1-2. a) Wa Yel-bũn 16:31 wã sẽn yetã, wãn to la d segd n ges d tẽed-n-taas nins sẽn kʋʋl n ket n tũud a Zeova ne b sũy fãa wã? b) Sogs-bʋs la d na n leok sõs-kãngã pʋgẽ?

B SÃ N nan pa ru diyama n maneg-a t’a lebg sõma, a pa pɩnd ye. F sã n yã-a me, a wõnda bũmb sẽn ka yõodo. Dẽnd ned tõe n kẽndame n wa yã diyama a woto buudu, n yõsg-a n pa bãng tɩ yaa bũmb sẽn tar yõod hal wʋsg ye.

² D tõe n yeelame tɩ d tẽed-n-taas nins sẽn kʋʋl n ket n tũud a Zeova wã yaa wa diyama a woto buudu. B tara yõod hal wʋsgo. Wẽnnaam Gomdã pʋgẽ, b maka nin-kãensã zoob-peendã ne maanfo. (Karm-y Yel-bũn 16:31; 20:29.) La d sã n pa gũusi, d tõe n wa getame tɩ b pa tar yõod wʋsg ye. Kom-bɩɩsã sã n sak n deeg tɩ sẽn kʋʋl-bã tara yõod hal wʋsgo, b na n paama bũmb yõod sẽn yɩɩd arzɛgs hal zĩig sẽn zãre. Sõs-kãngã pʋgẽ, d na n leoka sogsg a tãabo: Bõe yĩng tɩ sẽn kʋʋl-b n ket n tũud a Zeova ne b sũy fãa wã tar yõod wʋsg a nifẽ? Bõe yĩng tɩ b tar yõod wʋsg a Zeova siglgã pʋgẽ? Bõe la d tõe n maane, tɩ b minimã naf-d sõma?

3. Sẽn zems ne Yɩɩn-sõamyã 92:13-16, bõe yĩng tɩ d tẽed-n-taas nins sẽn kʋʋlã tar yõod wʋsg a Zeova nifẽ?

³ Sẽn kʋʋl-b n ket n tũud Wẽnnaam a Zeova ne b sũy fãa wã tara yõod wʋsg a nifẽ. A mii b sẽn sɩd yaa neb nins b sũurã pʋgẽ, la a nand-ba, b zʋg-sõma wã yĩnga. Sẽn kʋʋl-bã sẽn tũ a Zeova yʋʋm wʋsgã sã n dɩk yam la minim nins b sẽn paamã n sõng kom-bɩɩsã, noom-a lame. (Zoob 12:12; 32:9; Yel. 1:1-4) Sẽn paase, b sẽn tõogd toogã me noom-a  lame. (Mal. 3:16) Yaa sɩd tɩ b paama zu-loees wʋsgo, la b tẽebã ket n tara pãnga. B sẽn saagd tɩ beoog na n yɩɩ neerã paama pãng n yɩɩd wakat ning b sẽn bãng sɩdã. Sẽn paase, a Zeova nong-b lame, bala b ket n moonda a yʋʋrã baa ne b sẽn kʋʋlã.—Karm-y Yɩɩn-sõamyã 92:13-16.

4. Bõe n tõe n keng d tẽed-n-taas nins sẽn kʋʋlã raoodo?

⁴ Yãmb sã n kʋʋlame, bɩ y kɩs sɩd t’a Zeova tẽra tʋʋm nins fãa y sẽn tʋm pĩndã yelle. (Ebre. 6:10) Yãmb teela koe-moonegã ne y sũy fãa, la woto nooma d saasẽ Ba wã. Yãmb maoo ne yɛl wʋsgo. Kẽer yɩɩ yɛl sẽn sãam y sũur hal wʋsgo. Yãmb sakd n tũuda Biiblã noyã, la y pʋd n wilgdẽ tɩ no-kãens la sõma n yɩɩda. Y saka ne y sũy fãa n tʋm tʋʋm sẽn tar yõod wʋsg a Zeova siglgã pʋgẽ, la y sõng neb a taab tɩ b paam minim tʋʋm kẽer wɛɛngẽ. Y maana y sẽn tõe fãa n minim bũmb wʋsg b sẽn toeem a Zeova siglgã pʋgẽ. Y teela neb a taab sẽn kẽes b mens zãng a Zeova tʋʋmdã pʋgẽ. Wẽnnaam a Zeova nonga yãmb hal wʋsgo, y sẽn ket n maand sɩd ne-a wã yĩnga. A pʋlmame t’a pa “basd sẽn maand-b pʋ-peelem” ne-a wã ye. (Yɩɩn. 37:28) A yeta yãmb yaa: “Mam na n zãa yãmb hal n tãag y zoob-peend wakate.” (Eza. 46:4) Ra tags-y tɩ y sẽn kʋʋlã yĩnga, y pa le tar yõod a Zeova siglgã pʋgẽ ye. Y pʋd n tara yõod hal wʋsgo!

5. Bõe la sẽn kʋʋl-bã pa segd n yĩmi?

⁵ Bũmb toor-toor n be sẽn kʋʋl-bã sẽn tõe n maan n teel a Zeova siglgã. Baa ne b sẽn pa le tar pãng wa pĩndã, b tara minim wʋsgo, b sẽn kaoos a Zeova siglgã pʋgẽ wã yĩnga. A Zeova tõe n tũnuga ne-b n maan bũmb wʋsgo. D na n goma neb kẽer kibay sẽn wilgd rẽnda yelle. Yaa neb sẽn zĩnd pĩnd wẽndẽ, la rũndã-rũndã neba.

6-7. Togs-y kibay sẽn be Biiblã pʋgẽ, sẽn wilgd neb sẽn paam a Zeova barka, b sẽn da tũud-a ne b sũy fãa baa ne b sẽn da kʋʋlã.

⁶ Biiblã gomda neb sẽn tũ a Zeova ne b sũy fãa yelle. B ra ket n tʋmda a tʋʋmdã baa ne b sẽn da kʋʋlã, tɩ yaa mak-sõngo. Wala makre a Zeova sẽn wa n yãk a Moyiiz  t’a na n lebg a no-rɛɛsa, la a lʋɩt Israyɛll nebã taoorã t’a taa yʋʋm 80. A Dãniyɛll me tog n da tara yʋʋm 90 la zaka, la ne rẽ fãa, a ra ket n yaa a Zeova no-rɛɛsa. Tʋm-tʋmd a Zã me tog n da tara yʋʋm 90 la zaka, Wẽnnaam sẽn wa n vẽneg-a t’a na n gʋls Vẽnegr sebrã.

⁷ Wẽn-sakdb kẽer yɩɩ neb yʋy sẽn pa yi, tɩ rẽ kɩt tɩ d tõe n yĩm b yell faag-faaga. Baa ne rẽ, a Zeova tẽega b yell n ning-b barka, b sẽn maan sɩd ne-a wã yĩnga. Wala makre, b pa gomd a Sɩmeyõ sẽn da yaa “nin-tɩrg la wẽn-zoɛtã” yell wʋsg Biiblã pʋgẽ ye. La a Zeova ra mii a sẽn sɩd ra yaa ned ningã, hal n kɩt t’a paam n yã a Zeezi sẽn da yaa bi-pɛɛlgã, la a togs bãngr-gomd biigã ne a ma wã zugu. (Luk 2:22, 25-35) Tẽeg-y no-rɛɛs-poak a Ann sẽn da yaa pʋg-kõorã me yelle. A ra tara yʋʋm 84, la a ra “pa viigd wẽnd-doogẽ wã ye.” A sẽn da “kẽnd tigissã n pa vaandẽ” wã yĩnga, a Zeova ning-a-la barka, n kɩt tɩ yẽ me paam n yã a Zeezi sẽn da yaa bi-pɛɛlgã. Dẽnd a Sɩmeyõ ne a Ann fãa ra tara yõod wʋsg a Zeova nifẽ.—Luk 2:36-38.

8-9. Bõe la saam-bi-poak a ye sẽn yaa pʋg-kõor maan a Zeova siglgã pʋgẽ?

⁸ Rũndã-rũndã, wẽn-sakdb wʋsg sẽn kʋʋl yaa mak-sõng kom-bɩɩsã yĩnga. Wala makre, d gom saam-bi-poak a Lois Didur yelle. A sẽn wa n lebg zall so-pakd Kanada wã, rẽ t’a tara yʋʋm 21 bala. A kãadmã poore, a sɩd a John lebga tigims sull yel-gɛta, tɩ b tũ taab n gilg n kaag tigimsã n kaoos yʋʋm wʋsgo. B wa n tɩ tʋma Kanada Betɛllẽ wã n kaoos yʋʋm 20 la zaka. A Lois sẽn wa n tar yʋʋm 58, siglgã kɩtame tɩ yẽ ne a sɩdã na n tɩ tʋmd Ikrɛn. B manesem yɩɩ wãna? Rẽ yĩnga, b tagsame tɩ b kʋʋlame, n pa le tõe n yik n kẽng tẽng a to bɩ? B sakame n na n kẽnge. B yãka a John t’a na n naag beenẽ filiyallã taoor lʋɩtb sullã. A John kaalmã yʋʋm a yopoe poore, a Lois yãka yam n na n kell n zĩnd beenẽ n tʋmd a Zeova tʋʋmã. A Lois tara yʋʋm 81 masã. A naaga Ikrɛn Betɛllã neb n ket n tũud a Zeova ne a sũur fãa, hal tɩ nebã nong-a wʋsgo.

⁹ Nebã tõeeme n yĩm pʋg-kõap kẽer wa a Lois yelle, n pa le tẽr b yell wa b sẽn da tẽr b yell b sɩdbã sẽn wa n ket n vɩ wã ye. La b sẽn lebg pʋg-kõapã pa rat n yeel tɩ b pa le tar yõod ye. A Zeova nanda saam-bi-pogs nins sẽn teel b sɩdbã hal yʋʋm wʋsgo, la b ket n tũud yẽ ne b sũy fãa wã. (1 Tɩm. 5:3) Sẽn paase, b kengda kom-bɩɩsã raoodo.

10. Mak-sõng-bʋg la a Toni kõ-yã?

¹⁰ D tẽed-n-taas nins sẽn kʋʋle, n be b zagsẽ tɩ neb get b yellã me tara yõod wʋsg a Zeova nifẽ. Wala makre, saam-biig a ye yʋʋr sẽn boond t’a Toni kʋʋlame, n be zĩig b sẽn get sẽn kʋʋl-bã yelle. A reega lisg Pɛnsilvani sẽn be Etazĩni soolmẽ wã,  yʋʋmd 1942 sa-sik kiuugã. Rẽ t’a tara yʋʋm 20. Rẽ poor bilfu, b modg-a lame n dat t’a kẽ sodaarã. A sẽn zãgsã, b kẽes-a-la bãens roog yʋʋm a yiib la pʋɩ-sʋka. Yẽ ne a pag a Hilda tara kamb a yiibu. B wub-b-la sɩdã pʋgẽ. A Toni yɩɩ kãsem-dãmbã sull yel-gɛt tigims a tãab pʋsẽ. A leb n yɩɩ tigims sull tigis-kãseng yel-gɛta. A ra kẽnda bãens roogẽ n lʋɩt taoor n maand tigissã, la a zãmsd nebã Biiblã beenẽ. A Toni tara yʋʋm 98 masã, la a ket n tʋmda a Zeova tʋʋmdã ne a sũur fãa. A ket n maanda a sẽn tõe fãa n naagd a tigingã neb n tũud a Zeova.

11. Wãn to la d tõe n wilg tɩ d nanda d tẽed-n-taas nins sẽn kʋʋl n be b zagsẽ n pa le tõe n yi wã?

¹¹ Wãn to la d tõe n wilg tɩ d nanda d tẽed-n-taas nins sẽn kʋʋl n be b zagsẽ n pa le tõe n yi wã? Sã n tõeeme, kãsem-dãmbã tõe n gesame tɩ b tõog n kẽnd tigissã, wall b paamd tigissã n kelgdẽ, la b sõng-b me tɩ b moond koɛɛgã. D tõe n tɩ kaag-b lame, bɩ n bool-b ne videokõnferãns maasem, n wilg-b tɩ b yell pak-d lame. D tẽed-n-taas nins sẽn kʋʋle, n be zĩig sẽn zãr wʋsg ne tigingã tɩ b get b yellã la d segd n wilg tɩ b yell pak-d lame n yɩɩda. D sã n pa gũusi, d tõe n wa yĩma b yelle. Tõe n yaa toog ne kẽer tɩ b gom b mensã yell ne-do. B pʋd n tõe n tagsdame tɩ rẽ pa zems ye. La d sã n maag d yĩng n sõs ne-ba, la d kelg-b neer b sã n wa togsd bũmb nins b sẽn maan a Zeova siglgã pʋgẽ tɩ kõ-b sũ-noogã, na n kenga d raood wʋsgo.

12. Nin-bʋs buud n tõe n be tõnd tigingã pʋgẽ?

¹² D tẽed-n-taas sẽn kʋʋle, sẽn tũ a Zeova ne b sũy fãa n yaa mak-sõng tõe n bee d tigingã pʋgẽ. D gom saam-bi-poak a ye yʋʋr sẽn boond t’a Ãrɩyɛt yelle. A tũu a Zeova n kaoos yʋʋm wʋsgo, Niuzɛrze sẽn be Etazĩni soolmẽ wã tiging a ye pʋgẽ. Rẽ poore, a wa n yikame n tɩ vɩ ne a bi-pugla. A tigin-paallã neb baoome n bãng-a sõma. B bãngame t’a tara minim wʋsgo. A togs-b-la koɛɛgã mooneg sẽn da yaa to-to a sẽn wa n bãng sɩdã paalem yʋʋmd 1925 wã, tɩ keng b raood wʋsgo. Wakat kãnga, a sã n da yi koɛɛgã mooneg fãa, a zãada yẽn borse, b sẽn tõe n wa yõk-a n tɩ pag bãens roog yĩnga. Yʋʋmd 1933 wã, b pʋd n yõk-a-lame n pag bãens roog semenne, hal naoor a yiibu. Wakat kãnga, a sɩdã sẽn da pa a Zeova Kaset soab n yaool n da teend-a wã yõd n gesa b kamb a tãabã yelle. Sãmbg kae tɩ d tẽed-n-taas nins sẽn kʋʋl wa a Ãrɩyɛte, n ket n tũud a Zeova ne b sũy fãa wã toga ne pẽgre.

13. Bõe la d bãng d tẽed-n-taas nins sẽn kʋʋlã zug tɩ wilgdẽ tɩ b tara yõod wʋsg a Zeova siglgã pʋgẽ?

¹³ D tẽed-n-taas nins sẽn kʋʋlã tara yõod wʋsg a Zeova nifẽ, la a siglgã pʋgẽ. B yãa bũmb toor-toor sẽn wilgd t’a Zeova sɩd teenda a siglgã, la t’a ningda bãmb mengã barka. B rɩka yam b kongr wʋsg pʋgẽ. Y segd n get-b-la wa “yam bulga,” la y rɩk yam b mak-sõngã pʋgẽ. (Yel. 18:4) Y sã n maag y yĩng n bao n bãng-b sõma, y tẽebã pãng na n paasame, la y na n bãnga bũmb wʋsgo.

14. Tõod 32:7 wã pʋgẽ, bõe la b sagend kom-bɩɩsã tɩ b maane?

¹⁴ D segd n modgame n sõsd ne d tẽed-n-taas nins sẽn kʋʋlã. (Karm-y Tõod 32:7.) B tõeeme n pa le ne sõma, n pa le tõe n kẽn tʋʋll-tʋʋlle, la b pa tõe n gom tɩ yi sõma ye. La baa ne rẽ, b ket n dat n tʋma a Zeova tʋʋmdã wʋsgo. Sẽn paase, b tara “yʋ-sõng” a Zeova nifẽ. (Koɛ. 7:1)  Tẽeg-y bũmb ning sẽn kɩt tɩ b tar yõod wʋsg a Zeova nifẽ wã yelle. Ket-y n wilgd-y tɩ y nand-b-la wʋsgo. Maan-y wa a Eliize. A Eli sẽn wa n dat n loog n bas-a wã, a Eliize kell n pẽdgame t’a na n paa ne-a. A yeela naoor a tãab fãa yaa: “Mam kõn pa ka n bas yãmb ye!”—2 Rĩm 2:2, 4, 6.

15. Sogs-bʋs la d tõe n sok d tẽed-n-taas nins sẽn kʋʋlã?

¹⁵ Maagd-y y yĩng n sokd sẽn kʋʋl-bã sogsgo, n wilg-b tɩ b yell pak-y lame. (Yel. 1:5; 20:5; 1 Tɩm. 5:1, 2) Y tõe n sok-b lame yaa: “Y sẽn wa n yaa bi-bɩɩgã, bõe n sõng yãmb tɩ y kɩs sɩd tɩ y bãnga sɩdã?” “Wãn to la yɛl nins y sẽn yã wã sõng tɩ yãmb ne a Zeova zoodã pãng paase?” “Bõe n sõng-y tɩ y kell n tall y sũ-noogã a Zeova tʋʋmdã pʋgẽ?” (1 Tɩm. 6:6-8) Rẽ poor bɩ y kelg-b neere, b sã n wa leokd yãmba.

16. Ned sẽn kʋʋl ne bi-bɩɩg sã n wa sõsd ne taaba, wãn to la tõe n naf b fãa?

¹⁶ Ned sẽn kʋʋl ne bi-bɩɩg sã n wa sõsd ne taaba, nafda b fãa. (Rom. 1:12) Y na n maneg n kɩsa sɩd t’a Zeova geta a nin-buiidã yelle, la y tẽed-n-taag ning sẽn kʋʋlã me na n bãngame t’a yell pak-y lame. A sũur na n yɩɩ noogo, a sẽn na n paam n togs yãmb a Zeova sẽn ning-a bark to-to wã.

17. Bõe yĩng tɩ d tõe n yeel tɩ d tẽed-n-taas nins sẽn kʋʋl n ket n tũud a Zeova ne b sũy fãa wã neerem paasda yʋʋmd fãa a Zeova nifẽ?

¹⁷ Neerem satame, la neb nins sẽn maand sɩd ne a Zeova wã neerem paasda yʋʋmd fãa a Zeova nifẽ. (1 Tes. 1:2, 3) Bõe yĩng tɩ d yet woto? Bala b sẽn sɩng n tũud a Zeova wã tɛka, b basame t’a vʋʋsem sõngã rems-ba, la a sõng-b tɩ b bɩɩs zʋg-sõma wʋsgo. D sã n baood n bãngd d tẽed-n-taas nins sẽn kʋʋl n tar yõod wʋsg a Zeova nifẽ wã, n nand-ba, la d rɩkd yam b nengẽ, d na n maneg n get-b-la wa neb sẽn tar yõod wʋsg a Zeova nifẽ.

18. Bõe yell la d na n gom sõsg ning sẽn pʋgdã pʋgẽ?

¹⁸ Kom-bɩɩsã sã n wilgdẽ tɩ b nanda sẽn kʋʋl-bã, tɩ sẽn kʋʋl-bã me wilgdẽ tɩ b sũur nooma ne kom-bɩɩsã, tigingã nebã tẽeb pãng paasdame. Sõsg ning sẽn pʋgdã pʋgẽ, d na n yãa sẽn kʋʋl-bã sẽn tõe n wilg to-to tɩ b nanda kom-bɩɩsã sẽn be tigingã pʋgẽ wã.