1. Bõe n maand rũndã-rũndã, t’a buud ra zɩ n maane?

RŨNDÃ-RŨNDÃ, bũmb sẽn da zɩ n maan hal ninsaalbã sẽn be dũniyã zugã tɛk n maande. Wa Biiblã sẽn da pĩnd n togsã, a Zeova tigimda “neb kʋʋng” sẽn yi “soolem dãmbã fãa pʋse, buud toay-toayã fãa pʋse, tẽms toay-toayã fãa pʋse, la sẽn gomd goam buud toay-toayã.” Nin-bãmbã sõor yɩɩda milyõ a nii masã. Yaa “buud sẽn tar pãnga,” n “tʋmd Wẽnnaam tʋʋmd wĩndg la yʋng” ne sũ-noogo. (Vẽn. 7:9, 15; Eza. 60:22) Sẽn nong-b Wẽnnaam ne b taabã sõor zɩ n ta woto ye.

2. Nonglem bʋg buud la sẽn pa baood-b Wẽnnaam zoodã bɩɩsda? (Ges-y fotã sẽn be yĩngrã.)

² La Biiblã ra togsame me tɩ tõnd wakatã, sẽn pa baood-b Wẽnnaam zoodã na n bɩɩsa nonglem sẽn pa nonglem hakɩɩka. B na n nonga b mense, tɩ sẽn pak-b yaa b mensã yell bala. Tʋm-tʋmd a Poll yeelame tɩ dũniyã ‘yaoolem wakate, . . . nebã na n yɩɩ beed rãmba, ligd-noangdba,’ la b ‘nong b sũ-noogã n yɩɩd b sẽn nong Wẽnnaamã.’ (2 Tɩm. 3:1-4) Pa nonglem a woto la Wẽnnaam dat tɩ d bɩɩs ye. Ned sã n baood a mengã raab bala, n tagsdẽ tɩ rẽ la a na n paam sũ-noogo, a belgda a menga. Yaa  nebã sẽn bɩɩsd nonglem a woto wã la vɩɩmã sẽn lebg toogã.

3. Bõe yell la d na n gome, la bõe yĩnga?

³ A Poll ra miime tɩ nebã sẽn na n nong b mens tɩ loogã, kiris-nebã sã n pa gũusi, b tõe n wa maana wa bãmba. Rẽ n so t’a sagl-b tɩ b “zãag” b mens ne neb a woto. (2 Tɩm. 3:5) La yaa vẽeneg tɩ d pa tõe n lak d mens fasɩ ne-b ye. Woto wã, bõe n na n sõng-d tɩ d ra wa maand wa bãmba, n paam t’a Zeova sẽn yaa nonglem soabã sũur yɩ noog ne-do? Bõe n wilgd tɩ nonglem ning Wẽnnaam sẽn dat tɩ d bɩɩsã yaa toor ne nonglem ning yell b sẽn gomd 2 Tɩmote 3:2-4? D na n bao n bãnga rẽ. Woto na n sõng-d lame tɩ d bʋgs neere, n ges d sẽn tõe n maan to-to, n maneg n bɩɩs nonglem ning sẽn na n kɩt tɩ d paam sũ-noog hakɩɩkã.

4. Bõe n wilgd tɩ ned sã n nong a meng n zemse, pa wẽnga?

⁴ A Poll yeelame tɩ ‘nebã na n yɩɩ beed rãmba,’ rat n yeel tɩ na n yɩɩ b mensã yell bal n pak-ba. Woto wilgdame tɩ b na n nonga b mens n yɩɩd bũmb fãa. La yaa wẽng tɩ d nong d meng bɩ? Ayo! Pʋd n yaa bũmb sẽn zemse. A Zeova meng n naan ninsaal t’a nong a menga. A Zeezi me yeelame: ‘Nong f to wa f menga.’ (Mark 12:31) Dẽnd ned sã n pa nong a menga, a pa tõe n nong a to ye. Ad saglg a to me Biiblã sẽn kõ: ‘Rapã tog n nonga b pagbã wa b sẽn nong b mens yĩngã. Ned ning sẽn nong a pag nonga a menga. Sɩd me, ned baa a yembr zɩ n kisg a meng ye. A rɩlgda a menga, n get a meng yelle.’ (Efɛ. 5:28, 29) Vẽenega, d sã n nong d meng n zemse, pa wẽng ye.

5. Bõe n wilgd tɩ ned nonga a meng tɩ looge?

⁵ B sẽn yeel 2 Tɩmote 3:2 tɩ nebã na n yɩɩ beed rãmbã wilgdame tɩ na n yɩɩ b mensã yell bal n pak-ba. B pa nong b mensã n zems ye. Ned sã n nong a meng tɩ looge, a tagsdame t’a yɩɩda a taabã, n pẽgd a meng tɩ looge. (Karm-y Rom-dãmb 12:3.) A pa baood a taabã nafre, yaa a mengã yell n pak-a n yɩɩda. Yell sã n maane, yaa a taabã bal la a ningd taale. Sebr a ye yeelame tɩ ned a woto yaa wa yʋgempend sẽn mi n gil a menga, n paam t’a kõbdã sẽn bʋgsã kɩt tɩ waood pa kẽed-a, n yaool n bas a taabã ne a poorã gõosã. Nin-bãmbã buudã pa tar sũ-noog hakɩɩk ye.

6. D sã n tar nonglem ning Wẽnnaam sẽn dat tɩ d bɩɩsã, nafda tõnd wãn to?

⁶ Biibl-mitb n yeel t’a Poll reng n sõdga beedã, bala yaa beedã n wat ne zʋg-wẽns a taabã a sẽn sõdg n paasã. La d sã n tar nonglem ning Wẽnnaam sẽn dat tɩ d bɩɩsã, na n sõngame tɩ d bɩɩs zʋg-sõma a taaba. Wala makre, sũ-noogo, laafɩ, sũ-mare, maan-neere, sõmblem, tẽebo, sũ-bʋgsem la yõk-m-menga. (Gal. 5:22, 23) Yɩɩn-gʋlsdã yeelame: “Bark bee neb nins sẽn paam tɩ Sẽn-Ka-Saab yaa b Wẽnnaamã zutu.” (Yɩɩn. 144:15) A Zeova yaa sũ-noog soaba, t’a nin-buiidã me tar sũ-noogo. B sẽn yaa kõatba, n nong n maand b taabã neerã kɩtame me tɩ b paamd sũ-noogo. B pa wa neb nins sẽn nong b mens tɩ looge, n dat bal tɩ yaa b taabã n maand-b neerã ye.—Tʋʋ. 20:35.

7. D sã n dat n bãng d sã n sɩd nonga Wẽnnaam, sogs-bʋs la d tõe n sok d menga?

⁷ D maanda wãn n bãng d sã n pa nong d mengã n yɩɩd Wẽnnaam? Tẽeg-y saglg ning sẽn be Filip-rãmb 2:3, 4. Be, b yeelame yaa: “Da maan-y bũmb baa fɩ ne geesem-geesem wall ne wuk-m-meng ye, la bɩ ned kam fãa paam sik-m-meng yam n tags tɩ neb a taaba yɩɩda yẽnda. Bɩ yãmb ned kam fãa ra ges a meng sõngr yell bal ye, la bɩ a ges neb a taaba sõngr yell me.” Bɩ d sok d meng yaa: ‘M tũuda sagl-kãnga bɩ? M maooda m pãng tɛk n tũud Wẽnnaam daabã bɩ? M baooda m sẽn tõe n maan n sõng m taabã tigingã pʋgẽ  la koe-moonegã zĩigẽ bɩ?’ Pa wakat fãa la yaa nana tɩ d yã sẽk la pãng n sõng d taabã ye. Yaa tɩlɛ tɩ d mao, la d mong d meng bũmb kẽere. La d miime t’a Zeova sẽn yaa yĩngr la tẽng Naandã sũur na n yɩɩ noog ne-do. Bũmb pa be n kõt-d sũ-noog n ta rẽ ye.

8. Bõe la kiris-neb kẽer maan-yã, b sẽn nong Wẽnnaamã yĩnga?

⁸ Kiris-neb kẽer basa tʋʋmd sẽn da yaood sõma, n na n tʋm Wẽnnaam tʋʋmã ne b pãng fãa, b sẽn nong-a wã yĩnga. A Erika yaa logtore, n be Etazĩni. A pa bao n na n lebg logto-kẽeng ye. A yãka yam n lebg wakat fãa so-pakda. Yẽ ne a sɩdã tõogame meng n kẽng tẽns a wãn pʋgẽ n tɩ tʋm a Zeova tũudmã tʋʋma. Ad a sẽn yeele: “Tõnd sẽn paam n maan bũmb wʋsg n sõng ne koe-moonegã buud-gom-zẽng pʋgẽ wã, n paas d sẽn paam n yõg zood ne neb wʋsgã sɩd nafa tõnd hal kẽengo. M ket n yaa logtore, la sẽn kõt-m sũ-noog n yɩɩdã yaa m sẽn kẽesd m sẽkã la m pãngã fãa la bal n sõngd nebã tɩ b bãngd Wẽnnaamã, la m sõngd m tẽed-n-taasã.”

9. Bõe yĩng tɩ ned sã n nong ligd bɩ a pa tar sũ-noogo?

⁹ A Poll yeelame tɩ nebã na n yɩɩ “ligd-noangdba.” Sẽn zems yʋʋm a wãna, so-pakd n da rat n taas rao a ye Wẽnnaam koɛɛgã. Raoã yiisa a potmaan n yãk ligd-vãad n tees-a, n bas n yeel yaa: “Yaoã la mam wẽnnaam!” Baa neb wʋsg sẽn pa na n sak n yeel woto vẽenegã, b yaa wa rao-kanga. B nonga ligdã, la bũmb nins ligdã sẽn tõe n da wã. La Biiblã yetame yaa: “Ned sã n nong ligdi, ligd ka sekd-a ye. La ned sã n nong arzegse, paoong paoosg ka sekd-a ye.” (Koɛ. 5:9, Wẽnnaam Sebre, 1983) Sẽn nong-b ligdã rat n paasda b paoongã wakat fãa, n maand b sẽn tõe fãa rẽ yĩnga. La baasda ne “tood buud toay-toaya.”—1 Tɩm. 6:9, 10.

10. Bõe la Biiblã yet arzɛkã la naongã wɛɛngẽ?

¹⁰ Yaa sɩd tɩ ligd yaa tɩlɛ ne d fãa. A sõngda tõnd bũmb wʋsg pʋgẽ. (Koɛ. 7:12) La rẽ yĩnga, ned sã n tar sẽn sek a na paam sẽn yaa tɩlɛ ne-a wã bala, a tõe n paama sũ-noog bɩ? N-ye! (Karm-y Koɛɛg soab 5:11) A Yake biig a Agʋʋr da pʋʋsa Wẽnnaam n yeele: “Da bas-y tɩ m yɩ naong soaba, la y ra bas tɩ m yɩ arzɛk soab me ye. Bɩ y kõ maam sẽn sekd m dɩɩbo.” D tõe n wʋma a sẽn pa rat n yɩ naong soabã võore. A wilgame t’a pa rat tɩ wa kɩt t’a zu, tɩ sãam Wẽnnaam yʋʋr ye. La bõe yĩng t’a pa rat n yɩ arzɛk soaba? A yeelame t’a pa rat tɩ ‘rɩ-n-tɩkã pʋgẽ, bɩ a wa yeel t’a ka mi’ a Zeova ye. (Yel. 30:8, 9) Sãmbg kae tɩ y mii neb sẽn bas Wẽnnaam teegre, n teeg ligdã.

11. Bõe la a Zeezi yeel arzɛgsã wɛɛngẽ?

¹¹ Sẽn nong-b ligdã pa tõe n ta Wẽnnaam yam ye. A Zeezi ra yeelame yaa: “Ned ba a yembr ka tõe n sak zu-soben-dãmb a yiib ye. Bala, a na n kisga a yembr la a nong a to wã, wala a loe a meng ne a yembr la a paoog a to wã. Yãmb ka tõe n sak Wẽnnaam la y sak arzegs me ye.” Nand t’a yeel woto, a ra yeelame yaa: “Da bĩng-y paoong yãmb yĩng dũniyã zug ka tɩ mogd bɩ tẽngempiisim sãamd-b lame, la wagda kẽed n wʋkdame. Bĩng-y yãmb paoongã arzãna, tɩ mogd bɩ tẽngempiisim ka saamd-a be ye, la wagda ka kẽed be n wʋk-a ye.”—Mat. 6:19, 20, 24.

12. D sã n pa baood bɛda, wãn to la rẽ tõe n sõng tɩ d tʋm Wẽnnaam tʋʋmã wʋsgo? Togs-y kibar sẽn wilgd rẽ.

¹² Sẽn tũud-b Wẽnnaam a Zeova wã  wʋsg maoodame n pa baood bɛd ye. B mikame tɩ rẽ kɩtame tɩ b paamd weer n tõe n tʋm a Zeova tʋʋmã n paase, tɩ b sũ-noogã me paasdẽ. A Zak yaa saam-biig sẽn be Etazĩni. A ra tara ro-bedre, la tʋʋm zĩig a sẽn so. A wa n dɩka rẽ fãa n koose, sẽn na yɩl n paam n lebg so-pakd wa a pagã. Ad a sẽn yeele: “Yɩl n bas d zag-neerã la d zĩigã pa yɩ nana ye. La na maan yʋʋm wʋsgo, m da mi n lebg n waa yir ne sũ-sãamse, tʋʋmã zu-loees yĩnga. M pagã sẽn yaa wakat fãa so-pakdã yaool n da tara sũ-noog daar fãa. A ra nong n yetame yaa: ‘Mam patrõ wã ka to ye!’ Ma-me sẽn yaa so-pakd masã wã, d yiibã fãa tʋmd n kõta patrõ-yɛnga, a Zeova.”

13. Bõe n tõe n sõng-d tɩ d bãng d tagsg sẽn yaa a soab ne ligdã?

¹³ Sẽn na yɩl n bãng d tagsg sẽn yaa a soab ne ligdã, d pelg d pʋg n leok sogs-kãensã: ‘Mam sẽn vɩ to-to wã wilgdame tɩ m sɩd tũuda Biiblã sẽn yet ligdã wɛɛngẽ wã bɩ? Yaa ligdã baoob la m lʋɩɩsd taoor bɩ? Yaa ligdã bɩ teedã yell n pak maam n yɩɩd m zoodã ne a Zeova la ne m taabã bɩ? Rẽ yĩnga, m kɩsa sɩd t’a Zeova na n gesame tɩ m paam sẽn yaa tɩlɛ ne-mã bɩ?’ D tõe n basa d yam t’a pa na n tol n sãam sẽn teeg-b yẽ wã sũur ye.—Mat. 6:33.

14. D tagsg segd n yɩɩ wãn ne yõ-noogrã?

¹⁴ Wa Biiblã sẽn da pĩnd n togsã, nebã wʋsg sɩd “nonga b sũ-noogã.” D miime tɩ d sã n nong d meng n zemse, la d tar tagsg sẽn zems ne ligdã, pa wẽng ye. Yõ-noogrã wɛɛngẽ me, d sã n maand n zemsdẽ, pa wẽng ye. Neb kẽer tẽedame tɩ b pa segd n maan baa fʋɩ n noog b yõor ye. La pa woto la a Zeova yeel ye. A wilgame tɩ wẽn-sakdbã tõe n nooga b yõore. Ad Biiblã sẽn yete: “Bɩ f kẽng n tɩ rɩ f rɩɩbo, la f yũ f reezẽ rãam ne sũ-noogo.”—Koɛ. 9:7.

15. B sẽn yeel 2 Tɩmote 3:4 tɩ nebã na n ‘nonga b sũ-noogã,’ rat n yeelame tɩ bõe?

¹⁵ Yaa sẽn nong-b sũ-noogã, hal n pa baood Wẽnnaamã yell la 2 Tɩmote 3:4 gomda. Yaa sɩd tɩ vɛrse wã yeelame tɩ b nonga b sũ-noogã “n yɩɩd b sẽn nong Wẽnnaamã,” la pa rat n yeel tɩ b  nonga Wẽnnaam bilf ye. Bãngd a ye yeelame: “Vɛrse-kãngã pa rat n yeel tɩ b nonga Wẽnnaam me bilf ye. Rat n yeelame tɩ b pʋd n pa nong-a baa bilf ye.” Woto yaa keoogr meng-menga, sẽn nong-b yõ-noogrã tɩ loogã yĩnga! Biiblã wilgame tɩ b basame tɩ “dũni sũ-noogã” soog-ba.—Luk 8:14.

16, 17. Yõ-noogrã wɛɛngẽ, wãn to la a Zeezi ra maanda, tɩ yaa mak-sõngo?

¹⁶ A Zeezi tagsg sẽn da yaa a soab yõ-noogrã wɛɛngẽ wã ra zemsame. A kẽnga “yi-kãadem” kibsẽ, la “tigr kãsenga.” (Zã 2:1-10; Luk 5:29) Yi-kãadmã kibsẽ, a maana yel-solemd tɩ koom lebg rãam, bala rãamã paoogame. Daar a ye me, neb n wɩd-a t’a rɩtame la a yũuda, la a wilga vẽeneg tɩ nin-bãmbã tagsgã pa zems ye.—Luk 7:33-36.

¹⁷ La a Zeezi pa bas tɩ ra yaa yõ-noogrã n pak-a ye. A ra lʋɩɩsda a Zeova raabã taoore, la a maand a sẽn tõe fãa n sõngd nebã. A saka nams-toaag ra-luk zugu, hal n ki sẽn na yɩl tɩ ãdem-biisã paam fãagre. A yeela sẽn dat-b n tũ yẽ naoã yaa: “Bark bee yãmb zutu, nebã sã n gomd yãmb wẽnga, la b namsd yãmba la b sa n sãam yãmb yʋʋr mam yĩnga. Maan-y sũ-noog n kɩdme, yãmb keoor sẽn na n yɩ kãseng arzãn pʋgẽ wã yĩnga. Bala, b rag n namsa Wẽnnaam no-rɛɛsdbã sẽn deng yãmbã me a woto.”—Mat. 5:11, 12.

18. D sã n dat n bãng d sã n pa nong yõ-noogrã tɩ looge, sogs-bʋs la d tõe n sok d menga?

¹⁸ Bõe n na n sõng-d tɩ d bãng d sã n pa nong yõ-noogrã tɩ looge? D tõe n soka d meng yaa: ‘M nonga yõ-noogrã n yɩɩd tigissã la koe-moonegã, hal n lʋɩɩsd rẽ taoor bɩ? M sakd n basa bũmb kẽer m sẽn nonge, m sẽn dat n tʋm Wẽnnaam tʋʋmã yĩng bɩ? M sã n wa rat n noog m yõore, rẽ yĩnga, m sokda m meng n ges m sẽn dat n maan a soabã sã n tata a Zeova yam bɩ?’ D sẽn nong a Zeova la d rat n noog a sũurã, d pa maand bũmb d sẽn mi tɩ pa noom-a ye. La pa rẽ bal ye. D gũusdame meng n pa maand baa bũmb nins d sẽn tagsd tɩ tõeeme n pa yɩ-a noogã ye.—Karm-y Matye 22:37, 38.

19. Ãnd dãmb n pa tol n tõe n paam sũ-noog hakɩɩka?

¹⁹ Na maan yʋʋm tus a yoob la woto ãdem-biisã sẽn namsde, dũniyã sẽn be a Sʋɩtãan nugẽ wã yĩnga. La keta bilf tɩ dũni-kãnga sa. Rũndã-rũndã, neb wʋsg nonga b mens tɩ looge, n nong ligdã, la b nong sũ-noogã. B vɩɩ b mensã raab yĩnga. Sẽn pak-b yaa b sẽn na n paam yõod ningã. Neb a woto pa tol n tõe n paam sũ-noog hakɩɩk ye. Yɩɩn-gʋlsdã wilga sẽn tõe n paam-a bark bɩ sũ-noog hakɩɩkã. A yeelame: “Bark bee ned ning sẽn paamd t’a Zakoob Wẽnnaamã yaa a sõangdã zugu. Sẽn teeg-a Sẽn-Ka-Saab tɩ b yaa a Wẽnnaamã tara barka.”—Yɩɩn. 146:5.

20. Yãmb sẽn nong Wẽnnaamã, wãn to la sõng-y tɩ y tar sũ-noogo?

²⁰ A Zeova nin-buiidã sẽn nong-a to-to wã tara paasgo, tɩ b sõorã me paasd yʋʋmd fãa. Woto yaa kaset tɩ Wẽnnaam Rĩungã Rĩm rɩta naam, la tɩ ka la bilfu, a na n kɩtame tɩ wẽn-sakdbã paam bark sẽn pa tõe n bãng n bilgi. Yaa d sã n maand Wẽnnaam daabã, n miẽ tɩ noogda a sũur la d tõe n paam sũ-noog wakat fãa. Hakɩɩka, sẽn nong-b a Zeova wã na n paama sũ-noog wakat sẽn kõn sa. Sõsg ning sẽn pʋgdã pʋgẽ, d na n yãa zʋg-wẽns neb nins sẽn nong b mens tɩ loogã sẽn tare, la d ges zʋg-sõma nins sẽn tũud-b a Zeova wã sẽn bɩɩsdã.