1-2. Bõe yell la d na n gom sõs-kãngã pʋgẽ?

NED sã n tool-y bũmb y sẽn dat ne y sũur fãa tɩ y gũudẽ tɩ pa wat tao-tao, y manesem yaa wãna? Y sũur pa na n sãam sɩda? Sɩd me, Yel-bũn 13:12 yetame: “Ned sã n gũud bũmb tɩ pa watẽ, sãamda a sũuri.” La y sã n wa bãng tɩ toollã sẽn nan pa ta yãmbã yaa bʋʋm-tɩrg yĩnga, y manesem na n yɩɩ wãna? Sã n yaa woto, y na n talla sũ-mar n kell n gũ.

² Sõs-kãngã pʋgẽ, d na n yãa Biiblã sagls a wãn sẽn tõe n sõng-d tɩ d kell n ‘gũ Wẽnnaam.’ (Mii. 7:7) Rẽ poore, d na n yãa bũmb a yiib wɛɛngẽ d sẽn segd n kell n tall sũ-mar n gũ t’a Zeova wa manes yɛlã. Sẽn na n baase, d na n yãa bark nins sẽn tʋll-b n gũ a Zeova wã sẽn na n wa paame.

3. Yel-bũn 13:11 wã wilgda tõnd bõe?

³ Yel-bũn 13:11 wã wilgda bũmb ning sẽn kɩt tɩ d segd n tall sũ-marã. Be b yetame yaa: ‘Arzɛk sẽn paam wakat-yɛng menemda tao-tao, la sẽn paamd-a arzɛk bilf-bilf fɩɩgda a paoongo.’ Vɛrse-kãngã sõngda tõnd tɩ d bãng bõe? Yam soab maagda a yĩng n maand bũmb fãa ne sũ-mare, la wat n baasa neere.

4. Yel-bũn 4:18 wã wilgda tõnd bõe?

⁴ Yel-bũn 4:18 wã yetame tɩ “nin-tɩrsã sor wẽnda wa sõor sẽn pukdi, t’a vẽenemã paasdẽ, hal n wa ta wĩnto-sʋka.” Gom-kãensã wilgda a Zeova sẽn vẽnegd a nin-buiidã a raabã to-to wã. Yaa bilf-bilf la a vẽnegd-ba.  Vɛrse-kãngã leb n sõngda tõnd tɩ d bãng kiris-ned sẽn toeemd bũmb kẽer a vɩɩmã pʋgẽ to-to, la a paasd yẽ ne a Zeova zoodã. Yɩlẽ tɩ ned wa paam zood sõma ne a Zeova, tõe n kaoosame. D sã n maagd d yĩng n bʋgsd sagls nins Wẽnnaam sẽn tũnugd ne a Gomdã la a siglgã n kõt-dã zug la d tũudẽ, bilf-bilfã, d na n wa tõog n bɩɩsa Kirist zʋg-sõma wã buudu. Sẽn paase, d na n maneg n bãnga Wẽnnaam sõma. D ges makr a Zeezi sẽn dɩk n wilg rẽ.

5. A Zeezi rɩka makr ne bõe n wilg ned tẽeb sẽn bɩt to-to wã?

⁵ A Zeezi wẽe yel-bũnd n wilg tɩ Rĩungã koɛɛgã d sẽn moondã yaa wa bõn-buud fĩ-fĩi d sẽn bʋt sũ-tɩrs rãmbã sũyẽ, tɩ wa bund n yit bilf-bilfu. A yeelame: ‘Bõn-buudã bundame n yit n bɩtẽ, la ka-koaadã pa mi rẽ sẽn maand to-to ye. Bilf-bilfu, pʋʋgã womda biis a toore. Pipi, kaaf n yita, n wa ning pʋga, n wa baas ne ka-zug sẽn kog sõma.’ (Mark 4:27, 28) A Zeezi ra ratame tɩ d bãng bõe? A wilgame tɩ wa bõn-bɩtg sẽn bɩt bilf-bilfã, ned sã n sak Rĩungã koɛɛgã, a tẽebã me bɩta bilf-bilfu. Wala makre, d Biibl karen-biig sã n wa paamd zood sõma ne a Zeova, d yãta vẽeneg t’a sɩngda bũmb wʋsg toeeng a vɩɩmã pʋgẽ. (Efɛ. 4:22-24) La d segd n tẽegame tɩ yaa a Zeova n kɩtd tɩ bõn-buudã sẽn yaa fĩ-fĩi wã bɩt a sũurẽ wã.—1 Kor. 3:7.

6-7. Yam-bʋg la d tõe n dɩk a Zeova sẽn naan tẽngã to-to wã wɛɛngẽ?

⁶ Sẽn yaa bũmb ning fãa la a Zeova maanda, baa kaoosda, a maagda a yĩng n wa baas-a. A sẽn maand woto wã yaa a yʋʋrã waoogr yĩnga, la neb a taabã nafr yĩnga. Wala makre, d ges a Zeova sẽn maneg tẽngã bilf-bilf to-to, hal tɩ ãdem-biisã wa tõe n vɩɩmd a zugu.

⁷ Biiblã goma a Zeova sẽn naan tẽngã to-to wã yelle, n yeel t’a ‘tẽega wĩir n mak’ tẽngã, t’a ‘tebenda a yẽbgrã t’a yasẽ,’ la t’a ‘tilga a soakã zĩigẽ kugrã.’  (Zoob 38:5, 6) A pʋd n dɩka sẽk n maag a yĩng n tags a tʋʋmdã yelle. (Sɩng. 1:10, 12) Tags-y n ges-y malɛgsã manesem sẽn yɩ to-to, b sẽn yã bũmb nins fãa a Zeova sẽn naanã. B sũyã tog n yɩɩ noog wʋsgo. Bala, b sɩngame n “kaasd ne sũ-noogo.” (Zoob 38:7) Rẽ wɛɛngẽ, yam-bʋg la d tõe n dɩke? A Zeova rɩka yʋʋm tusa n na n naan bũmba fãa. La a sẽn maag a yĩng n ges bũmb nins fãa a sẽn naanã, a yãame tɩ “yaa sõma hal wʋsgo.”—Sɩng. 1:31.

8. Bõe yell la d na n gom masã?

⁸ D sẽn yã bũmb ninsã wilgdame tɩ sagls n be Wẽnnaam Gomdã pʋgẽ, n sõngd tõnd tɩ d bãng tɩ yaa tɩlɛ tɩ d tall sũ-mare. Masã, d na n goma bũmb a yiib wɛɛngẽ d sẽn segd n tall sũ-mar n kell n gũ a Zeova.

9. Bõe wɛɛngẽ la yaa tɩlɛ tɩ d kell n gũ a Zeova?

⁹ Yaa tɩlɛ tɩ d gũ t’a Zeova wa leok d pʋʋsgo. D sã n wa pʋʋs a Zeova n kos-a pãng n na n mao ne zu-loɛɛg wall pãn-komsem, d tõe n getame t’a kaoosdame n pa leokd-d ye. Bõe yĩng t’a Zeova mi n pa leokd d pʋʋsgã fãa zĩig pʋgẽ?

10. Pʋʋsgã wɛɛngẽ, bõe yĩng tɩ d segd n kell n tall sũ-mare?

¹⁰ A Zeova maagda a yĩng n kelgd d pʋʋsgã. (Yɩɩn. 65:3) A geta d pʋʋsgã wa bũmb sẽn wilgd tɩ d sɩd tara tẽebo. (Ebre. 11:6) D sã n pʋʋs a Zeova n kos-a t’a sõng-d tɩ d ta a yam, t’a neẽ tɩ d maanda modgr rẽ wɛɛngẽ, noom-a lame. (1 Zã 3:22) D sã n kos a Zeova t’a sõng-d tɩ d tõog n bas bũmb d sẽn maand tɩ pa noom-a, d segd n talla sũ-mare, la d maan d sẽn tõe fãa n bas bõn-kãnga. A Zeezi wilgame tɩ Wẽnnaam tõeeme n pa leok d pʋʋsg zĩig pʋgẽ ye. Ad a sẽn yeele: “Bɩ y ket n kotẽ tɩ b na kõ-yã. Ket-y n gẽesd-y tɩ y na yã. Ket-y n kogsd-y kʋɩlengã tɩ b na pak n kõ-yã. Bala, sẽn kot-a fãa paamdame, sẽn gẽesd-a fãa yãtame, la b pakd n kõo sẽn kogsd-a kʋɩleng fãa.” (Mat. 7:7, 8) D sã n tũ sagl-kãngã n kell n ‘wɩng ne pʋʋsgo,’ d tõe n basa d yam tɩ d saasẽ Ba wã kelgda d pʋʋsgã, la t’a na n leok-d lame.—Kol. 4:2.

11. D sã n wa getẽ t’a Zeova kaoosdame n pa leokd d pʋʋsgo, wãn to la Ebre-rãmb 4:16 tõe n sõng-do?

¹¹ Baa d sẽn tõe n wa getẽ t’a Zeova kaoosdame n pa leokd d pʋʋsgã, a pʋlmame t’a na n leoka d pʋʋsgã tɩ zems a wakate. (Karm-y Ebre-rãmb 4:16.) Rẽ n so tɩ d pa segd n ning a Zeova taale, a sã n wa pa leokd d pʋʋsg tao-tao ye. Wala makre, yʋʋm wʋsg la woto neb wʋsg sẽn pʋʋsd n kotẽ tɩ Wẽnnaam Rĩungã wa sãam dũni-wẽn-kãngã. A Zeezi pʋd n yeelame tɩ d pʋʋs rẽ wɛɛngẽ. (Mat. 6:10) La ned sã n bas a Zeova tũubu, dũni-wẽn-kãngã sãoongã sẽn pa wa wakat ning yẽndã sẽn da tẽedã yĩnga, yaa yalemdo. (Hab. 2:3; Mat. 24:44) D sã n kell n gũ a Zeova, la d pʋʋsd-a n tall tẽeb t’a na n leok-d lame, yaa yam tʋʋmde. Dũni-wẽn-kãngã sãoongã na n waa wakat sẽn zems kɛpɩ. Bala a Zeova zoe n yãka daarã la wakatã. La na n yɩɩ raar sẽn kell n zems ne nebã fãa.—Mat. 24:36; 2 Pɩy. 3:15.

12. Yel-bʋg sasa la tõe n yɩ toog ne-d tɩ d tall sũ-mare?

¹² B sã n wa maand tõnd kɛgre, yaa tɩlɛ tɩ d tall sũ-mare, n kell n gũ a Zeova. Naoor wʋsgo, neb kẽer namsda b taabã,  b yĩn-kõbgo, b buudu, b minundu, b tẽnga, wall b sẽn yaa pag bɩ rao yĩnga. Neb kẽer paamda namsgo, b sẽn tar komslem yĩnga, wall b yamã sẽn pa ta yĩnga. B maanda a Zeova Kaset rãmb wʋsg kɛgre, b tũudmã yĩnga. B sã n wa namsd tõnd yɛl a woto buud yĩnga, d segd n tẽega a Zeezi sẽn yeel bũmb ningã. A yeelame: “Ned ning sẽn na n tõog toog hal tɩ saabã ta, a na n paama fãagre.” (Mat. 24:13) La y sã n wa bãng tɩ tigingã ned n maan yel-wẽn-kãsenga, bõe la y segd n maane? Y sã n wa bãng tɩ yellã taa kãsem-dãmbã, rẽ yĩnga, y na n talla sũ-mar n kell n bas tɩ b welg yellã tɩ zems ne noy nins a Zeova sẽn gãnegã bɩ? Bõe la kãsem-dãmbã segd n maan rẽ wɛɛngẽ?

13. Ned sã n maan yel-wẽn-kãsenga, bõe la a Zeova rat tɩ kãsem-dãmbã maane?

¹³ Kãsem-dãmbã sã n wa bãng tɩ ned n maan yel-wẽn-kãseng tigingã pʋgẽ, b pʋʋsda a Zeova n kos-a “yam ning sẽn yit yĩngrã,” sẽn na n yɩl n tõog n bãng yellã vɩʋʋg sõma wa yẽnda. (Zak 3:17) B raabã yaa b sõng yel-wẽn-maandã t’a bas “sor ning a sẽn da tudg n dɩkã,” sã n mik tɩ b tõeeme. (Zak 5:19, 20) Sẽn paase, b ratame n maan b sẽn tõe fãa n kogl tigingã, la b bels neb nins sũy sẽn sãam yellã yĩngã. (2 Kor. 1:3, 4) Ned sã n wa maan yel-wẽn-kãseng tɩ kãsem-dãmbã segd n kao bʋʋdo, b segd n deng n bao n bãnga yellã vɩʋʋgo, la woto tõe n dɩka sẽka. Rẽ poore, b na n pʋʋsame, la b maag b yĩng n tik Biiblã saglsã n kibl a soabã tɩ pa “loog noor ye.” (Zer. 30:11, MN) Baa ne kãsem-dãmbã sẽn basd tɩ kaoos tɩ b yaool n welg yellã, b pa yɩt yãg-yãg me n kao bʋʋd ye. Kãsem-dãmbã sã n welgd yɛlã tɩ zemsd ne a Zeova noyã, yaa tigingã neb fãa nafr yĩnga. Baa kãsem-dãmbã sã n welg yell tɩ tũ noyã, yellã sẽn nams neb ninsã sũy tõe n ket n sãamdame. Sã n yaa woto ne yãmba, bõe la y tõe n maan tɩ y sũ-sãangã booge?

14. Y tẽed-n-taag sã n maan bũmb tɩ sãam y sũur wʋsgo, Biiblã kiba-bʋg n tõe n sõng-y tɩ y tõog toogo?

¹⁴ Ned wall y tẽed-n-taag zoe n maana bũmb tɩ sãam y sũur wʋsg bɩ? Neb kibay  n be Wẽnnaam Gomdã pʋgẽ, n wilgd d sẽn tõe n maan to-to n kell n gũ a Zeova t’a wa welg yɛlã. Wala makre, baa a Zozɛf ba-biisã sẽn nams-a wʋsgã, a pa bas tɩ b sẽn maan-a wẽng ningã kɩt t’a lebg sũ-to-ned ye. A pʋd n maana a sẽn tõe fãa n kell n tũ a Zeova. La a Zeova ning-a-la barka, a sẽn tall sũ-mar n kell n tõog toogã yĩnga. (Sɩng. 39:21) Kaoosg zugẽ, a Zozɛf wa n basa taal wẽng ning b sẽn maan-a wã yĩnga, la a tags bark nins a Zeova sẽn ning-a wã yelle. (Sɩng. 45:5) Wa a Zozɛfe, tõnd me sã n kell n paas tõnd ne a Zeova zoodã, la d gũudẽ t’a wa rems kɛgr ning b sẽn maan tõndã, d paamda belsgo.—Yɩɩn. 7:18; 73:28.

15. Bõe n sõng saam-bi-poak t’a pa bas tɩ b sẽn maan-a kɛgr sãam a sũuri?

¹⁵ Yaa vẽeneg tɩ namsg paood sẽn ta namsg ning a Zozɛf sẽn paamã. La sẽn yaa namsg ning fãa la d paam-yã, d sũur sãamdame. D sã n wa paam yell ne neda, baa yaa ned sẽn pa tũud a Zeova, d sã n tũ Biiblã saglsã, na n naf-d lame. (Fili. 2:3, 4) Ad saam-bi-poak a ye kibare: A sũur sãama wʋsgo, a sẽn wa n bãng t’a tʋmd-n-taag n wɩt-a n sãamd a yʋʋrã. Saam-bi-poakã pa yɩ yãg-yãg n leok ye. A pʋd n maaga a yĩng n tags a Zeezi mak-sõngã yelle. B sẽn wa n tʋʋd a Zeezi wã, a pa tʋʋs n lebs ye. (1 Pɩy. 2:21, 23) Saam-bi-poakã sẽn tags rẽ yellã, a yãka yam n na n kell n sĩndi. Kaoosg zugẽ, a wa n bãngame t’a tʋmd-n-taagã ra maooda ne bã-kɛgenga, hal t’a yam ka a meng ye. A wa n yeelame meng t’a tʋmd-n-taagã sẽn maan woto wã, yaa a bãagã yĩng lakae pa pʋ-toog ye. Saam-bi-poakã sũur yɩɩ noog wʋsgo, a sẽn tall sũ-mar n tõog toogã. A paama sũur pʋgẽ bãan me.

16. B sã n wa maan-y kɛgre, bõe n tõe n bels-yã? (1 Pɩyɛɛr 3:12)

¹⁶ Y sã n namsda b sẽn maan-y kɛgr wall yell a to yĩnga, bɩ y tẽeg t’a Zeova pẽe “sũ-sãang rãmbã.” (Yɩɩn. 34:19) A nonga yãmb y sũ-marã yĩnga, la y sẽn basd y yɛlã fãa ne-a wã yĩnga. (Yɩɩn. 55:23) A Zeova n yaa dũniyã fãa bʋ- kaooda. A nee yɛl nins fãa sẽn maandã. (Karm-y 1 Pɩyɛɛr 3:12.) Y sã n wa maood ne yell y sẽn pa tõe n welge, y pa na n tall sũ-mar n gũ t’a wa welg sɩda?

17. Wa Ezayi 30:18 sẽn wilgdã, bõe la a Zeova pʋlem t’a na n maaname?

¹⁷ Ka la bilfu, d saasẽ Ba wã na n kɩtame tɩ d paam bark wʋsg ne a Rĩungã maasem. Ezayi 30:18 yetame: ‘Sẽn-Ka-Saab gũuda wakat n na n ning yãmb barka, rẽ n kɩte, tɩ b na n yik n zoe yãmb nimbãanega. Bala, Sẽn-Ka-Saab yaa Wẽnnaam sẽn yaa bʋ-tɩrg soaba. Bark bee neb nins fãa sẽn tẽed bãmbã zugu!’ Neb nins sẽn ket n gũud a Zeova wã na n paama bark wʋsg masã menga, la dũni-paalgã sẽn watã pʋgẽ me.

18. Bark-bʋs la d na n wa paame?

¹⁸ Wẽnnaam nin-buiidã sã n wa kẽ dũni-paalgã pʋgẽ, b pa na n tol n le mao ne yɩɩrã la zu-loees nins fãa b sẽn paamd rũndã-rũndã wã ye. Wẽgb buudã fãa na n saame. La toog me pa na n le zĩnd ye. (Vẽn. 21:4) Wakat kãnga, d pa na n le maand yɩɩr n gũud bũmb nins d sẽn datã ye. Bala, d na n paama rẽ hal tɩ seke. (Yɩɩn. 72:16; Eza. 54:13) Ad sɩd yaa bark tɛkẽ!

19. A Zeova sõngda tõnd masã meng tɩ d na n wa tõog n maan bõe?

¹⁹ Masã menga, a Zeova sõngda tõnd tɩ d tõogd n basd minim-wẽnse, la d bɩɩsd zʋg-sõma n na n wa tõog n vɩɩmd a Rĩungã pʋgẽ. Da koms-y raood n bas a Zeova tũub ye. Vɩ-noog n nan ket taoore! Sẽn mik tɩ manegr n watã, bɩ d kell n tall sũ-mar n gũ a Zeova t’a wa maan bũmb nins a sẽn pʋlem t’a na n maaname wã.