METEWO wã ned a ye n ges b masĩn-dãmbẽ wã, n bãng tɩ sob-kẽeng n wate, la tɩ neb wʋsg n be sobgã sẽn na n fugẽ wã. Sẽn mik tɩ tõe n tũu ne neb yõyã, a maana a sẽn tõe fãa, n keoog nebã tɩ ra wa kẽ n bõog ye.

A Zeova me keoogda dũniyã nebã fãa rũndã-rũndã, n yet-b tɩ yell wẽnem sẽn yɩɩd sob-kẽeng n wate. Wãn to la a keoogd nebã? Bõe n kɩt tɩ d tõe n bas d yam t’a na n deng n keooga nebã tɩ seke? Sẽn na yɩl n leok sogsg a yiibã, d reng n tẽeg a Zeova sẽn keoog neb pĩnd wẽndẽ.

Pĩnd wẽndẽ, naoor wʋsg la a Zeova keoog nebã t’a sũ-puugr sẽn wõnd “sob-kẽeng” n wate, la tɩ yaa sẽn na n sɩbg neb nins sẽn yãk yam n kɩɩsd yẽ noyã. (Yel. 10:25; Zer. 30:23) La wakat fãa, a rengd n keoog-b lame tɩ nan zãra, la a wilg-b b sẽn tog n maan tɩ zems ne yẽ raabã. (2 Rĩm. 17:12-15; Nee. 9:29, 30) Sẽn na yɩl tɩ nebã paam raood n toeeme, naoor wʋsgo, a tʋmda a no-rɛɛs t’a taas-b a bʋ-kaoorã koeese, la a sõng-b tɩ b bãng tɩ b segd n toeema tao-tao n paam n põse.—Amoos 3:7.

Wala makre, a Nowe yɩɩ no-rɛɛs a Zeova sẽn tʋm t’a taas bʋ-kaoor koeese. Yʋʋm wʋsg pʋgẽ, a talla raood n keoog a zãmaanã neb sẽn da tʋmd tʋʋm-dẽgdo, la b yaa wẽnem dãmbã tɩ sa-kãseng n wate. (Sɩng. 6:9-13, 17) A togs-b-la b sẽn tog n maan me, n paam n põse. A moona rẽ naoor ka tɛka. B wa n bool-a lame meng tɩ “tɩrlem koe-moonda.”—2 Pɩy. 2:5.

A Nowe modga ne a tʋʋmdã sõma, la ne rẽ fãa, wakat kãng nebã maana b toog kae ne keoogrã. B pa tẽ Wẽnnaam baa bilfu. Baasa wãna? B kiime, bala ‘sa-kãsengã wa n kãaga b fãa n looge.’ (Mat. 24:39; Ebre. 11:7) Saagã sẽn wa n sɩng niibã, b ra pa tõe n yeel tɩ Wẽnnaam pa keoog-b tɩ sek ye.

Wakat n zĩnd me tɩ yɩ sãoongã sẽn wa n ket tɩ bilf la a Zeova keoog nebã. Ne rẽ fãa, a gesame tɩ b paam weer n tõe n tek yam. Ad makr sẽn wilgd rẽ: A sẽn na n nams Ezɩpt nebã ne tood piigã, nand tɩ toog fãa sɩnge, a reng n keoog-b lame. Wala makre, toog a yopoe soabã sasa, a kɩtame tɩ sapɩlem-bɛd ni. La nand tɩ sɩngã, a tʋma a Moyiiz ne a Aarõ tɩ b tɩ keoog a Farawõ ne a tʋm-tʋmdbã. A keoog-b lame tɩ ket tɩ beoogo. Woto wã, d tõe n yeelame t’a kõo nebã weer sẽn sek b na bao soondg zĩis sɩda? Ad Biiblã sẽn yete: “A Faarõ tʋmtʋmdb kẽer sẽn dag n zoet Sẽn-Ka-Saabã kɩtame tɩ b tall b rũmsã ne b tʋmtʋmdbã n wa kẽes rotẽ. La neb nins sẽn ka geelg Sẽn-Ka-Saab goamã basa b tʋmtʋmdbã ne b rũmsã weoogẽ wã.” (Yik. 9:18-21) Yaa vẽeneg t’a Zeova kõo weer sẽn seke, bala sẽn tũ-b keoogrã tao-tao wã paamame tɩ b nebã la b rũmsã põse.

Nand me t’a Zeova kɩt tɩ toog piig soabã wa a Farawõ ne a tʋm-tʋmdbã zugã, a keoog-b lame. La b maana yalemdo, n ka kelg keoogrã ye. (Yik. 4:22, 23) Baasa wãna? B kom-dẽemsã kiime. Kaeto! (Yik. 11:4-10; 12:29) B ra tõe n saka keoogrã tɩ nan pa kẽ n bõog bɩ? N-ye! Nand tɩ to-kãng sɩngã, a Moyiiz boola Israyɛll nebã tao-tao n togse, la a wilg-b b sẽn tog n maan n fãag b zagsã rãmba. (Yik. 12:21-28) Neb a wãn n sak keoogrã? Sã n yaa ne neb kẽer sẽn mage,  b taa milyõ a tãabo. Yɩɩ Israyɛll neba, n paas “neb sẽn yaa buud toor-toor neb me.” Dẽnd neb sẽn pa Israyɛll neba, la baa Ezɩpt neb meng n paam n põs Wẽnnaam sũ-puugrã, n tũ n yi Ezɩpti.—Yik. 12:38.

Wa Biiblã kiba-kãensã sẽn wilgdã, nand t’a Zeova wa ne sɩbgr fãa, a rengd n gesame tɩ nebã paam keoogr tɩ seke. (Tõo. 32:4) Bõe yĩng t’a maand woto? Tʋm-tʋmd a Pɩyɛɛr wilga a võore. A yeelame t’a Zeova ‘pa rat tɩ ned baa a ye sãame,’ la t’a “ratame tɩ nebã fãa tek yam n kos sugri.” (2 Pɩy. 3:9) Hakɩɩka, Wẽnnaam ra pa rat tɩ yell paam nebã ye. Nand t’a sɩbg-ba, a raab yaa b tek yam, n maan a sẽn yetã n paam n põse.—Eza. 48:17, 18; Rom. 2:4.

Rũndã-rũndã me, Wẽnnaam keoogda dũniyã gill nebã, tɩ b fãa segd n sake, tɩ nan pa kẽ n bõog ye. A Zeezi sẽn wa n be tẽngã zugã, a wilgame tɩ dũni-kãngã na n wa paama sãoongo, la tɩ na n yɩɩ ‘to-kãsenga.’ (Mat. 24:21) A goma dũniyã sãoongã sẽn watã yelle, n deng n togs bũmb kẽer sẽn na n yɩ bãnde, n sõng kiris-nebã tɩ b bãng tɩ dũniyã saab kolgdame. A bilga yɛl buud toor-toor sẽn na n zĩnd rũndã-rũndã, tɩ tõnd sɩd ne tɩ pidsdame.—Mat. 24:3-12; Luk 21:10-13.

Sẽn mik tɩ b pĩnd n togsame tɩ to-kãseng n watã, a Zeova keoogda ned fãa rũndã-rũndã, n yet-a t’a yãk yam n sak yẽ la a tũ yẽ raabã. A ratame tɩ wẽn-sakdbã vɩɩm yɩ noog masã menga, la b wa vɩɩmd dũni-paalg ning pʋgẽ tɩrlem sẽn na n zĩndã, n paam bark ka tɛka. (2 Pɩy. 3:13) A Zeova sẽn dat n keng nebã raood tɩ b tẽ a pʋlemsã, a kɩtame tɩ b moond fãagr koɛɛga. Yaa ‘Rĩungã koe-noogã’ a Zeezi sẽn pĩnd n togs tɩ b na n “moona dũniyã tɛk fãa tɩ yɩ kaset buud fãa yĩngã.” (Mat. 24:14) Wẽnnaam sigla kiris-neb hakɩɩkã sõma, tɩ b ‘moond’ koe-kãng na maan tẽns 240 pʋgẽ. A Zeova ratame tɩ nebã fãa la bal sak a keoogrã, n paam n põs sɩbgrã sẽn kʋɩ wa saag sẽn naag ne sob-kẽengã.—Sof. 1:14, 15; 2:2, 3.

Dẽnd sokr sẽn ket masã pa a Zeova sã n na n deng n keooga nebã tɩ sek ye. Yaa vẽeneg tɩ wakat fãa, a maanda woto. Ad sokr ning sẽn ketã: Nebã na n saka keoogrã tɩ nan pa kẽ n bõog bɩ? Tõnd sẽn yaa Wẽnnaam koe-taasdbã, bɩ d kell n maan d sẽn tõe fãa, n sõng neb wʋsg tɩ b wa põs dũni-kãngã sãoongã.