1, 2. Bõe la saam-biig a ye wa n bãnge, la bõe la a maan-yã?

A ROBƐƐR reega lisg a yʋʋm 15. Baasgo, pa a Zeova tũubã n da pak-a n yɩɩd ye. Ad a sẽn yeele: “Yaa sɩd tɩ m da pa maand sẽn yaa wẽng ye. La m da tũuda m we n tũ bala. Ra wõnda m tara zood sõma ne a Zeova, bala m da pa vaand tigissã, n mi n yaa sõngd so-pakd kiis a wãn yʋʋmdã pʋgẽ me. La m da getame tɩ bũmb n paoog-ma.”

² Yaa hal a Robɛɛr kãadmã poor la a yaool n bãng bũmb ning sẽn da paoog-a wã. Yẽ ne a pagã ra mi n maanda reem sẽn tik Biiblã kibay zugu, n sogsd taab sogsgo. A pagã ra mii Biiblã sõma, n leokd sogsgã nana-nana. La naoor wʋsgo, a Robɛɛr yẽ ra pa mi a sẽn na n leok to-to, n da getẽ tɩ yaa yãnde. A yeelame: “Ra yaa wa m pa mi baa fʋɩ. M yeela m meng yaa: ‘Sã n yaa maam n tog n sõngd m pagã tẽebã wɛɛngẽ, rẽnda m dems yellã.’” A sɩd remsa yellã. Ad a sẽn yeele: “M zãmsa Biiblã, n zãms n zulgi, hal tɩ bũmba fãa wa lebgd vẽeneg m yamẽ wã. M da wʋmda Biiblã goamã võor sõma masã. La sẽn tɩ yɩɩda, m mikame tɩ paasa maam ne a Zeova zoodã pãnga.”

3. a) A Robɛɛr kibarã wilgda tõnd bõe? b) Sogs-bʋs la d na n leoke?

³ A Robɛɛr kibarã kõta tõnd yam. Tõe tɩ d mii bũmb wʋsg Biiblã sẽn yete, la d kẽnd tigissã n pa vaandẽ ye. La rẽ bal pa  wilgd tɩ tõnd ne a Zeova zoodã tara pãng ye. Baa d sã n zoe n maoome n paas tõnd ne a Zeova zoodã, d sã n fees d meng sõma, d na n yãa bũmb kẽer d sẽn tog n maneg n paase. (Fili. 3:16) Sẽn na yɩl n sõng d fãa tɩ d kell n yɩ neb vʋʋsem sõngã sẽn wilgd sore, d na n leoka sogsg a tãabo: 1) Wãn to la d tõe n bãng tõnd ne a Zeova zoodã sã n tara pãnga? 2) Bõe la d tõe n maan n ket n paasd tõnd ne a Zeova zoodã? 3) D sã n tar zood sõma ne a Zeova, wãn to la na n sõng tõnd d vɩɩmã pʋgẽ, daar ne a to fãa?

4. Ãnd dãmb n segd n tũ saglg ning sẽn be Efɛɛs-rãmb 4:23, 24?

⁴ D sẽn wa n bãng a Zeova, n yãk yam n na n tũ-a wã, d toeema bũmb wʋsg d vɩɩmã pʋgẽ. La toeengã pa sa d lisgã poor ye. Biiblã wilgame tɩ d segd n maoome n ‘tek d yamã.’ (Efɛ. 4:23, 24) D sẽn pa zems zãnga yĩnga, yaa tɩlɛ tɩ d fãa ket n toeemdẽ. Baa d sã n sɩng n tũuda a Zeova hal sẽn kaoose, yaa tɩlɛ tɩ d mao n kell n tall zood sõma ne-a.—Fili. 3:12, 13.

5. Sogs-bʋs la d tõe n sok d menga, tɩ sõng-d tɩ d fees d menga?

⁵ Sẽn na yɩl n ket n paasd tõnd ne a Zeova zoodã pãnga, yaa tɩlɛ tɩ d fees d meng ne pʋ-peelem. D yaa bi-bɩɩg tɩ d yaa kãsma, d sok d meng yaa: ‘Rẽ yĩnga, m nee toeeng m vɩɩmã pʋgẽ tɩ wilgdẽ tɩ m maoodame n na n kell n yɩ ned vʋʋsem sõngã sẽn wilgd sor bɩ? M neeme tɩ m sɩd rɩkda a Zeezi togs-n-taar bɩ? M tagsg sẽn yaa a soab ne tigissã, la m manesem sẽn yaa to-to tigissã sasa wã wilgdame tɩ m nanda tũudmã yɛl bɩ? M no-goamã wilgdame tɩ bõe n pak maam n yɩɩda? Mam sẽn zãmsd Biiblã to-to wã, m sẽn manegd d meng to-to wã, la m fu-yerdɩ wã, bɩ m manesem sẽn yaa a soab b sã n sagl-ma wilgda bõe mam zugu? M manesem yaa wãna, m sã n wa be makr taoore? Rẽ yĩnga, m getame tɩ m lebga kiris-ned tẽeb sẽn bɩ bɩ?’ (Efɛ. 4:13) D sã n bʋgs sogs-kãensã zug neere, tõe n sõngame tɩ d bãng tõnd ne a Zeova zoodã pãng sẽn ta zĩig ninga.

6. Bõe me n tõe sõng-d tɩ d bãng d sã n tara zood sõma ne Wẽnnaam?

⁶ Wakat ninga, yaa tɩlɛ tɩ d taabã sõng-d tɩ d bãng d sã n sɩd tara zood sõma ne a Zeova. Tʋm-tʋmd a Poll wilgame tɩ ned sã n vɩ a mengã yĩnga, a pa mi t’a manesmã pa noom Wẽnnaam ye. La ned sẽn sakd tɩ vʋʋsem sõngã wilgd-a sor mii Wẽnnaam tagsg bũmb fãa pʋgẽ. A miime t’a Zeova pa nong ned sẽn vɩ a mengã yĩng ye. (1 Kor. 2:14-16; 3:1-3) Kãsem-dãmbã sẽn tar Kirist tagsgã, naoor wʋsgo, b tẽed-n-taag sã n wa sɩng yĩngã ratem sakre, tao-tao bala b bãngdame. Kãsem-dãmbã sã n wa baood n na n sõng-do, rẽ yĩnga d sakda b sõngrã, la d maan d sẽn tõe fãa n na n toeem bɩ? D sã n maand woto, d wilgdame tɩ d rata ne d sũur fãa n bɩɩs d tẽebã.—Koɛ. 7:5, 9.

7. Bõe yĩng tɩ d sã mi Biiblã sẽn yetã bal bɩ pa sek d na yɩ ned vʋʋsem sõngã sẽn wilgd sore?

⁷ D sã mi Biiblã sẽn yetã bal pa sek d na yɩ ned vʋʋsem sõngã sẽn wilgd sor ye. Rĩm a Salomo ra mii a Zeova noyã sõma. Bũmb kẽer meng a sẽn yeel n be Biiblã pʋgẽ. La baasgo, a zoodã ne a Zeova wa n sãamame. A pa kell n maan sɩd ne a Zeova ye. (1 Rĩm. 5:9, 10; 11:4-6) Woto wilgdame tɩ bõe me n yaa tɩlɛ? D segd n ket n maoodame n bɩɩsd d tẽebã. (Kol. 2:6, 7) Wan to la d tõe maan dẽ?

8, 9. a) Bõe n na n sõng-d tɩ d tẽebã yɩ kãn-kãe? b) D sã n wa zãmsd Biiblã la d bʋgsd a goamã zugu, d raabã segd n yɩɩ bõe? (Ges-y sõsgã sɩngrẽ fotã.)

⁸ A Poll ra sagla pipi kiris-nebã tɩ b modg n bɩɩs b tẽebã. (Ebre. 6:1) Wãn to la d tõe n tũ a saglgã rũndã-rũndã? Bũmb a ye sẽn na n sõng-d wʋsgo, yaa d sẽn na n zãms  Kell-y n pa-y “Wẽnnaam nonglmã pʋgẽ” sebrã. Na n sõngame tɩ d bãng n tũ Biiblã saglsã d vɩɩmã pʋgẽ. Y sã n zoe n zãmsa seb-kãngã, y tõe n baoo sɛb a taab sẽn na n sõng-y tɩ y tẽebã yɩ kãn-kãe. (Kol. 1:23) Sẽn paase, d segd n bʋgsa bũmb nins d sẽn zãmsã zugu, la d bõos a Zeova t’a sõng-d tɩ d tũ.

⁹ D sã n wa zãmsd Biiblã la d bʋgsd a goamã zugu, d segd n tẽegame tɩ d sẽn dat ne d sũur fãa yaa d paam n ta a Zeova yam, la d sak a noyã. (Yɩɩn. 40:9; 119:97) Yaa tɩlɛ me tɩ d zãag d mens ne bũmb nins sẽn tõe n gɩdg d tẽebã bɩʋʋngã.—Tit 2:11, 12.

10. Bõe la kom-bɩɩsã tõe n maane, n paas bãmb ne a Zeova zoodã pãnga?

¹⁰ Kom-bɩɩse, y yãka bũmb n dat n wa maan a Zeova tũudmã pʋgẽ bɩ? Saam-biig a ye sẽn tʋʋmd Betɛllẽ wã sã n mi n kẽng tigims sull tigis-kãsenga, a wae n sõsda ne sẽn dat-b n deeg lisgã nand tɩ sõssã sɩnge. B wʋsgã nong n yaa kom-bɩɩse. Saam-biigã sokd-b-la b sẽn dat n wa maan a Zeova tũudmã pʋgẽ. B wʋsgã leoorã wilgdame tɩ b zoe n tagsa b sẽn dat n wa n maanã yell neere. Wala makre, b rat n wa kẽesa b meng zãng a Zeova tʋʋmdã pʋgẽ, bɩ n kẽng zĩig koe-moondb sẽn pa waoogẽ n tɩ moon koɛɛgã. La kẽer yẽ pa mi b sẽn na n leok ye. Tõe tɩ woto wilgdame tɩ b pa get tɩ b segd n yãka b sẽn dat n wa maan a Zeova tũudmã pʋgẽ ye. Y sã n yaa bi-bɩɩg bɩ y sok y meng yaa: ‘AmMam sẽn kẽnd tigissã la m yit koɛɛgã moonegã, yaa m roagdbã yĩng bɩ?Am Mam mengã tara zood sõma ne a Zeova bɩ?’ D yaa bi-bɩɩg tɩ d yaa kãsma, d fãa segd n yãka d sẽn dat n wa maan a Zeova tũudmã pʋgẽ. Rẽ na n sõngame tɩ tõnd ne a Zeova zoodã paasdẽ.—Koɛ. 12:1, 13.

11. a) Sẽn na yɩl tɩ d tẽebã pãng paase, bõe n yaa tɩlɛ? b) Ãnd togs-n-taar la d segd n dɩke?

¹¹ D sã n fees d meng n bãng bũmb nins d sẽn segd n demsã, yaa tɩlɛ tɩ d modg n sɩd demse. Mao n tall zood sõma ne Zeova wã yaa yõor yelle. (Rom. 8:6-8) La a Zeova pa baood tɩ tõnd zems zãng ye. A sõngda tõnd ne a vʋʋsem sõngã maasem, tɩ d tõe n yɩ neb tẽeb sẽn bɩ. Baasgo, yaa tɩlɛ tɩ tõnd me maan modgre. Daar a ye, saam-biig a John Barr sẽn yɩ siglgã taoor lʋɩtb sull nedã wɛgsa Luk 13:24, n yeel yaa: “Wʋsg pa tõog n tũ rigno-sẽkẽ wã n kẽ, bala b pa maan modgr sẽn sek b tẽebã na tall pãng ye.” D segd n dɩka a Zakoob togs-n-taare. A maoo ne malɛk hal n wa paam t’a ning-a barka. (Sɩng. 32:27-29) Yaa sɩd tɩ Biiblã zãmsg tõe n yɩ-d-la noogo, la d pa segd n karemd-a wa sebr d sẽn karemd a noomã yĩng bal ye. D segd n modgame n bao n bãng bõn-paala, tɩ sõng-do.

12, 13. a) Bõe n na n sõng-d tɩ d tũ Rom-dãmb 15:5 wã goamã? b) Wãn to la tʋm-tʋmd a Pɩyɛɛr kibarã la a saglgã tõe n sõng-do? d) Bõe la y tõe n maan n paas y tẽebã pãnga? (Ges-y zĩ-gũbrã.)

¹² D sã n modgd n na n paasd tõnd ne a Zeova zoodã, vʋʋsem sõngã na n kõ-d-la pãng tɩ d toeem d tagsa wã. Tarẽ-n-tarẽ, d wat n tagsda wa Kiristã. (Rom. 15:5, MN) Sẽn paase, vʋʋsem sõngã na n sõng-d lame tɩ d tõog n yiis tʋls-wẽns buud fãa d sũurẽ wã, la d bɩɩs zʋgd sẽn tat Wẽnnaam yam. (Gal. 5:16, 22, 23) D sã n wa mik tɩ d nong n tagsda ligdã la teedã yelle, wall d yĩngã raab yelle, d pa segd n koms raood ye. D wɩng ne pʋʋsgo, n kos a Zeova t’a kõ-d a vʋʋsem sõngã tɩ sõng-d tɩ d toeem d tagsa wã, n tags bõn-sõma yelle. (Luk 11:13) D tẽeg tʋm-tʋmd a Pɩyɛɛr yelle. Pa wakat fãa la a tags wa Kiristã ye. (Mat. 16:22, 23; Luk  22:34, 54-62; Gal. 2:11-14) La a pa koms raood ye. Bilf-bilfã, ne a Zeova sõngre, a Pɩyɛɛr wa n tõogame n tagsd wa Kiristã. Tõnd me tõe n wa tõogame.

¹³ Kaoosg zugẽ, a Pɩyɛɛr sõdga zʋg-sõma sẽn tõe n sõng-do. (karm-y 2 Pɩyɛɛr 1:5-8.) D segd n maana d “pãng sẽn tõe fãa,” n bɩɩs yõk-m-menga, sũ-tõogo, saam-biir nonglem la zʋg-sõma a taaba. Daar fãa, d tõe n soka d meng yaa: ‘Zʋg-sõng bʋg la m tõe bɩɩs rũndã, n paas m tẽebã pãnga?’

14. D sã n yaa ned vʋʋsem sõngã sẽn wilgd sore, wãn to la na n sõng tõnd d vɩɩmã pʋgẽ?

¹⁴ D sã n tagsd wa Kiristã, na n sõngame tɩ d tʋʋmã zĩigẽ wall lekollẽ wã bɩ d no-goamã la d manesmã yɩ sõma. D yam-yãkr fãa me na n wilgame tɩ d maoodame n na n dɩk Kiristã togs-n-taare. D sã n yaa ned vʋʋsem sõngã sẽn wilgd sore, d pa na n bas tɩ baa fʋɩ sãam tõnd ne a Zeova zoodã ye. D sã n wa be makr pʋgẽ, d tẽebã na n sõng-d lame tɩ d tõog d menga, n da maan wẽng ye. D sã n wa rat n yãk yam, yɩta sõma tɩ d reng n sok d meng yaa: ‘Biiblã sagl-bʋs n na n sõng-ma? Sã n da yaa a Zeezi, bõe la a ra na n maane? Yam-yãk-bʋg n na n noog a Zeova sũuri?’ D segd n minim n maanda woto. D rɩk makr ne yɛl a wãna, la d ges Biiblã sagls nins sẽn tõe n sõng-d tɩ d bãng n yãk yam tɩ zems yell fãa pʋgẽ.

15, 16. D sã n tagsd wa Kiristã, wãn to la na n sõng-do, a) d sã n wa baood ned n na n kẽ kãadem? b) d sã n wa baood zo-rãmba?

¹⁵ D sã n wa baood ned n na n kẽ kãadem. D segd n tũu saglg ning sẽn be 2 Korẽnt-rãmb 6:14, 15 wã. (Karm-y-yã.) A Poll gomdã wilgda vẽeneg tɩ ned sẽn sakd tɩ vʋʋsem sõngã wilgd-a sor ne ned sẽn vɩ a meng yĩng pa tõe n tũ taab tɩ yãk neng zãng ye. Wãn to la a gomdã tõe n sõng-yã, y sã n wa baood ned n na n kẽ kãadem?

¹⁶ D sã n wa baood zo-rãmba. D segd n tũu saglg ning sẽn be 1 Korẽnt-rãmb 15:33 wã. (Karm-y-yã.) Ned sẽn sakd tɩ vʋʋsem sõngã wilgd-a sor pa na n saag n yõg zood ne neb sẽn tõe n kɩt t’a tẽebã koms ye. Bõe la d tõe n sok d menga, tɩ sõng-d tɩ d bãng n tũ Biiblã saglgã? Wala makre, d tõe n soka d meng yaa: ‘Wãn to la tõe n sõng-m tɩ m bãng n yãk neb nins m sẽn mi n sõsd ne ẽntɛrnetã pʋgẽ wã? Neb m sẽn pa mi sã n dat tɩ d naag taab n tão ze-video-rãmb ne ẽntɛrnetã maasem, m maanda wãna?’

17-19. D sã n sakdẽ tɩ vʋʋsem sõngã wilgd-d sore wãn to la na n sõng-do, a) tɩ d ra pʋg bũmb sẽn ka yõodo? b) tɩ d bãng n yãk d sẽn dat n wa maanã? d) tɩ d bãng d sẽn na n maaneg mo-yõsr sasa?

¹⁷ Bũmb nins sẽn tõe n wa gɩdg d tẽebã bɩʋʋngã. A Poll sẽn yeel kiris-nebã bũmb ning tɩ be Ebre-rãmb 6:1 pʋgẽ wã yaa keoogre. (Karm-y-yã.) Bõe la a Poll sẽn bool tɩ “tʋʋm nins sẽn yaa kũumã,” tɩ d segd n lak d meng ne wã? Yaa bũmb nins sẽn ka yõodo, sẽn pa sõngd tõnd tɩ d tẽebã bɩ wã. A Poll  gomdã tõe n sõnga tõnd bũmb wʋsg pʋgẽ. D sã n wa rat n maan afɛɛr bɩ bũmb a to, d sok d meng yaa: ‘Mam segd n kẽesa m meng afɛɛr-kãnga pʋgẽ bɩ? Bũmb ning m sẽn dat n maanã naaga bũmb nins sẽn ka yõodã bɩ? Bõe yĩng tɩ m pa segd n naag sul nins sẽn maood n dat n toeem yɛlã?’

¹⁸ D sẽn dat n wa maan a Zeova tũudmã pʋgẽ wã. A Zeezi sẽn wa n sõsd ne nebã tãngã zugã, a kõo saglg sẽn tõe n sõng-d tɩ d bãng n yãk d sẽn dat n wa maanã. (Mat. 6:33) Sẽn sakd-a tɩ vʋʋsem sõngã wilgd-a sor lʋɩɩsda Rĩungã yɛl taoore. Rẽ sã n be d yamẽ, na n kɩtame tɩ d sok d meng yaa: ‘Yaa tɩlɛ tɩ m kẽng inivɛrsite n tɩ karem bɩ? M segd n saka tʋʋmd buud fãa bɩ?’

¹⁹ Mo-yõsã. A Poll kõo Rom tigingã neb saglg sẽn tõe n sõng tõnd mo-yõsr sasa. (Rom. 12:18) D sẽn maood n dɩkd Kiristã togs-n-taarã, d maanda d sẽn tõe fãa ‘tɩ laafɩ zĩnd tõnd ne nebã fãa sʋka.’ Tõnd ne d to moor sã n yõsge, d maanda wãna? D yaa ned sẽn pa sakd n deeg a taabã sẽn yet bɩ, bɩ d taabã neeme tɩ d yaa ned sẽn baood laafɩ?—Zak 3:18.

20. Bõe yĩng tɩ y rat n maan y sẽn tõe fãa n kell n yɩ ned vʋʋsem sõngã sẽn wilgd sore?

²⁰ Woto yaa makr a wãn bal sẽn kõt kaset tɩ Wẽnnaam noyã la a saglsã tõe n sõnga tõndo, tɩ d yam-yãkr fãa wilg tɩ d yaa ned vʋʋsem sõngã sẽn wilgd sore. D sã n sakdẽ tɩ vʋʋsem sõngã wilgd-d sore, d paamda sũ-noogo, tɩ d vɩɩmã tar barka. A Robɛɛr, rao ning yell d sẽn da gomã yeelame: “Mam sẽn mao n paam zood sõma ne a Zeova wã tɛka, m lebga sɩd-sõngo, n get m kambã me yell sõma. M sũur lebga noogo.” Tõnd me sã n maan d sẽn tõe fãa n ket n bɩɩsd d tẽebã, d na n paama bark ka tɛka. Masã menga, d na n paamame tɩ d vɩɩmã yɩ noogo, la d wa paam “vɩɩm hakɩɩkã” beoog-daare.—1 Tɩm. 6:19.