1. A Zeova tagsg yaa wãn ne sik-m-mens rãmbã?

A ZEOVA nonga sik-m-mens rãmbã. Yaa neb nins bal sẽn tar sik-m-meng hakɩɩkã n tõe n yɩ a zo-rãmb meng-menga. Biiblã yetame tɩ “Wẽnnaam kisa waoog-m-menga.” (1 Pɩy. 5:5) Tõnd fãa ratame n ta a Zeova yam, n paam t’a nong-do. Rẽ n so tɩ yaa sõma tɩ d bãng d sẽn tõe n maan to-to n bɩɩs sik-m-mengã.

2. Bõe yell la d na n gom sõs-kãnga pʋgẽ?

² Sõs-kãnga pʋgẽ, sogsg a tãab la d na n leoke. 1) Bõe n wilgd tɩ ned yaa sik-m-meng soaba? 2) Bõe yĩng tɩ d segd n bɩɩs zʋg-sõng-kãnga? 3) Bõe n tõe n wa kɩt tɩ lebg toog tɩ d kell n yɩ sik-m-meng soaba? Wa d sẽn na n yã wã, d sã n bɩɩs sik-m-mengã sõma, a Zeova sũur na n yɩɩ noogo, leb n nafda tõnd mengã.—Yel. 27:11; Eza. 48:17.

3. Bõe n wilgd tɩ ned yaa sik-m-meng soaba?

³ Sik-m-meng soab pa wukd a meng ye. A pa tɩtaam soab me ye. Sik-m-meng soab sak n deegame t’a pa baa fʋɩ a Zeova taoor ye. A miime me tɩ neb a taabã tara b sẽn maand tɩ yaa sõma n yɩɩd yẽ.—Fili. 2:3, 4.

4-5. Baa wõnd ned yaa sik-m-meng soaba, rẽ pa wilgd t’a sɩd yaa sik-m-meng soab ye. Bõe yĩnga?

⁴ Neb n be n wõnd b yaa sik-m-mens rãmba. B tõe n yaa yãn-zoɛt bɩ nin-sĩndga. Nina me mii neb waoogre, a sẽn paam wubr ningã yĩng bala. La a sũurã pʋgẽ, a nanda a meng tɩ loog noore.  Baa kaoosda, a sẽn yaa a soab a sũurã pʋgẽ wã pa tõe n pa wa puk ye.—Luk 6:45.

⁵ Neb me n be n wõnd b kɩsa b meng sɩda, wall n pa solgd b tagsgo, n yaool n pa wuk-m-mens rãmb ye. (Zã 1:46, 47) Yaa wa tõog bãmb mensã sẽn tare, la b segd n gũusame n da wa teeg rẽ ye. D yaa yãn-zoɛt bɩ nin-sĩndg tɩ d pa woto me, ned fãa tog n modg n yɩɩ sik-m-meng soab a sũurã pʋgẽ.

6. Wa b sẽn wilg 1 Korẽnt rãmb 15:10 pʋgẽ wã, yam-bʋg la d tõe n dɩk tʋm-tʋmd a Poll mak-sõngã pʋgẽ?

⁶ D gom tʋm-tʋmd a Poll yelle. A Zeova kɩtame t’a tʋm tʋʋm-kãsemse. Wala makre, a lugla tigims tẽns wʋsgo. Tõe meng tɩ yaa a Poll n moon koɛɛgã tẽns wʋsg n yɩɩd a Zeezi Kirist tʋm-tʋmdb a taabã. Ne rẽ fãa, a pa tags t’a sãoo a tẽed-n-taasã ye. Ne sik-m-menga, a yeelame yaa: “Mam yaa tʋm-tʋmdbã yao-zʋʋga. Mam pa zems tɩ b bool maam tɩ tʋm-tʋmda, mam sẽn nams Wẽnnaam tigingã yĩnga.” (1 Kor. 15:9) A sẽn yeel woto wã poore, a togsa vẽeneg t’a sẽn tar zood sõma ne a Zeova wã, yaa a Zeova barkã yĩnga, pa yẽ sẽn yaa toore, wall a sẽn tõog n tʋm tʋʋm wʋsg yĩng ye. (Karm-y 1 Korẽnt rãmb 15:10.) A Poll sẽn togs woto lɛtr ning a sẽn tool Korẽnt kiris-nebã pʋgẽ wã yaa mak-sõngo. Sɩd yaa sik-m-meng tɛkẽ! Sẽn yɩɩd fãa, d sã n tẽeg tɩ tigingã rap kẽer n da baood n na n wilg tɩ b são-a lame.—2 Kor. 10:10.

7. Bõe la saam-biig a ye b sẽn da mi sõma maan-yã, tɩ wilgdẽ t’a yaa sik-m-meng soaba?

⁷ A Zeova kaset rãmb wʋsg yeelame tɩ saam-biig a Karl Klein vɩɩmã kibar kõ-b-la raoodo. A yɩɩ Siglgã taoor lʋɩtb sull neda. A kibarã pʋgẽ, a sika a meng n sak n togs yɛl kẽer sẽn nams-a n maan yʋʋma. Wala makre, a yeelame tɩ yʋʋmd 1922, a maka koɛɛgã moonego, la a sẽn yi pipi n mik tɩ pa nana ne-a wã, a maana sẽn dat n ta yʋʋm a yiib n pa le yi ye. A sẽn wa n tɩ tʋmd Betɛllẽ wã me, saam-biig n sagl-a daar a ye, t’a maan sũ-kẽk ne-a rasem a wãna. A wilgame me tɩ yɩɩrã ne sũkrã kɩtame t’a bẽ, la wa n saame. La a paamame me tɩ b kõ-a tʋʋm-kãsems a Zeova tũudmã pʋgẽ. A sẽn da yaa saam-biig neb wʋsg sẽn mi, t’a yaool n sak n gom a kongr kẽer yellã sɩd wilgdame t’a ra yaa sik-m-meng soaba. Saam-biis la saam-bi-pogs wʋsg nong n tẽegda saam-biig a Karl Klein yelle, la b  tẽegd a kibarã a sẽn togs ne pʋ-peelem tɩ be yamleoogã. *

8. Wãn to la 1 Pɩyɛɛr 5:6 sõngd tõnd tɩ d bãng tɩ sik-m-meng nooma a Zeova?

⁸ Sẽn tɩ yɩɩd fãa, yaa sik-m-mengã sẽn noom a Zeova wã yĩng la d sẽn segd n modg n bɩɩs-a wã. Tʋm-tʋmd a Pɩyɛɛr wilga rẽ vẽenega. (Karm-y 1 Pɩyɛɛr 5:6.) B goma a Pɩyɛɛr sẽn yeel bũmb ningã yell “ Viens, suis-moi ” sebrã pʋgẽ, n yeel yaa: “Wuk-m-mengã yaa wa zẽnem. Tõe n halka ned vɩɩm. Yaa zʋg-wẽng sẽn tõe n kɩt tɩ baa ned tar tõog n yɩɩd a taabã fãa bɩ Wẽnnaam pa tõe n tũnug ne-a n tʋm ye. La sik-m-mengã yẽ tõe n kɩtame tɩ ned sẽn pa ta a taabã fãa paam tɩ Wẽnnaam tũnug ne-a n tʋm wʋsgo. . . . A Zeova . . . na n keo-y-la y sik-m-mengã yĩnga, hal tɩ rẽ noom-a.” * Bũmb kae t’a yõodã le ta d sẽn na n maan t’a Zeova sũur yɩ noog ye!—Yel. 23:15.

9. Bõe yĩng tɩ d yetẽ tɩ d sã n yaa sik-m-meng soaba, kɩtdame tɩ d taabã nong d zĩigẽ?

⁹ Sik-m-mengã sẽn noom a Zeova wã sẽn yãk a toogo, a nafda tõnd mengã wʋsgo. Kɩtdame tɩ neb a taabã nong d zĩigẽ. D sã n ning d meng d taabã zĩigẽ, d bãngda a võore. (Mat. 7:12) Neb paood sẽn dat n be ne ned sẽn baood wakat fãa tɩ yaa yẽ sẽn datã n be, n pa sakd n kelgd a to tagsg ye. La d sã n paam n be ne d tẽed-n-taasã, tɩ d ‘kʋmd taaba, n tar saam-biir nonglem, n zoet taab nimbãaneg la d tar sik-m-menga,’ noom-d lame. (1 Pɩy. 3:8) Neb a woto zĩigẽ la d nonga. Tõnd me sã n yaa sik-m-meng soaba, bãmb me na n nonga d zĩigẽ.

10. Wãn to la sik-m-mengã sõngd ned t’a maan sũ-noog ne vɩɩmã?

 ¹⁰ Sik-m-mengã sõngdame me tɩ d maan sũ-noog ne vɩɩmã. Togs sɩdã, d mi n nee yɛl sẽn wõnd yaa yel-kɛga. Yam soab a Salomo ra yeelame: “Mam yãnda yembs sẽn zao wiidi, tɩ nanambs kẽnd ne nao wa yembse.” (Koɛ. 10:7) Pa sẽn tar-b minim bɩ bãngr n yɩɩdã n paamd waoogr wakat fãa ye. Sasa ninga, yaa sẽn pa tar-b minim la bãngr wʋsgã n paamd pẽgr n yɩɩda. La a Salomo sak n deegame tɩ sẽn são yaa d maan sũ-noog ne yɛlã sẽn yaa to-to wã, la d ra bas tɩ sẽn wõnd yaa yel-kɛgã yikd d sũur ye. (Koɛ. 6:9) D sã n yaa sik-m-meng soaba, na n yɩɩ nana ne-d tɩ d maan sũ-noog ne vɩɩmã, la d ra baoodẽ tɩ yɛlã yɩ wa d sẽn tagsd tɩ segd n yɩɩ to-to wã ye.

11. Ned sã n sagl-do, bõe la d segd n maane?

¹¹ Daar fãa, d tõe n wilga bũmb wʋsg pʋgẽ tɩ d yaa sik-m-mens rãmba. D gom bũmb a wãn yelle. Ned sã n wa sagl-do. Yɩta sõma tɩ d tẽegdẽ tɩ ned sã n wa yã-d n na n sõng-d tɩ d rems bũmb d sẽn maane, tog n sɩd yaa wẽng n sek remsgo, tɩ d pa miẽ ye. Wakat kãnga, tõe tɩ sẽn wat d yamẽ pipi yaa d zãgs saglgã. Tõe tɩ d na n goma a soabã wall d tags wẽng a zugu, pa rẽ bɩ d yeel t’a sẽn sagl-d to-to wã pa zems ye. La d sã n yaa sik-m-meng soaba, d na n modg n yõka d menga, n maan sẽn segde.

12. Sẽn zems ne Yel-bũn 27:5, 6, bõe yĩng tɩ ned sã n wa na n sagl-d bɩ d segd n maan sũ-noogo? Rɩk-y makre.

¹² Sik-m-meng soab sakda remsgo, n pa yikd a sũur ye. D rɩk makr wa yãmb sẽn na n be d tigsg zĩigẽ. Y gilg n sõsa ne y tẽed-n-taas a wãna, la a yembr n bool yãmb kɛɛng n togs-y tɩ zẽ-vãad n tab y yẽnã. Yaa vẽeneg tɩ y sũur na n sãamame. La rẽ yĩnga, y sũur kõn yɩ noog y sẽn paam t’a togs-yã? Tõe meng tɩ y na n yeelame tɩ ned sã n da togs-y pĩnd n são. Woto me, bũmb sã n pa zemse, tɩ d tẽed-n-taag tall raood n wa yã-d n na n sõng-d tɩ d remse, d segd n sika d meng n sak la d maan sũ-noog ne rẽ. D pa get tɩ nin-kãng yaa d bɛ ye. A yaa d zoa.—Karm-y Yel-bũn 27:5, 6; Gal. 4:16.

13. B sã n wa kõ ned tʋʋmd a Zeova tũudmã pʋgẽ, wãn to la d tõe n wilg tɩ d yaa sik-m-meng soaba?

¹³ B sã n wa kõ ned tʋʋmd a Zeova tũudmã pʋgẽ. A Zaazõ sẽn yaa  kãsem-soabã yeelame: “M sã n yã b sẽn kõ ned tʋʋmde, m sokda m meng yaa: ‘Bõe yĩng tɩ pa maam la b kõ-yã.’” Yãmb me mi n tagsa woto bɩ? Ned sã n “modgd n dat” n paam tɩ b kõ-a tigingã tʋʋma, pa wẽng ye. (1 Tɩm. 3:1) La d segd n gũusa ne d sẽn tagsd bũmb ningã. Sã n pa rẽ, zẽk-m-meng tõe n wa paama pãng d sũurẽ wã. Wala makre, y tõe n yaa rao n be tigingã pʋgẽ, n wa tagsdẽ tɩ tʋʋmd ning wɛɛngẽ, yãmb n tar minim n yɩɩda. Y tõe n yaa pag me n be tigingã pʋgẽ, n wa tagsdẽ tɩ yãmb sɩdã minimã yɩɩda a zagl ne a zagl hal zĩig sẽn zãre. La d sã n sɩd yaa sik-m-meng soaba, d pa na n tagsd woto ye.

14. Wẽnnaam sẽn wa n kõ Israyɛll rap a taab me tʋʋma, t’a Moyiiz tall manesem ningã kõta tõnd yam-bʋgo?

¹⁴ D tõe n dɩka yam a Moyiiz manesem pʋgẽ. Wẽnnaam sẽn da yãk-a t’a get Israyɛll nebã yellã ra noom-a lame. La a sẽn wa n yãk Israyɛll rap a taab tɩ b na n sõng-a wã, a manesem yɩɩ wãna? A pa maan sũ-kiir ye. (Sõd. 11:24-29) A sika a meng n sak tɩ neb a taab na n sõng-a ne nin-buiidã yɛlã bʋʋbo. (Yik. 18:13-24) Sẽn da lebg rap wʋsg n bʋʋd yɛlã, yaa nana tɩ ned fãa paam tɩ b bʋ a yelle. Woto wilgdame t’a Moyiiz tagsa nin-buiidã neer yelle, n pa bao tɩ kell n yɩ yẽ a ye n tʋmd tʋʋmdã sẽn tar ziirã ye. Ad yaa mak-sõng tɛkẽ! D tẽeg tɩ d sã n dat n paam t’a Zeova tũnug ne-d n tʋm tʋʋm wʋsgo, pa d minimã la d bãngrã la sard ye. Sẽn tar yõod n yɩɩdã yaa d sik-m-mengã. Yaa sɩd t’a Zeova ‘bee hal yĩngri, la a nee sik-m-mens rãmbã.’—Yɩɩn. 138:6.

15. Wilg-y bũmb kẽer sẽn kɩt tɩ d tẽed-n-taas sãnda yɛl toeeme.

¹⁵ D yɛlã sã n wa toeeme. Yʋʋma noorã, siglgã kɩtame tɩ neb wʋsg bas tʋʋm b sẽn da kõ-ba. B yaool n da tʋma tʋʋmdã n kaoos yʋʋm wʋsgo. Wala makre, yʋʋmd 2014 tɛka, b kɩtame tɩ distrik yel-gɛtbã ne b pagbã toeem tʋʋmde. Rẽ tɛk me, b wilgame tɩ tigims sull yel-gɛt sã n ta yʋʋm 70, a segd n basa a tʋʋmdã. B yeelame me tɩ kãsem-dãmb sull yel-gɛt sã n wa ta yʋʋm 80, a na n basa a tʋʋmdã. Sẽn pa kaoos wʋsg woto, b kɩtame me tɩ neb wʋsg sẽn da yaa Betɛllẽ tʋm-tʋmdb lebg  so-pakdba. Neb a taab me sẽn da kẽes b mens zãng a Zeova tʋʋmdã pʋgẽ wa n kong n basame, bãag wall b zakã rãmb yell gesgo, pa rẽ bɩ yell a to yĩnga.

16. Baa ne d tẽed-n-taas kẽer yɛl sẽn toeem hal tɩ pa yɩ nana wã, bõe n sõng-b tɩ b kell n sik b mens n sake?

¹⁶ Togs sɩdã, toeengã pa yɩ nana ne d tẽed-n-ta-kãensã ye. B wʋsg ra tʋma b pĩnd tʋʋmdã yʋʋm ka tɛka, hal n da nong rẽ ne b sũy fãa. Kẽer sũy sãama wʋsgo, la tarẽ-n-tarẽ, b wa n minima b tʋʋm-paallã. Bõe n sõng-ba? Bũmb ning sẽn sõng-b n tɩ yɩɩda, yaa b sẽn nong a Zeova wã. B miime tɩ yaa a Zeova la b rɩk b mens n kõ lakae, pa tʋʋmd bɩ bũmb a to ye. (Kol. 3:23) Baa sẽn yaa tʋʋmd ning la b tʋmd masã wã, b sũy yaa noog b sẽn ket n tũud a Zeova ne sik-m-mengã. B ‘sika b yɩɩrã fãa n bas ne-a,’ n miẽ t’a geta b yelle.—1 Pɩy. 5:6, 7.

17. D sẽn paam tɩ Biiblã sagend tõnd tɩ d yɩ sik-m-mens rãmbã noom-d lame. Bõe yĩnga?

¹⁷ D sẽn paam tɩ Biiblã sagend tõnd tɩ d yɩ sik-m-mens rãmbã, d sũy pa noom sɩda? D sã n bɩɩsd zʋg-sõng-kãnga, nafda tõnd mengã, la nafd d taabã me. Sõngda tõnd tɩ d tõog toog baa ne vɩɩmã zu-loeesã. La sẽn yɩɩd fãa, paasda tõnd ne d saasẽ Ba wã zoodã. D sẽn mi tɩ baa ne a sẽn yaa “soab ning sẽn yɩɩd fãa wã,” a nonga a nin-buiidã sẽn yaa sik-m-mens rãmbã, la a nand-bã, d sũy yaa noog wʋsgo!—Eza. 57:15.