1. Bõe n tõe n kɩt tɩ Biiblã zãmsg yamleoog pa tar kiris-neb kẽere?

RŨNDÃ-RŨNDÃ, yɩl n paam ligd n ges f meng la f zakã rãmb yell yaa toogo. D tẽed-n-taas wʋsg tʋmda daarã tõr sẽn na yɩl n paam bũmb nins sẽn yaa tɩlɛ ne b zakã rãmbã bala. Kẽer nengẽ, tʋʋmã zĩigẽ kẽnd la lebgr meng rɩkda sẽk wʋsgo. Sãnda tʋʋm pʋd n yaa tʋʋm-wɛgla. D tẽed-n-taas wʋsg sẽn wat n na n sig tʋʋm zaabr tɩ yaamsã sãag-b lame, hal tɩ Biiblã zãmsg yamleoog pa tar-b baa-baa.

2. Wakat bʋg la yãmb yãt sẽk n zãmsd Biiblã?

² La bũmb sẽn be bala, yaa tɩ d segd n yãta sẽk n zãmsd Biiblã la bũmb nins siglgã sẽn yiisdã. Woto yaa tɩlɛ ne sẽn dat-a n paam zood sõma ne a Zeova, la a wa paam vɩɩm sẽn ka sɛtã. (1 Tɩm. 4:15, 16) Neb kẽer nekda yibeoog pĩnda, wakat ning bʋʋr sẽn nan kae, tɩ b yamã me nan yaa fasɩ wã, n zãmsd Biiblã. Sãnda me baooda sẽk bilf tʋʋmã sigb poore, wakat b sẽn mi tɩ bũmb pa na n tiis-ba, n zãmsd Biiblã la bũmb nins siglgã sẽn yiisdã, la b bʋgsdẽ.

3-4. Bõe la siglgã toeem-yã, la yaa bõe yĩnga?

³ Yaa vẽeneg tɩ y miime tɩ yaa tɩlɛ tɩ d fãa modg n yãt sẽk n zãmsd Biiblã. La tõe tɩ y sok yaa: ‘M maanda wãn n bãng n yãk m sẽn na n zãmsã? Siglgã sẽn yiisdã labsame. M pa tõe n karem la m kelg bɩ n ges fãa ye.’ Neb kẽer maoodame n paamd sẽka, n zãmsd Biiblã la bũmb nins fãa siglgã sẽn yiisdã. La d tẽed-n-taas wʋsg yẽ nengẽ, yaa toogo. Siglgã taoor lʋɩtb sull miime tɩ sɩd pa nana ye. Rẽ n so tɩ sẽn nan pa kaoose, b yãka yam n boog sɛbã b sẽn yiisdã, la baa b sẽn ningd d sɩtã zugã.

⁴ Wala makre, sẽn mik tɩ kibay wʋsg bee jw.org^® pʋgẽ la JW Télédiffusion^® wã pʋgẽ, tɩ d tõe n ges wall d karem tɩ keng d  raoodã, siglgã pa le yiisd aniyɛɛrã ye. Yʋʋmdã pʋgẽ, yaa naoor a tãab bal la d yiisd Gũusg Gasgã ne Réveillez-vous ! wã masã. Woto fãa yaa sẽn na yɩl tɩ d tõe n paamd sẽk n tʋmd d tʋʋm a taabã. Dẽnd yaa sẽn na n sõng tõnd tɩ d tõog n lʋɩɩs “bũmb nins sẽn tar yõod n yɩɩdã” taoore. (Fili. 1:10) Bõe n na n sõng-d tɩ d bãng n yãk d sẽn segd n karem bɩ n kelg wall n ges d Biiblã zãmsg sasa wã, la d maanda wãn tɩ zãmsgã maneg n naf-d n yɩɩd pĩndã? Sogs-kãensa la d na n leoke.

5-6. Siglgã sẽn yiisdã sʋka, bʋg la d segd n deng n karem bɩ n kelge?

⁵ Bõe la d segd n deng n karem bɩ n kelg wall n gese? Yaa vẽeneg tɩ d segd n baoo sẽk daar fãa n zãms Wẽnnaam Gomdã. B booga vɛrse-rãmb sõor tigingã neb sẽn segd n karem semen fãa wã, sẽn na yɩl tɩ d paam sẽk n paase, n bʋgs la d maan vaeesg d sẽn karmã zugu. D raabã pa d we n karem vɛrse nins d sẽn tog n karmã bal ye. D segd n modgame me tɩ Biiblã sẽn yetã kẽ d sũurã, la paas tõnd ne a Zeova zoodã.—Yɩɩn. 19:15.

⁶ Bõe me la d segd n karem la d zãms neere? Segdame tɩ d segl Gũusg Gasgã zãmsgo, Tigingã Biibl zãmsgo, la d segl sõss a taabã b sẽn wɛgsd Kiris-neb vɩɩm la b tʋʋmã tigsg sasa wã. D segdame me n karemd Gũusg Gasgã wakat fãa, b sẽn yiisd a soab zãmsgã yĩngã, la sẽn yaa-a nebã fãa yĩngã me, la Réveillez-vous ! wã, sã n mik tɩ bee buud-gomd d sẽn wʋmd pʋgẽ.

7. Yãmb sã n pa tõe n karem bɩ n kelg wall n ges bũmb nins fãa siglgã sẽn ningd jw.org pʋgẽ wã, la JW Télédiffusion pʋgẽ wã, y segd n sãama y sũur bɩ?

⁷ Tõe tɩ y na n yeelame yaa: ‘Be neere! La bũmb nins fãa b sẽn yiisd jw.org pʋgẽ wã, la JW Télédiffusion pʋgẽ wã yẽ? Tolg n labsame!’ D rɩk makr ne b sẽn na n segl rɩ-nood buud toor-toor rɛstorã pʋgẽ. Sẽn wa-b rɛstorã wã pʋgẽ wã pa tõe n lemb rɩbdã fãa ye. Ned fãa na n yãka rɩbd a wãn bal n dɩ. Woto me, yãmb sã n pa tõe n karem bɩ n kelg wall n ges bũmb nins fãa siglgã sẽn ningd d sɩt wɛɛb rãmbã pʋsẽ wã, bɩ y ra sãam y sũur ye. Maan-y y sẽn tõe wã. La sebr zãmsg meng rat n yeelame tɩ bõe? Wãn to la d tõe n maan tɩ zãmsgã naf-d sõma? Bɩ d leok sogs-kãens masã.

8. Y sã n wa segend Gũusg Gasgã zãmsgã, wãn to la y segd n maane, la rẽ nafa wã yaa bõe?

⁸ Sebr zãmsg yaa f sẽn na n karemd-a la f gũusd neer sẽn na yɩl n bãng bũmb sẽn tar yõod a pʋgẽ. Pa f sẽn na n karem zĩig ning f sẽn segd n zãmsã tao-tao bala, tɩ sogsg sã n beẽ bɩ f rẽeg leoorã ye. Wala makre, y sã n wa segend Gũusg Gasgã zãmsgã, y segd n deng n karma zĩig ning b sẽn gʋls tɩ: ‘D sẽn na n yã wã.’ Rẽ poor bɩ y ges gom-zugã, gom-zu-biyã, la sogsg nins sẽn kʋmsd sõsgã. Rẽ poor masã bɩ y maag y yĩng n karemd sull fãa. Gũus-y neer n bãng b sẽn gomd bũmb ning yell sull fãa pʋgẽ wã. Naoor wʋsgo, wẽneg n yaa sullã pipi gomdã n sõngd tɩ d bãng rẽ. Nong n yaa sull fãa pipi gomd n wilgd goamã sẽn na n tees neng ningã. Y sã n wa karemdẽ, gũus-y neer n ges wãn to la sull fãa sẽn yetã sõngd n wɛgsd gom-zu-bilã la gom-zugã. Y sã n yã gom-bil y sẽn pa mi, wall gomd y sẽn pa wʋmd a võore, bɩ y rẽege, n wa maan vaeesg n paam n wʋm a võor sõma.

9. a) Y sã n wa segend Gũusg Gasgã zãmsgã, bõe yĩng tɩ y segd n karem vɛrse-rãmbã, la wãn to la y tog n maan dẽ? b) Wa b sẽn wilg Zozoe 1:8 wã, d sã n karem vɛrse, bõe la d segd n maane?

⁹ Gũusg Gasgã zãmsgã sasa, yaa Biiblã la d zãmsda. Rẽ wã, bao-y n bãng-y vɛrse-rãmbã sẽn yetã, sẽn yɩɩd fãa vɛrse nins b sẽn na n kɩt tɩ b karmã. Gũus-y neer n paam n bãng  vɛrse-rãmbã goam wall b gom-biis nins sẽn kell n zems ne b sẽn yeel sullã pʋgẽ wã. Yɩta sõma me tɩ y maag y yĩng n bʋgs vɛrse nins y sẽn na n karmã zug sõma, la y tags n ges yãmb mengã sẽn tõe n tũ vɛrse fãa sẽn yetã to-to.—Karm-y Zozoe 1:8.

10. Wa Ebre-rãmb 5:14 sẽn wilgdã, bõe yĩng tɩ zak pʋgẽ Biibl zãmsgã sasa bɩ roagdbã segd n sõng kambã tɩ b bãng sebr zãmsgo, la b sẽn tõe n maan vaeesg to-to?

¹⁰ Roagdbã ratame tɩ b zak pʋgẽ Biiblã zãmsgã tall yamleoog ne kambã. Woto zemsame. La yɩta sõma tɩ b tẽeg tɩ baa b sẽn segd n deng n bao b sẽn na n maan bũmb ning b zak pʋgẽ Biibl zãmsgã sasa wã, b pa segd n tags tɩ yaa tɩlɛ tɩ semen fãa bɩ b bao bũmb sẽn na n kɩt tɩ tolg n be yamleoog wʋsg ye. Wala makre, kẽer naagda taab n ges JW Télédiffusion wã, wall b naag taab n ka a Nowe koglgã buudu, pa rẽ bɩ n maan bũmb a to. Woto yaa sõma, la d ra yĩm tɩ segdame me tɩ b sõng kambã tɩ b bãng sebr zãmsg ye. Yaa tɩlɛ tɩ b bãng tigissã sẽn segend to-to, b sẽn tõe n maan vaeesg siglgã sẽn yiis bũmb ninsã pʋgẽ to-to, n tõog n leok sokr b karen-bi-taas sẽn soke, wall n welg yell b sẽn tar lekollẽ wã. (Karm-y Ebre-rãmb 5:14.) Zakẽ tɩ kambã sã n minim n zãmsd Biiblã la bũmb a taabã siglgã sẽn yiisdã, na n yɩɩ nana ne-b tɩ tigissã la tigis-kãsemsã sasa bɩ b kelg sõssã neere, baa sã n pa naag ne video-rãmba. La yaa vẽeneg tɩ zãmsgã sẽn segd n kaoos to-to wã tog n zemsa ne biig fãa sẽn yaa to-to wã, la a yʋʋmã.

11. Bõe yĩng tɩ d segd n sõng Biibl karen-biig fãa t’a bãng vaeesgo, la zãms n zulgi?

¹¹ Segdame me tɩ d sõng Biiblã karen-biisã tɩ b bãng sebr zãmsg sõma. Sɩngrẽ wã, d sã n neẽ tɩ b segenda Biiblã zãmsgã, n dẽegd leoorã b sebrã zugu, pa rẽ bɩ d neẽ tɩ b segend tigissã me woto, d sũur noomame. La yaa tɩlɛ tɩ d sõng-b tɩ b bãng b sẽn tõe n maan vaeesg to-to la b zãms b toor n zulgi. Rẽ, b sã n wa tar zu-loɛɛga, b pa na n yɩ tao-tao n gilgd tigingã neb nengẽ n baood sagls ye. B na n tõog n maana vaeesg bũmb nins siglgã sẽn yiisã pʋgẽ, n paam sagls b toore.

12. Biiblã zãmsg sasa, d tõe n yãka yam n na n maan bõe?

¹² Y sã n yaa ned sẽn pa nong sebr zãmsgo, y tõe n tagsdame tɩ pa tol n tõe n tall yamleoog ne-y ye. Yaool n tõeeme. Maan-y tɩ zãmsgã yaa koɛɛg-koɛɛg sɩngrẽ wã, tɩ y yaool n paasd sẽkã bilf-bilfu. Yãk-y bũmb takɩ y sẽn dat n modg n maane. Yaa sɩd tɩ d sẽn dat pipi, yaa  d modg tɩ paasd d zoodã ne a Zeova. La bũmb a taab me la d tõe n yãk yam n na n maane. Wala makre, y tõe n baoo sokr b sẽn sok yãmb leoore, wall y maan vaeesgo, yell sẽn namsd-y zugu.

13. a) Bilg-y bi-bɩɩg sẽn tõe n maan to-to, n tõog n bãng n wilg a karen-bi-taas bũmb a sẽn tẽede. b) Wãn to la y tõe n tũ saglg ning sẽn be Kolos rãmb 4:6?

¹³ Y sã n yaa bi-bɩɩg n ket lekolle, tõe tɩ y karen-bi-taasã fãa tẽeda evolisiyõ wã. Y tõe n dat n wilg-b-la Biiblã sẽn yetã, la y tagsdẽ tɩ y pa na n tõog ye. Woto wilgdame tɩ y segd n baoo sẽk n zãms Biiblã n paas y minimã. Ad bũmb a yiib y sẽn tõe n maan zãmsgã sasa: 1) Deng-y n bao-y kaset sẽn na n kɩt tɩ yãmb mengã maneg n kɩs sɩd tɩ yaa Wẽnnaam n naan bũmb fãa. 2) Bao-y y sẽn na n maan to-to n bãng n wilg ned bũmb y sẽn tẽede. (Rom. 1:20; 1 Pɩy. 3:15) Bɩ y reng n sok y meng yaa: ‘Bõe yĩng tɩ mam karen-bi-taasã tẽed evolisiyõ wã?’ Y sã n bãng rẽ, bɩ y maag y yĩng masã n maan vaeesg bũmb nins siglgã sẽn yiisã pʋgẽ, n paas y bãngrã. Y na n yãame tɩ yɩl n wilg y taabã bũmb nins y sẽn tẽedã tõeeme n pa yɩ toog wa yãmb sẽn da tagsdã ye. Neb wʋsg tẽeda evolisiyõ wã, bala, ned b sẽn nand n yeel-b tɩ yaa sɩda, tɩ bãmb me tẽed rẽ yĩng bala. Y sã n togs nina bũmb a ye wall a yiib sẽn wilgd tɩ evolisiyõ wã yaa ziri, a sã n nonga sɩda, a na n basa a sẽn da tẽedã.—Karm-y Kolos rãmb 4:6.

14-16. a) Y sã n dat n bãng Biiblã sebr ning sõma n paase, bõe la y tõe n maane? b) Wãn to la vɛrse-rãmbã b sẽn sõdg sull 16 pʋgẽ wã tõe n sõng-y tɩ y bãng bũmb wʋsg a Amoos sebrã zug n paase? (Ges-y zĩ-gũbrã. “ Bao-y n bãng-y neb nins yell Biiblã sẽn gomdã sõma!”)

¹⁴ D rɩk makr me ne y sẽn na n yã tɩ d tigsg a ye wakat la b na n karem la b wɛgs Biiblã sebr a ye. Yaa sebr sẽn naag b sẽn boond b rãmb tɩ “no-rɛɛs-bi” wã sɛbã, tɩ yãmb yaool n getẽ tɩ y pa mi no-rɛɛs-kãng sõma woto ye. Ad y sẽn tõe n deng n maane: Segdame tɩ y tʋlg ne y sũur fãa n na n bãng koɛɛg ning no-rɛɛsã sẽn gʋlsã sõma. La bõe n na n sõng-yã?

¹⁵ Pipi, sok-y y meng yaa: ‘Bõe la m zoe n mi no-rɛɛsã zugu? A yɩɩ nin-bʋg buudu? A zĩnda tẽn-bʋgo? A tʋʋmd yɩɩ bõe?’ D sã n bãng bũmb kẽer no-rɛɛsã zugu, tõe n sõng-d lame tɩ d wʋm a gom-biis sãnda võor sõma, wall d wʋm makr a sẽn dɩk võore. Y sã n wa karemd Biiblã sebre, bɩ y gũus neer tɩ y na n yãa goam sẽn sõngd tɩ d bãng sẽn gʋls-a seb-kãngã sẽn yɩ ned ning buudã.

¹⁶ Yiib-n-soaba, y sã n tõog n bãng sẽn yɩ wakat ning la no-rɛɛsã gʋls sebrã, na n sõng-y-la wʋsgo. Sã n yaa Traduction du monde nouveau wã bɩ y ges “Biiblã sɛbã yʋy” sẽn be baasgẽ wã, tɩ y na n bãnga rẽ nana-nana. Y tõeeme me n tɩ ges Guide d’étude de la Parole de Dieu wã seb-neng 14-17 wã, tɩ kart n be be n wilgd no-rɛɛsdbã la rĩm-dãmbã sẽn zĩnd wakat ningã. Sã n yaa bãngr-goam n be Biiblã zĩig ning y sẽn zãmsdã, yɩta sõma tɩ y bao n bãng vɩɩmã sẽn da yaa to-to wakat kãngã. Yaa minim la yel-manesem bʋs la nin-buiidã ra tar tɩ pa sõma, tɩ no-rɛɛsã rat n sõng-b tɩ b toeeme? Ãnd dãmb me n zĩnd no-rɛɛsã wakatẽ wã? Y sã n dat n bãng bũmb fãa vɩʋʋg sõma, tõe n yɩɩ tɩlɛ tɩ y tɩ karem bũmb kẽer Biiblã sɛb a taab pʋgẽ. Wala makre, y sã n dat n bãng bũmb nins sẽn da maan no-rɛɛs a Amoos zãmaanẽ wã, y sã n tɩ karem 2 Rĩm-dãmb sebrã vɛrse kẽere, ne 2 Kibay sebrã vɛrse kẽere, na n sõng-y-la wʋsgo. Traduction du monde nouveau wã pʋgẽ, Amoos 1:1 wã referãens-rãmbã zĩigẽ, b pʋd n sõdga 2 Rĩm-dãmb ne 2 Kibay vɛrse kẽere.  Yɩta sõma me tɩ y karem a Ooze sebrã, bala, wõnda a zĩnda a Amoos wakatẽ wã. Y sã n tɩ karem Biiblã seb-kãensã fãa, na n sõng-y lame tɩ y bãng vɩɩmã sẽn da yaa to-to a Amoos wakatẽ wã.—2 Rĩm. 14:25-28; 2 Kib. 26:1-15; Ooze 1:1-11; Amoos 1:1.

17-18. Rɩk-y makr sẽn wilgd tɩ Biiblã zãmsg sasa, d sã n gũusd n get baa yaa yel-bõonesã, paasda zãmsgã yamleoogo. Tõe n yɩɩ makr b sẽn kõ sull a yiibã pʋgẽ, wall makr a to y sẽn tare.

¹⁷ D sã n wa karemd Biiblã, yaa sõma tɩ d tʋlg n wʋm d sẽn karemdã võor sõma n paase. D rɩk makr ne y sẽn na n karemd a Zakari sebrã sak 12 sẽn da pĩnd n gom Mesi wã kũum yellã. (Zaka. 12:10) Y sã n wa ta vɛrse 12, y na n yãa b sẽn yeel t’a “Natã buudã neb roog” na n yãba Mesi wã kũum yĩnga, la tɩ b sũy na n sãama wʋsgo. Y na n karmame n loog tao-tao bɩ? Yɩta sõma tɩ y yals n sok y meng yaa: ‘Bõe n be Mesi wã ne a Natã buudã neb sʋka? Bũmb n be m sẽn tõe n maan n paam vẽenem n paas bɩ?’ Sɩng-y vaeesgo! Ges-y Zakari 12:12, Traduction du monde nouveau wã pʋgẽ. Referãens-rãmbã zĩigẽ, b yeelame tɩ y karem 2 Sãmwɛll 5:13, 14. Be, y na n bãngame t’a Natã yɩɩ rĩm a Davɩɩd bi-ribla. B yeelame me tɩ y karem Luk 3:23, 31. Be, b wilgame t’a Natã yaa a Zeezi ma a Maari yaaba. (Ges-y yʋʋmd 2017 sa-sik kiuug Gũusg Gasgã seb-neng 32, sull a 4.) Zĩig pʋgẽ, y sũur na n maneg n yɩɩ noogo! Bõe yĩnga? Y miime tɩ b ra pĩnd n wilgame t’a Zeezi na n yɩɩ a Davɩɩd yagenga. (Mat. 22:42) La a Davɩɩd kom-dibli wã sõor yaool n yɩɩda 20. Dẽnd pa zaalem la a Zakari sẽn pĩnd n togs n welg t’a Natã buudã neb sũy na n sãama wʋsg a Zeezi kũumã yĩngã ye.

¹⁸ Ad makr a to yɛsa: Y sã n karem Luk sak a 1 wã, b wilgame tɩ malɛk a Gabriyɛll  waa a Maari nengẽ, n wa yeel-a t’a na n doga bi-ribla, la a paas yaa: “Yẽ na n yɩɩ kãsenga. B na n bool-a lame tɩ Sẽn ka-a to wã Bi-ribla. Wẽnnaam a Zeova na n kõo yẽ a yaab a Davɩɩd geerã. A na n yɩɩ Rĩma, n dɩ naam a Zakoob yagensã zug wakat sẽn kõn sa.” (Luk 1:32, 33) Tõe tɩ sẽn na n pa y yamẽ, yaa a Gabriyɛll sẽn yeel tɩ b na n boola a Zeezi tɩ “Sẽn ka-a to wã Bi-riblã.” La tẽeg-y t’a Gabriyɛll yeelame me t’a Zeezi na n “yɩɩ Rĩma, n dɩ naam.” Woto wã, d tõe n soka d meng yaa: A Maari tagsame t’a Gabriyɛll gomdã rat n yeelame tɩ bõe? Rẽ yĩnga, a tagsame tɩ rat n yeelame t’a Zeezi na n deega rĩm a Erood zĩiga, wall yaa ned sẽn na n wa ledg a Erood la a na n siki, n deeg naamã, n soog Israyɛll nebã bɩ? A Zeezi sã n lebg naaba, a Maari me paamda naam. Bala, yẽ la rĩmã ma. Sẽn paase, b zakã rãmb na n tɩ zĩnda na-yirã. La b pa wilg zĩig baa a ye t’a Maari goma bũmb a woto yell ne a Gabriyɛll ye. B pa yeel me t’a kosa naam bilf Rĩungã pʋgẽ, wa a Zebede kom-dibli a yiibã ye. (Mat. 20:20-23) Wõnda yel-bõonese, la kɩtdame tɩ d maneg n kɩs sɩd t’a Maari ra yaa sik-m-meng soab meng-menga!

19-20. Wa b sẽn wilg Zak 1:22-25, la 4:8 wã pʋgã, d sã n wa zãmsd Biiblã, d sẽn dat n tɩ yɩɩd segd n yɩɩ bõe?

¹⁹ D tẽeg tɩ d sã n zãmsd Biiblã la bũmb nins siglgã sẽn yiisdã, d sẽn dat n yɩɩd yaa rẽ na paas tõnd ne a Zeova zoodã. D ratame me tɩ Biiblã zãmsgã sõng-d tɩ d fees d menga, n bãng d “sẽn yaa to-to wã” sõma, la d zʋg nins d sẽn segd n teke, n paam n ta Wẽnnaam yam. (Karm-y Zak 1:22-25; 4:8.) Rẽ wã, d sã n dat n sɩng Biiblã zãmsg fãa, d segd n pʋʋsa a Zeova n kos a vʋʋsem sõngã sõngre. Segdame tɩ d bõos-a t’a sõng-do, tɩ d rɩ zãmsgã yõod sõma la d tõog n bãng d manesem nins d sẽn segd n basã.

²⁰ Yɩɩn-gʋlsdã ra goma Wẽnnaam ned yelle, n yeel yaa: ‘Yẽnda nonga Sẽn-Ka-Saab tõogã, n tagsd a yell wĩndg la yʋngo! . . . Yẽnda paamda tõogr bũmb ning fãa a sẽn maandã pʋga.’ (Yɩɩn. 1:2, 3.) Bɩ d fãa yɩ wa nin-kãnga!