1, 2. Bõe yĩng tɩ rũndã-rũndã vɩɩmã pa nana ne a Zeova Kaset rãmbã? (Ges-y fot-rãmbã sẽn be yĩngrã.)

LOGTOƐƐMB wʋsg tʋmda logto-yiy sẽn pid ne neb sẽn tar bã-longdse. B geta bãad-kãens yelle, b sẽn dat n sõng-bã yĩnga. La yaa tɩlɛ tɩ b kogl b mense, tɩ b bãasã ra wa long-b ye. Tõnd wʋsg bee yell sẽn wõnd woto pʋgẽ. Sɩd me, d zagsẽ wã wall d tʋʋmã zĩisẽ, d mi n bee ne neb sẽn tar tagsa la yel-manesem sẽn yaa toor fasɩ ne Wẽnnaam sẽn datã. Rẽ kɩtame tɩ pa nana ne-d ye.

² Dũniyã sẽn be a yaoolem wakatã, neb wʋsg maanda b toog kae ne Wẽnnaam noyã. Lɛtr a yiib-n-soabã tʋm-tʋmd a Poll sẽn gʋls n tool a Tɩmote wã pʋgẽ, a wilga nebã yel-manesem sẽn na n yɩ to-to. A yeelame tɩ dũniyã sɛɛb sã n kolgdẽ, b yel-manesmã me na n lebgda wẽng n paasdẽ. (Karm-y 2 Tɩmote 3:1-5, 13.) Yaa sɩd tɩ nebã manesem-wẽnsã tõe n sãama d sũur wʋsgo. La d sã n pa gũusi, d tõe n wa tagsda wa bãmba, la d rat n maand wa bãmba. (Yel. 13:20) Sõs-kãnga pʋgẽ, d na n yãame tɩ Wẽnnaam nin-buiidã yaa tor fasɩ ne dũniyã nebã, bala bãmb bɩɩsda zʋg-sõma. D na n yãa d sẽn tõe n maan me n da wa rɩk dũniyã  nebã zʋg-wẽnse, baa d sã n wa sõngd-ba, n dat tɩ b bãng a Zeova.

3. Yaa nin-bʋs buud yell la b sẽn gomd 2 Tɩmote 3:2-5 wã?

³ A Poll yeelame tɩ ‘yaoolem wakatã, tood na n zĩndame.’ Rẽ poore, a sõdga hal zʋg-wẽns 19 nebã sẽn na n talle. A sẽn sõdg zʋg-wẽns ninsã wõnda a sẽn sõdg b rãmb Rom-dãmb 1:29-31 wã. Sẽn paase, goam kẽer la a pʋd-yã, tɩ pa be zĩig a to Biiblã babg ning b sẽn da gʋls ne gɛrkã pʋgẽ ye. A Poll goamã sɩngrẽ, a yeelame tɩ “nebã na n yɩɩ . . .” La pa rat n yeel tɩ nebã fãa na n talla zʋg-wẽnsã a sẽn sõdgã ye. Kiris-neb hakɩɩkã na n yɩɩ toor fasɩ.—Karm-y Malasɩ 3:18.

4. Bõe n wilgd tɩ ned yaa wuk-m-meng soaba?

⁴ A Poll sẽn yeel tɩ neb wʋsg na n yɩɩ beed rãmb la ligd noangdbã, a paasame tɩ kẽer na n yɩɩ yʋ-baoodba, wilg-m-mens rãmb la wuk-mens-rãmba. Sẽn tar-b zʋg-wẽns a woto wã nong n tagsdame tɩ b são b taabã, b tõog wall b neerem, pa rẽ bɩ b tarem wall b yʋʋm bɩ b naam yĩnga. Neb a woto tʋllame tɩ b taabã waoog-b tɩ looge. Bãngd a ye yeelame tɩ ned sã n yaa wuk-m-meng soaba, yaa wa a “tara tẽn-kugr a sũurã pʋgẽ, n wõgemded a taoor n waoogd a menga.” Neb kẽer yeelame tɩ wuk-m-meng pa be yamleoog baa-baa, hal tɩ wuk-m-meng soab sã n ne a to sẽn yaa woto, pa sakd-a ye.

5. Bõe n wilgd tɩ baa neb sẽn da tũud a Zeova sõma wa n wuka b mense?

⁵ A Zeova kisa wuk-m-menga. Biiblã wilgame t’a kisa “tɩtaam-gesgo.” (Yel. 6:16, 17) Wuk-m-meng kɩtdame tɩ ned pa tõe n paam Wẽnnaam zood ye. (Yɩɩn. 10:4) Wuk-m-mengã yaa a Sʋɩtãan zʋgo. (1 Tɩm. 3:6) Bʋko, baa neb sẽn da tũud a Zeova ne b sũy fãa wa n wuka b mense. Wala makre, na maan yʋʋm wʋsgo, rĩm a Ozɩyaas tũu a Zeova sõma. La Biiblã yeelame: “Yẽnda sẽn wa n mik t’a pãngã lebga wʋsgã, yẽnda wuka a meng tɩ wa ne a sãoongo. Bala, yẽnda maana sẽn ka zems ne Sẽn-Ka-Saab sẽn yaa yẽnda Wẽnnaamã. Yẽnda kẽe Sẽn-Ka-Saab roogã pʋg n na n yõog tɩdar wisd tẽn-kugrã zugu.” Rĩm a Ezekɩyaas sẽn da tũud a Zeova ne a sũur fãa wã me wa n wuka a menga, la pa kaoos wʋsg ye.—2 Kib. 26:16; 32:25, 26.

6. Bõe yĩng t’a Davɩɩd ra tõe n lebg wuk-m-meng soaba, la bõe n kɩt t’a kell n yɩ sik-m-meng soaba?

⁶ Neb kẽer wukda b mense, b neerem, b pãnga, b naam wall b yʋʋr sẽn yi yĩnga, pa rẽ bɩ minim b sẽn tar mizikã wɛɛngẽ yĩnga. Tõe me tɩ yaa bũmb sãnda la b tõogd n maandẽ, hal tɩ nebã pẽgd-ba. A Davɩɩd ra tara woto fãa, la a kell n yɩɩ sik-m-meng soaba. A sẽn kʋ a Goliatã poore, rĩm a Sayull rɩka a bi-pugl n kõ-a t’a maan a paga. La a Davɩɩd yeelame yaa: “Mam yaa ãnda, la mam buudã ne m ba wã zak rãmb yaa ãnda rãmb Israyɛll buudã sʋka, tɩ mam na n lebg rĩmã rɛɛmba?” (1 Sãm. 18:18) Bõe n sõng a Davɩɩd t’a kell n yɩ sik-m-meng soaba? A ra miime tɩ yaa a Zeova sẽn sik a meng n ‘sulg n ges’ yẽ wã yĩng la a sẽn tar zʋg-sõma, la tõog ne minim n tõe n maan bũmb kẽerã. (Yɩɩn. 113:5-8) A ra miime tɩ bõn-sõma nins fãa a sẽn tarã yaa a Zeova n kõ-a.—Ges-y 1 Korẽnt-rãmb 4:7.

7. Bõe n na n sõng-d tɩ d yɩ sik-m-mens rãmba?

⁷ Rũndã-rũndã me, a Zeova nin-buiidã maoodame n na n kell n yɩ sik-m-mens rãmb wa a Davɩɩde. D sẽn mi tɩ baa ne a Zeova sẽn yaa pãng sẽn-ka-to soabã, a yaa sik-m-meng soabã noom-d-la wʋsgo. (Yɩɩn. 18:35, MN) D maoodame n tũud  saglg Biiblã sẽn kõ. Ad b sẽn yeele: “Bɩ y yelg nimbãan-zoeer meng-menga, la sõmblem, la sik-m-menga, la sũ-bʋgsem, la sũ-mar wa futu.” (Kol. 3:12) D miime me tɩ “nonglem ka fʋʋmd a menga, a ka maand wilg-m-menga.” (1 Kor. 13:4) Nebã sã n neẽ tɩ d yaa sik-m-mens rãmba, tõe n kɩtame tɩ b rat n bao n bãng a Zeova. Wa saam-bi-poak yel-manesem sẽn tõe n kɩt t’a sɩd sẽn pa tũud a Zeova wa sak n tũ-a wã, tõnd me sik-m-mengã tõe n sõngame tɩ nebã rat n tũ a Zeova.—1 Pɩy. 3:1, 2.

8. a) Kẽer tagsg yaa wãn ne kambã sẽn kɩɩsd b roagdbã? b) Bõe la Biiblã yet kambã?

⁸ A Poll wilga nebã ne taab yel-manesem sẽn na n yɩ to-to yaoolem wakatã. A yeelame tɩ kambã na n kɩɩsda b roagdbã. Wakat ninga, nebã pa get tɩ rẽ yaa wẽng ye. Sɛbã, filim-dãmbã la tele wã pʋgẽ, b pʋd n maandame tɩ yaa wa yaa bũmb sẽn zemse. La sɩd-sɩdã, kambã sẽn kɩɩsd b roagdbã sãamda zagsã rãmb zems-n-taare. Zems-n-taar sã n yaool n pa be zagsã pʋsẽ, yɩta toog tɩ zems-n-taar zĩnd nin-buiidã me sʋka. Hal sẽn kaoose, ninsaalbã mii rẽ. Wala makre, pĩnd wẽndẽ Gɛrɛs soolmẽ wã, ned sã n pãb a ba bɩ a ma, b ra yiisd-a-la buudu. Rom soolmẽ wã me, ned sẽn pãb a ba, ne ned sẽn kʋ a to fãa yaa yembre. Biiblã babg ning b sẽn da gʋls ne ebre wã ne babg ning b sẽn da gʋls ne gɛrkã fãa pʋgẽ, b yetame tɩ kambã segd n waooga b roagdbã.—Yik. 20:12; Efɛ. 6:1-3.

9. Bõe n na n sõng kambã tɩ b sakd b roagdbã?

⁹ Kambã sã n tagsd b roagdbã sẽn maand bũmb nins n kõt-bã, n wilgd tɩ b sũur nooma ne rẽ, na n sõng-b lame tɩ b ra yɩ kɩɩsdb wa b taabã ye. Sẽn yɩɩd fãa, b segd n tẽegdame tɩ yaa a Zeova sẽn yaa d fãa Ba wã n dat tɩ b waoog b roagdbã. Kambã sã n pa gomd b roagdbã yell wẽnga, na n sõnga b taabã tɩ bãmb me waoogd b roagdbã. La yaa vẽeneg tɩ roagdbã sã n pa tar nimbãan-zoeer bɩ nonglem, na n yɩɩ toog tɩ b kambã sakd-b ne b sũy fãa. La biig sã n neẽ t’a roagdbã sɩd nong-a lame, a na n data ne a sũur fãa n kell n sak-ba, baa sã n wa yaa toogo. Bi-bɩɩg yʋʋr sẽn boond t’a Ostin yeelame: “M da mi n dat n maana sẽn pa segde, la m doagdbã ra gãnega noy sẽn pa toog wʋsgo, la b wilg-m noor fãa võore, la b maan me tɩ m da tõe n yẽsd ne-b nana-nana. Rẽ sõnga maam tɩ m kell n sak-ba. M da nee vẽeneg tɩ m yell pak-b lame, tɩ rẽ kɩt tɩ m da rat n maan m sẽn tõe fãa n noog b sũuri.”

10, 11. a) Zʋg-wẽns bʋs n wilgd tɩ nebã sɩd pa nong taaba? b) Hal sẽn ta zĩ-bʋg la kiris-neb hakɩɩkã nong b taabã?

¹⁰ A Poll sõdga zʋg-wẽns a taab sẽn wilgd tɩ nebã pa nong taab ye. A sẽn yeel tɩ kambã na n kɩɩsda b roagdbã poore, a yeelame tɩ nebã na n yɩɩ zɩ-beoog rãmba. Zʋg-kãensã a yiibã sẽn pʋgd taabã sɩd zemsame, bala ned sã n yaa zɩ-beoog soaba, a pa nand bũmb nins b sẽn maand n kõt-a wã ye. A Poll yeelame me tɩ wʋsg na n yɩɩ nen-kɛgems rãmba, neb sẽn pa baood laafɩ. B na n yɩɩ neb sẽn nong tʋya la zãmb dãmba, n nong n gomd n paoogd b taabã, la baa Wẽnnaam menga. Sẽn paase, b na n yɩɩ tẽn-kãn-neba, rat n yeel tɩ neb sẽn dõt b taaba, n dat n sãam b yʋʋre. *

¹¹ A Zeova nin-buiidã yaa toor fasɩ ne neb a taabã, bala b nonga b taabã ne  nonglem hakɩɩka, nonglem buk ning b sẽn boond ne gɛrk tɩ agapɛ wã. La rẽ pa sɩng masã ye. A Zeezi yeelame t’a Moyiiz tõogã noor ning sẽn yaa-a kãseng n yɩɩdã yaa ‘nong Wẽnnaam,’ la tɩ sẽn pʋgd-a wã yaa ‘nong f to.’ (Mat. 22:38, 39) A yeelame me tɩ yaa kiris-neb hakɩɩkã sẽn na n nong taabã n na n kɩt tɩ nebã bãng tɩ b sɩd yaa yẽ karen-biisi. (Karm-y Zã 13:34, 35.) B na n nonga baa b bɛɛbã menga.—Mat. 5:43, 44.

12. Bõe la a Zeezi maan-yã, tɩ wilgdẽ t’a nonga nebã?

¹² A Zeezi wilgame t’a sɩd nonga nebã. A ra gilgda tẽnsã, n taasd nebã Rĩungã koe-noogã. A kɩtame tɩ zoens nin puki, tɩ wobs la põy kẽne, tɩ wãoob paam laafɩ, la a kɩt tɩ wʋms wʋmdẽ. A vʋʋga neb sẽn ki menga. (Luk 7:22) A pʋd n sakame n ki ãdem-biisã yĩnga, baa wʋsg sẽn da kis-a wã. A rɩka a Ba wã togs-n-taar bal kɛpɩ, n wilg nonglem sẽn ka to. Dũniyã gill zugu, a Zeova Kaset rãmbã rɩkda a Zeezi togs-n-taare, n wilgd b taabã b nonglem.

13. D sã n wilgd d taabã d nonglem, wãn to la tõe n kɩt tɩ b rat n bao n bãng a Zeova?

¹³ D taabã sã n neẽ tɩ d nong-b lame, na n kɩtame tɩ b rat n bao n bãng d saasẽ Ba wã. Wala makre, Taylãnd soolmẽ wã, rao a ye n kẽng tõnd rasem a tãab tigis-kãsengẽ, n yã d tẽed-n-taasã sẽn nong taab to-to wã, hal tɩ yɩ-a noogo. A sẽn lebg n kulã, a kosa a Zeova Kaset rãmbã tɩ b wat n zãmsd-a Biiblã naoor a yiib semen fãa. A taasa a roagdbã fãa Rĩungã koe-noogã. Kiis a yoob poor bala, a maana a pipi Biibl kareng Rĩungã roogẽ. Sẽn na yɩl n bãng d sã n sɩd wilgdame tɩ d nonga d taabã, d sok d meng yaa: ‘M maanda m sẽn tõe fãa n sõngd m zakã rãmba, m tigingã neba, la koe-moonegã zĩigẽ neb bɩ? M maoodame n nong m taabã baa ne b pãn-komsmã wa a Zeova bɩ?’

14, 15. Zʋg-bʋs la wʋsg tara, tɩ kɩt tɩ b yaa wa rũmsi? Wãn to la kẽer tõog n toeeme?

¹⁴ Zʋg-wẽns a taab la nebã tar yaoolem  wakatã, tɩ rẽ me kɩt tɩ d segd n zãag d mens ne-ba. Wala makre, wʋsg toog ka be ne sõmblem ye. B kisa sẽn yaa sõma, la b pʋd n maand b sẽn tõe fãa n gɩdgd sõma buud fãa maanego. Neb a woto pa tar yõk-m-menga, b yaa nin-wẽnse. Kẽer yaa sũ-tʋʋls rãmba, bɩ tʋb-pa-wʋmdba, wall neb sẽn pa gũusda.

¹⁵ Wʋsg ra yaa wa we-rũmsi, la b wa n tõog n toeemame. Woto yaa bũmb Biiblã sẽn da pĩnd n togse. (Karm-y Ezayi 11:6, 7.) Wala makre, b yeelame tɩ rigd-n-yĩids ne gɩgma na n zĩnda zĩig a ye ne pe-bi la nag-bi, tɩ laafɩ be b sʋka. Bõe n kɩt tɩ laafɩ be b sʋka? Ad Biiblã sẽn yete: “Bala, dũniyã gill na n pida ne Sẽn-Ka-Saab bãngre, wa ko-kãsengã sẽn pidã.” (Eza. 11:9) Rũng pa tõe n bao n bãng a Zeova ye. Dẽnd yaa Biiblã sẽn na n sõng nebã tɩ b toeemã yell la bãngr-gom-kãngã sẽn gomdã.

16. Wãn to la Biiblã sõng neb tɩ b toeeme?

¹⁶ Tõnd sʋkã, kẽer ra yaa nin-wẽnse, hal n da yaa wa rigd-n-yĩidsi. La masã, b yaa neb sẽn nong laafɩ. Y sã n dat n karem sãnda kibay bɩ y kẽ jw.org pʋgẽ n ges sõss nins gom-zug sẽn yaa: “Biiblã toeemda neba.” Neb nins sẽn bãng a Zeova, n tũud-a wã pa wa sẽn maand-b wa b sakda Wẽnnaam, tɩ b yel-manesmã yaool n wilgdẽ tɩ b kɩɩsd-a lame wã ye. Nand tɩ kẽer bãng a Zeova, b ra yaa nin-wẽnse, la masã, b yeelga “nin-paalgã wa fuugu, nin-paalg ning Wẽnnaam sẽn naan wa b sẽn data, tɩrlem la sõmblem sɩd sẽn wat ne wã pʋgẽ.” (Efɛ. 4:23, 24) Nebã sã n zãmsd Biiblã, n bãngd Wẽnnaam sõma, b wat n neeme tɩ yaa tɩlɛ tɩ b tũud a noyã. Rẽ kɩtdame tɩ b rat ne b sũy fãa n bas bũmb kẽer b sẽn tẽede, la b rat n toeem b tagsa wã la b yel-manesmã. Yaa sɩd tɩ toeeng a woto pa nana ye. La ne vʋʋsem sõngã maasem, Wẽnnaam sõngda sẽn dat-b ne b sũy fãa n ta a yamã tɩ b tõoge.

17. Bõe n na n sõng-d tɩ d ra wa rɩk sẽn pa tũud-b a Zeova wã zʋg-wẽnsã?

¹⁷ Rũndã-rũndã, yɩl n bãng sẽn tũud-a Wẽnnaam ne sẽn pa tũud-a n bak lebgda nana. Tõnd sẽn tũud Wẽnnaamã, d segd n gũusame n da wa rɩk neb nins sẽn pa tũud-a wã zʋg-wẽnsã ye. D tũuda Biiblã sẽn yeelã, n zãagd d mens ne neb nins yell b sẽn gomd 2 Tɩmote 3:2-5 wã. Yaa sɩd tɩ d pa tõe n lak d mens fasɩ ne-b ye. Kẽer yaa d tʋmd-n-taase, d karen-bi-taase. Tõe me tɩ d bee zag-yɛng ne sãnda. La d pa segd n dɩk b togs-n-taare, n tagsd wa bãmba, la d maand wa bãmb ye. Bõe n na n sõng-do? Yaa tɩlɛ tɩ d zãmsd Biiblã, la d yõg zood ne neb nins sẽn dat ne b sũy fãa n tũ a Zeova wã. Woto, tõnd ne a Zeova zoodã pãng na n paasame.

18. Wãn to la d no-goamã, la d sẽn zãad d mensã sõma wã tõe n kɩt tɩ d taabã bao n bãng a Zeova?

¹⁸ Yaa tɩlɛ me tɩ d maan d sẽn tõe fãa n sõng d taabã tɩ b bãng a Zeova. Bao-y segb buud fãa, n taas-b koɛɛgã, la y pʋʋs a Zeova t’a sõng-y tɩ y bãng y sẽn na n yɛɛlga, la wakat ning sẽn zemse. D segd n maaname tɩ d taabã bãng tɩ d yaa a Zeova Kaset rãmba. Woto, nebã na n pẽga Wẽnnaam tõnd yel-manesmã sẽn yaa sõma wã yĩnga. Pa tõnd la b na n pẽg ye. A Zeova zãmsda tõnd sẽn na yɩl “tɩ d bas wẽn-kɩɩsgo la dũniyã ratem wẽnsã la d vɩɩmd zamaan kãnga pʋgẽ ne gũus-m-menga la tɩrlem la d sak Wẽnnaam.” (Tit 2:11-14) D sã n sakd a Zeova, n zãad d mensã sõma, d taabã na n yãame, la tõe meng tɩ kẽer yeel-d yaa: “Tõnd na n tũu yãmb n kẽnge. Bala, tõnd wʋmame tɩ Wẽnnaam bee ne yãmba.”—Zaka. 8:23.