1-2. A Zeezi goam nins sẽn be Zã 4:35, 36 pʋgẽ wã võor yaa bõe?

DAAR a ye, a Zeezi ra rɩka sor n debd Galile, n wa ne pʋto, tɩ koodã nan pa yao kẽebg ye. (Zã 4:3-6) Ra keta sẽn zems kiis a naas tɩ yaool n ta kẽebgo. La a Zeezi yeela bũmb sẽn ling a karen-biisã wʋsgo. Ad a sẽn yeelã: “Zẽk-y y nens n ges pʋtã. B pelgame n ta tigsgu.” (Karm-y Zã 4:35, 36.) A gomdã võor yaa bõe?

² A Zeezi ra pa gomd kẽebg sɩd-sɩd yell ye. A ra gomda neb tigsg yelle. Bõe n kɩt t’a yeel woto? Baa ne zʋɩf-rãmbã ne Samari nebã sẽn da pa mokd to bugmã, a Zeezi moona Samari pag a ye koɛɛgã t’a sak n kelge. A sẽn yeel tɩ pʋtã pelgame n ta tigsgã, yaa pagã sẽn tɩ gom a yell tẽngã pʋg tɩ Samari neb kʋʋng ra kaoog n wat a nengẽ wã yĩnga. B ra watame n na n bao n bãng bũmb wʋsg n paase. (Zã 4:9, 39-42) Bãngd a yembr goma kiba-kãngã yelle, n yeel tɩ “nebã sẽn yik zĩig pʋgẽ n wa na n kelg a Zeezi wã . . . wilgdame tɩ b ra wõnda kood sẽn ta kẽebgo.”

3. Y sẽn get nebã to-to wã sã n yaa wa a Zeezi, wãn to la na n sõng-y koɛɛgã mooneg wɛɛngẽ?

³ Yãmb tagsg yaa wãn ne neb nins y sẽn taasd koe-noogã? Yãmb get-b-la wa kood sẽn bɩ n ta kẽebg bɩ? Sã n yaa woto, bũmb a tãab la y na n maan tɩ wilg rẽ vẽenega. Pipi, yãmb na n moonda ne yãgbo. Kẽebg wakat pa kaoosd ye. Dẽnd y pa segd n sãam sẽkã ye. Yiibu, y sũur na n nooma ne nebã sẽn sakd n kelgd koe-noogã. Biiblã yeelame tɩ ‘nebã kɩdemda tigsg wakate.’ (Eza. 9:2) Tãabo, y na n getame tɩ ned buud fãa tõe n wa lebga a Zeezi karen-biiga. Woto na n kɩtame tɩ y modgd n toeemd y sẽn gomd bũmb ning yellã tɩ zemsd ne sẽn noom ned fãa.

4. Tʋm-tʋmd a Poll mak-sõng bʋg la d na n yã sõs-kãnga pʋgẽ?

⁴ Tõe t’a Zeezi karen-biis kẽer ra tagsdame tɩ Samari nebã pa tol n tõe n lebg a karen-biis ye. La a Zeezi yẽ ra pa tagsd woto ye. A pʋd n da get-b-la wa neb sẽn tõe n wa lebg a karen-biisi. Tõnd me segd n geta neb nins d sẽn taasd koɛɛgã woto. Rẽ wɛɛngẽ, tʋm-tʋmd a Poll kõo tõnd mak-sõngo. Yam-bʋg la d tõe n dɩk a nengẽ? Sõs-kãnga pʋgẽ, d na n yãame tɩ 1) a ra baood n bãngda a sẽn moond-b rãmbã sẽn tẽed bũmb ninsi, 2) a ra baood n bãnga sẽn noom-bã, la 3) a ra get-b-la wa neb sẽn tõe n wa lebg a Zeezi karen-biisi.

5. Bõe n kɩt t’a Poll ra bas a yam n moond karen-doogẽ wã?

⁵ A Poll ra nong n moonda zʋɩf-rãmbã karen-dotẽ wã. Wala makre, Tesalonik karen-doogẽ wã, a “sõsa [ne zʋɩf-rãmbã] Gʋls-sõamyã wɛɛngẽ vʋʋsg ray a tãabo.” (Tʋʋ. 17:1, 2) A Poll ra basa a yam n moond karen-doogẽ wã. A ra yaa zʋɩfe. (Tʋʋ. 26:4, 5) A ra mii zʋɩf-rãmbã yɛl sõma. Rẽ n so t’a bas a yam n taasd-b koɛɛgã.—Fili. 3:4, 5.

6. Bõe n wilgd tɩ neb nins a Poll sẽn taas koɛɛgã raagẽ wã yaa toor ne neb nins a sẽn taas koɛɛgã karen-doogẽ wã?

⁶ Bɛɛb n wa n yik n namsd a Polle, tɩ yɩ tɩlɛ t’a zoe n yi Tesalonik n kẽng Beere, n wa yi be n kẽng Atɛn. Beenẽ me, “a ra sõsda karen-doogẽ wã ne Zʋɩf-rãmbã, la ne neb a taab sẽn tũud Wẽnnaam.” (Tʋʋ. 17:17) La a sẽn wa n moond raagẽ wã, neb nins sẽn da kelgd-a wã ra yaa toore. B sʋkã neb kẽer da yaa filozof-rãmba, la bu-zẽms sẽn da tagsd t’a Poll koɛɛgã yaa “zãms-paalga.” B yeela a Poll yaa: “Fo bilgda tõnd bũmb kẽer d sẽn zɩ n wʋme.”—Tʋʋ. 17:18-20.

7. Wa Tʋʋm 17:22, 23 sẽn wilgdã, wãn to la a Poll ra toeemd a sẽn moond koɛɛgã to-to wã tɩ zemsd ne nebã?

⁷ Karm-y Tʋʋm 17:22, 23. A Poll sẽn sõs ne bu-zẽmsã to-to Atɛnnã yɩɩ toor ne a sẽn sõs ne zʋɩf-rãmbã to-to b karen-doogẽ wã. Tõe t’a Poll baoome n na n bãng Atɛn nebã sẽn tẽed bũmb ninga. A maaga a yĩng n ges bũmb nins sẽn be b tẽngẽ wã, n bãng bũmb nins b sẽn maand tũudmã wɛɛngẽ wã. Rẽ poore, a baoo bũmb bãmb mengã sẽn sak n deege, n tũnug ne Gʋls-sõamyã n sõs ne-b rẽ zugu. Bãngd a ye yeelame: “A sẽn da yaa kiris-ned sẽn yaa zʋɩfã, a ra miime tɩ gɛrk-rãmb nins sẽn pʋʋsd bõn-naandsã ra pa tũud Wẽnnaam sɩd-sɩdã, rat n yeel tɩ Wẽnnaam ning zʋɩf-rãmbã ne kiris-nebã sẽn da tũudã ye. La baa ne rẽ, a modgame n wilg Atɛn nebã tɩ Wẽnnaam ning yell yẽ sẽn gomdã pa wẽn-sãang ne-b ye.” Dẽnd a Poll ra sakd n toeemda a sẽn moond to-to wã tɩ zemsd ne nebã. A yeela Atɛn nebã tɩ yẽ sẽn taasd koɛɛg ningã yita ‘Wẽnnaam ning b sẽn pa mi’ wã nengẽ, soab ning b sẽn mamsd n na n tũ wã. Baa ne bu-zẽmsã sẽn da pa mi Gʋls-sõamyã sõma wã, a Poll pa tags tɩ b pa tol n tõe n lebg kiris-neb ye. A ra get-b-la wa kood sẽn bɩ n ta kẽebgo, n da toeemd a sẽn moond koe-noogã to-to wã tɩ zemsd ne-ba.

8. a) Y maanda wãn n bãng y moonegã zĩigẽ nebã sẽn tẽed bũmb ninsã? b) Ned sã n yeel t’a tara a tũudum, y tõe n leok-a lame tɩ bõe?

⁸ Yɩ-y neb sẽn gũusd n getẽ wa a Polle. Y sã n wa moondẽ, bɩ y gũusd n get bũmb nins sẽn na n sõng-y tɩ y bãng nebã sẽn tẽedã. Wala makre, bõe ne bõe n be a soabã zakẽ wã? A yʋʋrã, a fu-yerdɩ wã, a sẽn maneg a meng to-to wã, la baa a sẽn gomd to-to wã wilgda a sẽn yaa tũudum ning ned bɩ? A tõe n yeela yãmb vẽeneg t’a tara a tũudum. Sã n wa yaa woto, so-pakd a ye yʋʋr sẽn boond t’a Flutura yeta a soabã yaa: “M pa wa n na n modg-y tɩ y sak m sẽn tẽed bũmb ninsã ye. M datame n bal n wilg-y tɩ . . . ”

9. Bõe la y tõe n maan n paam n sõs ne ned sẽn tar tũudum?

⁹ Bõe zug la y tõe n sõs ne ned sẽn tar tũudum? Bao-y bũmb yãmb ne a soabã fãa sẽn tẽeda, n sõs rẽ zugu. Tõe t’a tẽedame tɩ Wẽnnaam yaa a yembre, wall a sak n deegame t’a Zeezi kiime n na n fãag ãdem-biisã, pa rẽ bɩ a tẽedame tɩ d vɩɩ dũni sẽn pid ne wẽnem pʋgẽ, la tɩ ka la bilfu na n saame. Tik-y bũmb yãmb y yiibã fãa sẽn tẽeda, n sõs ne-a Biiblã zug noog-noogo.

10. Bõe la d segd n modg n maane, la bõe yĩnga?

¹⁰ Kẽer tara b tũudum, la pa bũmb nins fãa b sẽn zãmsd-bã la b tẽed ye. Dẽnd baa y sã n bãng ned tũudum, bɩ y bao n bãng a mengã sẽn tẽed bũmb ninsã. A Davɩɩd sẽn yaa zall so-pakd sẽn be Ostrali wã yeelame: “Rũndã-rũndã, nebã rɩka filozofi wã n kalem ne b tũudmã yɛla.” A Donalta sẽn be Albani wã me yeelame: “Neb kẽer d sẽn sõsd ne yetame tɩ b tara b tũudum, la b wat n sak n deegame tɩ b pa kɩs sɩd tɩ Wẽnnaam beeme ye.” Misioneer a ye sẽn be Arzãntin me wilgame tɩ neb kẽer yetame tɩ b tẽedame tɩ Wẽnnaam yaa mens a tãabo, la b yaool n pa sak n deeg tɩ Ba wã ne Biigã la vʋʋsem sõngã naaga taab n yaa Wẽnnaam-yɛng ye. A paasame: “M sã n bãng tɩ pa bũmb nins fãa b sẽn zãms a soabã la a tẽeda, sõngd-m lame tɩ m bãng n sõs ne-a bũmb d fãa sẽn tẽed zugu.” Woto wã, baood-y n bãngd-y nebã sẽn sɩd tẽed bũmb ninsã. Rẽ, wa a Polle, yãmb tõe n “lebga bũmb fãa neb buud fãa yĩnga.”—1 Kor. 9:19-23.

11. Wa Tʋʋm 14:14-17 sẽn wilgdã, wãn to la a Poll taas Listr nebã koɛɛgã tɩ kẽ-b sõma?

¹¹ Karm-y Tʋʋm 14:14-17. A Poll bao n bãnga bũmb ning sẽn noom a kɛlgdbã, n tik rẽ zug n sõs ne-ba. Wala makre, tõe tɩ kʋʋngã a sẽn sõs ne Listr tẽngẽ wã ra mii Gʋls-sõamyã bilfu, wall b pʋd n da pa mi baa bilf ye. Rẽ n so t’a Poll sõs ne-b bũmb b sẽn mi zugu. A goma Wẽnnaam sẽn kɩt tɩ b tõe n paam kood sõma wã yelle, la b sẽn tõe n paam sũ-noog b vɩɩmã pʋgẽ wã me yelle. A gom-biisã n paas a sẽn da rɩkd makr ninsã võor da yaa nana.

12. Bõe n tõe n sõng-y tɩ y bãng sẽn noom neda, n tõog n sõs ne-a tɩ zemse?

¹² Gũusd-y n get-y bũmb ning sẽn noom nebã n tõog n bãng n sõs ne-b tɩ zemse. Y sã n wa kolgd ned wall a zaka, bõe n tõe n sõng-y tɩ y bãng sẽn noom-a? Yaa gũusgã yɛs n na n sõng-yã. Tõe t’a pɩɩsda a zakã, bɩ n karemd sebre, wall n manegd a weefo, pa rẽ bɩ n tʋmd tʋʋmd a to. Sã n zemsame, y tõe n tika a sẽn maand bũmb ningã n sõs ne-a. (Zã 4:7) Nina fu-yerdɩ tõe n wilga a sẽn yit tẽng ninga, a sẽn tʋmd tʋʋmd ninga, bɩ a sẽn nong reem ninga. Saam-biig a ye yʋʋr sẽn boond t’a Gustavo yeelame: “Daar a ye, mam sõsa ne yʋʋm 19 bi-bɩɩga. Yɩɩn-yɩɩnd yʋʋr sẽn yi fot n da be a fuugã zugu. M goma ne-a a fuugã yelle, t’a togs maam bũmb ning sẽn kɩt t’a nong yɩɩn-yɩɩndã. A sakame n na n zãms Biiblã. La masã, a lebga a Zeova Kaset soaba.”

13. Wãn to la y tõe n kãab ned Biibl zãmsgo, tɩ zãmsgã yamleoog kẽ-a?

¹³ Y sã n wa kãabd ned Biibl zãmsgo, bɩ y maan tɩ zãmsgã yamleoog kẽ-a, la y wilg-a rẽ sẽn na n naf-a to-to. (Zã 4:13-15) Wala makre, saam-bi-poak a ye n taas pag koɛɛgã, t’a sak tɩ b na n zĩnd a roogẽ wã n sõse. A yãa dipolom sẽn tab lalgã, n bãng tɩ pagã kẽnga karen-saam-dãmbã lekolle, n lebg karen-saamba. Saam-bi-poakã yeela pagã tɩ tõnd me zãmsda nebã bũmb wʋsg ne Biiblã la d tigissã maasem. Pagã sakame n na n zãms Biiblã. A waa tigsgã vẽkembeoogã, la tigs-kãseng ning sẽn pʋglã. Yʋʋmd poore, a reega lisgu. Sok-y y meng yaa: ‘Bõe n noom mam sẽn lebgd n tɩ kaagd b rãmbã? Rẽ yĩnga, m tõe n bilga ned tõnd sẽn zãmsd nebã Biiblã to-to wã hal tɩ zamsgã yamleoog kẽ-a bɩ?’

14. Bõe la y tõe n maane, n tõog n zãms ned Biiblã tɩ kẽ-a sõma?

¹⁴ Y sã n wa na n tɩ zãms ned Biiblã, wakat fãa bɩ y reng n segl y meng sõmã, n tags a sẽn yaa ned ningã, la bũmb nins sẽn noom-a wã yelle. Y sã n wa segend y menga, bɩ y bao vɛrse nins y sẽn na n tɩ karmã, video nins y sẽn na n wilg-a wã, la makr ning y sẽn na n dɩk n bilg Biiblã goam võor sõma wã. Sok-y y meng yaa: ‘Bõe n na n yɩ karen-biigã noog n yɩɩda, hal n kẽ a sũurã?’ (Yel. 16:23) Albani, so-pakd yʋʋr sẽn boond t’a Flora n da zãmsd pag a ye Biiblã. Pagã yeel-a-la vẽeneg yaa: “M pa tõe n tẽ tɩ sẽn ki-bã na n sɩd vʋʋgame ye.” A Flora pa bao n na n modg-a t’a sak n tẽ ye. A yeelame: “M tagsame t’a segd n deng n bãnga Wẽnnaam ning sẽn pʋlem tɩ sẽn ki-bã na n vʋʋgame wã sõma.” Rẽ tɛka, zãmsg fãa sasa, a Flora gomda a Zeova nonglmã, a yamã la a pãngã yell ne-a. Bilf-bilfã, pagã wa n sɩng n tẽeda kũum vʋʋgrã. Masã, a lebga a Zeova Kaset soab sẽn tar yẽesem.

15. Sẽn zems ne Tʋʋm 17:16-18 wã, manesem-bʋg la Atɛn nebã ra tar tɩ namsd a Polle, la bõe yĩng t’a kell n taas-b koɛɛgã?

¹⁵ Karm-y Tʋʋm 17:16-18. Baa ne Atɛn neb wʋsg sẽn da yaa bõn-naands pʋʋsdba, yoaadb la filozof-rãmbã, a Poll pa tags tɩ b pa tol n tõe n lebg kiris-neb ye. Sẽn paase, a kell n taas-b-la koɛɛgã, baa ne b sẽn da tʋʋd-a wã. Nand t’a Poll meng wa lebg kiris-neda, a ra yaa ‘wẽn-tʋʋsa, ned sẽn da namsd kiris-nebã, la tɩta-neda.’ (1 Tɩm. 1:13) Wa a Zeezi sẽn da kɩs sɩd t’a Poll tõe n wa lebga kiris-nedã, a Poll me ra kɩsa sɩd tɩ Atɛn nebã tõe n wa lebga a Zeezi karen-biisi. La sɩd yɩɩ wa a sẽn da tagsdã.—Tʋʋ. 9:13-15; 17:34.

16-17. Bõe n wilgd tɩ ned buud fãa tõe n sak n lebga a Zeezi karen-biiga? Togs-y kibare.

¹⁶ Pipi kiris-nebã wakatẽ, neb buud toor-toor n sak n lebg a Zeezi karen-biisi. A Poll sẽn gʋls lɛtr n tool kiris-neb nins sẽn da be Gɛrɛs sẽn yaa Korẽnt tẽng a ye pʋgẽ wã, a yeelame tɩ tigin-kãng neb kẽer da yaa bi-beese, wall neb sẽn da tʋmd tʋʋm-dẽgdo. Rẽ poore, a paasame yaa: “La Wẽnnaam peka yãmb tɩ y lebg yɩlma.” (1 Kor. 6:9-11) Yãmb da tõe n tags tɩ neb a woto tõe n toeemame n wa lebg a Zeezi karen-biis sɩda?

¹⁷ Rũndã-rũndã, neb wʋsg sakd n toeemdame n lebgd a Zeezi karen-biisi. Wala makre, Ostrali, so-pakd a ye yʋʋr sẽn boond t’a Yukina bãngame tɩ ned buud fãa tõe n sak n kelga koɛɛgã. Daar a ye, a ra bee biru pʋgẽ, n yã pʋg-sad sẽn tar tatuwaas-rãmba, n yer fut sẽn yaa yonglgo. A Yukina yeelame: “Sɩngrẽ wã, m da pa rat n gom ne-a ye. La m wa n baas n sõsa ne-a. M bãngame t’a nonga Biiblã wʋsgo, hal t’a tatuwaas-rãmbã yaa Yɩɩn-sõamyã vɛrse kẽere.” Pʋg-sadã sɩnga Biiblã zãmsgo, hal n wat tigissã. *

18. Bõe yĩng tɩ d pa segd n kaood nebã bʋʋd n yetẽ tɩ b pa na n kelge?

¹⁸ Yaa a Zeezi sẽn da tagsd tɩ neb wʋsg na n sak n tũ-a lame yĩng la a sẽn yeel tɩ pʋtã pelgame n ta tigsgã bɩ? A bada. Biiblã ra pĩnd n togsame tɩ neb bilf bal n na n sak n tẽ-a. (Zã 12:37, 38) A Zeezi ra tara tõog n tõe n bãng sẽn be ned sũurẽ. Dẽnd a ra miime tɩ neb wʋsg pa na n sak n kelg-a ye. (Mat. 9:4) Baa ne rẽ, a kell n moona ned buud fãa, n na n bao neb bilfã sẽn na n kelg-a wã. Tõnd pa tõe n bãng sẽn be ned sũurẽ ye. Rẽ wã, d pa segd n kaood nebã bʋʋd n yetẽ tɩ b pa na n kelg ye. D ning d yamẽ tɩ b tõe n wa lebga kiris-neba. A Mark sẽn yaa misioneer n be Burkĩna Faso wã yeelame: “Naoor wʋsgo, neb nins m sẽn tagsd tɩ b na n kell n wɩnga ne Biiblã zãmsgã wat n basame. Yaa b rãmb nins sẽn wõnd b pa na n zãag zĩigã n kelld n wɩng ne zãmsgã. Kɩtame tɩ m bãng tɩ sẽn são yaa d bas t’a Zeova vʋʋsem sõngã wilg-d sore.”

19. D manesem segd n yɩɩ wãn ne d moonegã zĩigẽ nebã?

¹⁹ D sã n tags n gese, tõe n wõnda d moonegã zĩigẽ, neb sẽn yaa wa kood sẽn bɩ n ta kẽebg pa waoog ye. La tẽeg-y a Zeezi sẽn yeel a karen-biisã bũmb ningã. Pʋtã pelgame, rat n yeel tɩ koodã bɩɩme n ta kẽebgo. Ned buud fãa tõe n toeemame n lebg a Zeezi karen-biiga. A Zeova nifẽ, nin-kãensã yaa wa ‘laog sẽn tar yõodo.’ (Aaze 2:7) D sã n get nebã wa Zeova ne a Zeezi sẽn get-b to-to wã, d na n baood n bãngda b sẽn sɩd yaa neb ninsi, la bũmb nins sẽn noom-bã. D pa na n tall tags-kɛg b zug ye. D na n ges-b-la wa neb sẽn tõe n wa lebg d tẽed-n-taase.