A Zeova ratame tɩ neb a yiib sẽn kẽ kãadem paam sũ-noogo, tɩ b kãadmã ne b zems-n-taarã kaoos wakat fãa. (Mat. 19:4-6) La y sã n dat n kẽ kãadem, y maanda wãn n paam pʋg-sõng bɩ sɩd-sõngo? A Zeova sẽn yaa d Naandã, a mii bũmb ning d sẽn segd n maane, n paam sũ-noog d kãadmã pʋgẽ. Woto yĩnga, y sã n tũ sagls la noy nins a sẽn kõ-dã, y na n paama sũ-noog y kãadmã pʋgẽ. Bɩ d gom sagls a wãn yelle.

Pipi, d segd n deng n sak n deegame tɩ d sũurã pida ne “zãmb n yɩɩd bũmb fãa, la a yaa wẽng wʋsgo.” (Zer. 17:9) Neb a yiib sẽn dat n kẽ kãadem sã n seg taab n zoe n sɩng taab roobo, b yamã tõe n kẽe taab tao-tao, tɩ lebg toog tɩ b tõog n tags neer n yãk yam sẽn zemse. Neb a yiib sã n yãk yam n kẽ kãadem, b yam sẽn kẽ taab yĩng bala, wat n baasa ne sũ-sãamse. (Yel. 28:26) Rẽ n so tɩ pa yam tʋʋmd tɩ b zoe n wilg tɩ b yam kẽe taaba, bɩ n gom goam n wilg tɩ b rata taab n kẽ kãadem, n yaool n nan pa bao n bãng taab sõma ye.

Yel-bũn 22:3 yetame: “Gũus-m-meng soab yãta yell n zoe n soonde, la zɩtbã zãgsda soondgo, n bao yell n kõ b mense.” Bõe yĩng tɩ tũnug ne sɩt wɛɛb nins sẽn sõngd ned t’a paam pag bɩ sɩdã tõe n wa ne yelle? Neb kẽer tũnuga ne sɩt-kãensã buudu, n sõsd ne ned b sẽn pa mi, hal n sɩng taab roobo, n yaool n wa bãng tɩ pa nin-tɩrg ye. Sẽn paase, nin-wẽns kẽer ningda foto sẽn pa bãmb foto, la b paas kibay sẽn pa sɩda, n tũnug ne rẽ n belg neb n dees ligdi. Sẽn maand-b woto wã wʋsgã mi n yeelame tɩ b yaa a Zeova Kaset rãmba.

Ad bũmb a to me sẽn tõe n wa ne zu-loɛɛga. Sɩt wɛɛb kẽer pʋsẽ, b maaname tɩ ordinatɛɛr-dãmb tõe n wẽ gɛɛl n bãng ned ne a to yɛl sã n teesd taab tɩ b tõe n kẽ kãadem. La kaset pa be n wilgdẽ tɩ gɛɛl a woto yaa sɩd ye. Sẽn mik tɩ kãadmã pa reem bũmbã, pa yam tʋʋmd tɩ d teeg tʋʋm-teoog ninsaal sẽn maan n ning ordinatɛɛr pʋgẽ n na n sõng ned t’a paam pag bɩ sɩd ye. Tʋʋm-teoog sẽn be ordinatɛɛr pʋgẽ pa tol n tõe n dɩk n mak ne Biiblã sagls ye.—Yel. 1:7; 3:5-7.

Saglg a ye n be Yel-bũn 14:15 wã pʋgẽ. Be b yetame yaa: “Zɩt tẽeda bũmb ning fãa a sẽn wʋme, la yam soab maanda gũusg ne  a yel-manesmã fãa.” Nand tɩ y ges ned sã n tõe n yɩɩ y pag bɩ y sɩda, y segd n deng n bao n bãnga a soabã sõma. La sã n yaa ne ẽntɛrnetã maasem la y rat n maan woto, na n yɩɩ toogo. Baa yãmb sã n toond taab fot-rãmb la kibaya, la y gʋlsd taab mesaaz-rãmba, rẽ yĩnga, y tõe n yeelame tɩ y sɩd mii a soabã sõma sɩda? Neb kẽer da tagsdame tɩ b sɩd paama b noanga, la b sẽn wa n seg a soabã, b sũyã sãama wʋsgo.

Yɩɩn-gʋlsdã yeelame: “Mam ka zĩndid ne zĩrẽ-yagdbã ye. Mam ka tũud zãmb dãmbã ye.” (Yɩɩn. 26:4) Neb wʋsg getame tɩ b sã n ning fot-rãmb sɩt-kãensã zug tɩ yaool n pa b fot-rãmba, wall b togs yɛl bãmb mensã zug tɩ yaool n pa sɩda, pa wẽng ye. B sã n wa gʋlsd wall b sõsd ne neda, b solgda b zʋg-wẽnsã. Nina tõe n yeelame t’a yaa a Zeova Kaset soaba, la rẽ yĩnga a sɩd yaa kiris-ned hakɩɩk sẽn deeg lisg bɩ? A tẽebã sɩd tara pãng bɩ? A tara zood sõma ne a Zeova bɩ? A tara yʋ-noog a tigingã pʋgẽ bɩ? Bɩ yaa ned sẽn tʋmd tʋʋm-wẽnse, wall yaa ‘tũud-n-ta-wẽnga’? (1 Kor. 15:33; 2 Tɩm. 2:20, 21) Biiblã kõt-a-la sor t’a tõe n kẽ kãadem bɩ? Y segd n bao n bãnga woto fãa. La sã n pa y paama a Zeova Kaset rãmb a taab sẽn mi nin-kãng sõma n soke, tõe n yɩɩ toog tɩ y bãng rẽ fãa. (Yel. 15:22) La yaa vẽeneg tɩ ned sẽn tũud a Zeova ne a sũur fãa pʋd n pa na n bao “lagem-n-taar sẽn pa zems” ne ned sẽn pa tũud a Zeova ye.—2 Kor. 6:14; 1 Kor. 7:39.

Sẽn mik tɩ y sã n tũnug ne sɩt-kãensã buud n na n bao pag bɩ sɩdã tõe n waa ne yellã, bũmb sẽn yaa sõma n yɩɩd n be y sẽn tõe n tũnug ne n gẽes ned y sẽn dat n kẽ kãadem ne, n bao n bãng a soabã sõma, n wa tõog n paam sũ-noog y kãadmã pʋgẽ. Yɛ la y tõe n paam ned sẽn tõe n wa yɩ y pag bɩ y sɩda? Sã n pa b gɩdgame t’a Zeova Kaset rãmbã ra tigim taaba, y tõe n bao n bãnga neb a taab sõma tigissã, tigis-kãsemsã, la tigiss a taab sasa.

D sã n wa pa tõe n tigim taab wala makre, koronavirisã bã-longdgã sasa, d tũnugda ne ẽntɛrnetã tʋʋm-teed a taab n maand tigissã, tɩ tõe n yɩ segb n kõ-y tɩ y bãng neb a taab sẽn pa kẽ kãadem wa yãmba. Y tõe n gesa b sẽn kẽesd b toog tigissã sasa wã, la b sẽn leokd to-to n wilgd b tẽebã. (1 Tɩm. 6:11, 12) Y tõeeme me tɩ tigissã poore, bɩ y kẽ b sẽn boond tɩ Salles de petites conférences zĩig a yembrẽ, n sõs ne ned ning y sẽn dat n sõs ne wã. Tigiss a woto sasa, y tõe n yãa a soabã manesem sẽn yaa to-to ne neb a taabã, tɩ rẽ tõe n sõng-y tɩ y bãng a sẽn sɩd yaa ned ningã. (1 Pɩy. 3:4) Bilf-bilfã, y sã n wa bãng taab sõma, y tõe n gesa y magbã sã n yekda taaba, la yãmb y yiibã sã n tõe n zemsa taab kãadem pʋgẽ.

Ned sẽn dat n kẽ kãadem sã n tũ Biiblã saglsã n na n bao neda, a na n yãame tɩ Yel-bũn sebrã sẽn yet bũmb ningã yaa sɩda. A yetame yaa: “Ned ning sẽn paam pʋg-sõng [bɩ sɩd-sõng] paama bõn-sõngo. A paamda a Zeova lohorem.”—Yel. 18:22, MN.