Mam doga yʋʋmd 1983, la rẽ sasa tɩ bũmb pa tar-m ye. La m sẽn wa n tar yʋʋm piiga, daar a ye, mam yĩngã tõr wa n zabda hal wʋsgo. Sẽn zems yʋʋm a yiib poore, daar a ye, m neka yibeoog n pa le tõe n yik n kẽn ye. Mam maka m karsã zẽkr meng n konge. Baraarã tɛka, m zɩ n tõog n le kẽn ye. Bãagã kɩtame me tɩ m pa le bɩtẽ ye. Masã menga, m ket n yaa kɩdg wa biiga.

Mam da maana kiis a wãn n be zakẽ bal n pa yit ye. La daar a ye, pagb a yiib sẽn yaa a Zeova Kaset rãmb n wa tõnd zakẽ wã. Sãan sã n da wa, m da zoetame n tɩ solge. La baraarã, m yaasame, n sak tɩ b na n sõs ne-ma. B goma arzãnã yell ne maam. Rẽ kɩtame tɩ m tẽeg m sẽn da wʋm bũmb ning m sẽn wa n tar yʋʋm a nu wã. Wakat-kãngã, misioneer a ye n da be Surinam, t’a yʋʋr yaa a Zetro. A ra wata tõnd tẽngẽ wã vugr kiuug fãa, n zãmsd m baaba Biiblã. A Zetro ra nonga maam, tɩ ma-me ra nong-a wʋsgo. M yaab-poak ne m yaab-raoog ra mi n tallda maam n kẽng a Zeova Kaset rãmbã tigiss kẽer b sẽn da maand tõnd tẽngẽ wã. A Florãns sẽn yaa pagb a yiibã nin-yendã soka maam m sã n dat n bãnga bũmb a taab Biiblã zug n paase, la m leokame tɩ n-ye.

A Florãns lebg n waa ne a sɩd a Zustus, tɩ b naag taab n na n zãmsd maam Biiblã. B sẽn bãng tɩ m pa mi karengã, b zãmsa maam karengo. Rẽ poor bilfu, m wa n tõe n karma sebre. Daar a ye, yẽ ne a sɩdã yeela maam tɩ b tʋma bãmb Surinam tɩ b na n tɩ zĩnd be n moon koɛɛgã. Bʋko, ned da pa le be Oreyala n na n ket n zãmsd maam Biiblã ye. La a Zeova pa yĩm mam yell ye.

Pa kaoos la so-pakd a ye yʋʋr sẽn boond t’a Floyɩɩd wa Oreyala ye. A sega maam a sẽn wa n moond koɛɛgã zak-zaka. A sẽn gom Biiblã zãmsg yell ne maamã, m laame. T’a sok maam yaa: “Bõe yĩng tɩ f laadẽ?” Mam yeel-a lame tɩ m zãmsa Bõe la Wẽnnaam dat tɩ tõnd maane? sebrã n sa, n sɩng Bãngr sẽn tar n debd vɩɩm sẽn-kõn-saẽ wã * sebrã zãmsgo. Mam togs-a-la bũmb ning sẽn kɩt tɩ zãmsgã yalsã. A Floyɩɩd zãmsa maam sebrã n baase. La rẽ poore, b wa n tʋm-a-la zĩig a to t’a na n tɩ zĩnd be n moon koɛɛgã. Mam wa n le pa tar Biibl karen-saamb ye.

La yʋʋmd 2004, a Grãnvill ne a Zozuwe sẽn  yaa zall so-pakdbã la b tʋm Oreyala. B ra moonda zak-zaka, n yã maam. B soka maam m sã n dat n zãmsa Biiblã, la m yõgemda m noore. Mam kos-b lame tɩ b lebg n sɩng Bãngr sebrã zãmsg ne maam. M da rat n bãnga bũmb ning b sẽn na n zãms maamã sã n na n yɩɩ yembr ne m pĩnd Biibl karen-saambã sẽn da zãms-ma. A Grãnvill yeela maam tɩ tigiss la b maand tõnd tẽngẽ wã. Mam da rat n kẽngame, baa ne m sẽn da maan sẽn kolg yʋʋm piig n pa tol n yi m yirã. Rẽ n so t’a Grãnvill tall põor-weef n wa tɩ mam zombe, t’a tus maam tɩ d kẽng Rĩungã roogẽ.

A Grãnvill wa n yeela maam tɩ m gʋls m yʋʋr Wẽnnaam tʋʋmdã lekollẽ. A yeelame: “Fo yaa koams yaa sɩda, la f tõe n gomame. Daar n wat tɩ f na n maan diskuuri. Na n sɩd yɩɩme.” A goamã kenga m daoodo, tɩ kɩt tɩ m bas m yam.

Mam sɩngame n moond koɛɛgã ne a Grãnvill. La tõnd tẽngẽ wã, soay wʋsg ra yaa londo, tɩ yɩl n kẽn ne põor-weefã yaa toogo. Woto yĩnga, mam kosa a Grãnvill t’a rɩkd maam ne burwɛte, n tusdẽ tɩ d gilgdẽ. Woto sõnga maam wʋsgo. Yʋʋmd 2005 tʋʋl-nif kiuugã, mam deega lisgu. Rẽ poor bilfu, saam-biisã sõnga maam tɩ m paam minim, n na n get sɛbã la sono wã yell Rĩungã roogẽ.

Bʋko, yʋʋmd 2007 wã, m baaba paama sãmpogr koom koglg pʋgẽ, tɩ tũ ne a yõore. Tõnd zakã rãmb sũy sãama wʋsgo. A Grãnvill pʋʋsa ne tõndo, la a karem vɛrse-rãmb Biiblã pʋgẽ n bels-do. Yʋʋm a yiib poore, yel-beed a to n maan hal tɩ sãam d sũy wʋsgo. A Grãnvill me maana kaalem. A koom koglgã bõrame tɩ tũ ne a yõore.

Tõnd tigin-bilã sẽn da be sũ-sãang pʋgẽ wã ra pa le tar kãsem-soab ye. Ra yaa kãsemb-sõngd a ye bala. A Grãnvill kũumã waa ne sũ-sãan-kãsenga. Ra yaa m zoa hakɩɩka. A sõnga maam tɩ m paam a Zeova zoodo, la bũmb a taab sẽn da yaa tɩlɛ ne-ma. Tigsg ning sẽn pʋgl a kũumã poorã, maam la b yãk tɩ m na n karem Gũusg Gasgã sulã. Mam tõog n karma pipi sul a yiibã, la rẽ poore mam sɩnga yãbre, tɩ m nintãmã tar sodgr bala, tɩ yɩ tɩlɛ tɩ m sig n tɩ zĩndi.

Tiging a to saam-biis n wa Oreyala n na n sõng tõndo. Rẽ la m sũ-sãangã yaool n sɩng boogre. Sẽn paase, filiyallã tʋma zall zo-pakd a ye yʋʋr sẽn boond t’a Kojo tõnd tigingẽ wã. M ma ne m yao n wa n sɩng Biiblã zãmsgo, hal n wa reeg lisgu. Rẽ kõo maam sũ-noog wʋsgo. Yʋʋmd 2015 tʋʋlg kiuugã, mam lebga kãsemb-sõngda. Rẽ poore, mam maana m pipi diskuuri. Baraare, mam sẽn tẽeg a Grãnvill sẽn da yeel maam bũmb ning yʋʋm wʋsg sẽn loogã, m yõgemda m noore, la m daag nintãm. A ra yeelame: “Daar n wat tɩ f na n maan diskuuri. Na n sɩd yɩɩme.”

Ne JW Teledifiziyõ wã maasem, mam bãngame tɩ saam-biis la saam-bi-pogs n tar mam zu-loɛɛgã buudu. La baa ne rẽ, b tõogd n maanda bũmb wʋsgo, la b tar sũ-noog me. Ma-me tõe n tʋma tʋʋm kẽere. Mam sẽn tʋll n tʋm a Zeova tʋʋmdã ne m sẽn ket n tar pãng ningã kɩtame tɩ m lebg wakat fãa so-pakda. Yʋʋmd 2019 bõn-bɩʋʋng kiuugã, mam paama kiba-noog m sẽn da pa tẽede. Ki-kãnga, b togsa maam tɩ b yãk-m lame tɩ m na n yɩ kãsem-soab tõnd tigingã pʋgẽ. Tigingã koe-moondbã taa neb 40.

M sũur nooma wʋsg ne saam-biis la saam-bi-pogs nins sẽn zãms maam Biiblã, la b sõng-m tɩ m tũud a Zeova wã. La sẽn yɩɩd fãa, m sũur nooma ne a Zeova, a sẽn pa yĩm mam yellã.