TÕND fãa kɩsa sɩd tɩ “yaoolem wakatã,” a Zeova wilgda a nin-buiidã sore, la a sõngd-b tɩ b paamd bũmb nins sẽn yaa tɩlɛ b tẽebã kengr yĩngã. (2 Tɩm. 3:1) La d miime tɩ yaa tɩlɛ tɩ tõnd me yɩ sakdba. B tõe n maka tõnd yɛlã sẽn yaa to-to wã ne Israyɛll nebã sẽn wa n be we-rasempʋɩɩgẽ wã. B sã n da peeb baorgã n bool nin-buiidã, b ra segd n sakame.

A Zeova ra kɩtame t’a Moyiiz maan tãntãad bɩ bard a yiib ne wanzuri, tɩ b ‘sã n wa rat tɩ nebã tigmi, yaa bãmb la b na n peebe,’ tɩ ‘b sã n wa rat tɩ nebã yik me, leb n yaa bãmb la b peebda.’ (Sõd. 10:2) Maan-kʋʋdbã ra segd n peeba bardã ne peebg buud toor-toore, n wilg nin-buiidã b sẽn segd n maanega. (Sõd. 10:3-8) Rũndã-rũndã, Wẽnnaam tũnugda ne bũmb toor-toor n wilgd a nin-buiidã b sẽn segd n maanega. D na n goma bũmb a tãab a Zeova sẽn tũnugd ne n kõt tõnd noy la sagls yelle, tɩ d tõe n mak rẽ ne bardã peebgo. Yaa b sẽn mi n boond tõnd tɩ d tigimd taab neb kʋʋngã, b sẽn mi n kɩt tɩ yel-gɛtbã paamd zãmsgã, la b sẽn mi n kõt tigimsã fãa noy b sẽn lebs n manege, bɩ n demsã.

A Zeova sã n da rat tɩ “nebã fãa” wa tigim taab sɛk-roogã noor sẽn tees yaangã, maan-kʋʋdbã ra peebda bard a yiibã fãa. (Sõd. 10:3) Buud piig la a yiibã fãa b sẽn welg sul a naase, tɩ b tilg b fu-rotã n gilg sɛk-roogã ra wʋmda baorgã peebgo. Sẽn dag n pẽ-b sɛk-roogã noorã ra tõe n taa be minit a wãn pʋgẽ bala. Kẽer ra zãra ne be, tɩ ra yaa tɩlɛ tɩ b rɩk sẽk bilfu, la b maan modgr n yaool n ta. Sẽn da yaa to-to fãa, a Zeova ra ratame tɩ b fãa tigim n kelg a noyã.

Rũndã-rũndã, yaa sɩd tɩ d pa tigimd taab sɛk-roogẽ ye. La b mi n bool-d-la Wẽnnaam nin-buiidã tigissẽ. Tõe n yɩɩ rasem a tãab tigs-kãsemsã, la tigiss a taab sẽn yaa toor zalle, tɩ d paamd zãmsg la sagls sẽn tar yõod wʋsg be. Dũniyã gill zugu, a Zeova nin-buiidã paamda zãms-yɛngã. Dẽnd neb nins sẽn sakd n tigim ne Wẽnnaam nin-buiidã me naagd n paama sũ-noogo. Kẽer segd n yii hal zĩ-zãrsẽ n wa. Baasgo, sẽn sakd-b n wa wã fãa mikdame tɩ b pa modg zaalem yĩng ye.

La neb nins sẽn yaa sul-bõonese, tɩ b sẽn beẽ wã me tolg n zãr ne tigs-kãsemsã zĩisã yẽ? Ne tɛknolozi wã maasem, bãmb wʋsg tõe n paama zãms-yɛngã, hal tɩ yaa wa b bee tigs-kãsemsã zĩisẽ. Wala makre, saam-biig la d biru-kãsengã ra tʋm t’a wa kaag Benẽ filiyallã, tɩ b tũnug ne tɛknolozi wã tɩ d tẽed-n-taas sẽn be Arlit, Nizɛɛr soolmẽ wã sẽn be Sahara we-rasempʋɩɩgẽ wã tõog n paam sõssã n kelge. B fãa yɩɩ neb 21, saam-biis ne saam-bi-pogse, la neb a taaba. Baa ne  b sẽn da be hal zĩ-zãrgẽ wã, b ra getame tɩ bãmb me naaga neb 44 131 wã sẽn tigim taabã. Ad Arlit saam-biig a ye sẽn yeele: “D pʋʋsd-y-la bark ne d sũur fãa, y sẽn tũnug ne tɛknolozi wã tɩ d paam sõssã n kelgã. Wilgda tõnd yɛs tɩ y sɩd nong-d-la wʋsgo.”

Israyɛll maan-kʋʋd sã n wa peeb baorg a ye bala, “yaa nanambsã sẽn yaa Israyɛll nebã kãsem-dãmbã bal” n tog n tigim taab sɛk-roogã taoore. (Sõd. 10:4) B ra tõe n paamame t’a Moyiiz taas-b kibay la a zãms-b bũmb kẽere. Rẽ ra tõe n sõnga kãsem-soab fãa t’a tʋm a tʋʋm sõma, a buudã neb sʋka. Yãmb sã n da be nanamb-kãens sʋka, y ra pa na n maan y sẽn tõe fãa n sak n wa, n paam n dɩ a nafa sɩda?

Rũndã-rũndã, tigimsã kãsem-dãmbã pa nanambs ye. B leb n pa soogd Wẽnnaam bãgrã b sẽn gũnug-bã ne pãng ye. (1 Pɩy. 5:1-3) La b sɩd maanda b sẽn tõe fãa n na n ges bãgrã yell sõma. Rẽnd b sã n bool-b tɩ b wa zãms bũmb kẽer tɩ b minimã paase, wala makre, b sã n bool-b Rĩungã tʋʋmd lekollẽ, b sakda tao-tao. Lekoll a woto buudã sasa, b wilgda kãsem-dãmbã b sẽn na n ges tigimsã yell sõma to-to n paase. Rẽ paasda bãmb ne tigingã neb fãa tẽebo. Baa yãmb sã n pa paam n kẽng lekoll a woto buudu, y paamd n dɩta a nafa, bala sẽn kẽng-bã rɩkda zãmsg ning b sẽn paamã n sõngd tigingã nebã.

Wakat ninga, Israyɛll maan-kʋʋdbã mi n peeba baorgã, tɩ rãamdã zẽkdẽ la sigda. Rẽ ra wilgdame t’a Zeova ratame tɩ buudã fãa yik n dɩk sore. (Sõd. 10:5, 6) Buudã ra sigla neere, tɩ b sã n wa na n yik n loog me bɩ zũnd-zãnd kaẽ ye. La ra yaa tʋʋmd meng-meng ne ned kam fãa. Tõe tɩ wakat ninga, yik n kẽng zĩig a to wã ra pa noom neb kẽer ye. Bõe yĩnga?

Tõe tɩ sãnda ra getame tɩ yikrã sõor yaa n yaa wʋsgo, la tɩ ra yaa lingr me. Biiblã yeelame tɩ “sawadgã sã n yals sɛk roogã zugu, Israyɛll nebã ka yikd tɩ sã n ka sawaodgã n zẽk ye.” La ‘wakat ninga, sawaodgã yalsda zaabr n tãag vẽkembeoog yibeoogo.’ Wakat ning me, a yalsda ‘rasem a yiibu, bɩ kiuugu, wall a kaoos n yɩɩg rẽ.’ (Sõd. 9:21, 22) Naoor a wãn la nin-buiidã yik n toeem zĩiga? Sõdb sak 33 wilgdame tɩ yaa na maan zĩis 40 la Israyɛll nebã tilg b tãb-sikã.

Wakat ninga, kẽer da paamda maasem zĩisi, tɩ tog n da noom-b wʋsg “we-rao-kẽen-kãngã sẽn dɩt nebã” pʋgẽ. (Tõo. 1:19) Rẽ ra tõe n kɩtame tɩ b wa tagsdẽ tɩ b sã n toeem zĩiga, pa na n maneg bãmb ye.

Nin-buiidã sã n wa sɩng loogre, tõe n yɩɩ toog ne kẽer tɩ b gũ bãmb buudã loogr wakate. B fãa wʋma baorgã rãamdã sẽn zẽkd la sigdã, la b fãa ra pa tõe n loog wakat-yɛng ye. Baorgã rãamdã sẽn zẽkd la sigdã wilgdame tɩ buud nins sẽn be yaangã, rat n yeel tɩ Zida, Isakaar la Zabulõ buudã n segd n deng n looge. (Sõd. 2:3-7; 10:5, 6) Bãmb sã n loog n sa, maan-kʋʋdbã ra peebda baorgã naoor a yiib-n-soaba, tɩ rãamdã zẽkdẽ la sigda, tɩ wilg tɩ buud a tãab nins sẽn be goabg babgã segd n loogame masã. Maan-kʋʋdbã ra kelld n maana woto hal tɩ nin-buiidã fãa looge.

Tõe tɩ yɩɩ toog ne yãmb me tɩ y sak yɛl kẽer siglgã sẽn toeeme. Tõe tɩ y tagsame tɩ toeengã yaa n looga noore. Tõe tɩ yɛl kẽer n da noom yãmba, tɩ y ra pa rat tɩ b toeem rẽ ye. Sẽn yaa a soab fãa, tõe tɩ yɩɩ toog ne-y tɩ y tall sũ-mare, la y wa n tõog n minima b sẽn toeem yɛl ninsã. Baasgo, d sã n modg n sak toeengã, d na n mikame tɩ sɩd nafd-d lame, la t’a Zeova sũur nooma ne-do.

A Moyiiz wakatẽ wã, a Zeova wilga neb milyõ-rãmba, pagba, rap la kamb sor we-rasempʋɩɩgã pʋgẽ. Sã n da pa ne a Zeova sẽn ges b yell la a wilg-b sorã, b ra kõn tõog n põs ye. Rũndã-rũndã me, yaa a Zeova sẽn wilgd tõnd sorã la d sẽn ket n tar zood sõma ne-a wã. Woto wã, bɩ d fãa yãk yam ne d sũy fãa n na n kell n yɩ sakdb wa Israyɛll neb nins sẽn da maand sɩd ne a Zeova wã, tɩ b sã n wa peeb baorgã, bɩ tõnd me sake.