1. Tõnd fãa ratame tɩ d zakã rãmb maan bõe?

SAAM-BI-POAK yʋʋr sẽn boond t’a Polin * yeelame: “Mam sẽn wa n bãng sɩdã bala, m raab ra yaa m zakã neb fãa wa paam arzãnã, tɩ d vɩɩmd ne taab wakat sẽn kõn sa. Sẽn yɩɩd fãa, m da ratame t’a Wɛn sẽn yaa-m sɩdã, n paas d bi-riblã sak a Zeova, tɩ d naag taab n tũ-a.” Yãmb zakã neb kẽer n nan pa tũud a Zeova bɩ? Sã n yaa rẽ, y tog n wʋmda a Polin goamã võor sõma.

2. Sogs-bʋs la d na n leok sõs-kãnga pʋgẽ?

² Tõnd pa tõe n modg d nebã tɩ b sak koe-noogã ye. La d tara d sẽn tõe n maan n sõng-ba, tɩ b tags Biiblã sẽn yetã zug neer la b sak n tũ. (2 Tɩm. 3:14, 15) Bõe yĩng tɩ d segd n taasd d nebã koɛɛgã? Bõe yĩng me tɩ d segd n ning d meng b zĩigẽ? Bõe la d tõe n maan n sõng d zakã rãmb tɩ b wa nong a Zeova wa tõndo? Rẽ wɛɛngẽ, wãn to la d tigingã nebã fãa tõe n sõng-do?

3. Wa 2 Pɩyɛɛr 3:9 wã sẽn wilgdã, bõe yĩng tɩ d segd n taasd d nebã koɛɛgã?

³ Ka la bilfu, a Zeova na n sãama dũni-kãnga. Yaa neb nins bal sẽn “tar yam ning sẽn zems ne vɩɩm sẽn ka sɛtã” n na n põse. (Tʋʋ. 13:48) D maanda modgr wʋsgo, n taasd neb buud fãa koɛɛgã. Rẽnd d sẽn dat me tɩ d nebã sak koɛɛgã, n wa naag tõnd n tũ a Zeova wã yaa bũmb sẽn zemse. D Ba a Zeova sẽn nong-dã ‘pa rat tɩ ned baa a ye sãam ye. A ratame  tɩ nebã fãa tek yam n kos sugri.’—Karm-y 2 Pɩyɛɛr 3:9.

4. D sã n wa taasd d ned koɛɛgã, bõe la d tõe n maane, tɩ yaool n pa zemse?

⁴ La d segd n tẽegdame tɩ fãagrã koɛɛg taasg wɛɛngẽ, d tõe n taasame tɩ zems wall pa zemse, la tɩ rẽ bee ne d sẽn gomd to-to wã. Naoor wʋsgo, sã n yaa ned tõnd sẽn pa mi la d taasd koɛɛgã, d gomda ne bʋgsem. La sã n wa yaa d neda, tõe tɩ d na n gomame n pa gũus ye.

5. D sã n wa rat n taas d zakã ned koɛɛgã, yɩta sõma tɩ d tẽeg bõe?

⁵ Tõnd sʋkã neb wʋsg mi n lebg n tagsa b sẽn mak n na n taas b ned koɛɛgã, n pa bãng n gom ne bʋgsem, hal n maand b bãngẽ. Tʋm-tʋmd a Poll ra sagla kiris-nebã, n yeel yaa: “Bɩ y goamã tall yamleoog wakat fãa tɩ yaa wa b yugla yamsem, sẽn na yɩl tɩ y bãng y sẽn segd n leok ned kam fãa to-to.” (Kol. 4:5, 6) D sã n wa taasd d zakã ned koɛɛgã, yɩta sõma tɩ d tẽeg a Poll saglgã. Sã n pa rẽ, baa ne d raabã sẽn yaa d sõng-b tɩ b tẽ koɛɛgã, d goamã na n kɩtame tɩ b pa tol n dat n le kelg-d ye.

6-7. Togs-y kibar sẽn wilgd tɩ d pag wall d sɩd sã n nan pa tũud a Zeova, yɩta sõma tɩ d ning d meng a zĩigẽ.

⁶ D ning d meng b zĩigẽ. A Polin, pag ning yell d sẽn zoe n gomã yeelame: “Sɩngrẽ wã, m sã n da na n sõs ne m sɩdã fãa, yaa Wẽnnaam la Biiblã yell bal la m gomda. D ra pa sõsd tɩ pa rẽ yell la d gomd ye.” A Polin sɩdã yaool n da pa mi baa fʋɩ la bal Biiblã zug ye. A ra pa  wʋmd a Polin goamã võor meng ye. A ra tagsdame tɩ sẽn be a pagã zugẽ yaa a tũudmã yell bala. A ra pʋd n yɛɛsdame t’a pagã kẽe tũudum-yooko, la tɩ b belg-a lame.

⁷ A Polin meng yeelame tɩ wakat n zĩnd tɩ yẽ ra wae n be ne a tẽed-n-taasã sibr la hato, la zaabr fãa la bala. Sã n pa tigissã zĩigẽ, yaa koɛɛgã mooneg zĩigẽ, wall pemsem kokr yĩnga. Ad a sẽn paase: “Wakat ninga, a Wɛn mi n taa yir tɩ ned kae, t’a zĩ a ye kaoo.” Yaa vẽeneg t’a Wɛn raab ra yaa a pagã ne a biigã be ne-a. A ra pa mi neb nins b sẽn tɩ be ne wã ye. Sẽn paase, wõnda yaa nin-kãens n lebg a pagã zo-rãmb masã, t’a nong-b n yɩɩd yẽ. Kɩtame t’a yeel a Polin tɩ sã n yaa woto, b na n kaoo kãadmã. Yãmb nee bũmb kẽer a Polin sẽn da tõe n maane, tɩ wilg t’a ninga a meng a sɩdã zĩigẽ bɩ?

8. Sẽn zems ne 1 Pɩyɛɛr 3:1, 2, bõe n tõe n sõng d neb nins sẽn nan pa tũud a Zeova wã, n yɩɩd d no-goamã?

⁸ D tẽegdẽ tɩ b geta d yel-manesmã n yɩɩd d no-goamã. Naoor wʋsgo, d yel-manesmã sẽn tõe tɩ nebã toeem yɩɩda d no-goamã. (Karm-y 1 Pɩyɛɛr 3:1, 2.) A Polin wa n bãnga rẽ. Ad a sẽn yeele: “M da miime t’a Wɛn nonga tõndo, la tɩ sɩd-sɩdã, a pa rat d kãadmã kaoob ye. La a sẽn yeel-m vẽeneg woto wã, m bãngame tɩ rẽnda m maneg n tũ a Zeova sẽn yet bũmb ning kãadmã wɛɛngẽ wã. M bãngame me tɩ pa goam wʋsgã la sardo, la tɩ sẽn são yaa m yel-manesmã sẽn na n yɩ mak-sõngo.” Rẽ tɛka, a Polin pa le modgd a Wɛn n sõsd ne-a Biiblã zug ye. A sɩngame masã n sõsd bũmb a taab zug ne-a. A Wɛn gũus n gesame t’a pagã lebga nin-bʋgsgo, t’a biigã me yaa sakda, n waoogd-ba.  (Yel. 31:18, 27, 28) A Wɛn sẽn yã Wẽnnaam goamã sẽn toeemd a zakã nebã to-to wã, a sɩngame n bʋgsd Biiblã sẽn yetã zugu, la a modgd n na n tũ.—1 Kor. 7:12-14, 16.

9. Bõe yĩng tɩ d pa segd n koms raoodo, n pa le taasd d nebã koɛɛgã?

⁹ D ra koms raood n bas ye. A Zeova kõta tõnd mak-sõngo. Sẽn na yɩl tɩ nebã wʋm koe-noogã la b sake, n wa paam vɩɩm sẽn ka satã, a maanda bũmb ka tɛk n ‘ka basdẽ’ ye. (Zer. 44:4) Tʋm-tʋmd a Poll me sagla a Tɩmote, n yeel-a t’a wɩng ne nebã sõngre. Bõe yĩnga? Bala a sã n maan woto, a na n fãaga a meng la a fãag neb nins sẽn kelgd-a wã. (1 Tɩm. 4:16) D nonga d zakã nebã, n dat tɩ b bãng Biiblã sẽn yetã, bala rẽ n yaa sɩda. Tarẽ-n-tarẽ, a Polin no-goamã la a tʋʋm-tʋmdɩ wã wa n kɩtame t’a zakã neb toeeme. Rũndã-rũndã, yẽ ne a sɩdã naaga taab n tũud a Zeova hal t’a sũur noomẽ. B yiibã yaa so-pakdba, t’a Wɛn yaa kãsem-soab me.

10. Bõe yĩng tɩ d segd n maan sũ-mare?

¹⁰ D maan sũ-mare. D sã n wa yãk yam n na n tũud Biiblã sẽn yetã, tõe n yɩɩ toog ne d zakã rãmb tɩ b sak d yam-yãkrã. Naoor wʋsgo, bũmb ning sẽn pa na n yɩ-b noog pipi, yaa d sẽn pa le naagd bãmb n maand tigã, la d sẽn pa le kẽed politikã yɛlẽ wã. Rẽ tõe n kɩtame tɩ kẽer sũy yik ne-do. (Mat. 10:35, 36) La d pa segd n tags tɩ b pa na n tol n toeem ye. D sã n bas n pa le sõngd-b sẽn na yɩl tɩ b wʋm bũmb nins d sẽn tẽedã võore, d zoe n kaoo b bʋʋdo, n yet tɩ b pa segd ne vɩɩm sẽn kõn sa wã ye. A Zeova yaool n pa kõ tõnd sor tɩ d kao bʋʋd ye. Pa tõnd tʋʋmd la rẽ ye. Yaa a Zeezi la a kõ tʋʋm-kãngã. (Zã 5:22) D sã n maand sũ-mare, d neb nins sẽn nan pa tũud a Zeova wã tõe n wa sak n kelga koɛɛgã.—Ges-y zĩ-gũbrã gom-zug sẽn yet tɩ: “ D wilg-b bũmb sẽn be d sɩt wɛɛbã zugu.”

11-13. A Aliis sẽn tall manesem ning ne a roagdbã kõta tõnd yam-bʋgo?

¹¹ D maand-b neere, la d ra bas me tɩ b tõog-d ye. (Yel. 15:2) D tẽed-n-taag a Aliis tũu sagl-kãnga tɩ naf-a. Yaa a sẽn wa n be zĩig sẽn zãr ne a roagdbã la a bãng a Zeova. A roagdbã yaool n da kẽe politikã hal sõma, n da pa tẽed Wẽnd me ye. A bãngame tɩ rẽnda a gom bõn-sõma nins a sẽn bãngã yell ne a roagdbã, n da bas tɩ kaoos ye. Ad a sẽn yeele: “Sã n kaoos tɩ f yaool n togs f zakã rãmb bũmb nins f sẽn tẽed masã wã, b sũ-sãangã yɩɩgda f sẽn na n togs pĩnda.” A baoo Biiblã goam a sẽn tagsd tɩ na n yɩɩ a roagdbã noogo, wala makre, vɛrse-rãmb sẽn gomd nonglmã yelle, n gʋls lɛtr n wilg-b rẽ, la a sok-b b tagsgo. (1 Kor. 13:1-13) A pʋʋs-b-la bark me b sẽn ges a yell la b wub-a sõma wã, la a bao kado n kõ-ba. Sẽn paase, a sã n kẽng n na n tɩ ges-ba, a maanda a sẽn tõe fãa n sõng a ma wã ne zakã tʋʋmã. Sɩngrẽ wã, a sẽn togs a roagdbã bũmb nins a sẽn tẽed masã wã, b sũy pa yɩ noog ye.

¹² A Aliis sã n da kull a roagdbã nengẽ, a modgdame n ket n karemd Biiblã daar fãa. A yeelame yaa: “Rẽ sõnga m ma t’a bãng tɩ m nanda Biiblã wʋsgo.” A ba wã wa n yãka yam n na n karem Biiblã n wʋm a bi-puglã toeengã võore. La a ra tagsdame me tɩ Biiblã pʋgẽ, a na n yãa sẽn pa zemse, n paam n gome. Ad a Aliis sẽn yeele: “M baoo Biibl n kõ-a, la m deng n laka zĩig a ye, n gʋls goam a wãn bal m sẽn dat n taas-a.” Baasa wãna? A baaba sẽn karem Biiblã, a pa yã sẽn pa zems ye. A pʋd n yãa bũmb ka tɛk sẽn yɩ-a noog wʋsgo.

¹³ Yaa tɩlɛ tɩ d gomd ne gũusgu, la d ra bas me tɩ b tõog-do, baa b sã n na n nams-d lame. (1 Kor. 4:12b) Wala makre, a Aliis ma  wã nams-a lame, la a pa bas t’a tõog-a ye. A Aliis yeeleme: “M sẽn wa n deeg lisgã, m ma yeela maam tɩ m yaa ‘bi-yoogo.’” A Aliis maana wãna? Ad a sẽn yeele: “M pa sĩnd n pa le gom m tũudmã yell ye. M goma ne-b ne waoogre, n wilg-b tɩ yaa maan n yãk m yam n lebg a Zeova Kaset soaba, la tɩ m pa na n toeem yam ye. M makame n na n sõng m ma t’a bas a yam tɩ m nong-a lame. D yiibã fãa yãbame. Rẽ poore, m segla rɩ-noog n kõ-a. Wakat kãng tɛka, m ma sak n deegame tɩ Biiblã zãmsgã yĩnga, m lebgda nin-sõngo.”

14. Bõe yĩng tɩ d pa segd n bas tɩ d roagdbã pẽdgr tõog tɩ d toeem yam?

¹⁴ Tõe n kaoosame, tɩ d zakã neb yaool n bãng a Zeova raabã maaneg sẽn tar yõod to-to tõnd nifẽ wã. Wala makre, a Aliis sẽn wa n bas a roagdbã sẽn da rat t’a tʋm tʋʋmd ningã, n yãk yam n na n lebg so-pakdã, a ma le ninga nintãm. La rẽ pa tõog a Aliis ye. A yeelame: “F sã n bas tɩ f zakã rãmb tõog tɩ f toeem yam yel-yɛng pʋgẽ, b na n wɩnga ne f pẽdgr yɛl a taab pʋgẽ me. La f sã n maand-b neere, n yaool n pa bas tɩ b tõog-fo, kẽer tõe n wa sak n kelg-f lame.” A Aliis nengẽ yɩɩ woto. A ba wã ne a ma wã fãa yaa so-pakdb masã, t’a ba wã yaa kãsem-soab me.

15. Sẽn zems ne Matiye 5:14-16, la 1 Pɩyɛɛr 2:12, wãn to la neb a taabã “tʋʋm-sõma wã” tõe n sõng d neb nins sẽn nan pa tũud a Zeova wã?

¹⁵ Yaa ne tigingã neb “tʋʋm-sõma wã” maasem me, la a Zeova sõngd nebã tɩ b lebgd a zo-rãmba. (Karm-y Matiye 5:14-16; 1 Pɩyɛɛr 2:12.) Baa y pagã wall y sɩdã pa a Zeova Kaset soaba, a zoe n paam n sõsa ne tigingã neb kẽer bɩ? A Polin, pag ning yell d  sẽn gomã ra mi n boola a tẽed-n-taas a zakẽ wã, t’a sɩdã paam n sõs ne-b n bãng-ba. A sɩdã ket n tẽra bũmb saam-biig a ye sẽn maan n sõng-a t’a bas a yam ne a Zeova Kaset rãmbã. A yeelame: “Saam-biigã rɩka vʋʋsem daar a ye, sẽn na yɩl bal n naag maam n ges balle. M bãngame tɩ bãmb me yaa wa neb a taabã bala.”

16. Bõe yĩng tɩ yaa sõma tɩ d mi n bool d nebã tɩ b wa tigissã?

¹⁶ Bũmb a to d sẽn tõe n maan tɩ sɩd sõng d nebã, yaa d sẽn na n bool-b tɩ b wa tigissã. (1 Kor. 14:24, 25) A Polin sɩdã sẽn na n kẽng a pipi tigsg yɩɩ a Zeezi kũumã tẽegre. Bala ra yaa tʋʋmã sigb poore, rẽ me, pa kaoosd ye. A yeelame: “M da pa wʋmd sõsgã võor sõma, la nebã manesem yɩ-m-la noogo, hal tɩ m pa tõe n yĩm ye. B reega maam neere, n yõk m nug sõma-sõma. M da nee vẽeneg tɩ b nonga nebã ne b sũy fãa.” Saam-biig a ye ne a pag n da sõngd a Polin wʋsgo. B ra mi n basame t’a biigã be ne-b tigissã sasa, la koɛɛgã mooneg sasa. Rẽ n so t’a Wɛn sẽn wa n yãk yam n na n bao n bãng a Polin sẽn tẽed bũmb ninsã sõma wã, a kosa saam-bi-kãng t’a na n wat n zãmsd-a Biiblã.

17. Bõe poorẽ la d pa segd n ning d meng taale, la bõe yĩng tɩ d pa segd n koms raood n bas d nebã sõngre?

¹⁷ D saagdame tɩ d zakã neb fãa na n wa naag-d lame n tũ a Zeova. La baa ne d sẽn modgd n dat n sõng-b tɩ b wa bãng sɩdã n tũ Wẽnnaamã, b tõeeme n pa sak ye. Sã n wa yaa woto, d pa segd n ning d meng taal ye. Sẽn yaa a soab fãa, d pa tõe n modg ned t’a sak d sẽn tẽed bũmb ninsã ye. La baa ne rẽ, bãng-y tɩ b sẽn ne a Zeova tũubã sẽn kõt yãmb sũ-noog ningã tõe n kɩtame tɩ b wa toeeme. Ra n tags-y tɩ pa maand-b bũmb ye. Pʋʋs-y b yĩnga. Gomd-y ne-b n gũusdẽ. Ra n koms-y raood n bas b sõngr ye! (Tʋʋ. 20:20) Kɩs-y sɩd t’a Zeova na n ninga y modgrã barka. Y nebã sã n yãk yam n kelg-yã, b na n paama fãagre!