1. Biiblã pʋgẽ, b sã n gomd kiblg yelle, rat n yeelame tɩ bõe?

B SÃ n gomd “kiblg” yelle, bõe n wat y yamẽ? Moorã Biibl pʋgẽ, b lebga gom-bil ning võor sẽn yaa “kiblgã” tɩ “sɩbgre,” “remsgo,” wall “zãmsgo.” Biiblã wilgdame tɩ b sã n kibl neda, yaa a neer yĩnga. Sẽn paase, b sã n wa gomd kiblg yelle, b mi n goma bãngr yelle, yam, nonglem la vɩɩm me yelle. (Yel. 1:2-7; 4:11-13) Woto fãa wilgdame tɩ Wẽnnaam sẽn kibind tõndã yaa a sẽn nong-do, la a rat tɩ d wa paam vɩɩm sẽn kõn sa wã. (Ebre. 12:6) Yaa sɩd tɩ wakat ninga, a Zeova kiblgã mi n naaga ne sɩbgre. La a zɩ n sɩbg ned n na n maan-a wẽnga, wall n loog nug ye. Sɩd me, b sã n kibl neda, sẽn tɩ yɩɩd fãa, yaa sẽn na yɩl n zãms-a bũmbu. Yaa wa biig wubri.

2, 3. Bõe yĩng tɩ d yetẽ tɩ kiblg tõe n naaga ne zãmsg la sɩbgre? (Ges-y fotã sẽn be yĩngrã.)

² D rɩk makre. Bi-ribl yʋʋr sẽn boond t’a Zoani reemda ne ball b roogã pʋgẽ, t’a ma yeel-a yaa: “Zoani, fo meng miime tɩ f pa segd n deem ne ball roogã pʋgẽ ye! F tõe n wa sãama bũmbu.” La a pa kelg a ma wã goam ye. A kell n deema ne ballã, hal tɩ wa wẽ rʋk sẽn tar n ningd fɩlɛɛr tɩ wãage. Wãn  to la a ma wã na n kibl-a? A na n tẽeg-a-la bũmb ning sẽn kɩt t’a sẽn maanã pa sõma wã, la a sõng-a t’a bãng t’a sã n sakd a roagdbã noore, yaa a neer yĩnga. A na n wilg-a lame me tɩ yaa tɩlɛ tɩ bãmb gãneg noya, la tɩ pa noy tũub sẽn yaa toog wʋsg ye. Sẽn na yɩl t’a Zoani rɩk yam, tõe t’a na n sɩbg-a lame me. Wala makre, a tõe n deega ballã rasem a wãna. Tõe n sõng-a lame t’a tẽeg t’a sã n kɩɩs a roagdbã, pa na n pa zaalem woto ye.

³ Tõnd sẽn yaa Kirist karen-biisã, d yaa Wẽnnaam zakã neba. (1 Tɩm. 3:15) Rẽ n so t’a Zeova tar sor n na n wilg-d sõma ne wẽng n bake, tɩ d sã n kɩɩs noy nins a sẽn gãnegã me bɩ a tõe n kibl-d ne nonglem. Sẽn paase, d sã n kɩɩs tɩ wa ne zu-loeese, rẽ me yaa kiblgu, bala na n sõng-d lame tɩ d tẽeg tɩ d sã n sakd d saasẽ Ba wã, yaa d neer yĩnga. (Gal. 6:7) Wẽnnaam nonga tõnd hal wʋsgo, n pa rat tɩ d wa namsdẽ ye.—1 Pɩy. 5:6, 7.

4. a) A Zeova ratame tɩ d sõng nebã ne Biiblã zãmsg maasem tɩ b bãng bõe? b) Sogs-bʋs la d na n leok sõs-kãnga pʋgẽ?

⁴ D sã n tikd Biiblã sẽn yetã n kibind d biig wall ned d sẽn zãmsd Biiblã, tõe n sõng-a lame t’a wa lebg Kirist karen-biiga. Yaa Wẽnnaam Gomdã la d tar n zãmsd d kambã la neb a taabã, n na n sõng-b tɩ b bãng sẽn yaa tɩrga, la b bãng ‘bũmb nins fãa a Zeezi sẽn yeel tõnd tɩ d maanã,’ la b sak n tũ. (2 Tɩmote 3:16; Matye 28:19, 20) A Zeova ratame tɩ b paam zãmsg a woto, n wa paam minim n tõe sõng neb a taab tɩ b lebg Kirist karen-biisi. (Karm-y Tit 2:11-14.) D na n leoka sõsg a tãab masã. 1) Bõe n wilgd t’a Zeova sã n kibl-du, yaa a sẽn nong-dã yĩnga? 2) Yam-bʋg la d tõe n dɩk neb nins a Zeova sẽn kibl pĩnd wẽndẽ wã kibay pʋgẽ? La 3) Wãn to la d tõe n dɩk a Zeova ne a Biigã togs-n-taare, a sẽn kibind tõnd to-to wã wɛɛngẽ?

5. Bõe yĩng tɩ d yetẽ t’a Zeova sẽn kibind tõndã wilgdame t’a nong-d lame?

⁵ A Zeova sẽn nong-dã yĩnga, a remsda tõndo, n zãmsd tõnd bũmb wʋsgo, la a sõngd tõnd tɩ d paamd minim n paasdẽ. Yaa sẽn na yɩl tɩ d kell n pa a nonglmã pʋgẽ, la d kell n pa vɩɩmã sor zugu. (1 Zã 4:16) A Zeova zɩ n maan bũmb n na n paoog tõndo, wall sẽn na yɩl tɩ d tags tɩ d ka võor ye. (Yel. 12:18) A pʋd n waoogda tõndo, n get d zʋg-sõma wã n yɩɩda, la a sakdẽ tɩ d tõe n yãk d toorẽ yam. Yaa ne Biiblã bɩ siglgã sɛb wall d roagdbã bɩ kãsem-dãmbã maasem la d paam kiblgu, d neeme tɩ yaa kaset t’a Zeova nong-d-la hal wʋsg bɩ? D tõe n wa maana bũmb ning n pa bãng tɩ yaa wẽnga, tɩ kãsem-dãmbã baood n na n sõng-d ne bʋgsem la nonglem. B sã n wa maand woto, yaa a Zeova togs-n-taar la b rɩkda.—Gal. 6:1.

6. Baa b sã n deeg tʋʋm ned sẽn tar tigingã pʋgẽ n bas-a sẽn na yɩl n kibl-a, wãn to la wilgd tɩ Wẽnnaam nong-a lame?

⁶ Wakat ninga, kiblgã pa tekd sagls bal ye. Sã n yaa yel-wẽn-kãseng la ned maan-yã, b tõe n deega tʋʋm a sẽn tar tigingã pʋgẽ n bas-a. Baa b sã n wa maan woto, wilgdame tɩ Wẽnnaam ket n nonga a soaba. B sã n deeg a tʋʋmã n bas-a, tõe n sõng-a lame t’a bãng t’a segd n maneg n wɩnga ne Biiblã zãmsgo, bʋgsgo, la pʋʋsgo. Woto tõe n sõngame t’a lebg n maneg yẽ ne a Zeova zoodã. (Yɩɩn. 19:8) Tarẽ-n-tarẽ, b tõe n wa lebs-a-la a tʋʋmã. Baa b sẽn mi n kong n yiis nina tigingã pʋgẽ wã yaa kaset t’a Zeova nonga tõndo, bala, sõngdame tɩ tigingã neb a taab ra wa rɩk a togs-n-taar ye. (1 Kor. 5:6, 7, 11) Sẽn mik tɩ Wẽnnaam pa kibind ned tɩ loog nugã, tõe n sõnga b sẽn yiis-a soabã t’a bãng a yel-wẽndã wẽnem sẽn ta zĩig ningã, n tek yam n kos sugri.—Tʋʋ. 3:19.

7. A Sebna yaa ãnda, la zʋg-bʋg la a wa n tarẽ?

⁷ D na n goma neb a yiib a Zeova sẽn kibl yelle, tɩ sõng-d tɩ d bãng t’a Zeova kiblgã sɩd tara yõodo. D na n deng n goma a Sebna sẽn zĩnd rĩm a Ezekɩyaas wakatẽ wã yelle. Rẽ poore, d na n goma d tẽed-n-taag a ye yʋʋr sẽn boond t’a Graham yelle. A Sebna ra yaa balem-naaba, n “get na-yirã yelle.” Dẽnd a ra tara naam. (Eza. 22:15) La bʋko, a wa n lebga wuk-m-meng soaba, n baood ziir wʋsgo. A tol n kɩtame tɩ b tu a yaoogã pĩig zugu, la a ra zombd ‘saar-dãmb sẽn tar ziiri.’—Eza. 22:16-18.

8. Bõe la a Zeova maan n na n kibl a Sebna, la baasa wãna?

⁸ A Sebna sẽn yik n baood yʋʋrã, Wẽnnaam reega a tʋʋmdã n kõ a Eliyakim. (Eza. 22:19-21) Yɩɩ wakat ning Asiiri rĩm a Senakeriib sẽn da segend n na n wa zab ne Zerizalɛmmã. A Senakeriib wa n tʋma a tʋm-tʋmdb ne sodaas kʋʋng tɩ b na n wa bugs zʋɩf-rãmbã, n dat tɩ rĩm a Ezekɩyaas sak tɩ Asiiri nebã soog-ba. (2 Rĩm. 18:17-25) A Ezekɩyaas tʋma a Eliyakim ne neb a yiib tɩ b na n tɩ gom ne a Senakeriib tʋm-tʋmdbã. B nin-yɛng ra yaa a Sebna. La rẽ t’a lebga seb-gʋlsda. Rẽnd d tõe n yeelame t’a Sebna pa maan sũ-kẽka, la t’a sika a menga, n sak tʋʋmd ziir sẽn pa ta pĩnd soabã. Bõe la kiba-kãngã wilgd tõndo? Bɩ d gom bũmb a tãab yelle.

9-11. a) A Sebna kibarã wilgda tõnd bõe? b) Yãmb tagsg yaa wãn ne a Zeova sẽn kibl a Sebna to-to wã?

⁹ Pipi, b reega a Sebna tʋʋmdã. Tẽegda tõnd tɩ “tɩtaam n dengd taoor tɩ sãoong pʋgle,” la tɩ “wuk-m-meng n lʋɩt taoore, tɩ lʋɩɩs pʋgle.” (Yel. 16:18) D sã n tara tʋʋmd tigingã pʋgẽ, tɩ d taabã getẽ tɩ yaa zu-zẽkre, d na n mao n kell n yɩɩ sik-m-meng soab bɩ? D na n tẽegda wakat fãa tɩ minim ning d sẽn tarã, la bũmb nins fãa d sẽn tõog n maanã tũu ne a Zeova sõngr bɩ? (1 Kor. 4:7) Tʋm-tʋmd a Poll keoogda tõnd n yetẽ yaa: “Mam yeta yãmb ned kam fãa t’a ra tags tɩ yẽnda yaa tɩrg tɩ looge, n kẽes a tagsd moog ye. La bɩ ned fãa paam tagsd sẽn zemse, t’a tõe n paam sik-m-menga.”—Rom. 12:3.

¹⁰ Yiib-n-soaba, a Zeova sẽn tolg n keoog a Sebna to-to wã wilgdame t’a ra kɩsa sɩd t’a tõe n toeemame. (Yel. 3:11, 12) B sã n deeg tigingã tʋʋm n bas neda, a tõe n dɩka yam a Sebna kibarã pʋgẽ. Pa segd t’a maan sũ-kẽka, n lebg sũ-to-ned ye. Yɩta sõma t’a ket n wɩngd ne  a Zeova tũubã wa a sẽn tõe, n ning a yamẽ tɩ kiblgã wilgdame t’a Zeova nong-a lame. D tẽeg tɩ d sã n kell n yɩ sik-m-meng soaba, d saasẽ Ba wã na n wa keo-d lame. (Karm-y 1 Pɩyɛɛr 5:6, 7.) D sã n sikd d menga, n yaa wa yagd sẽn sakd nombo, a Zeova na n sõng-d-la ne nonglem tɩ d rems d sẽn tog n demsã fãa.

¹¹ Tãab-n-soaba, roagdbã ne kãsem-dãmbã tõe n dɩka yam a Zeova sẽn kibl a Sebna to-to wã pʋgẽ. A Zeova sã n kibl neda, yaa yel-wẽndã la a kisa, pa sẽn maan-a yel-wẽndã ye. Sã n wa yaa tɩlɛ tɩ roagd me kibl a biiga, yɩta sõma t’a rɩk a Zeova togs-n-taare, n zʋʋg biigã kongrã n ges sẽn yaa sõma a nengẽ wã. Kãsem-soab me sã n wa na n kibl a tẽed-n-taaga, a segd n dɩka a Zeova togs-n-taar woto.—Zʋʋd 22, 23.

12-14. a) Kẽer manesem yaa wãn ne a Zeova kiblgã? b) Wãn to la Wẽnnaam Gomdã sõng saam-biig a ye t’a rems a tagsgo, la baasa wãna?

¹² Bʋko, b sã n kibl nina, a basdame tɩ rẽ sãam a sũuri, hal n kɩt t’a zãag a meng ne a Zeova la a nin-buiidã. (Ebre. 3:12, 13) La rat n yeelame tɩ d pa le tõe n sõng-a bɩ? Ayo. A Graham kibarã wilgda rẽ. B ra yiis-a-la tigingã pʋgẽ, n wa lebs n deeg-a. La rẽ zugẽ, a wa n basa tigissã kẽnd la koɛɛgã moonego. Kãsem-soab a ye n mao n yõg zood ne-a, t’a wa kos-a t’a zãms-a Biiblã.

¹³ Ad kãsem-soabã sẽn yeele: “A Graham zu-loɛɛgã ra yaa wuk-m-mengã. A sũur da pa noom ne kãsem-dãmb nins sẽn kao bʋʋdã, n yiis-a tigingã pʋgẽ wã ye. Zãmsg a wãnã sẽn pʋglã, d goma wuk-m-mengã la yɛl nins a sẽn wat ne wã yelle. Wẽnnaam Gomdã sẽn yaa wa nin-gɛtgã sõnga a Graham t’a fees a menga, n wa bãng a sẽn sɩd yaa ned ning buudã. Ra pa be yamleoog ye! A sẽn maan rẽ poorã seka pẽgre! A sak n deegame tɩ wuk-m-mengã ra yaa wa ‘sug-raoog’ sẽn be yẽ nifẽ wã, n kɩt t’a ra pa le ne baa fʋɩ, la tɩ yellã yaa yẽ sẽn da tagsd tɩ kãsem-dãmbã sẽn maanã pa zemsã. Tao-tao bala, a sɩnga toeengo. A leb n sɩnga tigissã kẽnd n pa vaandẽ, n zãmsd Wẽnnaam Gomdã sõma, la a minim n pʋʋsd daar fãa. A sakame me n na n le sõngd a zakã rãmb a Zeova tũudmã pʋgẽ, hal tɩ yɩ a pagã ne a kambã noogo.”—Luk 6:41, 42; Zak 1:23-25.

¹⁴ Kãsem-soabã paasame yaa: “Daar a ye, a Graham yeela maam bũmb sẽn yɩ-m noog wʋsgo. Ad a sẽn yeelã: ‘M bãnga a Zeova hal sẽn kaoose, n yɩ so-pakd menga. La yaa masã la m tõe n yeel ne pʋ-peelem tɩ m nonga a Zeova.’ Pa kaoos la b yãk-a t’a na n sõngd n gilgd ne mikoro wã tigissã sasa ye. A sũur da nooma wʋsg ne tʋʋmdã. A kibarã sõnga maam tɩ m bãng tɩ ned sã n sik a meng Wẽnnaam taoor n sak tɩ b kibl-a, pa na n kaoos la a paam bark ka tɛk ye.”

15. Bõe la d segd n maane, tɩ d sã n wa kibl ned bɩ a sak nana-nana?

¹⁵ D sã n dat n yɩ karen-saamb sẽn mi neb zãmsgo, yaa tɩlɛ tɩ tõnd mengã zãmsd Biiblã sõma. (1 Tɩm. 4:15, 16) Woto me, neb nins a Zeova sẽn kõ sor tɩ b tõe n kibl b taabã segd n sikda b mens n sakdẽ t’a Zeova wilgd-b sore. Rẽ na n kɩtame tɩ b taabã waoogd-ba, tɩ b sã n sagl ned bɩ a sak nana-nana. Bɩ d gom a Zeezi mak-sõngã yelle.

16. Yam-bʋg la d tõe n dɩk a Zeezi nengẽ, tɩ sõng-d tɩ d bãng d sẽn tõe n zãms ned to-to wall n kibl-a tɩ yɩ sõma?

¹⁶ A Zeezi ra sakda a Ba wã wakat fãa,  baa sã n wa yaa toog wʋsgo. (Mat. 26:39) A ra yeta nebã tɩ yẽ bãngrã, a yamã la a sẽn zãmsd-b bũmb ninsã fãa yita a Ba wã nengẽ. (Zã 5:19, 30) A Zeezi sik-m-mengã la a wẽn-sakrã kɩtame tɩ sũ-tɩrs rãmbã ra wata a nengẽ, la kɩt me t’a yaa karen-saamb sẽn gomd gom-nood la sẽn kʋmd nebã nimbãanega. (Karm-y Luk 4:22.) A gom-noodã ra kẽeda neb nins sẽn da yaa wa tãn-wĩ-kaoongo, pa rẽ bɩ fɩtl laong sẽn ket n nusdẽ wã, n kengd b raoodo. (Mat. 12:20) A kell n talla sũ-mar n yɩ sũ-bʋgsem soaba, baa sã n wa yaa toogo. Wala makre, a tʋm-tʋmdbã sẽn wa n wẽed no-koeemd n dat n bãng sẽn yaa-a kãseng n yɩɩd bãmb sʋkã, a pa yik a sũur ye. A kibl-b-la ne nonglem la bʋgsem.—Mark 9:33-37; Luk 22:24-27.

17. Zʋg-sõma bʋs la kãsem-dãmbã tog n bɩɩse, n tõog n ges tigingã yell neere?

¹⁷ Kãsem-dãmbã sã n wa na n kibl neda, b segd n dɩka a Zeezi togs-n-taare. Woto, b wilgdame tɩ b sakdame tɩ Wẽnnaam ne a Biigã wilgd-b sore. Tʋm-tʋmd a Pɩyɛɛr yeelame yaa: “Rɩlg-y Wẽnnaam piisã sẽn be ne yãmbã. La ka ne modgr ye, yaa ne yamleoogo wa sẽn zems Wẽnnaam daabã. La ka paoong ratem yĩng ye, yaa ne sũur sẽn yaa sõama. La ka tɩ y soog nebã b sẽn gũnug yãmbã ne pãng ye, la yaa tɩ yãmb na yɩ mamsg wʋsg piisã yĩnga.” (1 Pɩy. 5:2-4) Kãsem-dãmbã sã n sakd Wẽnnaam ne Kirist sẽn yaa tigingã Zu-soabã ne sũ-noogo, na n nafa bãmb mengã, la naf b tẽed-n-taasã b sẽn segd n ges b yellã.—Eza. 32:1, 2, 17, 18.

18. a) Bõe la a Zeova rat tɩ roagdbã maane? b) Wãn to la a Zeova sõngd roagdbã b kambã wubr pʋgẽ?

¹⁸ La zagsã pʋsẽ yẽ? Ad a Zeova sẽn yeel zak-soben-dãmbã: “Ra maan-y bũmb sẽn yikd y kambã sũy ye. Wub-y-ba, n sagl-ba, la y keoog-b wa sẽn zems Zu-soabã raabo.” (Efɛ. 6:4) Yaa tɩlɛ bɩ? Ad Yel-bũn 19:18 sẽn yete: “Rems f biig f sẽn ket n tõe n dems-a wakate, la f ra tʋlg a kũum ye.” Yaa roagdbã la a Zeova kõ noor tɩ b kibl b kambã. B sã n ka maan dẽ, b tara taal a Zeova taoore. (1 Sãm. 3:12-14) La b sã n sik b mens n pʋʋs a Zeova n kos t’a sõng-b ne a vʋʋsem sõngã maasem, la b bao sagls a Gomdã pʋgẽ, a na n kõ-b-la yam la raood ning b sẽn datã.—Karm-y Zak 1:5.

19, 20. a) D sã n sakd a Zeova kiblgã, wata ne bark-bʋse? b) Bõe yell la d na n gom sõsg ning sẽn pʋgdã pʋgẽ?

¹⁹ D sã n sakd a Zeova kiblgã, la d rɩkd yẽ ne a Zeezi togs-n-taar d sã n wa na n kibl neda, na n waa ne bark ka tɛka. D tigimsã la d zagsã pʋsẽ, laafɩ la bãan na n zĩndame. Ned kam fãa yam na n gãee bãane, t’a neẽ t’a taabã nong-a lame, la b nand-a. Woto fãa yaa bũmb nins d sẽn na n paam beoog-daarã reng-n-lɛmbga. (Yɩɩn. 72:7) Sɩd me, d tõe n yeelame tɩ ne a Zeova kiblgã maasem, d zãmsda d sẽn tog n maanega, n tõog n vɩɩmd ne taab ne laafɩ wakat sẽn kõn sa. (Karm-y Ezayi 11:9.) D sã n tẽegd rẽ yelle, na n sõng-d lame tɩ d ne vẽeneg t’a Zeova kiblgã yaa kaset t’a sɩd nong-d lame.

²⁰ Sõsg ning sẽn pʋgdã pʋgẽ, d na n maneg n goma zakã pʋgẽ kiblgã la tigingã pʋgẽ kiblgã yelle. D leb n na n goma d sẽn tõe n kibl d meng to-to wã yelle, la d ges d sẽn tõe n maanega, n gil bũmb toolem sẽn yɩɩd kiblgã.