Yãmb ra miime bɩ?
Bõe n paam Niniiv tẽngã?
YƲƲMD 670 sẽn deng a Zeezi rogmã sẽnese, Asiiri lebga dũni gill pãn-soaad sẽn tar pãng wʋsgo. Sɩd me, kʋdemd wẽndẽ teed bĩngr zĩig ning b sẽn boond tɩ The British Museum sɩt wɛɛb pʋgẽ, b wilgame tɩ sẽn sɩng ne Sipr sẽn be nin-taoorã, n tall n tãag Irã sẽn be yaangã ra naaga Asiiri soolmã, la tɩ wakat n zĩnd tɩ Ezipt me ra naage. Asiiri na-tẽngã sẽn yaa Niniivã n da yaa tẽn-kãseng n yɩɩd dũniyã gill zugu. A ra tara zĩ-neeba, ro-bɛd sẽn yaa neeba, la sɛb bĩngr zĩis sẽn yalme. B ra gʋla Niniiv tẽngã lals zut tɩ wilgdẽ tɩ wa Asiiri rĩm-dãmb a taabã, rĩm a Asurbanipal me ra boonda a meng tɩ “dũni gill rĩmã.” A naamã wakate, ra yaa wa ned ra pa tõe n zab n deeg Asiiri la Niniiv sẽn yaa na-tẽngã ye.
Wakat kãnga, Asiiri sẽn da yaa dũni gill pãn-soaad sẽn tar pãng wʋsgã soolem n da yalem n yɩɩda
La Asiiri pãngã sẽn wa n sɩd yaa kãsengã, a Zeova no-rɛɛs a Sofoni yeelame: “[A Zeova] na n . . . menesa Asiiri tẽngã, bãmb na n sãama Niniiv tẽngã, la tẽngã na n lebga koɛɛng wa raoogo.” A Zeova no-rɛɛs a Nahuum me yeelame: “Zɛ-y wanzuri wã! Zɛ-y sãnemã! . . . Zɛɛbo! Wãabo! Sãoongo! . . . Woto, ned ning sẽn yãnd-a foom fãa, a na n loba a neng kɛɛng n yeele: ‘Niniiv tẽnga, fo sãamame.’” (Sof. 2:13; Nah. 2:10, 11; 3:7) Tõe tɩ nebã sẽn wʋm bãngr-gom-kãensã wã, b soka b mens yaa: ‘Gom-kãnga sɩd na n pidsame bɩ? Ned na n tõog n zab n deega Asiiri sẽn yaa dũni gill pãn-soaad sẽn tar pãngã bɩ?’ Ra wõnda yaa bũmb sẽn pa tol n tõe ye.
Niniiv wa n lebga ra-boogo
La b sẽn da pa tẽed bũmb ningã n maane! Yʋʋm a wãn nand tɩ yʋʋmd 600 sẽn deng a Zeezi rogmã ta, Babilon nebã ne Meed nebã zaba ne Asiiri n tõoge. Nebã sɩd wa n yi n basa Niniiv tẽngã, la b wa pʋd n yĩm a yell fasɩ. Sebr a yembr yeelame tɩ “kaoosg zugẽ, nebã yi n basa Niniiv tẽngã hal t’a wa lebg ra-boogo, la tɩ yaa Biiblã sẽn gom Niniiv yellã n kɩt tɩ nebã ket n tẽegd tẽngã yelle.” Sɩd me, sɩt wɛɛb a to pʋgẽ me, b yeelame tɩ “ned baa a ye ra pa mi tɩ Asiiri na-tẽngã sẽn da yaa kãsengã sɩd zĩndame ye.” Yʋʋmd 1845 wã tɛka, tẽn-vaeesd a Austen Henry Layard sɩnga Niniiv ra-boogã vaeesgo. Bũmb nins a sẽn yã wã sɩd wilgame tɩ Niniiv ra yaa tẽng sẽn tar ziiri.
Bãngr-goamã b sẽn togs Niniiv zugã sẽn paam pidsgã kengda d tẽebo, la kɩt tɩ d tõe n bas d yam tɩ bãngr-goam nins sẽn gomd rũndã-rũndã pãn-soaadbã sãoong yellã me na n pidsame.—Dãn. 2:44; Vẽn. 19:15, 19-21.
