1. D sã n wa koms raoodo, bõe n tõe n paam-do?

DAAR ne a to fãa, d segda zu-loeese, n maand d sẽn tõe fãa n maood ne-ba. La d sã n wa koms raoodo, yaa toog tɩ d tõog n mao ne zu-loeesã. Dẽnd d segd n gesa raood komsgã wa bũmb sẽn tõe n boog d sũ-noogã, la kɩt me tɩ d wa tagsdẽ tɩ d ka võor ye. Yel-bũn 24:10 yetame: “Fo sã n bas tɩ f raood boog yel-pakr wakate, f pãngã fãa lebga zaalem bala.” Sɩd me, d sã n koms raoodo, tõe n kɩtame tɩ d wa pa le tar pãng n tõe n mao ne zu-loeesã ye.

2. Bõe n tõe n koms d raoodo, la bõe yell la d na n gom sõs-kãngã pʋgẽ?

² Bũmb wʋsg n tõe n koms d raoodo. Wala makre, d sã n tar tags-kɛg d mengã zugu, d pãn-komsmã, pa rẽ bɩ bãaga. Sẽn paase, d tõe n wa komsa raoodo, d sã n pa paam tʋʋmd d sẽn nong a Zeova siglgã pʋgẽ, wall d sã n moonda zĩig nebã sẽn pa kelgdẽ. Sõs-kãngã pʋgẽ, d na n yãa bũmb kẽer d sẽn tõe n maane, n tõog n mao ne raood komsgã.

3. Bõe n tõe n sõng-d tɩ d tall tagsg sẽn zems d pãn-komsmã zugu?

³ Yaa nana tɩ d tall tags-kɛg d mengã, la d pãn-komsmã zugu. Woto yĩnga, d tõe n wa tagsdame tɩ d pãn-komsmã yĩnga, a Zeova pa na n tol n dat tõnd dũni-paalgã pʋgẽ ye. D sã n tagsd woto, tõe n waa ne yelle. D tagsg segd n yɩɩ wãn to ne d pãn-komsmã? Biiblã wilgdame t’a Zeezi Kirist sẽn yãk a toogo, ninsaalbã fãa “maana yel-wẽna.” (Rom. 3:23) La a Zeova pa feesd tõnd n dat n yã d pãn-komsmã, bɩ n dat tɩ d zems zãng ye. A yaa Ba sẽn nong a kamba, n dat n sõng-ba. A leb n yaa sũ-mar soaba. A nee tõnd sẽn modgd n na n tõog d pãn-komsmã, la tags-kɛgã d sẽn tar d mens zutã, n dat n sõng-do.—Rom. 7:18, 19.

4-5. Wa 1 Zã 3:19, 20 sẽn wilgdã, bõe n sõng saam-bi-pogs a yiibã tɩ b tõog n mao ne raood komsgã?

 ⁴ D gom a Debora ne a Mariya kibayã yelle. * A Debora sẽn wa n yaa biiga, a zakã rãmb ra nong n paoogd-a lame, tɩ rẽ kɩt t’a tẽed t’a ka võor ye. B ra pa nong n pẽgd-a ye. Woto kɩtame t’a wa tar tags-kɛg a mengã zugu. A sã n da tudg bilfu, a ra tagsdame t’a ka võor baa bilf ye. A Mariya me ra tara zu-loe-kãng buudu. A zakã neb ra paoogd-a lame. Woto kɩtame t’a ra tagsdẽ t’a ka võor ye. Baa a sẽn wa n deeg lisgã, a ra tagsdame tɩ pa zems t’a lebg a Zeova Kaset soab ye.

⁵ Baa ne rẽ, saam-bi-pogs a yiibã pa bas a Zeova tũub ye. Bõe n sõng-ba? B pʋʋsa a Zeova ne b sũy fãa, n bas b yɛlã ne-a. (Yɩɩn. 55:23) B wa n sak n deegame tɩ d saasẽ Ba a Zeova sẽn nong-dã mii yɛl nins sẽn paam tõnd pĩndã, la d tags-kɛgã sẽn namsd tõnd to-to wã. A nee d zʋg-sõma wã, baa tõnd mengã sã n tagsdame tɩ d pa tar ye.—Karm-y 1 Zã 3:19, 20.

6. Ned sã n le lʋɩ a minun-wẽng pʋgẽ, bõe la a segd n maane?

⁶ Ned sẽn maood n na n bas minim-wẽng sẽn kɩ yẽg wʋsg tõe n le lʋɩɩ minun-kãng pʋgẽ, hal t’a sũur sãam wʋsgo. D sã n ning d meng taal yel-wẽnd d sẽn maan yĩnga, pa wẽng ye. (2 Kor. 7:10) La d pa segd ning d meng taal tɩ loog noore, n tagsdẽ tɩ d ka võor baa bilfu, la t’a Zeova pa tol n tõe n kõ-d sugr ye. Woto yaa tags-kɛgre, sẽn tõe n kɩt meng tɩ d bas a Zeova tũubu. Tẽeg-y Yel-bũn 24:10 sẽn yet bũmb ningã. D sã n koms raoodo, d pa na n le tar pãng wʋsg ye. D pʋd n segd n pʋʋsa a Zeova n kos-a t’a kõ-d sugri. (Eza. 1:18) A sã n yã tɩ y sɩd teka yam n kot sugri, a na n kõ-y-la sugri. Sẽn paase, y segd n baoo kãsem-dãmbã sõngre. B na n talla sũ-mar ne-yã, n sõng-y tɩ y tẽebã le paam pãnga.—Zak 5:14, 15.

7. Yɩl n maan sẽn yaa tɩrgã sã n yaa toog ne-do, bõe yĩng tɩ d pa segd n koms raoodo?

⁷ Kãsem-soab a ye sẽn be Fãrense, t’a yʋʋr boondẽ t’a Zãnluk nong n yeta neb nins sẽn maood ne pãn-komsmã yaa: “A Zeova nifẽ, nin-tɩrg pa ned sẽn pa tudgd ye. Yaa ned sũur sẽn sãamd ne a kongre, t’a maood wakat fãa n na n toeeme.” (Rom. 7:21-25) Rẽnd y sã n maood ne pãn-komsem bɩ y ra tags tɩ y ka võor ye. D tẽeg tɩ tõnd ned baa a ye pa tõe n yɩ tɩrg zãng Wẽnnaam nifẽ ye. Yaa tɩlɛ tɩ d fãa paam tɩ Wẽnnaam maan d lohorem. La ne a Zeezi kũumã sẽn yɩ  rõndã maasem, a sɩd maan-d-la lohorem meng-menga.—Efɛ. 1:7; 1 Zã 4:10.

8. D sã n wa koms raoodo, ãnd dãmb nengẽ la d tõe n kos sõngre?

⁸ D tõe n paama raood kengr d tẽed-n-taasã sẽn yaa wa d zak nebã nengẽ: D sã n wa sõsd ne-ba, b na n kelg-d-la neere, n keng d raoodo. (Yel. 12:25; 1 Tes. 5:14) D gom saam-bi-poak a Zoy sẽn yit Nizeria wã yelle. A maooda ne raood komsgo. Ad a sẽn yeele: “M tẽed-n-taasã sã n da kaẽ, m da na n kẽe yɛ? B sẽn be wã yaa kaset t’a Zeova leokda m pʋʋsgã. Ne nin-kãensã maasem, mam bãnga m sẽn tõe n maan n keng neb a taabã raoodo.” La d segd n tẽegame tɩ pa wakat fãa la d tẽed-n-taasã tõe n bãng tɩ d rata raood kengr ye. Rẽ n so tɩ d segd n yɩ pipi n kolg d tẽed-n-taag tẽeb sẽn bɩ, n gom ne-a d zu-loɛɛgã yell n paam t’a sõng-do.

9. Wãn to la Yɩɩn-sõamyã 41:4 ne 94:19 wã kengd d raoodo?

⁹ D kos a Zeova sõngre: D sã n wa ka laafɩ, sẽn yɩɩd fãa d sã n maood ne bãag sẽn kaoos ne-do, tõe n lebga toog tɩ d tall tagsg sẽn zemse. Yaa sɩd tɩ rũndã-rũndã, a Zeova pa maand yel-soalem n sãoogd tõnd bãasã ye. La a belsda tõnd la a kõt-d pãng tɩ d tõogd toogo. (Karm-y Yɩɩn-sõamyã 41:4; 94:19.) Wala makre, a tõe n kɩtame tɩ d tẽed-n-taag sõng-d ne d zakã tʋʋm-bõonese, bɩ n tɩ ra d teed n wa kõ-do. A tõe n kɩtame me tɩ d tẽed-n-taas wa pʋʋs ne-do. A tõeeme me n kɩt tɩ d tẽeg bũmb sẽn be a Gomdã pʋgẽ n tõe n keng d raoodo. Wala makre, Biiblã sẽn wilg tɩ dũni-paalgã pʋgẽ d na n zemsa zãnga, tɩ bãasã la tood buud fãa me sa wã.—Rom. 15:4.

10. Bõe n sõng a Isãng t’a pa kell n pa a raood komsgã pʋgẽ?

¹⁰ A Isãng sẽn yit Nizeria wã paama sãmpogr sẽn kɩt t’a lebg koamsa. A logtorã yeel-a lame t’a pa na n le tõog n kẽn a bada. A Isãng yeelame: “Mam sũur sãamame, hal tɩ m koms raoodo.” La rẽ yĩnga, a kell n paa a raood komsgã pʋgẽ bɩ? Ayo! Bõe n sõng-a? A yeelame: “Maam ne m pagã zɩ n bas a Zeova pʋʋsgo, la a Gomdã zãmsg ye. D leb n yãka yam n na n maan sũ-noog ne bõn-sõma nins d sẽn tarã, wala makre, d sẽn saagd n na n wa vɩɩmd dũni-paalgã pʋgẽ wã.”

11. A Sĩndi maana wãn n paam sũ-noogo, a sẽn wa n bẽed bã-kɛgengã?

¹¹ D gom saam-bi-poak a Sĩndi yelle. A bee Megsiki. Logtoɛɛmbã yeel-a lame t’a bẽeda bãag sẽn na n tũ ne a yõore. Bõe n sõng-a t’a pa koms raoodo? A sẽn wa n be logtor-yirã, a yãka yam n na n taasd koɛɛgã daar fãa. A yeelame: “Woto sõnga maam tɩ m tagsd m taabã yell n yɩɩd m woperasɩyõ wã, m toogã wall bãagã sẽn da namsd-m to-to wã. Ad m sẽn da yãk yam n na n maandẽ: M sã n da wa sõsd ne logtoɛɛmbã, m dengd n soka b zakã rãmb kibare. Rẽ poore, m sokd-b lame n gese, bõe yĩng tɩ b yãk yam n na n tʋm logtoeemdã sẽn yaa tʋʋmd sẽn pa nana wã. Woto, lebgda nana tɩ m bãng bũmb ning zug m sẽn tõe n sõs ne-b tɩ yɩ-b noogo. B wʋsg yeelame tɩ b pa wae n yãt bãad sẽn sokd logtor n gese a sã n keemame ye. Wʋsg pʋʋsa maam bark m sẽn tagsd b yellã. Kẽer pʋd n kõo maam b adɛrs la b telefõn nimero. Wakat-kãng sẽn da yaa toog ne-mã, a Zeova kɩtame tɩ m paam sũur pʋgẽ bãane, hal tɩ ling-m wʋsgo.”—Yel. 15:15.

12-13. Bõe la neb kẽer sẽn ka laafɩ wall sẽn yaa koms-rãmb maan n tõog n moon koɛɛgã, la rẽ woma bi-bʋse?

 ¹² Bãad-rãmbã wall koms-rãmbã tõe n komsa raoodo, b sẽn pa tõe n moon koɛɛgã wʋsgã yĩnga. La baa ne rẽ, b wʋsg tõogd n moonda sõma. Wala makre, logtoɛɛmbã ra gãnega saam-bi-poak a Lorɛll sẽn yit Etazĩni wã masĩn pʋgẽ n maan yʋʋm 37, tɩ ra sõngd-a t’a vʋʋsdẽ. A ra bẽeda kãnsɛɛre, b maan-a-la woperasɩyõ kãsemse, a ra tara yĩn-gãong bãag me. Baa ne zu-loe-kãensã, a pa bas koɛɛgã mooneg ye. A ra moonda logtoɛɛmbã ne neb nins sẽn da wat n get-a a zakẽ wã. Baasa wãna? A tõog n sõnga sẽn yɩɩd neb 17 tɩ b lebg a Zeova Kaset rãmba. *

¹³ Saam-biig a Risaar sẽn yaa kãsem-soab n be Fãrensã tara saglg sẽn tõe n sõng neb nins sẽn be b zagsẽ n pa tõe n yi, wall zĩis b sẽn get sẽn kʋʋl-bã yellã. A yeelame yaa: “Mam yeta nin-kãensã tɩ b bao bũmb n dogend d sɛbã. Woto, nebã sã n loogdẽ n getẽ, b tõe n sokame tɩ b paam n sõs ne-ba. Rẽ tõe n kenga d tẽed-n-taas nins sẽn pa le tõe n moon zak-zakã raoodo.” Neb nins sẽn be b zagsẽ n pa tõe n yi wã leb n tõe n tũnuga ne lɛta wall ne telefõn n moon koɛɛgã.

14. Mak-sõng bʋg la rĩm a Davɩɩd kõ-do?

¹⁴ D yʋʋmã, d laafɩ wã, la yɛl a taab tõe n kɩtame tɩ b pa tõe n kõ-d tʋʋmd ning a Zeova siglgã pʋgẽ ye. Sã n wa yaa woto, d tõe n dɩka yam rĩm a Davɩɩd kibarã pʋgẽ. B sẽn wa n yeel-a tɩ pa yẽ la Wẽnnaam yãk t’a na n me wẽnd-doogã, tɩ yaool n yaa tʋʋmd a sẽn da rat n tʋm ne a sũur fãa wã, a kell n sakame n na n teel ned ning Wẽnnaam sẽn yãk t’a na n me roogã ne a sũur fãa. A Davɩɩd kõo sãnem la wanzuri wʋsg n teel tʋʋmdã. Ad sɩd yaa mak-sõng tɛkẽ!—2 Sãm. 7:12, 13; 1 Kib. 29:1, 3-5.

15. Bõe n sõng a Uug t’a pa koms raood n base?

¹⁵ Yĩns ka laafɩ yĩnga, saam-biig a ye sẽn be Fãrens t’a yʋʋr boondẽ t’a Uug ra pa le yaa kãsem-soab ye. A ra pa le tõe meng n tʋm a zakã pʋgẽ tʋʋm-bõones ye. A yeelame: “Sɩngrẽ wã mam sũurã sãama hal wʋsgo, tɩ m da tagsdẽ tɩ m ka võor ye. La m wa n yãame tɩ tara yõod tɩ m sak n deeg tɩ bũmb wʋsg la m sɩd da pa le tõe n maane. Kɩtame tɩ m sũur da noom ne bũmb nins bal m sẽn tõe n maan n ket n tũud a Zeova wã. M yãka yam n pa na n  koms raood n bas ye. Wa a Zedeyõ ne a rap kobs-tã wã sẽn da yɛ la b kell n zab zabrã n baasã, ma-me pa na n koms raood n bas ye.”—Bʋ. 8:4.

16. Yam-bʋg la d tõe n dɩk malɛgsã mak-sõngã pʋgẽ?

¹⁶ Malɛgs nins sẽn kell n maan sɩd ne a Zeova wã me kõo tõnd mak-sõngo. Rĩm-wẽng a Akaab naamã wakate, a Zeova yeela malɛgsã tɩ b togs b sẽn tõe n belg rĩmã to-to. Malɛgs wʋsg togsa b sẽn na n maan to-to. La Wẽnnaam saka malɛk a ye sẽn yeelã, n wilg tɩ yẽ nengẽ wã la sõma n yɩɩda. (1 Rĩm 22:19-22) Rẽ yĩnga, malɛgs a taabã sũy sãamame, tɩ b tags tɩ b sẽn dɩk b sẽk n wilg b sẽn na n maan to-to wã yaa zaalem sɩda? Bũmb kae sẽn wilgd tɩ b tagsa woto ye. Malɛgsã sɩd yaa sik-m-mens rãmba, la b rat t’a Zeova paam waoogr buud fãa.—Bʋ. 13:16-18; Vẽn. 19:10.

17. D sã n pa paam tʋʋmd ning a Zeova siglgã pʋgẽ tɩ kɩt tɩ d sũur sãame, bõe la d segd n maane?

¹⁷ D ra tol n yĩm tɩ d sẽn paam n yaa a Zeova Kaset rãmbã, la d moond a Rĩungã yaa zu-zẽkr meng ye: A Zeova siglgã pʋgẽ, b tõe n kõ-d-la tʋʋmde, wall b reege. La pa rẽ n kɩt tɩ d tar yõod a Zeova nifẽ ye. Yaa d sã n yaa sik-m-meng soaba, la d sɩd tar yõod a Zeova la d tẽed-n-taasã nifẽ. Rẽ wã, bɩ d kos a Zeova t’a sõng-d tɩ d kell n yɩ sik-m-mens rãmba, la d sak n deeg tɩ pa bũmba fãa la d tõe n maan ye. D tags neb nins sẽn kõ mak-sõng sik-m-mengã wɛɛngẽ, tɩ b gomd b yell Biiblã pʋgẽ wã yelle. D sak n tʋmd d tẽed-n-taasã yĩng ne yamleoogo, wa d sẽn tõe tɛka.—Yɩɩn. 138:6; 1 Pɩy. 5:5.

18-19. Baa sã n wõnd nebã pa kelgd koɛɛgã y sẽn moondã, bõe la y tõe n maan n kell n tall sũ-noogo?

¹⁸ Wakat ninga, yãmb sũur mi n sãama y koe-moonegã sẽn pa womd biis yĩnga, wall y sẽn pa mikd nebã b zagsẽ wã yĩng bɩ? Sã n yaa woto, bõe la y tõe n maan n kell n tall sũ-noogo? Sagls sẽn tõe n sõng yãmb n be zĩ-gũbr ning sẽn yet tɩ: “Y sẽn tõe n maane, tɩ y koe-moonegã kõ-y sũ-noogo.” Tara yõod wʋsg me tɩ d tall tagsa sẽn zemse, koe-moonegã wɛɛngẽ. Woto rat n yeelame tɩ bõe?

¹⁹ D tẽeg tɩ d sẽn moond koɛɛgã yaa sẽn na n sõng nebã tɩ b bãng Wẽnnaam yʋʋrã  la a Rĩungã: A Zeezi yeela vẽeneg tɩ yaa neb sõor bilf bal n na n sak n tũ yẽ. (Mat. 7:13, 14) D sã n wa moond koɛɛgã fãa, d paamdame n tʋmd ne a Zeova, a Zeezi la malɛgsã, tɩ sɩd yaa zu-zẽkre. (Mat. 28:19, 20; 1 Kor. 3:9; Vẽn. 14:6, 7) A Zeova n takd neb nins sẽn dat n tũ yẽ wã n wat a nengẽ. (Zã 6:44) Rẽ wã, ned sã n pa sak n kelg tõnd rũndã, tõe t’a sak n kelg tõnd daar a to.

20. Wãn to la Zeremi 20:8, 9 wã tõe n sõng-d tɩ d tõog raood komsgo?

²⁰ No-rɛɛs a Zeremi kibarã sõngda tõnd tɩ d bãng bũmb wʋsgo. B sẽn da tʋm-a t’a tɩ moon koɛɛgã zĩig ningã, nebã wʋsg ra pa rat n kelg ye. Nebã ra tʋʋd-a lame la b paoogd-a “wakat fãa.” (Karm-y Zeremi 20:8, 9.) A sũurã sãama wʋsgo, hal t’a ra rat n koms raood n bas tʋʋmdã. La a pa maan woto ye. Bõe yĩnga? A Zeova “goamã” ra yaa wa bugum a sũurã pʋgẽ, t’a ra pa tõe n sĩnd ye. Yaa woto me ne tõndo, d sã n bas tɩ Wẽnnaam Gomdã kẽ d sũurã, la d yamã. Woto me yaa bʋʋm sẽn kɩt tɩ d segd zãmsd Biiblã daar fãa, la d bʋgsd a zugu. Rẽ na n paasa d sũ-noogã, tɩ d koe-moonegã me womd biis sõma.—Zer. 15:16.

21. Sẽn wa n yaa bũmb ning fãa n kɩt tɩ d koms raoodo, bõe la d tõe n maan n tõog n mao?

²¹ A Debora, saam-bi-poak ning yell d sẽn gomã yeelame: “Raood komsgã yaa a Sʋɩtãan zab-teoog sẽn tar pãng wʋsgo.” La a Zeova pãngã yɩɩda a Sʋɩtãan ne a zab-teedã fãa. Dẽnd sẽn wa n yaa bũmb ning fãa n kɩt tɩ y koms raoodo, bɩ y kos a Zeova sõngre. A na n sõng-y lame tɩ y tõog n mao ne y pãn-komsmã, la y sã n wa ka laafɩ me. A leb n na n sõng-y lame tɩ y tall tagsg sẽn zems siglgã tʋʋma, la koɛɛgã mooneg wɛɛngẽ. Sẽn paase, pelg-y y pʋg n pʋʋs y saasẽ Ba wã, n togs-a y zu-loeesã. Ne a Zeova sõngre, y na n tõog n maoo ne raood komsgã.