TƲƲMD la yãmb sɩng n dat tigingã pʋgẽ, n nan pa paam bɩ? Tõe meng tɩ b rɩk n kõo ned a to. Tõe tɩ yaa tʋʋmd me y sẽn da tʋm pĩndã. La kʋʋlem bɩ bãas wall y zakã rãmb yell gesg wa n kɩtame tɩ y pa le tõe n maan y sẽn da maandã ye. Tõeeme me tɩ yaa tʋʋmd y sẽn tʋm yʋʋm wʋsgo, tɩ b wa toeem bũmb kẽer siglgã pʋgẽ, tɩ yɩ tɩlɛ tɩ yãmb me toeem wall y base. Sẽn yaa a soab fãa, y tõe n getame tɩ y sẽn paam n maand bũmb ning Wẽnnaam tʋʋmdã pʋgẽ wã pa ta y sẽn da tʋll n maanã ye. Sã n wa yaa woto, tõe n mi n sãama y sũuri. La ne rẽ fãa, wãn to la y tõe n maan tɩ sũ-sãamsã ra wa paam pãnga, tɩ y koms raood wall y lebg sũ-to-ned bɩ sũ-kẽk soaba? Bõe n na n sõng-y tɩ y sũ-noogã ra sa?

D sã n maag d yĩng n bʋgs a Zãmbatiis kibarã zugu, na n sõng-d lame tɩ d bãng d sẽn tõe n maan tɩ d sũ-noogã ra sa ye. A Zãmbatiis tʋma tʋʋmd sẽn sɩd tar barka. La yaa vẽeneg t’a ra tʋllẽ lame t’a vɩɩmã ra baas wa sẽn yɩ to-to wã ye. Tõe t’a ra pa tags t’a na n zĩnda bãens roog n kaoose, hal tɩ yɩɩg a tʋʋmdã sẽn kaoos to-to wã ye. Ne rẽ fãa, a kell n talla a sũ-noogã a vɩɩmã tõre. Bõe n sõng-a? Bõe n tõe n sõng tõnd me tɩ baa yɛlã sã n wa pa wa tõnd sẽn da ratã, bɩ d sũ-noogã ra sa?

A Zãmbatiis sɩnga a tʋʋmdã yʋʋmd 29 tʋʋl-nif kiuugã sẽnese. A lʋɩɩ taoor n maneg sor Mesi wã yĩnga, n da moond n yetẽ: “Tek-y yam, bala saasẽ Rĩungã kolgame.” (Mat. 3:2; Luk 1:12-17) Wʋsg saka a koɛɛgã. Sɩd me, neb kʋʋng yii zĩ-zãrsẽ n wa kelg a goamã, tɩ wʋsg sak n tek yam n deeg lisgu. A talla raood me n keoog tũudmã taoor dãmb sẽn da get b mens wa nin-tɩrsã, n togs-b sɩbgr ning b sẽn na n paame, b sã n pa toeeme. (Mat. 3:5-12) Yʋʋmd 29 zĩ-likr kiuugã sẽnes la a maan bõn-kãseng ning a sẽn da segd n maanã: A lisa a Zeezi. Rẽ tɛka, a ra yeta nebã tɩ b tũ a Zeezi masã, tɩ yẽ la Mesi ning b sẽn da wilg t’a watame wã.—Zã 1:32-37.

A Zãmbatiis tʋʋmdã pa tall to ye. A Zeezi goma rẽ yelle, n yeel yaa: “Pagb sẽn dog b rãmbã sʋka, ned sẽn yɩɩd a Zãmbatiis nan pa zĩnd ye.” (Mat. 11:11) Yaa vẽeneg t’a Zãmbatiis  sũur da yaa noogo, Wẽnnaam sẽn ning-a bark woto wã. Wa a Zãmbatiisi, neb wʋsg me paama bark ka tɛk rũndã-rũndã. D gom saam-biig yʋʋr sẽn boond t’a Teeri yelle. A pagã yʋʋr la a Sãndra. B yiibã fãa sẽn kẽes b meng zãng a Zeova tʋʋmdã pʋgẽ wã yɩɩda yʋʋm 50 masã. Ad a Teeri sẽn yeele: “M paamame tɩ b kõ-m tʋʋm wʋsgo. M yɩɩ so-pakda, Betɛllẽ tʋm-tʋmda, zall so-pakda, tigims sull yel-gɛta, distrik yel-gɛta. Masã wã, m le yaa zall so-pakda.” F sã n paam tɩ b bobl-f a Zeova tũudmã tʋʋma, kõta sũ-noogo. La wa a Zãmbatiis kibarã sẽn wilgdã, d yɛlã sã n wa toeeme, yɩl n da bas tɩ f sũ-noogã sa pa nana ye.

A Zãmbatiis ra maanda sũ-noog ne tʋʋmd ning a Zeova sẽn kõ-a wã. Yaa rẽ me n sõng-a t’a pa tol n bas t’a sũ-noogã sa wã. A Zeezi lisgã poore, a Zãmbatiis tʋʋmdã pãng ra boogdame, t’a Zeezi tʋʋmdã pãng ra tar paasg bala. Kɩtame t’a Zãmbatiis karen-biisã wa kong n yeel-a yaa: “Rao ning sẽn da be ne yãmb Zʋrdẽ kʋɩlgã rʋʋnde, yãmb sẽn kõ kaset n gom a soab yellã lisda neba, tɩ nebã fãa rabd b nengẽ.” (Zã 3:26) La a Zãmbatiis yeel-b lame yaa: “Ned ning sẽn so pʋg-paalã yaa pʋg-paal sɩdã. La pʋg-paal sɩdã zoa sã n yas n kelgd pʋg-paal sɩdã, a koɛɛgã kõt-a-la sũ-noog wʋsgo. Rẽnd mam sũ-noogã pida zãnga.” (Zã 3:29) A ra pa maand geesem-geesem ne a Zeezi ye. A pa tags me tɩ tʋʋmd ning Wẽnnaam sẽn kõ a Zeezi wã sẽn yɩɩd yẽ rẽndã, faagda yẽ tʋʋmdã ye. A sũur da pʋd n noomame, a sẽn paam t’a tʋʋmdã kɩt t’a yaa wa ‘pʋg-paal sɩd zoa’ wã.

Yam-sõng ning a Zãmbatiis sẽn da tarã sõng-a lame t’a kell n maan sũ-noogo, baa ne a tʋʋmdã sẽn pa yɩ nana wã. Hal a rogmã, a ra yaa Nazireẽ, n pa segd n yũ rãam buud baa a yembr ye. (Luk 1:15) A Zeezi goma a Zãmbatiis sẽn da mongd a meng bũmb wʋsgã yelle, n yeel yaa: “A Zã waame n loet noor la a pa yũud divẽ ye.” A Zeezi ne a karen-biisã yẽ ra pa vɩ woto ye. Bãmb ra vɩɩ wa neb a taabã bala. (Mat. 11:18, 19) Sẽn paas me, a Zãmbatiis pa maan yel-solemd baa a yembr meng ye. A yaool n da miime t’a Zeezi karen-biisã, baa sẽn da reng n yɩ-b yẽ karen-biisã paama tõog n da maand yel-soalma. (Mat. 10:1; Zã 10:41) La a pa bas tɩ rẽ sãam a sũur ye. A kell n tʋma tʋʋmd ning a Zeova sẽn kõ yẽ wã ne yẽesem.

Tõnd me sã n nand tʋʋmd ning b sẽn kõ-d a Zeova tũudmã pʋgẽ wã, sõngdame tɩ d sũ-noogã ra wa sa ye. A Teeri, rao ning yell d sẽn da gomã yeelame: “B sã n da kõ-m tʋʋmd fãa, m tʋmda ne m sũur fãa.” A tagsa a sẽn kẽes a meng zãng a Zeova tʋʋmdã pʋgẽ t’a vɩɩmã yɩ to-to wã, n yeel yaa: “M pa maand m bãngẽ ne baa fʋɩ. Sẽn wat m yamẽ yaa yel-nood sẽn noogd sũur bala.”

D sã n bʋgs bũmb ning sẽn kɩt t’a Zeova tũudmã tʋʋmd fãa yaa tʋʋmd sẽn tar barkã, d sũur manegd n yɩɩ noog d sẽn paam n tũud-a wã. Tũudmã tʋʋmd fãa kɩtdame tɩ d yaa “Wẽnnaam tʋmd-n-taase.” (1 Kor. 3:9) Wa nin-gɛtg yẽesg sẽn sõngd t’a ket n pɩnd sõma wã, tõnd me sã n tẽegdẽ tɩ d sẽn paam n tʋmd a Zeova tʋʋmdã yaa bark tɛkẽ, n bʋgsd rẽ zug wakat fãa, na n sõngame tɩ d ra bas tɩ d sũ-noogã sa ye. D pa na n makd modgr ning tõnd sẽn maandã ne d taabã ye. D pa na n get tʋʋm nins b sẽn kõ d taabã, n faagd b sẽn kõ tõndã ye.—Gal. 6:4.

Tõe t’a Zãmbatiis ra miime t’a tʋʋmdã na n talla tɛka. La tõe t’a ra pa tagsd tɩ na n tiig n baasa wa sẽn yɩ to-to wã ye. (Zã 3:30) A Zãmbatiis sẽn lis a Zeezi wã, kiis a yoob woto poore, rat n yeel tɩ yʋʋmd 30 wã pʋgẽ bala, rĩm a Erood yõka a Zãmbatiis n kẽes roogo. Ne rẽ fãa, a kell n wɩnga ne sɩdã togsgo. (Mark 6:17-20) Bõe n sõng-a t’a sũ-noogã pa sa, baa ne yɛlã sẽn toeemã? Wakat fãa, a sẽn da tagsd n yɩɩd yaa Wẽnnaam raabã pidsgã yelle.

A Zãmbatiis sẽn wa n be bãens roogã, a ra wʋmda a Zeezi tʋʋmdã sẽn paamd pãngã kibare. (Mat. 11:2; Luk 7:18) A ra kɩsa sɩd tɩ yaa a Zeezi la Mesi wã. La tõe t’a ra sokda a meng a  Zeezi sã n na n sɩd tõog n pidsa bũmb nins fãa Gʋls-sõamyã sẽn yeel tɩ Mesi wã na n maaname wã. Tõe me t’a ra sokda a meng yaa: ‘Mesi wã sã n segd n yɩɩ naaba, yaa masã la a na n sɩng a naamã bɩ? Na n tũu ne rẽ tɩ b yiis-m bãensã roogẽ bɩ? Sẽn na yɩl n wʋm yɛlã võor sõma, a tʋma a karen-biis a yiib tɩ b tɩ sok a Zeezi yaa: “Yaa yãmb la Soab ning sẽn tog n wa wã bɩ, bɩ tõnd segd n gũu ned a to?” (Luk 7:19) Tags-y n ges-y b sẽn lebg n wa, t’a Zãmbatiis maag a yĩng n na n kelg-ba. B bilga yel-soalem a Zeezi sẽn maane, la b paas t’a yeela bãmb tɩ b wa yeel a Zãmbatiis yaa: “Zoens nin pugsdame masã, põy kẽndame, wãoob lebgda yɩlma, wʋms wʋmdame, kũum vʋʋgdame, tɩ koe-noogã moond naong rãmb sʋka.”—Luk 7:20-22.

A Zãmbatiis karen-biisã sẽn wa n togs-a bũmb ninsã tog n kenga a raoodo. Ra wilgda vẽeneg t’a Zeezi pidsda b sẽn da pĩnd n togs tɩ Mesi wã na n maaname wã. Baa ne a sẽn pa yiis a Zãmbatiis bãens roogẽ wã, a Zãmbatiis ra miime tɩ yẽ tʋʋmdã pa yɩ zaalem ye. Yɛlã pa yɩ nana ne-a, la a ra tara a sẽn na tik n maan sũ-noogo.

Wa a Zãmbatiisi, tõnd me sã n tagsd a Zeova raabã pidsgã yell n yɩɩda, d na n maana sũ-mar toog pʋgẽ, ne sũ-noogo. (Kol. 1:9-11) Bɩ d karemd Biiblã la d bʋgsd a goamã zugu, tɩ d na tõog n maan woto. Rẽ n na n tẽegd tõnd tɩ d sẽn tʋmd Wẽnnaam tʋʋmdã pa tol n tõe n yɩ zaalem ye. (1 Kor. 15:58) A Sãndra yeelame: “M karemda Biiblã sak a ye daar fãa. Paasda maam ne a Zeova zoodã. Kɩtame tɩ yaa a Zeova yell la m tagsd n yɩɩda. Pa m mengã yell ye.” Yɩta sõma me tɩ d get Wẽnnaam tʋʋmdã sẽn paamd pãng to-to wã. Na n sõngame tɩ d zʋʋg tõnd mensã yɛlã, n get a Zeova sẽn maandã. A Sãndra yeelame: “JW Télédiffusion^® wã d sẽn get kiuug-kiuugã sõngdame tɩ d neẽ tɩ tõnd ne siglgã neb a taabã sɩd yaa wa zak a ye neba. Sõngda tõnd tɩ d ra bas tɩ d sũ-noogã sa ye.”

A Zãmbatiis tʋʋmdã pa kaoose, la “wa a Eli,” a tʋma ne a sũur fãa, la ne a pãng fãa. Wa a Eli, yẽ me “ra yaa ninsaal wa tõndo.” (Luk 1:17; Zak 5:17) Tõnd sã n dɩk a togs-n-taare, n nand tũudmã tʋʋmd ning fãa b sẽn kõ-do, la d tagsd sẽn tar yõodã yell n yɩɩda, sẽn wa n yaa to-to fãa, d na n kell n tũu Wẽnnaam ne sũ-noogo.