1. Sok-bʋg la d mi n sokd d menga?

YÃMB sã n tags yɛl nins sẽn na n maan ka la bilfã yelle, kẽesd-y-la rabeem bɩ? Wala makre, ziri tũudmã sãoongã, a Goog sẽn yit Magoogã sẽn na n zab ne Wẽnnaam nin-buiidã, la Armagedõ zabrã. Yãmb zoe n soka y meng n gese yel-kãensã sẽn kẽesd rabeemã sasa, y na n tõog n kell n maana sɩd ne a Zeova bɩ? Y sã n zoe n soka y meng woto, bɩ y bãng t’a Zeezi goam nins sẽn be vɛrse ning zug sõs-kangã sẽn tikã tõe n sõng-y-la wʋsgo. A yeela a tẽn-tʋmdbã yaa: “Ra bas-y tɩ y sũyã sãam ye. Tẽ-y Wẽnnaam.” (Zã 14:1) D tẽebã sã n tara pãnga, na n sõng-d lame tɩ d tõog n yals kãn-kãe yɛl nins sẽn wat ka la bilfã taoore.

2. Bõe la d tõe n maan tɩ d tẽebã tall pãnga? Bõe yell la d na n gom sõs-kãngã pʋgẽ?

² D sã n tags bũmb nins d sẽn maand masã meng d tẽebã sã n wa paamd makrã yelle, d bãngda d sẽn tõe n maan n paas d tẽebã pãnga. Sɩd me, d bãngda bũmb kẽer d sẽn segd n maan tɩ d tẽebã pãng paase. D sã n tõog n yals kãn-kãe makr taoor fãa, d tẽebã na n paamda pãng n paasdẽ. Rẽ na n sõng-d lame tɩ d wa tõog n yals kãn-kãe yɛl nins sẽn watã taoore. Sõs-kãngã pʋgẽ, d na n yãa yɛl a naase, sẽn wilgd vẽeneg t’a Zeezi karen-biisã ra segd n talla tẽeb sẽn tar pãnga. D na n yãa tõnd me sẽn tõe n mao ne yel-kãensã buud to-to rũndã-rũndã, la rẽ sẽn tõe n sõng-d to-to tɩ d segl d mense, yɛl nins sẽn wat ka la bilfã yĩnga.

3. Wa Matiye 6:30, 33 sẽn wilgdã, bõe la a Zeezi wilg tẽebã tallg wɛɛngẽ?

³ Zak soab fãa sẽn dat yaa a modg t’a zakã rãmb paam rɩɩbo, fut la gãag zĩiga. D sẽn vɩ toog wakatã, woto mi n pa  nana ye. D tẽed-n-taas kẽer tʋʋm n sãame, tɩ b maan b sẽn tõe fãa, n pa paam tʋʋmd a to ye. Kẽer zãgsa tʋʋmd b sẽn kõ-ba, tʋʋmdã sẽn pa zems ne kiris-nedã yĩnga. Sã n wa yaa woto, d segd n talla tẽeb t’a Zeova na n gesame tɩ d zakã rãmb paam bũmb nins sẽn yaa tɩlɛ ne-bã. A Zeezi togsa a karen-biisã rẽ, a sẽn wa n sõsd ne-b tãngã zugã. (Karm-y Matiye 6:30, 33.) D sã n kɩs sɩd zãng t’a Zeova pa na n daag-d n base, d na n tõog n lʋɩɩsa a raabã taoor d vɩɩmã pʋgẽ. D sã n neẽ t’a Zeova sɩd sõngda tõnd tɩ d paamd sẽn yaa tɩlɛ ne-dã, d zoodã ne-a na n paamda pãnga, la d tẽebã me na n talla pãnga.

4-5. Sẽn wa n lebg toog ne zak a ye rãmb tɩ b paam sẽn yaa tɩlɛ ne-bã, bõe n sõng-ba?

⁴ D ges a Zeova sẽn sõng a Miguwɛll ne a zakã rãmb sẽn be Venezuwela wã to-to. Yɩl n paam sẽn yaa tɩlɛ ne-bã ra lebga toogo, hal tɩ b ra maand yɩɩre. A Miguwɛll ne a zakã rãmb ra tara pʋʋg n kooda, tɩ b sẽn da paamd bũmb ninsã ra sekd-b tɩ b tõe n vɩɩmde. La daar a ye, bi-bees sẽn tar zab-teed wa n deega b pʋʋgã ne pãnga, la b rig-ba. A Miguwɛll yeelame: “Masã, zĩig ning tõnd sẽn tõe n ko n paam rɩɩbã pa yalem ye. Rẽ me, pa tõnd n so ye. Daar fãa yibeoogo, m rengd n pʋʋsa a Zeova t’a sõng-d tɩ d paam sẽn yaa tɩlɛ ne-d daarã yĩnga.” Vɩɩmã yaa toog ne a Miguwɛll ne a zakã rãmba. La b sẽn kɩs sɩd t’a Zeova sẽn yaa Ba sẽn nong-dã na n gesame tɩ b paam sẽn yaa tɩlɛ ne-b daar fãa wã yĩnga, b kẽnda tigissã n pa vaandẽ, la b moond koɛɛgã me. B sẽn lʋɩɩs a Zeova tũubã taoor b vɩɩmã pʋgẽ wã yĩnga, a Zeova gesame tɩ b paamd bũmb nins sẽn yaa tɩlɛ ne-bã.

⁵ A Miguwɛll ne a Pag a Yurayi tagsa a Zeova sẽn ges b yell to-to b zu-loɛɛgã pʋgẽ wã yell n yɩɩda. Wakat ninga, a Zeova tũnuga ne b tẽed-n-taasã, n sõng-b tɩ b paam teed kẽer sẽn yaa tɩlɛ ne-ba, bɩ n sõng a Miguwɛll t’a paam tʋʋmde. Wakat kẽer me, a Zeova tũnuga ne b tẽngã filiyallã n sõng-b tɩ b paam bũmb kẽer sẽn yaa tɩlɛ ne-ba. A Zeova zɩ n daag-b n bas ye. Woto sõng-b lame tɩ b tẽebã pãng paase. B bi-pugl-kãseng a Zoselin togsa bũmb takɩ a Zeova sẽn maan n sõng-ba. Rẽ poore a yeelame yaa: “A Zeova sẽn sõng tõnd to-to wã sɩd kengda raoodo. A yaa m zoa m sẽn teeg n vɩ. Zu-loees nins d sẽn paamã sõnga tõnd tɩ d segl d mense, zu-loe-kɛgems nins sẽn wat ka la bilfã yĩnga.”

6. Y sã n maooda ne ligd zu-loeese, bõe la y tõe n maan tɩ y tẽebã pãng paase?

⁶ Yãmb maooda ne ligd zu-loees bɩ? Sã n yaa woto, yaa vẽeneg tɩ pa nana ne-y ye. La baa y zu-loɛɛgã sẽn yaa to-to, y tõe n tũnuga ne rẽ n paas y tẽebã pãnga. Pʋʋs-y-yã a Zeova, la y karem a Zeezi goam nins sẽn be Matiye 6:25-34, la y bʋgs b zugu. Tags-y neb kẽer kibay sẽn wilgd tɩ  d sã n lʋɩɩs a Zeova tʋʋmdã taoore, a na n gesame tɩ d paam sẽn yaa tɩlɛ ne-do. (1 Kor. 15:58) Y sã n maan woto, y na n maneg n kɩsa sɩd tɩ y saasẽ Ba wã sã n sõnga neb sẽn da maood ne yãmb zu-loeesã buudu, a na n sõnga yãmb me. A mii bũmb nins sẽn yaa tɩlɛ ne-yã, la a mi a sẽn tõe n sõng-y to-to tɩ y paam rẽ. Y sã n neẽ t’a Zeova sõngd-y lame, y tẽebã na n paama pãnga, tɩ y wa tõog n yals kãn-kãe yɛl nins sẽn watã taoore.—Hab. 3:17, 18.

7. Wa Matiye 8:23-26 sẽn wilgdã, wãn to la sob-kãseng mak a Zeezi karen-biisã tẽebo?

⁷ Daar a ye, a Zeezi ne a karen-biisã ra bee koom-koglg pʋgẽ n togd sore, tɩ sob-kãseng yik mogrã zugu. La a Zeezi tũnuga ne bũmb ning sẽn maanã n sõng-b tɩ b bãng tɩ b segd n talla tẽeb sẽn tar pãnga. (Karm-y Matiye 8:23-26.) Baa ne sobgã sẽn da fugd wʋsg tɩ ko-pɛmã zẽkd n kẽed koglgã pʋgẽ wã, a Zeezi ra maaga a yĩng n gõe. Rabeem kẽe a karen-biisã, tɩ b nek-a n kos-a t’a fãag-ba. La a Zeezi sok-b-la ne bʋgsem yaa: “Yãmb a tẽeb bilf rãmba, bõe yĩng tɩ yãmb yɛɛsd woto?” Karen-biisã ra pa segd n yɛɛs ye. B ra segd n bãngame t’a Zeova tõe n kogla a Zeezi ne neb nins sẽn be ne-a wã. Woto wilgda tõnd bõe? D tẽebã sã n tar pãnga, d na n tõog n yalsa kãn-kãe sob-kãseng sasa, wall zu-loe-kɛgeng sẽn wõnd sob-kãseng taoore.

8-9. Wãn to la a Anell tẽebã paam makre, la bõe n sõng-a?

⁸ D gom a Anell yelle. Yaa saam-bi-poak sẽn pa kẽ kãadem, n be Portoriko. A tõog n yalsa kãn-kãe zu-loe-kãseng taoore, t’a tẽebã pãng paase. A zu-loɛɛgã yɩɩ sob-kãseng sɩd-sɩda. Yʋʋmd 2017 wã, sob-kãseng ning b sẽn bool tɩ Mariya wã sãama a zakã. Sẽn paase, a tʋʋmã sãama sob-kãsengã yĩnga. A yeelame: “Wakat-kãng sẽn yɩ toog wakatã, mam da maanda yɩɩr wʋsgo. La m modgame n teeg a Zeova zãng-zãng ne pʋʋsgã maasem, n pa bas tɩ yɩɩrã kɩt tɩ m pa tõog n maan m sẽn da segd n maanã ye.”

⁹ A Anell leb n wilga bũmb a to sẽn sõng-a t’a tõog n mao ne a zu-loɛɛgã. Yaa sakrã. Ad a sẽn yeele: “Mam sẽn sak n tũ noy nins a Zeova siglgã sẽn kõ wã sõnga maam tɩ m yamã gãande. A Zeova tũnuga ne m tẽed-n-taasã n sõng-ma. B kenga m raoodo, la b kõ-m teed sẽn da yaa tɩlɛ ne-ma.” A paasame yaa: “A Zeova kõo maam tɩ yɩɩg m sẽn da tõe n kos-a wã hal zĩig sẽn zãre. Rẽ paasa m tẽebã pãnga.”

10. Y sã n maooda ne zu-loees sẽn yaa wa “sob-kãsenga,” bõe la y tõe n maan tɩ sõng-yã?

¹⁰ Yãmb me maooda ne zu-loees sẽn yaa wa “sob-kãseng” bɩ? Tõe tɩ y sẽn maood ne zu-loees ninsã yaa sabab-wẽng yĩnga. Tõe me tɩ yaa bã-kɛgeng n namsd yãmba, tɩ y koms raoodo, n pa mi y sẽn maandg ye. Y tõe n maanda yɩɩr wakat ninga, la ra  bas-y tɩ yɩɩrã kɩt tɩ y pa teeg a Zeova ye. Pelgd-y y pʋg n pʋʋsd-a, tɩ y zoodã pãng paase. Bʋgsd-y bũmb nins a Zeova sẽn maan pĩndã n sõng yãmbã zugu. (Yɩɩn. 77:12, 13) Y tõe n basa y yam t’a pa na n tol n daag yãmb n bas a bada.

11. Bõe yĩng tɩ d segd n yãk yam n sakd neb nins sẽn lʋɩt tõnd taoorã?

¹¹ Bõe me n tõe n sõng-y zu-loeesã sasa? Wa a Anell sẽn yeelã, yaa sakrã. Modg-y n teeg-y neb nins a Zeova ne a Zeezi sẽn kɩs sɩdã. Wakat ninga, neb nins a Zeova sẽn yãk tɩ b lʋɩt tõnd taoorã tõe n yeelame tɩ d maan bũmbu, tɩ d yaool n getẽ tɩ pa tar neng ye. La d sã n sak b sẽn yeelã, a Zeova ningda barka. A Gomdã, n paas wẽn-sakdb kẽer kibay wilgdame tɩ sakrã fãagda yõyã. (Yik. 14:1-4; 2 Kib. 20:17) Bʋgsd-y kiba-kãens zutu. Woto na n sõng-y lame tɩ y tʋll n tũ noy la sagls nins a Zeova siglgã sẽn kõt masã wã, la b sẽn na n kõ-d ka la bilfã. (Ebre. 13:17) Rẽ wã, y pa segd n zoe rabeem, to-kãsengã sẽn wat ka la bilfã yĩng ye.—Yel. 3:25.

12. Wãn to la Luk 18:1-8 wã wilgd tɩ tẽebã tõe n sõng-d lame, b sã n wa maand-d kɛgre?

¹² A Zeezi ra miime tɩ b sã n wa maand a karen-biisã kɛgre, tõe n komsa b tẽebã. Sẽn na yɩl n sõng-b tɩ b tõog n yals kãn-kãe, a wẽe yel-bũnd tɩ be Luk sebrã pʋgẽ. A goma pʋg-kõor sẽn kẽng bʋ-kaood sẽn pa zoet Wẽnnaam nengẽ yelle, n tɩ pẽdg ne kosgo, sẽn na yɩl t’a kao bʋʋd tɩrga. A ra kɩsa sɩd t’a sã n kell n pẽdg ne kosgo, a na n paamame tɩ bʋ-kaoodã sõng-a. A wa n paamame tɩ bʋ-kaoodã sak n sõng-a. Yam-bʋg la d tõe n dɩk kiba-kãngã pʋgẽ? A Zeova pa nin-wẽng ye. Rẽ n so t’a Zeezi yeel yaa: “Pa vẽeneg t’a na n kaoo a nin-tũusdsã sẽn boond-a wĩntoog la yʋngã bʋʋd tɩrg . . . sɩda?” (Karm-y Luk 18:1-8.) Rẽ poore, a Zeezi paasame yaa: “Ninsaal Biigã sã n wa wa, a na n yãa tẽeb kãng tẽngã zug sɩda?” B sã n wa maand-d kɛgre, d segd n talla sũ-mar la d kell n yals kãn-kãe, tɩ wilg tɩ wa pʋg-kõorã, tõnd me tẽebã tara pãnga. D sã n tar tẽeb a woto buudu, d tõe n kɩsa sɩd tɩ sẽn yaa wakat ning fãa, a Zeova na n sõng-d lame. D segd n sak n deegame me tɩ pʋʋsgã sõngda wʋsgo. Wakat ninga, a Zeova tõe n leoka d pʋʋsgã hal tɩ ling-du.

13. Wãn to la pʋʋsgã sõng zak a ye rãmba, neb sẽn wa n maand-b kɛgre?

¹³ D gom saam-bi-poak a ye yʋʋr sẽn boond t’a Veronik, n be Kõngo yelle. Gudgr n da yik b tẽngẽ wã, tɩ yɩ tɩlɛ tɩ yẽ ne a sɩdã sẽn pa tũud a Zeova wã, n paas b bi-pugl sẽn tar yʋʋm 15 zoe n yi tẽngã. B wa n taa zĩig sodaas sẽn gɩd sorã. Sodaasã kɩtame tɩ b yalse, la b yeel tɩ b na n kʋ-b lame. A Veronik sɩnga yãbre. La a bi-puglã zẽka a koɛɛga, n pʋʋsd a Zeova la a pʋt a Zeova yʋʋrã, n na n sõng a ma wã t’a  yam gãande. A sẽn pʋʋs n sa wã, sodaasã taoor soabã sok-a lame yaa: “Pʋg-sada, ãnd n wilg foo pʋʋsgo?” T’a leok yaa: “Yaa m ma. Yaa pʋʋsg ning sẽn be Matiye 6:9-13 la a wilg maam.” Sodaasã taoor soabã yeel-a lame yaa: “Pʋg-sada, bɩ foo ne f roagdbã loog ne laafɩ. La bɩ yãmb Wẽnnaam a Zeova kogl-yã!”

14. Bõe n tõe n mak d tẽebã, la bõe n tõe n sõng-d tɩ d kell n yals kãn-kãe?

¹⁴ Kibay a woto wilgda pʋʋsgã yõod sẽn ta zĩig ninga. La Wẽnnaam sã n pa leok y pʋʋsg tao-tao wall vẽeneg-vẽenega, y maanda wãna? Wa pʋg-kõor ning yell a Zeezi sẽn gom a yel-bũndã pʋgẽ wã, ket-y n pʋʋsd-y la y bas y yam tɩ d Wẽnnaamã pa na n daag-y n base, la t’a na n wa leoka y pʋʋsgã wakat sẽn zemse. Ket-y n pʋʋsd-y a Zeova n kot a vʋʋsem sõngã. (Fili. 4:13) Tẽeg-y tɩ ka la bilfu, a Zeova na n ning-y-la bark wʋsgo, hal tɩ y yĩm tood nins fãa y sẽn da tarã yelle. Ne a Zeova sõngre, y sã n kell n yals kãn-kãe zu-loeesã taoore, y tẽebã pãng na n paasame, tɩ y wa tõog n yals kãn-kãe yɛl nins sẽn wat ka la bilfã taoore.—1 Pɩy. 1:6, 7.

15. Wa Matiye 17:19, 20 wã sẽn wilgdã, bõe la a Zeezi karen-biisã pa tõog n maane?

¹⁵ A Zeezi wilga a karen-biisã tɩ tẽebã na n sõng-b lame tɩ b kell n yals kãn-kãe zu-loeesã taoore. (Karm-y Matiye 17:19, 20.) Daar a ye, b pa tõog n dig zĩna, baa ne b sẽn da tõog n dig zĩn-dãmb pĩndã. Bõe yĩng la b sẽn pa tõog n dig zĩnã? A Zeezi wilgame tɩ yaa b tẽebã sẽn da paoodã yĩnga. A yeel-b lame tɩ b tẽebã sã n da yaa wʋsgo, b ra na n tõoga zu-loees sẽn wõnd tãmse. Tõnd me tõe n maooda ne zu-loeese, tɩ wõnd d pa na n tol n tõog n yals kãn-kãe ye.

16. Wãn to la tẽebã sõng a Geyedi t’a tõog n mao ne a sũ-sãangã sẽn da yaa kãsengã?

¹⁶ D gom saam-bi-poak a ye yʋʋr sẽn boond t’a Geyedi n be Guwatemala yelle. Daar a ye, b kẽnga tigsg n lebg n kuiisẽ tɩ bi-bees yek-ba, n kʋ a sɩd a Edi. Wãn to la a Geyedi tẽebã sõng-a t’a tõog n mao ne a sũ-sãangã sẽn da yaa kãsengã? A yeelame: “Pʋʋsgã sõngda maam tɩ m dɩkd m yɛlã fãa n basd ne a Zeova, tɩ kɩt tɩ m yam gãe bãane. M neeme t’a Zeova tũnugda ne m zakã rãmb la m zo-rãmbã sẽn be tigingã pʋgẽ wã n get m yelle. Mam sẽn ket n wɩngd ne a Zeova tũubã sõngda maam tɩ m sũ-sãangã boogdẽ, tɩ m ket n maood beoog ne a noor fãa, n pa bʋʋd yɛlã sẽn na n yɩ to-to ye. Yel-kãngã sõnga maam tɩ m bãng tɩ sẽn wa n yaa zu-loɛɛg ning fãa, a Zeova ne a Zeezi n paas siglgã na n sõnga maam tɩ m kell n mao.”

17. Bõe la d tõe n maane, d sã n wa maood ne zu-loɛɛg sẽn wõnd tãnga?

¹⁷ Y bee sũ-sãams pʋgẽ, y ned sẽn maan kaalem yĩng bɩ? Sã n yaa rẽ, bɩ y maag y  yĩng n karem Biiblã kibay nins sẽn gomd neb sẽn vʋʋg yellã, tɩ sõng-y tɩ y maneg n kɩs sɩd t’a Zeova sẽn pʋlem tɩ sẽn ki-bã na n wa vʋʋgame wã na n pidsame. Y sũur sãamame, b sẽn yiis y zakã ned tigingã pʋgẽ yĩng bɩ? Bɩ y zãms Biiblã, tɩ sõng-y tɩ y maneg n kɩs sɩd t’a Zeova kiblgã la sõma n yɩɩda. Sẽn yaa zu-loɛɛg ning fãa la y maood ne, bɩ y ges rẽ wa segb y sẽn paam n na n paas y tẽebã pãnga. Pelg-y y pʋg n togs a Zeova sẽn be y sũurẽ. Ra zãag-y y meng ne neb a taabã ye. Pʋd n baood-y y tẽed-n-taasã zĩiga. (Yel. 18:1) Maand-y bũmb kẽer sẽn na n sõng-y tɩ y tõog toogo, baa na n yɩɩ ne nintãm. (Yɩɩn. 126:5, 6) Kell-y n wɩng-y ne tigissã kẽnde, koɛɛgã moonego, la Biiblã karengo. Ket-y n tagsd-y bõn-sõma nins a Zeova sẽn pʋlem tɩ wat ka la bilfã yelle. Y sã n neẽ t’a Zeova sɩd sõngd-y lame, y tẽebã pãng na n paasdame.

18. Y sã n wa yã bũmb sẽn wilgd tɩ y tẽebã paoodame, bõe la y tõe n maane?

¹⁸ Y pĩnd zu-loeesã, wall y sẽn maood ne zu-loees nins masã wã sã n wilgdame tɩ yaa wa y tẽebã pa tar pãnga, bɩ y ra koms raood ye. Ges-y rẽ wa segb y sẽn tõe n tũnug ne n paas y tẽebã pãnga. Wa a Zeezi tẽn-tʋmdbã, kos-y-yã a Zeova t’a sõng-y tɩ y tẽebã pãng paase. (Luk 17:5) Sẽn paase, tags-y kibay nins d sẽn gom sõs-kãngã pʋgẽ wã yelle. Wa a Miguwɛll ne a pag a Yurayi, tẽegd-y wakat nins fãa a Zeova sẽn sõng yãmbã yelle. Wa a Veronik bi-puglã ne a Anelle, pelgd-y y pʋg n pʋʋsd a Zeova, sẽn yɩɩd fãa zu-loe-kɛgems sasa. La wa a Geyedi, bãng-y t’a Zeova tõe n tũnuga ne y zakã ned wall y zo-rãmb n sõng-yã. Y sã n bas t’a Zeova sõng-y tɩ y tõog n mao ne y zu-loeesã masã menga, y tõe n basa y yam t’a na n sõng-y lame tɩ y tõog n mao ne zu-loɛɛg ning fãa y sẽn na n wa sege.

19. A Zeezi ra kɩsa sɩd ne bõe, la yãmb me tõe n kɩsa sɩd ne bõe?

¹⁹ A Zeezi wilga a karen-biisã yɛl nins wɛɛngẽ b sẽn segd n modg tɩ b tẽebã tall pãngã. La a ra kɩsa sɩd t’a Zeova na n sõng-b lame tɩ b tõog n mao ne zu-loees nins fãa b sẽn na n segã. (Zã 14:1; 16:33) A ra kɩsa sɩd tɩ kʋʋn-kãseng n na n põs to-kãsengã sasa, b tẽebã sẽn tar pãngã yĩnga. (Vẽn. 7:9, 14) Yãmb na n naaga nin-kãensã bɩ? Ne a Zeova sõngre, y na n wa tõog n naag-b lame, y sã n modg masã meng tɩ y tẽebã pãng paase.—Ebre. 10:39.