1-2. a) Bõe n sõngd tõnd tɩ d tõogd n maood ne zu-loeesã daar ne a to fãa? Wilg-y y leoorã võore. b) Bõe yell la d na n gom sõs-kãnga pʋgẽ?

“MAM sã n tags zu-loees nins fãa m sẽn mao ne wã, m nee vẽeneg tɩ pa yɩ ne m meng pãng ye.” Yãmb zoe n yeela woto bɩ? Tõnd sʋkã neb wʋsg zoe n yeela a buudu. Tõe tɩ y tagsa y sẽn tõog n mao ne bã-toaag bɩ y nin-nongr kaalem, n yeel woto. Y sã n lebg n tẽege, y neeme tɩ y sẽn tõog n mao daar ne a to fãa wã, yaa a Zeova sẽn kõ yãmb a vʋʋsem sõngã sẽn yaa “pãng ning sẽn yɩɩd ninsaal rẽndã.”—2 Kor. 4:7-9.

² Leb n yaa Wẽnnaam vʋʋsem sõngã la d teeg sẽn na yɩl n da rɩk dũniyã nebã togs-n-taar ye. (1 Zã 5:19) Sẽn paas me, d rata pãng n na n zab ne ‘zĩn-dãmbã.’ (Efɛ. 6:12) D sẽn mi woto fãa wã, d na n bao n bãnga bũmb a yiib vʋʋsem sõngã sẽn maand tɩ sõngd tõndo. Rẽ poore, d na n yãa d sẽn tõe n maane, n paam tɩ vʋʋsem sõngã tõog n sõng-d sõma.

3. Wilg-y bũmb a ye a Zeova sẽn maande, tɩ sõngd tõnd tɩ d tõogd toog baa ne zu-loeesã?

³ Sẽn na yɩl n sõng-d tɩ d maan bũmb nins d sẽn tog n maan baa ne zu-loeesã, vʋʋsem sõngã kõta tõnd pãng la raoodo. Tʋm-tʋmd a Poll yeelame tɩ yẽ sẽn tõog n kell n tũ a Zeova baa ne a zu-loeesã, yaa a sẽn da teeg “Kirist pãngã” yĩnga. (2 Kor. 12:9) A sẽn na n gilg naoor a yiib-n-soab n moon koɛɛgã, a wɩnga ne koe-moonegã yaa sɩda, la yɩɩ tɩlɛ me t’a tʋm n bao ligd n ges a meng yelle. A tɩ zĩnda Korẽnte, a Akila ne a Pirsill zakẽ wã. Bãmb da wʋgda fu-roto. Sẽn mik t’a Poll me mii tʋʋm-kãngã, a ra yãka ray n tʋmd ne-ba. (Tʋʋ. 18:1-4) Vʋʋsem sõngã sõnga a Poll t’a paam pãnga, n tõog n tʋm n  ges a meng yelle, la a tʋm Wẽnnaam tʋʋmdã me.

4. Sẽn zems ne 2 Korẽnt rãmb 12:7b-9 wã, bõe n da namsd a Polle?

⁴ Karm-y 2 Korẽnt rãmb 12:7b-9. Vɛrse-kãensã pʋgẽ, a Poll sẽn yeel t’a tara ‘gõaag a yĩngã pʋgẽ’ wã võor yaa bõe? Gõaag sã n kõs yãmb n kell n pa be, zabda wʋsgo. Dẽnd a Poll gomdã rat n yeelame t’a tara zu-loɛɛg sẽn namsd-a wʋsgo. Zu-loe-kãng la a sẽn bool t’a “Sʋɩtãan malɛk” sẽn tar yẽ n ‘pãbd pɛgsã.’ Tõeeme tɩ pa a Sʋɩtãan bɩ a zĩn-dãmbã n wa ne a Poll zu-loɛɛgã, tɩ d tõe n yeel tɩ yaa wa bãmb n dɩk gõaagã n kõs-a ye. La b sẽn yaa malɛg-wẽnsã, b sẽn yã a Poll zu-loɛɛgã, tõe tɩ b yɩɩ tao-tao n na n maan tɩ yellã kenge, tɩ yaa wa b sẽn tusd gõaagã tɩ kẽ pʋgẽ n paase. Bõe la a Poll na n maane?

5. Wãn to la a Zeova leok a Poll pʋʋsgã?

⁵ Pipi, a ra ratame tɩ “gõaagã” yi t’a paam a menga. A meng yeelame t’a kosa a Zeova “naoor a tãab” t’a kɩt tɩ gõaagã yi la bas-a. Baa ne a Poll sẽn pʋʋs naoor wʋsgã, gõaagã pa yi ye. La rat n yeelame t’a Zeova pa leok a Poll pʋʋsgã bɩ? Pa woto ye. A leokame. A Zeova pa kɩt tɩ yellã sa, la a kõo a Poll pãng t’a tõog toogo. A Zeova yeel-a lame yaa: “Yaa pãn-komsem pʋgẽ la fo paamd mam pãngã tɩ pidi.” (2 Kor. 12:8, 9) Sɩd me, ne Wẽnnaam sõngre, a Poll kell n talla sũ-noogo, la sũur pʋgẽ bãane!—Fili. 4:4-7.

6. a) A Zeova tõe n leoka tõnd pʋʋsg wãn to? b) Bõe la b yet vɛrse nins b sẽn sõdg sullã pʋgẽ wã, tɩ kõt yãmb pãng la raoodo?

⁶ Wa a Polle, yãmb me zoe n kosa a Zeova t’a kɩt tɩ yell sa la bas-y bɩ? Tõe meng tɩ y pelga y pʋg n kos n yɩlme, tɩ yellã kell n pa welge, wall a pʋd n kenge. Y tagsame tɩ tõe tɩ yaa a Zeova sũur n pa noom ne-y bɩ? Sã n yaa rẽ bɩ y tẽeg a Poll nengẽ wã. A Zeova sẽn leok a Poll pʋʋsgã, a na n leoka yãmb me pʋʋsgã. A tõeeme n pa kɩt tɩ yellã sa, la ne a vʋʋsem sõngã maasem, a na n kõo yãmb pãng la raood ning y sẽn tog n talle, n paam n tõog toogã. (Yɩɩn. 61:4, 5) B tõe n ‘luba tõnd tẽnga,’ la a Zeova pa na n bas tõnd ye.—2 Kor. 4:8, 9; Fili. 4:13.

7-8. a) Bõe yĩng tɩ d tõe n mak vʋʋsem sõngã ne sebgo? b) Bõe la a Pɩyɛɛr yeel-yã, n na n bilg vʋʋsem sõngã sẽn tʋmd to-to wã?

⁷ Bõe me la vʋʋsem sõngã maanda, tɩ sõngd tõndo? Baa mogr sã n gudgi, sebg sã n be sõma, tõe n sõnga batayo t’a kell n kẽn n ta a sẽn datẽ wã. Woto me, vʋʋsem sõngã tõe n sõnga ned t’a kell n wɩng ne Wẽnnaam tũub baa ne zu-loeesã, hal n ta dũni-paalgã pʋgẽ.

⁸ Tʋm-tʋmd a Pɩyɛɛr sẽn yɩ zĩm-yõgdã, a ra mii mogrã zug kẽnd ne batayo. Tõe tɩ yaa rẽ n kɩt t’a pʋd gom-bil sẽn bilgd mogrã zug kẽnd ne batayo, a sẽn wa n na n gom bũmb vʋʋsem sõngã sẽn maand yellã. Ad a sẽn yeele: “Zɩ n tũ ne ninsaal raab tɩ bãngr-gomd wa ye. La yaa neb n togs Wẽnnaam koees wa sẽn zems vʋʋsem sõngã sẽn vẽneg-bã.” Gɛrkã gom-bil ning b sẽn lebg tɩ “vẽnegã” bilgda sebg sẽn “dɩk bũmbu,” bɩ sẽn “peegd bũmb” n loogdẽ.—2 Pɩy. 1:21.

9. Gom-bil ning a Pɩyɛɛr sẽn pʋde, n na n wilg tɩ yaa vʋʋsem sõngã n vẽneg Biiblã gʋlsdbã kɩtame tɩ nebã ra tõe n tags bõe yelle?

⁹ A Pɩyɛɛr sẽn pʋd gom-bilã, bõe yell la nebã tags-yã? A Luk me sẽn gʋls Tʋʋm sebrã, a pʋda gom-bi-kãnga, n na n bilg sebg sẽn “peegd” batayo t’a loogdẽ. (Tʋʋ. 27:15) Biibl-mit n yeel t’a Pɩyɛɛr sẽn pʋd gom-bilã, n na n wilg tɩ yaa vʋʋsem sõngã n vẽneg Biiblã gʋlsdbã, a ra ratame tɩ nebã tags sebg sẽn peegd batayo n loogdẽ yelle.  Yaa wa a sẽn yeel bal tɩ: ‘Wa sẽn yaa ne sebgã pãng la batayo tat a sẽn debdẽ wã, yaa ne vʋʋsem sõngã pãng me la no-rɛɛsdbã la Biiblã gʋlsdbã tʋm b tʋʋmdã.’ Biibl-mitã yeelame me tɩ wa b sẽn segd n yidg batayo pɛɛl t’a yaool n tõog n tũ sebgã, no-rɛɛsdbã me ra segl n saame n na n tũ vʋʋsem sõngã sẽn wilgd-bã. A Zeova maana a sẽn tog n maanã. Yẽ n kõ-b a pãngã d sẽn tõe n mak ne sebgã. La Biiblã gʋlsdbã me maana b sẽn tog n maanã. B sak n tũu vʋʋsem sõngã sẽn da wilgdã.

10-11. Sẽn na yɩl n paam vʋʋsem sõngã sõngre, bũmb a yiib n yaa tɩlɛ. Yaa bõe ne bõe? Rɩk-y makre.

¹⁰ La d miime t’a Zeova pa le tũnugd ne a vʋʋsem sõngã n vẽnegd neb tɩ b gʋlsd a goam ye. Baasgo, vʋʋsem sõngã ket n sõngda Wẽnnaam nin-buiidã. A Zeova ket n maanda yẽ sẽn tog n maanã. La bõe la d tõe n maane, n paam tɩ vʋʋsem sõngã sõng tõndo? Yaa tɩlɛ tɩ d maan tõnd me sẽn tog n maanã. Wãn to?

¹¹ D rɩk makre. Ned sã n dat t’a batayo tũ sebgã, bũmb a yiib la a segd n maane. Pipi, yaa tɩlɛ t’a kɩt tɩ batayo wã rɩk sore, n tũud sebgã sẽn teesdẽ wã. Batayo wã sã n be koomã noor n dɩga, n pa rɩk sore, sebgã pa tõe n peeg-a n loog ye. Yiib-n-soaba, yaa tɩlɛ tɩ batayo wã soab yidg batayo wã pɛɛlã fasɩ. Sɩd me, baa sebgã fugd sõma, sã n mik t’a pa paamd batayo wã pɛɛl n wẽed sõma, batayo wã pa na n yẽrgd sõma ye. Woto me, yaa tõnd sã n paamd vʋʋsem sõngã sõngr bal la d na n tõog n kell n wɩng ne a Zeova tũubu. Sẽn na yɩl n paam vʋʋsem sõngã sõngre, bũmb a yiib n yaa tɩlɛ. Pipi, segdame tɩ d naagd n maand bũmb nins vʋʋsem sõngã sẽn sõngd Wẽnnaam nebã tɩ b maandẽ wã. Yiib-n-soaba, segdame tɩ d “yidg d batayo wã pɛɛlã fasɩ,” rat n yeel tɩ d maand Wẽnnaam nin-buiidã sẽn maandã wa d sẽn tõe fãa. (Yɩɩn. 119:32) D sã n maand bõn-kãensã a yiibã, ne vʋʋsem sõngã pãnga,  d na n kell n wɩnga ne Wẽnnaam tũub baa ne zu-loeesã la namsgã d tũudmã yĩngã, hal n tãag dũni-paalgã pʋgẽ.

12. Bõe yell la d na n gom masã?

¹² Bũmb a yiib vʋʋsem sõngã sẽn maand n sõngd tõnd la d sẽn gomã. D yãame t’a kõt-d-la pãnga, tɩ sõngd tõnd tɩ d maand sɩd ne a Zeova baa ne zu-loeesã. A leb n sõngda tõnd tɩ d ket n wɩngd ne a Zeova tũubu, tɩ rẽ sõngd-d tɩ d kell n pa vɩɩm sẽn ka sɛtã sor zugu. Masã, d na n yãa bũmb a naas d sẽn tõe n maane, n paam tɩ vʋʋsem sõngã sõng-d sõma.

13. Sẽn zems ne 2 Tɩmote 3:16, 17 wã, wãn to la Biiblã tõe n sõng-do, la bõe la d segd n maane?

¹³ Pipi, zãmsd-y Wẽnnaam Gomdã. (Karm-y 2 Tɩmote 3:16, 17) Gɛrkã gom-bil ning b sẽn lebg tɩ “Wẽnnaam n vẽnegã” võor meng-mengã yaa “Wẽnnaam n fʋʋse.” Sɩd me, tũu ne Wẽnnaam vʋʋsmã t’a goamã wa Biiblã gʋlsdbã yamẽ tɩ b gʋlse. D sã n karemd Biiblã la d bʋgsdẽ, Wẽnnaam raabã kẽeda d yamẽ wã la d sũurẽ wã. Gom-kãens n wat n kɩt tɩ d rat n mao tɩ d sẽn vɩ to-to wã zems ne Wẽnnaam raabã. (Ebre. 4:12) La d sã n dat tɩ vʋʋsem sõngã sõngd-d sõma, yaa tɩlɛ tɩ d bao sẽk n karemd Biiblã n pa vaandẽ, la d bʋgsd d sẽn karemdã zug neere. Rẽ, d na n maoodame tɩ d sẽn yet la d sẽn maand fãa zemsd ne Biiblã.

14. a) Bõe yĩng tɩ d tõe n yeel tɩ d tigissã sasa, d paamda vʋʋsem sõngã sõma? b) Bõe la d tõe n maane, tɩ d sã n wa wat tigissã bɩ mik tɩ d ‘batayo wã pɛɛl yidga sõma’?

¹⁴ Yiib-n-soaba, tigimd-y ne y taabã n waoogd Wẽnnaam. (Yɩɩn. 22:23) D tigissã sasa, d paamda vʋʋsem sõngã sõma! (Vẽn. 2:29) Bõe yĩng tɩ d tõe n yeel woto? Bala, d sã n tigim taaba, d pʋʋsd n kota vʋʋsem sõngã, n yɩɩnd Rĩungã yɩɩl sẽn tik Biiblã zugã, la d kelgd sagls sẽn be Biiblã pʋgẽ. Leb n yaa ne vʋʋsem sõngã maasem me la b yãkd saam-biis nins sẽn wɛgsd saglsã tɩ d kelgdẽ wã. Vʋʋsem sõngã me n sõngd saam-bi-pogsã tɩ b segend b sõssã, n wat n sõsd tɩ d kelgdẽ. D sã n dat tɩ vʋʋsem sõngã sõngd tõnd sõma, yaa tɩlɛ tɩ d reng n segl d sẽn dat n yeel tigissã sasa wã. Woto, d sã n wa wat tigissã, rẽ tɩ d ‘batayo wã pɛɛl yidga sõma.’

15. Wãn to la d tõe n bas tɩ vʋʋsem sõngã sõng-d koe-moonegã sasa?

¹⁵ Tãab-n-soaba, naagd-y n moond koɛɛgã. D sã n karemd Biiblã koe-moonegã sasa tɩ nebã kelgdẽ, yaa wa d sẽn basd tɩ vʋʋsem sõngã sõngd tõnd tʋʋmdã pʋgẽ. (Rom. 15:18, 19) La d sã n dat tɩ vʋʋsem sõngã sõngd-d sõma, d segd n moonda koɛɛgã n pa vaandẽ, tɩ sã n tõe fãa bɩ d karemd Biiblã tɩ nebã kelgdẽ. Ad bũmb y sẽn tõe n maan tɩ y sẽn taasd koɛɛgã to-to wã tall yamleoogo: Tũ-y b sẽn maand to-to Kiris-nebã vɩɩm la b tʋʋma tigissã sasa wã.

16. Bõe la d tõe n maan n paam a Zeova vʋʋsem sõngã sõngre?

¹⁶ Naas-n-soaba, pʋʋsd-y-yã a Zeova. (Mat. 7:7-11; Luk 11:13) D sã n dat a Zeova vʋʋsem sõngã sõngre, d tõe n pʋʋs-a lame n kose. Bũmb ka tõe t’a Zeova pa wʋm d pʋʋsg ye. A sã n na n kõ tõnd a vʋʋsem sõngã me, bũmb pa tõe n gɩdg tɩ pa ta-d ye. Baa d be bãens roogẽ. Hal baa a Sʋɩtãan meng pa tõe ye. (Zak 1:17) La wãn to la d segd n pʋʋse, d sã n dat tɩ vʋʋsem sõngã sõngd-d sõma? Sẽn na yɩl n leok sokrã, d na n tẽega Biiblã kibar a ye. Yaa Luk evãnzillã bal n togs kibarã. *

17. Yam-bʋg la d tõe n dɩk a Zeezi kibar ning sẽn be Luk 11:5-9, 13 pʋgẽ wã?

 ¹⁷ Karm-y Luk 11:5-9, 13. Makr ning a Zeezi sẽn dɩkã wilgda d sẽn segd n pʋʋs to-to, d sã n dat tɩ vʋʋsem sõngã sõng-do. A wilga kibarã pʋgẽ tɩ raoã sẽn paam a sẽn datã, yaa a sẽn da “pẽdgd n kot n pa basdẽ wã.” Baa sẽn da yaa yʋn-sʋkã, a pa bas tɩ rẽ kɩt t’a pa tɩ kos a zoa wã sõngr ye. (Ges-y yʋʋmd 2018 sẽoog kiuug Kiris-nebã vɩɩm la b tʋʋma tigissã na-kẽndr not-rãmbã.) A Zeezi wilgame tɩ kibarã kõta yam-bʋg pʋʋsgã wɛɛngẽ? A yeelame: “Mam yeta yãmb tɩ y ket n kotẽ, tɩ b na kõ-yã. Ket-y n gẽesd-y tɩ y na yã. Ket-y n kogsd-y kʋɩlengã, tɩ b na pak n kõ-yã.” Yam-bʋg la d tõe n dɩke? D sã n dat n paam vʋʋsem sõngã sõngre, d segd n pẽdgda ne kosgo.

18. Wa makr ning a Zeezi sẽn dɩkã sẽn wilgdã, bõe yĩng tɩ d tõe n bas d yam t’a Zeova na n sak n kõ-d-la a vʋʋsem sõngã?

¹⁸ Makr ning a Zeezi sẽn dɩkã wilgda bũmb ning me sẽn kɩt t’a Zeova sakd n kõt tõnd a vʋʋsem sõngã. A Zeezi yeelame tɩ raoã tɩ kosa sõngrã, n na n paam n deeg a sãan sõma. A ra segd n baoo rɩɩb n kõ sãanã sẽn wa yʋn-sʋkã, la a ra pa tar baa fʋɩ ye. A Zeezi yeelame tɩ yaa raoã sẽn da “pẽdgd n kot n pa basdẽ wã” la a to wã sẽn sak n sõng-a wã. A rɩka makrã n na n wilg bõe? A ratame tɩ nebã bãng tɩ ninsaal sẽn pa zems zãngã sã n sak n na n sõng a to, pẽdgr yĩnga, d saasẽ Ba wã sẽn yaa maan-neer soabã n na n sak n sõng-d n yɩɩda, d sã n kos a vʋʋsem sõngã, n pẽdgdẽ. Dẽnd yell sã n wa pak-do, d tõe n pʋʋsa a Zeova n kos a vʋʋsem sõngã, n bas d yam t’a na n deega d kosgã.—Yɩɩn. 10:17; 66:19.

19. Bõe yĩng tɩ d tõe n kɩs sɩd tɩ d na n kell n tõoga toogo?

¹⁹ D tõe n kɩsa sɩd tɩ baa ne a Sʋɩtãan sẽn pa yat ne d namsgã, d na n kell n tõoga toogo. Bõe yĩnga? Bala, bũmb a yiib la vʋʋsem sõngã maand tɩ sõngd tõndo. Pipi, vʋʋsem sõngã kõta tõnd pãng la raood tɩ d maood ne d zu-loeesã. Yiib-n-soaba, vʋʋsem sõngã yaa wa seb-kãseng sẽn ‘wẽed tõnd batayo wã pɛɛl’ sõma, n sõngd tõnd tɩ d na n kell n wɩng ne a Zeova tũub n tãag dũni-paalgã. Bɩ d fãa yãk yam n na n kell n sak tɩ vʋʋsem sõngã sõng-d sõma!