1-2. Wãn to la a Zeova goam nins sẽn be Ezayi 65:16, 17 wã tõe n sõng-d tɩ d ra koms raood n base?

YƲƲMD 2017 rasem a tãab tigis-kãsengã gom-zug yɩɩ: “Ra koms raood n bas ye.” Yɩɩ gom-zug sẽn tall pãnga. Sõssã wilga d sẽn na n maan to-to n tõog toog d zu-loeesã pʋsẽ. Yaa yʋʋm a naas la woto masã, la d ket n tõogda toog dũni-wẽn-kãngã pʋgẽ.

² Sẽn pa kaoose, yãmb maoo ne zu-loees bɩ? Yãmb zakã ned bɩ y zo-nongr n maan kaalem bɩ? Yãmb maooda ne bãag sẽn tõe n tũ ne y yõor bɩ? Yaa kʋʋlmã sẽn wat ne zu-loees ninsã la y maood ne bɩ? Yaa sabab-wẽnga, nen-kɛglem, bɩ namsg y tẽebã yĩng bɩ, bɩ yaa bãaga, wala makre, koronavirisã bã-longdgã sẽn wa ne zu-loees ninsã? D sɩd gũuda wakat ning yel-kãensã fãa sẽn na n sa fasɩ n pa tol n le zĩndi, tɩ d pa na n le tẽr b yell me wã.—Karm-y Ezayi 65:16, 17.

3. Bõe la d segd n maan masã menga, la bõe yĩnga?

³ Vɩɩmã yaa toog dũni-kãngã pʋgẽ. La tõe tɩ d na n wa maoo ne zu-loees sẽn yaa toog n yɩɩd woto. (Mat. 24:21) Vẽenega, d segd n modgame n ket n tõogd toog n paasdẽ. Bõe yĩnga? Bala a Zeezi yeelame: “Yaa ne yãmb tõog-toogã la y na n fãag y vɩɩmã.” (Luk 21:19) D sã n tags neb a taabã sẽn tõogd toog zu-loees nins pʋsẽ wã yelle, tõe n sõnga tõnd tɩ d ket n tõogd toog n paasdẽ.

4. Bõe yĩng tɩ d tõe n yeel t’a Zeova n tõogd toog n yɩɩd nebã fãa?

⁴ Ãnd n kõt mak-sõng sẽn ka to tõog-toogã wɛɛngẽ? Yaa Wẽnnaam a Zeova. Woto linga yãmb bɩ? Y sã n bʋgs rẽ zug neere, pa na n le ling-y ye. Dũniyã bee a Sʋɩtãan nugẽ. Yaa rẽ yĩng la a sẽn pid ne zu-loees wʋsgã. A Zeova tõe n kɩtame tɩ zu-loeesã sa zĩig pʋgẽ. La a gũudame n  na n maan rẽ beoog-daare. (Rom. 9:22) La nananda, d Wẽnnaamã tõogda toogo, n gũud tɩ wakat-kãng ta. Bɩ d gom yɛl a wɛ yelle. D na n yãame t’a Zeova yãka yam n na n tõog toog yel-kãens pʋsẽ.

5. Wãn to la b sãam Wẽnnaam yʋʋre, la yãmb tagsg yaa wãn ne rẽ?

⁵ B sẽn sãam a Zeova yʋʋrã: A Zeova nonga a yʋʋrã, la a rat tɩ nebã fãa waoog-a. (Eza. 42:8) La yaa sẽn zems yʋʋm tus a yoob la woto b sẽn sãamd a yʋʋrã. (Yɩɩn. 74:10, 18, 23) Sɩnga Edɛn zẽedã zĩigẽ, a Sʋɩtãan sẽn wa n dõd Wẽnnaam n yeel t’a monga a Ãdem ne a Awa bũmb sẽn tõe n kõ-b sũ-noog hakɩɩkã. (Sɩng. 3:1-5) Wakat-kãng tɛka, b rõda a Zeova n yeel t’a mongda ninsaalbã bũmb nins sẽn sɩd yaa tɩlɛ ne-bã. A Zeezi sũur pa yɩ noog ne b sẽn sãam a Ba wã yʋʋrã ye. Woto kɩtame t’a yeel a karen-biisã tɩ b pʋʋs yaa: “Tõnd Ba sẽn be saasẽ, bɩ yãmb yʋʋr paam waoogre.”—Mat. 6:9.

6. Bõe yĩng t’a Zeova bas tɩ kaoos wʋsg t’a yaool n na n wilg tɩ yẽ bal n tar sor n na n dɩ naam yĩngr la tẽnga?

⁶ B sẽn kɩɩs a naamã sẽn ka to wã: A Zeova bal n tar sor n na n yɩ yĩngr la tẽng Naaba. Sẽn paase, a sẽn dɩt a naamã to-to wã sõmblem ka to ye. (Vẽn. 4:11) La a Sʋɩtãan baoome n na n belg malɛgsã la ninsaalbã, tɩ b tags tɩ Wẽnnaam pa tar sor n na n dɩ naam ye. Na n kaoosame t’a Zeova yaool n wilg tɩ yẽ bal n tar sor n na n dɩ naam yĩngr la tẽnga, la t’a sẽn dɩt a naamã to-to wã ka to ye. Ne yam, Wẽnnaam basame tɩ kaoos wʋsgo, sẽn na yɩl tɩ ninsaalbã bãng tɩ b sẽn makd n na n dɩ naam b toor tɩ pa tũ ne Naandã sõngrã, pa tõe n yãk neng ye. (Zer. 10:23) Wẽnnaam sẽn tar sũ-marã yĩnga, a na n wa welga yellã vugri, wakat fãa yĩnga. Rẽ, nebã fãa na n bãngame tɩ yaa a Rĩungã bal n tõe n wa ne laafɩ la bãan tẽngã zugu.

7. Ãnd dãmb n kɩɩs a Zeova, la bõe n na n paam nin-kãensã?

⁷ Malɛgs kẽer sẽn lebg tõatbã: A Zeova naana malɛgsã la ninsaalbã tɩ b ra zems zãng n pa tar zams ye. La malɛk ning sẽn lebg tõatã b sẽn boond t’a Sʋɩtãanã, belga a Ãdem ne a Awa sẽn da zems zãngã tɩ b kɩɩs a Zeova. Malɛgs la ninsaalb a taab me wa n lebga tõatba. (Ziid 6) Kaoosg zugẽ, Israyɛll nebã sẽn da yaa nin-buiid a Zeova sẽn yãkã wa n bas-a lame n tũud wẽn-faado. (Eza. 63:8, 10) A Zeova sũur sãamame, la a bee bʋʋm. Ne rẽ fãa, a tõoga toogo. A na n kell n tõoga toog n tãag wakat ning a sẽn yãk n na n sãam tõatbã fãa wã. Wakat kãnga, a Zeova ne neb nins sẽn maand sɩd ne-a wã sũy na n yɩɩ noogo, b sẽn pa na n le tõogd toogo, zu-loɛɛg sẽn pa na n le zĩnd dũni-kãngã pʋgẽ wã yĩnga.

8-9. Bõe ne bõe la b yet a Zeova zug tɩ yaa ziri, la bõe la d tõe n maan rẽ wɛɛngẽ?

⁸ A Sʋɩtãan sẽn yelgd ziri ninsã: A Sʋɩtãan rõda a Zoob la neb nins fãa sẽn tũud a Zeova ne b sũur fãa wã, n yeel tɩ b sẽn tũud a Zeova wã, yaa rẽ sẽn nafd-bã yĩng bala. (Zoob 1:8-11; 2:3-5) A Sʋɩtãan ket n dõta nebã hal n tãag rũndã. (Vẽn. 12:10) La tõnd me tara d sẽn tõe n maan n wilg t’a yaa ziri yagda. Yaa d sẽn na n kell n tõog toog d zu-loeesã pʋsẽ, la d kell n maan sɩd ne a Zeova d sẽn nong-a wã yĩnga. Wa a Zoobe, a Zeova na n ninga tõnd me barka, d sã n kell n tõog toogo.—Zak 5:11.

⁹ A Sʋɩtãan tũnugda ne ziri tũudmã  taoor dãmb n yetẽ t’a Zeova yaa wẽnem soaba, la tɩ yaa yẽ n kɩt tɩ nebã namsdẽ. Kẽer yetame meng tɩ biig sã n ki, yaa Wẽnnaam n deeg-a t’a na n tɩ lebg malɛk saasẽ. Woto sɩd sãamda Wẽnnaam yʋʋre. D miime t’a Zeova yaa d Ba sẽn nong-do. D sã n wa bẽed bã-kɛgenga, bɩ ned d sẽn nong sã n wa maan kaalem, d pa ningd nebã taal ye. D pʋd n kɩsa sɩd tɩ daar n wat t’a na n sãoog bãad-rãmbã la a vʋʋg sẽn ki-bã. D tõe n sõnga nebã tɩ b bãng t’a Zeova yaa Wẽnnaam sẽn nong-do. Woto, Wẽnnaam paamd n leoka sẽn tʋʋd-a yẽ wã.—Yel. 27:11.

10. Bõe la Yɩɩn-sõamyã 22:24, 25 wã sõngd tõnd tɩ d bãng a Zeova zugu?

¹⁰ A nin-nongdsã sẽn namsdã: A Zeova yaa Wẽnnaam sẽn yaa nimbãan-zoɛta. A sã n ne d sẽn namsde, a sũur sãamda wʋsgo. Tõe tɩ yaa b sẽn namsd tõnd d tũudmã yĩnga, bãaga, wall d pãn-komsem yĩnga. (Karm-y Yɩɩn-sõamyã 22:24, 25.) A Zeova wʋmda d namsgã võore, n dat tɩ sa, la a sɩd na n kɩtame tɩ sa. (Ges-y Yikr 3:7, 8; Ezayi 63:9.) Daar n wat t’a “na n yẽes nintãm fãa ninsaalbã ninẽ, la kũum pa na n le zĩndi, sũ-sãanga, yãbr wall toog pa na n le zĩnd ye.”—Vẽn. 21:4.

11. A Zeova tagsg yaa wãn to ne neb nins sẽn maan sɩd ne-a wã sẽn maan kaalmã?

¹¹ A zo-rãmb nins sẽn maan kaalmã yĩnga: A Zeova tagsg yaa wãn to ne pagb la rap nins sẽn tũ-a ne b sũy fãa n maan kaalmã? A rata ne a sũur fãa n le yã-ba! (Zoob 14:15) Tags-y n ges-y a Zeova sẽn dat ne a sũur fãa to-to n le yã a zoa a Abrahaam. (Zak 2:23) Bɩ a Moyiizi, Wẽnnaam sẽn sõs ne a soab “neng ne nengã.” (Yik. 33:11) Leb-y n tags-y n ges-y a sẽn dat ne a sũur fãa  to-to n leb n wʋm a Davɩɩd ne yɩɩn-yɩɩndb a taab sẽn da yɩɩnd yɩɩn-nood n pẽgd-a wã. (Yɩɩn. 104:33) Baa ne Wẽnnaam zo-kãensã sẽn maan kaalmã, a pa tol n yĩm b yell ye. (Eza. 49:15) A ket n tẽra b sẽn da yaa neb ninsã hal sõma. Biiblã yeelame tɩ “Wẽnnaam nifẽ, b fãa vɩɩme.” (Luk 20:38) A na n wa vʋʋg-b lame, n le kelgd b sẽn pʋʋsd-a ne b sũy fãa wã, la a sakd bũmb nins fãa b sẽn na n maand n waoogd-a wã. Y nin-nongr sã n maana kaalem, y sẽn tagsd woto yellã tõe n bels-y lame la keng y raoodo.

12. Bõe n sãamd a Zeova sũur n tɩ yɩɩda, dũni-wẽn-kãngã sẽn kolg saabã wakate?

¹² Nin-wẽnsã sẽn namsd nebã: Kɩɩsgã sẽn zĩnd Edɛn zẽedã zĩigẽ wã tɛka, a Zeova ra miime tɩ yɛlã na n kengame n yaool n wa manege. A Zeova kisa wẽnemã, zãmbã la nen-kɛglem tʋʋmã sẽn be dũniyã zug rũndã-rũndã wã. A sẽn dat n tɩ yɩɩd yaa a kogl ka-pãng rãmbã, wala makre, kɩɩbsã la pʋg-kõapã. (Zaka. 7:9, 10) A Zeova sẽn ne b sẽn namsd neb nins sẽn maand sɩd ne-a wã la b kẽesd-b bãens rotã, sãamda a sũur wʋsgo. Y tõe n kɩsa sɩd t’a Zeova nong-y-la wʋsgo, y sẽn naagd yẽ n ket n tõogd toogã.

13. Bõe la nebã maand tɩ Wẽnnaam neẽ, hal tɩ yaa wẽng wʋsgo, la bõe la a na n wa maan rẽ wɛɛngẽ?

¹³ Yoobã yɛl sẽn paamd pãngã: Wẽnnaam naana ninsaal a meng wẽnego. A Sʋɩtãan ratame tɩ ninsaalbã tʋmd raglem tʋʋma. A Nowe wakatẽ wã, Wẽnnaam sẽn yã tɩ ‘ninsaalbã wẽngã lebga wʋsg dũniyã zugã,’ b “sũur sãama ne b menga, bãmb sẽn maan ninsaal n ning dũniyã zugã, la bãmb sũur sãama wʋsgo.” (Sɩng. 6:5, 6, 11) La wakat-kãng tɛk n tãag rũndã, yɛlã yolsame bɩ? Yaa vẽeneg tɩ ayo. A Sʋɩtãan sẽn ne tɩ yoobã yɛlã piuugame wã noom-a-la wʋsgo. Wala makre, rap ne rap la pagb ne pagb sẽn kẽed ne taabã. (Efɛ. 4:18, 19) A Sʋɩtãan sã n tõog tɩ ned sẽn tũud a Zeova maan yel-wẽnde, a sũur manegd n noomame. A Zeova sũ-marã sã n wa ta a tɛka, a na n sãama yoaadbã fãa, n wilg t’a sɩd kisa yoob buud fãa.

14. Bõe la ninsaalbã maand tẽngã la rũmsã Wẽnnaam sẽn naanã?

¹⁴ Ninsaalbã sẽn sãamd tẽngã: ‘Ninsaal tõee a to n maand-a wẽnga,’ la pa rẽ bal ye. Ninsaalbã pa get tẽngã la rũmsã yell wa a Zeova sẽn datã ye. (Koɛ. 8:9; Sɩng. 1:28) Bãngdb kẽer wilgame tɩ ka la yʋʋm a wãna, ninsaalbã tʋʋm na n kɩtame tɩ tɩɩs la rũms sẽn ta bãmb milyõ menem tẽngã zugu. Sɩd be bʋʋm la nebã sẽn maand yɩɩr rũmsã la weoogã yĩngã. La a Zeova yeelame t’a na n sãama “neb nins sẽn sãamd tẽngã,” la a kɩt tɩ dũniyã gill lebg arzãna.—Vẽn. 11:18; Eza. 35:1.

15-16. Bõe n segd n kɩt tɩ tõnd me rat n tõog toog wa a Zeova? Rɩk-y makre.

¹⁵ Tags-y n ges-yã: Yʋʋm tusa la woto d saasẽ Ba wã sẽn tõogd toogo, bũmb nins fãa sẽn maand tẽngã zug tɩ pa sõma wã yĩnga. (Ges-y zĩ-gũbrã: “ Yɛl kẽer pʋsẽ a Zeova sẽn tõogd toogo.”) A Zeova ra tõe n sãama dũniyã, sẽn yaa wakat ning fãa la a rata. La a sẽn maand sũ-marã sõngda tõnd hal wʋsgo. D rɩk makre. Tags-y n ges-y pag sẽn na n tʋtẽ, tɩ b yeel yẽ ne a sɩdã tɩ biig ning b sẽn na n dogã bẽeda bã-kɛgenga, la t’a na n namsa wʋsgo, n ki pẽbre. Ne rẽ fãa, roagdbã sũy nooma wʋsg ne biigã sẽn na n doge, baa ne sẽn na n yɩ toog tɩ b tõog n ges a yell  sõma wã. B sẽn nong b biigã yĩng na n kɩtame tɩ b tõog toogo, la b maan b sẽn tõe fãa n kell n ges a yelle.

¹⁶ Woto me, a Ãdem ne a Awa yagensã fãa rogdame n yaa neb sẽn pa zems zãnga. Baa ne rẽ, a Zeova nong-b lame la a get b yelle. (1 Zã 4:19) Pagã ne a sɩdã yell d sẽn gom makrã pʋgẽ wã pa tõe tɩ b biigã yĩns sãoog ye. La a Zeova yẽ na n kɩtame tɩ ninsaalbã namsgã sa. A yãka wakat n na n sɩd maan woto. (Mat. 24:36) Rẽ yĩnga, a Zeova sẽn nong tõnd woto wã pa segd n kɩt tɩ tõnd me maan d sẽn tõe fãa n tõog toog sɩda?

17. Wãn to la goam nins b sẽn togs a Zeezi zug tɩ be Ebre-rãmb 12:2, 3 tõe n sõng-d tɩ d kell n tõog toogo?

¹⁷ Tõog-toogã wɛɛngẽ, a Zeova n kõ mak-sõng sẽn ka to. A Zeezi rɩka a Ba wã togs-n-taare, n tõog toogo. A Zeezi sẽn wa n be tẽngã zugã, a saka yaalgo, paoogre, la a reeg toog ra-luk zug tõnd yĩnga. (Karm-y Ebre-rãmb 12:2, 3.) Sãmbg kae t’a Zeova sẽn tõogd toogã, sõnga a Zeezi tɩ yẽ me tõog toogo. Tõe n sõnga tõnd me tɩ d tõog toogo.

18. Wãn to la 2 Pɩyɛɛr 3:9 wã sõngd tõnd tɩ d bãng a Zeova sũ-marã yõodo?

¹⁸ Karm-y 2 Pɩyɛɛr 3:9. A Zeova mii wakat ning sẽn zems t’a sãam dũni-wẽn-kãngã wã. A sũ-marã kɩtame tɩ b paam n tigimd kʋʋn-kãseng sẽn yaa neb milyõ-rãmb sẽn naag taab n tũud-a la b pẽgd-a. B fãa sũy nooma a Zeova sẽn tõog toog n kaoose, hal tɩ b wa roge, n wa nong-a la b rɩk b meng n kõ-a wã. Neb milyõ-rãmb sã n wa tõog toog n tãag saabã, na n lebga vẽeneg t’a Zeova sẽn tall sũ-marã pa yɩ zaalem ye.

19. D segd n yãka yam n na n maan bõe, la d keoorã na n yɩɩ bõe?

¹⁹ A Zeova mak-sõngã sõnga tõnd tɩ d bãng d sẽn tõe n tõog toog ne sũ-noog to-to. Baa ne a Sʋɩtãan sẽn wa ne sũ-sãams la namsgã, a Zeova ket n yaa “Wẽnnaam sẽn yaa sũ-noog soaba.” (1 Tɩm. 1:11) Tõnd me tõe n kell n maana sũ-noogo, n gũud wakat ning a Zeova sẽn na n kɩt t’a yʋʋrã paam waoogre, n wilg tɩ yẽ n segd n yɩ yĩngr la tẽng Naaba, la a kɩt tɩ wẽnemã la zu-loeesã fãa sa wã. Bɩ d kell n yãk yam n tõogd toogo, la d keng d pelse, d sẽn mi tɩ d saasẽ Ba wã me tõogda toogã yĩnga. D sã n maand woto, Biiblã sẽn yet bũmb ningã na n pidsa tõnd ned kam fãa zugu. Ad a sẽn yeele: “Sũ-noog soab la ned ning sẽn tõogd toog zu-loees sasa, bala a sẽn lebg ned sẽn tat Wẽnnaam yamã, a na n paama vɩɩm maanfã a Zeova sẽn pʋlem neb nins sẽn nong bãmb wakat fãa wã.”—Zak 1:12.