaka?

⁶ Segdame tɩ d tẽegd wakat fãa tɩ yaa a Zeova a ye tãa bal n tõe n maan a raab bũmb fãa pʋgẽ. Bõe yĩnga? Bala, yẽ n naan bũmb fãa, n leb n yaa yĩngr la tẽng Naaba. (1 Tɩm. 1:17; Vẽn. 4:11) Rĩm a Davɩɩd yeela bũmb sẽn bilgd a Zeova naamã la a ziirã sẽn ka mak-n-taarã hal sõma. (Karm-y 1 Kibay 29:11, 12.) La yĩngr la tẽng bõn-vɩɩlɩ wã fãa sẽn tar lohorem ningã tara koaka. A Zeova ratame tɩ tõnd sak n deeg tɩ yaa yẽ bal n tar sor n na n wilg noy sã n zemsame, pa rẽ bɩ sã n wẽgda nin-buiidã, wall yaa noy faado, bɩ sã n looga nugu. Sɩd me, hal sɩngrẽ wã, a sẽn maan to-to ne d yaab a Ãdem ne a Awa wã wilgdame tɩ woto la a rata.

7. Sõdg-y bũmb kẽer d sẽn maand tɩlɛ, tɩ yaool n noom tõndo.

⁷ A Ãdem ne a Awa ra tara lohorem bũmb wʋsg pʋgẽ, la noy kẽer la b ra segd n tũ tɩlɛ. Noy kẽer meng tũubã pa baood tɩ b yals n tags ye. Wala makre, b ra miime bal tɩ b sã n dat n ket n vɩ, yaa tɩlɛ tɩ b vʋʋsd pemsmã, n dɩtẽ, la b gõe. La woto sẽn yaa tɩlɛ wã, rat n yeelame tɩ b pa tar lohorem bɩ? Ayo! A Zeova pʋd n maaname tɩ bõn-kãensã noom-ba, n kõt-b sũ-noogo. (Yɩɩn. 104:14, 15; Koɛ. 3:12, 13) D sã n paam pems-noog n vʋʋse, wall d sã n dɩ rɩɩb d sẽn nonge, pa rẽ bɩ n kẽ yʋng n paam n gũs sõma, d sũur pa noom sɩda? D pa get tɩ woto kɩtame tɩ d pa tõe n maan d yam ye. Yaa vẽeneg t’a Ãdem ne a Awa me tagsg ra yaa woto.

8. Wilg-y noor a ye Wẽnnaam sẽn da kõ a Ãdem ne a Awa. Bõe yĩng t’a kõ-b noorã?

 ⁸ Ad noor a ye a Zeova sẽn da kõ a Ãdem ne a Awa: A yeel-b-la vẽeneg tɩ b rog kamb n fɩɩg n pid dũniyã, la b soog-a. (Sɩng. 1:28) No-kãngã ra kɩtame tɩ b pa tar lohorem bɩ? A bada! B pʋd n paama lohorem, n na n naag n pids b Naandã raabo. A ra ratame tɩ tẽngã tõr lebg arzãna, tɩ ninsaalb sẽn zems zãng vɩɩmd a zug wakat sẽn kõn sa. (Eza. 45:18) Rũndã-rũndã, ned sã n yãk yam n pa na n kẽ kãadem, wall a sã n dat n kẽ kãadem la a pa rat n dog biiga, a pa kɩɩsd Wẽnnaam raabã ye. Neb wʋsg yẽ kẽeda kãadem n dog kamba, baa ne b sẽn mi tɩ zu-loees kõn kongã. (1 Kor. 7:36-38) Bõe yĩnga? Bala, nebã ket n paamda sũ-noog a pʋgẽ, la b saagdẽ tɩ zu-loeesã na n zemsa b nugu. (Yɩɩn. 127:3) Hakɩɩka, a Ãdem ne a Awa sã n da sakẽ-la a Zeova, b kãadmã ra na n yɩɩ noogo, tɩ bãmb ne b kambã la b yagensã vɩɩm me tall bark wakat sẽn kõn sa. *

9. Bõe n wilgd tɩ Wẽnnaam noor ning sẽn be Sɩngr 2:17 wã pa noor sẽn ka yõodo, bɩ sẽn loog nugu?

⁹ Noor a to me la a Zeova kõ a Ãdem ne a Awa, la a togs-b bũmb ning sẽn na n paam-ba, b sã n kɩɩs noorã. A yeelame: “Yaa tɩɩg ning sẽn kɩtd tɩ ned bãng wẽnga, ne sõmb n bakã biis bal la fo ka tog n dɩ. Bala, daar ning fo sẽn na n dɩ tɩ-kãngã bilã, fo na n kiime.” (Sɩng. 2:17) Rẽ yĩnga, yaa noor sẽn ka yõodo, bɩ sẽn loog nugu, wall sẽn wẽgd-b bɩ? Yaa noor sẽn kɩt tɩ b pa le tar lohorem bɩ? Ayo! Seb-mitb wʋsg yeelame tɩ noorã Wẽnnaam sẽn kõ wã yaa sõma, la tɩ zemsame. Wala makre, b nin-yend n yeel tɩ noorã sõngda tõnd tɩ d bãng tɩ “yaa Wẽnnaam bal n mi sẽn yaa sõma . . . ne ãdem-biisã, la tɩ leb n yaa yẽ bal n mi sẽn pa sõma . . . ne ãdem-biisã. Nebã sã n dat tɩ b vɩɩmã yɩ ‘sõma,’ yaa tɩlɛ tɩ b teeg Wẽnnaam la b sak-a. B sã n kɩɩs Wẽnnaam, a basd-b lame tɩ b soog b mense, n welgd sẽn yaa sõma ne sẽn yaa wẽngã b toore.” Ãdem-biisã yaool n pa tõe n bãng sẽn yaa sõma ne sẽn pa sõma wã n bak b toor ye.

10. Yãk f toorẽ yamã pa yembr ne f sẽn na n tar sor n wilgd sẽn yaa sõma bɩ wẽng n bak ye. Wilg-y-yã a võore.

¹⁰ La neb kẽer na n yeelame tɩ baasgo, noorã kɩtame t’a Ãdem ne a Awa ra pa tõe n maan b yam ye. Sẽn yet-b woto wã pa mi tɩ yãk f toorẽ yamã pa yembr ne f sẽn na n tar sor n wilgd sẽn yaa sõma bɩ wẽng n bakã ye. A Ãdem ne a Awa ra tara lohorem, n tõe n yãk b sã n na n saka Wẽnnaam bɩ b pa na n sak-a. La yaa a Zeova bal n tar sor n wilgd sẽn yaa sõma bɩ wẽngã n bake. Wẽnnaam sẽn yeel tɩ tɩɩgã yaa “wẽng la sõmb bãngr tɩɩgã,” ra tog n sõnga a Ãdem ne a Awa tɩ b bãng woto vẽenega. (Sɩng. 2:9) Pa wakat fãa la ninsaal tõe n bãng a yam-yãkr sẽn na n baas to-to, wall sã n na n maneg-a lame ye. Rẽ n so tɩ d mi n yã tɩ nina yãk yam ninga, tɩ wa baas ne zu-loeese, namsg wall yel-beedo, tɩ yaool n pa yɩ ne yam-wẽng ye. (Yel. 14:12) Yaa ninsaal tõogã sẽn tar koakã yĩnga. A Zeova sẽn yeel a Ãdem ne a Awa tɩ b ra rɩ tɩɩgã bilã, yaa sẽn na n sõng-b tɩ b bãng tɩ yɩl n paam lohorem hakɩɩka, yaa tɩlɛ tɩ b sak yẽ. La bõe la b yãk yam n maane?

11, 12. Bõe yĩng t’a Ãdem ne a Awa sẽn yãk yam ningã baas ne yel-beedo? Rɩk-y makre.

¹¹ Bʋko, a Ãdem ne a Awa yãka yam n  kɩɩs a Zeova. A Awa tẽe a Sʋɩtãan sẽn yeel tɩ b sã n dɩ tɩɩgã bilã, ‘b yamã na n wekame tɩ b lebg wa Wẽnnaam n mi sõama ne wẽng n bakã.’ (Sɩng. 3:5) B sẽn dɩ tɩɩgã bilã, b paama lohorem n yɩɩd pĩndã bɩ? Ayo! A Sʋɩtãan belg-b lame. Sɩd me, b sẽn dɩ wã, pa kaoos la b bãng t’a Zeova noor kɩɩsg wata ne yel-beed ye. (Sɩng. 3:16-19) Bõe yĩng tɩ wat ne yel-beedo? Bala, a Zeova pa kõ ninsaal sor t’a tõe n bãng sẽn yaa sõma ne sẽn yaa wẽng n bake, tɩ pa tũ ne yẽ sõngr ye.—Karm-y Yel-bũn 20:24.

¹² D rɩk makr ne sɩlg sofɛɛre. Yɩl n ta a sẽn datẽ wã ne laafɩ, yaa tɩlɛ t’a tũ sor b sẽn yãke, la a tall wẽnebã tʋʋm-teedã n tʋm sõma, la a mi n sokd sẽn get-b sɩlsã soayã yellã bũmb kẽere. La a sã n zãgs n dɩk sor yaare, bɩ n wẽn sɩlgã wa a sẽn dat bala, tõe n baasa ne yel-beedo. A Ãdem ne a Awa yɩɩ wa sɩlg sofɛɛr sẽn maan a yam. B pa sak n tũ sor ning Wẽnnaam sẽn yet tɩ b tũ wã ye. Baasa wãna? Waa ne yel-beedo! Bãmb ne b kambã la b yagensã lebga yel-wẽn-maandb la kiidba. (Rom. 5:12) B sẽn bao n na welg sẽn yaa sõma bɩ wẽngã b toorã, b pa paam lohorem n paas ye. B pʋd n konga lohorem hakɩɩkã a Zeova sẽn da kõ-bã.

13, 14. Bõe la d tog n maane, n paam lohorem hakɩɩkã?

¹³ Neb n tagsd tɩ yaa b sã n tõe n maan b yam bũmb fãa pʋgẽ la b vɩɩmã na n yɩ noogo. La b bee bʋʋm bɩ? Yaa sɩd tɩ d sã n tar lohorem yaa sõma. La tags-y n ges-y vɩɩmã sẽn da na n yɩ to-to, ned fãa sã n da tar lohorem n maand a sẽn date, tɩ gɩdgr kae ye. Sebr a ye pʋgẽ, b yeelame tɩ tẽng fãa pʋgẽ, yɩl n bãng n lugl noyã pa nana, bala, noyã tog n wilgda nin-buiidã sẽn pa tar lohorem n maanã, la leb n sõng tɩ ned fãa tõe n maan a sẽn tar sor n maanã. Yaa rẽ yĩng la tẽng fãa noyã sẽn yaa ka tɛka, tɩ noy-lugundbã la bʋ-kaoodbã sẽn wilgd b sẽn tog n tũ noyã to-to wã me waoogẽ wã.

¹⁴ La a Zeezi wilga d sẽn tõe n maan to-to n paam lohorem hakɩɩka. Ad a sẽn yeele: “Yãmb sã n tall mam goamã,  yãmb yaa mam karen-biis hakɩɩka. Yãmb na bãng sɩda, la sɩdã na kõ yãmb lohorem.” (Zã 8:31, 32, Wẽnnaam Sebre, 1983) A Zeezi gomdã wilgdame tɩ yɩl n paam lohorem hakɩɩkã, bũmb a yiib n yaa tɩlɛ: Pipi, d tog n saka a goamã sẽn yaa sɩdã, la yiib-n-soaba, d tog n lebga a karen-biiga. Rẽ la d paamd d meng zãng-zãnga. D na n paama d meng ne bõe? Ad a Zeezi sẽn yeele: “Ned ninga fãa sẽn maand yel-wẽna, a yaa yel-wẽnã yamba. . . . Biigã sã n kõ yãmb lohorem, yãmb na paam lohorem menga.”—Zã 8:34, 36, Wẽnnaam Sebre, 1983.

15. Bõe n wilgd tɩ lohorem ning a Zeezi sẽn yeel t’a karen-biisã na n paamame wã sɩd yaa lohorem hakɩɩka?

¹⁵ Lohorem ning a Zeezi sẽn yeel t’a karen-biisã na n paamame wã yɩɩda lohorem ning neb wʋsg sẽn baood rũndã-rũndã wã. A Zeezi sẽn yeel tɩ “Biigã sã n kõ yãmb lohorem, yãmb na paam lohorem mengã,” yaa d sẽn na n paam d mens ne yembd ning pʋgẽ ãdem-biisã fãa sẽn be, hal tɩ yaa nimbãaneg sẽn pa tõe n bãng n bilgã yell la a ra gomda, rat n yeel tɩ ‘yel-wẽnã yembdã.’ Yel-wẽnã pa kɩt tɩ d maand sẽn pa segd bal ye. A tõe n kɩtame tɩ d pa maan bũmb nins d sẽn mi tɩ yaa neerã ye. Wakat ning me, a kɩtdame tɩ d pa maand d sẽn tõe wã fãa ye. Dẽnd d sɩd yaa yel-wẽnã yembse, tɩ rẽ wat ne sũ-sãams la namsgo, n wa baas ne kũum. (Rom. 6:23) Tʋm-tʋmd a Poll ra mii yel-wẽnã sẽn namsd ninsaal to-to wã. (Karm-y Rom-dãmb 7:21-25.) Yaa d sã n wa paam d mens fasɩ ne yel-wẽnã, la d na n paam lohorem ning a Ãdem ne a Awa sẽn da tar sɩngrẽ wã.

16. D maanda wãn n paam lohorem hakɩɩka?

¹⁶ La d tẽeg t’a Zeezi yeelame tɩ yaa d ‘sã n tall yẽ goamã’ la a na n kõ-d lohorem. Woto wilgdame tɩ bũmb kẽer la d segd n maane, n yaool n paam lohorem hakɩɩkã. Bõe la d segd n maane? D sẽn lebg kiris-nebã, d kɩɩsa d mensã raabo, n yãk yam n na n tũ noy nins a Zeezi sẽn gãnegã. (Mat. 16:24) Wa a Zeezi sẽn pʋlmã, wakat n wat tɩ d na n paam n dɩ a maoongã yõod zãnga. Wakat kãnga, d na n sɩd paama lohorem hakɩɩka.

17. a) D sã n dat sũ-noog hakɩɩka, bõe la d tog n maane? b) Bõe la d na n bãng sõsg ning sẽn pʋgdã pʋgẽ?

¹⁷ D sã n sak n tũ bũmb nins a Zeezi sẽn zãms nebã, tɩ wilgdẽ tɩ d yaa a karen-biisi, d vɩɩmã na n talla barka, tɩ d tar sũ-noog hakɩɩkã. Rẽ me, d na n wa paama d meng fasɩ ne yel-wẽnã la kũumã yembdã. (Karm-y Rom-dãmb 8:1, 2, 20, 21.) Sõsg ning sẽn pʋgdã pʋgẽ, d na n bãnga d sẽn tog n maan to-to ne lohorem ning d sẽn zoe n tarẽ wã tɩ zemse, t’a Zeova sẽn yaa Wẽnnaam sẽn kõt lohorem hakɩɩkã paam waoogr wakat sẽn kõn sa.