ZÃMSGÃ YĨNGA 39
‘Mam yãa kʋʋn-kãsenga’
‘Mam yãa kʋʋn-kãseng ned baa a ye sẽn pa tõe n sõde, . . . tɩ b yas geerã taoor la Pe-bilã taoore.’—VẼN. 7:9.
YƖƖLL 60 D keoog nebã, yaa yõor yelle
D SẼN NA N YÃ WÃ *
1. Yʋʋmd 95 wã sẽnese, tʋm-tʋmd a Zã yɛlã ra yaa wãn-wãna?
YƲƲMD 95 wã sẽnes tɩ yɛlã ra pa nana ne tʋm-tʋmd a Zã ye. Wõnda tʋm-tʋmdbã sʋka, yaa yẽ a ye n da ket n vɩ. A ra kʋʋla wʋsgo, n da be bãens roogo, ko-sʋk tẽngẽ b sẽn da boond tɩ Patmose. (Vẽn. 1:9) A ra miime tɩ bɛɛb n da zãmsd tigimsã nebã bũmb kẽer sẽn pa sɩda, tɩ ra wat ne welsg b sʋka. Ra wõnda pa na n kaoos la b tõog tɩ Kirist tũudmã menem fasɩ ye.—Ziid 4; Vẽn. 2:15, 20; 3:1, 17.
Tʋm-tʋmd a Zã yãa neb “kʋʋn-kãseng” sẽn yer kasaab-peelse, n zãad koms vãad b nusẽ (Ges-y sull a 2)
2. Wa Vẽnegr 7:9-14 sẽn wilgdã, bõe la a Zã yã hal tɩ kõt sũ-noogo? (Ges-y sebrã pipi neng fotã.)
2 Yaa zu-loe-kãensã fãa pʋgẽ la Wẽnnaam vẽneg a Zã, t’a yã bũmb kẽer sẽn da na n wa pids kaoosg zugẽ. Vẽnegrã pʋgẽ, b yeela malɛgs tɩ b gãd to-kãsengã sebdã kãn-kae, hal tɩ b ning Wẽnnaam yembsã b yaoolem bãndã. (Vẽn. 7:1-3) Wẽnnaam yembsã yaa sẽn na n tɩ rɩ-b naam ne a Zeezi saasẽ wã. B yaa neb 144 000. (Luk 12:32; Vẽn. 7:4) La a Zã goma neb sull a to me yelle. Bãmb sõorã ra waoogame, hal t’a yeel yaa: “Rẽ poore, mam yãa kʋʋn-kãseng ned baa a ye sẽn pa tõe n sõde, sẽn yit tẽnsã fãa pʋsẽ, buud fãa pʋsẽ, la sẽn gomd buud-goamã fãa tɩ b yas geerã taoor la Pe-bilã taoore.” (Karm-y Vẽnegr 7:9-14.) Tags-y n ges-y-yã a Zã sũurã sẽn yɩ noog to-to, a sẽn bãng tɩ tarẽ-n-tarẽ, neb milyõ ka tɛk n na n wa lebg tũudum hakɩɩkã nebã!
3. a) Bõe yĩng t’a Zã sẽn yã bũmb ningã segd n keng tõnd tẽebã? b) Bõe yell la d na n gom sõs-kãnga pʋgẽ?
3 Yaa vẽeneg t’a Zã sẽn yã bũmb ningã kenga a tẽebã. Dẽnd tõnd tẽebã la segd n keng n yɩɩda, bala yaa rũndã-rũndã la a sẽn yã wã pidsda. D neeme tɩ b tigimda neb milyõ-rãmb tũudum hakɩɩkã pʋgẽ. Yaa neb sẽn saagd tɩ
b na n wa põsa to-kãsengã sasa, n vɩɩmd tẽngã zug wakat sẽn kõn sa. Hal na maan yʋʋm 80 la zaka, a Zeova sõnga a nin-buiidã tɩ b bãng kʋʋn-kãsengã sẽn yaa a soaba. Sõs-kãnga pʋgẽ, d na n deng n goma a Zeova sẽn maan to-to n sõng-b tɩ b bãng rẽ wã yelle. Rẽ poore, d na n goma bũmb a yiib yelle: 1) Kʋʋn-kãsengã nebã sõor sẽn labsã, la 2) b sẽn yit dũniyã zĩis toɛy-toɛyã. Woto na n kenga sẽn saagd-b tɩ b na n paam n naaga kʋʋn-kãsengã tẽebo.KƲƲN-KÃSENGÃ NA N VƖƖMDA SAASẼ BƖ, BƖ YAA TẼNGÃ ZUGU?
4. a) Bõe la Biiblã yeta, tɩ kiris-neb ne yʋʋrã pa mi? b) Bõe n wilgd tɩ Biiblã Zãmsdbã yẽ tagsgã ra yaa toore?
4 Kiris-neb ne yʋʋrã pa zãmsd b nebã tɩ Biiblã wilgdame tɩ daar n wate, tɩ wẽn-sakdbã na n vɩɩmd tẽngã zug wakat sẽn kõn sa ye. (2 Kor. 4:3, 4) B fãa la bal yeta nebã tɩ nin-tɩrsã rabda saasẽ b kũum poore. La kiris-neb sul-bil n da pa tagsd woto. Yaa b sẽn da boond-b rãmb tɩ Biiblã Zãmsdbã, sẽn sɩng n yiisd Gũusg Gasgã hal yʋʋmd 1879 tɛkã. Bãmb ra miime tɩ Wẽnnaam na n wa kɩtame tɩ tẽngã lebg arzãna, tɩ neb milyõ ka tɛk sẽn yaa wẽn-sakdb vɩɩmd dũniyã zug ka, lakae pa saasẽ ye. La kaoosame tɩ b yaool n wa bãng wẽn-sakdb kãens sẽn yaa neb ninsã n welge.—Mat. 6:10.
5. Bõe la Biiblã Zãmsdbã ra mi neb 144 000 zugu?
5 La yaa vẽeneg tɩ Biiblã Zãmsdbã ra miime me, tɩ Biiblã yetame tɩ neb la b na n yãk ‘tẽngã zug’ tɩ b tɩ naag a Zeezi n dɩ naam saasẽ. (Vẽn. 14:3) Yaa neb 144 000 sẽn dɩk b mens n kõ Wẽnnaam n lebg kiris-neba, n tũ Wẽnnaam ne yẽesem b sẽn wa n be tẽngã zugã, n pa tol n bas-a ye. La kʋʋn-kãsengã yẽ yaa ãnd dãmba?
6. Biiblã Zãmsdbã tagsg ra yaa wãn kʋʋn-kãsengã zugu?
6 A Zã yeelame tɩ yẽ sẽn yã kʋʋn-kãsengã, b ra ‘yasa geerã taoor la Pe-bilã taoore.’ (Vẽn. 7:9) A Zã gom-kãensã kɩtame tɩ Biiblã Zãmsdbã ra tagsdẽ, tɩ wa neb 144 000, kʋʋn-kãsengã me na n kẽnga saasẽ. La kʋʋn-kãsengã ne neb 144 000 fãa sã n na n kẽnga saasẽ, bõe n bakd sul a yiibã masã? Biiblã Zãmsdbã ra tagsdame, tɩ kʋʋn-kãsengã nebã tog n yaa kiris-neb sẽn pa tolg n sak Wẽnnaam sõma, b sẽn wa n be tẽngã zugã. B ra tagsdame tɩ baa nin-kãensã sã n modgame n tũ Biiblã noyã, tõe tɩ b kẽer ra keta kiris-neb ne yʋʋrã tũudum pʋgẽ. Woto kɩtame tɩ Biiblã Zãmsdbã ra yetẽ tɩ yaa neb sẽn tũ Wẽnnaam ne yẽesem bilfu, la pa sek b na naag a Zeezi n dɩ naam ye. B ra yetame tɩ kʋʋn-kãsengã nonglmã ne Wẽnnaam sẽn pa wʋsgã, b na n kẽnga saasẽ n tɩ yals geerã taoore, la b pa na n paam geer n zomb ye.
7. a) Biiblã Zãmsdbã ra tagsdame tɩ ãnd dãmb n na n vɩɩmd tẽngã zug yʋʋm tusrã sasa? b) Bõe la b ra yet rap nins sẽn tũ Wẽnnaam nand tɩ Kiristã wa wã wɛɛngẽ?
7 Woto wã, ãnd dãmb la sẽn na n vɩɩmd tẽngã zugã? Biiblã Zãmsdbã ra tagsdame tɩ neb 144 000 ne kʋʋn-kãsengã sã n wa loog saasẽ, neb a taab sẽn yaa bãmb milyõ-rãmb n na n paam n zĩnd tẽngã zugu, n dɩ Kiristã naamã sẽn na n kaoos yʋʋm tusrã nafa. B ra tagsdame tɩ yaa Kiristã naamã sɩngr poor la nin-kãensã na n yaool n bãng a Zeova la b tũ-a. B ra pʋd n yetame tɩ yaa yʋʋm tusrã pʋgẽ la b na n paam tɩ b zãms-b a Zeova noyã. Rẽ poor masã la a Zeova na n ning sẽn na n kell n sak-b yẽ noyã barka, tɩ b vɩɩmd tẽngã zug wakat sẽn kõn sa, tɩ sẽn na n yɩ-b kɩɩsdbã paam sãoongo. Biiblã Zãmsdbã ra yetame tɩ yʋʋm tusrã poore, Yɩɩn. 45:17.
tõe tɩ Wẽnnaam na n keoo neb kẽer a sẽn yãk tɩ b “yɩ nanambs” dũniyã zug yʋʋm tusrã sasa, n kɩt tɩ bãmb me tɩ vɩɩmd saasẽ, la tɩ b sʋkã, rap sẽn yɩ wẽn-sakdb nand tɩ Kiristã wa, n na n naage.—8. Biiblã Zãmsdbã ra yetame tɩ sẽn na n paam-b Wẽnnaam barkã yaa sul a tãabo. Wilg-y sull fãa n bake.
8 Dẽnd Biiblã Zãmsdbã ra yetame tɩ nebã yaa sul a tãabo: 1) Neb 144 000 sẽn na n tɩ rɩ naam saasẽ ne a Zeezi wã, 2) kʋʋn-kãsengã sẽn yaa kiris-neb sẽn pa tall yẽesem sõma, n na n kẽng saasẽ n tɩ yals a Zeezi geerã taoorã, la 3) neb milyõ-rãmb sẽn na n vɩɩmd tẽngã zugu, n paam tɩ b zãms-b a Zeova noyã Kiristã naam sẽn na n kaoos yʋʋm tusrã sasa. * La a Zeova wa n kɩtame tɩ b paam vẽenem sõma n paase.—Yel. 4:18.
VẼENEMÃ MANEG N YÃNGAME
Yaa yʋʋmd 1935 tigis-kãsengã sasa, tɩ neb kʋʋng sẽn saagd tɩ b na n wa vɩɩmda tẽngã zug reegd lisgu (Ges-y sull a 9)
9. a) Wãn to la kʋʋn-kãsengã be tẽngã zugu, n yaool n yas ‘geerã taoor la Pe-bilã taoore’? b) Bõe yĩng tɩ d yetẽ tɩ b sẽn lebg n wʋm Vẽnegr 7:9 wã võor to-to wã n tar nenga?
9 Yʋʋmd 1935 wã, a Zeova Kaset rãmbã bãnga kʋʋn-kãsengã a Zã sẽn yã wã sẽn yaa b rãmbã vẽeneg n bake. B bãngame t’a Zã sẽn yã tɩ b ‘yas geerã taoor la Pe-bilã taoorã,’ pa rat n yeel tɩ b bee saasẽ ye. Yaa sẽn bilgd b sakrã la b tẽebã. Kʋʋn-kãsengã na n bee tẽngã zugu, la d tõe n yeelame tɩ b yasa ‘geerã taoore,’ bala b kɩsa sɩd t’a Zeova n yaa yĩngr la tẽng Naaba, n sakd-a. (Eza. 66:1) B sẽn yeel tɩ b yasa ‘Pe-bilã taoorã’ me rat n yeelame tɩ b wilgdame tɩ b tẽeda ne b sũy fãa t’a Zeezi maoongã yaa yel-wẽnã yaood yĩnga. Gomdã buud n be Matiye 25:31, 32. Be, b yeelame t’a Zeezi na n zĩnda a geerã zugu, tɩ “buudã fãa,” hal baa nin-wẽnsã ‘tigim a taoore.’ Yaa vẽeneg tɩ yaa tẽngã zug la nin-kãensã fãa be-yã, pa saasẽ ye. B sẽn lebg n wʋm gomdã võor woto wã n tar nenga. Kɩtame tɩ d wʋmd Biiblã sẽn pa yet zĩig baa a ye tɩ kʋʋn-kãsengã rabda saasẽ wã võore. Sull a ye tãa n na n tɩ vɩɩmd saasẽ wakat sẽn kõn sa. Yaa neb 144 000 sẽn na n tɩ ‘lebg rĩm-dãmba,’ n ‘dɩ naam tẽngã zugã.’—Vẽn. 5:10.
10. Bõe n wilgd tɩ yaa tɩlɛ tɩ kʋʋn-kãsengã neb paam tɩ b sõng-b tɩ b zãms a Zeova noyã la b tũ-a nand tɩ yʋʋm tusrã sɩnge?
10 Dẽnd yaa yʋʋmd 1935 wã tɛk la a Zeova Kaset rãmbã bãng masã, tɩ kʋʋn-kãsengã a Zã sẽn yã wã yaa neb sẽn saagd tɩ b na n wa vɩɩmda wakat sẽn kõn sa tẽngã zugu, la tɩ yaa kiris-neb hakɩɩk sẽn maan sɩd ne a Zeova. Togame tɩ kʋʋn-kãsengã neb paam tɩ b sõng-b tɩ b zãms a Zeova noyã la b tũ-a nand tɩ yʋʋm tusrã sɩnge, sã n pa rẽ, b pa tõe n paam n põs to-kãsengã ye. “Sẽn na yɩl n tõog n põs bõn-kãensã fãa sẽn tog n wa” nand tɩ Kiristã naamã sẽn na n kaoos yʋʋm tusrã sɩngã, yaa tɩlɛ tɩ b tall tẽeb sẽn tar pãnga.—Luk 21:34-36.
11. Tog n yaa bõe yĩng la Biiblã Zãmsdbã kẽer sẽn da tagsd tɩ yʋʋm tusrã poore, nin-tɩrs la b na n yãk tɩ b kẽng saasẽ wã?
11 La b sẽn da tagsd tɩ yʋʋm tusrã poore, nin-tɩrs kẽer la b na n yãk tɩ b kẽng saasẽ wã yẽ? Yaa hal yʋʋmd 1913 wao-fugdg kiuug rasem 15 Gũusg Gasgã pʋgẽ la b ra yeel tɩ tõe tɩ Wẽnnaam maan woto. Tõe tɩ neb n da yet b meng yaa: ‘Pĩnd wẽn-sakdbã keoor sã n na n yɩɩ vɩɩm sẽn kõn sa tẽngã zug ka bala, zemsame tɩ kiris-neb wẽn-sakr sẽn pa ta bãmb paam n tɩ vɩɩmd saasẽ sɩda?’ La bõe yĩng tɩ b ra yet b mens woto? Tog n yaa b sẽn da tẽed bũmb a yiib sẽn pa sɩdã: 1)
B ra tẽedame tɩ kʋʋn-kãsengã na n kẽnga saasẽ. 2) B ra tagsdame tɩ kʋʋn-kãsengã yaa kiris-neb sẽn pa tolg n tũ Wẽnnaam ne yẽesem.12-13. Keoorã wɛɛngẽ, bõe la sẽn paam-b vʋʋsem sõng zaeebã ne kʋʋn-kãsengã neb fãa sak n deege?
12 La wa d sẽn zoe n yeelã, yʋʋmd 1935 tɛkã, a Zeova Kaset rãmbã bãnga vẽeneg tɩ kʋʋn-kãsengã a Zã sẽn yã wã yaa sẽn na n põs-b Armagedõ zabrã sasa wã. Biiblã wilgdame tɩ yaa neb sẽn zĩnd tẽngã zug ka, n “põs to-kãsengã sasa,” la tɩ b “zẽkda b koees n gomd ne pãng n yetẽ: ‘Fãagrã yita tõnd Wẽnnaamã sẽn zao geerã zugã nengẽ, la Pe-bilã nengẽ.’” (Vẽn. 7:10, 14) Biiblã leb n wilgdame tɩ sẽn na n vʋʋg-b n kẽng saasẽ wã paamda “bũmb sẽn yaa sõma n yɩɩd” pĩnd wẽn-sakdbã sẽn na n paamã. (Ebre. 11:40) D tẽed-n-taasã sẽn bãng woto wã tɛka, b sɩngame n moond koɛɛgã ne yẽesem, n yet nebã tɩ b wa tũ a Zeova, tɩ b na n wa paam n vɩɩmda wakat sẽn kõn sa tẽngã zugu.
13 Kʋʋn-kãsengã neb sũy nooma ne bũmb ning b sẽn saagd tɩ b na n wa paamame wã. B miime tɩ yaa a Zeova n yãkd ned sã n na n kẽnga saasẽ n tɩ maan yẽ raabã, wall a sã n na n zĩnda tẽngã zug ka n maan yẽ raabã. Sẽn paam-b vʋʋsem sõng zaeebã ne kʋʋn-kãsengã neb fãa sak n deegame tɩ yaa a Zeova barkã yĩnga, rat n yeel t’a sẽn kɩt t’a Zeezi Kirist wa ki tɩ yɩ maoongã yĩng la b sẽn na n paam b keoorã.—Rom. 3:24.
B SÕORÃ LABSAME
14. Yʋʋmd 1935 wã poore, bõe yĩng tɩ kiris-neb wʋsg ra ket n sokd b mens n get kʋʋn-kãsengã sã n na n sɩd yɩɩ wʋsg wa Biiblã sẽn pĩnd n togsã?
14 Baa a Zeova nin-buiidã sẽn bãng kʋʋn-kãsengã vẽeneg n bak yʋʋmd 1935 wã, wʋsg ra ket n sokda b meng sẽn na n yɩ to-to tɩ sẽn saagd-b n na n vɩɩmd tẽngã zugã wa lebg neb sõor sẽn labse. Yʋʋmd 1935 wã tɩ saam-biig a Ronald Parkin ra tara yʋʋm 12. Ad a sẽn yeele: “Rẽ tɩ dũniyã gill zug koe-moondbã sõor yaa na maan neb tus pis-nu la a yoobe. La wʋsgã ra paama vʋʋsem sõngã zaeebo. D tõe n yeelame meng tɩ b fãa la bala. Kɩtame tɩ ra wõnd kʋʋn-kãsengã pa waoog woto ye.”
15. Kʋʋn-kãsengã talla fɩɩgr bala. Bõe n wilgd rẽ?
15 La rẽ tɛka, siglgã tʋma misioneer-dãmb tẽns wʋsgo. Bilf-bilfã, a Zeova Kaset rãmbã sõor talla fɩɩgre. Yʋʋmd 1968 wã, b yiisa sebre, n da tar n zãmsd nebã Biiblã. A gom-zugã yaa: La vérité qui conduit à la vie éternelle. Eza. 60:22) Yʋʋma noorã, a Zeova siglgã yiisa koe-moonegã tʋʋm-teed a taab sẽn sõngd nebã hal sõma, tɩ b bãngd Biiblã sẽn yetã. Yaa vẽeneg masã tɩ sɩd lebga kʋʋn-kãseng la b tigimda. B sõorã yɩɩda milyõ a nii.
Sebrã sẽn da sõngd nebã tɩ b bãngd Biiblã sẽn yetã nana-nana wã yĩnga, pʋ-peelem dãmb wʋsg sakame n na n tũ a Zeova, hal tɩ b sõorã buud ra zɩ n zĩnd ye. Yʋʋm a naas pʋgẽ bala, neb tus kobs-nu la zak n deeg lisgu. Katolik tũudmã pãng wa n sɩnga boogr Ameriklatin la tẽns a taab pʋgẽ. Erop yaangã ne Afirik tẽns sãnda pʋsẽ d sẽn da pa tar sor n tʋmd d tũudmã tʋʋm kẽerã, b kõ-d-la sor masã. Woto fãa kɩtame tɩ d sõorã fɩɩge, tɩ neb milyõ-rãmb deeg lisgu. (B YITA DŨNIYÃ ZĨIG FÃA
16. Kʋʋn-kãsengã neb yita yɛ?
16 A Zã yeelame tɩ kʋʋn-kãsengã yita “tẽnsã fãa pʋsẽ, buud fãa pʋsẽ,” la b “gomd buud-goamã fãa.” No-rɛɛs a Zakari me ra reng n togsa a buudu. Ad a sẽn da yeelã: “Badaare, neb sẽn gomd goam buud toor-toor pʋgẽ neb piig na n gãda Zʋɩf a yembr fãa fuug noor n yeele: ‘Tõnd na n tũu yãmb n kẽnge. Bala, tõnd wʋmame tɩ Wẽnnaam bee ne yãmba.’”—Zaka. 8:23.
17. Sẽn na yɩl n sõng neb sẽn yit tẽns fãa, la sẽn gomd buud-goamã fãa, bõe la d maanda?
17 A Zeova Kaset rãmbã bãngame tɩ sẽn na yɩl n tigim neb sẽn gomd buud-goamã fãa, yaa tɩlɛ tɩ b moon koe-noogã ne buud-goam wʋsgo. Mat. 24:14; Zã 13:35.
Yaa sẽn yɩɩd yʋʋm 130 masã la d sẽn sɩng n lebgd sɛb nins d sẽn tar n zãmsd Biiblã buud-goam wʋsg pʋgẽ wã. Rũndã-rũndã, d lebgda d sɛbã buud-goam kobs pʋgẽ. Tʋʋmdã paama pãnga, hal t’a buud ra zɩ n zĩnd ye. D nee vẽeneg tɩ yaa yel-solemd la a Zeova maanda, bala, a tigimda buud toɛy-toɛy neb kʋʋn-kãsenga. Bũmb nins sẽn yaa tɩlɛ d tẽebã kengr yĩngã sẽn be ne buud-goam wʋsgã, neb kʋʋngã tũuda Wẽnnaam yam a ye, baa b sẽn yit dũniyã zĩis toor-toorã. Nebã mi-b lame, b sẽn moond koɛɛgã ne yẽesem la b sẽn nong taabã yĩnga. Woto sɩd kengda tẽebo!—A ZÃ SẼN YÃ BŨMB NINGÃ YÕOD NE TÕNDO
18. a) Wa Ezayi 46:10, 11 sẽn wilgdã, bõe yĩng tɩ b sẽn da togs kʋʋn-kãsengã wɛɛngẽ wã sẽn pidsd rũndã-rũndã wã pa lingd tõndo? b) Bõe yĩng tɩ sẽn na n vɩɩmd-b tẽngã zugã pa tagsd t’a Zeova mong-b-la bõn-sõngo?
18 A Zeova sẽn kɩt t’a Zã pĩnd n togs tɩ kʋʋn-kãseng la b na n tigsã, kõta tõnd sũ-noog wʋsgo! Rẽ sẽn pidsd rũndã-rũndã hal tɩ be yamleoogã pa lingd tõnd ye. (Karm-y Ezayi 46:10, 11.) Kʋʋn-kãsengã neb sũy noomame, a Zeova sẽn kɩt tɩ b na n wa vɩɩmd wakat sẽn kõn sa tẽngã zugã. B pa tagsd tɩ b sẽn pa paam vʋʋsem sõngã zaeeb n na n tɩ naag a Zeezi n dɩ naam saasẽ wã, a Zeova mong-b-la bõn-sõng ye. Biiblã pʋgẽ, kibay n be n gomd rap la pagb sẽn tall tẽeb yelle, hal tɩ vʋʋsem sõngã sõng-b tɩ b maan bõn-kãsemse. La b yaool n pa naag neb 144 000 ye. Wala makre, a Zãmbatiisi. (Mat. 11:11) D tõe n sõdga a Davɩɩd me. (Tʋʋ. 2:34) Nin-kãensã la neb a taab me na n vʋʋgame n vɩɩmd arzãnã pʋgẽ, tẽngã zugu. Bãmb ne kʋʋn-kãsengã na n paamame n wilg tɩ b maanda sɩd ne a Zeova, la b teend a naamã sẽn ka to wã.
19. A Zã sẽn da pĩnd n togs tɩ kʋʋn-kãseng la b na n tigsã sẽn pidsd rũndã-rũndã wã, wãn to la yaa kaset tɩ wakatã lebga pẽdga?
19 Hal pĩnd n tãag masã, Wẽnnaam ra zɩ n tigim tẽns toɛy-toɛy neb milyõ-rãmba, tɩ b tũud-a yam a yembr ye. D saagdame n na n kẽng saasẽ, tɩ d na n wa vɩɩmda tẽngã zug me, yaa tɩlɛ tɩ d sõng nebã wa d sẽn tõe fãa, tɩ b wa naag a Zeezi “piis a taabã” sẽn yaa kʋʋn-kãsengã. (Zã 10:16) Ka ne ka, a Zeova na n kɩtame tɩ to-kãsengã b sẽn pĩnd n togs tɩ watame wã sɩnge. To-kãsengã sasa, b na n sãama goosneema-rãmbã la tũudum nins sẽn tar ãdem-biisã n namsdẽ wã. Kʋʋn-kãsengã sẽn paam n na n wa vɩɩmd tẽngã zugu, n tũ a Zeova wakat sẽn kõn sa wã, yaa zu-zẽkr tɛkẽ!—Vẽn. 7:14.
YƖƖLL 139 Tags dũni-paalgã yelle