MAANA yʋʋm wʋsgo, tɩ neb sẽn sãbsd Biiblã ra yetẽ tɩ rĩm a Bɛlsazaar b sẽn gomd a soab yell Dãniyɛll sebrã pʋgẽ wã pa tol n zĩnd ye. (Dãn. 5:1) Yaa tẽn-vaeesdbã sẽn da nan pa yã kaset sẽn wilgd t’a sɩd zĩndame wã la b sẽn da yet woto wã. La yʋʋmd 1854 tɛka, yɛlã toeemame. Bõe tɩ d yet woto?

Yʋʋm-kãngã, Gãrãnd Bertayn rao a ye yʋʋr sẽn boond t’a George Taylor tɩ vaeesa Uur tẽngã raboogã. Yaa rũndã-rũndã Irakã goabg babgã. Vaeesgã sasa, a yãa yagd te-bõones ro-kẽeng a ye pʋgẽ. Yaa te-bõones sẽn yaa wa tãn-koeem-gilsi, n zems sãntɩmetr 10 woto, tɩ b gʋls b fãa zug n gilgi. A yembr gʋlsem n naag ne pʋʋsgo. Pʋʋsgã pʋgẽ, b kotame tɩ Babilond rĩm a Naboniid ne a bi-kãseng a Bɛlsazaar paam yõ-woko. Yɩɩ tɩlɛ tɩ sẽn da sãbsd-b Biiblã meng sak n deeg tɩ yaa kaset t’a Bɛlsazaar sɩd zĩndame.

La Biiblã pʋgẽ, b pa yet t’a Bɛlsazaar zĩndame bal ye. B paasame t’a yɩɩ rĩma. Neb n da yet tɩ rẽ me pa sɩd ye. Wala makre, yʋʋmd 1875 wã sẽnese, a William Talbot sẽn yaa siãnsã bãngd a ye wã yeela a sebr pʋgẽ yaa: “Neb n yet t’a ‘Bel-sar-ussur [Belshazzar] rɩɩ naam wakat-yɛng ne a Naboniid sẽn yaa a ba wã.’ La bũmb yaool n kae n wilgd rẽ vẽeneg ye.”

B pa le tõe n wẽ no-koeem-kãng ye. Bala, yagdã te-bõonesã tẽn-vaeesdbã sẽn yã wã sʋka, a ye gʋlsem n wilgd t’a Bɛlsazaar ba a Naboniid ra wa n yii Babilond tẽngã, n tɩ kaoos yʋʋma. Ãnd n da rɩt naam Babilond sasa kãnga? Sebr a yembr (Encyclopaedia Britannica) yeelame t’a “Naboniid sẽn wa n zoe n bas tẽngã, a rɩka naamã la sodaasã fãa la bal n gũnug a Bɛlsazaare.” Dẽnd wakat kãngã, a Bɛlsazaar me ra yaa naab Babilond tẽngã. Woto kɩtame t’a Alan Millard sẽn yaa tẽn-vaeesd la buud-goam yel-mitã yeel tɩ b sẽn “bool a Bɛlsazaar tɩ ‘rĩm’ Dãniyɛll Sebrã pʋgẽ wã” zemsame.

Yaa vẽeneg tɩ sã n yaa ne sẽn tũud-b a Zeova wã, yaa Biiblã meng n kõt kaset n tɩ yɩɩd tɩ d tõe n kɩsa sɩd ne goam nins sẽn be Dãniyɛll sebrã pʋgẽ wã, la tɩ sɩd yaa Wẽnnaam n vẽneg tɩ b gʋlse.—2 Tɩm. 3:16.