1, 2. Bõe la a Zeova maand ne bũmb nins a sẽn so wã?

A ZEOVA yaa Wẽnnaam sẽn yaa kõata. Tõnd sẽn tarã fãa yita yẽ nengẽ. Sãnemã, wanzuri wã, la tẽngã bõn-sõma a taabã fãa yaa a Zeova n so. A tũnugda ne rẽ tɩ bõn-vɩɩsã paamd sẽn yaa tɩlɛ wã. (Yɩɩn. 104:13-15; Aaze 2:8) Kibay wʋsg n be Biiblã pʋgẽ, n wilgd a Zeova sẽn mi n maan yel-solemde, n pids a nin-buiidã bõn-daabo.

² Wala makre, Israyɛll buudã sẽn zĩnd we-raoogẽ wã yʋʋm pis-naasã, a Zeova gesame tɩ b paam mannã, la koom. (Yik. 16:35) Rẽ n so tɩ ‘bũmb ka paoog-b ye.’ (Nee. 9:20, 21) A Zeova sõnga no-rɛɛs a Eliize t’a maan yel-solemde, tɩ kaam bilf pʋg-kõor a ye sẽn da tar lebg wʋsgo. Sõngame tɩ pagã paam ligd wʋsg n yao a samã fãa, hal tɩ sẽn kellã sek a na tõog n ges yẽ ne a kom-dibli wã yelle. (2 Rĩm. 4:1-7) A Zeova sõnga a Zeezi me t’a maan yel-solemde, n sõng tɩ neb paam rɩɩbo, la baa ligd menga.—Mat. 15:35-38; 17:27.

3. Sogs-bʋs la d na n leok sõs-kãnga pʋgẽ?

³ Bũmb nins a Zeova sẽn so wã pa tol n tõe n bãng n sõd ye.  A tõe n tũnuga ne bũmb fãa tɩ bõn-vɩɩsã sẽn be tẽng zugã paam sẽn yaa tɩlɛ wã. La a wilgame t’a ratame t’a nin-buiidã kõt b sẽn tare, n teend a siglgã tʋʋmã. (Yik. 36:3-7; karm-y Yel-bũn 3:9.) Bõe yĩng t’a Zeova rat tɩ tõnd me yãkd d paoongã n kõt yẽ? Bõe la pĩnd wẽndẽ wẽn-sakdbã ra maand n teend a Zeova tũudmã tʋʋmã? Rũndã-rũndã, bõe la a Zeova siglgã maand ne ligdã nebã sẽn kõtã? Sõs-kãnga pʋgẽ, d na n leoka sogs-kãensã.

4. D sã n yãk d paoong n teel a Zeova tũudmã tʋʋmã, wilgda bõe?

⁴ D yãkda d sẽn tarã n kõt a Zeova, d sẽn nong-a, tɩ d sũur noom ne-a wã yĩnga. D sã n tags bũmb nins fãa a sẽn maan n kõ-dã, d sũ-noogã pa tõe n bãng n bilgi, tɩ d rat n maan bũmb n wilg tɩ d pa zɩ-beoog rãmb ye. Tõnd me tagsda wa rĩm a Davɩɩde. A sẽn wa n sõdgd bũmb nins b sẽn na n tall n me wẽnd-doogã, a yeelame tɩ bũmb fãa yita a Zeova nengẽ, la tɩ bũmb nins tõnd sẽn kõt a Zeova wã fãa yaa yẽ n kõ-do.—Karm-y 1 Kibay 29:11-14.

5. Bõe la Biiblã yeta, tɩ wilgdẽ tɩ d sẽn yãkd d sẽn tarã n kõt a Zeova wã naaga bũmb nins d sẽn maand n waoogd-a wã?

⁵ D tẽeg me tɩ d sẽn yãkd d sẽn tarã n kõt a Zeova wã naaga bũmb nins d sẽn maand n waoogd-a wã. Vẽnegr pʋgẽ, tʋm-tʋmd a Zã yãa malɛgs sẽn yet a Zeova yaa: “Tõnd Zu-soab la d Wẽnnaam, yãmb n zems tɩ reeg ziiri, la waoogre, la pãnga. Bala, yãmb n naan bũmb fãa, la yaa yãmb daab yĩng la y naan-b tɩ b beẽ.” (Vẽn. 4:11) Sɩd-sɩdã, segdame tɩ d kõt a Zeova d bõn-sõma wã, bala a toga ne waoogr la ziiri. A ra kɩtame t’a Moyiiz yeel Israyɛll nebã tɩ yʋʋmd fãa bɩ b maan tigr naoor a tãab n waoog yẽ. La a wilgame tɩ tigr fãa sasa, b pa “tog n wa Sẽn-Ka-Saab taoor nug-zaal ye.” (Tõo. 16:16) Rũndã-rũndã me, d sẽn yãkd d paoongã n kõt a Zeova ne yamleoogã yaa bũmb sẽn waoogd-a. D sẽn maand woto wã, d teenda a tũudmã tʋʋmã, tɩ wilgdẽ me tɩ d sũur nooma ne a siglgã sẽn maandã.

6. D sã n yaa kõatba, manegd-a tõnd mengã. Bõe yĩnga? (Ges-y sõsgã sɩngrẽ fotã.)

⁶ Ned sã n yaa kõata, manegd-a lame n yɩɩd a sẽn na n bas tɩ yaa a taabã n kõt-a t’a reegdẽ bala. (Karm-y Tʋʋm 20:35.) D rɩk makr ne biig sẽn tigs ligd a roagdbã sẽn kõt-a, n wa yãk n da bũmb n ko-ba. A roagdbã sũur kõn yɩ noog wʋsg ne-a sɩda? D tõe n dɩka makr me ne bi-bɩɩg sẽn yaa so-pakda, n ket a roagdbã zakẽ. A sã n kõ a roagdbã ligd bilf n na n sõng ne zakã yell gesgo, b sũur na n yɩɩ noogo. Tõe tɩ b ra pa tags t’a na n maana woto ye. La b na n sak n deega a kũunã. Bõe yĩnga? Bala b biigã kũunã wilgdame t’a sũur nooma ne bũmb nins fãa b sẽn maand n kõt-a wã. Woto me, a Zeova miime tɩ d sã n yãkd d paoongã n kõtẽ, manegda tõnd mengã.

7, 8. Mak-sõng bʋg la pĩnd wẽndẽ wẽn-sakdbã kõ-yã, a) sã n yaa ne kõ kũun n teel tũudmã tʋʋmd takɩ wã? b) sã n yaa ne kõ n teel tũudmã tʋʋmd buud fãa wã?

⁷ Biiblã wilgda vẽeneg tɩ pĩnd wẽndẽ, a Zeova nin-buiidã ra kõta b sẽn tare, n teend a tũudmã tʋʋmã. Wakat ninga, b mi n kõo tʋʋmd takɩ yĩnga. Wala makre, b sẽn wa n na n ti sɛk-roogã, a Moyiiz yeela Israyɛll nebã tɩ b yãk bũmb nins b sẽn so wã n kõ tʋʋmdã yĩnga. Rĩm a Davɩɩd me sẽn wa n segend wẽnd-doogã meebã, a maana a buudu. (Yik. 35:5; 1 Kib. 29:5-9) Rĩm a Zoas wakatã, yaa nebã sẽn kõ ligd ningã la maan-kʋʋdbã tall n maneg a Zeova roogã. (2 Rĩm. 12:5, 6) Pipi kiris-nebã wakat me, komã sẽn wa n kẽ Zide soolmã, tɩ ra yaa tɩlɛ tɩ beenẽ kiris-nebã paam sõngrã, b tẽed-n-taasã “yãka yam tɩ ned kam fãa kɩs sõngr  ning sẽn zems a pãnga,” tɩ b tool-ba.—Tʋʋ. 11:27-30.

⁸ A Zeova nin-buiidã ra yãkda b paoongã n kõt n sõngd neb nins sẽn tʋmd tũudmã tʋʋm n yɩɩdã me. Wala makre, wa sẽn zems ne a Moyiiz tõogã, Levi buudã neb pa paam zĩis wa buud a taabã, tɩ yaa b pʋɩɩr ye. Yaa Israyɛll neb a taabã n da yãkd b paoongã piig pʋɩɩr n kõt-ba. Woto, sẽn da pak bãmb yaa b wɩng ne sɛk-roogã tʋʋm bala. (Sõd. 18:21) A Zeezi sẽn wa n be tẽng zugã me, pagb kẽer n da ‘yãkd b paoong n sõngd a Zeezi ne a karen-biisã.’—Luk 8:1-3.

9. Nebã ra maanda wãn n paamd bũmb n kõt n teend tũudmã tʋʋmã?

⁹ La yaa vẽeneg tɩ ned fãa sẽn maand to-to n na n paam bũmb n kõ n teel Wẽnnaam tũudmã tʋʋmã pa yembr ye. Israyɛll nebã sẽn wa n na n kõ kũun tɩ b ti sɛk-roogã, wõnda b yãka paoong ning me b sẽn tall n yi Eziptã. (Yik. 3:21, 22; 35:22-24) Pipi kiris-nebã wakatẽ wã, kẽer koosa b pʋt bɩ b zagse, n tall ligdã n wa kõ tʋm-tʋmdbã. Tʋm-tʋmdbã rɩka ligdã n pʋɩɩ sẽn dat-b sõngrã. (Tʋʋ. 4:34, 35) Kiris-neb sãnda me tigsa ligd bilf-bilfu, n wa rɩk n kõ n teel Wẽnnaam tũudmã tʋʋmã. (1 Kor. 16:2) Woto, sẽn tar-b la sẽn pa tar-bã fãa ra tõe n paama bũmb n kõ.—Luk 21:1-4.

10, 11. a) Kũunã wɛɛngẽ, wãn to la d tõe n dɩk pĩnd wẽn-sakdbã togs-n-taare? b) Y tagsg yaa wãn ne y sẽn paam n tõe n kõ kũun n teel Rĩungã tʋʋmã?

¹⁰ Rũndã-rũndã me, b tõe n mi n yeelame tɩ d kõ kũun n teel tʋʋmd takɩ. Wala makre, b sã n wa rat n me Rĩung ro-paalle, wall b rat n lebs n maneg d Rĩung roogã. Tõeeme me tɩ yaa d Betɛllã wall d tʋʋmdã biru la b rat n manege. Sasa ning me, yaa sẽn na n sõng ne tigis-kãseng seglgo, wall n sõng d tẽed-n-taas sabab-wẽns sẽn paame. Ligdã d sẽn kõtã sõngdame me tɩ b paamd n get sẽn tʋmd-b tõnd biru-kãsengẽ wã yelle, la sẽn tʋmd-b biru-rãmb a taabã sẽn be dũniyã gill zugã me yelle. Yaa d sẽn kõt bũmb ninsã me la b tar n sõngd misioneer-dãmbã, zall so-pakdbã, la tigims sull yel-gɛtbã. Tõe me tɩ yãmb tigingã neb rɩka no-sɩɩr n na n kõt kũun wakat fãa tɩ b paam n me tigis-kãsems rot la Rĩung rot n kõ d tẽed-n-taas sẽn be zĩis a taaba.

¹¹ Tõnd ned kam fãa tõe n kõo bũmb n teel tʋʋm nins a Zeova siglgã sẽn tʋmd dũniyã gill zug rũndã-rũndã sẽn yaa yaoolem wakatã. Naoor wʋsgo, ned pa mi sẽn yaa a soab n kõ kũunã ye. D ningda d kũunã kogendã sẽn be Rĩungã rotẽ wã, wall d tũnug ne jw.org n toole, la nebã pa bãngd ye. La d sã n tagsdẽ tɩ d kũunã pa zem bũmbu? D bãng tɩ siglgã paoongã yaa yamleoog kũunã d fãa sẽn kõt bilf-bilfã sẽn naag taaba. Pa wae n yaa ligd b sẽn kõ vãs woto ye. Baa d tẽed-n-taas nins farã sẽn namsdã rɩkda Masedoan kiris-nebã togs-n-taare. Masedoan kiris-nebã ‘naongã ra yaa wʋsgo,’ la b baas n kosa ne b sũyã fãa n na n naag n sõng Wẽnnaam nebã, hal n kõ n yɩɩd b pãng sẽn tõe menga.—2 Kor. 8:1-4.

12. Bõe la siglgã maanda, tɩ wilgdẽ tɩ b gũusda neer ne b sẽn maand ne ligdã nebã sẽn kõtã?

¹² Siglgã taoor lʋɩtb sull sẽn maand to-to ne ligd ning d sẽn kõtã wilgdame t’a sɩd tara yam, la t’a yaa sɩd soaba. (Mat. 24:45) B pʋʋsda wakat fãa n kot a Zeova sõngre, sẽn na yɩl n bãng b sẽn tog n maaneg ne ligdã tɩ zemse. Sẽn paase, b rengd n tags n gesa b sẽn dat n maan bũmb ning ne ligdã, la b geel neere. (Luk 14:28) Pĩnd wẽndẽ wã, wẽn- sakdb nins b sẽn da yãk tɩ b get ligd ning nebã sẽn kõtã yellã ra gũusda neer sẽn na yɩl tɩ b ra tall ligd-kãng n maan bũmb a to sẽn pa naag tũudmã tʋʋm ye. Wala makre, a Ɛsdras wa n leba Zerizalɛm ne arzɛk Pɛrs rĩmã sẽn kõ. Ra yaa sãnem, wanzuri, la bõn-sõma a taaba. Fãa ra yɩɩda dolaarã ligd milyõ koabga. A Ɛsdras nifẽ, woto fãa yaa kũun b sẽn kõ a Zeova. Rẽ n so t’a wilg b sẽn tog n maanega, tɩ baa ne sorã sẽn pid ne fãadbã bɩ arzɛkã fãa ta Zerizalɛm tɩ bũmb pa maan ye. (Ɛsd. 8:24-34) Pipi kiris-nebã wakatẽ wã me, yaa tʋm-tʋmd a Poll n deeg kũunã b sẽn kõ n na n teel Zide kiris-nebã. A gesame tɩ neb nins sẽn na n tɩ kõ ligdã maan bũmb fãa ne pʋ-peelem, “ka Zu-soabã nifẽ bal ye, la ninsaalbã nifẽ me.” (Karm-y 2 Korẽnt-rãmb 8:18-21.) Rũndã-rũndã me, a Zeova siglgã rɩkda a Ɛsdras ne a Poll togs-n-taare, n gũusd neer ne b sẽn maand bũmb ning ne ligdã nebã sẽn kõtã.

13. D tagsg segd n yɩɩ wãn ne bũmb nins siglgã sẽn toeem yʋʋmã noorã?

¹³ Wakat ninga, zak rãmb mi n gesa b sẽn tõe n maaneg n kẽgs ligdi, sẽn na yɩl tɩ ligd ning b sẽn yiisdã ra yɩɩg b tõog ye. B tõeeme me n tags n ges bũmb kẽer b sẽn tõe n base, n paam n tʋm tũudmã tʋʋm n paase. A Zeova siglgã me mi n maana woto. Yʋʋmã noorã, bũmb kẽer la siglgã yãk yam n na n maane. La kɩtame tɩ wakat ning bɩ ligd ning b sẽn yiisã yɩɩd nebã sẽn kõ wã. Rẽ n so tɩ siglgã baood a sẽn na n maan n paam n kẽgs ligdi, la a toeem d sẽn maand bũmb kẽer to-to wã sẽn na yɩl tɩ d tõog n maan d sẽn tõe fãa ne ligdã nebã sẽn kõtã.

14-16. a) Bõe la siglgã tõogd n maand ne ligdã y sẽn kõtã? b) Siglgã sẽn maandã nafda yãmb mengã wãn to?

¹⁴ Neb wʋsg sẽn tũud a Zeova hal sẽn kaoos yeelame tɩ siglgã sẽn yiisd bũmb nins rũndã-rũndã wã sõor paasa wʋsgo, la tɩ b ra zɩ n yã a buud ye. Masã, d tara jw.org la JW Télédiffusion. D lebga Les Saintes Ecritures. Traduction du monde nouveau wã ne buud-goam wʋsg n paase. Yʋʋmd 2014 n tãag 2015 wã, d talla rasem a tãab tigis-kãseng gom-zug sẽn da yaa: “Bɩ y reng n bao Wẽnnaam Rĩungã!” Tẽns 14 pʋgẽ, yɩɩ tigis-kãseng sẽn tigim tẽns wʋsg neb ɛstaad-bɛd pʋsẽ. Sẽn kẽng-bã fãa sũy yɩɩ noog wʋsgo.

 ¹⁵ Neb wʋsg wilgame tɩ b sũur yaa noog wʋsg ne bõn-kãensã siglgã sẽn maand tõnd neer yĩngã. Pag ne a sɩd sẽn yaa d tẽed-n-taase, n be Aazi soolmẽ wã goma JW Télédiffusion wã yelle, n yeel yaa: “Tõnd sẽn beẽ wã yaa tẽn-bila. Kɩtame tɩ wakat ning bɩ d mi n getẽ tɩ d yaa d yembre, n yĩm tɩ b tʋmda a Zeova tʋʋmdã zĩig fãa. La d sã n ges JW Télédiffusion fãa, d tẽegda zĩig pʋgẽ tɩ d tara tẽed-n-taas sẽn be dũniyã gill zugu. D tẽed-n-taasã sẽn be tõnd tẽngẽ wã sũy nooma wʋsg ne JW Télédiffusion wã. Naoor wʋsgo, d wʋma b sẽn yet tɩ kiuug fãa, b sã n ges JW Télédiffusion wã, b yamẽ, yaa wa siglgã taoor lʋɩtb sull nebã bee bãmb sɛɛgẽ. B maneg n neeme masã tɩ b sẽn paam n yaa Wẽnnaam siglgã nebã yaa zu-zẽkre.”

¹⁶ Dũniyã gill zugu, yaa sẽn dat n ta Rĩung rot tus a yi la kobs-nu la b met wall b manegdẽ. Hõnduras tiging a ye n wa n paam Rĩung ro-paalle. Ad tigingã neb sẽn yeele: “D sũy yaa noog wʋsg d sẽn paam n yaa a Zeova zakã neba, n tar saam-biis dũniyã gill zug sẽn sõng tõnd tɩ d paam d toorẽ Rĩung roogã. Bala pĩndã, ra wõnda yaa zãmsdo.” Neb wʋsg me wilgda b sũ-noogo, b sã n paam tɩ b lebg Biiblã b buud-gomdã pʋgẽ, wall yaa siglgã sebr la b paam-yã, pa rẽ bɩ yaa sabab-wẽng n paam-b tɩ d tẽed-n-taasã wa sõng-ba, wall b sã n tags perzãntoaar-dãmbã tall n moonã sẽn sõngd nebã to-to wã.

17. Bõe n kɩt tɩ d miẽ t’a Zeova teenda a siglgã?

¹⁷ D sẽn tõogd n maand woto fãa ne ligd ning bal nebã sẽn kõt ne yamleoogã yaa bũmb neb nins sẽn pa a Zeova Kaset rãmbã sẽn pa tõe n wʋm a võore. Ãnterepiriiz-bedr taoor soab n tɩ ges d sɛbã yiisg zĩig a ye. A sẽn wʋm tɩ tʋm-tʋmdbã tʋmdame n pa reegd yaoodo, tɩ yaa ligd nebã sẽn kõt ne yamleoog la b tar n get tʋʋmã yellã, la tɩ d pa koosd teed bɩ n maand kɛrmes-rãmb sẽn na yɩl n paam ligdã, ling-a-la wʋsgo. A yeelame tɩ pa tõe ye. A bee bʋʋm! Tõnd meng miime tɩ yaa a Zeova sẽn teend tʋʋmdã la d sẽn tõogdã.—Zoob 42:2.

18. a) D sã n kõt d sẽn tarã n teend Rĩungã tʋʋmã, bark bʋs la d na n paame? b) Wãn to la d tõe n sõng d kambã la sẽn nan bãng-b a Zeova wã tɩ b maan wa tõndo?

¹⁸ A Zeova waooga tõndo, a sẽn sak tɩ d tõe n yãkd d sẽn tarã n teend Rĩungã tʋʋmdã b sẽn tʋmd dũniyã gill zugã. A yeelame tɩ d bas d yam t’a na n ning-d-la bark d sẽn maand woto wã yĩnga. (Mal. 3:10) A wilgame tɩ d sã n nong n kõtẽ, d paoongã na n paasame. (Karm-y Yel-bũn 11:24, 25.) A wilgame me tɩ d sã n kõtẽ, d na n paama sũ-noogo, bala kũun bee bark n yɩɩd reegre. (Tʋʋ. 20:35) Ne d no-goamã la d tʋʋm-tʋmdɩ wã, d tõe n sõnga d kambã la sẽn nan bãng-b a Zeova wã tɩ bãmb me bãng tɩ b sã n kõt b sẽn tarã n teend tũudmã tʋʋmã, b na n paama bark ka tɛka.

19. Wãn to la sõs-kãngã keng yãmb raoodo?

¹⁹ D sẽn tarã fãa yaa a Zeova n kõ-do. D sã n yãkd d sẽn tarã n kõt-a, wilgdame tɩ d nong-a lame, la tɩ d sũur yaa noog ne bũmb nins a sẽn maan n kõ-dã. (1 Kib. 29:17) Israyɛll nebã sẽn yãk b paoongã n kõ tɩ b na n me wẽnd-doogã, b “maana sũ-noog ne kũun nins b sẽn tall n wa ne yamleoogã, bala, yaa ne b sũyã fãa la b sak ne yamleoog n tall n wa kõ Sẽn-Ka-Saabo.” (1 Kib. 29:9) Bɩ tõnd me ket n yãkd bũmb nins a Zeova sẽn kõ-dã n kõt-a, la d maand sũ-noog ne d sẽn paam n tõe n maan woto wã.