1-3. a) Yɩɩn-sõamyã 5:5-7 wã wilgdame t’a Zeova tagsg yaa wãn ne wẽng buud fãa? b) Bõe yĩng tɩ d tõe n yeel tɩ belg biig bɩ modg-a n tʋm tʋʋm-dẽgdã kɩɩsda “Kiristã tõogã”?

WẼNNAAM A ZEOVA kisa wẽng buud fãa. (Karm-y Yɩɩn-sõamyã 5:5-7.) Sãmbg kae t’a kisa ned sẽn na n belg biig bɩ a modg-a n tʋm tʋʋm-dẽgd ne-a. Bala, yaa bũmb sẽn tolg n yaa wẽng wʋsgo! Tõnd sẽn yaa a Zeova Kaset rãmbã, d rɩkda a togs-n-taare. Tõnd me kisa tʋʋm-wẽng a woto. Tigingã ned sã n maan yell a woto me, d pa na n sĩnd n getẽ ye.—Rom. 12:9; Ebre. 12:15, 16.

² Sẽn yaa tʋʋm-dẽgd ning fãa la ned belg biig bɩ n modg-a n maane, kɩɩsda “Kiristã tõogã.” (Gal. 6:2) Bõe yĩng tɩ d yet woto? Sõsg ning sẽn loogã pʋgẽ, d yãame tɩ Kiristã tõogã, rat n yeel tɩ bũmb nins fãa a sẽn zãms nebã ne a no-goamã, la ne a yel-manesmã la a tʋʋm-tʋmdɩ wã maasmã yẽbga nonglem zugu, la tɩ sõngda nebã tɩ b maand sẽn yaa tɩrga. Kiris-neb hakɩɩkã sẽn tũud tõ-kãngã, b tara manesem-sõng ne kambã, tɩ kɩtdẽ tɩ kambã yam gãe bãane, tɩ b neẽ me tɩ b sɩd nong-b lame. Ned sã n belg biig bɩ a modg-a n tʋm tʋʋm-dẽgdo, yaa wẽng wʋsgo, la wilgdẽ tɩ yaa a mengã yell bal n pak-a. Kɩtdame me tɩ biigã yam pa gãe, t’a getẽ me tɩ b pa nong-a ye.

³ Bʋko, yaa yell sẽn piuug zĩig zãnga, la sẽn mi n paam hal baa kiris-neb hakɩɩk menga. Bõe yĩnga? Bala, “nin-wẽnsã ne bɛlgdbã” lebgda wʋsgo, tɩ sãnda meng tõe n bao n na n kẽ kiris-nebã sʋka, sẽn na yɩl n paam kẽer n belge.  (2 Tɩm. 3:13) Sẽn paase, neb kẽer sẽn yet tɩ b tũuda a Zeova wa n saka b yĩngã tʋls-wẽnse, tɩ rẽ kɩt tɩ b belg kamb bɩ n modg-ba, n tʋm tʋʋm-dẽgd ne-ba. La bõe yĩng tɩ woto yaa yel-wẽn-kãsenga? D na n goma rẽ yelle. Rẽ poore, d na n yãa kãsem-dãmbã sẽn maande, ned sã n maan yel-wẽn-kãsenga. Wala makre, ned sã n belg biig bɩ a modg-a n tʋm tʋʋm-dẽgdo. D na n yãa roagdbã me sẽn tõe n maaneg n kogl b kambã. *

4-5. Bõe yĩng tɩ d yetẽ tɩ ned sã n belg biig bɩ a modg-a n tʋm tʋʋm-dẽgdo, a beega biigã?

⁴ Ned sã n belg biig bɩ a modg-a n tʋm tʋʋm-dẽgdo, namsda neb ka tɛk n kaoos yʋʋm wʋsgo. Namsda biigã, la neb nins fãa sẽn nong-a wã. Wala makre, a zakã rãmba, la tigingã nebã. Ned sã n maan woto, yaa yel-wẽn-kãseng tɛkẽ!

⁵ A beega biigã. Ned sã n maan a to wẽnga, wall a maan-a bũmb t’a namsdẽ, yaa yel-wẽnde. Wa d sẽn na n yã sõsg ning sẽn pʋgdã pʋgẽ wã, ned sã n tʋm tʋʋm-dẽgd ne biiga, a maan-a-la wẽng hal wʋsgo. A zãmba biigã, bala, biigã ra kɩs-a-la sɩda. Rẽ me, kɩtame tɩ biigã yam pa le gãe ye. Togame tɩ d kogl kambã ne tʋʋm-wẽns a woto. Segdame me tɩ d bels la d sõng yel-kãngã sẽn paam-b rãmbã.—1 Tes. 5:14.

6-7. Bõe yĩng tɩ d yetẽ tɩ ned sã n belg biig bɩ a modg-a n tʋm tʋʋm-dẽgdo, a beega tigingã nebã, la tẽngã taoor dãmba?

⁶ A beega tigingã nebã. Tigingã ned sã n belg biig bɩ a modg-a n tʋm tʋʋm-dẽgdo, sãamda tigingã yʋʋre. (Mat. 5:16; 1 Pɩy. 2:12) Woto sɩd pa zems ye! Bala, kiris-neb milyõ-rãmb maanda sɩd ne a Zeova, n ‘wɩsgd b mens n zabd tẽebã yĩnga.’ (Ziid 3) Tigingã ned sã n tʋm sẽn yaa wẽnga, n sãam tigingã yʋʋre, la a pa rat n tek yam n kos sugri, b yiisd-a lame.

⁷ A beega tẽngã taoor dãmba. Kiris-nebã segd n ‘saka nanambsã.’ (Rom. 13:1) D sã n tũud tẽngã laloa-rãmbã, rẽ n wilgd tɩ d sakda nanambsã wa sẽn segdã. Tigingã ned sã n kɩɩs tẽngã laloa, wala makre, a sã n belg biig bɩ a modg-a n tʋm tʋʋm-dẽgdo, a beega tẽngã taoor dãmba. (Ges-y Tʋʋm 25:8.) Yaa sɩd tɩ kãsem-dãmbã pa tar sor n na n sɩbg ned sẽn kɩɩs tẽngã laloa ye. La b pa na n sõng ned sẽn tʋm tʋʋm-dẽgd ne biig t’a põs tẽngã taoor dãmb sɩbgrã ye. (Rom. 13:4) Sẽn maan-a yellã na n kẽeba a sẽn bʋdã.—Gal. 6:7.

8. Ned sã n beeg a to, a Zeova tagsg yaa wãna?

⁸ Sẽn yɩɩd fãa, a beega Wẽnnaam. (Yɩɩn. 51:6) Ned sã n beeg a to, a beega a Zeova me. Tõogã Wẽnnaam sẽn da kõ Israyɛll nebã wilgda rẽ. B wilga be tɩ ned sã n zuk a to bũmbu, wall a maan-a-la zãmb n deege, a ‘beega’ a Zeova. (Maan. 5:21-23) Tigingã ned sã n belg biig bɩ a modg-a n tʋm tʋʋm-dẽgdo, yaa wa a zuka bũmb biigã nengẽ, bala a kɩtame tɩ biigã yam pa le gãe ye. Dẽnd yaa vẽeneg t’a beega Wẽnnaam. Sẽn paas me, a sãama a Zeova yʋʋre. Woto fãa yĩnga, sɩd yaa yel-wẽn-kãseng meng-meng d sẽn segd n kisgi.

9. Na maan yʋʋm wʋsgo, bõe la a Zeova siglgã maanda, la bõe yĩnga?

⁹ Na maan yʋʋm wʋsgo, a Zeova siglgã  yiisda sɛb ka tɛk sẽn gomd b sẽn mi n belg kambã bɩ n modg-b n tʋm tʋʋm-dẽgdã yelle, la a kõt sagls sẽn tik Biiblã. Wala makre, sõss wʋsg la b wɛgs Gũusg Gasgã la Réveillez-vous ! wã pʋgẽ, n wilg yell a woto sẽn paam-b rãmbã sẽn tõe n maanega, n paam yolsgo, la neb a taabã sẽn tõe n sõng-b to-to la b keng b raoodo, la roagdbã me sẽn tõe n maane, n kogl b kambã. Kãsem-dãmbã sɩng n paamda zãmsg sõma, la sagls sẽn yit Biiblã pʋgẽ, tɩ rẽ tõe n sõng-b tɩ b bãng n welg yell a woto buudã. Hal ne rũndã, siglgã mi n lebg n gesa sagls la noy nins b sẽn kõ kãsem-dãmbã rẽ wɛɛngẽ wã, tɩ bũmb sã n dat toeeng bɩ b toeeme. Bõe yĩnga? Yaa sẽn na yɩl tɩ b sẽn welgd yell a woto buudã to-to wã zems kɛpɩ ne Kiristã tõogã.

10-12. a) Ned sã n wa maan yel-wẽn-kãseng tɩ kãsem-dãmbã na n welg yellã, bõe la b tẽegd wakat fãa, la bõe me n segd n pak-ba? b) Wa sẽn zems ne Zak 5:14, 15 wã, bõe la kãsem-dãmbã na n bao n maane?

¹⁰ Ned sã n maan yel-wẽn-kãseng tɩ kãsem-dãmbã na n welg yellã, b tẽegda wakat fãa tɩ wa sẽn zems ne Kiristã tõogã, b segd n gesa Wẽnnaam piisã yell ne nonglem, la b maan sẽn yaa tɩrga, la sẽn zems a nifẽ. Woto kɩtame tɩ b sã n wa togs-b tɩ ned n maan yel-wẽn-kãsenga, b rengd n tagsa bũmb kẽer zug neere. Sẽn pak kãsem-dãmbã n tɩ yɩɩdã yaa b mao t’a Zeova yʋʋrã ra sãam ye. (Maan. 22:31, 32; Mat. 6:9) Bũmb a to me sẽn pak-ba, yaa b tẽed-n-taasã na kell n tall zood sõma ne a Zeova. Ned sã n maan yel-wẽn-kãsenga, b ratame me n sõng neb nins fãa rẽ sẽn namsdã.

¹¹ Sã n mik me tɩ sẽn maan-a yellã yaa tigingã neda, kãsem-dãmbã ratame me tɩ sã n tõe bɩ b sõng-a t’a lebg n maneg a zoodã ne a Zeova. (Karm-y Zak 5:14, 15.) Kiris-ned sã n sak a tʋls-wẽnga, n maan yel-wẽn-kãsenga, a yaa wa ned sẽn ka laafɩ, rat n yeel t’a pa le tar zood sõma ne a Zeova ye. * Wakat kãnga, kãsem-dãmbã na n yɩɩ wa logtoɛɛmba. B na n maana b sẽn tõe fãa sẽn na yɩl n sõng “bãadã,” rat n yeel tɩ sẽn maan-a yel-wẽndã, t’a paam laafɩ. Biiblã saglsã b sẽn na n kõ-a wã tõe n sõng-a lame t’a maneg a zoodã ne Wẽnnaam. La yaa a sã n sɩd teka yam ne a sũur fãa, n kot sugri.—Tʋʋ. 3:19; 2 Kor. 2:5-10.

¹² Hakɩɩka, kãsem-dãmbã tʋʋmdã pa nana ye. B rata piisã Wẽnnaam sẽn gũnug-bã neer ne b sũur fãa. (1 Pɩy. 5:1-3) B ratame tɩ b tẽed-n-taasã yam gãe bãan tigingã pʋgẽ. Rẽ n so tɩ ned sã n wa togs-b tɩ ned n maan yel-wẽn-kãsenga, b maanda bũmb tao-tao, yellã welgr yĩnga. Wala makre, b sã n wʋm tɩ ned n belg biig bɩ n modg-a n tʋm tʋʋm-dẽgdo, bõe la b maanda? Ges-y sogsg nins sẽn be sull 13, 15 la 17 wã sɩngrẽ wã.

13-14. Kãsem-dãmbã sã n wʋm tɩ ned n belg biig bɩ n modg-a n tʋm tʋʋm-dẽgdo, b sakdame tɩ b taas yellã tẽngã taoor dãmb bɩ? Wilg-y y leoorã võore.

¹³ Kãsem-dãmbã sakdame tɩ b taas yellã tẽngã taoor dãmba, wa laloa wã sẽn wilgdã bɩ? N-ye! Tẽns kẽere, b yiisa noor n wilg tɩ ned sã n wʋm tɩ ned n belg biig bɩ n modg-a n tʋm tʋʋm-dẽgdo, a segd n togsa tẽngã taoor dãmba. Kãsem-dãmb nins sẽn be tẽn-kãensã tũuda laloa wã sẽn yeelã. (Rom. 13:1) Pa noor sẽn kɩɩsd Wẽnnaam noyã ye. (Tʋʋ. 5:28, 29) Rẽ n so tɩ b sã n wa togs kãsem-dãmbã yell a woto, tao-tao bala, b na n soka filiyallã, n bãng b sẽn tog n maan to-to n tũ tẽngã laloa wã sẽn yetã.

¹⁴ Kãsem-dãmbã na n wilga biigã ne a nebã,  la ned ning fãa sẽn wʋm yellã tɩ b tara sor n na n tɩ togs tẽngã taoor dãmba. La sã n mik tɩ yaa tigingã ned n maan yellã, tɩ yelg hal tɩ neb wʋsg wʋme? Rẽ yĩnga, kiris-ned sã n taas yellã tẽngã taoor dãmba, a segd n tagsame t’a sãama Wẽnnaam yʋʋr bɩ? Ayo! Yaa sẽn maan-a yellã n sãam Wẽnnaam yʋʋre.

15-16. a) Wa 1 Tɩmote 5:19 sẽn yetã, bõe yĩng tɩ kãsem-dãmbã sã n na n lugl bʋ-kaoor sull n bʋ yell bɩ yaa tɩlɛ tɩ kaset rãmb taa a yiibu? b) Kãsem-dãmbã sã n wʋm tɩ tigingã ned n belg biig bɩ n modg-a n tʋm tʋʋm-dẽgdo, bõe la b maanda?

¹⁵ Bõe yĩng tɩ yaa tɩlɛ tɩ kaset rãmb taa a yiibu, tɩ kãsem-dãmbã yaool n lugl bʋ-kaoor sulli? Biiblã wilgdame tɩ rẽ n yaa tɩrga. Sã n pa mikame tɩ yaa sẽn maan-a yellã n vẽneg n togse, yaa tɩlɛ tɩ b paam kaset rãmb sẽn ta a yiib yell pʋgẽ, tɩ kãsem-dãmbã yaool n lugl bʋ-kaoor sulli. (Tõo. 19:15; Mat. 18:16; karm-y 1 Tɩmote 5:19.) Woto rat n yeelame tɩ b sã n wʋm tɩ ned n tʋm tʋʋm-dẽgd ne biiga, yaa tɩlɛ tɩ kaset dãmb ta a yiibu, tɩ b yaool n togs tẽngã taoor dãmb bɩ? Ayo! B sã n yeel tɩ ned n kɩɩs laloa wã, tɩ kãsem-dãmbã wall neb a taab na n tɩ togs tẽngã taoor dãmba, pa tɩlɛ tɩ kaset rãmb taa a yiib ye.

¹⁶ Kãsem-dãmbã sã n wʋm tɩ tigingã ned n belg biig bɩ n modg-a n tʋm tʋʋm-dẽgdo, b na n maana b sẽn tõe fãa tɩ b tũ laloa wã sẽn wilg yellã vẽneg n togsã wɛɛngẽ wã. Rẽ poore, b na n bao n bãnga yellã vɩʋʋg sõma, la b tik Biiblã sẽn yetã, n ges b sã n segd n lugla bʋ-kaoor sull n bʋ yellã. B sẽn yeel tɩ ned ning maana yellã sã n yeel tɩ yaa rõadga, neb sẽn maan kaset ne yellã sã n beẽ, kãsem-dãmbã na n kelga bãmba. Sẽn wa n togs-a yellã ne ned a to bɩ sẽn yɩɩd nin-yend sã n yeel t’a sɩd maana biigã woto, wall t’a maana biig a to woto, seka kãsem-dãmbã na lugl bʋ-kaoor sulli. * Ned a to sẽn maan kaset ne yellã sã n pa be, pa rat n yeel tɩ yaa rõadg ye. Baa kaset rãmbã sã n ka ta a yiibu, kãsem-dãmbã miime tɩ tõe tɩ yellã sɩd yaa sɩda, la tɩ sãama neb sũuri. B na n wɩnga ne neb nins fãa yellã sẽn namsdã sõngr la b belsgo. Sẽn paase, b na n gũusda ned ning b sẽn yeel t’a tʋma tʋʋm-dẽgd ne biigã, sẽn na yɩl n kogl tigingã.—Tʋʋ. 20:28.

17-18. Bʋ-kaoor sullã tʋʋmd yaa bõe?

¹⁷ Bʋ-kaoor sullã tʋʋmd yaa bõe? B sẽn yet tɩ “bʋ-kaoor sullã,” pa rat n yeel tɩ kãsem-dãmbã na n bʋʋ yellã, n ges tẽngã taoor dãmb sã n tog n sɩbga sẽn maan-a yellã ye. Yaa tẽngã taoor dãmb n segd n ges tɩ yellã pʋgẽ bɩ b tũ laloa wã sẽn yetã, pa kãsem-dãmbã tʋʋmd la rẽ ye. (Rom. 13:2-4; Tɩt 3:1) Bʋ-kaoorã sull tʋʋmd yaa b bao n bãng ned sẽn maan yel-wẽn-kãseng sã n tõe n kell n paa tigingã pʋgẽ.

¹⁸ Kãsem-dãmb nins sẽn na n naag bʋ-kaoor sullã pʋgẽ wã tʋʋmd yaa b bao n welg yellã tũudmã wɛɛngẽ bala. B tikda Biiblã sẽn yetã, n bao n bãng sẽn maan-a yellã sã n teka yam n kot sugri. A sã n pa tek yam, b na n yiis-a-la tigingã pʋgẽ, la b togs tigingã taoor t’a pa le yaa a Zeova Kaset soab ye. (1 Kor. 5:11-13) La a sã n teka yam n kot sugri, b pa na n yiis-a ye. Baasgo, kãsem-dãmbã na n wilg-a lame tɩ tõe t’a pa na n tol n le paam tɩ b kõ-a tʋʋmd tigingã pʋgẽ ye. B sẽn dat kambã neerã, tõe tɩ b na n goma ne roagdbã yembr-yembre, n wilg-b tɩ b maan gũusgu, tɩ b kambã ra pẽnegd sẽn maan-a yellã wʋsg ye. La b na n gũusame n da wa togs yellã sẽn paam-b rãmbã yʋy ye.

19-22. Bõe la roagdbã tõe n maan n kogl b kambã? (Ges-y sebrã pipi neng fotã.)

¹⁹ Ãnd dãmb n segd n ges kambã koglgã yell n tɩ yɩɩda? Yaa roagdbã. * Y kambã yaa wa ‘kũun’ a Zeova sẽn kõ yãmba. (Yɩɩn. 127:3) Yaa yãmb n segd n ges b yelle, n kogl-ba. Bõe la y tõe n maane, tɩ b ra wa belg-b bɩ n modg-b n tʋm tʋʋm-dẽgdo?

²⁰ Pipi, rɩ-y kibay n paase. Yɩta sõma tɩ y bao n bãng sẽn yaa neb nins buud n nong n belgd kamb wall b modgd-b n tʋmd tʋʋm-dẽgdã, la b sẽn maand to-to n paamd kambã. Gũus-y ne neb nins y sẽn tagsd tɩ b tõe n maana a buudã, la zĩis nins yell a woto buud sẽn tõe n paam kambã. (Yel. 22:3; 24:3) Tẽegd-y tɩ sẽn maand-b kambã woto wã wae n yaa neb kambã sẽn mi sõma, la b sẽn kɩs sɩda.

²¹ Yiib-n-soaba, wae-y n sõsd-y ne y kambã sõma, n togsd taab sẽn be y sũurẽ. (Tõo. 6:6, 7) Rat n yeelame me tɩ b sã n wa gomda, y segd n kelg-b-la neere. (Zak 1:19) Tẽegd-y tɩ yell a woto sã n paam biiga, naoor wʋsgo, a yɛɛsdame n pa rat n togs ned ye. A tõe n tagsdame tɩ b pa na n tẽ-a ye. Tõe me tɩ sẽn maan-a yellã bugs-a lame, n yeel-a t’a ra saag n togs ye. Y sã n wa tagsdẽ tɩ yell n paam y biiga, bɩ y maag y yĩng n sõs ne-a, n sok-a sogsg la y kelg-a neere, n paam n bãng sẽn yaa yell ninga.

²² Tãab-n-soaba, sõng-y y kambã tɩ b bãng bũmb kẽere. Gom-y pag ne rao lagengã yell ne-ba, la gũus-y tɩ zems ne b yʋʋmã. Sõng-y-b tɩ b bãng b sẽn tog n maanega, ned sã n dat n sɩɩs b yĩngã zĩig a sẽn pa segd n sɩɩse. A Zeova siglgã yiisa bũmb toor-toor sẽn tõe n sõng-y tɩ y bãng n kogl y kambã. Modg-y n tũ-y b sẽn yetã.—Ges-y zĩ-gũbrã gom-zug sẽn yaa: “ Rɩ-y kibay n paam n sõng y kambã.”

23. A Zeova Kaset rãmbã tagsg yaa wãn ne belg biig wall f modg-a n tʋm tʋʋm-dẽgdã? Sok-bʋg la d na n leok sõsg ning sẽn pʋgdã pʋgẽ?

²³ Tõnd sẽn yaa a Zeova Kaset rãmbã, d getame tɩ belg biig wall f modg-a n tʋm tʋʋm-dẽgdã yaa tʋʋm-beedo, la yel-wẽn-kãsenga. D sẽn tũud Kiristã tõogã, tigingã ned sã n maan yell a woto, d pa na n sõng-a t’a põs sɩbgr ye. La d sã n mi tɩ b ra belga d tẽed-n-taaga, wall tɩ b ra modg-a lame n tʋm tʋʋm-dẽgdo, d maanda wãn n sõng-a? D na n leoka sokrã sõsg ning sẽn pʋgdã pʋgẽ.