1, 2. a) Tʋm-tʋmd a Poll dãmb wakatẽ wã, bõe yĩng tɩ nebã ra nong n gomd yembd yelle, la lohorem yelle? b) A Poll wilgame tɩ d tõe n paama lohorem hakɩɩkã ãnd soab nengẽ?

PIPI kiris-nebã wakat tɩ Rom soolmã ra yaa pãn-soaada. Soolmã neb ra pẽgda b mense, n yetẽ tɩ bãmb tẽngã sẽn sigl yɛlã to-to laloa wã la bʋ-kaoorã wɛɛngẽ wã ka to, la tɩ nebã sẽn tar lohorem ningã ka mak-n-taar ye. La soolmã pãngã la a ziirã ra pa tẽng-n-biisã sabab yĩng ye. Tʋʋmã fãa la bal ra yaa yembs n tʋmde. Wakat n zĩnd meng tɩ neb a tãab zugu, nin-yendã yaa yamba. Dẽnd yaa vẽeneg tɩ nebã ra wae n gomda yembd yelle, la lohorem yelle, baa kiris-nebã.

² Tʋm-tʋmd a Poll lɛta wã pʋgẽ, a goma lohorem yell naoor wʋsgo. La ra pa sẽn na n sõng n welg dũniyã zu-loeesã ye. Yaa sɩd tɩ neb wʋsg ra maooda b sẽn tõe tɛk n dat n toeem nin-buiidã yɛlã. La sẽn da pak a Poll ne a tẽed-n-taasã yaa b mao tɩ nebã wʋm Wẽnnaam Rĩungã koe-noogã, la b bãng t’a Zeezi Kirist sẽn ki tɩ yɩ maoongã yaa bũmb yõod sẽn ka to. A Poll wilga a tẽed-n-taasã b sẽn tõe n paam lohorem hakɩɩkã a soab ning nengẽ. Lɛtr a yiib-n-soabã a sẽn tool Korẽnt kiris-nebã pʋgẽ, a yeela vẽeneg yaa: “Zusoabã yaa Sɩɩga, la Zusoabã  Sɩɩgã sẽn be zĩig ninga, lohorem bee be.”—2 Kor. 3:17, Wẽnnaam Sebre, 1983.

3, 4. a) Bõe yell la a Poll reng n gome, n yaool n na n togs goam nins sẽn be 2 Korẽnt-rãmb 3:17 wã? b) Bõe la d segd n maane, n paam lohorem ning a Zeova sẽn kõtã?

³ Lɛtrã pʋgẽ, a Poll reng n goma a Moyiiz sẽn zĩnd Sinayi tãngã zug ne a Zeova malɛkã, n wa lebg n sigd t’a nengã pɩndã. Israyɛll nebã sẽn yã rẽ wã, rabeem yõk-b lame, t’a Moyiiz kong n lud a nengã ne peende. (Yik. 34:29, 30, 33; 2 Kor. 3:7, 13) La a Poll paasame tɩ ned “sã n wẽnemd n tek yam n tẽ ‘Zu-soabã,’ peendã pilgdame.” (2 Kor. 3:16) A gomdã võor yaa bõe?

⁴ Sõsg ning sẽn loogã pʋgẽ, d yãame tɩ yaa a Zeova sẽn yaa bũmb fãa Naandã bal n tar lohorem, n tõe n maan a sẽn dat fãa. Dẽnd d sɩd tõe n yeelame t’a Zeova sẽn beẽ lohorem bee be, la t’a vʋʋsem sõngã sẽn be zĩig ninga, lohorem bee be. La yɩl n paam lohorem-kãnga, yaa tɩlɛ tɩ d “wẽnemd n tek yam n tẽ ‘Zu-soabã,’” rat n yeel tɩ d mao n paam zood sõma ne-a. Israyɛll nebã sẽn wa n be weoogã pʋgẽ wã, b tagsg sẽn da yaa a soab ne bũmb nins a Zeova sẽn maandã ra wilgdame tɩ b pa tar tẽeb ye. Ra yaa wa peend n lud b yamã la b sũurã, tɩ lebg b mensã raab n pak-ba. B sẽn paam b mens ne yembdã bala, b basame tɩ yaa b mensã tʋlsem pidsg n pak-b n yɩɩda.—Ebre. 3:8-10.

5. a) Lohorem-bʋg la a Zeova vʋʋsem sõngã sõngd ned t’a paame? b) Bõe yĩng tɩ d miẽ tɩ ned tõe n bee bãens roog wall yembdo, n ket n tar lohorem ning a Zeova sẽn kõtã? d) Sogs-bʋs la d na n leoke?

⁵ La lohorem ning a Zeova sẽn kõt ne a vʋʋsem sõngã maasmã pa wa ned sẽn na n be yembdo, n wa paam tɩ b yiis-a wã bal ye. A Zeova sẽn kõt lohorem ningã yɩɩda rẽ hal zĩig sẽn zãre. Yaa bũmb ninsaal sẽn pa tõe n paam ne a meng pãnga. Sɩd me, vʋʋsem sõngã sõngdame tɩ d paam d mens ne yel-wẽnã la kũumã yembdo, la d paam d mens ne minim-wẽns la tũudum sẽn pa sɩda. (Rom. 6:23; 8:2) Ad yaa lohorem tɛkẽ! Baa ned sẽn be bãens roog wall sẽn be yembd tõe n paama lohorem a woto. (Sɩng. 39:20-23) Saam-biig a Eric Frost kibarã ne saam-biig a Horst Henschel kibarã wilgda rẽ. B yiibã fãa zĩnda bãens roog yʋʋm wʋsgo, b tũudmã yĩnga. Y tõe n paama b kibayã JW Library aplikasiyõ wã pʋgẽ n kelge. (Ges-y INTERVIEWS ET TEMOIGNAGES > L’ENDURANCE DANS LES EPREUVES.) La wãn to la d tõe n wilg tɩ d sũur nooma ne lohorem ning d sẽn tarã? Wãn to la d tõe n tũnug ne segb nins d lohormã sẽn kɩt tɩ d tarẽ wã, n maand sẽn yaa neere? D na n leoka sogs-kãensã.

6. Bõe n wilgd tɩ Israyɛll nebã sũur da pa noom ne lohorem ning a Zeova sẽn kõ-bã?

⁶ Ned sã n kõ tõnd kũuni, d pʋʋsd-a-la barka, n wilg tɩ d sũur nooma ne-a. A Zeova sẽn yiis Israyɛll nebã Ezipt yembdã pʋgẽ tɩ b paam b mensã, b pa wilg tɩ b sũur nooma ne-a ye. Kiis a wãn poor bala, b yamã ra bee rɩbd nins b sẽn da rɩt Eziptã, tɩ b ra yẽgemd mannã a Zeova sẽn kõt-bã poorẽ, n da rat meng n leb Ezipti. B ra getame tɩ zĩmã, kõnkõmbrã, pastɛkã, gãbdã, gɛba wã ne laee wã b sẽn bas Eziptã yõod yɩɩda lohorem ning a Zeova sẽn kõ-bã. Dẽnd a Zeova sũur sẽn puug ne-bã pa zaalem ye. (Sõd. 11:5, 6, 10; 14:3, 4) Woto kõta tõnd yam.

7. Wãn to la a Poll tũ saglg ning a sẽn kõ 2 Korẽnt-rãmb 6:1 wã, la wãn to la tõnd me tõe n tũ a saglgã?

⁷ Tʋm-tʋmd a Poll keooga kiris-nebã fãa, tɩ b gũus n da wa tall manesem sẽn wilgd tɩ b sũur pa noom ne lohorem ning a Zeova sẽn kõ-b ne a Biig a Zeezi Kirist maasmã ye. (Karm-y 2 Korẽnt-rãmb 6:1.) D tẽeg t’a  Poll ra geta a meng wa nimbãan-neda, a sẽn da yaa yel-wẽnã la kũumã yambã yĩnga, hal tɩ ra namsd-a wʋsgo. La a yeelame: “Bɩ d pʋʋs Wẽnnaam bark tõnd Zu-soab a Zeezi Kiris maasem yĩnga.” Bõe yĩng t’a yeel woto? Ad a sẽn yeel a tẽed-n-taasã: “Sɩɩg sẽn kõt vɩɩm a Zeezi Kiris pʋgẽ wã tõog yolsa maam ne yel-wẽnã tõogo, la ne kũum tõog yembdo.” (Rom. 7:24, 25; 8:2) Wa a Polle, d ra tol n yĩm t’a Zeova fãaga tõnd ne yel-wẽnã la kũumã yembd ye. A Zeezi maoongã maasem yĩnga, d tõe n tũu Wẽnnaam ne sũur kaset sẽn pa le ningd-d taale, hal tɩ rẽ kõt-d sũ-noog meng-menga.—Yɩɩn. 40:9.

8, 9. a) Tʋm-tʋmd a Pɩyɛɛr yeelame tɩ d gũus n da wa maan bõe ne d lohormã? b) Wãn to la ned tõe n lʋɩɩs a lohormã taoor n maan sẽn pa segde?

⁸ D pa segd n wilg bal tɩ d sũur nooma ne a Zeova, a sẽn kõ-d lohormã yĩng ye. D segd n gũusame me n da wa lʋɩɩs lohorem-kãng taoor n maan sẽn pa segd ye. Tʋm-tʋmd a Pɩyɛɛr yeelame tɩ d pa segd n sak tɩ d lohormã yɩ wẽng lilldg ye. (Karm-y 1 Pɩyɛɛr 2:16.) Woto pa tẽegd tõnd yell ning sẽn paam Israyɛll nebã, b sẽn wa n be weoogẽ wã sɩda? Yaa yell sẽn yɛgd tõnd rũndã-rũndã me. Tõe meng tɩ yaa tõnd n segd n tũ a Pɩyɛɛr saglgã n yɩɩda. A Sʋɩtãan kɩtame t’a dũniyã pid ne bũmb toor-toore, hal n maandẽ tɩ d yamã tõe n kẽ rẽ nana-nana. Wala makre, futã la mengã manegr wɛɛngẽ, rɩɩbã, reemã la yõ-noogrã wɛɛngẽ. Piblisite wã rãmb nong n yãkda neb sẽn yaa neeb tɩ b maand piblisite-rãmbã, n na n belg tõnd tɩ d ra teed sẽn pa tɩlɛ ne-do. Dẽnd d sã n pa gũusi, dũniyã tõe n wa belg-d-la nana-nana, tɩ d lʋɩɩs d lohormã taoore, n maan sẽn pa segde.

⁹ D leb n tõe n tũu a Pɩyɛɛr saglgã d yam-yãkr a taab pʋgẽ. Wala makre, d sã n wa rat n yãk yam karengã wall tʋʋmã wɛɛngẽ. Rũndã-rũndã, b pirsda kambã lekoll-dãmbẽ wã tɩ b wɩsg b mens n karem sõma, n paam n kẽng inivɛrsite-bɛdẽ. B ratame tɩ kambã tẽ tɩ b sã n karem n zãage, rẽ la b na n paam tʋʋm-sõngo, n yɩ rakã-rãmb tɩ nebã waoogd-ba. Tõe tɩ b na n togs-b-la kibay sẽn wilgd tɩ neb nins sẽn karemd inivɛrsite-bɛdẽ wã wat n paama tʋʋm-sõngo, n yɩɩd sẽn pa kẽngd-b inivɛrsite wã. Woto fãa tõe n kɩtame tɩ biig ning tags t’a sã n sɩd karem n zãage, rẽ la a wat n paam t’a vɩɩmã tall barka. La bõe la roagdbã ne b kambã pa segd n yĩmi?

10. Baa d tar sor n maand bũmbu, bõe la d pa segd n yĩmi?

¹⁰ Kẽer tõe n tagsdame tɩ sẽn mik tɩ bõn-kãensã wɛɛngẽ wã yaa ned fãa n tog n yãk a toorẽ yamã, b tara sor n na n maan b sẽn date, b sũur kasetã sã n pa ningd-b taale. Tõe tɩ b tẽra bũmb a Poll sẽn da yeel Korẽnt kiris-nebã. A ra sokame yaa: “Bõe yĩng tɩ sũur kaset sẽn ka mam dẽnd na n wa kao mam lohorem bʋʋdo?” (1 Kor. 10:29) Yaa sɩd tɩ karengã la tʋʋmã wɛɛngẽ, ned fãa tara lohorem n tõe n yãk a sẽn date. Baasgo, d pa segd n yĩm tɩ bũmb fãa pʋgẽ, d pa tar lohorem zãng-zãng n tõe maan d yam, la tɩ d yam-yãkr fãa wata ne bi-sõma wall bi-wẽns ye. Rẽ n so t’a Poll yeel yaa: “Noor beeme tɩ maan fãa, la ka bũmb fãa n be yõod ye. Noor beeme tɩ maan bũmb fãa, la ka fãa n sõngd ye.” (1 Kor. 10:23) Woto wilgdame tɩ baa d tar sor n yãkd d sẽn date, d pa segd n lʋɩɩs rẽ taoor n maan sẽn noom tõnd bal ye. D segd n tẽegame tɩ bũmb kẽer n be, n tar yõod n yɩɩd tõnd mengã raabã.

11. A Zeova sẽn sõng tõnd tɩ d paam lohormã yaa bõe yĩnga?

¹¹ A Pɩyɛɛr sẽn keoog-d tɩ d ra wa sak tɩ d lohormã yɩ wẽng maaneg lilldgã poore, a wilga bũmb a to d sẽn segd n maane. A yeelame tɩ d sẽn paam lohormã, d segd n sakame n “tʋm wa Wẽnnaam tʋmtʋmdba.” Dẽnd a Zeova sẽn sõng tõnd ne a Zeezi maasem tɩ d paam d mens ne yel-wẽnã la kũumã yembdã, yaa sẽn na yɩl tɩ d rɩk d mensã n kõ yẽ, n maan a raabã d vɩɩmã tõre.

12. Mak-sõng-bʋg la a Nowe ne a zakã rãmb kõ tõndo?

¹² D sã n kẽesd d mengã wʋsg a Zeova tũudmã tʋʋm pʋgẽ, rẽ na n sõng-d lame n tɩ yɩɩd tɩ d ra wa lʋɩɩs d lohormã taoor n pids d mengã tʋlsem, wall n bao bũmb nins dũniyã nebã sẽn baoodã ye. (Gal. 5:16) D tẽeg a Nowe ne a zakã rãmb yelle. B wakatẽ wã tɩ dũniyã ra pida ne yoob la nen-kɛglem, la b pa naag n maan wa nebã ye. Bõe n sõng-ba? Yaa b sẽn yãk yam n wɩng ne tʋʋm nins a Zeova sẽn kõ-bã. B kaa koom-koglgã, n bao rɩɩb n bĩng b mensã yĩnga, la rũmsã me yĩnga, la b moon n keoog nebã. Ad Biiblã sẽn yeele: “A Nowe maana bũmbã fãa wa sẽn zems Wẽnnaam sẽn dag n yeel yẽnda wã kɛpɩ.” (Sɩng. 6:22) Kɩtame tɩ yẽ ne a zakã rãmb paam n põs b wakatẽ dũniyã sãoongo.—Ebre. 11:7.

13. Bõe tʋʋmd la a Zeova kõ tõndo?

¹³ Bõe tʋʋmd la a Zeova kõ tõnd rũndã-rũndã? D sẽn yaa kiris-nebã, d miime tɩ tõnd me segd n tʋma tʋʋmd ning a Zeova sẽn da kõ a Zeezi wã. (Karm-y Luk 4:18, 19.) Rũndã-rũndã, a Sʋɩtãan sẽn yaa dũni-kãnga wẽnnaamã luda neb wʋsg yam, tɩ b pa mi meng tɩ b yaa ziri tũudmã ne politikã yembse, la ligdã ne teedã yembs ye. (2 Kor. 4:4) Wa a Zeezi, d paamame n tõe n moon koɛɛgã, n sõng nebã tɩ b bãng a Zeova sẽn yaa Wẽnnaam sẽn kõt lohormã, la b tũ-a. (Mat. 28:19, 20) Tʋʋmdã meng pa  nana, sẽn paase, zu-loees pa kongd ye. Zĩis kẽere, nebã pa rat n kelg koɛɛgã, tɩ sãnda meng yikd b sũur ne-do. La sẽn mik tɩ yaa a Zeova n kõ-d lohormã, yɩta sõma tɩ d ned kam fãa sok a meng yaa: ‘M pa tõe n tʋm a Rĩungã tʋʋmã n paas sɩda?’

14, 15. Bõe la a Zeova Kaset rãmb wʋsg yãk yam n maandẽ? (Ges-y sõsgã sɩngrẽ fotã.)

¹⁴ A Zeova Kaset rãmb wʋsg sẽn ne tɩ dũniyã sãoong ta n saame wã, b basa bũmb kẽer baoob sẽn na yɩl n yã sẽk n lebg so-pakdba. (1 Kor. 9:19, 23) Woto sɩd kengda raoodo! Kẽer paa b sẽn beẽ wã, tɩ sãnda yik n tɩ sõngd zĩis koe-moondb sẽn pa waoogẽ. Yʋʋm a nu wã sẽn loogã, sẽn yɩɩd neb tus 250 n lebg so-pakdba. Kɩtame tɩ so-pakdbã sõor yɩɩd milyõ la tus koabg masã. Wʋsg sẽn yãk yam n wɩngd ne a Zeova tʋʋmã woto wã sɩd yaa bõn-sõng tɛkẽ!—Yɩɩn. 110:3.

¹⁵ Bõe n sõng d tẽed-n-ta-kãensã tɩ b yãk yam-sõng a woto? D gom a Gɩyon ne a Zidit yelle. Yʋʋm 30 wã sẽn loogã, b zĩnda tẽns toor-toor n tʋm a Zeova tũudmã tʋʋma. B ket n tẽrame tɩ so-pakdbã lekoll sẽn wa n sɩng yʋʋmd 1977 wã, b ra sagenda karen-biisã n yɩlemdẽ tɩ b tɩ sõng zĩis nins koe-moondb sẽn pa waoogã. A Gɩyon yeelame tɩ kɩtame tɩ yẽ toeem tʋʋmd naoor wʋsgo, sẽn na yɩl tɩ bao-n-kõ-noorã la bũmb a taab ra wa reeg b sẽkã fãa ye. B wa n tõog n kẽnga tẽn-zẽms n na n tɩ moon koɛɛgã. B yeelame tɩ bãmb sẽn da teeg a Zeova, n pʋʋsd-a n kot sõngrã, kɩtame tɩ b tõog n zãms nebã buud-goamã la b minimdã, la b tõog me n mao ne zĩigã sẽn mi n yaa tʋʋlg wʋsgo, bɩ waood wʋsgã. B tagsg yaa wãn ne b sẽn paam n tʋm a Zeova tʋʋmã woto yʋʋm-kãensã fãa wã? Ad a Gɩyon sẽn yeele: “M da getame tɩ m paam n kẽesa m meng zãng tʋʋmd sõmblem sẽn ka to pʋgẽ. M da maneg n neeme tɩ maam ne a Zeova sɩd yaa zood menga. D ra yaa wa ba ne a biiga. M da wʋmda Zak 4:8 goamã võor sõma masã. Be, b yeelame yaa: ‘Kolg-y Wẽnnaam, la bãmb na pẽneg yãmba.’ M da kɩsa sɩd tɩ m paama bũmb ning m sẽn da sɩng n baoodẽ wã, rat n yeel tɩ tʋʋmd sẽn na n kɩt tɩ m vɩɩmã tall barka.”

16. D tẽed-n-taas wʋsg yãka yam n maan bõe?

¹⁶ D tẽed-n-taas kẽer tõe n yɩɩ so-pakdb n kaoos wa a Gɩyon ne a Zidit. Sãnda yẽ yaa yʋʋm a wãn bala. La d tẽed-n-taas wʋsg me n sakd ne yamleoog n tɩ sõng ne siglgã rot meebo. Wala makre, b sẽn wa n met d biru-kãsengã Warwik sẽn be Niuyork soolmẽ wã, na maan d tẽed-n-taas bãmb tus 27, pagb la rap n wa n sõnge. Kẽer tʋma semen a yiibu, sãnda kiis a wãna, tɩ kẽer tʋm yʋʋmd bɩ sẽn yɩɩd rẽ. B wʋsg monga b mens bũmb kẽer sẽn na yɩl n wa sõnge. B sɩd yaa mak-sõngo, bala b yãka yam n maan bũmb sẽn waoogd a Zeova sẽn yaa Wẽnnaam sẽn kõt lohormã.

17. D sã n tũnugd ne segb nins d lohormã sẽn kɩt tɩ d tarẽ wã n maand sẽn yaa neere, bõe la d na n wa paame?

¹⁷ D sũur nooma d sẽn bãng a Zeova la d tũud-a, n paamd lohorem ning a sẽn kõt sẽn tũud-b yẽ wã. Bɩ d wilgd d yam-yãkr fãa pʋgẽ tɩ d nanda lohorem ning a sẽn kõ-dã wʋsgo. D ra lʋɩɩs d lohormã taoor n maan sẽn pa segd ye. D pʋd n tũnug ne segb nins rẽ sẽn kɩt tɩ d tarẽ wã, n tʋm a Zeova tʋʋmã ne d pãng fãa. Rẽ, d tõe n basa d yam t’a sẽn pʋlem bũmb ning Rom-dãmb 8:21 wã sã n wa pidsi, d na n paama bark ka tɛka. B yeela be tɩ bõn-naandsã “na n paama yolsg ne yembdo, la sãoongã, n paam pʋɩɩr ne Wẽnnaam kambã lohorem sẽn be ziirã.”