1. Wa Filip rãmb 2:3 sẽn wilgdã, wãn to la sik-m-mengã sõngd tõnd tɩ d tall zood sõma ne d taabã?

TÕND sikda d meng n sakd n tũud a Zeova noyã, bala d miime tɩ wakat fãa yaa yẽ n mi bũmb ning sẽn yaa sõma ne tõnd n yɩɩdã. (Efɛ. 4:22-24) Sik-m-mengã kɩtame tɩ d lʋɩɩsd a Zeova raabã taoore, la d getẽ tɩ neb a taabã yɩɩda tõndo. Woto kɩtdame tɩ d tar zood sõma ne a Zeova la ne d tẽed-n-taasã.—Karm-y Filip rãmb 2:3.

2. Bõe la tʋm-tʋmd a Poll sak n deege, la bõe yell la d na n gom sõs-kãnga pʋgẽ?

² La d sã n pa gũusi, a Sʋɩtãan dũniyã neb sẽn yaa wuk-m-mens rãmb la rat-m-ye rãmbã tõe n wa tõogame tɩ d lebg wa bãmba. * Wõnda yel-kãngã n da yɛgd pipi kiris-nebã, bala tʋm-tʋmd a Poll ra yeela Rom kiris-nebã yaa: “Mam yeta yãmb ned kam fãa t’a ra tags t’a tara yõod wʋsg ye. La bɩ a tagsa wã yɩ tagsa sẽn wilgd t’a tara yam-sõngo.” (Rom. 12:3) A Poll sak n deegame tɩ d segd n nanda d menga. La sik-m-mengã na n kɩtame tɩ d tall tagsg sẽn zems d mengã zugu. Sõs-kãngã na n wilga sik-m-mengã sẽn tõe n sõng tõnd to-to tɩ d ra tall wuk-m-meng bũmb a tãab pʋgẽ: 1) D kãadmã, 2) b sẽn kõ tõnd tʋʋm nins a Zeova siglgã pʋgẽ wã, la 3) rezo sosiyo rãmbã.

3. Bõe yĩng tɩ mo-yõs pa tõe n pa zĩnd kãadem pʋgẽ, la bõe la kẽer maand n na n welg-ba?

³ A Zeova lugla kãadmã n dat tɩ pag ne a sɩd paam sũ-noogo. La b fãa sẽn pa zems zãngã yĩnga, mo-yõs pa tõe n pa zĩnd ye. A Poll pʋd n yeelame tɩ neb nins sẽn kẽed kãadmã na n paama zu-loeese. (1 Kor. 7:28) Nina tõe n tagsdame tɩ yẽ ne a pagã wall a sɩdã sẽn da pa kẽẽ kãadem ne taab n são, bala b zabda taab wakat fãa. B sã n tagsd wa dũniyã rãmba, b na n yɩɩ tao-tao n tags tɩ yellã tɩɩm yaa b sẽn na n kao b kãadmã bala. B na n getame tɩ sẽn são yaa ned fãa bao a meng bala.

4. D segd n gũusame n da wa tags tɩ bõe?

⁴ D segd n gũusame tɩ d yamã ra wa yi d kãadmã ye. D miime tɩ Biiblã wilgame tɩ yaa pag bɩ rao sã n yo la a to wã tar sor n tõe n kao kãadmã. (Mat. 5:32) Rẽ wã, zu-loees nins yell a Poll sẽn gomã sã n wa paam-do, d pa segd n bas tɩ wuk-m-meng wa kɩt tɩ d tags tɩ: ‘Mam pagã bɩ m sɩdã pa get m yell sõma ye. A pa nong-m wa sẽn segdã ye. Sã n da yaa ne ned a to la m sẽn kẽ kãadmã, tõe tɩ m sũ-noogã yɩɩgẽ woto.’ Ned sã n tagsd woto, yaa a mengã yell bal n pak-a. Yel-kãngã buud pʋgẽ, dũniyã nebã na n sagla yãmb tɩ y maan y sũurã raabo, baa na n tũu ne y kãadmã kaoobo. La Biiblã yetame yaa: “Ra bao-y y mens nafr bal ye. Bao-y y taabã nafr me.” (Fili. 2:4) A Zeova sẽn datã yaa y kell n pa ne taaba, pa y kao y kãadmã ye. (Mat. 19:6) A ratame tɩ y reng n tags yẽ yelle, pa yãmb mengã yell ye.

5. Wa Efɛɛz rãmb 5:33 sẽn yetã, pag ne a sɩd manesem segd n yɩɩ wãn ne taaba?

⁵ Pag ne a sɩd segd n nonga  taab la b waoogd taaba. (Karm-y Efɛɛz rãmb 5:33.) Biiblã yeta tõnd tɩ d nang pãng ne kũun n yɩɩd reegre. (Tʋʋ. 20:35) Bõe n na n sõng pag ne a sɩd tɩ b wilgd tɩ b nonga taab la b waoogd taaba? Yaa sik-m-mengã. Pag ne a sɩd sã n yaa sik-m-mens rãmba, b ned kam fãa na n ‘baooda a to nafre,’ n pa baood a meng nafr ye.—1 Korẽnt rãmbã 10:24.

6. Yam-bʋg la d tõe n dɩk a Ɛstivɛn ne a Ɛstefani goamã pʋgẽ?

⁶ Sik-m-mengã sõnga kiris-neb wʋsg tɩ b paam sũ-noog b kãadmã pʋgẽ n paase. Wala makre, pʋg-sɩd a ye yʋʋr sẽn boond t’a Ɛstivɛn yeelame: “Y segd n naagda taab n tʋmd ne yam a yembre, sẽn yɩɩd fãa, zu-loees sã n wa beẽ. Y pa na n sokdẽ tɩ ‘bõe n na n naf maam n yɩɩd?’ ye. Y pʋd na n sokdame tɩ: ‘Bõe n na n naf tõnd n yɩɩda?’” A pagã yʋʋr la a Ɛstafani. Yẽ me tagsda woto. Ad a sẽn yeele: “Ned kae sẽn dat n zĩnd ne ned sẽn zabd ne-a wakat fãa ye. Mo-yõsr sã n wa beẽ, d baoodame n na n bãng yellã yẽgre. Rẽ poore, d pʋʋsdame, n maan vaeesgo, la d yẽs ne taab n bao yellã tɩɩm. D baoodame n na n welg yellã lakae, d pa zabd ne taab ye.” Kãadmã pʋgẽ, ned fãa sã n pa tagsdẽ t’a sãoo a to wã, sɩd na n naf-b lame.

7. Rao sẽn deeg lisg sã n paam tʋʋm n paas a Zeova siglgã pʋgẽ, a manesem segd n yɩɩ wãna?

⁷ D getame tɩ d sẽn maand d sẽn tõe fãa n tũud a Zeova wã yaa zu-zẽkr meng-menga. (Yɩɩn. 27:4; 84:11) Rao sẽn deeg lisg sã n baood n na n tʋm n paas a Zeova siglgã pʋgẽ, seka pẽgre. Sɩd me, Biiblã yetame: “Rao sã n modgd n dat n lebg yel-gɛta, yaa tʋʋm-sõng la a baooda.” (1 Tɩm. 3:1) La a sã n paam tɩ b sɩd kõ-a tʋʋmde, a pa segd n tagsdẽ t’a sãoo a taabã masã ye. (Luk 17:7-10) A raabã segd n yɩɩ tʋm a taabã yĩng ne sik-m-menga.—2 Kor. 12:15.

8. Yam-bʋg la d tõe n dɩk a Dioterfɛs kibarã, ne a Ozɩyas la a Absalom kibarã pʋgẽ?

⁸ Biiblã gomda neb sẽn da tagsd tɩ b sãoo b taab yelle, tɩ yaa keoogr ne-do. A Dioterfɛs sẽn da pa sik-m-meng soabã ra baoodame n na n “yɩ taoor soab” tigingã pʋgẽ. (3 Zã 9) A Ozɩyas baoo ne wuk-m-meng n na n tʋm tʋʋmd a Zeova sẽn pa kõ-a sor t’a tʋme. (2 Kib. 26:16-21) A Absalom sẽn da rat n lebg rĩmã maana sɩlem n na n paam tɩ nin-buiidã teel-a. (2 Sãm. 15:2-6) Kiba-kãensã wilgda vẽeneg t’a Zeova sũur pa noom ne neb nins sẽn baood b mens waoogr bɩ ziirã ye. (Yel. 25:27) Wuk-m-mengã la yʋ-baoorã wat n baasa ne yel-beedo.—Yel. 16:18.

9. Mak-sõng bʋg la a Zeezi kõ tõndo?

⁹ A Zeezi pa yɩ wa nin-kãensã ye. ‘Baa a sẽn da wõnd Wẽnnaamã, a pa bao n na n deeg Wẽnnaam zĩiga, n yetẽ t’a zema Wẽnnaam ye.’ (Fili. 2:6) Yaa a Zeova bal n yɩɩd a Zeezi ne pãnga, la baa ne rẽ a Zeezi zɩ n tags t’a tara yõod tɩ loog ye. A yeela a karen-biisã yaa: “Ned ning sẽn zãad a meng wa bi-kɩdg yãmb fãa sʋka, yẽ soab n yaa kãsenga.” (Luk 9:48) Ad d sẽn paam n tõe n tʋm ne so-pakdba, kãsem-sõngdba, kãsem-dãmb la tigims sull yel-gɛtb sẽn tar sik-m-meng wa a Zeezi wã sɩd yaa bark menga! Sẽn tũud-b a Zeova ne sik-m-mengã nonga b tẽed-n-taasã, tɩ sɩd wilgdẽ tɩ b yaa kiris-neb hakɩɩka.—Zã 13:35.

10. Y sã n wa getẽ tɩ yell n be tigingã pʋgẽ, la tɩ kãsem-dãmbã pa welgd-a wa sẽn segdã, bõe la y segd n maane?

¹⁰ La y sã n wa getẽ tɩ yell n  be tigingã pʋgẽ, tɩ yaa wa kãsem-dãmbã pa welgd-a wa sẽn segdã, bõe la y segd n maane? Ra yẽgm-y ye. Tall-y sik-m-meng n kell n teel sẽn lʋɩt-b taoorã. (Ebre. 13:17) Sẽn na yɩl n tõog n maan woto, sok-y y meng yaa: ‘Rẽ yĩnga, mam sẽn tagsd tɩ bũmb ning yaa yellã, sɩd yaa yell b sẽn tog n welg bɩ? Yaa masã la b segd n welg-a bɩ? Yaa maam n segd n welg-a bɩ? Rẽ yĩnga, m baoodame n na n kɩt tɩ zems-n-taar zĩnd bɩ, bɩ m datame n wilg tɩ ma-me pa zaalem?’

11. Wa Efɛɛz rãmb 4:2, 3 sẽn yetã, d sã n tũud a Zeova ne sik-m-menga, a nafa wã yaa bõe?

¹¹ Ned sã n yaa sik-m-meng soaba, a Zeova nanda rẽ n yɩɩd a sẽn na n tar minim bɩ tõogo. Zems-n-taar sã n be neb sʋka, rẽ tara yõod ne a Zeova n yɩɩd b sẽn na n tʋm tʋʋmd tɩ yɩ sõma bala. Bɩ y maan y sẽn tõe fãa n tũ a Zeova ne sik-m-menga. Rẽ na n sõngame tɩ tigingã neb zems-n-taar paase. (Karm-y Efɛɛz rãmb 4:2, 3.) Moond-y koɛɛgã ne y pãng fãa. Ges-y y sẽn tõe n maanega, n maan y taabã neere. Maand-y nebã fãa sãando, baa neb nins sẽn pa tar tʋʋmd tigingã pʋgẽ wã. (Mat. 6:1-4; Luk 14:12-14) Y sã n sulgd y meng n naagd y tẽed-n-taasã n tʋmd tigingã pʋgẽ, b na n yãa tõog la minim ning y sẽn tarã, la sẽn yɩɩd fãa, b na n yãame tɩ y yaa sik-m-meng soaba.

12. Biiblã yetame tɩ d bao zo-rãmb bɩ? Wilg-y y leoorã võore.

¹² A Zeova naana tõnd tɩ d tõe n naagd d zakã rãmb la d zo-rãmbã n maand bũmb kẽer tɩ kõ-d sũ-noogo. (Yɩɩn. 133:1) A Zeezi ra tara zo-rãmb hakɩɩka. (Zã 15:15) Biiblã wilgda zood hakɩɩk sẽn tõe n naf tõnd to-to. (Yel. 17:17, MN; 18:24) A leb n yetame tɩ  pa sõma tɩ d zãag d meng ne d taabã ye. (Yel. 18:1) Neb wʋsg tagsdame tɩ b tõe n tũnuga ne rezo sosiyo rãmbã n paam zo-rãmb wʋsgo, n da yɩ b yembr ye. La d segd n maana gũusgu.

13. Bõe yĩng tɩ neb kẽer sẽn nong n kẽed rezo sosiyo rãmbẽ wã wat n mik tɩ b yaa b yembre, tɩ lebg sũ-sãams wʋsg bɩ deprɛsɩyõ?

¹³ Bãngdb n maan vaeesgo, n mik tɩ neb nins sẽn kẽesd sẽk wʋsg rezo sosiyo rãmbẽ wã n get fot-rãmb nebã sẽn ningi, wall b karemd nebã sẽn gʋls be wã wat n getame tɩ b pa tar zo-rãmba, tɩ baas ne sũ-sãams bɩ deprɛsɩyõ. Bõe yĩnga? Tõe tɩ bũmb a ye yaa tɩ neb nins sẽn nong n ningd fot-rãmb rezo sosiyo rãmbẽ wã nong n tũusda b fot-neeba, wall bãmb ne b zo-rãmb fot-neeba, zĩ-neeb b sẽn kẽngẽ fot-rãmba, tɩ kɩt tɩ yaa wa b vɩɩmã tolg n yaa nuura. Nina tõe n gesa fot-kãense, n wa tagsdẽ tɩ yẽnda yẽ vɩɩmã ka neng ye. Ad saam-bi-poak sẽn tar yʋʋm 19 sẽn yeele: “Mam sã n mi n get fot-rãmbã, n neẽ tɩ nebã yit n noogda b yõor wɩkɛn-dãmbã, tɩ mam yẽ yaool n dõb zakẽ, m sũurã sãamdame.”

14. Bõe saglg n be 1 Pɩyɛɛr 3:8 wã n tõe n sõng tõnd tɩ d tʋm ne rezo sosiyo rãmbã tɩ zemse?

¹⁴ Sãmbg sẽn ka be, d tõe n tʋma ne rezo sosiyo rãmbã tɩ naf-do. Wala makre, d tõe n tũnuga ne rẽ n paamd n sõsd ne d zakã rãmb la d zo-rãmba. La yãmb gũus n gesame tɩ neb kẽer sẽn ningd fot-rãmbã, video rãmb la mesaaz-rãmbã yaa sẽn na yɩl tɩ b pẽg bãmb wall neb a taab bɩ? Yaa wa b sẽn yet nebã yaa: “Ges-y maam!” Kẽer ningda b mens fot-rãmb rezo sosiyo rãmbẽ wã, n bas n gʋls gom-kãs bɩ gom-dẽgd n paase, pa rẽ bɩ b maan woto ne fot-rãmb neb a taab sẽn ningi. Woto fãa pa zems ne kiris-ned ye. Bala kiris-nebã segd n bɩɩsa sik-m-meng la nimbãan-zoeere.—Karm-y 1 Pɩyɛɛr 3:8.

15. Wãn to la Biiblã tõe n sõng-d tɩ d da yɩ wuk-m-mens rãmb la yʋ-baoodba?

¹⁵ Yãmb sã n nong n tʋmda ne rezo sosiyo rãmbã bɩ y sok-y y meng yaa: ‘Fot-rãmbã ne video-rãmbã mam sẽn ningd be, la goam nins mam sẽn gʋlsd be wã na n kɩtame tɩ m taabã getẽ tɩ m yaa wilg-m-meng la wuk-m-meng soab bɩ? Mam sẽn maandã tõe n kɩtame tɩ neb a taabã maand sũ-kiir ne-m bɩ?’ Biiblã yetame: “Bũmb nins fãa sẽn be dũniyã pʋgẽ wã, rat n yeel tɩ  yĩngã ratem, ninã ratem, la wilg f paoong ne wuk-m-mengã pa yit Ba wã nengẽ ye. B yita dũniyã nengẽ.” (1 Zã 2:16) Biibl a yembr pʋgẽ, b lebga gomd ning sẽn yaa “wilg f paoong ne wuk-m-mengã” tɩ: “Tʋll n wilg tɩ f yaa nin-kãsenga.” Kiris-ned pa segd n dat n yɩ nin-kãseng wall a bao a taabã pẽgr ye. A tũuda Biiblã sẽn yet tɩ: “Bɩ d ra lebg wuk-m-mens rãmba, n wagsd taab la d maand sũ-kiir ne taab ye.” (Gal. 5:26) Sik-m-mengã na n sõng-d lame tɩ d ra yɩ wuk-m-mens rãmb la yʋ-baoodb wa dũniyã rãmb ye.

16. Bõe yĩng tɩ d pa segd n yɩ wuk-m-mens rãmba?

¹⁶ Yaa tɩlɛ tɩ d bɩɩs sik-m-menga, bala wuk-m-mens rãmbã pa tar ‘yam-sõng’ ye. (Rom. 12:3) B yaa zab-zabdba, la rat-m-ye rãmba. B tagsa wã la b tʋʋm-tʋmdɩ wã wae n kẽesda bãmb mensã la neb a taabã toog pʋgẽ. B sã n pa toeem b tagsa wã, a Sʋɩtãan tõe n tũnuga ne rẽ n lud b yamã. (2 Kor. 4:4; 11:3) La sik-m-meng soab yẽ tara yam-sõngo. A pa tagsd t’a sãoo a taabã ye. A sakd n deegame t’a taabã yɩɩda yẽ zĩis wʋsg pʋgẽ. (Fili. 2:3) A miime tɩ “Wẽnnaam kisa waoog-m-menga, la b kõta sik-m-mens rãmbã b barkã.” (1 Pɩy. 5:5) Sẽn tar-b yam-sõngã pa rat t’a Zeova yɩ b bɛ ye.

17. Bõe la d segd n maan n kell n yɩ sik-m-mens rãmba?

¹⁷ Sẽn na yɩl n kell n yɩ sik-m-mens rãmba, d segd n tũu Biiblã saglg ning sẽn yet tɩ d ‘yeeg nin-kʋdgã ne a tʋʋmã, la d yeelg nin-paalgã.’ Woto baooda modgr wʋsgo. D segd n bao n bãnga a Zeezi mak-sõngã neere, la d maan d sẽn tõe tɛk n dɩk a togs-n-taare. (Kol. 3:9, 10; 1 Pɩy. 2:21) D sã n tõog n maan woto, na n naf-d lame. D sã n bɩɩs sik-m-menga, na n paasa sũ-noogã d zakã pʋgẽ, na n paasa tigingã neb zems-n-taarã, la sõng-d me tɩ d bãng n tʋm ne rezo sosiyo rãmbã tɩ zemse. Sẽn yɩɩd fãa, d na n paam n taa a Zeova yam, la d paam t’a ning-d barka.