1. A Zeezi boola zĩm-yõgdb a naas n yeel-b tɩ bõe, la b manesem yɩɩ wãna?

NAND t’a Pɩyɛɛre, a Ãndere, a Zak la Zã lebg a Zeezi karen-biisi, b tʋʋmd ra yaa zĩm-yõgbo. A Zeezi bool-b lame tɩ b wa tũ-a. Mams-y n ges-y rẽ sẽn ling-b to-to. A yeel-b lame yaa: “Wa n tũ-y maam, tɩ mam na n kɩtame tɩ y yõg neba, wa y sẽn yõgd zĩmã to-to wã.” * B manesem yɩɩ wãna? Ad Biiblã sẽn yete: “Zĩig pʋgẽ, b basa b zĩm-gãmba wã n pʋg bãmba.” (Mat. 4:18-22) B sẽn sak n na n tũ a Zeezi wã na n kɩtame tɩ b vɩɩmã toeem fasɩ. B pa na n le yõgd zĩm ye. Masã yaa ‘ninsaalb la b na n yõgd vɩɩse.’ (Luk 5:10) Rũndã-rũndã, a Zeezi ket n boonda pʋ-peelem dãmb sẽn nong sɩdã tɩ b wa lebg a karen-biisi. (Mat. 28:19, 20) Yãmb me saka a Zeezi boolgã, n na n yõgd ninsaalb wa b sẽn yõgd zĩmã to-to wã bɩ?

2. Bõe yĩng tɩ yãk yam n lebg a Zeezi karen-biig pa reem yelle, la bõe n na n sõng-d tɩ d tõog n yãk yam a woto?

² Tõe tɩ yãmb sɩnga Biiblã zãmsg hal sẽn kaoose, n sak n toeem bũmb wʋsg y vɩɩmã pʋgẽ. La masã, y segd n yãka y sã n na n lebga koe-moonda. Yãmb sã n yɛɛsdame n pa rat n lebg a Zeezi karen-biiga, bɩ y ra sãam y sũur ye. Tõe tɩ rẽ wilgdame tɩ y miime tɩ yam-yãkr a woto pa reem yell ye. Yaa  sɩd tɩ Biiblã yeelame t’a Pɩyɛɛr ne a zo-rãmbã basa b zĩm-gãmba wã “zĩig pʋgẽ.” La b pa yɩ yãg-yãg n maan woto n pa reng n tags ye. B sẽn da mi a Zeezi la b sak n deeg tɩ yẽ la Mesi wã ra yɩɩda kiis a yoob masã. (Zã 1:35-42) Tõe tɩ yãmb me bãnga bũmb wʋsg a Zeova ne a Zeezi zugu, n dat n ket n bãngd-b n paasdẽ. La y pa segd n yɩ yãg-yãg n lebg koe-moonda, n pa reng n tags ye. Bõe n sõng a Pɩyɛɛr ne a Ãndere la neb a taab tɩ b yãk yam n lebg a Zeezi karen-biisi?

3. Zʋg-sõma-bʋs n tõe n sõng-d tɩ d wa sak n lebg a Zeezi karen-biiga?

³ A Zeezi pipi karen-biisã ra tara yẽesem, minim, raoodo, la b ra wõrd b mense. Yaa vẽeneg tɩ zʋg-sõma-kãensã sõng-b lame tɩ b wa tõog n moond koɛɛgã sõma wa b sẽn da yõgd zĩmã to-to wã. Sõs-kãngã pʋgẽ, d na n yãa d sẽn tõe n maan to-to n bɩɩs zʋg-sõma-kãensã, tɩ sõng-d tɩ d wa tõogd n moond koɛɛgã la d zãmsd nebã Biiblã sõma.

4. Bõe n kɩt t’a Pɩyɛɛr da yõgd zĩmã?

⁴ A Pɩyɛɛr da yõgda zĩm n get a zakã rãmb yelle, la a ra pa get rẽ wa a nug-tʋʋmd bal ye. Wõnda a ra nonga zĩmã yõgbo. (Zã 21:3, 9-15) Sẽn paase, a zãmsa koɛɛgã moonego, n da nong rẽ wa a sẽn da nong zĩmã yõgb to-to wã. Ne a Zeova sõngre, a Pɩyɛɛr wa n bãnga tʋʋmdã sẽn tʋmd to-to wã sõma.—Tʋʋ. 2:14, 41.

5. Sẽn zems ne Luk 5:8-11 wã, bõe yĩng t’a Pɩyɛɛr da maand yɩɩre, la bõe n tõe n sõng-d tɩ d ra maand yɩɩr woto?

⁵ Sẽn tɩ yɩɩd fãa, yaa d sẽn nong a Zeova wã yĩng la d sẽn moond koɛɛgã. D sã n nong a Zeova, na n kɩtame tɩ d gomd a yell  ne nebã, baa d sã n tagsdame tɩ d pa tar minim. A Zeezi sẽn wa n bool a Pɩyɛɛr t’a wa lebg a karen-biigã, a yeela a Pɩyɛɛr yaa: “Da le maan dabeem ye.” (Karm-y Luk 5:8-11.) A Pɩyɛɛr da pa maand yɩɩr ne bũmb ning sẽn da tõe n wa maane, a sã n sak n lebg a Zeezi karen-biig ye. A sẽn yã t’a Zeezi maana yel-solemd tɩ b paam zĩm wʋsgã ling-a lame, hal t’a pʋd n tags t’a pa zems ne a yɩ a Zeezi tʋmd-n-taag ye. Yãmb me sã n tags bũmb nins fãa y sẽn segd n maan n tõog n lebg Kiristã karen-biigã yelle, y tõe n maanda yɩɩre. Sã n yaa woto bɩ y maneg n nong a Zeova ne a Zeezi la nebã, tɩ na n sõng-y lame tɩ y sak n lebg koe-moonda.—Mat. 22:37, 39; Zã 14:15.

6. Bõe me n kɩt tɩ d moond koɛɛgã?

⁶ Bũmb a to me n kɩt tɩ d moond koɛɛgã. Yaa d sẽn dat n sak noor ning a Zeezi sẽn kõ wã. A yeelame: “Bɩ y kẽng n tɩ sõng buud fãa neb tɩ b lebg mam karen-biisi.” (Mat. 28:19, 20) Sẽn paase, d moonda koɛɛgã, bala nebã ‘namsdame la b pa tar ned sẽn get b yelle,’ tɩ rẽ kɩt tɩ b rat ne b sũy fãa n bãng Wẽnnaam Rĩungã. (Mat. 9:36) A Zeova ratame tɩ nebã buud fãa paam bãngr hakɩɩk sɩdã zugu, n wa paam fãagre.—1 Tɩm. 2:4.

7. Wãn to la Rom dãmb 10:13-15 wã wilgd tɩ koɛɛgã mooneg tara yõod wʋsgo?

⁷ D sã n tags koɛɛgã mooneg sẽn tõe n fãag nebã to-to wã yelle, kɩtdame tɩ d rat ne d sũy fãa n tʋm tʋʋm-kãnga. Nebã yõgda zĩm n koosdẽ, bɩ n dɩtẽ. La tõnd yẽ sẽn yõgd nebã wa b sẽn yõgd zĩmã to-to wã yaa sẽn na n fãag b yõyã.—Karm-y Rom dãmb 10:13-15; 1 Tɩm. 4:16.

8-9. Bõe la zĩm-yõgd segd n bãnge, la bõe yĩnga?

⁸ A Zeezi wakatẽ wã, Israyɛll ned sẽn yaa zĩm-yõgd ra segd n bãnga zĩm ning buud a sẽn dat n yõkã sõma. (Maan. 11:9-12) A leb n segd n bãnga a sẽn tõe n paam zĩm-kãens zĩig ninga. Zĩmã nong n bee zĩig ning koomã sẽn yaa sõma ne-bã, la zĩig ning b sẽn tõe n paam dɩɩb sõma. Zĩm-yõgd tõe n yika wakat ning fãa a sẽn dat bal n tɩ yõg zĩm bɩ? Sẽn na n yɩl n bãng tɩ zĩmã yõgb tara wakate, daar a ye, saam-biig sẽn be ko-sʋk tẽng n bool misioneer t’a wa tɩ b tɩ yõg zĩma. Misioneerã yeel-a lame yaa: “D seg taab beoog yibeoog wakat a wɛ.” Tɩ saam-biigã leok-a yaa: “Fo pa wʋmd yɛlã võor ye. D segd n kẽnga wakat ning sẽn zems ne zĩmã, la pa wakat ning sẽn zems ne tõndã ye.”

⁹ Woto me, a Zeezi wakatẽ wã, karen-biisã sẽn wa n lebg koe-moondb n yõgd neb wa b sẽn yõgd zĩmã to-to wã, b ra kẽnda nebã sẽn beẽ, la wakat ning b sẽn na n mik-ba. Wala makre, a Zeezi karen-biisã ra moonda wẽnd-doogẽ wã, zʋɩf-rãmbã karen-dotẽ, zak-zaka, la raasẽ. (Tʋʋ. 5:42; 17:17; 18:4) Tõnd me segd n bao n bãnga wakat ning d koe-moonegã zĩisẽ nebã sẽn be b zagsẽ, wall zĩis nins d sẽn tõe n paam-bã. D segd n toeemda zĩis nins d sẽn moondã, la wakat ning d sẽn moondã me, sẽn na yɩl n paam neb wʋsgo.—1 Kor. 9:19-23.

10. Tʋʋm-te-bʋs la a Zeova siglgã kõt tõndo?

¹⁰ Zĩm-yõgd segd n tara tʋʋm-teed sẽn zemse, la a mi a sẽn tõe n tʋm ne-b to-to. Tõnd me segd n tara tʋʋm-teed sẽn zems ne d koɛɛgã moonego, la d mi d sẽn tõe n tʋm ne-b to-to. A Zeezi kõo a karen-biisã sagls takɩ, n wilg-b b sẽn tõe n maan to-to n yõg nebã wa b sẽn yõgd zĩmã to-to wã. A wilga b sẽn segd n zã bũmb ninga, b sẽn tog n moon zĩig ninga, la b sẽn na n yeel bũmb ninga. (Mat. 10:5-7;  Luk 10:1-11) Rũndã-rũndã, a Zeova siglgã kõt-d-la koe-moonegã tʋʋm-teedo, hal tɩ sõngd-d wʋsgo. * Sẽn paase, b zãmsda tõnd d sẽn tõe n tʋm ne te-kãensã to-to. Woto sõngda tõnd tɩ d tar bas-m-yam la minim, n tõe n moon koɛɛgã sõma.—2 Tɩm. 2:15.

11. Bõe yĩng tɩ koe-moondbã segd n tall raood wa zĩm-yõgdba?

¹¹ Zĩm-yõgd segd n talla raoodo. Wakat ninga, yɛl kẽer tõe n ling-a-la mogrã zugu. Sasa ninga, zĩm-yõgdbã tʋmda ne yʋngo, tɩ mogrã tõe n tiig n gudg menga. Koe-moondbã me sẽn yõgd nebã wa b sẽn yõgd zĩmã to-to wã segd n talla raoodo. D sã n wa sɩng koɛɛgã moonego, tɩ nebã bãng tɩ d yaa a Zeova Kaset soaba, tõe n waa ne namsgo. Wala makre, d zakã rãmb tõe n nams-d lame, d mitinsã tõe n yaand-d lame, wall nebã tõeeme n pa kelgd koɛɛgã ye. Woto fãa tõe n yaa wa mogr sẽn gudgi. La pa segd n ling tõnd ye. A Zeezi pĩnd n yeelame t’a na n tʋma a karen-biisã tɩ b tɩ moon kɩɩsdb sʋka.—Mat. 10:16.

12. Wa Zozoe 1:7-9 sẽn wilgdã, bõe n tõe n sõng-d tɩ d tall raoodo?

¹² Bõe la y tõe n maan n paam raoodo? Pipi, bas-y y yam t’a Zeezi bee saasẽ n ket n sõngd tõnd koe-moonegã pʋgẽ. (Zã 16:33; Vẽn. 14:14-16) Rẽ poore, tall-y tẽeb sõma t’a Zeova na n kell n gesa y yelle.  (Mat. 6:32-34) Y tẽebã pãng sã n paasdẽ, y raoodã me na n paasdame. A Pɩyɛɛr ne a zo-rãmbã sẽn sak n bas b nug-tʋʋmdã n tũ a Zeezi wã, b wilgame tɩ b tẽebã sɩd tara pãnga. Yãmb me sẽn wa n yeel y zakã rãmb la y mitinsã tɩ y sɩngame n zãmsd Biiblã ne a Zeova Kaset rãmbã la y kẽnd b tigissã, wilgdame tɩ y tẽebã sɩd tara pãnga. Sãmbg kae tɩ y toeema bũmb wʋsg y vɩɩmã pʋgẽ, n tar yel-manesem sẽn yaa sõma, y sẽn dat n tũ a Zeova noyã yĩnga. Rẽ me, yɩɩ tɩlɛ tɩ y tall tẽeb la raoodo. Y sã n modgdẽ tɩ y raoodã paasdẽ, y tõe n basa y yam t’a Zeova ‘sẽn yaa yãmb Wẽnnaamã na n zĩnda ne-y zĩig ninga fãa yãmb sẽn na n kẽnge.’—Karm-y Zozoe 1:7-9.

13. Wãn to la bʋgsgã ne pʋʋsgã tõe n sõng-y tɩ y tall raoodo?

¹³ Bõe me la y tõe n maan n paam raoodo? Pʋʋs-y-yã a Zeova n kos raood la pɛl-kɛgenga. (Tʋʋ. 4:29, 31) A na n leoka y pʋʋsgã, la a pa na n tol n bas-y ye. A na n sõngda yãmb wakat fãa. Y tõeeme me n bʋgs a Zeova sẽn fãag neb to-to pĩnd wẽndẽ wã. Tags-y a sẽn sõng yãmb to-to tɩ y mao ne zu-loeesã, la a sẽn kõ yãmb pãng tɩ y toeem bũmb kẽer y vɩɩmã pʋgẽ wã. Yaa vẽeneg tɩ soab ning sẽn sõng a nin-buiidã tɩ b pasg mog-miuugã tõe n sõnga yãmb me tɩ y lebg Kiristã karen-biiga. (Yik. 14:13) Kell-y n tall-y bas-yard wa yɩɩn-gʋlsdã. Ad a sẽn yeele: “Sẽn-Ka-Saab bee ne maam, dẽ, dabeem ka tar maam ye. Ninsaalbã tõe n maana maam bõe?”—Yɩɩn. 118:6.

14. A Masae ne a Tomoyo kibayã wilgda tõnd bõe?

¹⁴ Bũmb a to me y sẽn tõe n maan n paam raoodo, yaa y sẽn na n bao n bãng a Zeova sẽn sõng neb sẽn da zoet yãnd tɩ b paam raood to-to. Ad saam-bi-poak a ye kibare. A yʋʋr la a Masae. A ra zoeta yãnde, hal n da tagsd t’a pa tol n tõe n moon koɛɛgã neb sʋk ye. Ra yaa toog wʋsg ne-a t’a gom ne neb a sẽn pa mi. A ra getame tɩ yaa wa tãn-kẽeng a sẽn pa tõe n dʋ. Rẽ n so t’a modg wʋsgo, n na n maneg n nong a Zeova la neb a taabã. A maaga a yĩng n tags koe-moonegã sẽn lebg tʋʋm-yãgdmã yelle, la a pʋʋs a Zeova t’a sõng-a t’a tʋll n moon koɛɛgã n paase. A tõoga a yãn-zoeerã, hal n yɩ wakat fãa so-pakda. A Zeova leb n tõe n sõnga ned sẽn sɩng koɛɛgã mooneg paalem, t’a ‘paam raoodo’. Ad saam-bi-poak a to kibare. A yʋʋr la a Tomoyo. A sẽn wa n sɩng koɛɛgã moonegã, kʋɩleng ning a sẽn kogs pipi wã, zakã soab yiime n yeel-a yaa: “Mam pa rat n yã a Zeova Kaset rãmbã ka ye!” La a lebs n pag kʋɩlengã. A Tomoyo yeela a tũud-n-taagã yaa: “Fo wʋma a sẽn yeelã bɩ? M pa yã n yaag m noor meng la a sẽn tol n bãng tɩ m yaa a Zeova Kaset soaba. M sũurã nooma wʋsgo!” A Tomoyo lebga wakat fãa so-pakd masã.

15. Sã n yaa toog ne-d tɩ d moon koɛɛgã, wãn to la d tõe n maan wa zĩm-yõgdbã, la bõe yĩng tɩ rẽ tar yõod ne kiris-nebã?

¹⁵ Zĩm-yõgdb nins sẽn paamd zĩm wʋsgã wõrda b mense. B modgda ne b pãng fãa n maand bũmb nins b sẽn segd n maanã. Wala makre, b sãta tõd-beoogo, n tʋm hal n paam b sẽn datã. Baa sebgã sã n fugd ne pãng tɩ mogrã gudgdẽ, b pa basd ye. Tõnd me sã n dat n tõog toog n tʋm d tʋʋmdã n baase, d segd n wõra d mense.—Mat. 10:22.

16. Bõe n tõe n sõng-d tɩ d tõogd n tʋmd tʋʋm nins sẽn wõnd yaa toog ne-dã?

¹⁶ Ned pa rogd ne wõr-m-meng ye. Ninsaal fãa nonga tʋʋm nins sẽn yaa nana wã. La wakat ninga, bũmb nins sẽn tar  yõod wʋsgã maaneg pa nana ye. Woto wã, d segd n wõrda d mense. Dẽnd d segd n paama sõngre, sẽn na yɩl n tõog n tʋm tʋʋm nins sẽn wõnd yaa toog ne-dã. La a Zeova tũnugda ne a vʋʋsem sõngã n sõngd tõndo.—Gal. 5:22, 23.

17. Pipi Korẽnt rãmb 9:25-27 wã pʋgẽ, a Poll yeelame tɩ bõe la a segd n maan n tõog n wõr a menga?

¹⁷ Tʋm-tʋmd a Poll ra wõrda a menga. Sɩd me, a yeelame t’a ra “pãbda” a yĩngã, sẽn na yɩl n tõog n maan sẽn yaa tɩrga. (Karm-y 1 Korẽnt rãmb 9:25-27.) A sagla neb a taabã tɩ b wõr b mense, la b maand bũmb fãa “wa sẽn segde, la ra yɩ ne zũnd-zãnd ye.” (1 Kor. 14:40) D segd n wõrda d mense, n tõog n ket n maand bũmb nins d sẽn segd n maan d tẽebã bɩɩsg yĩngã, wala makre, n moond koɛɛgã la d zãmsd nebã Biiblã wakat fãa.—Tʋʋ. 2:46.

18. A Zeova nifẽ, bõe n wilgd tɩ d tʋʋmdã yãkda nenga?

¹⁸ Zĩm-yõgd sã n paam zĩm wʋsgo, a getame t’a tʋʋmdã yãka nenga. La tõnd yẽ nengẽ, pa d sã n tõog tɩ neb wʋsg wa sak n tũud a Zeova la wilgd tɩ d tʋʋmdã yãka neng ye. (Luk 8:11-15) D sã n ket n wɩngd ne koɛɛgã mooneg la d zãmsd nebã Biiblã, a Zeova nifẽ d tʋʋmdã yãkda nenga. Bõe yĩnga? Bala d sakd n maanda yẽ ne a Biigã sẽn yeel tɩ d maanã.—Mark 13:10; Tʋʋ. 5:28, 29.

19-20. Bõe yĩng tɩ d segd n kẽes d mens zãng koɛɛgã mooneg pʋgẽ masã menga?

¹⁹ Tẽns kẽere, yaa kiis kẽere bal la nebã tar sor n tõe n tɩ yõg zĩm. Ki-kãens sã n wa rabd b saabẽ, zĩm-yõgdbã tʋmda ne yãgbo. Tõnd me sẽn yaa koe-moondb n yõgd nebã wa b sẽn yõgd zĩmã to-to wã, d tara bʋʋm n na n wɩng ne d tʋʋmdã, bala, dũni-kãngã saab ta n saame. Wakatã sẽn ket tɩ d na n moon koɛɛgã sẽn fãagd yõyã pa le waoog ye. D ra bas n gũ nindaare, bɩ n tagsdẽ tɩ d segd n gũu wakat sẽn yaa sõma, n yaool n kẽes d toog tʋʋm-kãngã sẽn tar yõod wʋsgã pʋgẽ ye.—Koɛ. 11:4.

²⁰ Bɩ d modg masã menga, n tʋll n moon koɛɛgã ne yẽesem n paase, n zamsd Biiblã sõma n paasdẽ, n modg n tall raoodo, la d wõrd d mense. Naag-y neb milyõ a nii la zakã sẽn moond koe-noogã, n paam sũ-noog ning a Zeova sẽn kõtã. (Nee. 8:10) Yãk-y yam n kẽes y mens zãng koɛɛgã mooneg pʋgẽ, hal n tãag a Zeova sẽn na n wa yeel tɩ sekame. Sõsg ning sẽn pʋgdã pʋgẽ, d na n yãa bũmb a tãab d sẽn tõe n maane, tɩ sõng-d tɩ d maneg n wɩng ne koɛɛgã moonego.