1. Ned sẽn da bas a Zeova sã n lebg n wa a nengẽ, a Zeova manesem yaa wãna?

SÕSG ning sẽn loogã pʋgẽ, tõnd yãame t’a Zeova maka a mengã ne pe-kɩɩm-sõng sẽn get a piis yell neere. Tõnd yãame me t’a baooda neb nins fãa sẽn da tũud-a n wa basã. A Zeova ra yeela Israyɛll neb nins fãa sẽn da bʋdg n bas-a wã yaa: “Lebg-y n wa-y mam nengẽ, tɩ mam me lebg n wa yãmb nengẽ.” D miime t’a Zeova ket n data woto, bala a yeelame yaa: ‘Mam ka tek ye.’ (Mal. 3:6, 7) A Zeezi yeelame tɩ baa yaa nin-yend sẽn da bas a Zeova n lebg n wa a nengẽ, a Zeova ne malɛgsã fãa maanda sũ-noogo.—Luk 15:10, 32.

2. Bõe yell la d na n gom sõs-kãngã pʋgẽ?

² D na n goma a Zeezi yel-bũn a tãab yelle. Yaa yel-bũn sẽn wilgd d sẽn tõe n sõng sẽn bas-b a Zeova wã to-to. D na n yãa zʋg-sõma kẽer d sẽn tog n bɩɩse, sẽn na yɩl n sõng-b tɩ b lebg n wa. Sẽn paase, d na n yãame tɩ d sẽn maand modgr n na n sõng neb nins tẽeb sẽn ka pãngã tara yõod wʋsgo.

3-4. Bõe yĩng tɩ pag ning yell b sẽn gom Luk 15:8-10 pʋgẽ wã maag a yĩng n gẽes a ligd-koɛɛngã sẽn menemã?

³ Tõnd segd n maana modgr wʋsgo, n bao neb nins sẽn dat n lebg n wa a Zeova nengẽ wã. A Luk evãnzillã pʋgẽ, a Zeezi wẽe yel-bũndi, n dɩk makr ne pag sẽn maan modgr n na n gẽes a bũmb sẽn tar yõod wʋsg sẽn meneme. Yaa darkem ligd-koɛɛnga. Yel-bũn-kãng sõngda tõnd tɩ d bãng pagã sẽn maan modgr to-to, n na n gẽes a ligd-koɛɛngã.—Karm-y Luk 15:8-10.

⁴ A Zeezi wilga pagã manesem sẽn yɩ to-to, a sẽn yã a darkem ligd-koɛɛngã. Bãmb wakatẽ wã, wõnda zʋɩf-pogsã ra kõta b kom-pugli wã darkem ligd-koeems piig b kãadmã daare. Tõe tɩ pagã ligd-koɛɛngã yaa kũun a woto.  Pagã tagsame tɩ ligdã lʋɩɩ tẽnga. Rẽ n so t’a yõgen fɩtl n gẽese, la a pa yã bũmb ye. Tõe tɩ fɩtlã vẽenemã ra pa sek a na yã ligd-koɛɛngã sẽn yaa kɩdgã ye. A wa n baas n pɩɩsa roogã zãng n na n gẽese. Tomã a sẽn pɩɩsã pʋgẽ la a yã a ligd-koɛɛngã. Fɩtlã vẽenem kɩtame tɩ ligd-koɛɛngã sẽn be tomã pʋgẽ wã ra yãgda. A yaa n yã a sẽn da gẽesdã! A boola a zo-rãmbã la a yagsã fãa n togs-b koe-noogã.

5. Ned sã n lak n bas tigingã, tõe n yɩɩ toog tɩ d bãng a zĩiga. Bõe yĩnga?

⁵ A Zeezi yel-bũndã sõngda tõnd tɩ d bãng tɩ yɩl n yã bũmb sẽn meneme, yaa tɩlɛ tɩ d maan modgr wʋsgo. Woto me, d tog maana modgr wʋsgo, n bao neb nins sẽn lak n bas tigingã. Tõe tɩ b sẽn pa le wat tigissã la b pa le moond koɛɛgã kaoosa yʋʋma. Tõeeme meng tɩ b yik n kẽnga tẽng a to, tɩ d tẽed-n-taasã sẽn be be wã pa mi-b ye. La d tõe n kɩsa sɩd tɩ masã wã, b kẽer rata ne b sũur fãa n lebg n wa a Zeova nengẽ. B ratame n le naag tũudum hakɩɩkã neb n tũ a Zeova, la yaa tɩlɛ tɩ tõnd sõng-ba.

6. Wãn to la tigingã nebã fãa tõe n kẽes b toogo, n bao neb nins sẽn bas a Zeova wã?

⁶ Ãnd dãmb n tõe n kẽes b toogo, n bao d tẽed-n-taas nins sẽn bas a Zeova wã? Yaa tõnd ned kam fãa: Kãsem-dãmbã, so-pakdbã, a soabã zak rãmba, la tigingã koe-moondbã fãa. Yãmb tara y zoa wall y roagd sẽn bas a Zeova bɩ? Yãmb moona koɛɛgã zak-zaka, wall zamã zĩigẽ n seg ned sẽn da tũud a Zeova n wa bas bɩ? A soabã sã n sakame n na n kõ y tigingã kãsem-dãmbã a telefõn nimero, y tõe n deeg n tɩ kõ-b lame.

7. Yam-bʋg la d tõe n dɩk a Toma sẽn yeelã pʋgẽ?

⁷ Bõe ne bõe takɩ la kãsem-dãmbã tõe n maane, sẽn na yɩl n yã neb nins sẽn dat n lebg n wa a Zeova nengẽ wã? A Toma * yaa kãsem-soab sẽn be Ɛspayn. A sõnga d tẽed-n-taas sẽn yɩɩd bãmb 40 tɩ b lebg n wa a Zeova nengẽ. Ad a sẽn yeele: “Pipi, m sokda m tẽed-n-taasã n na n bãng b sã n mii ned sẽn bas a Zeova, la a soab sẽn be zĩig ning masã. Wakat ning me, m sokda koe-moondbã n gese, ned n da tũud a Zeova n wa base, tɩ b tẽr a yell bɩ? Tigingã nebã fãa la bal sakdame n na n sõnge, bala b getame tɩ nin-kãensã gẽesgã paka bãmb me. M sã n wa kẽng n na n tɩ kaag d tẽed-n-taag sẽn bas a Zeova, m sokda a kambã la a roagdb a taabã yelle. Neb kẽer sẽn bas a Zeova ra wata tigissã ne b kambã. Tõe meng tɩ b kambã ra lebga koe-moondba. D tõe n sõnga bãmb me tɩ b lebg n wa a Zeova nengẽ.”

8. Wa Luk 15:17-24 sẽn wilgdã, biigã sẽn yi n bas a ba wã zakã, n wa baas n tek yamã, a ba wã manesem yɩɩ wãn ne-a?

⁸ D sã n wa segd n sõng ned sẽn dat n lebg n wa a Zeova nengẽ, zʋg-sõma bʋs la d tog n bɩɩse? D tõe n dɩka yam a Zeezi yel-bũnd a ye pʋgẽ. A goma bi-ribl sẽn yi n bas a ba zak yelle. D ges yam ning d sẽn tõe n dɩk yel-bũndã pʋgẽ. (Karm-y Luk 15:17-24.) A Zeezi wilga sẽn yɩ to-to tɩ biigã wa baas n tek yam, la a lebg n wa a ba wã zakẽ. Bi-riblã sẽn wa n watẽ wã, a ba wã wudgame n seg-a, n mobg-a, tɩ wilg t’a nong-a lame. Biigã sũur-kasetã ra ningd-a-la taale, t’a tagsdẽ tɩ pa zems tɩ b le bool yẽ tɩ raoã bi-ribl ye. Biigã sẽn pelg a pʋg n togs sẽn be a sũurẽ wã, a ba wã kʋma a nimbãanega. Rẽ poore, ba wã maana bũmb takɩ n na n sõng biigã t’a bãng t’a sẽn lebg n wa zakẽ wã noom-a lame, la  t’a pa segd n ges a meng wa tʋm-tʋmda, bala a ket n yaa a biig a sẽn nonge. Sẽn na yɩl n wilg rẽ vẽenega, ba wã kɩtame tɩ b maan kibs biigã sẽn tek yamã yĩnga, la a kɩt tɩ b yelg-a fu-neere.

9. Sẽn na yɩl n sõng sẽn bas-b a Zeova wã tɩ b lebg n wa a nengẽ, zʋg-sõma bʋs la d segd n bɩɩse? (Ges-y zĩ-gũbrã: “ Bõe la d tõe n maan n sõng sẽn dat-b n lebg n wa a Zeova nengẽ wã?”)

⁹ A Zeova yaa wa biigã ba wã. A nonga d tẽed-n-taas nins sẽn bas-a wã, n dat tɩ b lebg n wa a nengẽ. Tõnd sã n dɩk a Zeova togs-n-taare, d tõe n sõng-b lame tɩ b lebg n wa a nengẽ. La rẽnda d tall sũ-mare, la d kʋm b nimbãanega, la d tall nonglem. Bõe yĩng tɩ zʋg-sõma kãensã yaa tɩlɛ, la wãn to la d tõe n bɩɩs-ba?

10. Bõe yĩng tɩ d tog n tall sũ-mar n tõog n sõng ned t’a lebg n wa a Zeova nengẽ?

¹⁰ D tog n talla sũ-mare, bala yɩl n tõog tɩ ned lebg n wa a Zeova nengẽ, kaoosdame. Wʋsg sẽn da bas a Zeova yeelame tɩ yaa kãsem-dãmbã la tigingã neb a taab sẽn wa n kaag-b naoor ka tɛk poore, la b yaool n yãk yam n na n lebg n wa. Saam-bi-poak sẽn be Aazi, t’a yʋʋr yaa a Nansi yeelame: “Saam-bi-poak a ye sẽn da be tigingã pʋgẽ, n yaa m zoa meng-meng n sõng-m wʋsgo. A ra nong-m-la wa a yao. A tẽeg-m-la bũmb kẽer d sẽn da nong n maandẽ. M sã n da wa togsd-a sẽn be m sũurẽ wã, a maagda a yĩng n kelg-m neere. A sã n da tar saglga, a kõt-m lame. A sɩd wilgame t’a yaa m zoa hakɩɩka, sẽn sõngd-m wakat fãa.”

11. Sẽn na yɩl n sõng ned sũur sẽn sãame, bõe yĩng tɩ d tog n kʋm a soabã nimbãanega?

¹¹ Ned sũur sã n sãam tɩ d kʋm a nimbãanega, tõe n sõngame t’a sũurã maage. Yaa wa tɩɩm sẽn kõt ned pãnga.  Neb kẽer sẽn bas a Zeova kẽnda ne sũ-toog hal na maan yʋʋm wʋsgo, bala tigingã ned n maan bũmb tɩ sãam b sũuri. Rẽ n kɩt tɩ b pa rat n lebg n wa a Zeova nengẽ ye. Kẽer tõe n tagsdame tɩ b maana bãmb kɛgre. B ratame n paam ned sẽn na n kelg-b neere, la a kʋm b nimbãanega. (Zak 1:19) A Mariya ra tũuda a Zeova, n wa bas-a. Ad a sẽn yeele: “M da rata ned sẽn na n kelg-m neere, n bels-ma, la a teel-ma.”

12. Rɩk-y makre, n bilg a Zeova sẽn tɛt neb nins sẽn bas-a wã to-to sẽn na yɩl tɩ b lebg n wa a nengẽ.

¹² Biiblã maka a Zeova sẽn nong a nin-buiidã to-to wã ne wĩiri. Woto zemsame. Bõe yĩnga? D rɩk makre: Mams-y wa yãmb sẽn na n lʋɩ bog-zulung pʋgẽ. Bokã zulmame hal tɩ y pa tõe n yi a pʋgẽ y toor ye. Sã n pa y paamame tɩ ned rɩk wĩir n lob-y tɩ y gãd t’a tak-y n yiisi, y pa na n tol n tõog n yi bokã pʋgẽ ye. A Zeova ra goma Israyɛll neb nins sẽn da bas-a wã yelle, n yeel yaa: “Mam tɛɛ bãmb ne. . . nonglem wĩyã.” (Ooze 11:4) Rũndã-rũndã, a Zeova manesem ket n yaa woto ne neb nins sẽn bas-a, n maood ne zu-loees la yɩɩr buud toor-toorã. A ratame tɩ b bãng t’a nong-b lame, la t’a rat n tɛ-b lame tɩ b lebg n wa a nengẽ. La a Zeova tõe n tũnuga ne yãmb n sõng nin-kãensã tɩ b bãng rẽ.

13. Togs-y kibar sẽn wilgd tɩ saam-biir nonglmã tara pãnga.

¹³ D sã n sõng sẽn pa le naagd-b tigingã neb n moond koɛɛgã, la b pa le kẽnd tigissã tɩ b bas b yam t’a Zeova nong-b lame, la tɩ tõnd me nong-b lame, sõngd-b-la wʋsgo. Pablo ning yell d sẽn gom sõsg ning sẽn loogã pʋgẽ wã kibar wilgda rẽ. A maana  sẽn yɩɩd yʋʋm 30, n da pa le naagd tigingã neb n moond koɛɛgã, la a ra pa le kẽnd tigissã me ye. Ad a sẽn yeele: “Daar a ye yibeoogo, m da yita m zakẽ wã, n kell n seg saam-bi-poak a yembr yʋʋm sẽn vẽsge. A sõsa ne-ma, hal t’a goamã ra wilgdẽ t’a nong-m lame. Kɩtame tɩ m sɩng yãbr wa biiga. M yeel-a lame tɩ yaa wa a Zeova n tʋm-a t’a wa sõs ne-ma. Yaa baraar la m yãk yam n na n lebg n wa a Zeova nengẽ.”

14. Wa yel-bũndã sẽn be Luk 15:4, 5 pʋgẽ wã sẽn wilgdã, pe-kɩɩmã sẽn yã a pesgã, bõe la a maan-yã?

¹⁴ Sẽn pa le moond-b koɛɛgã, la b pa le kẽnd tigissã ratame tɩ d sõng-b la d keng b raood n kaoose. Sũ-sãangã tõe n yaa wʋsg ne-ba, wa a Zeezi sẽn wilg yel-bũnd ning pʋgẽ a sẽn dɩk makr ne biig sẽn yi n bas a ba zakã. Naoor wʋsgo, b sẽn da leb a Sʋɩtãan dũniyã pʋgã kɩtame tɩ b tẽebã koms wʋsgo. Yaa tɩlɛ tɩ d sõng-b tɩ b tẽebã le paam pãnga. A Zeezi sẽn wẽ yel-bũndã n gom pesg sẽn menem yellã, a wilgame tɩ pe-kɩɩmã sẽn yã pesgã, a rɩk-a lame n palg a bãgdẽ, n tall-a n lebg n wa bãgrẽ wã. Pe-kɩɩmã ra zoe n dɩka sẽk wʋsg n gẽes pesgã. Yɩɩ yaams me. La a bãngame bal tɩ yaa tɩlɛ t’a rɩk-a, bala pesgã ra pa tõe n le kẽn a toor n wa bãgrẽ wã ye.—Karm-y Luk 15:4, 5.

15. Bõe la d tõe n maan n sõng ka-pãng rãmbã sẽn dat n lebg n wa a Zeova nengẽ wã? (Ges-y zĩ-gũbrã: “ Tʋʋm-teoog sẽn sõngd wʋsgo.”)

¹⁵ Wakat ninga, yɩl n sõng neb kẽer sẽn bas a Zeova tɩ b mao ne bũmb ning sẽn kɩt tɩ b pa le tũud-a wã, tõe n yɩɩ tɩlɛ tɩ d bao sẽk wʋsgo, tõe n waa ne yaams me. La ne a Zeova vʋʋsem sõngã, a Gomdã la bũmb nins siglgã sẽn yiisdã maasem, d tõe n sõng-b lame tɩ bãmb ne a Zeova  zoodã le paam pãnga. (Rom. 15:1) Wãn to? Kãsem-soab a ye sẽn tar minim yeelame: “Neb nins sẽn da bas a Zeova, n wa yãk yam n na n lebg n wa a nengẽ wã fãa la bal segda ne Biibl zãmsgo.” * Rẽ wã, kãsem-dãmbã sã n kos yãmb tɩ y zãms ned a woto Biiblã, bɩ y sak ne yamleoogo. Kãsem-soabã paasame: “Yaa tɩlɛ tɩ koe-moond ning sẽn na n zãms a soabã Biiblã lebg a zoa hakɩɩka, a sẽn tõe n pelg a pʋg n togs sẽn be a sũurẽ.”

16. Bõe n kɩt tɩ d miẽ tɩ d tõe n teega malɛgsã sõngre?

¹⁶ Kibay wʋsg n be n wilgd tɩ malɛgsã sõngda tõnd koe-moonegã pʋgẽ, sẽn na yɩl tɩ d tõog n yã neb nins sẽn da bas a Zeova, n dat ne b sũur fãa n lebg n wa a nengẽ wã. (Vẽn. 14:6) Wala makre, a Silviyo sẽn be Ekowatɛɛrã ra pʋʋsa ne a sũur fãa, n kos a Zeova t’a tʋm ned t’a wa sõng-a t’a lebg n wa a nengẽ. A sẽn wa n ket n pʋʋsdẽ, a wʋma b sẽn kogs a kʋɩlengã. Yaa kãsem-dãmb a yiib n wa n na n kaag-a. Yɩɩ ne sũ-noog la b sɩng a sõngre.

17. D sã n sõng ka-pãng soaba, nafa wã yaa bõe?

¹⁷ D sã n sõng ka-pãng rãmbã tɩ b lebg n wa a Zeova nengẽ, d na n paama sũ-noog wʋsgo. A Salvadoor yaa so-pakd sẽn maand modgr wʋsg n sõngd sẽn da bas-b a Zeova wã. Ad a sẽn yeele: “Wakat ninga, m sã n tags sẽn da bas-b a Zeova n lebg n wa a nengẽ wã yelle, m daagda nintãm sũ-noogã yĩnga. M sã n tags t’a Zeova lebg n yiis-b-la a Sʋɩtãan dũniyã pʋgẽ, la tɩ ma-me naagame n sõnge, noom-m-la wʋsgo.”—Tʋʋ. 20:35.

18. Yãmb sã n basa a Zeova, y tõe n kɩsa sɩd ne bõe?

¹⁸ Yãmb sã n basa a Zeova, y tõe n kɩsa sɩd t’a ket n nong-y lame. A ratame tɩ y lebg n wa a nengẽ. Bũmb kẽer la y segd n maan n tõog n lebg n wa. Wa a Zeezi yel-bũnd ning pʋgẽ a sẽn yeel tɩ biigã yiime n bas a ba zakã, t’a ba wã ra gũud a lebgrã, a Zeova me gũuda yãmb lebgre, n na n deeg-y ne sũ-noogo.