Yãmb karma Gũusg Gasg nins b sẽn yiis yaoolmã sõma bɩ? Bɩ y ges y sã n tõe n leoka sogs-kãensã:

Tõnd manesem segd n yɩɩ wãn ne sẽn paam-b zaeebã?

D nand-b-la b tẽebã yĩnga. La d pa segd n waoog-b tɩ loog noor ye. Tõnd pa pẽgd ned tɩ loog noor ye. D pa segd n sok sẽn paam-b zaeebã n ges b maana wãn n bãng tɩ b paama vʋʋsem sõngã zaeeb ye.—w20.01, s.n. 29.

Bõe n kɩt tɩ y segd n kɩs sɩd t’a Zeova nand-y-la wʋsgo?

Biiblã wilgdame tɩ y sẽn da be y ma pʋgẽ wã t’a Zeova ra zoe n nee yãmba. A Zeova meng n kelgd yãmb pʋʋsgã. A mii sẽn be yãmb sũurẽ, la y tagsgo. Yãmb tʋʋm-tʋmdɩ wã tõe n sãama a Zeova sũuri, wall noog a sũuri. (1 Kib. 28:9; Yel. 27:11) A Zeova a toor n tak yãmb n wa a siglgã pʋgẽ.—w20.02, s.n. 12.

Wakat bʋg la d segd n gome, la wakat bʋg la d segd n sĩndi?

D gomda a Zeova yell ne sũ-noogo. D sã n wa yã tɩ ned n maand bũmb sẽn tõe n wa kẽes-a yɛl pʋgẽ, d segd n gomame la d ra sĩnd ye. Kãsem-dãmbã sã n yã tɩ tigingã ned n dɩk so-wẽnga, b pa sĩnded ye. Ned sã n bee zĩig b sẽn gɩdg d tũudmã, d pa segd n sok-a n ges b sẽn maand to-to n ket n tũud a Zeova beenẽ ye. Sã n yaa tõnd n be zĩ-kãnga, d pa segd me n togs d sẽn maand to-to ye. D pa segd me n togs neb a taabã bũmb b sẽn pa segd n bãng ye.—w20.03, s.n. 20-21.

Wãn to la sʋy nins yell b sẽn gomd Zowɛll sak a 2 pʋgẽ wã yaa toor ne sʋy nins yell b sẽn gomd Vẽnegr sebrã pʋgẽ wã?

Zowɛll 2:20-3:2 wilgdame tɩ Wẽnnaam na n diga sʋyã la a lebs koodã b sẽn sãamã. Rẽ zugẽ, Wẽnnaam na n sika a vʋʋsem sõngã. Rẽ fãa pidsa wakat ning Babilon sodaasã sẽn tɩ zab ne Israyɛlle, la tẽns a taab kaoosg zugẽ wã. Vẽnegr 9:1-11 sẽn gomd sʋy nins yellã makda neb nins a Zeova sẽn zae ne a vʋʋsem sõngã. B moonda ne raood n wilgdẽ t’a Zeova na n wa sãama dũni-kãngã, tɩ rẽ kɩt tɩ neb nins sẽn teend dũni-kãngã wã yam pa gãe ye.—w20.04, s.n. 3-6.

Ãnd la rɩtg rĩmã rũndã-rũndã?

Yaa Risi ne a poorẽ dãmbã. B zabda ne Wẽnnaam nin-buiidã, bala b gɩdga koɛɛgã moonego, la b namsd a Zeova Kaset rãmbã. Rɩtg rĩmã wagsda ne goabg rĩmã.—w20.05, s.n. 13.

Rẽ yĩnga, zʋg-sõma a wɛ nins b sẽn sõdg Galat rãmb 5:22, 23 pʋgẽ wã bal n yaa vʋʋsem sõngã biis bɩ?

Ayo. Vʋʋsem sõngã sõngda tõnd tɩ d bɩɩsd zʋg-sõma a taab me, wala makre, tɩrlem. (Efɛ. 5:8, 9)—w20.06, s.n. 17.

Bõe yĩng tɩ d segd n gũus ne bũmb nins d sẽn ningd rezo sosiyo rãmbã pʋgẽ wã?

Bũmb nins d sẽn ningd rezo sosiyo rãmbã pʋgẽ wã tõe n kɩtame tɩ neb a taabã getẽ tɩ d yaa wilg-m-meng la wuk-m-meng soaba, la tɩ d pa sik-m-meng soab ye.—w20.07, s.n. a 6-7.

Yam-bʋg la d tõe n dɩk zĩm-yõgdb nins sẽn mi b tʋʋmd sõma wã nengẽ?

B kẽnda zĩmã sẽn beẽ, la wakat ning b sẽn na n paam-ba. B tara minim n tõe n tʋm ne zĩmã yõgb tʋʋm-teed sõma. B tʋmda ne raoodo, baa yɛlã sã n wa pa nana. Tõnd me tõe n maana woto koɛɛgã mooneg wɛɛngẽ.—w20.09, s.n. a 5.

Bõe la d tõe n maan n sõng d Biibl karen-biisã tɩ b nong Wẽnnaam ne b sũy fãa?

D tõe n sagl-b lame tɩ b karemd Biiblã daar fãa la b bʋgsd b sẽn karemdã zugu. D leb n tõe n zãms-b-la pʋʋsgo.—w20.11, s.n. a 4.

Tʋm-tʋmd a Poll sẽn yeel tɩ ‘na n tũu ne Kiristã tɩ nebã fãa paam vɩɩmã,’ yaa ãnd dãmba?—1 Kor. 15:22.

A Poll ra pa rat n yeel tɩ nebã fãa na n vʋʋgame ye. A ra gomda sẽn paam-b zaeebã yelle. ‘Wẽnnaam welga bãmb tɩ b yɩ yembr ne a Zeezi Kiristi.’ (1 Kor. 1:2; 15:18)—w20.12, s.n. a 5-6.

Bõe la sẽn paam-b zaeebã na n maane, b sã n wa ‘toeem nif kamsg pʋgẽ, yaoolem baorgã peebg sasa’?—1 Kor. 15:51-53.

B na n naaga Kiristã n kɩɩm nebã ne kut rasaare. (Vẽn. 2:26, 27)—w20.12, s.n. 12-13.