1. Zu-loe-bʋs la pipi kiris-nebã paam-yã?

YƲƲMD 62 ne 64 sʋka, tʋm-tʋmd a Pɩyɛɛr wa n gʋlsa lɛtr n tool kiris-neb nins sẽn “sãeeg n be Põ la Galasi la Kapadoos la Aazi ne Bitini soolem n lebg sãamb beenẽ wã.” (1 Pɩy. 1:1) Kiris-nin-kãensã sẽn da be Aazimineer soolmẽ wã ra yaa buud toɛy-toɛy neba. Ra yaa tɩlɛ tɩ b paam raood kengr la saglse, bala b ra namsd-b-la b tũudmã yĩnga, la b kãnegd-ba. Ra yaa “nams-toaag” menga. Sẽn paase, b ra bee wakat sẽn yaa wẽng wʋsgo. Sɩd me, ad a Pɩyɛɛr sẽn yeele: “Bũmb fãa sɛɛb wakat kolgame.” Ra keta yʋʋm piig bala, tɩ Zerizalɛm sãoongã ta. Bõe n na n sõng kiris-nebã fãa tɩ b tõog n mao ne zu-loeesã?—1 Pɩy. 4:4, 7, 12.

2, 3. Bõe yĩng t’a Pɩyɛɛr sagl a tẽed-n-taasã tɩ b maan taab sãando? (Ges-y fotã sẽn be yĩngrã.)

² Ad bũmb a ye a Pɩyɛɛr sẽn sagl a tẽed-n-taasã tɩ b maane: “Maan-y taab sãando.” (1 Pɩy. 4:9) Gɛrk gom-bil ning b sẽn lebg tɩ “maan sãamb sãandã” rat n yeelame tɩ “f nong sãambã, wall f maan-b neere.” La d tẽeg tɩ yaa a tẽed-n-taasã la a Pɩyɛɛr sẽn yeel tɩ b ‘maan taab sãando,’ baa b sẽn da zoe n mi taaba, la b mi n naag taab n maan bũmb kẽerã. B sã n  maand taab sãando, wãn to la na n naf-ba?

³ Ra na n maneg n paasa b zoodã ne taaba. D rɩk makr ne yãmb mengã. Y tẽra ned sẽn zoe n bool yãmb a zakẽ, hal tɩ y pa tõe n yĩm sẽn yɩ-y noog to-to wã bɩ? Tõe tɩ y tẽra yãmb me sẽn bool tigingã ned y zakẽ, la rẽ sẽn paas y zoodã to-to wã. D sã n maand d tẽed-n-taasã sãando, sõngdame tɩ d maneg n bãng-b n paase. Yɛlã sẽn da tar kengr a Pɩyɛɛr dãmb wakatẽ wã kɩtame tɩ kiris-nebã ra segd n mao tɩ b zoodã ne taab paase. D sẽn be dũniyã ‘yaoolem wakatã,’ yaa tɩlɛ tɩ tõnd me maan woto.—2 Tɩm. 3:1.

4. Sogs-bʋs la d na n leok sõs-kãnga pʋgẽ?

⁴ Segb bʋs la d paamda, n tõe n maan taab sãando? Bõe n tõe n wa kɩt tɩ d pa rat n maan d taabã sãando, la bõe n na n sõng-do? D tẽed-n-taag sã n maan-d sãando, bõe n na n sõng-d tɩ d tall manesem-sõngo?

5. Wãn to la d tõe n maan d taabã sãand tigissã zĩigẽ?

⁵ Tigissã zĩigẽ: Yaa a Zeova ne a siglgã n boond tõnd tigissẽ wã. D rat n deega neb nins fãa sẽn wat be wã neere, sẽn yɩɩd fãa sẽn nan sɩng-b tigissã waoongã. (Rom. 15:7) Yaa a Zeova n bool bãmb me. Rẽ n so tɩ d segd n deeg-b neere, n pa ges b futã wall b sẽn maneg b mens to-to wã ye. (Zak 2:1-4) Y sã n yã sãan sẽn yaa a yembre, bɩ y boola t’a wa zĩnd n yɛgl yãmba. Y sã n wilg-a tigissã na-kẽndrã, la y sõngd-a t’a baood vɛrse-rãmbã Biiblã pʋgẽ, a sũur na n yɩɩ noogo. Y sã n maand woto, wilgdame tɩ y ‘maood n maanda sãambã sãando.’—Rom. 12:13.

6. Ãnd dãmb la d segd n maan sãand n yɩɩda?

⁶ Y tõe n boola ned tɩ y rɩ wall y rɩk maasga: Pĩnd wẽndẽ, ned tõe n mi n boola a to a zakẽ tɩ b naag taab n dɩ. (Sɩng. 18:1-8; Bʋ. 13:15; Luk 24:28-30) Woto wilgdame t’a rata a soab zoodo, la a rat me tɩ laafɩ zĩnd b sʋka. Ãnd dãmb la d segd n maan sãand n yɩɩda? Yaa neb nins d sẽn wae n be ne wã, rat n yeel tɩ d tẽed-n-taasã sẽn be d tigingã pʋgẽ wã. Dũni-kãngã sãoongã sẽn tar kolgrã, tõnd ne d tẽed-n-taasã segd n teela taaba. D segd n yɩɩ zo-rãmb sẽn pa yit taab poorẽ, la sẽn baood laafɩ ne taaba. Yʋʋmd 2011 wã, siglgã taoor lʋɩtb sull toeema Gũusg Gasgã zãmsg lɛɛr Etazĩni Betɛllẽ wã. Ra sɩngda zaabr 6:45, tɩ b kɩt tɩ lebg 6:15. Bõe yĩnga? Koɛɛgã b sẽn taasã pʋgẽ, b wilgame tɩ zãmsgã sã n sa pĩnda, Betɛllã tʋm-tʋmdbã tõe n paam n mi n boola taaba, n maan taab sãando. Betɛll-dãmb a taab me maana woto. Kɩtame tɩ sẽn tʋmd-b Betɛllẽ wã zoodã ne taab maneg n paase.

7, 8. Saam-biig sã n wa d tigingã pʋgẽ n na n wɛgs sõsga, wãn to la d tõe n maan-a sãando?

⁷ Tiging a to saam-biig bɩ tigims sull yel-gɛt wall saam-biig Betɛllã sẽn tʋm sã n wa d tigingã pʋgẽ n na n wɛgs sõsga, yaa segb d sẽn paam n tõe n maan-b sãando. (Karm-y 3 Zã 5-8.) Wala makre, y tõe n bool-b lame tɩ y naag taab n dɩ wall y rɩk maasga.

⁸ Etazĩni saam-bi-poak a ye yeelame: “Na maan yʋʋma, maam ne m sɩdã paama segb n mi n deeg saam-biis ne b pagb d zakẽ wã. B mi n waame n na n wɛgs sõsga. D sã n paam n deeg-b fãa, yaa sũ-noogo. D paamd n laa ne taaba, la sẽn yɩɩd fãa, d paamda tẽeb kengre. D zɩ n maan d bãngẽ ye.”

9, 10. a) Ãnd dãmb la d tõe n mi n deeg gãag-sobendo? b) Sẽn pa tar-b ro-bɛdã me tõe n deega neb gãag-sobend bɩ? Togs-y kibare.

⁹ Y tõe n deega ned gãag-sobendo. Pĩnd wẽndẽ, ned sã n deeg sãana, a mi n baoo gãag zĩig n kõ-a. (Zoob 31:32; Fɩl. 22) Rũndã-rũndã me, d mi n maana woto. Tigims sull yel-gɛtbã sã n kaagd tigimsã, naoor wʋsgo, yaa saam-biisã n segd n ges tɩ b paam gãag zĩiga. Siglgã lekoll karen-biis wall d tẽed-n-taas nins sẽn gilgd n met siglgã rotã me mi n data gãag zĩiga. Sabab-wẽng me  sã n maane, mi n sãama d tẽed-n-taas roto. B tõe n data gãag zĩiga, hal n tãag b sẽn na n wa paam b rotã manegre. D pa segd n tags tɩ yaa sẽn tar-b ro-bɛdã bal n segd n sõng ye. Tõe tɩ bãmb zoe n sõnga neb naoor wʋsgo. Baa yãmb roogã pa bedme, rẽ yĩnga, y pa tõe n deeg nina, n kõ-a gãag zĩiga?

¹⁰ Kooredisiid saam-biig a ye tẽega bãmb sẽn da reeg siglgã lekoll karen-biis kẽer b zakẽ wã. Ad a sẽn yeele: “Sɩngrẽ wã, m da yɛɛsdame, bala d ra kẽe kãadem paalem, tɩ d roogã me ra yaa kɩdga. La d mikame tɩ karen-biisã sẽn da be ne-dã ra yaa sũ-noog meng-menga. D paam n yãa pag ne a sɩd sẽn tõe n paam sũ-noog to-to, b sã n tũud a Zeova la b baood n na n maan bũmb wʋsg a tũudmã pʋgẽ. D sẽn da nan kẽ kãadem paalmã yĩnga, naf-d lame.”

11. Bõe yĩng tɩ yaa sõma tɩ y reeg sẽn nan wa-b tigingã pʋgẽ wã sãando?

¹¹ Sẽn nan wa-b tigingã pʋgẽ wã: D tẽed-n-taag mi n yii tiging a to n wa tõnd tigingẽ wã. Wakat ning menga, yaa zak rãmb tõre. Tõe tɩ b waame n na n sõng ne koe-moonegã. Tõe me tɩ yaa so-pakdb b sẽn tʋm tõnd tigingẽ wã. Sẽn yaa a soab fãa, yaa toeeng meng-menga. B segd n minima zĩ-sãanga, tigin-paalle, la tõe meng tɩ b segd n zãmsa buud a to minimd wall b goamã. Y tõe n bool-b lame tɩ y naag taab n kok pemsem, n sõse, wall y rɩ. Woto na n sõng-b lame tɩ b paam n yõg zood ne neba, la sõng me tɩ toeengã ra yɩ toog wʋsg ne-b ye.

12. Togs-y kibar sẽn wilgd tɩ sãamb reegr pa baood tɩ d segl rɩ-bɛd ye.

¹² Sãamb reegr pa baood tɩ d segl rɩ-bɛd ye. (Karm-y Luk 10:41, 42.) Saam-biig a ye tẽega bũmb sẽn yɩ yẽ ne a pagã noogo, b sẽn wa n lebg misioneer-dãmb paalmã. Ad a sẽn yeele: “Tõnd da ket n yaa kom-bɩɩse, n nan pa mi bũmb kẽere, tɩ d sẽn zãr ne d ba-yirã me ra sãamd d sũuri. Daar a ye zaabre, sũ-sãangã ra tolg n namsda mam pagã, tɩ mam bels-a n konge. Sẽn wa n zems zaabr 7:30, ned n wẽ tõnd kʋɩlengã. D sẽn pakã, d mikame tɩ yaa paga. A ra nan zãmsda Biiblã. A zãa orãaz-rãmb a tãab n wa n na n pʋʋs misioneer-paalã b waoongo. Tõnd kɩtame t’a kẽ, la d toog koom n kõ-a. D maana te ne sokola me tɩ d yũ. Rẽ tɩ tõnd nan pa wʋmd Suwayili buud-gomdã, yẽ me pa wʋmd ãngilind ye.” Saam-biigã yeelame tɩ kell n tũ ne rẽ tɩ bãmb na n sɩng zood yõgb ne b tẽed-n-taasã, tɩ b sũ-noogã paas hal sõma.

13. Y sã n maand y taabã sãando, wãn to la nafd yãmba?

¹³ Yãmb mi n dat n maana y taabã sãando, tɩ y yamã yood bɩ? Sã n yaa rẽ, bɩ y bãng tɩ y bõndame. Bala, y sã n wa maand neb sãando, yaa sũ-noog wakate. Sõngdame me tɩ y paam zo-rãmb sẽn pa na n tol n bas-yã. Leb n yaa bũmb sẽn sõngd tɩ d ra wa getẽ tɩ nebã pa baood d zĩigẽ, tɩ sãamd d sũur ye. La bõe n tõe n wa kɩt tɩ ned pa maand a taabã sãando? D na n goma bũmb a wãn bal yelle.

14. D sã n getame tɩ d pa tar sẽk n maand d taabã sãand la d sakdẽ tɩ bãmb me maand tõnd sãando, bõe la d tõe n maane?

¹⁴ Yɩl n yã sẽk la pãnga: A Zeova Kaset rãmbã tʋʋmã waoogame, tɩ b tʋʋm sãnda me yaa tɩlɛ. Kẽer getame tɩ b pa tar sẽk n na n maand b taabã sãando, la tɩ na n yɩɩ yaams wʋsgo. Y sã n tagsda woto, yɩta sõma tɩ y toeem bũmb kẽere, n tõog n yãt sẽk n maand y taabã sãando, la y sakdẽ tɩ y taabã me maand-y sãando. Biiblã sagenda tõnd tɩ d tẽegd n maand taab sãando. (Ebre. 13:2) Y sã n maan y sẽn tõe sẽn na yɩl n yãt sẽk n maand y taabã sãando, y maana sẽn segde. Tõe tɩ na n yɩɩ tɩlɛ tɩ y bas bũmb kẽer yõod sẽn pa tolg n waoogẽ.

15. Bõe yĩng tɩ neb kẽer tagsdẽ tɩ b pa tõe n maan b taabã sãando?

 ¹⁵ Y tagsg sẽn yaa a soab y mengã zugã: Y mi n dat n maana y taabã sãando, la y tagsdẽ tɩ y pa tõe bɩ? Tõe tɩ y yaa ned sẽn pa nong goama, n tagsdẽ tɩ y sã n na n maan ned sãando, y pa na n tõog t’a sũur yɩ noog ye. Tõe me tɩ y yaa naong soaba, n tagsdẽ tɩ y pa tõe n deeg ned sõma n ta tigingã neb a taabã ye. La tẽeg-y tɩ pa zakã neerem n tar yõod ye. Sã n yaa yɩlemde, n be yamleoogo, tɩ teedã pa zũna, y sẽn deeg-a soabã sũur na n yɩɩ noogo.

16, 17. Y sã n wa na n deeg sãamba, n maand yɩɩre, bõe n tõe n sõng-yã?

¹⁶ Y sã n wa na n deeg sãamba, n maand yɩɩr bɩ y bãng tɩ y pa y yembr ye. Gãrãnd Bertayn kãsem soab a ye yeelame: “F sã n mi tɩ sãan n na n sig-fu, f pa tõe n pa maan yɩɩr baa yaa bilf ye. La yaa wa bũmb nins fãa d sẽn maand a Zeova tũudmã pʋgẽ wã. Bark la sũ-noog ning d sẽn na n paamã yɩɩda yɩɩrã hal zĩig sẽn zãre. Baa yaa kafe la m da naag sãan tɩ d zĩ n yũud la d sõsda, ra noom-m-la wʋsgo.” Tẽegd-y wakat fãa tɩ y manesmã sã n wilgd sãanã t’a yell pak-y lame, sõngdame. (Fili. 2:4) Nebã fãa la bal nong n dat n togsda b taabã b sẽn yã, la b sẽn maan b vɩɩmã pʋgẽ. Naoor wʋsgo, yaa d sã n wa be ne taab n sõsd la d tõe n paam neb kẽer kibay n wʋme. Kãsem soab a to me yeelame: “M sẽn mi n bool tigingã neb sãnda m zakẽ wã tɩ d sõsã sõngda maam tɩ m bãng-b sõma, la m wʋm b manesem kẽer võor n yɩɩd pĩndã, la m pʋd n bãng sẽn yɩ to-to tɩ b wa tũud a Zeova.” Y sã n tar manesem sẽn wilgd sãanã tɩ y tagsda a yelle, y tõe n basa y yam tɩ y fãa sũur na n yɩɩ noogo.

¹⁷ Saam-bi-poak sẽn yaa so-pakd nong n deegda siglgã lekoll karen-biis a zakẽ. A yeelame: “Sɩngrẽ wã, m da maanda yɩɩre, bala m roogã pa ro-bedre, rẽ me, roogã teed yaa te-kʋda. Lekollã karen-saamb a ye pag n yeel bũmb sẽn kɩt tɩ m bas m yam masã. A yeelame tɩ yẽ ne a sɩdã sã n wa gilgd n kaagd tigimsã, semen nins sẽn noom bãmb n yɩɩdã yaa b sẽn na n paam n sig ned sẽn tar tẽeb sõma, t’a tarmã pa waooge, t’a yaool n wɩngd ne a Zeova tũubã wa bãmba, n pa baood bɛd ye. Woto tẽegda maam gomd m ma sẽn da nong n yet tõnd d sẽn wa n yaa yãasã. A ra yetame: ‘Neb sẽn dɩt medg la b nong taab n são.’” (Yel. 15:17) Sã n yaa nonglem yĩng la d maand d taabã sãando, bɩ d bas d yam tɩ yaa rẽ n tar yõod n yɩɩda.

18, 19. D sã n maand d taabã sãando, wãn to la tõe n sõng-d tɩ d bas tags-kɛg d sẽn tar b zugu?

¹⁸ Y tagsg sẽn yaa a soab neb a taabã zugã: Ned n be yãmb tigingã pʋgẽ, tɩ bũmb kẽer a sẽn maand yikd yãmb sũur bɩ? Y sã n pa mao tɩ toeeme, y na n ket n tara tags-kɛg a soabã zugu. Nebã sẽn yaa toor-toorã tõe n kɩtame tɩ y pa nong nina manesem, n pa rat n maan-a sãand ye. Tõe me tɩ ned n da maan bũmb sẽn sãam y sũuri, tɩ yaa toog tɩ y bas taale.

¹⁹ Biiblã yetame tɩ d sã n maand d taabã sãando, tõe n sõngame tɩ zems-n-taar zĩnd d sʋka, hal baa ne neb nins sẽn yaa d bɛɛbã. (Karm-y Yel-bũn 25:21, 22.) Y sã n bool ned y zakẽ tɩ y sõse, tõe n sõnga yãmb tɩ y bas tags-kɛg y sẽn tar a soab zugu, la y tõog tɩ y zems-n-taarã paase. Tõe tɩ rẽ tɛk bɩ y ne a soabã zʋg-sõma nins sẽn kɩt t’a Zeova tak-a n wa a nin-buiidã sʋkã. (Zã 6:44) Sã n yaa nonglem yĩng la y bool ned y zakẽ, t’a soab yaool n da pa tẽeda, tõe n tũu ne rẽ tɩ zood kell n sɩnge. La bõe n na n sõng-y tɩ y bãng sã n sɩd yaa nonglem yĩnga? Tũ-y saglg ning sẽn be Filip-rãmb 2:3 wã. Be, b yetame: “Bɩ ned kam fãa paam sik-m-meng yam n tags tɩ neb a taaba yɩɩda yẽnda.” Bʋgs-y n bao-y y tẽed-n-taasã zʋg-sõma nins sẽn kɩt tɩ y tagsdẽ tɩ b yɩɩda yãmbã. Tõe tɩ yaa b tẽebã, b sũ-marã, b raoodã, wall zʋg-sõng a to. Y  sã n tags rẽ, y na n maneg n nong-b lame, tɩ lebg nana masã tɩ y maan-b sãand ne pʋ-peelem.

20. Ned sã n bool tõnd a zakẽ tɩ d sake, bõe yĩng tɩ d segd n yɩ sɩd rãmba, la wãn to la d tõe n wilg rẽ?

²⁰ Yɩɩn-gʋlsd a Davɩɩd ra soka a Zeova yaa: “Sẽn-Ka-Saabo, ãndã n na n zĩnd yãmb fu-roogã pʋga?” (Yɩɩn. 15:1) A Davɩɩd wẽneg n leokame, n sõdg zʋg-sõma a Zeova sẽn dat tɩ sẽn na n zĩnd-a yẽ fu-roogã pʋgẽ talle. Wala makre, a yeelame t’a soab “sã n maan pʋlengo, ba sã n na n yɩɩ toog ne-a, a ka lebsd a noor poorẽ ye.” (Yɩɩn. 15:4) Ned sã n bool tõnd a zakẽ tɩ d sake, d pa segd n lebg n toeem yam, sã n pa sɩd yaa yel-pakr yĩng ye. Tõe tɩ sẽn bool-a tõndã zoe n seglame n na n deeg-do. D sã n pa kẽnge, a modgrã na n yɩɩ zaalem. (Mat. 5:37) Neb kẽer me mi n sakame, n wa kuug n sak ned a to boolle, n tagsdẽ tɩ be n yaa sõma n yɩɩda. Rẽ yĩnga, woto wilgdame tɩ d nonga a soabã la d waoogd-a sɩda? Ned sã n deeg-d a zakẽ, d segd n maana sũ-noog ne bũmb ning fãa a sẽn na n kõ-dã. (Luk 10:7) Sã n mik tɩ yaa tɩlɛ tɩ d viigi, yɩta sõma tɩ d togs a soabã pĩnda. Woto, d wilgdame tɩ d nand-a lame, la d nong-a.

21. D sã n pa paoogd tẽngã neb minimdu, wãn to la na n sõng-do, b sã n wa maand-d sãando?

²¹ Yɩta sõma me tɩ d wilg tɩ d pa paoogd tẽngã nebã minimd ye. Tẽns kẽere, b sakd n deega ned sãando, baa b ra pa gũud-a. La zĩis sãnda, rẽnda f reng n togs tɩ f watame. Zĩis kẽer me, zakã soab na n deng n gesame tɩ sãanã paam rɩɩb sẽn yaa sõma, tɩ zakã rãmb rɩ b sẽn paame. La zĩis a taaba, sãanã ne zakã rãmb rɩta rɩ-yɛnga. Zĩis a taab me, b sẽn bool a soabã mi n zãa bũmb n wa. La tẽns kẽere, zakã rãmb sũur nooma wʋsgo, sãanã sã n pa nams a meng n zã bũmb n wa. Buud a taab me nengẽ, b sã n bool neda, a rengd n zãgsa vugri, wall naoor a yiibu, n yaool n wa sake. La buud a taab nengẽ, f sã n zãgse, b geta rẽ wa paoogre. Bɩ d maan d sẽn tõe fãa tɩ sẽn maand-a tõnd sãandã sũur yɩ noog ne a sẽn bool-dã.

22. Bõe yĩng tɩ yaa tɩlɛ tɩ d ‘maan taab sãando’?

²² D tõe n yeelame tɩ rũndã-rũndã, “bũmb fãa sɛɛb wakat kolgame” n yɩɩd pĩndã. (1 Pɩy. 4:7) Ka la bilfu, tõ-kãseng buud sẽn zɩ n zĩndi, la sẽn pa na n tol n le zĩnd n na n sɩnge. Yɛlã sẽn tar kengrã, yaa tɩlɛ tɩ tõnd ne d tẽed-n-taasã nong taab ne d sũur fãa. Yaa masã meng la d segd n tũ a Pɩyɛɛr saglgã n yɩɩd pĩndã. A ra yeelame: “Maan-y taab sãando.” (1 Pɩy. 4:9) Hakɩɩka, sãamb reegr segd n yɩɩ d minung masã menga, la wakat fãa yĩnga.