1-2. Pagbã sẽn kẽng a Zeezi yaoogẽ wã, bõe la malɛkã yeel-ba, la bõe la a Zeezi mengã puk n yeel-ba?

A ZEEZI kũumã ra-yɩt-n-daarã, pagb sẽn yaa wẽn-zoɛtb n yik ne tõd-beoog n na n kẽng a yaoogẽ wã. Yɩɩ yʋʋmd 33 Nizã kiuug rasem 16. Sũ-sãangã ra ket n namsd-b lame, bala a Zeezi Kirist ra yaa b Zu-soaba. B kẽnga ne ka-rãmb sẽn tar yũ-noogo, n na n tɩ maneg a kũumã. La b sẽn ta wã, b mikame tɩ yaoogã yaa vɩʋʋgo, tɩ ling-ba! Malɛk n zĩnd be, n yeel pʋg-kãensã sẽn da yaa a Zeezi karen-biisã t’a vʋʋgame. A paasame yaa: “B renga yãmb taoor n dabd Galile. Yãmb na n yãa bãmb beenẽ.”—Mat. 28:1-7; Luk 23:56; 24:10.

² Pagbã sẽn wa n lebg n loogdẽ wã, a Zeezi meng puka b taoore, n yeel-b yaa: “Kẽng-y n tɩ togs-y m saam-biisã kibarã, sẽn na yɩl tɩ b kẽng Galile, tɩ be la b na n yã maam.” (Mat. 28:10) Tog n yaa bũmb sẽn tar yõod wʋsg la a Zeezi ra tar n dat n tigim a karen-biisã n togse. Bala, a vʋʋgrã poore, tigs-kãng siglgã n yɩ pipi bũmb a sẽn maane.

3-4. Bõe n wilgd tɩ pa a Zeezi tʋm-tʋmdbã bal la a sẽn kõ noor ning sẽn be Matiye 28:19, 20 wã? (Ges-y sebrã pipi neng fotã.)

³ Karm-y Matiye 28:16-20. Tigsgã sasa, a Zeezi wilga tʋʋm-kãseng a karen-biisã sẽn na n tʋm pipi kiris-nebã wakate. Tʋʋm-kãng me la tõnd sẽn tʋmd rũndã-rũndã wã. Baraarã a Zeezi yeelame yaa: “Bɩ y kẽng n tɩ sõng buud fãa neb tɩ b lebg mam karen-biisi, . . . la y zãms bãmb tɩ b sak bũmb nins fãa mam sẽn yeel yãmbã.”

 ⁴ A Zeezi ratame t’a poorẽ dãmbã fãa moon koe-noogã. Pa a tʋm-tʋmdb 11 wã sẽn kell n maan sɩd ne-a wã bal ye. Bõe n wilgd rẽ? A sẽn kɩt tɩ b tigim Galile tãngã zug t’a kõ noor tɩ b tɩ sõng nebã tɩ b lebg a karen-biisã, pa a tʋm-tʋmdbã bal n zĩnd be ye. Tẽeg-y tɩ malɛkã yeela pagbã yaa: “Yãmb na n yãa bãmb [Galile].” Dẽnd pagb sẽn yaa wẽn-sakdb me tog n zĩnda be. Sẽn paas me, tʋm-tʋmd a Poll meng yeelame t’a Zeezi “vẽnega b meng ne saam-biis kobs-nu la zak wakat-yɛnga.” (1 Kor. 15:6) Yɩɩ yɛ?

5. Bõe la 1 Korẽnt rãmb 15:6 sõngd tõnd tɩ d bãnge?

⁵ D tara bʋʋm n na n yeel t’a Poll sẽn wa n togsd goam nins sẽn be 1 Korẽnt rãmb 15:6, a ra tagsda tigsg ning sẽn zĩnd Galile, tɩ b gomd rẽ yell Matiye 28 pʋgẽ wã. Bõe yĩnga? Pipi, a Zeezi karen-biisã fãa la bal ra yaa Galile neba. Dẽnd sẽn na yɩl n paam n tigim neb wʋsgo, Galile tãngã zugã n da são sẽn na n yɩ ned zakẽ Zerizalɛm. Yiib-n-soaba, a Zeezi vʋʋgrã poore, a ra zoe n talla tigsg ne a tʋm-tʋmdb 11 wã ned zakẽ Zerizalɛm. Sã n da yaa bãmb bal la a Zeezi rat tɩ b moon koe-noogã la b sõng nebã tɩ b lebg a karen-biisi, a ra na n kell n togs-b-la rẽ b sẽn wa n tigim taab Zerizalɛmmã, n da le kos bãmb ne pagb la neb a taab tɩ b tigim Galile ye.—Luk 24:33, 36.

6. Bõe yĩng tɩ d yetẽ tɩ Matiye 28:20 wã wilgdame tɩ rũndã-rũndã kiris-nebã me segd n sõnga nebã tɩ b lebg karen-biisi? Bõe n wilgd tɩ neb n tũud noorã rũndã-rũndã?

⁶ Bũmb a to me n wilgd tɩ noorã a Zeezi sẽn kõ wã pa tʋm-tʋmdb 11 wã bala, la tɩ leb n pa pipi kiris-nebã bal ye. A Zeezi goamã baasgẽ, a yeelame yaa: “Mam bee ne yãmb daar fãa, hal tɩ ta dũniyã saabo.” (Mat. 28:20) Sɩd me, wa a Zeezi sẽn yeelã, rũndã-rũndã, neb ka tɛk n sõngd buud fãa neb tɩ b lebgd a karen-biisi. Yãmb we n tags n gese! Yʋʋmd fãa, na maan neb 300 000 sẽn yaa a Zeezi karen-biis n deegd lisgu, n lebgd a Zeova Kaset rãmba.

7. Bõe yell la d na n gome, la yaa bõe yĩnga?

⁷ Neb wʋsg sẽn zãmsd Biiblã ne a Zeova Kaset rãmbã wat n deega lisgu. La kẽer me zãmsda Biiblã ne-d n kaoose, n pa gomd lisg reegr ye. B nonga Biiblã zãmsgã, la b pa modgd n na n bɩɩs b tẽebã, n wa reeg lisg ye. D kɩsa sɩd tɩ y sã n zãmsd ned Biiblã, y rata ne y sũur fãa n sõng a soabã t’a tũ bũmb nins a sẽn bãngã, n wa lebg Kiristã karen-biiga. Sõs-kãnga pʋgẽ, d na n yãa d sẽn tõe n maan to-to tɩ zãmsgã kẽed karen-biigã sũuri, tɩ kɩt t’a nong a Zeova, la d sẽn tõe n sõng-a to-to t’a tẽebã bɩ. Bõe yĩng tɩ d na n gom rẽ yelle? Bala, mi n yaa tɩlɛ tɩ d bao n bãng d sã n segd n basame n pa le zãmsd ned Biiblã, bɩ d sã n na n ket n zãmsd-a lame.

8. Bõe yĩng tɩ yɩl n sõng ned t’a wa nong a Zeova pa nana?

⁸ A Zeova ratame tɩ ned sã n na n tũ-a bɩ yɩ nonglem yĩnga. Dẽnd tõnd daabã yaa d sõng karen-biigã t’a bãng t’a Zeova rata a neere, la t’a nong-a-la wʋsgo. D rat n sõng-a lame t’a bãng t’a Zeova yaa “kɩɩbs ba,” la “pʋg-kõap sõangda.” (Yɩɩn. 68:6) Sẽn zãmsd-a Biiblã sã n wa neẽ tɩ Wẽnnaam sɩd nong-a lame, na n kẽe a sũurã, tɩ yẽ me sẽn nong Wẽnnaam to-to wã maneg n paam pãnga. Yaa toog ne Biiblã karen-biis kẽer tɩ b sak n deeg t’a Zeova nong-b lame, bala, b pa paam tɩ b ba-roakã wilg-b nonglem ye. (2 Tɩm.  3:1, 3) Y sã n zãmsd ned Biiblã, yɩta sõma tɩ y sõng a soabã t’a bʋgs a Zeova zʋgã sẽn yaa sõma zãngã zugu. Sõng-y-yã-a t’a bãng tɩ Wẽnnaam sẽn yaa d Ba sẽn nong-dã ratame t’a wa paam vɩɩm sẽn kõn sa wã, la t’a na n sõng-a-la rẽ yĩnga. Bõe me la d tõe n maane?

9-10. Seb-bʋs la d segd n tall n zãms nebã Biiblã, la yaa bõe yĩnga?

⁹ Tall-y “Bõe la d tõe n bãng Biiblã pʋgẽ?” sebrã, ne “D sẽn tõe n pa Wẽnnaam nonglmã pʋgẽ to-to” sebrã, n sõng y karen-biisã. B yiisa seb-kãensã sẽn na yɩl tɩ d tall n sõng d karen-biisã tɩ b wa nong a Zeova. Wala makre, ad goam kẽer b sẽn wɛgs Bãng Biiblã sebrã sak a 1 wã pʋgẽ: Ninsaalbã yell paka Wẽnnaam bɩ? Nebã sẽn namsdã pa noom Wẽnnaam ye, Y tõe n yɩɩ a Zeova zoa bɩ? La Pa Wẽnnaam nonglmã pʋgẽ sebrã yẽ? Seb-kãng na n sõnga karen-biigã t’a bãng Biiblã saglsã tũub sẽn tõe n naf-a to-to, la sõng-a t’a paam zood sõma ne a Zeova. Baa y sã n zoe n zãmsa neb a taab Biiblã ne  seb-kãensã maasem, y sã n na n tɩ zãms ned fãa, bɩ y segl y menga, la y modg tɩ zãmsgã zems ne karen-biig fãa yɛl sẽn yaa to-to wã.

¹⁰ Ned yãmb sẽn zãmsd Biiblã sã n wa rat tɩ y sõs bũmb zugu, tɩ yaool n be sebr a to pʋgẽ, n pa sebr d sẽn tar n zãmsd nebã Biiblã, y maanda wãna? Y tõe n yeel-a lame tɩ yẽ mengã bao sẽk n karem seb-kãng a toore. Woto y paamd n kell n kẽnga taoore, n zãms-a Biiblã ne sɛb a yiibã yell d sẽn zoe n gomã, tɩ bũmb ra tiis zãmsgã ye.

11. D sã n wa zãmsd ned Biiblã, wakat bʋg la d segd n sɩngd zãmsgã ne pʋʋsg la d baasd ne pʋʋsgo? Bõe la y tõe n maan n sõng karen-biigã t’a bãng pʋʋsgã yõodo?

¹¹ Sɩng-y zãmsg fãa ne pʋʋsgo. D sã n wa zãmsd ned Biiblã, naoor wʋsgo, yaa sõma tɩ d sɩngd zãmsgã ne pʋʋsg la d baasd ne pʋʋsgo, n da bas tɩ kaoos ye. D segd n sõnga karen-biigã t’a bãng tɩ yaa vʋʋsem sõngã bal n tõe n sõng-d tɩ d wʋm Wẽnnaam Gomdã võor sõma. Rẽ wɛɛngẽ, koe-moondb kẽer sã n wa rat n sõng karen-biig t’a bãng pʋʋsgã yõodo, b rengd n karma Zak 1:5 wã. Be b yetame yaa: “Ned sã n be yãmb sʋkã tɩ yam paoog-a bɩ a kell n kos Wẽnnaam tɩ b na n kõ-a lame.” Rẽ poore, b sokda karen-biigã yaa: “Ned sã n dat n paam yam, bõe la a segd n maane?” Karen-biigã na n sak n deegame t’a segd n pʋʋsa Wẽnnaam.

12. Wãn to la y tõe n tũnug ne Yɩɩn-sõamyã 139:2-4 n sõng y karen-biig t’a pelgd a pʋg n pʋʋsd a Zeova?

¹² Zãms-y karen-biigã a sẽn segd n pʋʋs to-to. Wilg-y-yã-a t’a Zeova ratame t’a pelgd a pʋg n pʋʋsd-a. Sõng-y-yã-a t’a bãng t’a pʋʋsgã pʋgẽ, a tõe n togsa a Zeova a sẽn tagsde, baa yaa bũmb a sẽn pa na n sak n togs ned a to. A Zeova pʋd n zoe n mii sẽn be d sũurẽ wã fãa. (Karm-y Yɩɩn-sõamyã 139:2-4.) D leb n tõe n wilga d karen-biigã t’a kos Wẽnnaam t’a sõng-a t’a tõog n bas a tags-kɛgã la a minim-wẽnsã. La ned y sẽn sɩng n zãmsd Biiblã sã n nong Nowɛllã ne a sũur fãa, n yaool n miẽ tɩ pa sõma, bala yita ziri tũudmã pʋgẽ? Yeel-y-yã-a t’a togs a Zeova sẽn be a sũurẽ wã takɩ, la a kos-a sõngr n tõog n nong bũmb nins Wẽnnaam sẽn nongã.—Yɩɩn. 97:10.

13. a) Bõe yĩng tɩ d segd n sõng d karen-biigã t’a sɩng tigissã waoong la d da bas tɩ kaoose? b) Bõe la d tõe n maan tɩ sõng karen-biigã t’a sã n wa be tigissã zĩigẽ bɩ a yam gãe?

¹³ Sõng-y karen-biigã t’a sɩng tigissã waoongo, la y ra bas tɩ kaoos ye. Karen-biigã sẽn wʋmd la a yãt bũmb nins tigissã sasa wã tõe n kɩtame t’a wa sak n tũ a Zeova. Wilg-y-yã-a Bõe la b maand Rĩung roogẽ? video wã, la y kos-a t’a wa tũ yãmb n kẽng tigsgã. Sã n tõe bɩ y yeel-a tɩ y na n wa rɩk-a lame. Y sã n na n tɩ zãms-a Biiblã, yɩta sõma tɩ koe-moondb toor-toor yãagd yãmba. Woto, y karen-biigã na n minima tigingã neb a taabã, la na n kɩtame t’a sã n wa be tigissã zĩigẽ bɩ a yam gãe.

14. Bõe n tõe n sõng Biibl karen-biig t’a tẽebã bɩ?

¹⁴ D raabã yaa d sõng neb nins d sẽn zãmsd Biiblã tɩ b tẽebã bɩ. (Efɛ. 4:13) Ned sã n sak tɩ d na n zãms-a Biiblã, yaa zãmsgã sẽn na n naf yẽ mengã to-to wã yell la a wae n tagsd n yɩɩda. La a sẽn nong a Zeova to-to wã sã n paasdẽ, a na n wa tagsda a sẽn tõe n maan n sõng neb a taabã me, baa tigingã nebã. (Mat. 22:37-39) Sã n mikame tɩ zemsame, bɩ y wilg-a tɩ yẽ me tõe n kõta ligd n teend Rĩungã tʋʋmde, la tɩ yaa zu-zẽkr bũmbu.

15. D karen-biig sã n wa tar zu-loɛɛga, bõe la d tõe n maan n sõng-a?

 ¹⁵ Wilg-y karen-biigã a sẽn tõe n maane, a sã n wa tar zu-loɛɛga. Wala makre, y karen-biig sẽn yaa koe-moond sẽn nan pa reeg lisg sã n wa togs yãmb tɩ tigingã ned n sãam a sũuri, y na n maana wãna? Y pa segd n bao n wilg ãnd n tar bʋʋm ye. Sẽn são yaa y wilg-a Biiblã sẽn yet bũmb ning mo-yõsã welgr wɛɛngẽ wã. Rẽ, a bãngdame t’a tõe n yãka yam n kõ a soabã sugri, la t’a sã n pa tõe rẽ, a segd n tɩ maaga a yĩng n gom ne-a, a sẽn dat tɩ laafɩ le zĩnd b sʋkã yĩnga. (Ges-y Matiye 18:15.) Sõng-y-yã-a t’a bãng a sẽn na n tɩ yeel a soabã bũmb ningã. Wilg-y-yã-a a sẽn tõe n maan vaeesg to-to tõnd sɛbã pʋgẽ, n paam sagls n tõog n tɩ welg yellã. A sã n deng n paam sõngr sõma yɛl a woto buud welgr wɛɛngẽ, n yaool n deeg lisgu, a lisgã poore, a na n tõog n talla zems-n-taar sõma ne tigingã nebã.

16. Bõe yĩng tɩ d segd n talld koe-moondb a taab n kẽnd n zãmsd nebã Biiblã?

¹⁶ Talld-y koe-moondb a taab tɩ y kẽnd n zãmsd y karen-biigã Biiblã, tɩ tigims sull yel-gɛtã kaagr sasa me bɩ y kos yel-gɛtã t’a tũ yãmb n kẽnge. Bõe yĩnga? Bala yɛl nins d sẽn zoe n gomã, n paas yɛl a taab wɛɛngẽ, tõe tɩ yaa koe-moondb a taabã n tõe n bãng n sõng karen-biigã n yɩɩd yãmb mengã. Wala makre, tõe t’a maka sɩgaarã basg naoor wʋsg n pa tõog ye. Sã n mikame tɩ koe-moond n be n da mao ne minim-kãngã hal n wa tõoge, bɩ y kɩt t’a yãag yãmba. A na n tõog n kõo karen-biigã sagls takɩ sẽn na n sõng-a yel-kãng wɛɛngẽ. Sã n yaa koe-moond a to n tũ yãmba, tɩ y tagsdẽ t’a minimã yɩɩda yãmba, y tõe n kos-a lame t’a lʋɩ taoor zãmsgã wakate. Koe-moondb a taab sã n yãagd yãmba, b minimã tõe n nafa karen-biigã wʋsgo. Tẽeg-y tɩ d raabã yaa d sõng karen-biigã t’a tẽebã bɩ.

17-18. Y sã n wa rat n bãng y sã n segd n basa karen-biig zãmsgo, bõe yell la y segd n tagse?

¹⁷ Y karen-biig sã n pa modg n na n toeem bũmb a vɩɩmã pʋgẽ, y tog n soka y meng y sã n segd n ket n zãmsd-a lame. La y segd n deng n tagsa a soabã bãngrã la a minimã sẽn yaa to-to wã yelle. Bala kẽer nengẽ kaoosdame tɩ b yaool n sɩng bũmb kẽer toeengo, tɩ sãnda nengẽ pa kaoosd ye. Rẽ wã, sok-y y meng yaa: ‘Mam karen-biigã sẽn modgd to-to wã zemsa ne a yɛlã sẽn yaa to-to wã bɩ?’ ‘A sɩngame n ‘sakd’ n tũud a sẽn zãmsdã bɩ?’ (Mat. 28:20) Baa sẽn tõe n kaoos tɩ Biibl karen-biig yaool n lebg koe-moondã, a segd n toeemda bũmb kẽer a vɩɩmã pʋgẽ bilf-bilfu.

¹⁸ La y sã n zãmsa ned Biiblã n kaoose, t’a pa maan baa fʋɩ sẽn wilgd tɩ zãmsgã tara yõod ne-a, y maanda wãna? D rɩk  makr wa a sẽn na n zãms Bãng Biiblã sebrã n sa, n yaool n zɩ n wa tigissã, hal baa a Zeezi kũumã tẽegr ye. Tõe meng tɩ y sɩnga Pa Wẽnnaam nonglmã sebrã zãmsg ne-a. Sẽn paase, a nong n vaanda zãmsgã bʋʋm-faad yĩnga. Sã n yaa woto, yaa sõma tɩ y pelg y pʋg n gom ne-a vẽeneg-vẽenega. *

19. Y sã n zãmsd ned Biiblã, tɩ wa wõnd a pa get tɩ zãmsgã tara yõod ne-a, bõe la y tõe n yeel-a, la bõe la y segd n bao n bãnge?

¹⁹ Y sã n wa na n pelg y pʋg n gom rẽ yell ne karen-biigã, y tõe n sok-a lame yaa: ‘Bõe n kɩt tɩ yaa toog ne foo tɩ f lebg a Zeova Kaset soaba?’ Tõe t’a leok t’a nonga Biiblã zãmsgã, la a pa na n tol n lebg a Zeova Kaset soab ye. Y sã n zãmsd-a-la Biiblã hal sẽn kaoose, t’a tagsd woto, tõe tɩ y sẽn basd a zãmsg n são. La wakat ninga, karen-biigã tõe n togsa yãmb bũmb sẽn kɩt tɩ yaa toog ne-a t’a lebg a Zeova Kaset soaba. Wala makre, tõe t’a tagsdame t’a kõn tol n tõog n moon zak-zak ye. Y sã n bãng a zu-loɛɛgã, y na n tõog n sõng-a-la sõma.

20. Sẽn zems ne Tʋʋm 13:48 wã, ãnd rãmb la d segd n ket n zamsd Biiblã?

²⁰ Togs sɩdã, Biiblã karen-biis kẽer manesem yaa wa Israyɛll neb kẽer sẽn da be no-rɛɛs a Ezekɩyɛll wakatẽ wã. A Zeova goma nin-kãens yell ne a Ezekɩyɛlle, n yeel yaa: “Ne bãmba, fo yaa wa yɩɩn-yɩɩnd sẽn tar koe-noogo, n yɩɩnd ne yʋʋm-teed tɩ noomẽ. Bãmb kelgda fo goamã, la b ka rɩkd-a n ning a nao-kẽndr zug ye. B kelgda f saglsã la b ka tũud ye.” (Eze. 33:32) Tõe tɩ yaa toog ne tõnd tɩ d yeel ned tɩ d na n basame n pa le zãmsd-a Biiblã ye. La d tẽeg tɩ “wakatã sẽn ketã lebga bilfu.” (1 Kor. 7:29) Ned sã n pa modgd baa bilfu, bɩ d ra ket n zãmsd-a Biiblã ye. Sẽn são yaa d rɩk d sẽkã n bao ned “sẽn tar yam ning sẽn zems ne vɩɩm sẽn ka sɛtã.”—Karm-y Tʋʋm 13:48.

21. Vɛrse-bʋg n yaa yʋʋmd 2020 wã vɛrse? La bõe la vɛrse wã na n sõng-d tɩ d modg n maane?

²¹ Yʋʋmd 2020 vɛrse wã na n sõng-d lame tɩ d maneg n tags d sẽn tõe n maan to-to n sõng nebã tɩ b lebg a Zeezi karen-biisã yell sõma. Yɩɩ noor a Zeezi sẽn kõ, a sẽn tigim a karen-biisã Galile tãngã zug n sõsã. A yeel-b lame yaa: ‘Bɩ y kẽng n tɩ sõng . . . nebã tɩ b lebg mam karen-biisi, n lis bãmba.’—Mat. 28:19.