1-2. Wãn to la d tõe n tũ Yel-bũn 4:25 saglgã? Togs-y kibare?

TAGS-Y n ges-y saam-bi-poak yʋʋm sẽn vẽsg sẽn tagsd a pĩnd vɩɩmã sẽn da yaa noogã yelle. La baa ne a sẽn tar zu-loees wʋsg masã wã, a ket n maanda a sẽn tõe fãa n tũud a Zeova. (1 Kor. 15:58) Daar fãa a mamsda a yamẽ yẽ ne a zakã rãmb la a zo-rãmbã sẽn be ne taab dũni-paalgã pʋgẽ. Tags-y n ges-y saam-pi-poak a to sẽn tẽeg t’a tẽed-n-taag n maan-a bũmb tɩ sãam a sũur wʋsgo. La a yãka yam n pa na n ket n tagsd rẽ yell ye. (Kol. 3:13) Tags-y n ges-y saam-biig sẽn ket n tẽr a sẽn da tudg n maan yɛl kẽer pĩndã tɩ pa sõma. La sẽn pak-a n tɩ yɩɩd masã yaa a we n modg n kell n maand sɩd ne a Zeova.—Yɩɩn. 51:12.

² Yaa bõe la nin-kãensã a tãabã maan tɩ wõnd taaba? B fãa tẽega bũmb sẽn da maan pĩndã yelle, la b ra pa tagsd rẽ yell wakat fãa ye. B pʋd n gesa b taoore, n tagsd beoogã yelle.—Karm-y Yel-bũn 4:25.

3. Bõe yĩng tɩ d segd n ‘get d taoore,’ n tagsd beoogã yelle?

³ Bõe yĩng tɩ tar yõod tɩ d ‘get d taoore,’ n tagsd beoogã yelle? Ned sã n kẽnd la a get a poorẽ, a pa tõe n kẽn tɩrg ye. Yaa woto me a Zeova tũubã wɛɛngẽ. D sã n ket n tagsd bũmb nins sẽn loogã, wall bũmb nins d sẽn maan pĩndã yell wakat fãa, d pa tõe n tũ a Zeova ne d sũur fãa ye.—Luk 9:62.

4. Bõe yell la d na n gom sõs-kãngã pʋgẽ?

⁴ Sõs-kãngã pʋgẽ, d na n goma bũmb a tãab yelle. Bõn-kãens yaa bẽds sẽn tõe n wa kɩt tɩ d nong n tagsd sẽn loogã yelle, n gomd rẽ yell wakat fãa. Yaa: 1) d sã n tagsdẽ tɩ d vɩɩmã ra yaa sõma pĩndã n yɩɩd masã, 2) d sã n tar sũ-kẽka, la 3) d sã n ningd d meng taal tɩ loog nugu. D na n  yãa Biiblã saglsã sẽn tõe n sõng-d to-to tɩ d ra tagsd “bũmb nins sẽn be poorẽ wã” yelle, la d nangd pãng n tagsd “bũmb nins sẽn be taoorã” yelle.—Fili. 3:13.

5. Koɛɛg soab 7:10 keoogda tõnd tɩ d ra maan bõe?

⁵ Karm-y Koɛɛg soab 7:10. Vɛrse-kãngã pa wilgd tɩ pa zems tɩ d sok tɩ: ‘Yaa wãn tɩ wakat sẽn loog poorẽ wã yaa sõma’ ye. D sẽn tõe n tẽeg sẽn loogã yellã yaa Wẽnnaam kũuni. Vɛrse wã yeelame: ‘Bɩ f ra sok tɩ yaa wãn tɩ wakat sẽn loog poorẽ wã yaa sõma n yɩɩd masã ye.’ Dẽnd bẽdgã yaa d sẽn na n dɩk d vɩɩmã sẽn da yaa to-to pĩndã n mak ne a sẽn yaa to-to masã wã, n tagsdẽ tɩ masã wã ka neng baa bilf ye.

6. Bõe yĩng tɩ d pa segd n tagsdẽ tɩ d vɩɩmã ra yaa sõma pĩndã n yɩɩd masã? Togs-y kibare.

⁶ Bõe yĩng tɩ d pa segd n ket n tagsdẽ tɩ d vɩɩmã ra yaa sõma pĩndã n yɩɩd masã? D sã n nong n tẽegd sẽn loogã yelle, d na n nong n tagsda sẽn yaa sõma wã yell bala, la d yĩm sẽn pa yɩ sõma wã. Wala makre, d gom Israyɛll nebã yelle. B sẽn yi Ezɩptã poor bala, b yĩma b vɩɩmã sẽn da yaa toog to-to beenẽ wã. Yaa rɩ-noodã b sẽn da rɩt be wã yell bal la b ra tagsda. B yeelame: “Tõnd da paamda zĩm zaalem la d paamd kõnkõmbr ne yoag la poaaro ne gãbdo, laee n dɩt Ezipt tẽnga.” (Sõd. 11:5, Wẽnnaam sebre, 1983) Rẽ yĩnga b sɩd da paamda rɩ-kãensã “zaalem” sɩda? Ayo. Ra pa nana ne Israyɛll nebã baa bilfu. Wakat-kãnga, b ra yaa yembs Ezɩpti, tɩ b ra namsd-b hal tɩ loogd noore. (Yik. 1:13, 14; 3:6-9) La b wa n yĩma to-kãensã fãa yelle, n da tʋll b pĩnd vɩɩmã yɛsa. B yãka yam n na n tags bõn-sõma wã b sẽn da paamd Ezɩptã yell n tɩ yɩɩda, n pa tagsd bõn-sõma nins a Zeova sẽn maan n kõ-b tɩ nan pa kaoosã yell ye. La a Zeova sũur pa yɩ noog ne-b ye.—Sõd. 11:10.

7. Bõe n sõng saam-bi-poakã sẽn na yɩl t’a ra wa tagsd wakat fãa t’a vɩɩmã ra yaa sõma pĩndã n yɩɩd masã?

⁷ Bõe la d tõe n maane, tɩ sõng-d tɩ d ra  wa tagsdẽ tɩ d vɩɩmã ra yaa sõma pĩndã n yɩɩd masã? D gom saam-bi-poak a ye yelle. A sɩnga tʋʋm Burkilin Betɛllẽ wã yʋʋmd 1945. Yʋʋm a wãn poore, a kẽe kãadem ne saam-biig sẽn da tʋmd Betɛllẽ wã me, tɩ b naag taab n tʋm beenẽ n kaoos yʋʋma. La yʋʋmd 1976, a sɩdã lʋɩɩ bãaga. A yeelame t’a sɩdã sẽn wa n bãng tɩ bãagã na n tũu ne a yõorã, a sagla yẽ n na n sõng-a t’a tõog toog a kũumã poore. Ad a sɩdã sẽn yeel-a: “D paama sũ-noog d kãadmã pʋgẽ. Neb wʋsg zɩ n paam rẽ ye.” La a paasame yaa: “Yaa sɩd tɩ f pa na n yĩm bõn-sõma nins d sẽn naag taab n maanã yell ye. La ra wa yõd n tags tɩ f vɩɩmã ra yaa sõma pĩndã n yɩɩd masã ye. Bilf-bilfã, f sũ-sãangã na n boogdame. Da sãam f sũur tɩ loog noore, yell ning sẽn paam foo wã yĩng ye. Maan sũ-noog yʋʋm nins fãa d sẽn zĩnd ne taaba, n tũ a Zeova wã yĩnga. . . . D sẽn tõe n tẽeg sẽn loogã yellã yaa Wẽnnaam kũuni.” Yãmb pa tagsd t’a saglgã yaa sõma wʋsg sɩda?

8. Saam-bi-poakã sẽn sak n tũ a sɩdã saglgã, wãn to la naf-a?

⁸ D saam-bi-poakã sɩd tũu a sɩdã saglgã. A kell tũu a Zeova ne a sũur fãa hal n tãag a kũum. A maana kaalem a sẽn wa n tar yʋʋm 92. Yʋʋm a wãn sẽn deng a kaalmã, a yeelame: “M sã n lebg n tags m sẽn kẽes m meng zãng a Zeova tʋʋmdã pʋgẽ sẽn yɩɩd yʋʋm 63 masã wã, m tõe n yeelame tɩ m paama sũ-noog wʋsg m vɩɩmã pʋgẽ.” Bõe yĩnga? Ad a sẽn yeele: “Bũmb ning sẽn kɩt tɩ m vɩɩmã tar barka, yaa d sẽn yaa tẽed-n-taas n be dũniyã gill zug n yaa wa zak a ye neba, la d sẽn saagd n na n wa vɩɩmd arzãnã pʋgẽ tẽngã zug ne taaba, n tũud d Naand a Zeova sẽn yaa Wẽnnaam sɩd-sɩdã wakat sẽn kõn sa yĩngã.” * Saam-bi-poakã sẽn kell n ges a taoor n da tagsd beoogã yellã sɩd yaa mak-sõng tɛkẽ.

9. Wa Maan-kʋʋr 19:18 sẽn wilgdã, wakat-bʋg la tõe n yɩ toog wʋsg tɩ d sak n kõ sugri?

⁹ Karm-y Maan-kʋʋr 19:18. Naoor wʋsgo, sã n yaa d tẽed-n-taaga, d zoa, wall d zakã ned n maan-d bũmb tɩ sãam d sũur wʋsgo, yaa toog tɩ d bas tɩ sa. Wala makre, saam-bi-poak a ye la a tẽed-n-taag rõd zaalem t’a zuka a ligdi. A tẽed-n-taagã wa n kos-a-la sugri, la saam-bi-poakã kell n gãda yellã gĩi n pa rat n bas tɩ sa ye. Yell a woto buud zoe n paama yãmb bɩ? Baa a buud zɩ n paam-do, d sʋkã neb wʋsg zoe n talla sũ-kẽka, n tags tɩ d pa tol n tõe n kõ ned sẽn beeg-d sugr ye.

10. D sã n wa tar sũ-kẽka, bõe n tõe n sõng-do?

¹⁰ D sã n wa tar sũ-kẽka, bõe n tõe n sõng-do? D segd n tẽegame t’a Zeova nee bũmba fãa. A mii yɛl nins fãa sẽn namsd tõndã, wala makre, ned sã n maan-d-la kɛgre. (Ebre. 4:13) Tõnd sã n namsdẽ, sãamda a sũuri. (Eza. 63:9) A pʋlmame t’a na n wa kɩtame tɩ toog buud fãa d sẽn paamde, b sẽn maan-d kɛgr yĩngã sa.—Vẽn. 21:3, 4.

11. D sã n kõt d taabã sugri, wãn to la nafd tõnd mengã?

¹¹ D tẽeg me tɩ d sã n kõt d taabã sugri, nafda tõnd mengã. Yaa woto la saam-bi-poak ning a tẽed-n-taagã sẽn da rõd zaalmã wa n bãnge. A wa n tõog n kõo a tẽed-n-taagã sugri, n pa le tar sũ-kẽk ne-a ye. A bãngame tɩ d sã n kõt d taabã sugri, a Zeova me na n kõ-d-la sugri. (Mat. 6:14) A ra miime t’a tẽed-n-taagã sẽn maanã yaa wẽng wʋsgo, la a yãka yam n na n bas tɩ sa. Baasa wãna? A sũ-noogã paasame. Sõng-a lame me t’a kell n wɩng ne a Zeova tũubu.

12. Bõe la 1 Zã 3:19, 20 wilgd tõndo?

¹² Karm-y 1 Zã 3:19, 20. D fãa mi n ningda d meng taal wakat ninga. Wala makre, neb kẽer ningda b mens taal bũmb nins b sẽn maan nand tɩ b bãng a Zeova wã yĩnga. Neb a taab ningda b mens taale, b sẽn tudg n maan yɛl kẽer b lisgã poor yĩnga. (Rom. 3:23) Sãmbg kae tɩ d rat n maana sẽn yaa tɩrga. La “tõnd fãa tudgda naoor wʋsgo.” (Zak 3:2; Rom. 7:21-23) Yaa sɩd tɩ d pa rat n ningd d meng taal ye. La yaool n tõe n naf-d lame. Wãn to? Bala, d sã n ningd d meng taale, tõe n kɩtame tɩ d toeem yam, la d yãk yam n da le yɩlem d kongrã ye.—Ebre. 12:12, 13.

13. Bõe yĩng tɩ d pa segd n ningd d meng taal tɩ loog nugu?

¹³ La wakat ninga, d tõe n wa ningda d meng taal tɩ loog nugu, rat n yeel tɩ n ket n ningd d meng taale, baa d sẽn tek yam n kos sugri, t’a Zeova wilg t’a kõ-d-la sugrã. Taal a woto tõe n wã-d lame. (Yɩɩn. 31:11; 38:4, 5) Wãn to? D gom saam-bi-poak a ye yelle. A ra ket n ningda a meng taale, tʋʋm-wẽns nins a sẽn da tʋm pĩndã yĩnga. A yeelame: “M da tagsdame tɩ pa tar yõod tɩ m wɩsg m meng n tʋm a Zeova tʋʋmdã ye. Bala, sẽn yaa soab fãa a pa na n fãag-m ye.” Tõe tɩ tõnd sʋkã, neb wʋsg tagsda woto. La d pa segd n ningd d meng taal tɩ loog nug ye. Tags-y n ges-y a Sʋɩtãan sũur sẽn na n yɩ noog to-to, d sã n bas a Zeova tũubu, t’a Zeova yaool n pa bas-d ye.—Ges-y 2 Korẽnt rãmb 2:5-7, 11.

14. Bõe la d tõe n maan n bãng t’a Zeova sɩd kõ-d-la sugri?

¹⁴ Baa ne rẽ, tõe tɩ y sokda y meng yaa: ‘M maanda wãn n bãng t’a Zeova sɩd kõ-m-la sugri?’ Y sã n sokd y meng  woto, pʋd n wilgdame t’a Zeova tõe n kõ-y-la sugri. Yʋʋm wʋsg sẽn looge, Gũusg Gasgã ra yeelame yaa: “Tõeeme tɩ d ket n yɩlemda d kongr naoor wʋsgo. Tõe tɩ yaa d sẽn nan pa tõog pãn-komsem d sẽn da tar nand tɩ d bãng a Zeova wã yĩnga. . . . Sã n yaa woto, bɩ y ra koms raood ye. Ra tags-y tɩ yaa yel-wẽnd a Zeova sẽn pa tol n tõe n kõ-y sugr ye. Yaa woto bal kɛpɩ la a Sʋɩtãan rat tɩ y tagse. Y sũur sẽn sãamd ne y mengã pʋd n wilgdame tɩ y pa nin-wẽnga, la t’a Zeova tõe n kõ-y-la sugri. Sik-y y menga, n ket n pʋʋsd Wẽnnaam sẽn na yɩl t’a kõ-y sugri, tɩ y paam sũur-kaset sẽn pa ningd-y taale, la a sõng-y me tɩ y ra le yɩlem y kongrã ye. Baa biig sã n maan yell n yɩlem naoor ka tɛka, wakat fãa a kota a ba wã sõngre. Rẽ wã, ket-y n kot-y a Zeova sõngr t’a na n sɩd sõng-y lame, a nimbãan-zoeerã yĩnga.”

15-16. Neb kẽer sẽn bãng t’a Zeova pa raag-b n basã, b manesem yɩɩ wãna?

¹⁵ A Zeova Kaset rãmb wʋsg paamame tɩ b yam gãande, b sẽn bãng t’a Zeova pa raag-b n basã yĩnga. Wala makre, sõss nins gom-zug sẽn yaa “Biiblã toeemda neba” pʋgẽ, saam-bi-poak a ye kibar la b togs-yã, tɩ sõng saam-biig a ye. Kibarã pʋgẽ, saam-bi-poakã wilgame tɩ tʋʋm-wẽns nins a sẽn da tʋm pĩndã yĩnga, ra yaa toog ne-a t’a sak n deeg t’a Zeova nong-a lame. Baa yʋʋm wʋsg a lisgã poore, a ra ket n tagsda woto. La a sẽn bʋgs a Zeezi kũumã sẽn yɩ maoong n dol tõnd yel-wẽnã zugã, sõng-a lame t’a bãng t’a Zeova nong-a lame. *

¹⁶ Wãn to la saam-bi-poakã kibarã sõng saam-biigã? Ad saam-biigã sẽn yeele: ‘Mam sẽn wa n yaa bi-bɩɩga, mam da minim n geta pornogarfi, hal tɩ ra yaa toog tɩ m base. Sẽn pa kaoose, m le gesa pornogarfi wã. Mam kosa kãsem-dãmbã sõngre, la m mao wʋsg sẽn na n yɩl n bas minun-wẽng-kãnga. Kãsem-dãmbã sõnga maam tɩ m bãng t’a Zeova nong-m lame, la t’a na n kõ-m-la sugri. Baa ne rẽ, m mi n yetame tɩ m ka võore, la t’a Zeova pa tõe n nong maam ye. Mam sẽn karem saam-bi-poakã kibarã  sɩd sõng-m lame. Masã, m miime tɩ m sã n wa tagsdẽ tɩ Wẽnnaam pa tõe n kõ-m sugri, yaa wa m sẽn yet t’a Biigã maoongã pa seke, n tõe n lud m yel-wẽnã ye. Mam wõrga sebrã zĩig ning kibarã sẽn beẽ wã, tɩ m sã n wa tagsdẽ tɩ m ka võor bɩ m karem la m bʋgs a zug tɩ sõng-ma.’

17. Bõe n sõng tʋm-tʋmd a Poll t’a ra pa ningd a meng taal tɩ loog nugu?

¹⁷ Kiba-kãensã buudã tẽegda tõnd tʋm-tʋmd a Poll yelle. Nand t’a lebg kiris-neda, a maana yel-wẽn-kãsemse. A Poll ra tẽra a sẽn tʋm tʋʋm-wẽns ninsã, la a ra pa tagsd rẽ yell wakat fãa ye. (1 Tɩm. 1:12-15) A ra getame t’a Zeezi kiime tɩ yɩ maoong n dol yẽ yel-wẽnã. (Gal. 2:20) Dẽnd a Poll ra pa ningd a meng taal tɩ loog nug ye. Sẽn da pak-a n yɩɩd yaa a maan a sẽn tõe fãa a Zeova tʋʋmdã pʋgẽ.

18. Bõe la d bãng sõs-kãngã pʋgẽ?

¹⁸ Sõs-kãngã pʋgẽ, d sẽn gom bũmb a tãab sẽn yaa bẽdg yellã, bõe la d bãng-yã? D bãngame tɩ: 1) d sẽn tõe n tẽeg sẽn loogã yellã yaa Wẽnnaam kũuni. La baa d vɩɩmã sã n da yaa sõma pĩndã, dũni-paalgã pʋgẽ vɩɩmã na n yɩɩ sõma n yɩɩda. 2) Neb a taab tõe n maan-d-la bũmb tɩ sãam d sũur wʋsgo. La d sã n sak n kõ sugri, d na n tõog n kell n tũu a Zeova ne d sũur fãa. 3) D sã n ningd d meng taal tɩ loog nugu, tõe n kɩtame tɩ d pa tũud a Zeova ne sũ-noog ye. Dẽnd wa a Polle, d tog n kɩsa sɩd t’a Zeova kõ-d-la sugri.

19. Bõe yĩng tɩ d yetẽ tɩ dũni-paalgã pʋgẽ, d pa na n le tags bũmb baa a ye sẽn da sãamd d sũur yelle?

¹⁹ D saagdame n na n wa vɩɩmd wakat sẽn kõn sa. Dũni-paalgã pʋgẽ, d pa na n le tags bũmb baa a ye sẽn da sãamd d sũur yell ye. Biiblã goma wakat-kãng yell n yeel yaa: “B kõn tol n leb n tẽeg sẽn zĩnd pĩndã yell ye.” (Eza. 65:17) Tags-y n ges-y: Tõnd sʋkã neb kẽer tʋma a Zeova tʋʋmdã hal n tãag b kʋʋlem wakate. La dũni-paalgã pʋgẽ, d fãa na n le paama keelem wa kom-bɩɩse. (Zoob 33:25) Dẽ wã, bɩ d yãk yam n da nong n tagsd sẽn loogã yell wakat fãa ye. D pʋd n tagsd beoogã yelle, la d maan d sẽn tõe fãa masã menga, n wa paam n vɩɩmd dũni-paalgã pʋgẽ.