1. Wãn to la 2 Korẽnt rãmb 3:1-3 sõngd tõnd tɩ d bãng tɩ zãms ned Biiblã t’a wa reeg lisg yaa zu-zẽkr bũmbu? (Ges-y sebrã pipi neng fotã.)

BIIBL karen-biig sẽn be yãmb moonegã zĩigẽ sã n wa reeg lisgu, y manesem yaa wãna? Sãmbg kae tɩ y sũur yaa noogo! (Mat. 28:19) La sã n yaa yãmb mengã n zãms nin-kãngã Biiblã t’a wa reeg lisgu, yãmb sũ-noogã pa tõe n bãng n bilg ye. (1 Tes. 2:19, 20) Neb sã n deeg lisg n lebg a Zeezi karen-biisi, b yaa wa “sɛb sẽn pẽgd” tigingã nebã fãa, la pa neb nins sẽn zãms nin-kãensã Biiblã bal ye.—Karm-y 2 Korẽnt rãmb 3:1-3.

2. a) Sok-bʋg sẽn tar yõod la d segd n sok d mense, la bõe yĩnga? b) Wakat bʋg la d tõe n yeel tɩ d zãmsda ned Biiblã? (Ges-y vẽnegrã)

² D gũus n gesame tɩ yʋʋm a naasã sẽn loogã, sẽn ta neb milyõ 10 n da zãmsd Biiblã kiuug fãa. * Woto sɩd kõta sũ-noogo! Yʋʋm-kãense, sẽn yɩɩd neb tus 280 n deeg lisg yʋʋmd fãa n lebg a Zeova Kaset rãmba, la a Zeezi Kirist karen-biisi. Wãn to la d tõe n sõng Biibl karen-biis milyõ-rãmbã tɩ b wa reeg lisgu? A Zeova sã n ket n maand sũ-mar ne nebã, n kõt-b weer tɩ b tõe n lebg Kiristã karen-biisi, tõnd me ratame n maan d sẽn tõe fãa n sõng nin-kãensã tɩ b wa reeg lisg tao-tao. Bala wakatã sẽn ketã pa le waoog ye.—1 Kor. 7:29a; 1 Pɩy. 4:7.

3. Bõe yell la d na n gom sõs-kãngã pʋgẽ?

³ Sẽn mik tɩ tara yõod masã meng tɩ d sõng nebã tɩ b  lebg a Zeezi karen-biisã, siglgã taoor lʋɩtb sullã sogsa filiyall-dãmb n na n bãng d sẽn tõe n maan to-to n sõng d Biibl karen-biis wʋsg tɩ b wa tõog n deeg lisgu. Sõs-kãngã la sẽn pʋgd-a wã pʋgẽ, d na n yãa yam ning d sẽn tõe n dɩk so-pakdba, misioneer-dãmba, la tigims sull yel-gɛtb sẽn tar minim wʋsg nengẽ. * (Yel. 11:14; 15:22) B wilga koe-moondbã ne Biibl karen-biisã sẽn tõe n maane, tɩ Biiblã zãmsgã yɩ sõma n paase. Sõs-kãngã pʋgẽ, d na n yãa bũmb a nu karen-biig fãa sẽn segd n maane, tɩ sõng-a t’a wa tõog n deeg lisg tao-tao.

4. Yals ned zak noor n zãms-a Biiblã wɛɛngẽ, bõe la d segd n bãnge?

⁴ Saam-biis la saam-bi-pogs wʋsg mi n yasa nebã zagsã noy n zãmsd-b Biiblã. Yaa sɩd tɩ woto tõe n sõnga a soabã t’a wa rat n zãms Biiblã. La naoor wʋsgo, sõsg a woto yaa koɛɛg-koɛɛg bala. Rẽ me, tõeeme n pa yɩ semen fãa ye. Sẽn na yɩl n sõng ned t’a tʋll n zãms Biiblã, koe-moondb kẽer reegda a telefõn nimero, n mi n tool-a mesaaz bɩ n bool-a n sõs ne-a Biiblã zug bilf bala. Sõsg a woto tõe n kaoosa kiisi, n yaool n pa wa baas ne Biibl zãmsg meng ye. Sã n yaa woto bal la Biibl karen-biig maand sẽn na yɩl n zãms Biiblã, rẽ yĩnga woto tõe n sõng-a lame t’a wa tõog n dɩk a meng n kõ a Zeova n deeg lisg sɩda? Na n yɩɩ toogo.

5. Bõe la a Zeezi yeel Luk 14:27-33 pʋgẽ, tɩ d tõe n tũnug ne rẽ n sõng d Biibl karen-biisã?

⁵ Daar a ye, a Zeezi rɩka makr n wilg ned sẽn segd n maane, a sã n dat n lebg yẽ karen-biiga. A goma ned sẽn dat n me gasg yelle, la rĩm sẽn dat n kẽng zabr yelle. A Zeezi yeelame tɩ sẽn dat n me-a roogã segd n ‘deng n zĩnd n geelga ligd ning a sẽn segd n yiis’ tɩ sek roogã meebã, la tɩ rĩmã me segd n ‘deng n zĩnd n yẽsa ne a sagendbã,’ n bãng a tãb-biisã sã n na n tõoga zabrã. (Karm-y Luk 14:27-33.) Woto me, a Zeezi ra miime tɩ ned sã n dat n lebg a karen-biiga, a segd n deng n tagsa rẽ sẽn baood t’a maan bũmb ningã zug neere. Woto yĩnga, d segd n sagla d Biibl karen-biisã tɩ b sak tɩ d zãms-b Biiblã semen fãa. Wãn to la d tõe n maan dẽ?

6. Bõe la d tõe n maan n paam Biibl karen-biis sẽn wɩngd ne zãmsgã?

 ⁶ Y sã n zãmsd ned Biiblã a zak noore, wogend-y zãmsgã n paasdẽ. Wala makre, y sã n na n tɩ zãms-a Biiblã, bɩ y ra sõs vɛrse a yembr zug bal ye. Y tõe n sõsa vɛrse a to zug n paase. A sã n wa minimi, bɩ y kos-a t’a bao zĩig y sẽn tõe n mi n zĩnd n zãms Biiblã. A sẽn na n leok to-to wã na n wilga a sã n sɩd ratame tɩ b ket n zãmsd-a Biiblã. Tarẽ-n-tarẽ, sẽn na yɩl tɩ zãmsgã kẽnd taoor tao-tao, y tõe n sok-a lame n ges a sã n datame tɩ y zãmsd-a Biiblã naoor a yiib semen fãa. La zãms-a Biiblã vugr bɩ naoor a yiib semen fãa wã bal pa sek ye.

7. Wãn to la koe-moond tõe n segl a meng neer Biibl zãmsg fãa yĩnga?

⁷ Yãmb sẽn yaa karen-saambã, y segd n segenda y meng sõma zãmsg fãa yĩnga. Y tõe n sɩnga ne bũmb nins y sẽn na n zãmsã karengo, la y karem vɛrse-rãmbã me. Tẽeg-y bũmb nins y sẽn dat tɩ pa karen-biigã yamẽ wã yelle. Tags-y gom-zugã yelle, gom-zu-bi wã, sogsgã, vɛrse nins b sẽn yeel tɩ y karmã, foto-rãmbã la video nins fãa sẽn tõe n sõng karen-biigã t’a wʋm zãmsgã võorã. Rẽ poor bɩ y reng n tags y karen-biigã yelle, la y ges y sẽn tõe n zãms-a rẽ nana-nana to-to t’a wʋm la a sak n tũ.—Nee. 8:8; Yel. 15:28.

8. Tʋʋm-tʋmd a Poll sẽn yeel bũmb ning Kolos rãmb 1:9, 10 sõngda tõnd tɩ d bãng bõe pʋʋsgã wɛɛngẽ?

⁸ Y sã n wa segend y menga, bɩ y pʋʋs a Zeova n gom karen-biigã yelle, la bũmb nins sẽn na n sõng-a wã me yelle. Kos-y-yã a Zeova t’a sõng-y tɩ y tõog n tik Biiblã n zãms karen-biigã tɩ kẽ-a sõma. (Karm-y Kolos rãmb 1:9, 10.) Reng-y n tags-y bũmb ning fãa sẽn tõe n yɩ toog ne karen-biigã t’a wʋm a võor bɩ n sak n deegã. Ning-y y yamẽ tɩ y raabã yaa y sõng-a t’a wa tõog n deeg lisgu.

9. Wãn to la Biibl karen-saambã tõe n sõng karen-biigã t’a segl zãmsgã?

⁹ D saagdame tɩ y sã n zãmsd karen-biigã Biiblã n pa vaandẽ, a sũur na n yɩɩ noog ne a Zeova la a Zeezi sẽn maan bũmb ninsã, tɩ rẽ kɩt t’a rat n bãng n paase. (Mat. 5:3, 6) Karen-biigã sã n dat tɩ zãmsgã naf-a sõma, a pa  segd n bas tɩ bũmb tiis a zãmsgã ye. Woto yĩnga, kɩt-y t’a bãng t’a segd n segla a meng zãmsg fãa yĩnga. A tog n deng n karma zãmsgã la a tags n ges a sẽn tõe n tũ saglsã to-to. Bõe la karen-saambã tõe n maan n sõng-a? Naag-y-yã-a n segl zãmsgã, t’a bãng rẽ sẽn maand to-to. * Sõng-y-yã-a t’a bãng a sẽn tõe n yã leoorã to-to vẽenega, la y bilg-a a sẽn na n maan to-to n dẽeg sullã pʋgẽ goam nins sẽn tar pãngã, tɩ sõng-a t’a tõog n leok nana-nana. Rẽ poor bɩ y kos-a t’a leok ne a meng gom-biisi. Y sã n maand woto, y na n tõog n bãnga a sã n wʋmda zãmsgã võor sõma. La bũmb a to me la y tõe n sõng y karen-biigã t’a maane.

10. Bõe yĩng tɩ tar yõod tɩ d karemd Biiblã daar fãa, la bõe la Biibl karen-biig tõe n maan tɩ Biiblã kareng naf-a sõma?

¹⁰ Karen-biigã sẽn zãmsd Biiblã ne karen-saambã sẽn yãk a toogo, bũmb a taab la a segd n maand a toor daar fãa tɩ nafd-a. A segd n kelgda a Zeova daar fãa, la a gomd ne-a. Wãn to? Yaa a sẽn na n kelgd a Zeova goamã, la a pʋʋsd-a. A sã n karemd Biiblã daar fãa, a kelgda Wẽnnaam. (Zoz. 1:8; Yɩɩn. 1:1-3) Y tõe n wilg-a-la Biiblã kareng na-kẽndrã sẽn be jw.org pʋgẽ wã sẽn tõe n sõng-a to-to. * Y sã n dat t’a Biiblã kareng naf-a sõma, bɩ y sagl-a t’a bʋgsd a sẽn zãmsd bũmb ning a Zeova zugã, la y wilg-a a sẽn tõe n tũ a sẽn zãmsd bũmb ningã a vɩɩmã pʋgẽ to-to.—Tʋʋ. 17:11; Zak 1:25.

11. Wãn to la Biibl karen-biig tõe n zãms pʋʋsg sõma, la bõe yĩng t’a segd n pʋʋsd a Zeova wakat fãa?

¹¹ Sagl-y y karen-biigã t’a pʋʋsd a Zeova daar fãa. Pelg-y y pʋg n pʋʋs a Zeova zãmsg fãa sɩngrẽ la a baasgẽ ne y karen-biiga, la y pʋʋs a yĩng me. A sẽn kelgd y pʋʋsgã, a na n bãnga a sẽn tõe n pelg a pʋg n pʋʋs a Zeova to-to, ne a Zeezi Kirist yʋʋrã maasem. (Mat. 6:9; Zã 15:16) Karen-biigã sã n karemd Biiblã daar fãa, rat n yeel tɩ n kelgd a Zeova, la a pʋʋsdẽ, rat n yeel tɩ n gomd ne a Zeova, tags-y n ges-y rẽ sẽn tõe n sõng-a to-to t’a paam zood sõma ne a Zeova! (Zak 4:8) Karen-biigã sã n minim n maand woto, na n sõng-a lame  t’a wa tõog n dɩk a meng n kõ a Zeova n deeg lisgu. Bõe me la a tõe n maan tɩ sõng-a?

12. Wãn to la koe-moond tõe n sõng Biibl karen-biig t’a paam zood sõma ne a Zeova?

¹² Biibl karen-biigã sẽn zãmsd bũmb ningã pa segd n be a yamẽ wã bal tɩ noom-a ye. Segd n kẽe a sũurã me. Bõe yĩnga? D sũurã, rat n yeel tɩ d tʋlsmã la d raabã, n na n kɩt tɩ d rat n tũ d sẽn zãmsdã. A Zeezi ra zãmsda nebã bũmb wʋsgo, hal tɩ b ra nong a kelgre. Nebã sẽn da tũud-a wã yaa a goamã sẽn da kẽed-b sũyã yĩng me. (Luk 24:15, 27, 32) Y karen-biigã segd n getame t’a Zeova sɩd beeme, n yaa ned a sẽn tõe n yõg zood ne, la a get-a wa a Ba, a Wẽnnaam, la a Zoa. (Yɩɩn. 25:4, 5) Y sã n wa zãmsd-a Biiblã, bɩ y sõng-a t’a bãng Wẽnnaam sõma. (Yik. 34:5, 6; 1 Pɩy. 5:6, 7) Sẽn yaa bũmb ning fãa zug la y sõsda, bɩ y sõng-a t’a bãng a Zeova sẽn yaa a soaba. Sõng-y-yã-a t’a bãng t’a Zeova yaa nonglem, maan-neer soaba, la nimbãan-zoɛta. A Zeezi yeelame tɩ “noor ning sẽn yaa kãseng n yɩɩdã, n yaa pipi noor” yaa “nong a Zeova sẽn yaa fo Wẽnnaamã.” (Mat. 22:37, 38) Modg-y n sõng-y karen-biigã t’a nong a Zeova ne a sũur fãa.

13. Wilg-y d sẽn tõe n maan to-to n sõng Biibl karen-biig t’a bãng a Zeova sõma.

¹³ Y sã n wa sõsd ne y karen-biigã, bɩ y wilg-a bũmb ning sẽn kɩt tɩ yãmb nong a Zeova wã. Woto tõe n sõng-a lame t’a bãng t’a segd n modgame n paam zood sõma ne Wẽnnaam. (Yɩɩn. 73:28) Wala makre, zãmsgã sasa, bɩ y ges gomd bɩ vɛrse sã n bee sullã pʋgẽ n wilgd bũmb takɩ a Zeova zug tɩ noom yãmba, wala a nonglmã, a yamã, a tɩrlmã bɩ a pãngã. Gom-y rẽ yell ne karen-biigã, la y wilg-a tɩ rẽ me naaga bũmb nins sẽn kɩt tɩ y nong y saasẽ Ba wã. Bũmb a to n be Biibl karen-biig fãa sẽn segd n maan n wa tõog n deeg lisgu.

14. Bõe la Ebre-rãmb 10:24, 25 wã yet tigissã waoong wɛɛngẽ, tɩ tõe n sõng Biibl karen-biig t’a tẽebã bɩ tao-tao?

¹⁴ D fãa ratame tɩ d Biibl karen-biisã modg n wa tõog n deeg lisgu. Bũmb a ye d sẽn tõe n maan n sõng-b yaa d sẽn na n yeel-b tɩ b wat tigissã. Koe-moondb kẽer sẽn tar minim wʋsg wilgame tɩ  karen-biis nins sẽn pa kaoosd la b sɩng tigissã waoongã tẽeb bɩta tao-tao. (Yɩɩn. 111:1) Koe-moondb kẽer togsda b karen-biisã tɩ b sã n wat tigissã, b na n bãnga bũmb a taab n paase. Karm-y Ebre-rãmb 10:24, 25 wã ne y karen-biigã, la y wilg-a tigissã waoong sẽn na n naf-a to-to. Ning-y Bõe la b maand Rĩung roogẽ? * video wã t’a gese. Sõng-y karen-biigã t’a modg n da vaal tigsg baa yembr ye.

15. Bõe la d tõe n maan n sõng karen-biigã t’a wat tigissã n pa vaandẽ?

¹⁵ Y karen-biigã sã n nan pa sɩng tigissã waoongo, wall a sã n vaandame, bõe la y tõe n maan n sõng-a? Gom-y ne-a bũmb y sẽn zãms tigissã sasa sẽn pa kaoos yelle. A sã n neẽ tɩ tigissã kõta yãmb sũ-noogo, a na n dat n watame. Kõ-y-yã-a Gũusg Gasgã bɩ Kiris-nebã vɩɩm la b tʋʋma tigissã na-kẽndr sebr ning y sẽn zãmsd tigsgã sasã wã. Wilg-y-yã-a bũmb nins y sẽn na n zãms tigsg ning sẽn watã sasa, la y sok-a n gese bõe n noom-a rẽ pʋgẽ n tɩ yɩɩda. A sã n wa tigsgã, a sẽn na n yã bɩ n wʋmã na n yɩɩ bũmb a sẽn zɩ n yã bɩ n wʋm tũudum a to pʋgẽ ye. (1 Kor. 14:24, 25) A na n yãa neb sẽn yaa mak-sõng a sẽn tõe n dɩk b togs-n-taare, neb sẽn tõe n sõng-a t’a wa tõog n deeg lisgu.

16. Wãn to la d tõe n zãms ned Biiblã t’a wa tõog n deeg lisgu? Bõe yell la d na n gom sõsg ning sẽn pʋgdã pʋgẽ?

¹⁶ Wãn to la d tõe n zãms ned Biiblã t’a wa tõog n deeg lisgu? D tõe n sõnga karen-biig fãa t’a bãng t’a pa segd n bas tɩ bũmb tiis a zãmsgã ye. Rẽ n so t’a segd n zãmsd Biiblã semen fãa, la a segend a meng zãmsg fãa yĩnga. D segd n sõng-a lame me t’a gomd ne a Zeova daar fãa, la a modg me n paam zood sõma ne-a. D sõng karen-biigã t’a kẽnd tigissã. (Ges-y seb-neng 12 zĩ-gũbrã: “Biibl karen-biig sẽn segd n maane, n wa tõog n deeg lisgu.”) Bũmb a nu me n be karen-saamb sẽn segd n maane, n tõog n sõng Biibl karen-biig t’a wa reeg lisgu. D na n yãa rẽ sõsg ning sẽn pʋgdã pʋgẽ.