1. Bõe la a Zeova rat tɩ d maane?

NONGLEM sẽn yaa kãseng tara yõod wʋsg a Zeova nifẽ. (Ooze 6:6) A ratame tɩ tõnd me ges rẽ wa bũmb sẽn tar yõod wʋsgo. Ne no-rɛɛs a Miise maasem, Wẽnnaam yeela tõnd tɩ d “nong maan-neere,” sẽn dat n yeel me tɩ d nong d taabã ne nonglem sẽn yaa kãsenga. (Mii. 6:8) La nand tɩ d tõog n maan rẽ, d segd n deng n bao n bãnga nonglem sẽn yaa kãseng sẽn dat n yɛɛlga.

2. Nonglem sẽn yaa kãseng rat n yeelame tɩ bõe?

² Ned sã n nong a to ne nonglem sẽn yaa kãsenga, rat n yeelame t’a nong-a-la hal wʋsgo, n na n kell n nong-a wakat fãa n pa tol n daag-a n bas ye. B nong n tũnugda ne gom-bi-kãng n gomd Wẽnnaam sẽn nong ninsaalbã to-to wã yelle. Ninsaalbã me tõe n nonga b taabã woto. Nonglem sẽn yaa kãsengã wɛɛngẽ, a Zeova n yaa mak-sõng sẽn ka to. Sõs-kãngã pʋgẽ, d na n yãa a Zeova sẽn wilgd a nonglem-kãsengã to-to ne ninsaalbã. Sõsg ning sẽn pʋgdã pʋgẽ, d na n yãa tõnd sẽn tõe n tall nonglem-kãseng to-to ne d taabã, n wilg tɩ d rɩkda a Zeova togs-n-taare.

3. Bõe la a Zeova togs a Moyiizi, a sẽn wa n vẽneg a meng ne-a wã?

³ Israyɛll nebã sẽn wa n yi Ezɩptã poore, a Zeova vẽnega a meng ne a Moyiiz n togs-a yẽ yʋʋrã, la a zʋg-sõma kẽere. Ad a sẽn yeele: “Mam . . . yaa Wẽnnaam sẽn yaa nimbãan-zoɛta, la bark kõata. Mam sũur ka yikd tao-tao ye, la mam yaa nonglem soaba, la m maanda sɩda. La mam maanda sɩd hal tɩ ta zamaan tusri, n kõt neb sugr b beegrã ne b kɩɩsgã la b yel-wẽnã fãa yĩnga.” (Yik. 34:6, 7) A Zeova sẽn togs a  Moyiiz a zʋg-sõma-kãensã sẽn be yamleoog hal wʋsgã, sõngda tõnd tɩ d bãng bũmb sẽn yaa toor zall a nonglmã wɛɛngẽ. Yaa bõe?

4-5. a) A Zeova goma a meng yell n yeel tɩ bõe? b) Sogs-bʋs la d na n leoke?

⁴ A Zeova pa nonglem soab bal ye. A yaa nonglem-kãseng soaba. Sɩd me, vɛrse-rãmb a taab n be Biiblã pʋgẽ n wilgd rẽ. (Nee. 9:17; 13:22; Yɩɩn. 86:15; 103:8; Zow. 2:13) Yaa a Zeova yell bal la b gomd vɛrse-kãens pʋsẽ, la pa ninsaalbã ye. A Zeova sẽn gomd a mengã yell woto Biiblã pʋgẽ wã zemsame. Dẽnd d tõe n yeelame tɩ nonglem sẽn yaa kãsengã tara yõod wʋsg a nifẽ. * Yaa rẽ n so tɩ rĩm a Davɩɩd gom a Zeova yell n yeel yaa: “Yãmb nonglmã bee hal saasẽ, . . . yãmb nonglmã tara yõod wʋsgo, ninsaalbã soondeda yãmb pɩgsã maasmẽ.” (Yɩɩn. 36:6, 8) Wala a Davɩɩde, tõnd me sũur nooma wʋsg a Zeova sẽn yaa nonglem-kãseng soabã yĩng bɩ?

⁵ Sẽn na yɩl n wʋm a Zeova nonglem-kãsengã võor sõma, d na n leoka sogsg a yiibu: Ãnd dãmb la a Zeova wilgd a nonglem-kãsengã? Wãn to la a Zeova sẽn wilgd tõnd a nonglem-kãsengã nafd tõndo?

6. Ãnd dãmb la a Zeova wilgd a nonglem-kãsengã?

⁶ Ãnd dãmb la a Zeova wilgd a nonglem-kãsengã? Biiblã wilgdame tɩ d tõe n nonga bũmb wʋsgo. Wala makre, “koobo,” “reezẽ rãam ne rɩ-noodo,” “remsgo,” “bãngre,” bɩ “yam.” (2 Kib. 26:10; Yel. 12:1; 21:17; 29:3) La yaa ned bal la f tõe n nong ne nonglem-kãsengã. Pa ne ninsaalbã fãa la a Zeova wilgd a nonglem-kãsengã ye. Yaa ne neb nins sẽn tar zood sõma ne-a wã bala. Wẽnnaam maanda sɩd ne a zo-rãmbã wakat fãa. A pʋlem-b lame tɩ b beoog na n yɩɩ neere. Sẽn paase, a na n kell n nong-b-la wakat fãa.

7. Wãn to la a Zeova wilg t’a nonga ãdem-biisã fãa?

⁷ A Zeova wilgame t’a nonga ãdem-biisã fãa. Daar a ye, a Zeezi yeela rao a ye yʋʋr sẽn boond t’a Nikodɛm yaa: “Wẽnnaam nonga dũniyã [rat n yeel tɩ ãdem-biisã fãa] hal wʋsgo, n kõ a Bi-ribl sẽn-ka-to wã sẽn na yɩl tɩ ned ning fãa sẽn tẽed yẽ ra sãame, la a paam vɩɩm sẽn ka sɛta.”—Zã 3:1, 16; Mat. 5:44, 45.

8-9. a) Bõe yĩng la a Zeova sẽn wilgd neb nins sẽn tũud-a wã a nonglem-kãsengã? b) Bõe yell la d na n gom masã?

 ⁸ Wa d sẽn zoe n yã wã, yaa neb nins sẽn maand a Zeova raabã bal la a wilgd a nonglem-kãsengã. Rĩm a Davɩɩd ne no-rɛɛs a Dãniyɛll yeela bũmb sẽn wilgd rẽ. Wala makre, a Davɩɩd yeelame: ‘Kɩt-y tɩ sẽn mi-b yãmbã tɩg ne y nonglmã.’ ‘Sẽn-Ka-Saab nonglmã ne neb nins sẽn zoet bãmbã paada zamaan woo zamaane.’ A Dãniyɛll me yeelame: ‘Zu-soab a Wẽnnaam, yãmb . . . gũuda y kaoolã, la y zoet neb nins sẽn nong yãmb la b sakd yãmb tõodã nimbãanega!’ (Yɩɩn. 36:11; 103:17; Dãn. 9:4) Wa gom-kãensã sẽn wilgdã, a Zeova wilgda neb nins sẽn tũud-a wã a nonglem-kãsengã, b sẽn mi-a, n zoet-a, n nong-a, la b tũud a noyã yĩnga. Yaa neb nins sẽn tũud a Zeova wa sẽn segdã bal la a wilgd a nonglem-kãsengã.

⁹ Nand tɩ d sɩng a Zeova tũubu, d ra paamame t’a nong-d wa a sẽn nong ãdem-biisã fãa wã. (Yɩɩn. 104:14) La masã d sẽn tũud-a wã, d paamame me t’a nong tõnd ne nonglem-kãsenga. A Zeova pʋd n yeta neb nins sẽn tũud-a wã yaa: “Mam nonglmã fo yĩngã kõn tol n loog” ye. (Eza. 54:10) Sɩd me, a Davɩɩd mengã bãngame t’a Zeova “welgda b nin-nongrã toore.” (Yɩɩn. 4:4) D sẽn mi rẽ wã, segd n kɩtame tɩ d maan bõe? Yɩɩn-gʋlsdã yeelame: “Bɩ sẽn tar-a yam gũus ne bõn-kãens fãa, n wʋm Sẽn-Ka-Saab nonglmã võore.” (Yɩɩn. 107:43) Yaa saglg sẽn yit a Zeova nengẽ. Bɩ d ges bũmb a tãab a Zeova sẽn maand tɩ wilgd a nonglem-kãsengã, la rẽ sẽn nafd tõnd to-to.

10. Wãn to la d sẽn mi tɩ Wẽnnaam nonglem-kãsengã paada wakat fãa wã nafd tõndo? (Yɩɩn-sõamyã 31:8)

¹⁰ Wẽnnaam nonglem-kãsengã paada wakat fãa yĩnga: Yɩɩn-sõamyã 136 pʋgẽ, b goma Wẽnnaam nonglmã yell naoor 26. Pipi vɛrse wã pʋgẽ, b yeelame: “Pʋʋs-y Sẽn-Ka-Saab bark b sõmblmã yĩnga, bala, bãmb nonglmã paada wakat fãa!” (Yɩɩn. 136:1) Vɛrse a 2 n tãag 26, vɛrse  fãa pʋgẽ, b lebs n togsa gomd ning sẽn yaa: “Bãmb nonglmã paada wakat fãa.” D sã n karem yɩɩn-kãngã goamã, d yãta a Zeova manesem toor-toor sẽn wilgd t’a yaa nonglem-kãseng soaba, hal tɩ d zɩ n tags rẽ yell meng ye. B sẽn deesd yɩɩllã pʋgẽ tɩ “bãmb nonglmã paada wakat fãa” wã, wilgdame tɩ Wẽnnaam sẽn nong a nin-buiidã to-to wã pa viigd ye. D sẽn mi t’a Zeova pa yɩt tao-tao n daag a nin-buiidã n basã kengda d raoodo. A nonga neb nins sẽn tũud-a wã wʋsgo, n na n kell n wilg t’a nong-b lame, sẽn yɩɩd fãa b sã n wa be toog pʋgẽ. Wãn to la rẽ nafd tõndo? D sẽn mi t’a Zeova pa raagd tõnd n basã kõta tõnd sũ-noog la pãnga, tɩ d tõe n kell n mao ne d zu-loeesã la d ket n tũud-a.—Karm-y Yɩɩn-sõamyã 31:8.

11. Wa Yɩɩn-sõamyã 86:5 wã sẽn wilgdã, bõe n kɩt t’a Zeova yaa sug-kõata?

¹¹ Wẽnnaam yaa sug-kõata, a nonglem-kãsengã yĩnga: A Zeova sẽn yaa nonglem-kãseng soabã yĩnga, a sã n yã yel-wẽn-maand sẽn bas a tʋʋm-wẽnsã n tek yam n kot sugri, a kõt-a-la sugri. Ad yɩɩn-gʋlsd a Davɩɩd sẽn yeel a Zeova zugu: “B ka sɩbgd tõnd wa sẽn zems d yel-wẽnã ye. B ka lebsd tõnd wa sẽn zems d kongrã ye.” (Yɩɩn. 103:8-11) A Davɩɩd mengã ra mii ned sũ-sãang sẽn tõe n ta zĩig ninga, a soabã sũur-kasetã sã n ningd-a taale. La a bãngame me t’a Zeova “kõta sugri.” Bõe n kɩt t’a Zeova yaa sug-kõata? Sok-kãngã leoor bee Yɩɩn-sõamyã 86:5 wã pʋgẽ. (Karm-y.) Dẽnd wa a Davɩɩd sẽn yeel a pʋʋsgã pʋgẽ wã, a Zeova kõta neb nins fãa sẽn kot sugrã sugri, a sẽn nong-b ne nonglem-kãsengã yĩnga.

12-13. D sũur sã n sãama wʋsgo, yel-wẽnd d sẽn maan pĩndã yĩnga, bõe n tõe n sõng-do?

¹² D sũur sã n sãam yel-wẽnd d sẽn maan yĩnga, zemsame. Pʋd n yaa sõma. Tõe n sõng-d lame tɩ d tek yam, la d toeem d yel-manesmã. La neb kẽer ket n ningda b mens taale, yel-wẽnd b sẽn da maan pĩndã yĩnga. B ket n tagsdame t’a Zeova pa tol n tõe n kõ-b sugri, baa b sã n kos sugr la b bas b tʋʋm-wẽnsã. Sã n yaa woto ne yãmba, y sã n tẽeg t’a Zeova nonga neb  nins sẽn tũud-a wã ne nonglem-kãsenga, na n sõng-y lame.

¹³ Wãn to la rẽ nafd tõndo? Baa ne d sẽn yaa koangdbã, d ket n tõe n tũu a Zeova ne sũur-kaset sẽn yaa sõma tɩ d sũur noomẽ. Bala “a Bi-ribl a Zeezi zɩɩmã pekda tõnd n yiisd yel-wẽnd buud fãa.” (1 Zã 1:7) Y sũur sã n sãamd yel-wẽnd y sẽn maan pĩndã yĩnga, bɩ y tẽeg t’a Zeova tʋllame n kõ yel-wẽn-maandb nins sẽn tek yam n kot sugrã sugri. D ges a Davɩɩd sẽn yeel bũmb ninga, tɩ wilgd t’a Zeova nonglem-kãsengã ne a sugrã lokda taabã. A yeelame: “Sẽn-Ka-Saab nonglmã b zoɛtbã yĩngã zãntlem yaa wa yĩngrã ne tẽngã sẽn zãnt ne taab to-to wã. Yaang ne nin-taoor sẽn zãr ne taab to-to wã, Sẽn-Ka-Saab zãagda tõnd ne d beegrã me a woto.” (Yɩɩn. 103:11, 12) Hakɩɩka, a Zeova tʋllame n ‘kõ-d sugr wʋsgo.’—Eza. 55:7.

14. Wãn to la a Davɩɩd wilg a Zeova nonglem-kãsengã sẽn kogend tõnd to-to?

¹⁴ Wẽnnaam kogenda tõnd ne yẽ zoodã, a nonglem-kãsengã yĩnga: A Davɩɩd pʋʋsa a Zeova n yeel yaa: “Yãmb yaa mam zĩ-soalgdga, yãmb zãagda maam ne yel-pakre, yãmb gũbgda maam ne fãagr kaasgo. . . . Sẽn-Ka-Saab nonglmã na n gũbga sẽn teeg-a bãmbã.” (Yɩɩn. 32:7, 10) Pĩnd wẽndẽ wã, b ra meta lalg n gũbg tẽnga, nin-buiidã koglg yĩnga. Woto me, a Zeova nonglem-kãsengã yĩnga, a kogenda tõnd ne bũmb nins fãa sẽn tõe n sãam tõnd ne yẽ zoodã. Sẽn paase, a Zeova nonglem-kãsengã yĩnga, a takda tõnd n pẽnegd a menga.—Zer. 31:3.

15. Wãn to la a Zeova nonglem-kãsengã yaa wa zĩ-soalgdga, la pãng zĩiga?

¹⁵ A Davɩɩd leb n dɩka makre, n wilg Wẽnnaam sẽn kogend a nin-buiidã to-to wã. A yeelame: “Yãmb yaa mam pãng soaba, . . . Wẽnnaam sẽn nong maamã yaa mam pãng zĩiga.” A Davɩɩd goma a Zeova yell me, n yeel yaa: “Sẽn-Ka-Saab yaa mam maan-neer soaba. Bãmb yaa mam pãng zĩiga, la m zĩ-soalgdga, la m fãagda. Bãmb yaa mam gãongo, la m zĩ-lilldga.” (Yɩɩn. 59:18; 144:2) Bõe yĩng t’a Davɩɩd rɩk a Zeova nonglem-kãsengã n mak ne zĩ-soalgdg la pãng zĩiga? Bala d sẽn tũud a Zeova wã, sẽn yaa zĩig ning fãa la d be, a na n kogl-d lame tɩ baa fʋɩ ra sãam zood ning d sẽn tar ne-a wã ye. Yaa woto me la Yɩɩn-sõamyã 91 soabã wilgda. Yɩɩn-kãng gʋlsdã yeelame: “Mam yeela Sẽn-Ka-Saab yaa: ‘Yãmb yaa mam zĩ-soalgdga, la m pãng zĩiga.’” (Yɩɩn. 91:1-3, 9, 14) A Moyiiz me rɩka makre, n wilg t’a Zeova kogenda tõndo. (Yɩɩn. 90:1) Sẽn paase, a sẽn wa n kolg kũumã, a togsa gomd sẽn wilgd t’a Zeova kogenda a nin-buiidã. A yeelame: “Wẽnnaam sẽn-ka-sɛɛb yaa yãmb zĩ-kẽedga la b nusã sẽn be wakat fãa wã zãada yãmba.” (Tõo. 33:27, Wẽnnaam Sebre, 1983) B sẽn yeel tɩ “b nusã sẽn be wakat fãa wã zãada yãmbã” sõngda tõnd tɩ d bãng bõe a Zeova zugu?

16. Bõe ne bõe la d mi tɩ tar yõod wʋsgo? (Yɩɩn-sõamyã 136:23)

¹⁶ A Zeova sã n yaa tõnd zĩ-soalgdga, d yam gãee bãane. La wakat ninga d tõe n komsa raoodo, n tagsdẽ t’a Zeova pa tõe n yɩ d zĩ-soalgdg ye. Sã n wa yaa woto, bõe la a Zeova na n maan n sõng tõndo? (Karm-y Yɩɩn-sõamyã 136:23.) A na n tẽega a nugu, n bels-d tɩ d le paam raoodo. (Yɩɩn. 28:9; 94:18) Wãn to la rẽ nafd tõndo? D miime tɩ d tõe n teega Wẽnnaam wakat fãa. Woto sõngda tõnd tɩ d bãng bũmb a yiib sẽn tar yõod wʋsgo. Pipi, yaa tɩ sẽn yaa zĩig ning fãa la d be, d  tõe n paamame t’a kogl-do. Yiibu, yaa tɩ tõnd yell paka d saasẽ Ba wã sẽn nong-dã wʋsgo.

17. Wẽnnaam nonglem-kãsengã yĩnga, d tõe n kɩsa sɩd ne bõe? (Yɩɩn-sõamyã 33:18-22)

¹⁷ Wa d sẽn yã wã, d sã n wa maood ne zu-loeese, d tõe n kɩsa sɩd t’a Zeova na n sõng-d lame tɩ d kell n tall zood sõma ne-a. (2 Kor. 4:7-9) No-rɛɛs a Zeremi yeelame: “Sẽn-Ka-Saab nonglmã ka sɛte, la bãmb nimbãan-zoeer ka tar tɛk ye.” (Wiis. 3:22) D tõe n basa d yam t’a Zeova na n kell n nong-d-la ne nonglem-kãsenga, bala wa yɩɩn-gʋlsdã sẽn yeelã, a Zeova “nif bee sẽn zoet-b bãmbã zugu, b nif bee sẽn tẽed-b bãmb nonglmã zugu.”—Karm-y Yɩɩn-sõamyã 33:18-22.

18-19. a) Bõe la d pa segd n yĩmi? b) Bõe yell la d na n gom sõsg ning sẽn pʋgdã pʋgẽ?

¹⁸ Bõe la d pa segd n yĩmi? Nand tɩ d sɩng a Zeova tũubu, d ra paamame t’a nong-d wa a sẽn nong ãdem-biisã fãa wã. La d sẽn sɩng a tũubã tɛka, d paamame me t’a nong-d ne nonglem-kãsenga. A nonglem-kãsengã yĩnga, a kogenda tõndo. A na n sakame tɩ d kell n yɩ a zoa, la a pids bũmb nins fãa a sẽn pʋlem tõndã. A ratame tɩ d kell n yɩ a zoa wakat fãa yĩnga. (Yɩɩn. 46:2, 3, 8) Rẽ wã, sẽn yaa zu-loɛɛg ning fãa la d maood ne, a Zeova na n kõo tõnd pãnga, tɩ d kell n maan sɩd ne-a.

¹⁹ D yãa a Zeova sẽn wilgd to-to t’a nonga neb nins sẽn tũud-a wã ne nonglem-kãsenga. A ratame tɩ tõnd me nong d taabã ne nonglem-kãsenga. Wãn to la d tõe n maan rẽ? D na n goma rẽ yell sõsg ning sẽn pʋgdã pʋgẽ.