1. Bõe la tʋm-tʋmd a Poll yeel vẽeneg a mengã zugu?

TƲM-TƲMD a Poll wilga vẽeneg tɩ yẽ mi n tara pãn-komsem. A yeelame tɩ yẽ ‘yĩngã pãng boogdame,’ t’a segd n mao n maan sẽn yaa tɩrga, la tɩ pa wakat fãa la a Zeova reegd yẽ pʋʋsgã wa yẽ dat to-to wã ye. (2 Kor. 4:16; 12:7-9; Rom. 7:21-23) A Poll yeelame me t’a bɛɛbã get-a-la wa ned sẽn ka pãnga. * La a pa bas tɩ neb a taabã sẽn gomd a yell wẽngã, bɩ yẽ mengã pãn-komsem kɩt t’a tags t’a ka bark ye.—2 Kor. 10:10-12, 17, 18.

2. Wa 2 Korẽnt-rãmb 12:9, 10 sẽn wilgdã, bõe la a Poll bãng tɩ tar yõod wʋsgo?

² A Poll bãnga bũmb sẽn tar yõod wʋsgo. A bãngame tɩ ned tõe n talla pãnga, baa a sã n tagsdẽ t’a ka pãnga. (Karm-y 2 Korẽnt rãmb 12:9, 10.) A Zeova yeela a Poll tɩ yaa ‘pãn-komsem pʋgẽ la a paamd yẽ pãngã tɩ pidi,’ rat n yeel t’a kõta a Poll pãng ning sẽn paoog-a wã. Pipi, d ges bũmb ning sẽn kɩt tɩ d pa segd n sãam d sũyã, d bɛɛbã sã n wa tʋʋd tõndã.

3. Bõe yĩng tɩ d tõe n maan sũ-noog tʋy pʋsẽ?

³ Tõnd ned baa yembr pa rat tɩ b tʋ-a ye. La tõnd bɛɛbã sã n tʋ-do, tɩ d bas tɩ rẽ sãam d sũur tɩ loog nugu, tõe n komsa d raoodo. (Yel. 24:10)  D bɛɛbã sã n tʋʋd tõndo, d manesem segd n yɩɩ wãna? Wa a Polle, tõnd “maanda sũ-noog . . . tʋy pʋsẽ.” (2 Kor. 12:10) Bõe yĩnga? Bala nebã sã n tʋʋd tõnd la b namsd tõndo, wilgdame tɩ d yaa a Zeezi karen-biis hakɩɩka. (1 Pɩy. 4:14) A Zeezi yeelame tɩ b na n namsa a karen-biisã b tũudmã yĩnga. (Zã 15:18-20) Yɩɩ woto ne pipi kiris-nebã. Bãmb wakatẽ wã, neb nins sẽn da sakd Gɛrk-rãmbã minimdã ra getame tɩ kiris-nebã ka yam, la b ka bark me. La Zʋɩf-rãmbã ra geta kiris-nebã wa ‘neb sẽn pa paam zãmsg la nin-talse.’ (Tʋʋ. 4:13) Kiris-nebã ra wõnda neb sẽn ka pãnga. B ra pa kẽed politikã la sodaarã yɛlẽ ye. Dẽnd b ra pa tar pãng nanambsã zugu, b ra pa tõe n zab n kogl b mens me. Sẽn paase, nebã ra pa nand-b ye.

4. Pipi kiris-nebã manesem yɩɩ wãn ne b bɛɛbã sẽn da gomd b yell wẽngã?

⁴ Pipi kiris-nebã basame tɩ nebã sẽn gomd b yell wẽngã kɩt tɩ b koms raood n bas bɩ? Ayo. Wala makre, tʋm-tʋmd a Pɩyɛɛr ne a Zã gesame tɩ b sẽn nams bãmb b sẽn da tũud a Zeezi wã yĩngã yaa zu-zẽkre. (Tʋʋ. 4:18-21; 5:27-29, 40-42) Karen-biisã ra pa tar bʋʋm n na n zoe yãnd ye. Kaoosg zugẽ, pipi kiris-nebã sẽn da yaa sik-m-meng rãmbã maana modgr wʋsg n na n sõng neb a taabã, n yɩɩd b bɛɛbã. Wala makre, vʋʋsem sõngã vẽnega kiris-neb kẽer tɩ b gʋls sɛb sẽn ket n sõngd neb milyõ-rãmba, la kɩt tɩ b tẽed manegre. La Rĩungã b sẽn da moondã zoe n luglame, la ka la bilfu, a na n dɩɩ naam ãdem-biisã fãa zugu. (Mat. 24:14) La politik pãn-soaad-kãseng ning sẽn nams kiris-nebã yẽ menema hal yʋʋm wʋsg masã, tɩ kiris-neb nins b sẽn da namsã yaool n be saasẽ, n yaa rĩm-dãmb masã. B bɛɛbã yẽ kiime, la baa b sã n wa vʋʋg me, yaa Rĩung ning kiris-nebã bãmb sẽn dag n kisgã sẽn da moondã n na n dɩ naam b zugu.—Vẽn. 5:10.

5. Wa Zã 15:19 sẽn wilgdã, bõe yĩng tɩ dũniyã rãmb paoogd a Zeova nin-buiidã?

⁵ Rũndã-rũndã, tõnd sẽn yaa a Zeova nin-buiidã, nebã mi n paoogda tõnd la b yaand tõndo, n yetẽ tɩ d pa tar yam, la tɩ d ka pãng ye. Bõe yĩnga? Bala, d pa sakd n maand wa dũniyã neb ye. D modgdame n na n yɩ sik-m-mens rãmba, sũ-bʋgsem dãmb la sakdba. La dũniyã neb yẽ kilsda tɩta-rãmbã, wuk-m-mens rãmbã la tõatbã. Sẽn paase, tẽng baa a yembr pʋgẽ, d pa kẽesd d toog politikã yɛlẽ, d pa kẽed sodaarã me. D yaa toor zãng ne dũniyã nebã. Rẽ kɩtame tɩ b getẽ tɩ tõnd paa poorẽ.—Karm-y Zã 15:19; Rom. 12:2.

6. Bõe la a Zeova sõngd a nin-buiidã tɩ b tõogd n maandẽ?

⁶ Baa ne dũniyã nebã tagsg sẽn yaa a soab tõnd zugu, a Zeova tũnugda ne tõnd n maand bõn-kãsemse. A kɩtame tɩ b moond koɛɛgã zĩis fãa, hal t’a buud ra zɩ n zĩnd ye. Rũndã-rũndã, a Zeova nin-buiidã n lebgd sɛb n tɩ yɩɩda, n kõt nebã seb-kãense, la b sõngd neb milyõ-rãmb ne Biiblã maasem tɩ b vɩɩmã lebgd sõma n paasdẽ. Yaa a Zeova la d segd n pẽg bõn-kãensã fãa yĩnga. A tũnugda ne neb sẽn wõnd b ka pãnga, n tʋmd tʋʋm-kãsems a woto. La wãn to la a teend tõnd ned kam fãa? A Zeova tõe n sõnga tõnd tɩ d paam pãng bɩ? Sã n yaa woto, bõe la d tõe n maan n paam t’a sõng-do? Bɩ d ges bũmb a tãab d sẽn tõe n bãng tʋm-tʋmd a Poll mak-sõngã pʋgẽ.

7. Yam-bʋg la d tõe n dɩk a Poll mak-sõngã pʋgẽ?

⁷ Ad yam ning d sẽn tõe n dɩk a Poll mak-sõngã pʋgẽ: A Zeova tũubã pʋgẽ, d ra teeg d meng pãng bɩ d tõod ye. Ne ninsaal tagsgo, a Poll da tara bʋʋm n na n wuk a meng la a teeg a menga. B wub-a-la Tars sẽn da yaa Rom soolmã porvẽns a yembr na-tẽngã. Tars tẽngã ra tara arzɛgs wʋsgo. Inivɛrsite-kãseng n da be be, hal t’a yʋʋrã ra yi. A Poll ra karem n zãagame. A ra paamame t’a Gamaliyɛll sẽn yaa Zʋɩf-rãmbã tũudum taoor soab b sẽn da waoogd wʋsgã yɩ a karen-saamba. (Tʋʋ. 5:34; 22:3) Wakat n zĩnd t’a Poll da yaa nin-kãseng Zʋɩf-rãmbã sʋka. A yeelame: “Mam da paamda pãng wʋsg Zʋɩf-rãmbã tũudmã pʋgẽ n yɩɩd mam dog-taasã wʋsg sẽn yaa mam buudã nebã.” (Gal. 1:13, 14; Tʋʋ. 26:4) Baa ne rẽ, a Poll ra pa teeg a meng ye.

8. Wa Filip rãmb 3:8 wã sẽn yetã, wãn to la a Poll ra get bũmb nins a sẽn basã, la bõe yĩng t’a ra ‘maand sũ-noog pãn-komsem pʋgẽ’?

⁸ Yɩɩ ne sũ-noog la a Poll bas bũmb nins sẽn da kɩt t’a yaa nin-kãseng dũniyã rãmb nifẽ wã. Sɩd me, a ra wa n geta bõn-kãens sẽn wõnd yaa zu-zẽkr bũmbã wa “sagdo.” (Karm-y Filip rãmb 3:8.) A Poll sẽn lebg Kiristã karen-biigã, a paama zu-loees wʋsgo. A meng buudã neb ra kis-a lame. (Tʋʋ. 23:12-14) Baa ne a sẽn da yaa Rom tẽng-n-biigã, Rom nebã pãb-a lame la b ning-a bãens roogo. (Tʋʋ. 16:19-24, 37) Sẽn paase, a Poll ra miime t’a tara pãn-komsem, tɩ yɩl n maan sẽn yaa tɩrg ra yaa toogo. (Rom. 7:21-25) La a pa bas t’a bɛɛbã bɩ yẽ mengã pãn-komsem kɩt t’a bas Kiristã tũub ye. A ra pʋd n “maanda sũ-noog pãn-komsem pʋgẽ.” Bõe yĩnga? Bala yaa a sẽn wat n ka pãng sasa la a yãt Wẽnnaam pãngã a vɩɩmã pʋgẽ.—2 Kor. 4:7; 12:10.

9. Wãn to la d segd n ges bũmb nins sẽn kɩt tɩ wõnd d ka võorã?

⁹ D sã n dat n paam pãng ning a Zeova sẽn kõtã, d pa segd n tags tɩ yaa d yãoog pãng yĩnga, d sẽn karem n ta zĩig ninga, d buud wall d tarem yĩng la d tar yõod ye.  Pa bõn-kãensã n kɩtd tɩ d tar yõod a Zeova nifẽ ye. Sɩd me, Wẽnnaam nin-buiidã sʋka, pa wʋsg n “yaa neb sẽn yaa yam dãmb ninsaalbã nifẽ, neb sẽn tar pãnga, la neb sẽn dog ne naam” ye. A Zeova pʋd n tũusa “dũniyã bũmb nins nebã sẽn get wa yalemdã,” tɩ b na n waoog-a. (1 Kor. 1:26, 27) Woto wã, baa yãmb pa tar bũmb kẽer sẽn wõnd tara yõod wʋsgã, y tõe n kell n tũu a Zeova. Pʋd-y n ges-y rẽ wa segb y sẽn paam n na n yã a Zeova sẽn na n sõng-y ne a pãngã to-to. Wala makre, yãmb sã n zoeta neb nins sẽn dat tɩ y maan sãmb-sãmb ne bũmb nins y sẽn tẽedã, bɩ y pʋʋs a Zeova n kos-a t’a kõ-y raood tɩ y gom n wilg y sẽn tẽedã. (Efɛ. 6:19, 20) Y sã n bẽeda bã-kɛgeng hal tɩ pa nana, bɩ y kos a Zeova t’a kõ-y pãng tɩ y kell n tʋm a tʋʋmã wa y sẽn tõe tɛka. Wakat ning fãa y sẽn na n yã a Zeova sẽn sõng-y, y tẽebã pãng na n paasame.

10. Bõe yĩng tɩ d segd n bao n bãng wẽn-sakdb nins yell b sẽn gomd Biiblã pʋgẽ wã kibaya, wala makre, b rãmb nins yell b sẽn gomd Ebre-rãmb 11:32-34 pʋgẽ wã?

¹⁰ A Poll yɩɩ ned sẽn da zãmsd Gʋls-sõamyã neere. A bãnga bũmb wʋsgo, la a rɩk yam neb nins yell b sẽn gomd Biiblã pʋgẽ wã kibay pʋgẽ. Lɛtr ning a sẽn gʋls n tool kiris-neb nins sẽn da yaa Ebre-rãmbã pʋgẽ, a yeel-b lame tɩ b tags wẽn-sakdb ka tɛkã sẽn kõ mak-sõng ningã yell neere. (Karm-y Ebre-rãmb 11:32-34.) D rɩk makr ne rĩm a Davɩɩd bala. Pa a bɛɛbã bal n da zabd ne-a ye. Neb me sẽn da yaa a zo-rãmb n wa n yik n lebg a bɛɛba. D sã n tags a Davɩɩd kibarã yelle, d yãta pãng ning a Poll sẽn da tõe n paame, a sã n bʋgs a Davɩɩd kibarã zugu. D leb n yãta tõnd me sẽn tõe n dɩk a Poll togs-n-taar to-to.

11. Bõe yĩng t’a Davɩɩd ra wõnd ned sẽn ka pãnga? (Ges-y sebrã pipi neng fotã.)

¹¹ A Goliat sẽn da yaa sodaag sẽn yaa gãndaoogã ra geta a Davɩɩd wa ned sẽn ka pãnga. A sẽn yã a Davɩɩdã, a paoog-a lame. Sɩd me, a Goliat ra yaa bed-kẽeng n yɩɩd a Davɩɩde, n leb n da tar zab-teedo, la a mi zabr sõma n yɩɩd-a. A Davɩɩd yẽ ra yaa bi-bɩɩg sẽn pa tar minim zabr pʋgẽ, la a leb n da pa tar zab-teed woto ye. Ra wõnda a Davɩɩd ka pãnga, la a yaool n da tara pãnga. A teega a Zeova t’a kõ-a pãnga, hal t’a tõog a bɛ wã.—1 Sãm. 17:41-45, 50.

12. Zu-loe-bʋg me la a Davɩɩd ra segd n mao ne?

¹² A Davɩɩd ra segd n maoo ne zu-loɛɛg a to sẽn da tõe n kɩt t’a tags t’a ka pãng ye. A Davɩɩd ra sakda a Sayulli, soab ning a Zeova sẽn yãk t’a yaa Israyɛll rĩmã. Sɩngrẽ wã, rĩm a Sayull ra waoogda a Davɩɩde. La wuk-m-mengã wa n kɩtame t’a Sayull maand sũ-kiir ne a Davɩɩde. A Sayull namsa a Davɩɩd wʋsgo, hal n mak n na n kʋ-a.—1 Sãm. 18:6-9, 29; 19:9-11.

13. A Davɩɩd manesem yɩɩ wãn ne kɛgr ning rĩm a Sayull sẽn maan-a wã?

¹³ Baa ne kɛgr ning rĩm a Sayull sẽn maan a Davɩɩdã, a Davɩɩd ra ket n waoogd-a lame, bala a ra yaa rĩm ning a Zeova sẽn yãkã. (1 Sãm. 24:7) A pa ning a Zeova taale, bõn-wẽns nins a Sayull sẽn maanã yĩng ye. A pʋd n teega a Zeova, n kos-a pãng sẽn na yɩl n tõog toog yellã pʋgẽ.—Yɩɩn. 18:1, 2.

14. Zu-loe-bʋs la a Poll paam-yã, tɩ wõnd a Davɩɩd rẽndã?

¹⁴ A Poll sẽn paam zu-loees ninsã wõnda a Davɩɩd rẽndã. A Poll bɛɛbã pãng ra yɩɩd-a-la hal zĩig sẽn zãre. A wakatẽ nanambs wʋsg n da kis-a.  Naoor wʋsgo, nin-kãensã kɩtame tɩ b pãb a Polle, la b kẽes-a bãens roogo. Wa a Davɩɩde, neb sẽn da tog n yɩẽ a Poll zo-rãmb n wẽneg n nams-a ne wẽnem. Kẽer sẽn da be kiris-neb tigingã pʋgẽ meng n maan beem ne a Polle. (2 Kor. 12:11; Fili. 3:18) La a Poll tõoga neb nins fãa sẽn da zabd ne-a wã. Wãn to? Baa ne b sẽn bao n na n gɩdg-a wã, a Poll kell n wɩnga ne koe-moonegã. A kell n maana sɩd ne a tẽed-n-taasã, baa b sẽn da mi n sãam a sũurã. La sẽn yɩɩd fãa, a kell n maana sɩd ne Wẽnnaam hal n tãag a yõor tɛka. (2 Tɩm. 4:8) A tõog n yalsa kãn-kãe zu-loe-kãsems pʋgẽ, la pa ne a meng pãng ye. Yaa a sẽn da teeg a Zeova wã yĩnga.

15. D bõn-daabã yaa bõe, la wãn to la d tõe n pids rẽ?

¹⁵ Yaa tɩlɛ ne yãmb tɩ y tõog toogo, y karen-bi-taase, y tʋmd-n-taas bɩ y zakã neb sẽn pa a Zeova Kaset rãmb sẽn tʋʋd-y wall b sẽn namsd-y y tũudmã yĩng bɩ? Ned n zoe n maan-y kɛgr tigingã pʋgẽ bɩ? Sã n yaa woto, bɩ y tẽeg a Davɩɩd ne a Poll mak-sõngã yelle. Y tõeeme n “kell n maan sẽn yaa sõma n tõog wẽnga.” (Rom. 12:21) Yaa sɩd tɩ y bõn-daabã pa y lobg ned kugr tɩ võd n kẽe a rĩirẽ wã, wa a Davɩɩd sẽn maanã ye. Y sẽn datã yaa y tõog tɩ Wẽnnaam Gomdã kẽ nebã sũy sõma. Yaa y sã n tikd Biiblã sẽn yetã n leokd nebã sogsgo, la y waoogd sẽn maand-b yãmb wẽngã, la y maand nebã fãa neere, baa y bɛɛbã, la y na n tõog n maan woto.—Mat. 5:44; 1 Pɩy. 3:15-17.

16-17. Bõe la a Poll pa tol n yĩmi?

¹⁶ Nand t’a Poll lebg Kirist karen-biiga, a ra yaa bi-bɩɩg sẽn yaa tɩta-neda, la sẽn da namsd a Zeezi karen-biisã. (Tʋʋ. 7:58; 1 Tɩm. 1:13) Yaa a Zeezi mengã n gɩdg a Poll b sẽn da boond t’a Sollã, sẽn na yɩl t’a ra nams kiris-neb tigingã ye. A Zeezi zĩnda saasẽ n gom ne a Polle, la a lob-a zondo. Yɩɩ tɩlɛ t’a Poll bao neb nins a sẽn da namsdã sõngre,  n le paam t’a ninã puki. A sika a meng n sak tɩ karen-biig b sẽn boond t’a Ananias sõng-a t’a ninã puki.—Tʋʋ. 9:3-9, 17, 18.

¹⁷ Kaoosg zugẽ, a Poll yʋʋrã wa n yii kiris-neb tigingã sʋka, la a zɩ n yĩm bũmb ning a Zeezi sẽn sõng-a t’a bãng Damas sorã zugã ye. A Poll kell n yɩɩ sik-m-meng soaba, n da sakd a tẽed-n-taasã sõngre. A yeelame tɩ b ‘sõnga yẽ ne sõngr sẽn kengd raoodo.’—Kol. 4:10, 11, notã.

18. Bõe n tõe n wa kɩt tɩ d pa rat d taabã sõngre?

¹⁸ Yam-bʋg la d tõe n dɩk a Poll nengẽ? Tõnd sẽn wa n sɩng a Zeova tũubu, n naagd a nin-buiidã, tõe tɩ d ra sakda nana-nana tɩ b sõngd tõndo, bala d mikame tɩ d yaa wa kamb sɩdã wɛɛngẽ, n segd n bao n bãng bũmb wʋsgo. (1 Kor. 3:1, 2) La yaa wãn to masã? D sã n tũuda a Zeova sẽn na maan yʋʋm wʋsgo, n tar minim sõma, d tõeeme n wa pa le rat n sak tɩ ned sõng-do, sẽn tɩ yɩɩd fãa sã n yaa ned sẽn pa kaoos sɩdã pʋgẽ wa tõndo. La a Zeova nong n tũnugda ne d saam-biisã la d saam-bi-pogsã n kengd d raoodo. (Rom. 1:11, 12) Yaa tɩlɛ tɩ d sak rẽ, d sã n dat n paamd pãng ning a Zeova sẽn kõtã.

19. Bõe n sõng a Poll t’a tõog n maan bõn-kãsemse?

¹⁹ A Poll sẽn lebg kiris-nedã poore, a maana bõn-kãsems sẽn sek pẽgre. Bõe yĩnga? Bala, a bãngame tɩ pa ned yãoog pãnga, a sẽn karem n ta zĩig ninga, a tarem, wall a sẽn yaa buud ning ned yĩng la a na n tõog n maan bũmb ye. Yaa a soab sã n tall sik-m-menga, la a teeg a Zeova. Bɩ d fãa maan wa a Polle, 1) n teeg a Zeova, 2) n dɩk yam Biiblã kibay pʋsẽ, la 3) d sakd d tẽed-n-taasã sõngre. Rẽ, baa d sã n wa getẽ tɩ d ka pãng baa-baa, a Zeova na n kõ-d-la pãnga.