1-2. a) Bõe kibs la neb kẽer mi n maandẽ? (Ges-y zĩ-gũbrã “ Kɩdeng yʋʋmdã ra yaa bõe?”) b) Bõe yell la a Zeezi sẽn gom Luk 4:16-18 pʋgẽ wã?

TẼNS kẽere, ned sã n tʋm tʋʋmd bɩ n maan bũmb n kaoos yʋʋm pis-nu, a maanda kibs rẽ yĩnga. Kibsã tõe n kaoosa daar tõre, rasem a yopoe, bɩ sẽn yɩɩd rẽ. La tarẽ-n-tarẽ, wat n saame, hal tɩ nebã yĩm a yell menga.

² Pĩnd wẽndẽ wã, Israyɛll nebã me ra maanda kibs kãseng yʋʋmd pis-nu fãa, tɩ kaoosd yʋʋmd tõre. B ra boonda yʋʋm-kãng tɩ kɩdeng yʋʋmde. Yaa sasa Israyɛll ned buud fãa sẽn da tõe n paam lohorem. Bõe yĩng tɩ kɩdeng yʋʋmdã tar yõod ne tõnd rũndã-rũndã? Bala tẽegda tõnd bũmb a Zeova sẽn maande, n na n sõng tõnd tɩ d wa paam lohorem wakat fãa yĩnga. A Zeezi meng goma lohorem-kãng yelle.—Karm-y Luk 4:16-18.

3. Wa b sẽn togs Maan-kʋʋr 25:8-12, wãn to la kɩdeng yʋʋmdã ra nafd Israyɛll nebã?

³ Sẽn na yɩl n wʋm lohorem ning yell a Zeezi sẽn gomã võor sõma, d na n deng n goma kɩdeng yʋʋmdã Wẽnnaam sẽn da yãk Israyɛll nebã yĩng pĩnd wẽndẽ wã yelle. A Zeova ra yeela Israyɛll nebã yaa: ‘Bɩ y welg yʋʋmd pis-nu yʋʋmdã toore, n moon lohorem tõog yãmb tẽngã pʋga, nebã fãa yĩnga. Yʋʋm-kãng na n yɩɩ kɩdeng yʋʋmd yãmb yĩnga. La yãmb ned kam fãa na n leb n sooga a pʋto, la a lebg n leb a meng nebẽ.’ (Karm-y Maan-kʋʋr 25:8-12.) Sõsg ning sẽn loogã pʋgẽ, d goma vʋʋsg daarã sẽn da nafd Israyɛll nebã to-to wã yelle. Wãn to la kɩdeng yʋʋmdã me ra nafd Israyɛll nebã?  Wala makre, Israyɛll ned sã n da tar sam wʋsgo, tɩ yɩ tɩlɛ t’a koos a pʋʋg n yao, kɩdeng yʋʋmdã sã n da ta, b segd n lebs-a-la a pʋʋgã. Woto, a soabã ‘lebsd n sooga a pʋʋgã,’ tɩ tõe n yɩ a kambã rogem-pʋɩɩre. Ad makr a to. Israyɛll ned ra tõe n tara sam wʋsgo, tɩ yɩ tɩlɛ t’a koos a biig bɩ a meng yembdo, n yao samdã. Kɩdeng yʋʋmdã sã n da ta, sẽn lebg-a yambã tog n ‘leba a meng nebẽ.’ Dẽnd ned ra pa lebgd yamb wakat fãa yĩnga, tɩ sẽn maand le kae ye. Woto wilgdame t’a Zeova ra geta a nin-buiidã yell sõma.

4-5. Bõe yĩng tɩ tar yõod tɩ d bao n bãng bũmb kẽer kɩdeng yʋʋmdã wɛɛngẽ?

⁴ Wãn to me la kɩdeng yʋʋmdã ra nafd Israyɛll nebã? A Zeova yeelame: “Nimbãan-ned ka na n zĩnd yãmb sʋk ye. Bala, Sẽn-Ka-Saab na n ninga tẽngã barka, tẽng ning Sẽn-Ka-Saab sẽn yaa yãmb Wẽnnaamã sẽn kõ yãmb tɩ y soogã.” (Tõo. 15:4) Woto yaa toor fasɩ ne bũmb ning sẽn maand rũndã-rũndã wã. Bala rakã-rãmbã arzɛgs tara paasgo, tɩ naong rãmbã me naong tar paasgo.

⁵ Tõnd sẽn yaa kiris-nebã, a Moyiiz tõogã tũub pa le yaa tɩlɛ ne-d ye. Dẽnd d pa tar kɩdeng yʋʋmde, tɩ sasa kãng sã n ta bɩ d kõt yembs lohorem, n basd sam taale, la d lebsd neb b pʋt ye. (Rom. 7:4; 10:4; Efɛ. 2:15) Baa ne rẽ, tara yõod tɩ d bao n bãng bũmb kẽer kɩdeng yʋʋmdã wɛɛngẽ. Bala tẽegda tõnd bũmb a Zeova sẽn maane, tɩ kɩt tɩ d tõe n paam d mens ne yel-wẽnã.

6. Ãdem-biisã segd n paama b mens ne bõe?

⁶ Tõnd fãa ratame n paam d mens ne yel-wẽnã, bala d yaa yel-wẽnã yembse, hal tɩ rẽ wẽnem yɩɩd yembd buudã fãa. D sẽn yaa yel-wẽn-maandbã kɩtame tɩ d kʋʋndẽ, n lʋɩt bãas la d kiidẽ. Neb wʋsg tõe n yãa rẽ vẽenega, b sã n wa get b meng nen-gɛtgẽ, wall b sã n wa kẽng logtor yir b sẽn ka laafɩ yĩnga. Sẽn paase, d sã n maan yel-wẽnde, d sũur sãamda wʋsgo. Tʋm-tʋmd a Poll yeelame tɩ yẽ ‘lebga yel-wẽndã tõogã sẽn be yẽ yĩngẽ wã yamba.’ A paasame: “Mam yaa nimbãan-ned bala! Ãnda n na n fãag maam ne yĩn- kãngã sẽn na n wa ne mam kũumã?”—Rom. 7:23, 24.

7. Bõe la a Ezayi ra pĩnd n togse, ãdem-biisã sẽn na n wa paam lohorem ningã wɛɛngẽ?

⁷ Zu-noogã, Wẽnnaam maana bũmb n na n fãag tõnd tɩ d paam d mens ne yel-wẽnã. La rẽ na n tũu ne a Zeezi. Yʋʋmd kobs-nii soabã sẽn deng a Zeezi rogmã, no-rɛɛs a Ezayi togsame tɩ ãdem-biisã na n wa paama lohorem meng-menga, hal tɩ rẽ na n yɩɩg lohorem ning Israyɛll nebã sẽn da paamd kɩdeng yʋʋmdã sasa wã. A yeelame: ‘Sẽn-Ka-Saab Sɩɩgã bee mam zugu, bala, Sẽn-Ka-Saab yãka maam. Bãmb tʋma maam tɩ m togs koe-noogã naong-rãmba, la m bels sũ-sãang-rãmbã, tɩ m togs b sẽn balg b rãmbã fãagr koɛɛga, la m togs sẽn be-b bi-bees roogã tɩ b na n paama yolsgo.’ (Eza. 61:1) Yaa ãnd yell la a Ezayi sẽn da gomdã?

8. Yaa ãnd n da na n wa kɩt tɩ ãdem-biisã paam lohorem ning yell a Ezayi sẽn gomã?

⁸ A Ezayi sẽn gom lohorem ning yellã sɩnga wakat ning a Zeezi sẽn wa n sɩng a koe-moonegã. A Zeezi sẽn wa n be a ba-yirã Nazarɛte, daar a ye a kẽnga zʋɩf-rãmbã karen-doogẽ. Baraarã, a karma a Ezayi gomdã tɩ zʋɩf-rãmb nins sẽn da be be wã kelge. A Zeezi wilgame tɩ yẽ waame n na n pids a Ezayi gomdã. A yeelame: “A Zeova vʋʋsem sõngã bee mam zugu. Bala, b yãka maam tɩ m moon koe-noog naong rãmbã. B tʋma maam tɩ m togs yembsã tɩ b na n paama b mense, la zoensã tɩ b nin na n pugsame, la tɩ m kɩt tɩ sẽn namsd-bã paam lohorem n looge, la m moon a Zeova bark yʋʋmdã.” (Luk 4:16-19) Bõe la a Zeezi maan n pids gom-kãngã?

9. Pipi kiris-nebã wakatẽ wã, bõe lohorem la neb wʋsg ra gũuda?

⁹ Yaa pipi kiris-nebã wakatẽ la nebã sɩng n na n paamd lohorem bɩ fãagr ning yell a Ezayi sẽn da gome, t’a Zeezi wa karem tɩ nebã kelgã. D tõe n tẽe rẽ, bala a Zeezi sẽn karem n sa wã, a yeelame: “Rũndã, Gʋls-sõamyã gom-kãensã yãmb sẽn kelg mas-masã wã pidsame.” (Luk 4:21) Sẽn kelg-b a Zeezi wã wʋsg ra tog n gũuda wakat ning b sẽn na n paam b mens ne Rom soogrã. A Zeezi karen-biisã me ra tog n gũuda lohorem kãnga. Bala rasem a wãn poore, b yiib n yeel yaa: “Tõnd ra tẽedame tɩ ra-kãng n yaa soab ning sẽn na n fãag Israyɛllã.” (Luk 24:13, 21) La d miime t’a Zeezi pa sagl a karen-biisã tɩ b  zab n fãag b mens ne Rom weoogrã ye. A pʋd n yeelame tɩ b “kõ a Sezaar bũmb nins sẽn yaa a Sezaar dẽndã.” (Mat. 22:21) Woto wã, wãn to la a kɩt tɩ wakat kãng nebã paam lohorem?

10. A Zeezi paka sor tɩ nebã tõe n paam b mens ne bõe?

¹⁰ Wẽnnaam Biigã waame n na n sõng nebã tɩ b paam lohorem bɩ fãagre, la yaa ne bũmb a yiibu. Pipi, a paka sore, tɩ b tõe n paam b mens ne ziri nins tũudmã taoor dãmb sẽn da togsd nebã, tɩ weoogd-bã. Sɩd me, wakat kãng tɩ zʋɩf-rãmb wʋsg ra tũuda minimd la ziri ka tɛka, n da lebg wa yembse. (Mat. 5:31-37; 15:1-11) Neb nins sẽn da segd n sõng nin-buiidã tɩ b tũ Wẽnnaam sõma wã ra yaa wa zoense. B sẽn pa sak n tẽ Mesi wã, la b pa tũ vẽenem ning a sẽn wa ne wã, b kell n paa likã pʋgẽ, la yel-wẽnã pʋgẽ. (Zã 9:1, 14-16, 35-41) A Zeezi sẽn da zãmsd nebã sɩdã, la a ra kõt mak-sõngã, sõnga pʋ-peelem dãmbã tɩ b paam b mens ne ziri nins b sẽn da yelgd tũudmã wɛɛngẽ wã.—Mark 1:22; 2:23–3:5.

11. Togs-y bũmb a to a Zeezi sẽn maan n sõng nebã tɩ b paam lohorem, hal tɩ sɩd yaa bõn-kãsenga.

¹¹ Bũmb a yiib-n-soab a Zeezi sẽn maan n sõng nebã tɩ b paam lohorem yaa a sẽn kɩt tɩ b paam b mens ne yel-wẽnã yembdã. Ne a Zeezi kũumã sẽn yɩ maoongã maasem, neb nins sẽn tẽed a maoongã, la b tar yel-manesem sẽn wilgd t’a kũumã sɩd yɩɩ maoongã tõe n paamame tɩ Wẽnnaam kõ-b b yel-wẽnã sugri. (Ebre. 10:12-18) A Zeezi yeelame: “Bi-riblã sã n yiis yãmb yembdẽ wã, yãmb sɩd na n paama lohorem.” (Zã 8:36) Lohorem kãng sɩd yɩɩda lohorem ning Israyɛll nebã sẽn da paamd kɩdeng yʋʋmdã sasa wã. Wala makre, yamb sã n da paam lohorem kɩdeng yʋʋmdã sasa, a le tõe n wa lebga yamba, wall a ki menga.

12. Ãnd dãmb la pipi neb sẽn dɩt lohorem ning yell a Zeezi sẽn gomã nafa?

¹² Yʋʋmd 33 Pãntekotã daare, a Zeova zaee a Zeezi tʋm-tʋmdbã la wẽn-sakdb a taab ne a vʋʋsem sõngã. A yãk-b lame tɩ b lebg a kamba, tɩ b kũumã poor bɩ b na n vʋʋg n kẽng saasẽ n tɩ rɩ naam ne a Zeezi. (Rom. 8:2, 15-17) Nin-kãensã n yɩ pipi neb sẽn dɩt lohorem ning yell a Zeezi sẽn gomã nafa. B paama b mens ne ziri la minimd nins zʋɩf-rãmbã tũudum taoor dãmb sẽn da zãmsd nebã, tɩ yaool n pa zems ne Biiblã sẽn yetã. Wẽnnaam nifẽ, b paama b mens me ne a Ãdem yel-wẽndã sẽn wat ne kũumã. Yaa a Zeezi naamã sẽn na n kaoos yʋʋm tusrã sã n  wa sa la kiris-nebã kɩdeng yʋʋmdã sẽn sɩng yʋʋmd 33 Pãntekotã me na n sa. Wakat kãng ne a na n ta tɩ bõe la b maan-yã?

13-14. Sẽn paam-b vʋʋsem sõng zaeebã sẽn yãk b toogo, ãnd dãmb me n tõe n paam lohorem ning yell a Zeezi sẽn gomã?

¹³ Rũndã-rũndã, a Zeezi tara ‘piis a taab’ sẽn yaa neb milyõ-rãmb sẽn yaa pʋ-peelem dãmba, n yit tẽns toɛy-toɛya. (Zã 10:16) Bãmb pa na n naag a Zeezi n dɩ naam ye. Biiblã wilgdame tɩ b na n wa vɩɩmda tẽngã zug wakat sẽn kõn sa. Yãmb naaga nin-kãensã bɩ?

¹⁴ Masã menga, tõnd me paamda bark nins sẽn na n tɩ rɩ-b naam Wẽnnaam Rĩungã pʋgẽ wã sẽn paamdã kẽere. Wala makre, d sẽn tẽed a Zeezi kũumã sẽn yɩ maoongã, d tõe n kosa Wẽnnaam d yel-wẽnã sugri. Woto kɩtame tɩ d tõe n paam n ta Wẽnnaam yam, la d tall sũur-kaset sẽn yaa fasɩ. (Efɛ. 1:7; Vẽn. 7:14, 15) Sẽn paase, tags-y n ges-y nafa nins y sẽn paamde, y sẽn paam y meng ne ziri nins tũudmã sẽn zãmsd nebã. A Zeezi yeelame: “Yãmb na n bãnga sɩdã, la sɩdã na n yiisa yãmb yembdẽ.” (Zã 8:32) D sẽn paam d mens woto wã sɩd yaa bark tɛkẽ!

15. Bark bʋs la d na n wa paame?

¹⁵ D na n wa paama lohorem hakɩɩka. Bala ka la bilfu, a Zeezi na n sãama tũudum nins fãa sẽn pa tat a Zeova yamã, la ninsaalbã goosneema rãmbã sẽn wẽgd nebã. Wẽnnaam  na n fãaga “kʋʋn-kãseng” sẽn yaa wẽn-sakdba, tɩ b vɩɩmd arzãn pʋgẽ tẽngã zugu, n paam bark buud toor-toore. (Vẽn. 7:9, 14) Neb ka tɛk me n na n vʋʋge. B sʋkã neb nins sẽn na n sak n maan a Zeova raabã pa na n le lʋɩ bãag bɩ n kʋʋl wall n ki ye.—Tʋʋ. 24:15.

16. Bõe la ãdem-biisã na n paam ka la bilfu, tɩ na n yɩ lohorem meng-menga?

¹⁶ A Zeezi naamã sẽn na n kaoos yʋʋm tusrã sasa, yẽ ne a na-rɩt-n-taasã na n sõnga ãdem-biisã tɩ b paam yĩns laafɩ hakɩɩka, la b le lebg Wẽnnaam kamba. Wa Israyɛll nebã sẽn da paamd lohorem kɩdeng yʋʋmdã sasa wã, ãdem-biisã na n paama lohorem meng-meng a Zeezi naamã sẽn na n kaoos yʋʋm tusrã sasa. Neb nins fãa sẽn tũud a Zeova ne b sũy fãa wã na n wa lebga neb sẽn zems zãnga, n pa le maand yel-wẽnd ye.

17. Sẽn zems ne Ezayi 65:21-23, bark bʋs la Wẽnnaam nin-buiidã na n wa paame? (Ges-y sebrã pipi neng fotã.)

¹⁷ Ezayi 65:21-23 pʋgẽ, b pĩnd n togsa vɩɩmã sẽn na n wa yɩ to-to tẽngã zugã. (Karm-y-yã.) Neb kẽer tagsdame tɩ arzãnã pʋgẽ, ned baa a ye pa na n tʋme, la tɩ na n yɩɩ vʋʋsg bala. Biiblã yaool n wilgame tɩ wakat kãnga, Wẽnnaam nin-buiidã na n tʋmda tʋʋm sẽn be barka. D tõe n kɩsa sɩd t’a Zeezi naamã sẽn na n kaoos yʋʋm tusrã sã n wa sa, ‘bõn-naandsã na n paama b mens ne yel-wẽndã la ne kũumã yembdo, n paam Wẽnnaam kambã lohormã sẽn be ziirã.’—Rom. 8:21.

18. Bõe yĩng tɩ d tõe n kɩs sɩd tɩ d na n wa paama sũ-noog hakɩɩka?

¹⁸ A Zeova ra gesame tɩ Israyɛll nebã tar wakat n vʋʋsdẽ, la b tar wakat me n tʋmdẽ. Na n yɩɩ woto me ne Wẽnnaam nin-buiidã a Zeezi naamã sasa. Yaa vẽeneg tɩ d na n tara wakat n maand bũmb kẽer a Zeova tũubã yĩnga. D sã n dat n paam sũ-noogo, a Zeova tũub yaa tɩlɛ. Na n yɩɩ woto me dũni-paalgã pʋgẽ. A Zeezi naamã sẽn na n kaoos yʋʋm tusrã sasa, wẽn-sakdbã fãa na n tara sũ-noogo. Bala d fãa na n tʋma tʋʋm sẽn be barka, la d naag taab me n tũud Wẽnnaam.