1. Bõe la a Zeova maan n kõ yãmba?

SƖNGA wãn to tɩ y wa lebg a Zeova Kaset soaba? Tõe tɩ yaa y roagdbã, y tʋmd-n-taag wall y karen-bi-taag n taas yãmb koe-noogã. Tõe me tɩ yaa a Zeova Kaset rãmbã n wa n moon yãmb y zakẽ wã. (Mark 13:10) Rẽ poore, ned n dɩk sẽk wʋsg la a maan modgr n zãms yãmb Biiblã. Y Biiblã zãmsg wakate, y wa n sɩngame n nong a Zeova, la y bãng t’a nonga yãmb me. A Zeova taka yãmb n wa sɩdã pʋgẽ. Masã y sẽn lebg a Zeezi Kirist karen-biigã, y saagdame n na n wa vɩɩmd wakat sẽn kõn sa. (Zã 6:44) Sãmbg kae tɩ y sũur nooma wʋsg ne a Zeova, a sẽn kɩt tɩ ned wa zãms yãmb Biiblã tɩ y bãng sɩdã, la a sak tɩ y lebg a Kaset soabã.

2. Bõe yell la d na n gom sõs-kãngã pʋgẽ?

² D sẽn bãng sɩdã masã wã, d paamame n tõe n sõng neb a taabã tɩ bãmb me rɩk vɩɩm sẽn kõn sa wã sore. Zak-zak moonegã tõe n yaa nana ne-do. La tõe tɩ yɩl n tõog n sɩng Biiblã zãmsg ne ned yaa toogo. Yaa yãmb me zu-loɛɛg la woto bɩ? Sã n yaa woto, sagls nins sẽn be sõs-kãngã pʋgẽ wã tõe n sõng-y lame. D na n yãa bũmb ning sẽn kɩt tɩ d tʋll n zãms nebã tɩ b lebg a Zeezi karen-biisã. D leb n na n yãa d sẽn tõe n maan n tõog zu-loees nins sẽn kɩt tɩ yaa toog tɩ d sɩng Biiblã zãmsg ne nebã. Bɩ d reng n ges bũmb ning sẽn kɩt tɩ d segd n zãms nebã Biiblã, la d ra moond-b koe-noogã balã.

3. Bõe yĩng la d sẽn moond koɛɛgã?

³ A Zeezi sẽn wa n be tẽngã zugã, a kõo a karen-biisã tʋʋmd sẽn tar babs a yiibu. Pipi, a yeel-b lame tɩ b moon  Rĩungã koe-noogã, la a wilg-b b sẽn tõe n maan rẽ to-to. (Mat. 10:7; Luk 8:1) Wala makre, a wilga a karen-biisã b sẽn tõe n maan to-to, nebã sã n kelg Rĩungã koe-noogã wall b pa sak n kelge. (Luk 9:2-5) Sẽn paase, a wilgame t’a karen-biisã na n moona koɛɛgã neb wʋsgo, la zĩis wʋsgo, bala a yeelame tɩ na n yɩɩ “kaset buud fãa yĩnga.” (Mat. 24:14; Tʋʋ. 1:8) A Zeezi karen-biisã ra segd n goma Wẽnnaam Rĩungã la a sẽn na n wa maan bũmb ninsã yelle, nebã na n sak n kelgame tɩ b pa na n sak n kelg me.

4. Wa Matiye 28:18-20 wã sẽn wilgdã, Rĩungã koe-moonegã sẽn yãk a toogo, bõe me la d segd n maane?

⁴ Tʋʋmd ning a Zeezi sẽn kõ a karen-biisã babg a yiib-n-soabã yaa bõe? Yaa a sẽn yeel a karen-biisã tɩ b zãms nebã tɩ b sak bũmb nins fãa yẽ sẽn yeelã. Neb kẽer tõe n tagsdame tɩ yaa pipi kiris-nebã bal la a Zeezi kõ noor tɩ b moon koɛɛgã la b zãms nebã. La rẽ yĩnga yaa woto bɩ? Ayo. A Zeezi yeelame tɩ tʋʋm-kãngã sẽn fãagd yõyã ra na n kell n kẽnga taoore, n ta tõnd wakatã, rat n yeel tɩ “hal tɩ ta dũniyã saabo.” (Karm-y Matiye 28:18-20.) Wõnda yaa a Zeezi sẽn wa n vẽneg a meng ne karen-biis sẽn yɩɩd bãmb 500 wã sasa la a kõ-b tʋʋm-kãnga. (1 Kor. 15:6) A Zeezi sẽn vẽneg a Zã t’a yã bũmb ningã pʋgẽ, a wilga vẽeneg t’a karen-biisã fãa segd n sõnga nebã tɩ b bãng a Zeova sõma.—Vẽn. 22:17.

5. Pipi Korẽnt rãmb 3:6-9 wã pʋgẽ, a Poll rɩka koɛɛgã mooneg ne nebã zãmsgã n mak ne bõe?

⁵ Tʋm-tʋmd a Poll rɩka koɛɛgã moonegã ne nebã zãmsgã n mak ne koobo, n wilg tɩ d pa segd n bʋtẽ bal ye. A tẽega Korẽnt kiris-nebã yaa: “Mam selame t’a Apolos zãgs koom . . . Yãmb yaa Wẽnnaam pʋʋg b sẽn koode.” (Karm-y 1 Korẽnt rãmb 3:6-9.) Tõnd sẽn tʋmd ‘Wẽnnaam pʋʋgẽ’ wã, d sã n wa moond koɛɛgã, yaa wa d sẽn bʋt bõn-buudu. La d sã n wa zãmsd nebã Biiblã, yaa wa d sẽn zãgsd koom. (Zã 4:35) La d miime tɩ yaa Wẽnnaam n kɩtd tɩ bõn-buudã bɩtẽ, rat n yeel tɩ yaa yẽ n takd nebã n wat a nengẽ.

6. D sã n wa zãmsd nebã Biiblã, bõe la d segd n sõng-b tɩ b maane?

⁶ D baooda neb nins fãa “sẽn tar yam ning sẽn zems ne vɩɩm sẽn ka sɛtã.” (Tʋʋ. 13:48) Sẽn na yɩl n sõng nin-kãensã tɩ b lebg a Zeezi karen-biisi, d segd n sõng-b lame 1) tɩ b wʋm bũmb nins b sẽn zãmsd Biiblã pʋgẽ wã võore, 2) tɩ b kɩs sɩd ne rẽ, la 3) tɩ b tũ rẽ b vɩɩmã pʋgẽ. (Zã 17:3; Kol. 2:6, 7; 1 Tes. 2:13) Tigingã nebã fãa tõe n sõnga Biibl karen-biisã. Yaa b sẽn na n kõ-b mak-sõng n wilg tɩ b nong-b lame, tɩ b sã n wa tigissã me bɩ b reeg-b sõma. (Zã 13:35) Biibl karen-saambã me segd n dɩka sẽk wʋsg la a modge, n sõng karen-biigã t’a bas tẽeb la minim-wẽns “sẽn vigl kãn-kãe” a sũurẽ wã. (2 Kor. 10:4, 5) Yɩl n sõng ned t’a wã tõog n maan woto tõe n kaoosa kiisi, t’a yaool n wa tõog n deeg lisgu. La rẽ sɩd seka modgre.

7. Bõe yĩng tɩ d moond nebã koɛɛgã la d sõngd-b tɩ b lebgd a Zeezi karen-biisi?

⁷ Bõe yĩng tɩ d moond nebã koɛɛgã la d sõngd-b tɩ b lebgd a Zeezi karen-biisi? Pipi, yaa d sẽn nong a Zeova wã yĩnga. Y sã n maand y sẽn tõe fãa n na n tũ noor ning a Zeezi sẽn kõ tɩ d moon nebã koɛɛgã la d sõng-b tɩ b lebg a karen-biisã, y wilgdame tɩ y nonga Wẽnnaam. (1 Zã 5:3) Tags-y n ges-y: Yaa y sẽn nong a Zeova wã  yĩng la y sẽn sak n moond koɛɛgã zak-zakã. Sɩngrẽ wã, no-kãngã tũub ra yaa nana ne-y bɩ? Tog n da pa nana ye. Yãmb sẽn ta ned zakẽ n na n taas koɛɛgã pipi wã, y sũurã ra pa kiuusd sɩda? Sãmbg kae tɩ y ra yɛɛsdame. La y ra miime tɩ yaa tʋʋm-kãng la a Zeezi rat tɩ y tʋme, la y saka tʋʋmdã. Tarẽ-n-tarẽ, koe-moonegã wa n lebga nana ne-yã. La yaa wãn to yẽ ne nebã zãmsgã? Y sã n tags rẽ yelle, y sũurã kiuusdame bɩ? Tõe tɩ yaa woto. La y sã n kos a Zeova t’a sõng-y tɩ y tõog y rabeemã la y tall raood n sɩng Biiblã zãmsg ne neda, a na n sõng-y lame tɩ y tʋll n sõng nebã tɩ b lebg a Zeezi karen-biisi.

8. Wa Mark 6:34 sẽn wilgdã, bõe me n tõe n kɩt tɩ d tʋll n zãms nebã Biiblã?

⁸ Yiibu, yaa d sẽn nong nebã yĩng la d sẽn zãmsd-b Biiblã. Daar a ye, a Zeezi ne a karen-biisã ra yɛɛ wʋsgo, b sẽn da gilg n moon koɛɛgã yĩnga. B ra baooda zĩig n na n vʋʋse, la neb kʋʋng n wa b nengẽ. Kʋʋngã nimbãaneg yõka a Zeezi, la a “sɩngame n zãmsd-b bũmb wʋsgo.” (Karm-y Mark 6:34.) A Zeezi wõra a menga, baa ne a sẽn da yɛ wã. Bõe yĩnga? Bala a ninga a meng kʋʋngã zĩigẽ. A ra neeme tɩ b namsda wʋsgo, la b rat tɩ b sõng-b tɩ b bãng tɩ manegr n wate. Rẽ kɩtame t’a Zeezi ra rat n sõng-ba. Yaa woto me rũndã-rũndã, baa sã n wõnda nebã tara sũ-noog b vɩɩmã pʋgẽ. B wõnda wa piis sẽn meneme, n pa tar pe-kɩɩm sẽn na n ges b yell ye. Tʋm-tʋmd a Poll bilgame tɩ neb a woto pa mi Wẽnnaam, la b pa mi tɩ manegr n wat me ye. (Efɛ. 2:12) B rɩka ‘sor ning sẽn tar n debd sãoong zĩigẽ’ wã. (Mat. 7:13) D sã n tags tõnd moonegã zĩigẽ nebã sẽn pa mi Wẽnnaamã yelle, nonglem la nimbãan-zoeerã kɩtdame tɩ d rat n sõng-ba. La bũmb d sẽn tõe n maan tɩ sõng-b n yɩɩda, yaa d sẽn na n bao n zãms-b Biiblã.

9. Wa Filip rãmb 2:13 sẽn yetã, wãn to la a Zeova tõe n sõng-yã?

⁹ Tõe tɩ y yɛɛsdame n pa rat n zãms nebã Biiblã, bala y getame tɩ woto baooda sẽk la modgr wʋsgo. Yãmb sã n tagsda woto, bɩ y pelg y pʋg n gom rẽ yell ne a Zeova. Kos-y-yã-a t’a sõng-y tɩ y paam ned sẽn dat tɩ y zãms-a Biiblã. (Karm-y Filip rãmb 2:13.) Tʋm-tʋmd a Zã yeelame tɩ d sã n kos Wẽnnaam bũmb sẽn zems ne a raabã, a na n kõ-d lame. (1 Zã 5:14, 15) Rẽ wã, y tõe n basa y yam t’a Zeova na n sõng-y lame tɩ y tʋll n zãms nebã Biiblã.

10-11. Bõe n tõe n wa kɩt tɩ d yɛɛsdẽ n pa rat n zãms nebã Biiblã?

¹⁰ D pa reemd ne koɛɛgã mooneg la nebã zãmsgã sẽn yaa tʋʋmd a Zeezi sẽn kõ-dã, baa ne d sẽn segd zu-loees sẽn tõe n kɩt tɩ d pa tõog n tʋm tʋʋmdã wa d sẽn datã. D gom zu-loeesã kẽer yelle, la d sẽn tõe n welg-b to-to.

¹¹ D sã n tagsdẽ tɩ d pa tõe n tʋm tʋʋmdã wʋsg wa d sẽn datã. Wala makre, koe-moondb kẽer yʋʋm vẽsgame, wall b laafɩ wã pa waoog ye. Yaa woto me ne yãmb bɩ? Sã n yaa woto, bɩ d gom koronavirisã bã-longdgã sẽn kɩt tɩ d bãng bũmb ningã yelle. D bãngame tɩ d tõe n tũnuga ne telefõnnã bɩ ne ẽntɛrnetã n zãms nebã Biiblã sõma. Woto, y tõe n zĩnda yir n zãms ned Biiblã nana-nana. La pa rẽ bal la d bãngẽ ye. Neb kẽer rat n zãmsa Biiblã, la b pa tar sẽk wakat ning saam-biisã sẽn yãk n moond koɛɛgã ye. La tõe tɩ b tara sẽk yibeoog pĩnda, bɩ zĩigã sẽn wat n zʋʋge. Yãmb tõe n zãmsa ned Biiblã wakat-kãensã bɩ? A Zeezi zãmsa a Nikodɛm ne  yʋngo, la yaa wakat-kãng n da zems ne a Nikodɛm.—Zã 3:1, 2.

12. Bõe n kɩt tɩ d tõe n bas d yam tɩ d tõe n yɩɩ karen-saamb sẽn mi neb zãmsgo?

¹² D sã n tagsdẽ tɩ d pa tar minim n na n zãms nebã Biiblã. Tõe tɩ d tagsdame tɩ d segd n yɩɩ karen-saamb sẽn tar minim bɩ bãngr wʋsgo, n yaool n tõog n zãms ned Biiblã. Yãmb sã n tagsda woto, ad bũmb a tãab sẽn tõe n sõng-y tɩ y bas y yam tɩ y tõe n zãmsa ned Biiblã: Pipi, a Zeova getame tɩ y tara minim n tõe n zãms nebã. (2 Kor. 3:5) Yiibu, a Zeezi sẽn tar ‘noor n na n ges bũmb fãa yell saasẽ la tẽngã zugã’ kõ-y-la sor tɩ y zãms nebã. (Mat. 28:18) La tãabo, y tõe n kosa neb a taab tɩ b sõng-yã. A Zeezi teega a Ba wã sẽn zãms-a bũmb ningã. Yãmb me tõe n maana wa yẽ. (Zã 8:28; 12:49) Sẽn paase, y tõe n kosa y koe-moonegã sull yel-gɛtã, so-pakd bɩ koe-moond sẽn tar minim t’a sõng-y tɩ y tõog n sɩng Biiblã zãmsg ne neda. Bũmb me sẽn tõe n sõng-y tɩ y paam minim yaa y sẽn na n yãagd nin-kãensã tɩ b kẽnd n zãmsd nebã Biiblã.

13. Bõe yĩng tɩ d segd n tʋll n tũnug ne manesem-paal n zãms nebã Biiblã?

¹³ Yɩl n minim koɛɛgã mooneg manesem-paalã la tʋʋm-te-paalã sã n yaa toog ne-do. D sẽn zãmsd nebã Biiblã to-to wã toeemame. Masã, yaa Vɩɩmd-y wakat sẽn kõn sa! sebrã la d tar n zãmsd nebã Biiblã n tɩ yɩɩda. Woto baoodame tɩ d segl d meng sõma, la d zãms a soabã Biiblã tɩ yɩ toor ne d sẽn da minim n maand pĩndã. Sulã pa waooge, rẽ me d tõe n sõsa ne karen-biigã n tɩ yɩɩda. D sã n wa tar sebrã n zãmsd neda, d tõe n paam n wilg-a-la video-rãmb wʋsgo, la d tʋm ne tʋʋm-te-paal siglgã sẽn yiisi, wala makre JW Library^® wã. Y sã n pa mi y sẽn tõe n tʋm ne tʋʋm-te-kãensã to-to, bɩ y kos ned t’a sõng-yã. Yaa toog ne ninsaalbã tɩ b bas bũmb b sẽn minimi. Dẽnd yɩl n minim manesem-paall pa nana ye. La ne a Zeova la ne neb a taabã sõngre, y na n wa minimame, hal tɩ y sã n wa zãmsd ned Biiblã bɩ y sũur noomẽ. So-pakd a ye yeelame tɩ f sã n tar seb-kãngã n zãmsd karen-biig Biiblã, nooma karen-saambã ne karen-biigã fãa.

14. D sã n wa moond koɛɛgã zĩig neb wʋsg sẽn pa rat n kelge, bõe yell la d segd n tẽege? Wãn to la 1 Korẽnt rãmb 3:6, 7 kengd d raoodo?

¹⁴ D sẽn be zĩig ningã sã n yaa toog tɩ d sɩng Biiblã zãmsg ne neda. Tõe tɩ nebã maanda b toog kae ne koɛɛgã d sẽn moondã, wall b pʋd n dat n gɩdg-d lame tɩ d da moon ye. Sã n wa yaa woto, wãn to la d tõe n kell n tall yam-sõngo? Tẽeg-y tɩ dũni-kãngã sẽn gudgã pʋgẽ, nebã yɛlã tõe n tiig n toeemame, tɩ neb nins sẽn da pa rat n kelgã tõe n wa rat n bao n bãng Wẽnnaam masã. (Mat. 5:3) Neb kẽer sẽn da zãgsd tõnd sɛbã wakat fãa wa n sakame n na n zãms Biiblã kaoosg zugẽ. D miime me tɩ yaa a Zeova la tigsgã soaba. (Mat. 9:38) A ratame tɩ d ket n bʋtẽ la d zãgsd koom, la yaa yẽ n kɩtd tɩ bɩtẽ. (1 Kor. 3:6, 7) D tẽeg tɩ baa d sã n pa tõe n zãms ned Biiblã masã, pa d tʋʋmdã biis la a Zeova tikd n keo tõnd ye. Yaa d modgrã, la woto sɩd kengda raoodo! *

15. Ned sã n sak n zãmsd Biiblã la a tũud bũmb nins a sẽn zãmsdã, a Zeova manesem yaa wãn to?

¹⁵ Ned sã n zãms Biiblã n sak a sẽn  yetã, la a taasd neb a taabã a sẽn bãng bũmb ningã, a Zeova sũur noomame. (Yel. 23:15, 16) A Zeova sũur tog n nooma wʋsgo, a sẽn ne a nin-buiidã sẽn moond koɛɛgã la b zãmsd nebã Biiblã ne yẽesmã. Wala makre, baa ne bã-longdgã sẽn zĩnd dũniyã gill zug yʋʋmd 2020 wã, d zãmsa Biiblã ne neb milyõ 7 705765, tɩ rẽ sõng neb tus 241994 tɩ b rɩk b mens n kõ a Zeova n deeg lisgu. Nin-kãensã sẽn lebg a Zeezi karen-biisã me na n zãmsa neb a taab Biiblã tɩ bãmb me wa lebg a Zeezi karen-biisi, tɩ d sõorã paase. (Luk 6:40) Sãmbg kae tɩ d sẽn sõngd nebã tɩ b lebgd a Zeezi karen-biisã nooma a Zeova wʋsgo.

16. Bõe la d tõe n yãk yam n maan tɩ yaa sõma wʋsgo?

¹⁶ D sẽn sõngd nebã tɩ b lebgd a Zeezi karen-biisã yaa tʋʋm-saalga. La ne a Zeova sõngre, tõnd me tõe n kẽesa d toog n sõng Biibl karen-biisã tɩ b wa nong a Zeova. Rẽ yĩnga, d pa tõe n yãk yam n na n modg n sɩng Biibl zãmsg baa yaa ne ned a ye sɩda? D sã n tũnugd ne segb buud fãa n sokd nebã n get b sã n dat n zãmsa Biiblã ne-do, d tõe n paam n sɩnga Biiblã zãmsg ne ned hal tɩ ling-du. D tõe n basa d yam t’a Zeova na n ninga d modgrã barka.

17. D sã n tõog n zãms Biiblã ne neda, wãn to la na n naf-do?

¹⁷ D sẽn paam n moond koɛɛgã la d zãmsd nebã Biiblã yaa zu-zẽkr tɛkẽ. Yaa tʋʋmd sẽn kõt-d sũ-noog hakɩɩka. Tʋm-tʋmd a Poll sõnga neb wʋsg Tesalonik tɩ b lebg a Zeezi karen-biisi. A wilga a sũ-noog ne rẽ, n yeel yaa: “Ãnd dãmb n yaa tõnd saagre, wall d sũ-noogo, pa rẽ bɩ d sũ-noog maanfo, tõnd Zu-soab a Zeezi taoor b waoongã wakate? Sɩd-sɩda, pa yãmb la? Hakɩɩka, yãmb n yaa tõnd ziir la d sũ-noogo.” (1 Tes. 2:19, 20; Tʋʋ. 17:1-4) Neb wʋsg paama sũ-no-kãng rũndã-rũndã. Saam-bi-poak a ye yʋʋr sẽn boond t’a Ɛstefani ne a sɩdã sõnga neb wʋsg tɩ b wa reeg lisgu. Ad a sẽn yeele: “Sũ-noog kae n yɩɩd f sẽn na n sõng ned t’a rɩk a meng n kõ a Zeova n deeg lisg ye.”