1. A Ãdem ne a Awa kɩɩsgã poor bala, bõe la a Zeova maan n na n keng ãdem-biisã raoodo?

HAL ninsaalbã sẽn lebg yel-wẽn-maandbã tɛka, a Zeova wilgame t’a yaa Wẽnnaam sẽn belsd nebã la a kengd b raoodo. A Ãdem ne a Awa kɩɩsgã poor bala, a togsa bãngr-gomd ning sẽn be Sɩngr 3:15. Ãdem-biisã sã n da wa wʋm bãngr-gomdã võore, ra na n kõ-b-la raoodo, tɩ b kɩs sɩd tɩ wakat n wat t’a Zeova na n kɩt tɩ b sãam a Sʋɩtãan b sẽn boond tɩ “wag-kʋdrã” ne a tʋʋmã fãa.—Vẽn. 12:9; 1 Zã 3:8.

2. Bõe la a Zeova maan n keng a Nowe raoodo?

² D gom a Zeova sẽn keng a Nowe raood to-to wã yelle. Wakat kãng tɩ dũniyã ra pida ne neb sẽn nong nen-kɛglem la yoobo. Yaa a Nowe ne a zakã rãmb bal n da tũud a Zeova. Woto ra tõe n komsa a Nowe raood zãnga. (Sɩng. 6:4, 5, 11;  Zʋʋd 6) La a Zeova sõnga a Nowe t’a paam raood n kell n tũ-a, la a wɩng ne neer maanego. (Sɩng. 6:9) A togsa a Nowe t’a na n wa sãama nin-wẽnsã, la a yeel-a a sẽn na n maan bũmb ning tɩ yẽ ne a zakã rãmb paam n põse. (Sɩng. 6:13-18) A Zeova gom-kãensã kɩtame t’a Nowe bãng vẽeneg t’a yaa Wẽnnaam sẽn kengd nebã raoodo.

3. Bõe la a Zeova maan n keng a Zozuwe raoodo? (Ges-y sõsgã sɩngrẽ fotã.)

³ A Zeova kenga a Zozuwe me raoodo. A ra kõo a Zozuwe tʋʋmd sẽn pa nana. Yẽ n da segd n lʋɩ nin-buiidã taoor tɩ b tɩ zab n deeg kãabg tẽngã. Tẽngã rãmb yaool n da mii zabr sõma. A Zeova ra miime tɩ woto tõe n kẽesa a Zozuwe rabeem. Rẽ n so t’a yeel a Moyiiz t’a keng a Zozuwe pɛlga. A yeel-a a Moyiiz yaa: ‘Wilg a Zozuwe bũmb nins yẽnda sẽn tog n maanã, la f kɩt t’a paam pãng la raoodo. Bala, yaa yẽnda n na n tall nebã n dʋʋg Zʋrdẽ kʋɩlgã n kɩt tɩ b tɩ soog tẽng ning fo sẽn na n yãndã.’ (Tõo. 3:28) Rẽ poore, a Zeova meng goma ne a Zozuwe, n yeel-a yaa: “Mam ka yeel foom tɩ f keng f meng n paam daood la? Da zoe rabeem ye, da yɛɛs ye. Bala, Sẽn-Ka-Saab sẽn yaa fo Wẽnnaamã na n zĩnda ne foom zĩig ninga fãa fo sẽn na n kẽnge.” (Zoz. 1:1, 9) Ad yaa goam sẽn sɩd kengd raoodo!

4, 5. a) Bõe la a Zeova maan n keng a nin-buiidã raood pĩnd wẽndẽ wã? b) Bõe la a Zeova maan n keng a Biigã raoodo?

⁴ A Zeova ra mi n taasa a nin-buiidã gill me koeese, n na n keng b raoodo. Wala makre, a Zeova ra miime t’a nin-buiidã sã n wa tɩ be yembd Babilond tẽngã, b na n datame tɩ b keng b raoodo. Rẽ n so t’a kɩt t’a no-rɛɛsã pĩnd n yeel yaa: “Da zoe rabeem ye, bala, mam bee ne foom. Da maan yɩɩr ye, bala, mam yaa fo Wẽnnaam. Mam kõta foom pãnga, la m na n wa sõnga foom, mam na n tebenda foom ne m nug-rɩtg sẽn tõogdã.” (Eza. 41:10) A Zeova ra kengda pipi kiris-nebã me raoodo. Rũndã-rũndã me, a kengda tõnd raoodo.—Karm-y 2 Korẽnt-rãmb 1:3, 4.

⁵ A Zeova kenga a Biig a Zeezi me raoodo. A lisgã sasa, a wʋma koɛɛg sẽn zĩnd saasẽ n yeel yaa: “Ada yaa mam Bi-ribl-nongr sẽn ta mam yam zãnga.” (Mat. 3:17) Tags-y n ges-y gom-kãensã sẽn keng a Zeezi pɛlg to-to, t’a tõog n maan a sẽn da tog n maan tẽngã zugã.

6. Wãn to la a Zeezi yel-bũnd ning pʋgẽ a sẽn gom talã-rãmb yellã kengd tõnd raoodo?

⁶ A Zeezi rɩka a Ba wã togs-n-taare, n da kengd nebã raoodo. A yel-bũnd ning pʋgẽ a sẽn gom talã-rãmb yellã wilgda rẽ. Yel-bũndã pʋgẽ, a yeelame tɩ zu-soabã pẽga tʋm-tʋmdb nins sẽn maan sɩd ne-a wã ned kam fãa n yeel-a yaa: “Yaa sõama, tʋmtʋmd sõng sẽn maand sɩda! Fo maana sɩd ne bũmb bilfu, la mam na n kɩtame tɩ fo ges bũmb wʋsg yelle. Wa n paam pʋɩɩr ne f zu-soabã sũ-noogo.” (Mat. 25:21, 23) Hakɩɩka, gom-kãensã kenga a karen-biisã raoodo, tɩ b mao ne b sũy fãa n kell n maan sɩd ne a Zeova.

7. Bõe la a Zeezi maan n keng a karen-biisã raoodo, la sẽn yɩɩd fãa a Pɩyɛɛre?

⁷ A Zeezi karen-biisã ra nong n wẽeda no-koɛɛm ne taaba, n dat n bãng sẽn yaa-a kãseng bãmb sʋkã. La a Zeezi maana sũ-mar ne-ba, n maag a yĩng n sagl-b tɩ b sik b mens n tʋm n sõng b taabã la b ra bao naam ye. (Luk 22:24-26) Naoor wʋsgo, a Pɩyɛɛr kongame, hal t’a Zeezi sũur sãam ne-a. (Mat.  16:21-23; 26:31-35, 75) La a Zeezi pa yeel t’a Pɩyɛɛr kõn le yɩ yẽ tʋm-tʋmd ye. A pʋd n kenga a raoodo, la a yeel-a t’a keng a taabã raoodo.—Zã 21:16.

8. Bõe la a Ezekɩyaas maan n keng tãb-biisã nanambsã la nin-buiidã raoodo?

⁸ Nand t’a Zeezi wa tẽngã zug n kõ mak-sõng neb a taabã raood kengr wɛɛngẽ menga, neb nins sẽn da tũud a Zeova wã ra miime tɩ segdame tɩ b kengd b taabã raoodo. Wala makre, a Ezekɩyaas. Asiiri nebã sẽn wa n dat n zab ne Zida nebã, a tigma tãb-biisã nanambsã la nin-buiidã, n gom n keng b raoodo. Sɩd me, kʋʋngã sẽn wʋm “a Ezekɩyaas goamã, b paama raoodo.”—Karm-y 2 Kibay 32:6-8.

9. Bõe la Zoob sebrã wilgd tõnd d taabã raood kengr wɛɛngẽ?

⁹ A Zoob me kõo mak-sõng neb a taabã raood kengr wɛɛngẽ. Yẽ mengã ra namsdame, n dat raood kengre. La bũmb la a yeel rap a tãabã sẽn da wa n na n bels-a wã, n na n wilg-b b sẽn tõe n keng ned raood to-to. A yeel-b lame tɩ sã n da yaa bãmb n namsde, tɩ yẽ na n bels-ba, a ‘rag n na n gomame n paas-b raoodo, la a noor dag na n yiisa belsg goam b yĩnga.’ (Zoob 16:1-5) A wa n paama belsg a Eliyu nengẽ, la a Zeova meng nengẽ.—Zoob 33:24, 25; 36:1, 11; 42:7, 10.

10, 11. a) Bõe yĩng t’a Zɛfte bi-puglã ra rat raood kengre? b) Rũndã-rũndã, ãnd dãmb me n dat raood kengr a woto?

¹⁰ A Zɛfte bi-puglã me ra rata raood kengre. A Zɛfte sẽn wa n na n tɩ zab ne Amo nebã, a pʋlma a Zeova t’a sã n sõng-a t’a tõog zabrã, a sã n wa lebg n watẽ, a zakã ned ning sẽn na n yi pipi n seg-a wã, a na n dɩka nin-kãng n kõ a Zeova, t’a tɩ tʋmd sɛk-roogẽ wã. A Zɛfte rãmb sɩd tõoga zabrã. La a sẽn wa n lebgdẽ wã, a bi-puglã sẽn yaa a bi-yendã n yɩ pipi n yi n seg-a. Sãama a Zɛfte sũurã hal wʋsgo. La baa ne rẽ, a pidsa a pʋlengã, n kɩt t’a bi-yendã kẽng sɛk-roogẽ wã Silo, n tɩ tʋm a yõor tɛka.—Bʋ. 11:30-35.

¹¹ Yaa sɩd tɩ pa yɩ nana ne a Zɛfte, la a biigã n yɩɩde. Baasgo, a sakame n na n pids a ba wã pʋlengã. (Bʋ. 11:36, 37) Dẽnd a ra pa na n tol n kẽ kãadem, tɩ b sokd rogem ye. A ba wã yʋʋr na n kell n menemame. Ad a sɩd da rata raood kengr la belsgo! Biiblã wilgame tɩ yʋʋmd fãa, Israyɛll kom-pugli wã ra kẽnda a Zɛfte bi-puglã nengẽ rasem a naase, n tɩ keng a raood la b pẽg-a, hal tɩ ra lebg minungu. (Bʋ. 11:39, 40, MN) A Zɛfte bi-puglã kibar kɩtame tɩ d tagsd d tẽed-n-taas nins sẽn pa kẽ kãadem, n yãk yam n kẽesd b sẽkã wʋsg Zu-soabã tʋʋm pʋgẽ wã yelle. Yɩta sõma tɩ d tẽegd n kengd b raoodo, la d pẽgd-ba.—1 Kor. 7:32-35.

12, 13. Bõe la a Pɩyɛɛr maan n ‘paas a ba-biisã raoodo’?

¹² A Zeezi kũumã ket tɩ beoogã, a kenga a Pɩyɛɛr raoodo. Baraar yʋngã, a yeel-a lame yaa: “Sɩmo! Sɩmo a Sʋtãan kosame n na n yelg yãmb wa b sẽn yelgd koodo. La mam pʋʋsa fo yĩnga, tɩ f tẽebã ra wa paoog ye. La fo sã n lebg n wa mam nengẽ, bɩ f paas f ba-biisã raoodo.”—Luk 22:31, 32.

¹³ A Pɩyɛɛr wa n sɩd yɩɩ wa ra-luk pipi kiris-nebã tigingã pʋgẽ. (Gal. 2:9) Wala makre, a sẽn maan bũmb ning Pãntekotã daarã, la baa rẽ poorã kenga  a tẽed-n-taasã raood wʋsgo. A kell n tũu a Zeova yʋʋm wʋsgo. A wa n gʋlsa a tẽed-n-taas n yeel-b yaa: ‘Mam gʋlsda seb-bi-kãngã n na n tʋm yãmba, la m sagl-yã, la m wilg-y tɩ yãmb sẽn be bark ning pʋgã n ya Wẽnnaam bark meng-menga.’ (1 Pɩy. 5:12) Lɛta nins a sẽn gʋls n tool kiris-nebã kenga b raood hal sõma. La ket n kengda tõnd raood baa rũndã-rũndã, sẽn yɩɩd fãa, d sẽn gũud Wẽnnaam pʋlemsã pidsgã.—2 Pɩy. 3:13.

14, 15. Biiblã sɛb nins tʋm-tʋmd a Zã sẽn gʋlsã pʋgẽ, bõe la a yeel tɩ kengd kiris-nebã raood hal ne rũndã?

¹⁴ Tʋm-tʋmd a Zã me yɩɩ wa ra-luk pipi kiris-nebã tigingã pʋgẽ. A evãnzillã pʋgẽ, a sẽn gomd a Zeezi tʋʋm-tʋmdɩ wã la a manesmã yell to-to wã kengda kiris-nebã raood hal ne rũndã. Wala makre, yaa yẽ evãnzillã pʋgẽ bal la b togs t’a Zeezi yeelame tɩ yaa nonglmã n na n yɩ bãnd sẽn sõngd tɩ b bãng kiris-neb hakɩɩkã n bake.—Karm-y Zã 13:34, 35.

¹⁵ Lɛta-rãmb a tãabã a sẽn tool pipi kiris-nebã sõngdame me tɩ d bãng bũmb a taab tũudum hakɩɩkã wɛɛngẽ. D kongr ning sã n wa kɩt tɩ d pa le tar raoodo, d sã n karem a Zã sẽn yeel t’a “Zeezi zɩɩmã pekda tõnd yel-wẽnã fãa n yiisã,” pa kengd d pɛlg sɩda? (1 Zã 1:7) La baa d sũurã sã n ket n ningd-d taale, d sã n karem a sẽn yeel tɩ “Wẽnnaam yɩɩda tõnd sũyã,” d pa paamd belsgo, hal tɩ d sũurã pid ne Wẽnnaam bark pʋʋsg sɩda? (1 Zã 3:20) Biiblã gʋlsdb sʋka, a Zã bal n tolg n yeel tɩ: “Wẽnnaam yaa nonglem.” (1 Zã 4:8, 16) A lɛtr a yiib-n-soabã ne a tãab-n-soabã pʋsẽ, a pẽga kiris-neb nins sẽn modgd n “kẽnd sɩdã pʋgẽ” wã.—2 Zã 4; 3 Zã 3, 4.

16, 17. Bõe la tʋm-tʋmd a Poll maan n keng pipi kiris-nebã raoodo?

¹⁶ Pipi kiris-nebã wakate, wõnda yaa  tʋm-tʋmd a Poll n wɩng ne a taabã raood kengr n tɩ yɩɩda. A Zeezi kũumã poore, tʋm-tʋmdbã fãa la bal kell n paa Zerizalɛm n kaoos bilfu. Yaa be la kiris-nebã taoor lʋɩtb sull ra be. (Tʋʋ. 8:14; 15:2) Zide kiris-nebã ra taasda nebã Kirist koe-noogã, la ra yaa neb sẽn da zoe n tẽed Wẽnnaam sɩd-sɩdã, b sẽn da sakd zʋɩf-rãmbã tũudmã yĩnga. La vʋʋsem sõngã kɩtame t’a Poll tɩ moon koɛɛgã gɛrk-rãmba, Rom neba, la bu-zẽms a taab sẽn da pʋʋsd wẽnnaam-dãmb ka tɛka.—Gal. 2:7-9; 1 Tɩm. 2:7.

¹⁷ A Poll gilga zĩ-zãrsẽ, n tɩ moon bu-zẽmsã koe-noogã, la a lugl tigimsi. A gilg n taa b sẽn boond rũndã-rũndã tɩ Tirki wã, la hal baa Gɛrɛs la Itali. Sẽn sak n lebg-b kiris-neb wakat kãngã namsa wʋsg b “tẽngã rãmb” nugẽ, n da rat raood kengr sõma. (1 Tes. 2:14) Yʋʋmd 50 wã sẽnese, a Poll gʋlsa lɛtr sẽn kengd raood n tool Tesalonik tigingã b sẽn da lugl paalmã. Lɛtrã pʋgẽ, a yeelame: “Tõnd pʋʋsda Wẽnnaam bark yãmb yĩng n ka basdẽ ye, la tõnd pʋta yãmb yell d pʋʋsg pʋgẽ. Tõnd tẽegda yãmb tẽebã tʋʋmde, la yãmb nonglmã tʋʋmde, la y tẽeb ne tõnd Zu-soab a Zeezi Kirisã tẽeb-pidsg gũudum sẽn ka vigsdã yelle.” (1 Tes. 1:2, 3) A sagl-b lame me tɩ b kengd taab raoodo. Ad a sẽn yeel-bã: “Paas-y taab raoodo, la y bɩɩs taab tẽeb wa y sẽn zoe n maandẽ wã.”—1 Tes. 5:11.

18. Bõe la pipi kiris-nebã taoor lʋɩtb sullã maan n keng a Filip raoodo?

¹⁸ Pipi kiris-nebã taoor lʋɩtb sullã ra kengda tigimsã yel-gɛtbã la b tẽed-n-taasã fãa raoodo. Wala makre, a Filip sẽn wa n tɩ moond Kirist koe-noogã Samari wã, kiris-nebã taoor lʋɩtb sullã maana bũmb n wilg tɩ b teend-a lame. B tʋma b neb a yiib tɩ b tɩ pʋʋs Samari kiris-nebã yĩnga, tɩ bãmb me paam vʋʋsem sõngã. Yɩɩ a Pɩyɛɛr ne a Zã. (Tʋʋ. 8:5, 14-17) Yaa vẽeneg tɩ woto kenga a Filip ne Samari kiris-neb a taabã raood hal sõma!

19. Kiris-nebã sẽn deeg b taoor lʋɩtbã sull lɛtrã n karmã, b manesem yɩɩ wãna?

¹⁹ Wakat n wa n zĩnd tɩ ra yaa tɩlɛ tɩ kiris-nebã taoor lʋɩtb sullã welg bãongã yelle. B ra tog n wilga sã n yaa tɩlɛ ne bu-zẽms nins sẽn lebg kiris-nebã tɩ b kẽ bãongo, wa a Moyiiz tõogã sẽn da yeel zʋɩf-rãmbã. (Tʋʋ. 15:1, 2) B pʋʋs n kosa vʋʋsem sõngã sõngre, la b vaees Gʋlsg sõamyã, tɩ rẽ sõng-b tɩ b rɩk no-sɩɩr n wilg tɩ bãongã pa le yaa tɩlɛ ye. Rẽ poore, b gʋlsa lɛta n wilg b no-sɩɩrã, la b yãk saam-biisi, n tʋm-b tɩ b tɩ kɩs tigimsã. Kiris-nebã sẽn deeg lɛtrã n karmã, “b fãa sũyã yɩɩ noogo, b sẽn paas bãmb raoodã yĩnga.”—Tʋʋ. 15:27-32.

20. a) Bõe la siglgã taoor lʋɩtb sull maanda, n kengd b tẽed-n-taasã sẽn be dũniyã gill zugã raoodo? b) Bõe yell la d na n gom sõsg ning sẽn pʋgdã pʋgẽ?

²⁰ Rũndã-rũndã me, kiris-nebã taoor lʋɩtb sullã kengda Betɛllẽ tʋm-tʋmdbã, misioneer-dãmbã, zall so-pakdbã la b tẽed-n-taasã sẽn be dũniyã gill zugã fãa raoodo. Wa pipi kiris-nebã, tõnd me sũur nooma d sẽn paamd raood kengr a woto wã. Sẽn paase, yʋʋmd 2015 wã, siglgã taoor lʋɩtb sull yiisa Lebg n wa a Zeova nengẽ sebrã. Yaa sebr sẽn keng neb wʋsg raood dũniyã gill zugu. La yaa sẽn lʋɩt-b taoor a Zeova tũudmã pʋgẽ wã bal n segd n dɩk a Zeova togs-n-taare, n kengd b tẽed-n-taasã raood bɩ? D na n leoka sok-kãnga sõsg ning sẽn pʋgdã pʋgẽ.