1. D maanda wãn n paam yam, la wãn to la yamã na n sõng-do?

A ZEOVA yamã ka tar koak ye. A sakda ne yamleoog n kõt tõnd me yam. Sɩd me, Zak 1:5 yetame: “Yam sã n paoog yãmb ned a yembre, bɩ a kos Wẽnnaam sẽn kõt nebã fãa ne yamleoog n ka lengdẽ wã, la b na kõ-a yamã.” Bũmb a ye d sẽn tõe n maan n paam yam ning a Zeova sẽn kõtã, yaa d sẽn na n sakd a kiblgã. Rẽ na n sõng-d lame tɩ d ra wa maan sẽn yaa wẽnga, la d kell n tall zood sõma ne-a. (Yel. 2:10-12) Woto, d tõogd n kell n paa “Wẽnnaam nonglmã pʋgẽ,” n wa “paam vɩɩm sẽn kõn sa wã.”—Zʋʋd 21.

2. Bõe n na n sõng-d tɩ d wa nong Wẽnnaam kiblgã?

² D sẽn pa zems zãngã, wall b sẽn wub tõnd to-to wã, pa rẽ bɩ bũmb a taab mi n kɩtame tɩ yaa toog tɩ d sak kiblgu, wall d tall tagsg sẽn zems kiblgã zugu. La d sã n gũus n ges a Zeova kiblgã sẽn wat ne nafa ninsã, na n kɩtame tɩ d maneg n ne vẽeneg t’a nong-d-la hal wʋsgo. Yel-bũn 3:11, 12 yetame yaa: “M biiga, ra kɩɩs Sẽn-Ka-Saab remsgã ye, . . . Bala, Sẽn-Ka-Saab keoogda b sẽn nong-a soaba.” Hakɩɩka, d tõe n basa d yam t’a Zeova sɩd rata tõnd neere. (Karm-y Ebre-rãmb 12:5-11.) Sẽn mik tɩ Wẽnnaam mii tõnd hal sõma wã, a sã n na n kibl-du, kelld n zemsa ne-do, pa loogd nug ye.  Sõs-kãnga pʋgẽ, d na n goma bũmb a naas yelle: 1) Tõnd sẽn kibind d mengã, 2) roagdbã sẽn kibind b kambã, 3) tigingã pʋgẽ kiblgã, la 4) bũmb toolem sẽn yɩɩd kiblgã.

3. Maanda wãn tɩ biig wa tõe n kibind a menga? Rɩk-y makre.

³ Ned sẽn kibind a meng maoodame n yõkd a menga, n gũusd ne a manesmã la a tagsa wã. Pa zʋgd d sẽn dogd ne ye. Yaa ned fãa n tog n bɩɩse. D rɩk makr ne roagd sẽn zãmsd a biig weefo. Sɩngrẽ wã, roagdã na n pʋgd n gãta weefã. La biigã sã n wa tõe weefã bilfu, roagdã na n mi n wa basame t’a kẽng a toore. Roagdã sã n wa neẽ tɩ biigã tõee weefã sõma, a na n tolg n basdame t’a zombd a toore. Woto me, roagdbã sã n maagd b meng wakat fãa n ‘sagend b kambã la b keoog-b wa sẽn zems Zu-soabã raabã, sõngda biig fãa t’a bɩɩs yam, n wa tõe n kibind a menga.—Efɛ. 6:4.

4, 5. a) Bõe yĩng tɩ yaa tɩlɛ ne ned sẽn ‘yelg nin-paalgã’ t’a kibind a menga? b) Baa d sã n wa konge, bõe yĩng tɩ d pa segd n koms raoodo?

⁴ Yaa woto me ne neb nins sẽn lebg kãsemb n yaool n na n bãng a Zeova wã. Tõe tɩ b zoe n tõogd n kibinda b mens bũmb kẽer wɛɛngẽ. La a Zeova tũubã wɛɛngẽ, b nan yaa wa yãase. B sã n sɩng ‘nin-paalgã yelgre,’ n maood n na n wõneg Kiristã, b wat n lebga wa kãsemba. (Efɛ. 4:23, 24) Ned pa tõe n lebg wa kãsem Wẽnnaam tũubã wɛɛngẽ, a sã n pa maood n kibind a meng ye. D sã n kibind d menga, na n sõng-d lame tɩ d “bas wẽn-kɩɩsgo la dũniyã ratem wẽnsã la d vɩɩmd zamaan kãnga pʋgẽ ne gũus-m-menga la tɩrlem la d sak Wẽnnaam.”—Tit 2:12.

⁵ Bʋko, tõnd fãa yaa koangdba. (Koɛ. 7:20) La d sã n wa konge, rat n yeelame tɩ d pa kibl d mengã sõma, wall tɩ d pʋd n pa mao n na n kibl d meng bɩ? Pa woto wakat fãa ye. Yel-bũn 24:16 yetame: “Nin-tɩrg tõe n lʋɩɩ naoor a yopoe, la a na n leb n yikame.” La bõe n na n sõng-d tɩ d tõog n ‘leb n yiki’? Yaa ne vʋʋsem sõngã sõngr la d na n tõoge, pa ne d meng pãng ye. (Karm-y Ezayi 12:2.) Sɩd me, yõk-m-meng naaga vʋʋsem-sõngã bilã. Ned sã n yaool n tõog n yõkd a menga, a kibinda a menga.

6. D maanda wãn n wa tõog n zãmsd Wẽnnaam Gomdã sõma? (Ges-y sõsgã sɩngrẽ fotã.)

⁶ Pʋʋsgã ne Biiblã zãmsg la a goamã bʋgsg na n sõng-d lame me tɩ d wa tõog n kibind d menga. La Biiblã zãmsg sã n yaa toog ne yãmba? Wala makre, nina pa nong sɛb kareng ye. Sã n yaa rẽ, bɩ y tẽegd wakat fãa tɩ y sã n sake, a Zeova na n sõng-y lame. A na n sõng-y lame tɩ y “tʋlg” a goamã ne y sũur fãa. (1 Pɩy. 2:2) Pʋʋs-y-yã a Zeova, n kos-a t’a sõng-y tɩ y wõr y menga, n tõog n yãt sẽk n zãmsd Biiblã. Rẽ poor bɩ y modg n maan wa y sẽn kosã. Wala makre, y tõe n maaname tɩ zãmsgã yɩ koɛɛg-koɛɛg sɩngrẽ wã. Tarẽ-n-tarẽ, zãmsgã na n wa lebga nana la noogo! Y sũur wat n lebga noogo, y sẽn paamd n yãkd wakat n yaa y yembre, n bʋgsd a Zeova goamã zugã.—1 Tɩm. 4:15.

7. D sã n kibind d menga, wãn to la na n sõng-d tɩ d tõog n pids d sẽn yãk yam n dat n maan a Zeova tũudmã pʋgẽ wã?

⁷ D sã n kibind d menga, na n sõngame tɩ d tõog n pids d sẽn yãk yam n na n maan bũmb nins a Zeova tũudmã pʋgẽ wã. Wala makre, saam-biig a ye sẽn tar kamb wa n getame t’a yẽesmã boogdame, t’a yãk yam n na n mao n lebg wakat fãa so-pakda. Bõe la a maan tɩ sõng-a t’a kibl a menga? A karma siglgã sɛb sẽn gomd so-pakrã yelle, la a wɩng ne pʋʋsgo. Woto kenga a raoodo, la paas yẽ ne a Zeova zoodã pãnga. A sã n da tõe fãa, a rɩkda sõngr so-pakrã. Baa ne  sẽn pa yɩ nana wã, a pa bas tɩ bũmb tiis-a ye. A wa n sɩd tõog n lebga so-pakda.

8-10. Bõe n tõe n sõng roagdbã tɩ b tõog n wub b kambã tɩ b wa tũud a Zeova? Rɩk-y makre.

⁸ A Zeova kõo roagdbã noor tɩ b ‘wub b kambã, n sagl-ba, la b keoog-b wa sẽn zems Zu-soabã raabo.’ (Efɛ. 6:4) La dũniyã sẽn yaa to-to rũndã-rũndã wã kɩtame tɩ rẽ maaneg pa nana ye. (2 Tɩm. 3:1-5) Biig rogmẽ, a pa mi sõma ne wẽng n bak ye. Yaa sɩd tɩ biig fãa rogda ne sũur-kaseto, la yaa tɩlɛ t’a paam wubri, t’a sũur-kasetã lebg sõma n paase. (Rom. 2:14, 15) Biibl-mit a ye yeelame tɩ gɛrk gom-bil ning b sẽn lebg Biiblã zĩis kẽer tɩ “kiblgã” võor me yaa “biig bɩʋʋngo,” rat n yeel tɩ ‘wub biig t’a wa bɩ n lebg nin-tɩrga.’

⁹ Roagdbã sã n kibind b kambã ne nonglem, kɩtdame tɩ kambã yam gãe. B bãngdame tɩ baa b tar lohorem n tõe n maan bũmb kẽere, pa bũmba fãa la b tõe n maane, la tɩ b sẽn maand fãa wata ne bi-sõma wall bi-wẽnse. Yaa rẽ yĩng la roagdbã sẽn segd n teeg a Zeova, sẽn na yɩl n paam yam n tõog n wub b kambã. Ra yĩm-y tɩ ned sẽn wubd a biig to-to wã bee ne a buudã ye. Zãmaanã me sẽn toeemdã kɩtame tɩ kambã wubr pa yembr ye. Roagdb nins sẽn teeg a Zeova wã pa wubd b kambã zond-yaare, wall b teeg ninsaalb bãngr ye.

¹⁰ D tõe n dɩka yam a Nowe kibarã pʋgẽ. A Zeova sẽn wa n yeel-a t’a ka koom-koglgã, a pa teeg a mengã yam la a bãngr ye. A ra zɩ n ka koglg ye. Rẽnd ra yaa tɩlɛ t’a teeg a Zeova n maan a sẽn ‘dag n yeel-a wã kɛpɩ.’ (Sɩng. 6:22) Baasa wãna? A tõog n kaa koglgã. A sẽn tũ a Zeova noorã, a pa mak n yɩlem ye. Yɩɩ vugr bala. Sõngame tɩ yẽ ne a zakã rãmb paam n põse. A Nowe sẽn da teeg a Zeova t’a wilgd-a sorã kɩtame me t’a tõog n ges a zakã yell neere. A tõog n wuba a kambã sõma, la a ra kõt-b mak-sõngo. Pa yɩ nana ye. Bala, sẽn deng sa-kãsengã, dũniyã ra yaa wẽng wʋsgo.—Sɩng. 6:5.

11. Bõe yĩng tɩ roagdbã tog n maan b sẽn tõe fãa tɩ zãmsgã kẽ kambã sũyã?

¹¹ Y sã n yaa roagda, y maanda wãn n maan a Zeova sẽn yeelã “kɛpɩ”? Kelgd-y-yã a Zeova. Sak-y t’a sõng-y ne a Gomdã la a siglgã maasem, tɩ y wub y kambã. Wakat n wat tɩ y kambã na n pʋʋs-y bark y sẽn sõng-b woto wã yĩnga. Saam-biig a ye yeelame: “M pa tõe n pʋʋs m roagdbã bark n sa, b sẽn wub maam to-to wã ye. B maana b sẽn tõe fãa tɩ b sẽn da zãmsd-m bũmb ninsã kẽ m sũurã. M sẽn tõog n paam zood sõma ne a Zeova, la m maand bũmb toor-toor a tũudmã pʋgẽ wã tũu  ne bãmb sõngr n tɩ yɩɩda.” Yaa sɩd tɩ roagdb kẽer wuba b biig sõma, t’a wa baas n bas a Zeova. La baasgo, roagdbã sã n maana b sẽn tõe fãa sẽn na yɩl t’a Zeova raabã kẽ biigã sũuri, b sũur-kasetã pa na n ning-b taal ye. Rẽ me, b tõe n saagame tɩ biigã na n lebg n waa a Zeova nengẽ.

12, 13. a) B sã n yiis biig tigingã pʋgẽ, bõe la a roagdbã tog n maan tɩ wilg tɩ b sakda a Zeova? b) Roagdbã sã n kell n sak a Zeova, a yõodã yaa bõe? Togs-y zak a ye rãmb kibare.

¹² B sã n yiis biig tigingã pʋgẽ, tõe n yɩɩ toog ne a roagdbã tɩ b kell n sak noy nins a Zeova sẽn ganeg rẽ wɛɛngẽ wã. Saam-bi-poak a ye bi-pugl la b yiis-yã, tɩ yɩ tɩlɛ t’a yi n bas zakã. Ad saam-bi-poakã sẽn yeele: “M da gẽesda siglgã sɛb pʋgẽ, n get m sã n pa na n yã bũmb m sẽn tõe n tik n paam n mi n ket n naagd m biigã ne a bi-puglã n maand bũmb kẽere. La m sɩdã maaga a yĩng n sõng-m tɩ m bãng tɩ d bi-puglã yell pa le be tõnd nugẽ, la tɩ d pa segd n kẽes d toog ye.”

¹³ Yʋʋm a wãn poore, b lebs n deega bi-puglã tigingã pʋgẽ. A ma yeelame: “Masã wã, a boonda maam daar fãa la bala, wall a gʋls-m mesaaze. A waoogda maam ne a baaba sõma, bala a miime tɩ d tũu Wẽnnaam sẽn yeelã. D lebga zo-rãmb meng-menga.” B sã n yiisa y biig tigingã pʋgẽ, y na n ‘teega a Zeova ne y sũur fãa, la y ra teeg y meng bãngr’ bɩ? (Yel. 3:5, 6) Tẽeg-y t’a Zeova kiblgã wilgdame t’a yamã la a sẽn nong tõnd to-to wã pa tar mak-n-taar ye. Ra n yĩm-y baa daar a ye t’a kɩtame t’a Biigã wa ki yãmb biigã yĩng me ye. Wẽnnaam raab yaa nebã fãa paam vɩɩm sẽn kõn sa wã. (Karm-y 2 Pɩyɛɛr 3:9.) Roagdba, kɩs-y sɩd wakat fãa t’a Zeova kiblgã la noy nins a sẽn gãnegã zemsame, baa tũubã sã n mi n yaa toog ne-yã. Da kɩɩs-y-yã a Zeova kiblgã ye. Tũ-y-yã a sẽn yet rẽ wɛɛngẽ wã.

14. A Zeova sẽn kɩt tɩ tʋm-tʋmd sẽn tũud sɩdã wilgd tõnd sẽn segd la sẽn pa segdã nafda tõnd wãn-wãna?

¹⁴ A Zeova pʋlmame t’a na n gesa kiris-neb tigingã yelle, n kogl-a, la a ges t’a nebã paam zãmsgo. Rẽ wɛɛngẽ, bũmb wʋsg la a sɩd maan-yã. Wala makre, a rɩka tigingã yell gesg n bobl a Biigã, t’a Zeezi me yãk tʋm-tʋmd sẽn tũud sɩdã t’a sõngd tõnd tɩ d paamd sẽn yaa tɩlɛ d tẽebã kengr yĩngã. (Luk 12:42) Tʋm-tʋmdã wilgda tõnd sẽn segd la sẽn pa segde, n kibind tõnd sõma. Yãmb zoe n kelga sõsg b sẽn wɛgs tigissã sasa, n wʋm bũmb ninga, wall yaa siglgã sebr la y karem n yã bũmbu, tɩ sõng-y tɩ y toeem y manesem bɩ y tagsg bɩ? Sã n yaa rẽ bɩ y kɩdem sũ-noogo! Bala, yaa kaset tɩ y sakdame t’a Zeova kibind yãmba.—Yel. 2:1-5.

15, 16. a) Bõe la d tog n maane, n paam n dɩ kãsem-dãmbã tʋʋmdã yõodo? b) Bõe la d tõe n maan n sõng-b tɩ b tʋm b tʋʋmã ne sũ-noogo?

¹⁵ Tiging fãa pʋgẽ me, Kiristã kõo ‘kũun sẽn yaa rapa,’ rat n yeel tɩ kãsem-dãmba, tɩ b get tigingã neb yelle. (Efɛ. 4:8, 11-13) Bõe la d tog n maan n paam n dɩ rẽ yõodo? D rɩk b togs-n-taare, n tall b tẽebã buudu, la d sakd n tũud Biiblã saglsã b sẽn kõt tõndã. (Karm-y Ebre-rãmb 13:7, 17.) Kãsem-dãmbã nonga tõndo, n dat tɩ d tall zood sõma ne Wẽnnaam. Wala makre, b sã n wa neẽ tɩ d vaanda tigissã, pa rẽ bɩ yaa d yẽesmã n booge, tao-tao bala, b na n sõnga tõndo. B na n sõsa ne-d n paam n kelg-do. Rẽ poore, b na n kenga d raoodo, la b kõ-d sagls ne Biiblã maasem. Sõngr a woto wilgdame t’a Zeova nonga tõndo. Yaa woto la yãmb tagsd bɩ?

¹⁶ D tẽeg tɩ mi n yaa toog ne kãsem-dãmbã tɩ b wa sõs ne-do, n sagl-d yell ning wɛɛngẽ. Rĩm a Davɩɩd sẽn wa n maan yel-wẽn-kãseng n solgdẽ wã, yãmb pa tagsd tɩ  pa yɩ nana ne no-rɛɛs a Natã t’a tɩ gom rẽ yell ne-a sɩda? (2 Sãm. 12:1-14) A Pɩyɛɛr me sẽn wa n tall manesem sẽn wilgd t’a baka kiris-nebã, n nong sẽn yaa-b zʋɩf-rãmbã, yɩɩ tɩlɛ me ne tʋm-tʋmd a Poll t’a tall raood n wilg-a a kongrã. (Gal. 2:11-14) Woto wã, bõe la y tõe n maan tɩ kãsem-dãmbã sã n wa na n sagl-y bɩ ra yɩ toog wʋsgo? Yɩ-y sik-m-meng soaba, ned pẽnegr sẽn pa toogo, la y mi n pʋʋsd-b barka. Ning-y y yamẽ tɩ b sẽn sõngd tõndã yaa kaset tɩ Wẽnnaam nonga tõndo. Rẽ na n nafa yãmb mengã, la kɩt tɩ b tʋm b tʋʋmã ne sũ-noogo.

17. Bõe la kãsem-dãmb maan n sõng saam-bi-poak a ye?

¹⁷ Saam-bi-poak a ye yeelame tɩ yẽ vɩɩmã yɛl kẽer n kɩt t’a ra tagsdẽ t’a pa tõe n tall zood sõma ne a Zeova, hal tɩ ra sãamd a sũurã wʋsgo, t’a yamã yi a menga. Ad a sẽn yeele: “M da miime tɩ m tog n togsa kãsem-dãmbã m zu-loɛɛgã. M sẽn togs-bã, b pa zab-ma, wall b ning-m taal ye. B pʋd n kenga m daoodo, tɩ m paam pãnga. Tigsg fãa poore, baa b tʋʋmã sẽn waoog to-to, b na n wa soka m keelem, baa na yɩ b nin-yende. M pĩnd vɩɩmã kɩtame tɩ m da tagsdẽ tɩ m pa zems ne a Zeova nonglem ye. La wakat ne a to fãa, a Zeova tũnuga ne tigingã neb la kãsem-dãmbã n wilg-m t’a nong-m lame. M kot-a lame t’a sõng-m tɩ m da tol n bas-a ye.”

18, 19. Bõe n tõe n nams ned n yɩɩg kiblgã toolem? Togs-y kibare.

¹⁸ Yaa sɩd tɩ wakat ninga, a Zeova kiblgã zabdame. La d sã n zãgs a kiblgã, rẽ sẽn na n wa ne bũmb ningã toolem n yɩɩda. (Ebre. 12:11) A Kayẽ kibarã, n paas rĩm a Sedesiyaas kibarã wilgda rẽ. Wẽnnaam sẽn wa n mik t’a Kayẽ kisa a yaoã hal n dat n kʋ-a wã, a keoog-a lame. A yeel-a lame yaa: “Yaa bõe tɩ fo puugd f sũur woto tɩ f neng gãneme? Fo sã n maan sẽn yaa sõama, f na n tõog n zẽka f zugu, la f sã n ka maan sẽn yaa sõama, yel-wẽnã wũga fo rignoorẽ, la a rat n sooga foom, bee ne foom tɩ f tõog-a.” (Sɩng. 4:6, 7) A Kayẽ pa kelg a Zeova keoogrã ye. A wa n baas n kʋʋ a yaoã, tɩ yɛl nins rẽ sẽn wa ne wã nams-a a vɩɩmã tõre. (Sɩng. 4:11, 12) A sã n da sakẽ-la a Zeova kiblgã, a ra pa na n nams a woto fãa ye.

¹⁹ A Sedesiyaas ra yaa rĩm-wẽnga, la ned sẽn ka võore. A naamã wakat tɩ yɛlã ra pa nana Zerizalɛm ye. No-rɛɛs a Zeremi keoog-a-la hal naoor wʋsg t’a bas a tʋʋm-wẽnsã, la a pa sak n na n toeem ye. La baasa wẽnga. (Zer. 52:8-11) Hakɩɩka, a Zeova pa rat tɩ d wa namsd bũmb poorẽ, n yaool n da tõe n gil ye.—Karm-y Ezayi 48:17, 18.

20. Sẽn sakd-b a Zeova kiblgã beoog na n yɩɩ wãna? La sẽn pa sakd-bã yẽ?

²⁰ Rũndã-rũndã, nebã maanda b toog kae ne Wẽnnaam kiblgã. La ka la bilfu, b na n yãa b tʋʋm-wẽnsã biisi. (Yel. 1:24-31) Woto wã, d ‘sak a Zeova kiblgã, n lebg yam dãmba.’ Bɩ d ned kam fãa tũ Wẽnnaam saglg ning sẽn be Yel-bũn 4:13. Ad a sẽn yeele: “Sak m demsgã neere, n da bas-a ye. Tall-a t’a na n kõ-f la-vɩɩm.”