TÕND ned kam fãa ratame tɩ b getẽ t’a yaa nin-sõngo. La yɩl n yɩ nin-sõng dũni-kãnga pʋgẽ pa nana ye. Neb wʋsg yaa “nin-sõamyã bɛɛba.” (2 Tɩm. 3:3) B toog kae ne noy nins a Zeova sẽn lugli, n wilgd sõma ne wẽng n bakã ye. B ‘boonda wẽng tɩ sõma la b boond sõma tɩ wẽnga.’ (Eza. 5:20) Sẽn paase, d sẽn pa zems zãngã, la b sẽn wub-d to-to wã, wall yɛl d sẽn yã d vɩɩmã pʋgẽ tõe n kɩtame tɩ yaa toog tɩ d yɩ nin-sõngo. Tõe tɩ d mi n tagsa wa a Ann sẽn tũud a Zeova na maan yʋʋm wʋsgã. A yeelame: “Yaa toog ne maam tɩ m tẽ tɩ m tõe n yɩɩ nin-sõngo.”

La zu-noogo, tõnd ned kam fãa tõe n mao n bɩɩsa sõmblem, n lebg nin-sõngo. Sõmblmã yaa zʋg-sõng Wẽnnaam vʋʋsem sõngã sẽn sõngd ned t’a bɩɩse. Baa tõnd mengã pãn-komsem la dũniyã nebã wall a bũmb a taab sẽn tõe n kɩt tɩ yɩ toog tɩ d yɩ nin-sõngã, vʋʋsem sõngã sẽn yaa pãn-kãsengã tõe n sõng-d lame tɩ d tõoge. Bɩ d bao n bãng yɩ nin-sõng sẽn dat yɛɛlga, la d ges wãn to la d tõe n bɩɩs sõmblem n paase.

B sã n yeel tɩ ned yaa nin-sõngo, rat n yeelame t’a pa mi wẽnem ye. A tara yel-manesem sẽn yaa sõma, la a maand sẽn yaa tɩrg wakat fãa. Ned sẽn yaa nin-sõng nong n baooda a sẽn tõe n maaneg n sõng a taabã, la a wae n maand-b neere.

Tõe tɩ y gũus n gesame tɩ nebã sakd n maanda b zakã rãmb la b zo-rãmbã neer nana-nana. La woto seka na wilg tɩ d yaa nin-sõng bɩ? Yaa vẽeneg tɩ d sẽn pa zems zãngã, d pa tõe n maand neer bɩ sõma, n pa tol n kongdẽ ye. Sɩd me, Biiblã yetame: “Nin-tɩrg ka be dũniyã zug n maand tɩrg n ka maand yel-wẽnd ye.” (Koɛ. 7:20) Tʋm-tʋmd a Poll me yeelame: “Mam miime tɩ bõn-sõng ka be mam pʋgẽ, mam yĩngã pʋgẽ ye.” (Rom. 7:18) Woto wã, d sã n dat n bɩɩs sõmblem, yaa tɩlɛ tɩ d rɩk yam a Zeova sẽn yaa sõmblem buud fãa yẽgrã nengẽ.

A Zeova n kõt mak-sõng sẽn ka to sõmblmã wɛɛngẽ. Ad Biiblã sẽn yete: “Yãmb yaa sõmblem soaba, la maan-neer soaba. Zãms-y maam y tʋlsmã.” (Yɩɩn. 119:68) Vɛrse wã wilgda bũmb a yiib a Zeova zugu. Bɩ d maneg n wɛgs rẽ.

A Zeova yaa sõmblem soaba. A sẽn maand fãa pʋgẽ, a sõmblmã pukdame. Daar a ye, a yeela a Moyiiz yaa: “Mam na n kɩtame tɩ mam sõmblmã fãa lʋɩ fo taoore.” Bõe la a maan-yã? A kɩtame t’a Moyiiz yã a ziirã la a sõmblmã. Wakat kãng la a Moyiiz wʋm koɛɛg sẽn yeel yaa: “Mam yʋʋr yaa Sẽn-Ka-Saabo, yaa Sẽn-Ka-Saab sẽn yaa Wẽnnaam sẽn yaa nimbãan-zoɛta, la bark kõata. Mam sũur ka yikd tao-tao ye, la mam yaa nonglem soaba la m maanda sɩda. La mam maanda sɩd hal tɩ ta zamaan tusri, n kõt neb sugr b beegrã ne b kɩɩsgã la b yel-wẽnã fãa yĩnga. La baoosgo, mam ka na n bas yãmb taal y beegrã yĩng ye.” (Yik. 33:19; 34:6, 7) Dẽnd d tõe n sɩd yeelame t’a Zeova sẽn maand fãa pʋgẽ, a sõmblmã pukdame. Baa a Zeezi mengã sẽn yɩ nin-sõng tɛkẽ wã yeelame: “Ned kae n yaa sõama tɩ sã n ka Wẽnnaam b yembr bal ye.”—Luk 18:19.

A Zeova yaa maan-neer soaba. Woto rat n yeelame t’a tʋʋmã fãa yaa sõma. Biiblã yetame:  “Sẽn-Ka-Saab yaa sõmblem soab nebã fãa yĩnga, la b nimbãan-zoeerã yãagda bãmb tʋʋmã fãa.” (Yɩɩn. 145:9) A maanda nebã fãa neer n pa bakdẽ ye. Yẽ n kõ b fãa vɩɩm, la a sõngdẽ tɩ b paamd sẽn yaa tɩlɛ ne b vɩɩmã. (Tʋʋ. 14:17) A sẽn sakd n kõt-d sugrã me wilgdame t’a yaa sõmblem soaba. Ad yɩɩn-gʋlsdã sẽn yeele: “Zu-soaba, yãmb yaa sõmblem soaba, la y kõta sugri.” (Yɩɩn. 86:5) D tõe n basa d yam t’a Zeova ningda “neb nins sẽn kẽnd ne burkĩndã” barka, n “ka mongd-b bõn-sõng ba a yembr ye.”—Yɩɩn. 84:12.

A Zeova sẽn naan ninsaal n wõneg a mengã wilgdame tɩ ned buud fãa tõe n yɩɩ nin-sõngo, n maand sẽn yaa neere. (Sɩng. 1:27) La pa rat n yeel tɩ d rogdame n zoe n yaa nin-sõng ye. Rẽ n so tɩ Biiblã yetẽ yaa: “Zãms-y tɩ maan sẽn yaa sõama.” (Eza. 1:17) Wãn to la d tõe n maan dẽ? Ad bũmb a tãab sẽn na n sõng-do:

Pipi, d pʋʋsd a Zeova n kot a vʋʋsem sõngã sẽn tõe n sõng-d tɩ d bɩɩs sõmblem hakɩɩkã. (Gal. 5:22) Wẽnnaam vʋʋsem sõngã tõe n sõnga tõnd tɩ d nong sẽn yaa sõma, la d kisg sẽn yaa wẽnga. (Rom. 12:9) Biiblã yeelame t’a Zeova tõe n kɩtame tɩ d “pɛlg yɩ kãenkãe ne tʋʋm-sõng fãa, la ne gom-sõng fãa.”—2 Tes. 2:16, 17.

Yiib-n-soaba, d karemd Wẽnnaam Gomdã a sẽn kɩt tɩ b gʋls ne a vʋʋsem sõngã maasmã. Rẽ, a Zeova na n sõng-d lame tɩ d ‘bãng pʋ-peelem ne bʋʋd sẽn yaa sõma,’ la d “paam manegr la seglg tɩ maan tʋʋm-sõamy buud fãa.” (Yel. 2:9, Wẽnnaam Sebre, 1983; 2 Tɩm. 3:17) D sã n karemd Biiblã la d bʋgsd d sẽn karmã zugu, d pidsda d sũurã ne bõn-sõma wã d sẽn bãngd a Zeova zugã, la a raabã zugã. Woto paasda bõn-sõma wã d sẽn bĩngd d sũurẽ wã, tɩ tõe n wa sõng-d beoogo.—Luk 6:45; Efɛ. 5:9.

Tãab-n-soaba, d maood wa d sẽn tõe tɛka, n ‘maand togs-n-taar ne sõma.’ (3 Zã 11, Wẽnnaam Sebre, 1983) Biiblã gomda neb sẽn kõ mak-sõng yelle, tɩ d tõe n dɩk b togs-n-taare. Yaa vẽeneg tɩ yaa a Zeova ne a Zeezi n kõt mak-sõng sẽn ka to. La d tõe n bʋgsa pĩnd wẽn-sakdb nins sẽn kõ mak-sõng sõmblmã wɛɛngẽ wã kibay me zugu. Tõe tɩ d na n tagsa a Tabita ne a Barnabaas yelle. (Tʋʋ. 9:36; 11:22-24) Y tõe n bʋgsa b ned kam fãa kibar zugu, n bao n bãng b sẽn maan bũmb ning takɩ n sõng b taabã. Tags-y n ges-y y sẽn tõe n maan n sõng nina y zakã pʋgẽ, wall y tigingã pʋgẽ. Y sã n wa karemd a Tabita ne a Barnabaas kibarã bɩ y ges b ned kam fãa sẽn paam bark ninsi, a sẽn da yaa nin-sõngo, n maand a taabã neerã. Yãmb me tõe n paama bark nins b sẽn paamã.

 Rũndã-rũndã wẽn-sakdb me n kõt mak-sõngo, tɩ d tõe n bʋgs bãmb me kibayã zugu. Wala makre, tigimsã kãsem-dãmbã nonga maan-neere, n tʋmd wʋsg b tẽed-n-taasã yĩngã. D tẽeg tɩ saam-bi-pogs me n kõt mak-sõng ne b no-goamã la b tʋʋm-tʋmdɩ wã, n ‘zãmsd neb a taabã sẽn yaa sõma.’ (Tit 1:8; 2:3, Wẽnnaam Sebre, 1983) Saam-bi-poak yʋʋr sẽn boond t’a Rozelin yeelame: “M tara m zoa sẽn modgd wʋsg n sõngd tigingã nebã la a kengd b raoodo. A nong n tagsda ned kam fãa yɛl sẽn yaa to-to wã, n mi n bao kado-bõones n kõ-b wall a maan bũmb kẽer n sõng-ba. M getame t’a yaa nin-sõng meng-menga.”

A Zeova ratame tɩ sẽn tũud-b yẽ wã modg n “maan sẽn yaa neere.” (Amoos 5:14) Woto, d pa na n nong noy nins a gãnegã bal ye. D na n data ne d sũur fãa me n maan sẽn yaa sõma.

D ra tags tɩ yɩl n yɩ nin-sõngo, yaa tɩlɛ tɩ d maand bõn-kãsems n kõt d taabã, wall d kõt-b bõn-bɛd ye. D rɩk makr ne tɩɩg ned sẽn sele. A sã n dat tɩ tɩɩgã bɩ, a pa na n kiig-a koom vugr bal ye. Yaa naoor wʋsg la a na n ningd koom bilf-bilfu. Woto me, d sã n wae n maand bõn-bõones n sõngd d taabã, rẽ n wilgd tɩ d yaa nin-sõngo.

Biiblã sagenda tõnd tɩ d yɩ neb sẽn segl n sa, n na n “sak n maan” tʋʋm-sõma fãa. (2 Tɩm. 2:21; Tit 3:1) D sã n gũusd n bãngd d taabã yɛl sẽn yaa to-to, tõe tɩ d yã bũmb d sẽn tõe n maan n sõng nina, bũmb ‘sẽn noom-a, sẽn yaa sõmb wɛɛngẽ, t’a tõe n bɩ.’ (Rom. 15:2) Tõe tɩ d na n yãka bũmb d sẽn tare, n tɩ kõ-a. (Yel. 3:27) D tõe n baoo rɩɩb bilfu, n bool nina t’a wa tɩ d naag taab n dɩ, wall d bool-a t’a wa tɩ d sõs n keng taab raoodo. D sã n bãng tɩ ned pa keeme, d tõe n tool-a-la mesaaz wall d bool-a, pa rẽ bɩ d tɩ ges-a. Sɩd-sɩdã, segb wʋsg n be d sẽn tõe n paam n gom “gom-sõng sẽn na sõng ned t’a bɩ la a wa ne bark neb nins sẽn wʋmdã zutu.”—Efɛ. 4:29.

Tõnd me baood n na n maana ned buud fãa neer wa a Zeova. Rẽ n so tɩ d maand nebã neer n pa bakdẽ ye. Ad bũmb a ye d sẽn tõe n maan tɩ sɩd wilg rẽ: Yaa d sẽn na n taasd ned buud fãa Rĩungã koe-noogã. Wa a Zeezi sẽn yeelã, d baood n maana baa neb nins sẽn kis tõndã neere. (Luk 6:27) D sã n yaa nin-sõngo, n maand d taabã neere, pa wẽng baa-baa, bala, “tõog ka be sẽn kɩɩsd bõn-kãensã ye.” (Gal. 5:22, 23, Wẽnnaam Sebre, 1983) B sã n namsd tõnd d tũudmã yĩnga, wall yaa yɛl a taab la d maood ne, n baas n tar manesem-sõngo, tõe n kɩtame tɩ neb yãk yam n na n wa tũudum hakɩɩkã pʋgẽ, tɩ rẽ kɩt tɩ Wẽnnaam paam waoogre.—1 Pɩy. 3:16, 17.

Biiblã yetame: “Nin-sõng na n dɩ a tʋʋmd yõodo.” (Yel. 14:14) A yõodã tõe n yɩɩ bõe? D sã n maand d taabã neere, bãmb me tõe n maan-d-la neer n lebse. (Yel. 14:22) Baa b pa maan n lebse, d sẽn wɩngd ne neer maanegã tõe n kɩtame tɩ b toeem b manesmã ne tõndo.—Rom. 12:20.

D sã n bas wẽng maanego, n maand sẽn yaa sõma, nafda tõndo. D tẽed-n-taas wʋsg tõe n kõo kaset ne rẽ. Ad saam-bi-poak yʋʋr sẽn boond t’a Nansi sẽn yeele: “Mam bɩʋʋngã wakate, m da yaa ned sẽn yaa yaare, n pa mi sẽn kisi, la sẽn pa waoogd a taabã. La m sẽn wa n sɩng Biiblã zãmsgo, n bãngd bũmb nins Wẽnnaam sẽn yeel sõma ne wẽngã wɛɛngẽ la m modg n tũudẽ wã, rẽ tɛk la m paam sũ-noog meng-menga. Masã, m nanda m menga, tɩ m sũur noom ne m menga.”

La sẽn yɩɩd fãa, d sẽn dat n modg n bɩɩs sõmblmã yaa d sẽn mi tɩ nooma a Zeova wã. Baa neb wʋsg pa ne d sẽn maandã, a Zeova neeme. A nee tõnd tʋʋm-sõma wã fãa, la baa d tags-sõma wã me. (Efɛ. 6:7, 8) Wãn to la a na n keo-do? Ad Biiblã sẽn yete: “Nin-sõng paamda Sẽn-Ka-Saab barka.” (Yel. 12:2) Bɩ d kell n wɩng ne sõmblmã bɩɩsgo. A Zeova pʋlmame tɩ “ned ning fãa sẽn maand sẽn yaa sõma na n paama ziiri, waoogr la laafɩ.”—Rom. 2:10, MN.