1. Bõe la tõnd tar tɩ yaa zu-zẽkr tɛkẽ?

D SẼN paam n be a Zeova tigingã pʋgẽ wã yaa zu-zẽkr tɛkẽ! Tõnd tara sũ-noog la bãan meng-menga, d sẽn naag d tẽed-n-taasã n tũud a Zeova a tigingã pʋgẽ wã. Yãmb tʋʋmd yaa bõe tigingã pʋgẽ?

2. Wẽnnaam sẽn vẽneg tʋm-tʋmd a Poll t’a gʋls sɛb ninsã wʋsg pʋgẽ, mak-bʋg la a Poll rɩk-yã?

² Wẽnnaam sẽn vẽneg tʋm-tʋmd a Poll t’a gʋls sɛb ninsã wʋsg pʋgẽ, a Poll rɩka makr sẽn tõe n sõng tõnd tɩ d bãng tʋʋmd ning d sẽn tar tigingã pʋgẽ wã. Lɛt-kãens fãa pʋsẽ, a Poll rɩka tigingã n mak ne ninsaal yĩngã. A leb n maka tigingã nebã ne ninsaal yĩngã wila.—Rom. 12:4-8; 1 Kor. 12:12-27; Efɛ. 4:16.

3. Bõe yell la d na n gom sõs-kãngã pʋgẽ?

³ Sõs-kãngã pʋgẽ, d na n yãa bũmb a tãab a Poll makrã sẽn zãmsd tõndo, tɩ tar yõod wʋsgo. Pipi, d na n yãame tɩ tõnd ned kam fãa tara a zĩig * a Zeova tigingã pʋgẽ. Yiibu, d na n yãa d sẽn tõe n maane, d sã n wa tagsdẽ tɩ d pa tar d zĩig tigingã pʋgẽ ye. Tãabo, d na n goma bũmb ning sẽn kɩt tɩ d segd n ket n wɩngd ne tʋʋmd ning d sẽn tar tigingã pʋgẽ wã yelle.

4. Rom dãmb 12:4, 5 wã sõngda tõnd tɩ d bãng bõe?

⁴ Pipi bũmb a Poll makrã sẽn sõngd tõnd tɩ d bãnge, yaa tɩ tõnd ned kam fãa tara yõod a Zeova nin-buiidã sẽn yaa wa zak a ye nebã sʋka. A Poll sɩnga a makrã, n yeele: “Yaa wa yĩngã sẽn tar wil wʋsgo, tɩ wilã fãa tʋʋm yaa toor-toorã. Woto me, baa tõnd sẽn yaa wʋsgã d yaa yĩng a yembr Kirist pʋgẽ, la tõnd ned kam fãa yaa a to willi.” (Rom. 12:4, 5) A Poll da rat n yeelame tɩ bõe? Ned fãa tʋʋmd yaa toor tigingã pʋgẽ, la ned kam fãa tara yõodo.

5. Yaa bõe “kũun” la a Zeova kõ tigingã?

⁵ B sã n gomd neb nins sẽn tar tʋʋmd tigingã pʋgẽ wã yelle, tõe tɩ y yɩ tao-tao n tags neb nins sẽn lʋɩt taoor tigingã pʋgẽ wã yelle. (1 Tes. 5:12; Ebre. 13:17) Yaa sɩd tɩ ne Kiristã maasem, a Zeova kõo a tigingã “kũun sẽn yaa rapa.” (Efɛ. 4:8) “Kũun sẽn yaa rapã” sʋka, d tõe n sõdga siglgã taoor lʋɩtb sull nebã, siglgã taoor lʋɩtb sullã sõngdbã, filiyall-dãmbã taoor lʋɩtb sull nebã, tigims sull yel-gɛtbã, siglgã lekoll karen-saam-dãmbã, tigingã kãsem-dãmbã, la kãsemb-sõngdbã. Yaa ne vʋʋsem sõngã maasem la b yãk saam-bi-kãensã fãa tɩ b get a Zeova piisã sẽn tar yõod wʋsg a nifẽ wã yelle, la b kengd tigingã neb tẽebo.—1 Pɩy. 5:2, 3.

6. Sẽn zems ne 1 Tesalonik rãmb 2:6-8, bõe la saam-biis nins b sẽn yãk ne vʋʋsem sõngã maasmã modgd n maandẽ?

⁶ Yaa ne vʋʋsem sõngã maasem la b yãkd saam-biisã tɩ b tʋmd tʋʋm toor-toor siglgã pʋgẽ. Yĩngã wil toor-toor wala nusã la naoã tʋmdame tɩ nafd yĩngã tõre. Woto me, saam-biis nins b sẽn yãk ne vʋʋsem sõngã maasmã tʋmda wʋsg tɩ nafd tigingã gilli. B pa baood ziir ye. B pʋd modgdame n kengd b saam-biisã raood la b tẽebo. (Karm-y 1 Tesalonik rãmb 2:6-8.) D pʋʋsda a Zeova barka, nin-kãensã sẽn lʋɩɩsd b taabã raab taoor la b tar minimã yĩnga!

7. Bark-bʋs la so-pakdb wʋsg paamda?

⁷ B tõe n yãka kẽer tɩ b yaa misioneer dãmba, zall so-pakdb bɩ wakat fãa so-pakdb tigingã pʋgẽ. Sɩda, dũniyã gill zugu, saam-biis ne saam-bi-pogs n dɩk b sẽkã fãa n moond koɛɛgã. Ne rẽ maasem, b sõnga neb wʋsg tɩ b lebg a Zeezi Kirist karen-biisi. Baa ne nin-kãensã sẽn yaa so-pakdb sẽn pa tar arzɛgsã, a Zeova ning-b-la bark wʋsg b vɩɩmã pʋgẽ. (Mark 10:29, 30) D nonga saam-bi-kãensã wʋsgo, tɩ d sũy me yaa noog b sẽn be tigingã pʋgẽ wã!

8. Bõe yĩng tɩ koe-moond fãa tar yõod wʋsg a Zeova nifẽ?

⁸ Yaa saam-biis nins b sẽn yãk n bobl tʋʋma, la so-pakdbã bal n tar b zĩig tigingã pʋgẽ bɩ? Ayo! Koe-moond fãa tara yõod Wẽnnaam nifẽ, la tigingã pʋgẽ. (Rom. 10:15; 1 Kor. 3:6-9) Sɩd me, tigingã bõn-daab me yaa a sõng nebã tɩ b lebg tõnd Zusoab a Zeezi karen-biisi. (Mat. 28:19, 20; 1 Tɩm. 2:4) Tigingã nebã fãa, rat n yeel tɩ sẽn deeg-b lisg la koe-moondb nins sẽn nan pa reeg lisgã modgdame n lʋɩɩsd tʋʋm-kãngã taoor b vɩɩmã pʋgẽ.—Mat. 24:14.

9. Bõe yĩng tɩ d nand d saam-bi-pogsã wʋsgo?

⁹ A Zeova waoogda saam-bi-pogsã n kõt-b tʋʋm sẽn tar yõod tigingã pʋgẽ. A getame tɩ pagb nins fãa sẽn  sakd-a wã tara yõod wʋsg a nifẽ. Yaa ma-rãmbã, pʋg-kõapã la saam-bi-pogs nins sẽn pa kẽ kãadmã. Gʋls-sõamyã gomda pagb wʋsg yʋy sẽn yi yelle. Yɩɩ pagb sẽn ta Wẽnnaam yam. B pẽg-b-la b mak-sõngã yĩnga. Bala b talla yam, yẽesem, raoodo, n yɩ kõatb la b tʋm tʋʋm-sõma. (Luk 8:2, 3; Tʋʋ. 16:14, 15; Rom. 16:3, 6; Fili. 4:3; Ebre. 11:11, 31, 35) D sɩd pʋʋsda a Zeova barka, a sẽn kõ-d saam-bi-pogs sẽn tar pʋg-kãensã zʋg-sõma wã buudã!

10. Bõe yĩng tɩ d sũy noom ne sẽn kʋʋl-b n be tõnd sʋkã?

¹⁰ D sũy leb n yaa noog d sẽn tar neb wʋsg sẽn kʋʋl d tigimsã pʋsẽ wã. Tigims kẽer tara pagb la rap sẽn kʋʋle, sẽn tʋmd a Zeova tʋʋmdã ne b sũy fãa, hal sẽn kaoose. Tõe tɩ kẽer sẽn lebg a Zeova Kaset rãmb nan pa kaoos ye. Sẽn yaa to-to fãa, tõe tɩ sẽn kʋʋl-bã maooda ne bãas toor-toore, b yʋʋmã sẽn vẽsgã yĩnga. Rẽ tõe n kɩtame tɩ b pa le tõe n moon koɛɛgã la b tʋm tigingã tʋʋm wʋsg ye. La nin-kãensã yʋʋmã sẽn vẽsgã maanda b sẽn tõe tɛk koɛɛgã mooneg pʋgẽ, la b maand b pãng sẽn tõe n kengd b taabã raoodo! Sẽn paase, d rɩta b minimã nafa. B sɩd bee rasãnd a Zeova nifẽ, la tõnd me nifẽ.—Yel. 16:31.

11-12. Bõe la yãmb tigingã kom-bɩɩs maand tɩ noom yãmba?

¹¹ Tags-y kom-bɩɩsã sẽn be tõnd sʋkã me yelle. B segda zu-loees wʋsg b bi-bɩɩlmã sasa dũni kãngã pʋgẽ, bala yaa a Sʋɩtãan n so dũniyã la a tudgd nebã ne a tags-wẽnsã. (1 Zã 5:19) Baasgo, d fãa sũy yaa noogo, d sã n ne kom-bɩɩsã sẽn kõt leoor tigissã sasa, n naagd n moond koɛɛgã, la b gomd n teend b tẽebã ne raoodã. Sɩd-sɩdã, yãmb a kom-bɩɩsã tara y zĩig a Zeova tigingã pʋgẽ!—Yɩɩn. 8:3.

¹² La yaa toog wʋsg ne d tẽed-n-taas kẽer tɩ b ges tɩ b tara yõod tigingã pʋgẽ.  Bõe n tõe n sõng d ned kam fãa t’a neẽ t’a tara yõod tigingã pʋgẽ? Bɩ d gese.

13-14. Bõe n tõe n kɩt tɩ neb kẽer wa tagsdẽ tɩ b pa tar yõod tigingã pʋgẽ?

¹³ Ges-y bũmb a yiib-n-soab d sẽn tõe n bãng a Poll makrã pʋgẽ. A togsa zu-loɛɛg sẽn be ne neb wʋsg rũndã-rũndã: Yaa toog ne-b tɩ b tẽ tɩ b tara yõod tigingã pʋgẽ. A Poll yeelame: “Naoor sã n yeele: ‘Mam sẽn pa nugã yĩnga, mam pa naag yĩngã,’ rẽ pa kɩtd t’a pa naag yĩngã ye. La tʋbr sã n yeele: ‘Mam sẽn pa nifã yĩnga, mam pa naag yĩngã,’ rẽ pa kɩtd t’a pa naag yĩngã ye.” (1 Kor. 12:15, 16) Yaa bõe la a Poll da rat tɩ d bãnge?

¹⁴ Yãmb sã n mak y meng ne tigingã neb a taabã, y tõeeme n pa le neẽ tɩ y tara yõod ye. Tigingã neb kẽer tõe n tara minim nebã zãmsg wɛɛngẽ, tɩ sãnda mi bũmb siglg sõma, bɩ b yaa pe-kɩɩmb sẽn mi neb belsgo. Tõe tɩ y tagsdame tɩ y pa maand sõma wa nin-kãensã ye. Rẽ wilgdame tɩ y yaa sik-m-meng soaba. (Fili. 2:3) La yaa y maan gũusgu. Yãmb sã n nong n makd y meng ne neb nins sẽn tar minim wʋsgã, na n komsa y raoodo. Y pʋd n tõe n wa tagsda wa a Poll sẽn yeelã, tɩ y pa tol n tar y zĩig tigingã pʋgẽ ye. Bõe n tõe n sõng-y tɩ y ra wa tags woto?

15. Wa 1 Korẽnt rãmb 12:4-11 sẽn yetã, bõe la d segd n sak n deeg minim nins d sẽn tarã wɛɛngẽ?

¹⁵ Tẽeg-y t’a Zeova ra kõo pipi kiris-neb kẽer tõog tɩ b tõe n maan yel-soalem ne vʋʋsem sõngã maasem, la pa kiris-nebã fãa n paam tõ-kãng ye. (Karm-y 1 Korẽnt rãmb 12:4-11.) A Zeova kõ-b-la kũun la minim toor-toore. La b ned kam fãa ra tara yõod a nifẽ. Rũndã-rũndã, tõnd pa tar tõog n tõe n maan yel-soalem ne vʋʋsem sõngã maasem ye. La yɛlã pa toeem ye. Baa d minimã sã n yaa toor-toore, d fãa tara yõod a Zeova nifẽ.

16. Tʋm-tʋmd a Poll sagl-bʋg la d segd n tũ?

 ¹⁶ D pa segd n mak d meng ne d tẽed-n-taasã ye. D segd n tũu saglg ning vʋʋsem sõngã sẽn vẽneg tʋm-tʋmd a Poll t’a togsã. A yeelame: “Bɩ ned kam fãa mak a meng tʋʋm n gese, tɩ rẽ la a na n paam bũmb a sẽn tõe n tik n maan sũ-noog a meng yĩng bala, la pa a sẽn na n mak a meng ne ned a to ye.”—Gal. 6:4.

17. Wãn to la a Poll saglgã tũub na n naf tõndo?

¹⁷ Tõnd sã n tũ a Poll saglgã vʋʋsem sõngã sẽn vẽneg-a t’a gʋlsã, la d fees d mengã tʋʋmã, d wat n bãngame tɩ d tara minim neb a taab sẽn pa tare. Wala makre, kãsem-soab tõeeme n pa tar minim n na n wɛgs sõsg sõma tigingã neb taoore, n yaool n tõe n sõng nebã sõma tɩ b lebg Kiristã karen-biisi. Bɩ tõe t’a pa ned sẽn mi bũmb siglg sõma wa tigingã kãsem-dãmb a taabã, tɩ tigingã koe-moondb yaool n miẽ t’a yaa kãsem-soab sẽn nong neba, tɩ b tõe n pẽneg-a n kos sagls sẽn yit Biiblã pʋgẽ n pa yɛɛs ye. Bɩ tõe tɩ yaa vẽeneg t’a yaa ned sẽn nong n deegd neb sãando. (Ebre. 13:2, 16) Tõnd sã n bãng tɩ d tara minim takɩ, d sũur na n nooma ne d sẽn tõe n maan bũmb ning n sõng tigingã. D pa na n wa rat me n maan sũ-kiir ne d saam-biis nins sẽn tar minim sẽn yaa toor ne tõnd rẽndã ye.

18. Wãn to la d tõe n paas d minimã?

¹⁸ Baa tõnd tʋʋmd sẽn yaa a soab tigingã pʋgẽ, d fãa segd n tʋll n tʋma d tʋʋmdã sõma n paase, la d paas d minimã. Rẽ n so t’a Zeova tũnugd ne a siglgã n zãmsd tõndo. Wala makre, kiris-nebã vɩɩm la b tʋʋmã tigissã sasa, d paamda zãmsg sẽn sõngd-d tɩ d tõe n moon koɛɛgã sõma n paase. Yãmb modgdame n tũud sagls nins d sẽn paamdã bɩ?

19. Wãn to la y tõe n maan n wa tõog n kẽng Rĩungã koe-moondb lekollã?

¹⁹ Zãmsg a to d sẽn paamd tɩ tar yõod wʋsg yaa ne Rĩungã koe-moondb lekollã maasem. Yaa pagb la rap nins sẽn kẽes b mens zãng a Zeova tʋʋmdã pʋgẽ, tɩ b yʋʋmã zems 23 n tɩ ta 65 wã n tõe n kẽnge. Tõe n wõnda yãmb yẽ pa tol n tõe n kẽng lekoll kãng ye. La ra tagsd-y bũmb nins sẽn kɩt tɩ y pa tõe n kẽngã yell ye. Gʋls-y bũmb nins sẽn kɩt tɩ y rat n kẽngã. Rẽ poor bɩ y maan bũmb nins sẽn na n sõng-y tɩ y wa tõog n kẽngã. Ne a Zeova sõngr la y modgre, y na n tõog n maana y sẽn da tagsd tɩ y pa tõe wã.

20. Rom dãmb 12:6-8 wã sõngda tõnd tɩ d bãng bõe?

²⁰ Bũmb a tãab-n-soab a Poll makrã sẽn sõngd tõnd tɩ d bãngã bee Rom dãmb 12:6-8. (Karm-y.) Beenẽ me, a Poll wilgame tɩ tigingã nebã tara kũun toor-toore. La masã, a wilga vẽeneg tɩ d segd n tũnuga ne kũun ning fãa d sẽn tare, n paas tigingã neb tẽebo.

21-22. Bõe la a Robɛɛr ne a Feligs kibarã wilgd tõndo?

²¹ Ges-y saam-biig a ye kibare. A yʋʋr la a Robɛɛre. * B tʋm-a lame t’a tɩ moon koɛɛgã tẽn-zẽnga. Rẽ poore, b bool-a lame t’a wa tʋm Betɛllẽ wã, a ba-yirã. Baa ne b sẽn togs-a tɩ b sẽn kɩt t’a toeem zĩigã pa pãn-komsem a sẽn tar yĩngã, a yeelame: “Mam sũurã sãama wʋsg ne m  mengã n kaoos kiisi. M da tagsdame tɩ m tʋʋmdã pa yãk neng ye. Wakat ninga, m yam la m bas Betɛllã tʋʋma.” A maana wãn n leb n paam sũ-noogo? Kãsem-soab n tẽeg-a t’a Zeova rengd n tũnuga ne tʋʋmd d sẽn tare, n sõng-d tɩ d paam minim n wa tõog n tʋm tʋʋmd a to. A Robɛɛr sak n deegame t’a ra segd n basa sẽn loogã yell tagsgo, la a tagsd a sẽn tõe n maan masã wã yell n yɩɩda.

²² Saam-biig a Feligs Episkopo me kibarã wõnda woto. Yẽ ne a pagã kẽnga Gileyaad lekollã yʋʋmd 1956. Rẽ poore, a lebga tigims sull yel-gɛt Bolivi. Yʋʋmd 1964, b paama biiga. A Feligs yeelame: “Yɩɩ toog ne-d tɩ d bas d tʋʋmdã d sẽn da nong wʋsgã. M dɩka yʋʋmd tõr n tar sidgri. La ne a Zeova sõngre, m toeema m yam-tagsgã n sak masã n na n vɩɩmd wa roagda.” Yãmb me yɛlã wõnda a Robɛɛr bɩ a Feligs rẽndã bɩ? Yãmb komsa raoodo, y sẽn pa le tar tʋʋm nins y sẽn da tar pĩndã yĩng bɩ? Sã n yaa woto, maand-y y sẽn tõe n maan masã mengã n tʋmd a Zeova tʋʋmdã la y sõngd y saam-biisã, tɩ rẽ la y na n paam sũ-noog n paase. Wɩngd-y ne a Zeova tʋʋmdã, n tũnugd ne y minimã n sõngd y taabã, tɩ yaa woto la y na n paas tigingã neb tẽebo, tɩ y sũ-noogã me paase.

23. Bõe la d segd n dɩk sẽk n maane? Bõe yell la d na n gom sõsg ning sẽn pʋgdã pʋgẽ?

²³ Tõnd ned kam fãa tara yõod wʋsg a Zeova nifẽ. A ratame tɩ d yɩ a zakã neba. D sã n dɩk sẽk n bʋgs d sẽn tõe n maan to-to n keng d tẽed-n-taasã raoodo, la d sɩd modg n maan rẽ, d pa na n tags tɩ d pa tar d zĩig tigingã pʋgẽ ye. La tõnd tagsg yaa wãn to ne tigingã neb a taabã? Wãn to la d wilgd tɩ d nand-b lame? D na n bãnga rẽ sõsg ning sẽn pʋgdã pʋgẽ.