Pa wõnd yaa woto ye. A Sʋɩtãan pa yeel a Awa t’a sã n dɩ tɩɩg ning biis Wẽnnaam sẽn yeel tɩ b ra rɩ wã, a na n kiime la bũmb n na n yi a yĩngẽ wã (nebã sẽn boond rũndã-rũndã tɩ sɩɩga, n yetẽ t’a pa kiidã) n tɩ vɩ zĩig a to ye. A Sʋɩtãan sẽn tũnug ne waafã n gom ne a Awa wã, a yeel-a lame t’a sã n dɩ tɩɩgã bila, a “ka na n tol n ki ye.” A gomdã rat n yeelame t’a Awa na n kell n vɩɩmda tẽngã zugu, t’a vɩɩmã noomẽ, tɩ pa Wẽnnaam n wilgd-a sẽn segd la sẽn pa segd ye.—Sɩng. 2:17; 3:3-5.

Nebã sẽn tagsd tɩ ninsaal tara sɩɩg sẽn pa kiidã sã n pa Edɛn la sɩng-yã, sɩnga wakat bʋgo? D pa mi ye. D sẽn mi bal yaa t’a Nowe wakatẽ sa-kãsengã sãama tũudum nins fãa sẽn da pa sõma wã. Sa-kãsengã poore, ned ra kae n ket n tẽed bũmb nins tũudum nins sẽn pa tat Wẽnnaam yamã sẽn da yelgdã ye. Bala yaa a Nowe ne a zakã rãmb bal sẽn da yaa wẽn-tũudb hakɩɩkã n da be.

Dẽnd nebã sẽn tẽed tɩ ninsaal tara sɩɩg sẽn pa kiidã tog n sɩnga sa-kãsengã poore. Wẽnnaam sẽn gẽdg ninsaalbã buud-gomdã Babɛll tɩ b sãeeg “dũniyã zĩigã fãa” wã, yaa vẽeneg tɩ b sẽn da tagsd tɩ ninsaal tara sɩɩg sẽn pa kiidã kell n paa b yamẽ. (Sɩng. 11:8, 9) Sẽn yaa wakat ning fãa la ziri-kãnga sɩng-yã, d miime bal tɩ yita a Sʋɩtãan sẽn yaa “ziri wã ba” wã nengẽ, la t’a sẽn ne tɩ yaa ziri sẽn paamd pãngã noom-a lame.—Zã 8:44.