Tõod 22:25-27 goamã pa sẽn na n gom raoã taalã yell ye. Bala rẽ zoe n yaa vẽenega. Yaa pagã sẽn pa tar taalã yell la b rat n wilg n yɩɩda. D ges b sẽn deng n yeel bũmb ningã.

Tõod 22:23, 24 ra reng n goma b sẽn na n dɩk pʋg-sad n kõ ned t’a na n maan a paga, tɩ rao a to yãnd-a “tẽngã pʋg” n kẽ ne-a. Raoã sẽn maan woto wã, a sãama a to paga, bala b sã n da rɩk pʋg-sad n kõ, yaa wa a sẽn kẽ kãadem. La pagã yẽ? Yẽ me tara taale, bala a ‘sĩnda a noor n ka wẽ no-bɩng tẽngã pʋgẽ’ ye. A sã n da wẽ no-bɩnga, neb ra tõe n wʋmame n wa fãag-a. Dẽnd d tõe n yeelame tɩ pagã me sakame. Woto wã, b yiibã fãa tara taale.

Yaa rẽ poor masã la b yeel yaa: “La sã n yaa weoogẽ la raoã yãnd pʋg-sadã b sẽn pʋlem sɩdã n yõk-a n gãand ne pãnga, yaa rao ning sẽn gãand-a pʋg-sadã a yembr bal la b tog n kʋ. Bɩ y ra maan pʋg-sadã bũmb ye. Pʋg-sadã ka maan bũmb sẽn yaa yel-wẽnde, sẽn sek kʋʋb ye. Yẽnda yellã yaa wa ned sẽn zab ne a to n kʋ-a. Bala, yaa weoog pʋgẽ la raoã paam yẽnda. La tõeeme tɩ pʋg-sadã b sẽn pʋlem sɩdã kelmame tɩ ned rag n ka be n na n fãag-a ye.”—Tõo. 22:25-27.

Yell a woto pʋgẽ, bʋ-kaoodbã ningda b yamẽ tɩ ka pʋg-sadã yell ye. Bõe yĩnga? Bala b tagsdame bal tɩ pʋg-sadã “kelmame tɩ ned rag n ka be n na n fãag-a ye.” Woto wã, pa yẽ n sak ye. La raoã tara taale, bala pipi a yõga pʋg-sadã, yiib-n-soaba, sẽn mik tɩ b ra zoe n dɩka pʋg-sadã n kõ wã, raoã sẽn “yõk-a n gãand ne pãngã,” a kẽe ne ned paga.

Yaa sɩd tɩ yaa pagã sẽn pa tar taalã la b rat n wilg n yɩɩda, la b sẽn togs yellã to-to wã wilgda vẽeneg me tɩ raoã tara taale, bala a yõga pʋg-sada, a kẽe ne ned paga. D tõe n kɩsa sɩd tɩ bʋ-kaoodbã na n ‘fees n bao n bãnga’ yellã vɩʋʋg sõma, n kao bʋʋdã tɩ zems ne noy nins Wẽnnaam sẽn gãneg vẽenega, la a togsd n yɩlemdẽ wã.—Tõo. 13:15; 17:4; Yik. 20:14.