1. Bõe la a Davɩɩd yeel a Zeova sik-m-mengã wɛɛngẽ?

D TÕE n sɩd yeelame t’a Zeova yaa sik-m-meng soab bɩ? N-ye. Bala a Davɩɩd yeelame: “Yãmb kõo maam y fãagr gãongã. La yãmb sik-m-mengã zẽkda maam.” (2 Sãm. 22:36, MN; Yɩɩn. 18:35, MN) A Davɩɩd sẽn wa n gʋlsd yɩɩn-kãngã, tõe t’a ra tagsda no-rɛɛs a Sãmwɛll sẽn da wa a Davɩɩd ba wã zakẽ n na n zae ned a to t’a wa lebg Israyɛll rĩma. Kom-dibli a nii wã sʋka, a Davɩɩd n da yaa yao-zʋʋga. Yaool n yaa yẽ la a Zeova yãk t’a na n wa ledg a Sayulli.—1 Sãm. 16:1, 10-13.

2. Bõe yell la d na n gom sõs-kãngã pʋgẽ?

² Sãmbg kae t’a Davɩɩd ra na n sak n deegame, tɩ bũmb ning b sẽn yeel Yɩɩn-sõamyã 113 pʋgẽ a Zeova zugã yaa sɩda. Ad b sẽn yeelã: “Bãmb sulgd n geta saasẽ la dũniyã. Bãmb yiisda ka-pãng soab tomẽ, la b yiisda nimbãan-ned tãmpʋʋrẽ. Bãmb kɩtdame t’a zĩnd ne nin-kãsemse.” (Yɩɩn. 113:6-8) Sõs-kãngã pʋgẽ, d na n lebg n tẽega a Zeova sẽn wilg to-to yɛl kẽer pʋsẽ t’a yaa sik-m-meng soaba, la yam ning d sẽn tõe n dɩk rẽ pʋgẽ. Rẽ poore, d na n goma rĩm a Sayulli, no-rɛɛs a Dãniyɛll la a Zeezi yelle, n ges sik-m-mengã wɛɛngẽ, yam-bʋg la d tõe n dɩk b ned kam fãa kibar pʋgẽ.

3. Manesem-bʋg la a Zeova tar ne tõndo, la bõe la rẽ wilgda?

³ A Zeova sẽn tar manesem ning ne ninsaalbã sẽn pa zems zãngã wilgdame t’a sɩd yaa sik-m-meng soaba. A pa sak tɩ d tũud-a bal ye. A sakame tɩ d yaa a zo-rãmb me.  (Yɩɩn. 25:14) A Zeova kɩtame t’a Bi-riblã wa ki tɩ yɩ maoong d yel-wẽnã yĩnga, tɩ d tõe n paam a zoodo. Ad sɩd yaa nimbãan-zoeer tɛkẽ!

4. Bõe la a Zeova maan n kõ-do, la yaa bõe yĩnga?

⁴ D ges bũmb a to a Zeova sẽn maane, tɩ wilgd a sik-m-mengã. A sẽn yaa d Naandã, a ra tõe n naan-d lame tɩ d pa tõe n yãk yam n vɩɩmd wa d sẽn dat ye. La a pa maan woto ye. A naan-d-la a meng wõnego, la a naan-d tɩ d tõe n yãk d toorẽ yam. Baa ne d sẽn pa zem bũmbã, a Zeova ratame tɩ d yãk yam n tũ-a ne d sũur fãa d sẽn nong-a wã yĩnga, la d sẽn mi me tɩ d sã n sak-a na n naf-d lame wã. (Tõo. 10:12; Eza. 48:17, 18) Ad d sũur segd n sɩd yɩɩ noog ne a Zeova, a sẽn yaa sik-m-meng soab woto wã!

5. Wãn to la a Zeova zãmsd tõnd sik-m-menga? (Ges-y sebrã pipi neng fotã.)

⁵ A Zeova zãmsda tõnd sik-m-menga, ne manesem ning a sẽn tar ne tõndã maasem. A Zeova yamã ka to ye. Baa ne rẽ, a mi n kelga neb a taab tagsgo. Wala makre, a sakame t’a Bi-riblã sõng-a bũmbã fãa naaneg pʋgẽ. (Yel. 8:27-30; Kol. 1:15, 16) Baa ne a Zeova pãngã sẽn ka to wã, a kõta neb a taab zu-sobendo. Wala makre, a yãka a Zeezi t’a yaa a Rĩungã Rĩmã, la a yãk neb 144 000 tɩ b na n yɩ a na-rɩt-n-taase. (Luk 12:32) D miime t’a Zeova sõnga a Zeezi t’a paam minim n na n yɩ Rĩm la maan-kʋʋdb kãsma. (Ebre. 5:8, 9) A sõngda a Zeezi na-rɩt-n-taasã me tɩ b paamd minim n tõe wa rɩ naamã, la a pa pʋgd n get b sẽn tʋmd to-to baa yel-bõonegã pʋgẽ ye. A pʋd n basa a yam tɩ b na n maana a raabã.—Vẽn. 5:10.

6-7. Yãk tʋʋmd n kõ nedã wɛɛngẽ, yam-bʋg la d tõe n dɩk d saasẽ Ba wã nengẽ?

⁶ Baa ne d saasẽ Ba wã sẽn pa baood ned  sõngrã, a kõta neb a taab zu-sobendo. Rẽ yĩnga, tõnd pa segd n maan woto n yɩɩd sɩda? Yãmb sã n yaa zak soaba, wall kãsem-soab tigingã pʋgẽ, tũ-y-yã a Zeova mak-sõngã, n yãkd y tʋʋm kẽer n kõt neb a taaba, la y ra pʋgd n pẽdsd n get b sẽn na n tʋm to-to ye. Y sã n dɩk a Zeova togs-n-taare, tʋʋmdã na n tʋmame. La pa rẽ bal ye. Y na n paam n sõnga y taabã tɩ b paam minim, la b kɩs b mens sɩda. (Eza. 41:10) Yam-bʋg me la sẽn tar-b zu-sobendã tõe n dɩk a Zeova nengẽ?

⁷ Biiblã yetame tɩ malɛgsã sã n wa togsd b tagsgo, a Zeova kelgda neere. (1 Rĩm. 22:19-22) Roagdba, wãn to la y tõe n dɩk a Zeova togs-n-taare? Sã n zemsame fãa, bɩ y mi n sok y kambã n ges tʋʋmd ning wɛɛngẽ, wãn to la b na n tʋme, tɩ sã n mik tɩ zemsame bɩ y tũ b sẽn na n yeelã.

8. Wãn to la a Zeova tall sũ-mar ne a Abrahaam la a Saara?

⁸ Bũmb a to me sẽn wilgd t’a Zeova yaa sik-m-meng soab yaa a sũ-marã. Wala makre, ned sẽn tũud a Zeova sã n baood ne waoogr n na n bãng a yam-yãkr ning võore, a maanda sũ-mar ne a soaba. A Zeova sẽn wa n yãk yam n na n sãam Sodom ne Gomoorã, t’a Abrahaam togs a tagsg rẽ wɛɛngẽ wã, a maaga a yĩng n kelg-a. (Sɩng. 18:22-33) Tẽeg-y-yã a Zeova manesem sẽn yɩ to-to me ne a Abrahaam pagã a Saara. A Saara laame, a Zeova sẽn pʋlem t’a na n dɩka pʋg baa ne a yʋʋmã sẽn vẽsgã. La a Zeova pa yik a sũur ne-a ye. (Sɩng. 18:10-14) A pʋd n waooga a Saara menga.

9. Yam-bʋg la roagdbã la kasem-dãmbã tõe n dɩk a Zeova mak-sõngã pʋgẽ?

⁹ Yam-bʋg la roagdbã la kasem-dãmbã tõe n dɩk a Zeova mak-sõngã pʋgẽ? Y sẽn get neb nins yellã sã n wa rat n bãng yɛl kẽer võore, y manesem yaa wãna? Y yɩta tao-tao n na n bao n wilg tɩ y yam-yãkrã yaa sõma bɩ? Bɩ y baoodame n na n wʋm b tagsgã võore? Sãmbg kae tɩ zak-soben-dãmbã la kãsem-dãmbã sã n dɩkd a Zeova togs-n-taare, nafda zagsã rãmb la tigingã nebã. D goma d sẽn tõe n dɩk yam ning a Zeova nengẽ, sik-m-mengã wɛɛngẽ. Masã, bɩ d gom neb kibay sẽn be Biiblã pʋgẽ yelle, n ges yam ning d sẽn tõe n dɩke.

10. Wãn to la a Zeova tũnugd ne neb vɩɩm kibay n zãmsd tõndo?

¹⁰ A Zeova sẽn yaa d Karen-saamb sẽn ka to wã, a kɩtame tɩ b gʋls neb kibay a Gomdã pʋgẽ n na n zãms-do. (Eza. 30:20, 21) D sã n bʋgsd Biiblã kibay nins sẽn gomd neb sẽn tall zʋg-sõma wala sik-m-mengã yelle, d rɩkda yam. D sã n leb n bʋgs bũmb ning sẽn paam neb nins sẽn pa tall zʋg-sõma a woto wã zug me, d rɩkda yam.—Yɩɩn. 37:37; 1 Kor. 10:11.

11. Yam-bʋg la d tõe n dɩk a Sayull manesem-wẽngã pʋgẽ?

¹¹ Tags-y n ges-y bũmb ning sẽn paam rĩm a Sayullã. Sɩngrẽ wã, a ra yaa bi-bɩɩg sẽn yaa sik-m-meng soaba. A ra pa get t’a sãoo a taabã, a ra pa tẽed t’a zemsa ne naam me ye. (1 Sãm. 9:21; 10:20-22) La tarẽ-n-tarẽ, a wa n lebga wuk-m-meng soaba. A zʋg-wẽngã puka a sẽn lebg rĩmã poor bilfu. Daar a ye, a gũu a Sãmwɛll n wa getẽ t’a kaoosdame. A pa tall sũ-mar ye. A pa sik a meng n gũ t’a Zeova wa maan bũmb n sõng a nin-buiidã ye. A maana maoong sẽn yõogd bugum, n yaool n da pa tar sor n na n maan rẽ ye. Woto kɩtame t’a Zeova sũur pa le noom ne-a, t’a reeg naamã n bas-a. (1 Sãm. 13:8-14) D sã  n dɩk yam kiba-kãngã pʋgẽ, n gũusd n da wa maan bũmb d sẽn pa tar sor n na n maane, wilgdame tɩ d yaa yam soaba.

12. Wãn to la a Dãniyɛll wilg t’a yaa sik-m-meng soaba?

¹² No-rɛɛs a Dãniyɛll yẽ pa maan wa a Sayull ye. A kõo mak-sõngo. A vɩɩmã tõre, a kell n yɩɩ sik-m-meng soaba, la a ra baood wakat fãa t’a Zeova wilg-a sore. A Zeova sẽn wa n tũnug ne a Dãniyɛll n vẽneg a Nebukadnezaar a zãmsdã võorã, a pa wẽ a yãoog n yeel tɩ yaa ne a meng tõog ye. A pʋd n sika a meng n wilg tɩ yaa a Zeova n vẽneg-a t’a bãnge, la tɩ yaa yẽ n tog ne pẽgrã. (Dãn. 2:26-28) Woto wilgda tõnd bõe? D tẽed-n-taas sã n nong n pẽgd tõnd d sẽn wɛgsd sõssã to-to wã yĩnga, wall d sã n paamdame tɩ d koe-moonegã womd biisi, d segd n tẽegame tɩ yaa a Zeova la d tog n pẽg rẽ yĩnga. D segd n sika d meng n sak n deeg tɩ sã n pa ne a Zeova sõngre, d pa tõe n maan bõn-kãens ye. (Fili. 4:13) D sã n maand woto, d rɩkda a Zeezi togs-n-taare. Bõe yĩng tɩ d yet woto?

13. A Zeezi sẽn yeel bũmb ning Zã 5:19, 30 wã wilgda tõnd bõe sik-m-mengã wɛɛngẽ?

¹³ Baa ne a Zeezi sẽn da yaa Wẽnnaam Bi-ribl sẽn zems zãngã, a kell n teega a Zeova. (Karm-y Zã 5:19, 30.) A zɩ n bao n na n deeg naam a Ba wã nengẽ ne pãng ye. Filip rãmb 2:6 yeelame t’a Zeezi “pa bao n na n deeg Wẽnnaam zĩiga, n yetẽ tɩ b zema Wẽnnaam ye.” A Zeezi sẽn yaa sakdã, a ra miime tɩ pa bũmb fãa la a tar sor n na n maane, a leb n da sakda a Ba wã naamã.

14. B sẽn wa n kos a Zeezi t’a maan bũmb sẽn zʋʋg a Zeova sẽn kõ-a sor t’a maanã, a leokame tɩ bõe?

¹⁴ Tẽeg-y a Zeezi manesem sẽn yɩ to-to, a Zak ne a Zã la b ma wã sẽn kos-a t’a maan bũmb a sẽn pa tar sor n maanã. A yeela vẽeneg tɩ yaa Ba wã sẽn be saasẽ wã bal n tõe n yãk neb nins sẽn na n zĩnd yẽ rɩtg bɩ a goabga, Rĩungã pʋgẽ. (Mat. 20:20-23) A Zeezi wilgame t’a miime t’a pa tar sor n maan bũmb fãa ye. A yɩɩ sik-m-meng soaba. A zɩ n maan bũmb tɩ zʋʋg a Zeova sẽn kõ-a sor t’a maanã ye. (Zã 12:49) Wãn to la d tõe n dɩk a Zeezi togs-n-taare?

15-16. Wãn to la d tõe n tũ Biiblã saglg ning sẽn be 1 Korẽnt rãmb 4:6 pʋgẽ wã?

 ¹⁵ D sã n tũ Biiblã saglg ning sẽn be 1 Korẽnt rãmb 4:6 pʋgẽ wã, d wilgdame tɩ d rɩkda a Zeezi togs-n-taare. B yeta be tɩ d ‘ra maan tɩ zʋʋg bũmb nins sẽn gʋlsã’ ye. Ned sã n wa kos tõnd saglga, d pa segd n yɩ tao-tao n togs d meng tagsgo, bɩ sẽn wa d yamẽ bal ye. D segd n wilga sẽn be Biiblã la siglgã sɛbã pʋsẽ wã. Woto, d wilgdame tɩ d sakame tɩ pa fãa la d mi ye. D sã n maand woto, wilgdame tɩ d yaa sik-m-meng soaba, la tɩ d sak n deegame t’a Zeova noyã la a saglsã la sõma n yɩɩda.—Vẽn. 15:3, 4.

¹⁶ D sẽn dat n waoog a Zeova wã sẽn yãk a toogo, bũmb a taab me n kɩt tɩ d segd n bɩɩs sik-m-menga. Bɩ d ges sik-m-mengã sẽn tõe n sõng tõnd to-to tɩ d paam sũ-noogo, la sõng tɩ tõnd ne d taabã zems-n-taarã paase.

17. Bõe yĩng tɩ sik-m-mens rãmbã tar sũ-noogo?

¹⁷ D sã n yaa sik-m-meng soaba, la d sakd n deegdẽ tɩ pa fãa la d tõe n maane, paasda d sũ-noogã. Wãn to? D sã n sak tɩ pa bũmb fãa la d tõe n maane, d sũur na n yɩɩ noog ne d sẽn paamd d taabã sõngrã. Wala makre, tẽeg-y a Zeezi sẽn wa n sãoog wãoob piigã. A yembr bal n lebg n wa pʋʋs a Zeezi bark a sẽn kɩt t’a bã-wẽngã sa wã. Yaa bũmb yẽ mengã sẽn da pa tol n tõe n maan a toor ye. Ra-kãngã sẽn yaa sik-m-meng soabã wilgame t’a sũur nooma ne a sẽn paam tɩ b sõng-a wã, tɩ kɩt t’a pẽg Wẽnnaam.—Luk 17:11-19.

18. Wãn to la sik-m-mengã sõngd tɩ tõnd ne d taabã moor noomẽ? (Rom dãmb 12:10)

¹⁸ Naoor wʋsgo, sik-m-mens rãmbã ne neb a taabã moor noomame, la b wae n tar  zood sẽn tar pãng me. Bõe yĩnga? B sak n deegame tɩ neb a taabã tara zʋg-sõma, la b kɩs-b sɩda. Sik-m-meng soab wilgda a sũ-noogo, a to sã n tõog n tʋm tʋʋmd b sẽn kõ-a. A na n yɩɩ tao-tao me n pẽg-a la a waoog-a.—Karm-y Rom dãmb 12:10.

19. Bõe yĩng tɩ d segd n zãag d meng ne wuk-m-menga?

¹⁹ La yaa toog ne wuk-m-mens rãmbã tɩ b pẽg b taabã. B getame tɩ yaa bãmb mengã n tog ne pẽgre. B nong n makda b mens ne neb a taabã, la b baood n wags ne-ba. B pa baood n na n sõng neb a taabã tɩ b paam minim la b kõ-b taoor-sobend ye. B nong n yetame yaa: “F sã n dat tɩ tʋʋmd yɩ wa f sẽn date, rẽnda f tʋm f toore.” Wuk-m-meng soab nong n yaa mag-bɛd soaba, la sũ-ki-neda. (Gal. 5:26) Ned a woto pa wae n paamd zo-rãmb tɩ kaoos ye. D sã n wa mik tɩ wuk-m-meng n be d sũurẽ wã, baa yaa bilfu, bɩ d yɩ tao-tao n pʋʋs a Zeova n kos t’a ‘maneg d yamã tɩ kɩt tɩ d toeeme,’ tɩ zʋg-wẽn-kãngã ra wa paam pãng d sũurã pʋgẽ ye.—Rom. 12:2.

20. Bõe yĩng tɩ d segd n yɩ sik-m-mens rãmba?

²⁰ Ad d sũy sɩd nooma wʋsg ne a Zeova, a sẽn kõt-d mak-sõngã! D neeme t’a sẽn tar manesem ning ne a nin-buiidã wilgda a sik-m-mengã, tɩ d rat n maan wa yẽ. D ratame me n tũ neb nins sẽn tũ a Zeova ne sik-m-mengã, tɩ Biiblã gomd b yellã mak-sõngo. Bɩ d ket n pẽgd a Zeova la d waoogd-a, bala a segda ne ziiri. (Vẽn. 4:11) Woto, tõnd me tõogd n kell n kẽna ne d Ba sẽn be saasẽ wã, bala a nonga sik-m-mens rãmbã.