A Zeova kõo koe-moondb kãensã sẽn da tʋll n moon koɛɛgã ne b sũy fãa wã raoodo. Yʋʋm-kãngã, so-pakdbã sõor sẽn da yaa 225 wã zẽk n taa 350. Yɩɩ pipi la woto, koe-moondb 8 000 la zak sẽn tool b rapoor-dãmb tɩ kẽng d biru-kãsengẽ wã. A Zeova ning-b-la bark hal tɩ yɩɩg b sẽn da tẽedã.

Yʋʋmd 1920 tʋʋlg kiuug rasem 21 wã, a Joseph Rutherford sẽn da yaa Biiblã Zãmsdbã taoor lʋɩtã wɛgsa sõsg t’a gom-zugã yaa: “Neb wʋsg sẽn vɩ rũndã-rũndã pa na n ki abada.” Biiblã Zãmsdbã maana b sẽn tõe fãa n na n bool sũ-tɩrs rãmbã tɩ b wa kelg sõsgã. B luwaasa Niuyork reem-do-kãseng a ye, la b pʋɩ boolg sɛb sẽn ta bãmb tus kobs-tã la pisi.

Neb nins sẽn wa wã sõor da yɩɩda b sẽn da tẽedã. Roogã sẽn da tõe n dɩk neb tus a nu balã yĩngã, kɩtame tɩ neb tus a yopoe pa yɩngã n pa tõog n kẽ ye. Gũusg Gasgã goma rẽ yell n yeel tɩ tigis-kãng naaga tigis-kãsems nins b sẽn maan t’a buud zɩ n zĩndã sʋka.

Nebã wa n bãngame tɩ Biiblã Zãmsdbã moondame n yetẽ tɩ “neb wʋsg sẽn vɩ rũndã-rũndã pa na n ki abada.” Wakat kãnga, b ra pa mi tɩ Rĩungã koɛɛgã segd n moona zĩig fãa ye. La baa ne rẽ, b ra tara yẽesem wʋsgo. A Ida Olmstead sẽn sɩng tigissã kẽnd yʋʋmd 1902 tẽega rẽ yell n yeel yaa: “Tõnd da miime tɩ ãdem-biisã na n wa paama bark wʋsgo. Rẽ n so tɩ d kell n moon koɛɛgã n pa bas ye.”

Betɛllã saam-biisã sɩngame n yiisd sɛb kẽer b toore, n na n sõng nebã tɩ b paam n zãms Biiblã. B raa masĩn-dãmb n lugl roog b sẽn luwaas Burkilin Betɛllã sɛɛga.

Yʋʋmd 1920 yʋʋm-vẽkr kiuugã, a Leo Pelle ne a Walter Kessler kosame n na n tɩ tʋmd Betɛllẽ wã. Ad a Walter sẽn yeele: “Tõnd sẽn ta wã, ẽmpirimeri wã taoor soab gesa tõnd n yeel yaa: ‘Keta lɛɛr a ye la pʋɩ-sʋk tɩ midi wã rɩɩb lɛɛr ta.’ Rẽ wã, a kɩtame tɩ d na n wʋk kartõ-rãmb sẽn pid ne sɛb n dʋʋse.”

A Leo togsa bũmb ning sẽn maan vẽkembeoogã. A yeelame yaa: “Tõnd tʋʋmd ra yaa roog ning b sẽn luwaasã lals pɛgbo.  M zɩ n tʋm tʋʋmd sẽn dẽgemd ned yĩng woto ye. La sẽn da yaa Zu-soabã tʋʋmdã, m da pa bʋʋd ye.”

Semen a wãn pʋgẽ bala, Betɛllã neb sẽn tʋmd ne yẽesem yiisa Gũusg Gasgã. Yʋʋmd 1920 wao-fugdg kiuug pipi daarã, b yiisa Gũusg Gasgã sẽn ta bãmb tus pis-yoobe. Saam-biisã wa n lugla sɛbã yiisg masĩn etaasã tẽngre, n pʋd a yʋʋr tɩ “zabr batayo.” Yʋʋmd 1920 tʋʋl-nif kiuug rasem 14 tɛka, b sɩnga L’Âge d’Or sebrã yiisgu. Yaa vẽeneg t’a Zeova ninga koe-moondb kãensã sẽn tar yẽesmã tʋʋmdã barka.

A Zeova nin-buiidã tʋʋmd ra paasdame, tɩ b zems-n-taarã me ra paamd pãnga. La yʋʋmd 1917 n tãag yʋʋmd 1919 wã, yɛlã sẽn wa n wɩngã, Biiblã Zãmsdb kẽer basa a Zeova siglgã. Bõe la b ra tõe n maan n sõng nin-kãensã?

Yʋʋmd 1920 tʋʋl-nif kiuug pipi daar Gũusg Gasgã pʋgẽ, sõsg la b yiis t’a gom-zugã yaa: “D modg tɩ laafɩ le zĩnd d sʋka.” B yeela sõsgã pʋgẽ yaa: “D kɩsa sɩd tɩ ned ning fãa sẽn tar Soaalã vʋʋsem sõngã, na n data ne a sũur fãa n yĩm bũmb ning sẽn loogã, la a maan a sẽn tõe fãa tɩ d zĩnd ne taab ne laafɩ, wa yĩng a yembre.”

Neb wʋsg sakame n na n maan wa b sẽn yeelã. Ad pag a ye ne a sɩd sẽn yeele: “D sũur yɩɩ noog wʋsg ne d sẽn bãng tɩ d sẽn da bas n pa moond koɛɛgã tɩ neb a taabã moondẽ wã, pa zems ye. Rẽ poore, d yãka yam n na n maneg n wɩng ne koɛɛgã mooneg n da tol n bas ye.” Neb nins fãa sẽn da bas n lebg n sɩngã ra tara tʋʋm wʋsg n na n tʋm masã.

Yʋʋmd 1920 sigr kiuug rasem 21 wã, Biiblã Zãmsdbã sɩngame n pʋɩt neb wʋsg Le mystère de Dieu accompli sebrã, sẽn yaa Études des Écritures sɛbã sebr a yopoe-n-soabã. Yʋʋmd 1918 wã, b sẽn wa n  gɩdg tɩ b ra le yiis sebrã, rẽ tɩ b ra bĩnga seb-kãensã bãmb wʋsgo.

B kosa so-pakdbã ne koe-moondbã fãa tɩ b naag n pʋɩ sɛbã. “Ned ning fãa sẽn da reeg lisg ra tõe n kẽesa a toog ne yamleoogo. Ad ned fãa sẽn da segd n yeel a menga: ‘Sẽn wa n yaa bũmb ning fãa la m maanda, m segd n modgame n pʋɩ seb-kãensã.’” A Edmund Hooper wilgame tɩ ne neb wʋsgo, yaa ne seb-kãensã pʋɩɩbã la b sɩng zak-zak moonegã. A paasame yaa: “D wa n bãnga d sẽn na n maanã vẽenega, tʋʋm-kãngã sẽn na n paam pãng dũniyã gill zugã wɛɛngẽ.”

Dũni gill pipi zabrã ra kɩtame tɩ yɩl n paam Biiblã Zãmsdbã sẽn be tẽns a taabã kibay ra yaa toogo. Rẽ kɩtame tɩ saam-biig a Rutherford ra rat n keng saam-biisã raoodo, la a le maneg n sigl koɛɛgã mooneg sõma. Yʋʋmd 1920 sa-sik kiuug rasem 12, yẽ ne saam-biis a naas n gilg Gãrãnd Bertayn, Erope, la Moayẽnoriyã, n na n tɩ kaag saam-biisã.

Saam-biig a Rutherford sẽn wa n kaagd Gãrãnd Bertayn wã, Biiblã Zãmsdbã maana tigis-kãsems a tãabo, la b wɛgs sõss 12 zãma wã yĩnga. Sẽn wa n kelg-bã sõor taa neb 50 000. Gũusg Gasgã goma kaagr kãng yell n yeel yaa: “Saam-biisã paama raood kengre, hal tɩ b sũy yɩ noogo. B zoodã pãng maneg n paasame, tɩ b ra tʋmd ne taab tɩ b sũy noomẽ.” Paari tẽngẽ wã, saam-biig a Rutherford le wɛgsa sõsg ning gom-zug sẽn yaa: “Neb wʋsg sẽn vɩ rũndã-rũndã pa na n ki abada”. Sõsgã ne a na n sɩngã tɩ roogã pida pãpp. Sõsgã poore, neb kobs-tã n kos n na n bãng bũmb a taab n paase.

Semen a wãn poore, saam-biis a wãn n tɩ kaag Atɛnne, Kɛɛre, la Zerizalɛm saam-biisã. Sẽn na yɩl n sõng neb nins sẽn be zĩ-kãensã n dat n bãng n paasã, saam-biig a Rutherford lugla sɛb bĩngr zĩig Ramala, Zerizalɛm sɛɛga. Rẽ poore, a leba Erope, n tɩ lugl Erop sãntral filiyallã, la a ges tɩ b na n yiisd sɛb beenẽ.

Yʋʋmd 1920 bõn-bɩʋʋng kiuugã, Biiblã Zãmsdbã yiisa L’Âge d’Or nimero 27 soabã, n gom b sẽn nams Biiblã Zãmsdbã yʋʋmd 1918 wã yelle. B kɩtame tɩ sɛbã yiisg masĩn ning b sẽn da boond tɩ  “zabr batayo ” wã tʋm wĩndg la yʋngo, n yiis L’Âge d’Or sebrã sẽn yɩɩd bãmb milyõ a naase.

 Nebã karma seb-kãng n bãng a Emma Martin yellã sẽn yɩ to-to wã. Saam-bi-poak a Martin da yaa so-pakda, n be Sãn Bɛrnardino, Kaliforni soolmẽ wã. Yʋʋmd 1918 tʋʋlg kiuug rasem 17 wã, yẽnda ne saam-biis a tãabo, a Hamm, a Sonnenburg, la a Stevens tɩ naaga Biiblã Zãmsdbã sul-bil tɩ b maan tigsga.

Rao a ye n da naag-ba, la a pa wa Biiblã zãmsg yĩng ye. Ad raoã sẽn wa n yeel kaoosg zugẽ: “Mam sẽn wa tigsgã, yaa porkirɛɛrã n tʋm maam. Mam kẽnga be n na n tɩ paam kaseto.” A paama kaset ning a sẽn da baoodã. Yaa Le mystère de Dieu accompli wã sebre. Rasem a wãn poore, b yõka saam-bi-poak a Martin ne saam-biis a tãabã. B ning-b-la taal n yeel tɩ b kɩɩsa laloa wã, n pʋɩt sɛb b sẽn gɩdg tɩ b ra pʋɩ ye.

B kaoo saam-bi-poak a Martin ne saam-biis a tãabã bʋʋdo, n yeel tɩ b tara taale, n segd kẽ bãens roog yʋʋm a tã. Yʋʋmd 1920 sig-noy kiuug rasem 17 wã, b sẽn da kos naoor wʋsg tɩ b lebg n kao bʋʋdã tɩ pa yãk nengã, b baas n kẽes-b-la roogo. La pa kaoos tɩ b paam yolsg ye.

Yʋʋmd 1920 sigr kiuug rasem 20 wã, saam-biig a Rutherford togsa b kibarã tigis-kãsengẽ, Sãn Frãnsisko tẽngẽ wã. Kɛlgdbã sũur sãama ne b sẽn maan kiris-nin-kãensã bũmb ninsã, tɩ kɩt tɩ b sak tɩ b na n tool Etazĩni perzidã wã telegarm. Ad b sẽn gʋlsã: ‘Tõnd getame tɩ b sẽn ning a madam Martin ne a zo-rãmbã taal n yeel tɩ b kɩɩsa laloa wã yaa bũmb sẽn pa zemse. Tẽngã taoor dãmb maana a madam Martin pãnga, n bao yell bal n dogl-a sẽn na yɩl n pag-a bãens roogo. La tõnd getame tɩ rẽ pa segd ye.’

Vẽkembeoogã bala, Amerik perzidã a Woodrow Wilson yeela zĩig pʋgẽ tɩ b yiis saam-bi-poak a Martin, saam-biig a Hamm, a Sonnenburg, la a Stevens. B sẽn da maan-b pãng n pag-b bãens roogã fãa saame.

Yʋʋmd 1920 wã baasgẽ, Biiblã Zãmsdbã sũur yɩɩ noog ne bũmb wʋsg sẽn maan yʋʋm-kãnga. Tʋʋmdã ra paamda pãng d biru-kãsengẽ wã, tɩ kiris-nebã me ra tar yẽesem n moond Wẽnnaam Rĩungã sẽn yaa ãdem-biisã zu-loeesã tɩɩmã. (Mat. 24:14) La b ra na n maneg n moona Rĩungã koe-noogã yʋʋmd 1921 wã sẽn yɩ vẽk-n-yʋʋmdã.