1. Nand tɩ biig reeg lisgu, bõe la a roagdbã segd n bao n bãnge?

SAAM-BI-POAK yʋʋr sẽn boond t’a Blossom Brandt tẽega a sẽn wa n yãk yam n dat n deeg lisgã. A yeelame: “Na maan kiisi, m da yeta m baaba ne m ma tɩ m dat n deega lisgu. B ra wae n sõsda ne maam rẽ zugu. B ra rat n bãnga m sã sɩd miime tɩ m sẽn dat n yãk yam ningã pa reem yelle. Yʋʋmd 1934 yʋʋm-sar kiuugã rasem 31 wã la m deeg lisgu. Yɩɩ bõn-kãseng m vɩɩmã pʋgẽ.” Rũndã-rũndã me, roagdbã ratame n sõng b kambã tɩ b bãng n yãkd yam sõma. Ned sã n yãk yam n na n bas tɩ kaoos t’a yaool n wa reeg lisgu, wall b yeel-a lame t’a bas tɩ kaoose, sã n mikame tɩ pa tɩlɛ, tõe n wa sãama zood ning a sẽn tar ne a Zeova wã. (Zak 4:17) La nand tɩ biig reeg lisg n lebg kiris-neda, yɩta sõma t’a roagdbã bao n bãng a sã n segl n saame, n tõe n tʋk zɩɩb ning rẽ sẽn wat ne wã.

2. a) Bõe poorẽ la tigims sull yel-gɛtb kẽer maand yɩɩre? b) Bõe yell la d na n gom sõs-kãnga pʋgẽ?

 ² Tigims sull yel-gɛtb n maand yɩɩre, bala b mi n yãa kom-bɩɩs sẽn kolg yʋʋm 20 bɩ sẽn yɩɩd rẽ bilfu, n ket n nan pa reeg lisgu, tɩ b roagdbã yaool n yaa a Zeova Kaset rãmba. Naoor wʋsgo, b kẽnda tigissã la b yit koɛɛgã moonego, la b getẽ tɩ b yaa a Zeova Kaset rãmb menga. La bũmb kẽer n kɩt tɩ b nan pa rɩk b mens n kõ a Zeova n deeg lisg ye. Wakat ninga, yaa b roagdbã n yeel-b tɩ b bas tɩ yɩ bilfu. Sõs-kãnga pʋgẽ, d na n yãa bũmb a naas sẽn kɩt tɩ roagdb kẽer pa sõng b kambã tɩ b tõog n deeg lisgã.

3. A Blossom roagdbã ra maanda yɩɩr bõe yĩnga?

³ A Blossom roagdbã yell d sẽn gom sɩngrẽ wã ra maanda yɩɩre, bala b ra sokda b mens b biigã sã n bɩɩme n sek a na bãng tɩ lisgã pa reem yelle, la a sã n tõe n wʋma a võore. Bõe n tõe n sõng roagdbã tɩ b bãng b biig sã n segl n saame n tõe n dɩk a meng n kõ a Zeova n deeg lisgu?

4. Wãn to la a Zeezi sẽn kõ noor ning Matye 28:19, 20 wã tõe n sõng roagdbã b kambã zãmsg pʋgẽ?

⁴ Karm-y Matye 28:19, 20. Wa d sẽn yeel sõsg ning sẽn loogã pʋgẽ wã, Biiblã pa yãk yʋʋm sõore, tɩ ned sã n pa ta rẽ bɩ a pa tõe n deeg lisg ye. La yɩta sõma tɩ roagdbã bʋgs neer n ges ‘maan ned t’a yɩ karen-biigã’ sẽn dat n yɛɛlgã. B sẽn yeel Matye 28:19 tɩ ‘maan nebã tɩ yɩ karen-biisã’ rat n yeelame tɩ zãms-b sẽn na yɩl tɩ b wa lebg a Zeezi karen-biisi. A Zeezi karen-biig yaa ned sẽn zãmsd bũmb nins a Zeezi sẽn wilg nebã, n wʋmd a võore, la a rat ne a sũur fãa n tũ. Dẽnd roagdbã segd n sɩnga b kambã sõngr hal b yãadem wakate, sẽn na yɩl tɩ b wa rɩk b mens n kõ a Zeova n deeg lisgu, n lebg Kiristã karen-biisi. Yaa sɩd tɩ b pa segd n lis bi-pɛɛlg ye. La Biiblã wilgdame tɩ baa kom-bõoneg tõe n wʋma Biiblã sẽn yetã, hal n nong rẽ ne b sũy fãa.

5, 6. a) Biiblã sẽn yeel bũmb ning a Tɩmote zugã sõngdame tɩ d bãng bõe a lisgã wɛɛngẽ? b) Wãn to la roagdb sẽn mi b kamb sõma sõngd b biig fãa?

⁵ A Tɩmote yãka yam n na n tũ a Zeova t’a ket n yaa bilfu. Tʋm-tʋmd a Poll yeelame t’a Tɩmote sɩnga Wẽnnaam Gomdã zãmsg hal a yãadem wakate. A Tɩmote ba wã ra pa tũud a Zeova ye. La a ma wã sẽn da yaa zʋɩfã, ne a yaab-poakã sõng-a-la hal t’a wa nong Wẽnnaam Gomdã. Kɩtame t’a ra tar tẽeb sẽn yaa kãn-kãe. (2 Tɩm. 1:5; 3:14, 15) A sẽn wa n kogl yʋʋm 20 bɩ sẽn yɩɩd rẽ bilfã t’a ra zoe n tara minim tɩ b tõe n kõ-a tʋʋm tigingã pʋgẽ. Sɩd me, a Poll sẽn wa n na n gilg tẽns toor-toor n moon koɛɛgã, a yãka a Tɩmote t’a na n tũ-a.—Tʋʋ. 16:1-3.

⁶ Kambã pa yembre, b bɩʋʋngã me pa yembre. Kẽer wʋmda Biiblã goamã sõma la b bãngd n yãkd yam b toor tɩ b nan ket n paoodẽ, n dat meng n deeg lisgu. Sãnda nengẽ, rẽnda b bɩ bilf n paase, n yaool n wa tõog n deeg lisgu. Rẽnd roagdb sẽn mi b kamb sõma pa na n pẽdg-b tɩ b reeg lisg ye. La b na n sõnga b biig fãa t’a mao n bɩɩs a tẽebã a toore. Biig manesem sã n wilgdẽ t’a tũuda saglg ning sẽn be Yel-bũn 27:11 wã, noogda a roagdbã sũuri. (Karm-y-yã.) La b pa segd n yĩm tɩ b bõn-daabã yaa b sõng b kambã tɩ b wa tõog n deeg lisg ye. Tõe tɩ roagdbã sokda b mens  masã yaa: ‘M biigã sẽn mi bũmb ninsã seka a na rɩk a meng n kõ a Zeova n deeg lisg bɩ?’

7. Yaa tɩlɛ tɩ ned bãng Biiblã sẽn yetã zãng n yaool n deeg lisg bɩ? Wilg-y y leoorã võore.

⁷ Roagdbã sẽn zãmsd b kambã Biiblã, yaa sẽn na yɩl tɩ b bãng Wẽnnaam Gomdã sõma. B sã n bãng Wẽnnaam Gomdã sõma, na n kɩtame tɩ b rat n dɩk b mens kõ a Zeova. La pa rat n yeel tɩ yaa tɩlɛ tɩ b bãng Biiblã sẽn yetã zãnga, n yaool n deeg lisg ye. Kiris-ned fãa lisg poore, a segd n ket n zãmsda Biiblã, n paasd a bãngrã. (Karm-y Koloos-rãmb 1:9, 10.) Woto wã, yaa hal sẽn ta zĩ-bʋg la ned segd n bãng Biiblã sẽn yetã, n yaool n deeg lisgu?

8, 9. Gũudã kibar sõngda tõnd tɩ d bãng bõe?

⁸ Roagdbã tõe n dɩka yam zak a ye rãmb kibar pʋgẽ. B zĩnda pipi kiris-nebã wakatẽ. (Tʋʋ. 16:25-33) A Poll so-toak a yiib-n-soabã sasa, a kẽnga Filip tẽngã. Yɩɩ yʋʋmd 50 a Zeezi rogmã poore. A sẽn wa n be be wã, b rõda yẽ ne a tũud-n-taag a Sɩlase, n yõg-b n sui bãens roogẽ. Baraar yʋngã, tẽn-digimdg n zĩndi, hal tɩ bãensã roog yẽbgr rigimdi, tɩ kʋɩlensã fãa pagse. Gũudã ra tagsdame tɩ bi-beesã zoeeme, n da rat n kʋ a menga. La a Poll pa bas-a t’a kʋ a meng ye. A Poll ne a Sɩlas paamame n sõs ne gũudã ne a zakã rãmba, n taas-b koe-noogã. B sũur sẽn da noom ne b sẽn bãng bũmb nins a Zeezi zugã kɩtame tɩ b maan bõe? B reega lisg zĩig pʋgẽ. Kiba-kãnga sõngda tõnd tɩ d bãng bõe?

⁹ Wõnda gũudã ra yaa Rom soda-kʋdr sẽn dɩk a retrɛte. A ra pa mi Wẽnnaam Gomdã ye. Dẽnd sẽn na yɩl n lebg kiris-neda, a ra segd n deng n bãnga Biiblã zãms-naana wã, n bãng a Zeova sẽn dat tɩ sẽn tũud-b yẽ wã maanã, la a sak me n tũ a Zeezi sẽn zãms nebã bũmb ninsã. A sẽn bãng bũmb nins wakat bilf pʋgẽ wã kɩtame t’a tʋll n deeg lisgu. Sãmbg kae t’a lisgã poore, a kell n wɩnga ne Wẽnnaam Gomdã zãmsg ye. Tõe tɩ yãmb biigã me mii Biiblã zãms-naana wã, la a mi rɩk f meng n kõ a Zeova n deeg lisgã sẽn dat n yɛɛlgã, t’a sũur me noom ne bũmb nins a sẽn bãngã. Sã n yaa woto, y maanda a wãna? Y tõe n kɩtame t’a tɩ yã kãsem-dãmbã, tɩ b ges a sã n tõe n deega lisgu. * Wa kiris-neb nins sẽn zoe n deeg lisgã, a na n kell n zãmsa Biiblã a vɩɩmã tõre, n bãngd a Zeova n paasdẽ.—Rom. 11:33, 34.

10, 11. a) Bõe la roagdb kẽer tagsda? b) Bõe n segd n pak roagdbã n yɩɩda?

¹⁰ Roagdb kẽer tagsdame tɩ b kambã sã n karem n paam dipolom-dãmb la b paam tʋʋm-sõngo, n yaool n wa reeg lisg n são. Yaa sɩd tɩ b tõe n tagsdame tɩ yaa b kambã neer yĩnga. La rẽ yĩnga, na n sɩd sõngame tɩ kambã paam vɩɩm sẽn tar barka? La sẽn yɩɩd menga, zemsa ne Biiblã sẽn yetã sɩda? Bõe la a Zeova rat tɩ d lʋɩɩs taoor d vɩɩmã pʋgẽ?—Karm-y Koɛɛg soab 12:1.

¹¹ Yɩta sõma tɩ d tẽegd wakat fãa tɩ dũni-kãnga ne bũmb nins fãa sẽn be a pʋgẽ wã pa tat a Zeova yam ye. (Zak 4:7, 8; 1 Zã 2:15-17; 5:19) Biig sã n tar  zood sõma ne a Zeova, rẽ n na n sõng-a t’a ra maan wa a Sʋɩtãan ne a dũniyã sẽn datã ye. Roagdbã sã n dat tɩ b kambã reng n paam dipolom-dãmb la tʋʋmde, b na n wa tagsdame tɩ bũmb nins sẽn be dũniyã pʋgẽ wã yõod yɩɩda bãmb ne a Zeova zoodã. La rẽ yĩnga, y sẽn nong y kambã, y ratame tɩ yɩ dũni-kãnga nebã n wilgd-b bũmb nins bãmb sẽn tagsd tɩ wata ne sũ-noogã bɩ? Yaa d sã n lʋɩɩsd a Zeova raabã taoor la d paamd sũ-noog hakɩɩka, la vɩɩm sẽn tar barka.—Karm-y Yɩɩn-sõamyã 1:2, 3.

12. Bõe yĩng tɩ kẽer tagsdẽ tɩ b kambã sã n bas tɩ kaoos bilf tɩ b yaool n deeg lisg n são?

¹² Saam-bi-poak a ye togsa bũmb ning sẽn da kɩt t’a pa rat t’a bi-puglã yãg n deeg lisgã. Ad a sẽn yeele: “Yaa yãnd yẽ, la yaa b sẽn yiisd yel-wẽn-maandbã tigingã pʋgẽ wã yĩng la m sẽn da pa rat t’a reeg lisgã.” Wa saam-bi-poakã, roagdb kẽer tagsdame tɩ b sã n bas tɩ b biigã bɩ bilf n paase, n pa le tʋʋmd yãad-tʋʋma, n yaool n deeg lisg n são. (Sɩng. 8:21; Yel. 22:15) B tõe n tagsdame tɩ b biigã sẽn pa reeg lisgã, a sã n wa maan yel-wẽn-kãsenga, b pa na n yiis-a tigingã pʋgẽ ye. Bõe yĩng tɩ tagsg a woto pa zemse?—Zak 1:22.

13. Ned sẽn pa reeg lisg sã n maan yel-wẽnde, a tara taal a Zeova taoor bɩ? Wilg-y y leoorã võore.

¹³ Yaa sɩd tɩ roagd pa na n dat t’a biig reeg lisgu, sã n pa a bɩɩme n sek a tõe n dɩk a meng kõ a Zeova ye. La roagdb sã n tagsdẽ tɩ biig sã n pa reeg lisgu, a Zeova pa ningd-a taal a yel-wẽnã yĩnga, pa zems ye. Bõe yĩng tɩ d yet woto? Bala, pa ned sã n deeg lisg la Wẽnnaam ningd-a taal a yel-wẽnd yĩng ye. Biig sã n zoe n mi sẽn yaa tɩrg la wẽng a Zeova nifẽ, a sã n maan yel-wẽnde, a tara taale. (Karm-y Zak 4:17.) Roagd sẽn tar yam pa na n yeel a biig t’a ra yãg n deeg lisg ye. Yẽ mengã na n maoome n kõ a kambã mak-sõngo. A sɩngda b sõngr hal b yãadem wakate, sẽn na yɩl tɩ b wa nong a Zeova noyã sẽn yaa tɩrsã. (Luk 6:40) Y kambã sã n nong a Zeova sõma, na n kɩtame tɩ b rat ne b sũy fãa n tũ a noyã.—Eza. 35:8.

14. Bõe la kãsem-dãmbã tõe n maan n sõng roagdbã ne b kambã wubri?

¹⁴ Kãsem-dãmbã me sã n mi n sõsd ne kambã, n gomd a Zeova tũudmã tʋʋm yell neere, na n sõnga roagdbã. Saam-bi-poak a ye ra ket n tẽra saam-biig a Russell sẽn sõs ne-a, a sẽn wa n tar yʋʋm a yoob bala. Ad saam-bi-poakã sẽn yeele: “A sõsa ne maam minit 15, tɩ m togs-a m sẽn dat n wa maan a Zeova tũudmã pʋgẽ wã.” Wãn to la sõng-a? A wa n lebga so-pakda, hal n kaoos yʋʋm 70 la zaka. Hakɩɩka, gomd sẽn yaa sõma la sẽn kengd raood tõe n sɩd nafa ned a vɩɩm tõre. (Yel. 25:11) Sẽn paase, kãsem-dãmbã tõe n mi n boola roagdb ne b kamb tɩ b wa sõng ne Rĩungã roog tʋʋm kẽere. B tõe n kõo kambã tʋʋm sẽn zems ne b yʋʋmã la b pãngã.

15. Bõe la tigingã neb a taabã me tõe n maan n sõng kambã?

¹⁵ Bõe la tigingã neb a taabã me tõe n maan n sõnge? B tõe n wilga kambã tɩ b yell pak-b lame. B tõe n gũusd n geta bũmb toor-toor sẽn wilgd tɩ b tẽebã bɩtame. Wala makre, tigissã sasa, biig sã n leok tɩ yɩ sõma, wall a wɛgsa sõsg tɩ yɩ sõma, pẽg-y-yã-a  neere. A sã n tõog n moona koɛɛgã lekollẽ wã, wall a kell n maana sɩd ne a Zeova makr pʋgẽ, bɩ y pẽg-a sõma. Y tõe n yãka yam n na n sõsd ne kambã nand tɩ tigissã sɩnge, la tigissã poore, tɩ woto wilgdame tɩ b yell sɩd pak-y lame. Rẽ, kambã na n neeme tɩ bãmb me naagame n yaa a Zeova ‘tigin-kãsengã’ neba.—Yɩɩn. 35:18, Wẽnnaam Sebre, 1983.

16, 17. a) Bõe yĩng tɩ yaa sõma tɩ kambã reeg lisgu? b) Bõe n tõe n wa kɩt tɩ roagd sũur yɩ noogo? (Ges-y sõsgã sɩngrẽ fotã.)

¹⁶ Roagdbã sẽn paam n tõe n ‘wub b kambã, n sagl-b la b keoog’ wa a Zeova sẽn datã yaa zu-zẽkr meng-menga. (Efɛ. 6:4; Yɩɩn. 127:3) Pĩnd wẽndẽ Israyɛllã sẽn da yaa buud a Zeova sẽn so wã yĩnga, biig sã n da roge, a zoe n yaa a Zeova rẽnda. La pa woto ne kiris-nebã ye. Roagdbã sã n nong a Zeova, tɩ b sũur me noom ne a tũudmã, pa rat n yeel tɩ na n yɩ woto ne b kambã ye. Sẽn sɩng ne biig rogem, a roagdbã segd n sõng-a-la hal t’a wa lebg Kirist karen-biiga, n dɩk a meng n kõ a Zeova n deeg lisgu. Rẽ n segd n yɩ b bõn-daabo. Bũmb n le be n tar yõod n yɩɩd rẽ sɩda? Yaa ned sã n dɩk a meng n kõ a Zeova n deeg lisgu, la a kell n maan sɩd ne-a la a na n wa paam n põs to-kãsengã sasa.—Mat. 24:13.

¹⁷ A Blossom Brandt sẽn wa n yãk yam n na n deeg lisgã, a roagdbã ra rat n bãnga a sã n sɩd miime t’a sẽn dat n maanã pa reem yell ye. B sẽn wa n kɩs sɩd t’a wʋmda a sẽn dat n maanã võorã, b teel-a-la a yam-yãkrã pʋgẽ. A Blossom lisgã ket tɩ beoogo, a ba wã maana bũmb baraar yʋngo, tɩ yɩ-a noogo. Ad a Blossom sẽn yeele: “A kɩtame tɩ d fãa yĩgimdi, t’a pʋʋse. A yeela a Zeova t’a sũur nooma a bi-puglã sẽn yãk yam n na n dɩk a meng n kõ-a wã.” Yʋʋm 60 la zak poore, a Blossom yeelame: “M pa na n tol n yĩm a sẽn maanã ye!” Roagdba, d pʋʋsda a Zeova tɩ yãmb me kambã wa rɩk b mens n kõ-a n deeg lisgu, tɩ y sũur yɩ noogo.