1-2. Yel-bʋs n namsd d tẽed-n-taas kẽere, la rẽ tõe n waa ne zu-loe-bʋs me?

D RƖK makr ne zu-loees a tãabo: Saam-biig sẽn yaa bi-bɩɩg n kẽng logtor yiri, tɩ logtoɛɛmbã yeel-a t’a bẽeda bã-toaag sẽn na n komsd-a bilf-bilfu. Saam-biig sẽn tar yʋʋm 50 la zak tʋʋm n sãame, t’a baood tʋʋm ne a sũur fãa n pa paamdẽ ye. Saam-bi-poak yʋʋm sẽn vẽsg sũur n sãamde, bala wakat fãa, a neeme t’a pa le tõe n tʋm a Zeova tʋʋmã wa pĩndã ye.

² Yɛl a woto buud sã n paam-yã, tõe n kɩtame tɩ y wa tagsdẽ tɩ y ka võor ye. Yaa yɛl sẽn tõe n kɩt tɩ ned sũ-noog sa fasɩ, t’a pa le nand a menga, la kɩt meng t’a pa le noom ne a taabã ye.

3. A Sʋɩtãan ne a dũniyã nebã tagsg yaa wãn ne ninsaal vɩɩm?

³ Dũni-kãnga nebã rɩkda a Sʋɩtãan togs-n-taare. Sã n yaa ne a Sʋɩtãan tagsgo, ninsaal vɩɩmã ka yõod baa-baa. Baa ne a sẽn da mi vẽeneg t’a Awa sã n kɩɩs Wẽnnaam, a na n kiime wã, a belg-a lame t’a sã n kɩɩse, a na n paam n sooga a menga. A Sʋɩtãan n so ligd baoorã siglsã, politikã siglsã, la dũniyã tũudum toor-toorã. Dẽnd pa lingr la tʋʋmã taoor dãmb la lɛɛbdb wʋsgo, n paas politikã taoor dãmba, la tũudmã taoor dãmb sẽn pa nand nebã, n getẽ tɩ ninsaal vɩɩmã pa baa fʋɩ wã ye.

4. Bõe yell la d na n gom sõs-kãnga pʋgẽ?

⁴ A Zeova yẽ pa rat tɩ d tagsdẽ tɩ d mengã wall d vɩɩmã ka yõod ye. D sã n tar zu-loɛɛg sẽn tõe n kɩt tɩ d wa pa le  nand d menga, a sõngda tõndo. (Yɩɩn. 136:23, Wẽnnaam Sebre, 1983; Rom. 12:3) Sõs-kãnga pʋgẽ, d na n goma a Zeova sẽn sõngd tõnd to-to: 1) Bãag sã n wa tar-d n namsdẽ, 2) ligdã yell sã n wa yaa toog ne-do, la 3) kʋʋlem sã n wa kɩt tɩ d tagsdẽ tɩ d pa le tõe n maan bõn-sõng a Zeova tũudmã pʋgẽ wa pĩndã. La d na n deng n goma bũmb ning sẽn kɩt tɩ d tõe n kɩs sɩd t’a Zeova nanda d ned kam fãa wã.

5. Bõe n kɩt tɩ y miẽ t’a Zeova nanda ninsaalbã?

⁵ Wẽnnaam naana tõnd ne tẽng tom, la d yõod yɩɩda tẽngã tom hal zĩig sẽn zãre. (Sɩng. 2:7) Ad bũmb a wãn sẽn wilgd t’a Zeova nanda tõndo: A naana tõnd tɩ d tõe n dɩk a togs-n-taare, n tall zʋg-sõma. (Sɩng. 1:27) A sẽn naan-d woto wã kɩtame tɩ d yõod yɩɩd bũmb a taabã fãa a sẽn naan tɩ be tẽngã zugã. A kɩtame meng tɩ yaa ninsaal n segd n ges tẽngã la rũmsã yelle.—Yɩɩn. 8:5-9.

6. Bõe me n kɩt tɩ d miẽ tɩ baa ne d sẽn pa zems zãngã, a Zeova nanda tõndo?

⁶ Baa a Ãdem yel-wẽndã poore, a Zeova kell n wilgame t’a nanda ninsaalbã. Yaa a sẽn nand tõnd wʋsgã la a sẽn kɩt t’a Bi-nongr a Zeezi wa ki tɩ yɩ maoongo, n na n dol tõnd yel-wẽnã. (1 Zã 4:9, 10) Ne maoon-kãng maasem yĩnga, a Zeova na n vʋʋga neb nins fãa sẽn maan kaalem a Ãdem yel-wẽndã yĩngã, “nin-tɩrsã ne sẽn pa-b nin-tɩrsã me.” (Tʋʋ. 24:15) Biiblã wilgdame tɩ tõnd tara yõod wʋsg Wẽnnaam nifẽ, baa d keelem wall d tarem bɩ d yʋʋm sẽn yaa to-to fãa.—Tʋʋ. 10:34, 35.

7. Bõe me n kɩt tɩ sẽn tũud-b a Zeova wã kɩs sɩd t’a nand-b lame?

⁷ Bũmb a taab me n kɩt tɩ d kɩs sɩd t’a Zeova nanda tõndo. A sõnga tõnd tɩ d bãng-a, la a ra gũusd n get d sẽn maand bũmb nins tɩ wilgdẽ tɩ d nonga koe-noogã. (Zã 6:44) A sẽn wa n yã tɩ d rata a zoodã, yẽ me sak n lebga d zoa. (Zak 4:8) Sẽn paas me, a getame tɩ d paamd zãmsg wakat fãa, tɩ wilgdẽ t’a sɩd nand-d lame. A mii d ned kam fãa sẽn yaa a soab rũndã-rũndã wã, la d sẽn tõe n wa toeem n lebg sõma to-to wã. A kibinda tõndo, a sẽn nong-dã yĩnga. (Yel. 3:11, 12) Woto fãa yaa kaset sẽn wilgd vẽeneg t’a Zeova nanda tõndo!

8. Wãn to la Yɩɩn-sõamyã 18:28-30 wã sẽn yet bũmb ningã tõe n sõng-do, tɩ d toeem d tagsg sẽn yaa a soab d zu-loeesã zugã?

⁸ Neb n da tagsd tɩ rĩm a Davɩɩd ka bark ye. La a Davɩɩd yẽ ra miime t’a Zeova nong-a lame, n sõngd-a. A sẽn da mi rẽ wã sõng-a lame t’a tõog toog a zu-loeesã pʋgẽ, n kell n tall tagsg sẽn zemse. (2 Sãm. 16:5-7) D sũur sã n sãame, wall yaa zu-loees n kɩt tɩ pa nana ne-do, a Zeova tõe n sõng-d lame tɩ tagsa nins sẽn wat d yamẽ wã lebg sõma. A tõe n sõng-d lame me tɩ d mao ne zu-loɛɛg buud fãa. (Karm-y Yɩɩn-sõamyã 18:28-30.) A Zeova sã n teend tõndo, bũmb pa tõe n kɩt tɩ d wa pa le tũud-a ne sũ-noog ye. (Rom. 8:31) D na n goma zu-loees a tãab yelle. D sã n wa tar zu-loe-kãense, yaa tɩlɛ tɩ d tẽegdẽ t’a Zeova nong-d lame, la t’a nand-d lame.

9. Bãag tõe n kɩtame tɩ ned wa tagsd bõe a mengã zugu?

⁹ Bãag ning tõe n kɩtame tɩ d sũur sãam wʋsgo, hal tɩ d wa tagsdẽ meng tɩ d pa le tar yõod ne ned baa a yembr ye. D sẽn mi tɩ nebã neeme tɩ bũmb kẽer la d pa le tõe n maanã, wall sẽn lebg tɩlɛ tɩ nebã sõng-dã tõe n wa yaa yãnd ne-do. Baa nebã pa mi  tɩ d bẽedame, tõnd mengã sẽn ne tɩ bũmb kẽer la d pa le tõe n maanã tõe n kɩtame tɩ yãnd tar-do. Sã n wa yaa woto, a Zeova kengda d raoodo. Wãn to?

10. Wa b sẽn wilg Yel-bũn 12:25 pʋgẽ wã, d sã n wa bẽedẽ, bõe n tõe n sõng-do?

¹⁰ D sã n wa bẽedẽ, “gom-noog” tõe n kenga d pɛlga. (Karm-y Yel-bũn 12:25.) A Zeova kɩtame tɩ b gʋls gom-nood wʋsg Biiblã pʋgẽ, goam sẽn tẽegd tõnd tɩ baa d sã n bẽedame, d tara yõod wʋsg a Zeova nifẽ. (Yɩɩn. 31:20; 41:4) D sã n karemd Biiblã, la d karemd-a n yɩlemdẽ, a Zeova tõe n sõng-d lame tɩ d mao tɩ tagsa sẽn komsd raood ra tõog-d ye.

11. Bõe la a Zeova maan n sõng d tẽed-n-taag a ye?

¹¹ D gom d tẽed-n-taag a Zorz yelle. A bi-bɩɩlem wakat la bãag yõk-a, tɩ pa yã n kaoos la koms-a, hal t’a ra tagsdẽ t’a ka le tar yõod ye. Ad a sẽn yeele: “Bãagã sẽn kɩt tɩ m tagsg lebg a soab m mengã zugã ling-m-lame. Nebã sẽn da get-m to-to wã me ra yaa yãnd ne-ma, tɩ m yaool n da pa segl m meng n na n tõog yãnd a woto ye. Bãagã sẽn wa n paamd pãngã, m da tagsda m vɩɩmã sẽn na n lebg a soabã. Sãama m sũur zãnga, tɩ m da yõkd a Zeova sɛɛg n kot a sõngre.” Bõe la a Zeova maan n sõng-a? A yeelame: “M sẽn da pa le tõe n tags bũmb zug n kaoosã, neb n sagl-m tɩ m bao Yɩɩn-sõamyã sebrã zĩis nins sẽn wilgd tɩ sẽn tũud-b a Zeova wã yell pak-a lame wã, n karem vɛrse a wãn bala. M da lebgd n karemda vɛrse-kãens daar fãa. M mikame tɩ sɩd belsd-m lame, la kengd m pɛlga. Tarẽ-n-tarẽ, nebã wa n neeme tɩ m nengã bee laad n yɩɩd pĩndã. Kẽer meng ra yetame tɩ mam sẽn baas n tar sũ-noogã kengda b raoodo. M bãngame bal tɩ yaa a Zeova n leok m pʋʋsgã! A sõng-m lame tɩ  m tagsg sẽn da lebg a soab m mengã zugã toeeme. Sẽn da pak-m masã n yɩɩdã, yaa a Zeova tagsg sẽn yaa a soab mam zug baa ne m bãagã.”

12. Bãag sã n tar-y n namsdẽ, y maanda a wãn n paam t’a Zeova sõng-yã?

¹² Bãag sã n tar-y n namsdẽ, bɩ y bas y yam t’a Zeova mii yãmb toogã fãa. Yõk-y-yã a sɛɛg n kos a sõngr sẽn na yɩl n tall tagsg sẽn zems y yellã zugu. Gẽes-y Biiblã pʋgẽ, tɩ y na n yãa a Zeova goam sẽn belsde. Bʋgsd-y vɛrse kẽer zugu, vɛrse-rãmb sẽn wilgd t’a Zeova sɩd nanda sẽn tũud-b yẽ wã. Woto, y na n yãame t’a Zeova sõngda neb nins fãa sẽn maand sɩd ne-a wã.—Yɩɩn. 84:12.

13. Zak soab tʋʋm sã n sãame, tõe n kɩtame t’a wa tagsd bõe a meng zugu?

¹³ Zak-soben-dãmbã fãa ratame n tõog n ges tɩ b zakã rãmb paamd bũmb nins sẽn yaa tɩlɛ ne-bã. La d rɩk makr ne zak soab tʋʋm sẽn sãame, tɩ yaool n pa a yell ye. A maanda a sẽn tõe fãa n na n bao tʋʋmd a to, la pa yãkd neng ye. Sã n wa yaa woto, tõe n kɩtame t’a tagsdẽ t’a ka võor ye. La a sã n tagsd a Zeova pʋlemsã yell n yɩɩda, tõe n sõng-a lame. Wãn to?

14. Wilg-y bũmb a wãn sẽn kɩt t’a Zeova pidsd a pʋlemsã.

¹⁴ Wakat fãa, a Zeova pidsda a pʋlemsã. (Zoz. 21:45; 23:14) Bõe yĩng t’a maand woto? Bʋʋmã waoogame. Pipi, a sã n pa maan woto, tõe n sãama a yʋʋrã. A Zeova yeelame t’a na n gesa neb nins fãa sẽn maand sɩd ne-a wã yelle. Rẽ n so t’a getẽ tɩ yaa tɩlɛ ne-a t’a pids a sẽn yeelã. (Yɩɩn. 31:2-4) Sẽn paase, tõnd yaa a Zeova zakã neba. A miime t’a sã n pa ges d yelle, d sũur na n sãama wʋsgo. A pʋlmame t’a na n kõ-d-la bũmb nins fãa sẽn yaa tɩlɛ  vɩɩmã pʋgẽ, la d tẽebã kengr yĩngã. Bũmb pa tõe t’a pa pids rẽ ye.—Mat. 6:30-33; 24:45.

15. a) Yel-bʋg n paam pipi kiris-nebã hal tɩ pa yɩ nana? b) Yɩɩn-sõamyã 37:18, 19 wã kɩtame tɩ d tõe n bas d yam ne bõe?

¹⁵ D sã n tẽegd bũmb nins sẽn kɩt t’a Zeova pidsd a pʋlemsã, tõe n sõngame tɩ d tõog toogo, ligdã yell sã n wa yaa toog ne-do. D tẽeg yell a ye sẽn zĩnd pipi kiris-nebã wakate. B sẽn wa n yik n namsd Zerizalɛm kiris-nebã, ‘b fãa sãeegame,’ sã n pa “tʋm-tʋmdbã bala.” (Tʋʋ. 8:1) Woto waa ne zu-loe-bʋse? Ligd zu-loeese. Wõnda kiris-neb tʋʋm n sãame, tɩ kẽer bõn b zags me. La a Zeova pa bas-b ye. Yellã pa kɩt me tɩ b sũ-noogã sa ye. (Tʋʋ. 8:4; Ebre. 13:5, 6; Zak 1:2, 3) A Zeova teel-b lame. A na n teela tõnd me.—Karm-y Yɩɩn-sõamyã 37:18, 19.

16. Bõe n tõe n wa kɩt tɩ d tagsdẽ t’a Zeova pa nand bũmb nins d sẽn maand a tũudmã pʋgẽ wã?

¹⁶ D yʋʋmã sã n wa vẽsgdẽ, d tõe n wa tagsdame tɩ bũmb nins d sẽn tõe n maan a Zeova tũudmã pʋgẽ wã ka võor ye. Wõnda rĩm a Davɩɩd sẽn wa n neẽ t’a kʋʋndame wã, a ra yɛɛsda a na n wa tagsd woto. (Yɩɩn. 71:9) La a Zeova tõe n sõng-d lame. Wãn to?

17. Saam-bi-poak a Zeeri kibarã wilgda tõnd bõe?

¹⁷ D gom saam-bi-poak yʋʋr sẽn boond t’a Zeeri yelle. Tigsg sẽn wilgd d sẽn segd n ges siglgã rot yell to-to wã la b ra rat n maan b Rĩungã roogẽ. B yeel-a lame t’a wa, la a ra pa rat n kẽng ye. A yeelame: “M kʋʋlame, m yaa pʋg-kõore, m pa mi fʋɩ rot yell gesg wɛɛngẽ! Mam pa na n tall yõod be ye.” Tigsgã ket tɩ beoogo, a pʋʋsa a Zeova ne yʋngã, n togs  sẽn be a sũurẽ wã. Vẽkembeoogã, a taa Rĩungã roogẽ, n da ket n sokd a meng a waoongã sã n tara yõodo. La tigsgã sasa, sõsd n wilg tɩ ned fãa sẽn sak n wa t’a Zeova na n zãms-a bũmbã, yaa wa a sẽn kõt a Zeova kũun yõod sẽn yɩɩd minim bɩ bãngre. A Zeeri yeelame: “M yeela m meng yaa: ‘Mam kũunã yaa rẽ bal kɛpɩ.’ M sɩnga yãbre, bala m bãngame tɩ m pʋʋsgã la a Zeova leok-yã. A ratame tɩ m bas m yam tɩ m tara bũmb yõod sẽn waooge, n tõe n kõ-a, la t’a na n zãms-m lame tɩ m tõog n tʋm tʋʋm-tɩrga.” A yeelame: “M sẽn wa n dabdã, m da pa tar raoodo, m da maanda yɩɩre, n da getẽ tɩ m ka yõod ye. La m sẽn wa n lebgdẽ wã, m da tara raoodo, n bas m yam fasɩ, la m miẽ tɩ m tara yõodo.”

18. Biiblã vɛrse-bʋs n wilgd tɩ baa d yʋʋmã sã n vẽsge, a Zeova ket n nanda d sẽn maand a tũudmã pʋgẽ wã?

¹⁸ Baa d yʋʋmã sã n wa vẽsgdẽ, d kell n bas d yam tɩ tʋʋm bee a Zeova sẽn dat tɩ d tʋme. (Yɩɩn. 92:13-16) A Zeezi yeelame tɩ baa d minimã bɩ d tõogã sẽn paood to-to, d sã n maand a Zeova raabã wa d sẽn tõe fãa, a Zeova sũur noomame. (Luk 21:2-4) Rẽ wã, wɩng-y ne y sẽn tõe wã maanego! Wala makre, y tõe n gomda a Zeova yell ne nebã, y tõe n pʋʋsda y tẽed-n-taasã yĩnga, y tõe n kengda y taabã raood sẽn na yɩl tɩ b kell n maan sɩd ne a Zeova. A Zeova nifẽ, y yaa a tʋmd-n-taaga. La pa y sẽn tõog n maan bũmb ninsã yĩng ye. Yaa y sẽn sakd-a ne yamleoogã yĩnga.—1 Kor. 3:5-9.

19. Rom dãmb 8:38, 39 wã kɩtame tɩ d tõe n bas d yam ne bõe?

¹⁹ D sẽn paam n tũud a Zeova, n miẽ t’a yaa Wẽnnaam sẽn nand sẽn maand-b yẽ raabã, d sũy nooma wʋsgo. A naana tõnd a raabã maaneg yĩnga, hal tɩ d sã n sɩd tũud-a bɩ d vɩɩmã tar barka. (Vẽn. 4:11) Dũniyã neb tõe n getame tɩ d ka yõodo, la a Zeova nand-d lame. (Ebre. 11:16, 38) Bãag sã n tar-d n namsdẽ, wall yaa ligdã yell n yaa toog ne-do, pa rẽ bɩ yaa kʋʋlmã la d zu-loɛɛga, d tẽegdẽ tɩ baa fʋɩ pa tõe n welg tõnd ne d saasẽ Ba wã nonglmã ye.—Karm-y Rom dãmb 8:38, 39.