1-2. Bõe la seb-gʋlsd a ye yeel-yã, la bõe yell la d na n gom sõs-kãngã pʋgẽ?

RŨNDÃ-RŨNDÃ, neb milyõ-rãmb yetame tɩ b tẽeda a Zeezi, la b pa sakd n deeg bũmb nins a sẽn zãms nebã ye. (2 Tɩm. 4:3, 4) Seb-gʋlsd a ye pʋd n yeelame: “Zeezi a to sã n da be tõnd sʋk rũndã-rũndã, n na n togs tõnd yɛlã wa pĩnd Zeezi wã sẽn maanã . . . , d ra na n zãgs-a-la rũndã-rũndã wa b sẽn zãgs-a yʋʋm tus a yiib sẽn loogã bɩ? . . . D tõe n leokame tɩ n-ye. D ra na n zãgsame n pa tẽ-a ye.”

² Pipi kiris-nebã wakatẽ, neb wʋsg wʋma a Zeezi sẽn zãms nebã bũmb ninsã la b yã a sẽn maan yel-soalma, la baa ne rẽ, b zãgsame n pa tẽ-a ye. Bõe yĩnga? Sõsg ning sẽn loogã pʋgẽ, d yãa bũmb a naas sẽn kɩt tɩ nebã pa sak n tẽ a Zeezi, a sẽn yeel la a sẽn maan bũmb ninsã yĩnga. Bɩ d le gom bũmb a naas yelle. D leb n na n yãa bũmb nins sẽn kɩt neb kẽer pa sakd n kelgd a Zeezi karen-biisã rũndã-rũndã, la d sẽn tõe n maan n da wa bas a Zeezi tũubu.

3. Bõe la a Zeezi ra maanda, tɩ kɩt tɩ neb wʋsg pa sak n tẽ-a?

³ A Zeezi sẽn wa n be tẽngã zugã, a ra nong n sõsda ne neb buud toor-toore. A naaga arzɛgs rãmb la nin-kãsems n dɩ. A ra rɩkda sẽk wʋsg me n sõsd ne naong rãmbã la nimbãan-dãmbã. Sẽn paase, a ra kʋmda neb nins b sẽn da get wa “yel-wẽn-maandbã.” Neb kẽer sẽn da tẽed tɩ b yaa tɩrs b mens nifẽ zãgsame n pa tẽ a Zeezi, a goamã la a tʋʋm-tʋmdɩ wã yĩnga. B soka a Zeezi karen-biisã yaa: “Bõe yĩng tɩ yãmb naag yõor-yaood dɛɛgdbã la yel-wẽn-maandbã n dɩtẽ la y  yũuda?” La a Zeezi leok-b lame yaa: “Pa neb nins sẽn tar laafɩ wã n baood tɩp ye. Yaa bãad-rãmb n baood tɩpa. Mam pa wa nin-tɩrs yĩng ye. M waame n na n sagl yel-wẽn-maandbã tɩ b tek yam n kos sugri.”—Luk 5:29-32.

4. Wa no-rɛɛs a Ezayi sẽn da pĩnd n togsã, zʋɩf-rãmbã ra segd n bãnga bõe Mesi wã wɛɛngẽ?

⁴ Bõe la Gʋls-sõamyã yeta? Nand tɩ Mesi wã wa, no-rɛɛs a Ezayi ra pĩnd n togsa hal daar zãr tɩ nebã pa na n sak n tẽ-a ye. Ad a sẽn yeelã: “Nebã paoog-b lame, b bas-b lame, . . . bãmb lebga wa soab ning nebã sẽn wẽnemd b nens n base, b paooga bãmba, la tõnd dag n ka nand-b ye.” (Eza. 53:3) “Nebã” ra na n zãaga b mens ne Mesi wã. Dẽnd zʋɩf-rãmbã sẽn da be pipi kiris-nebã wakatẽ wã ra segd n bãngame tɩ nebã ra na n zãgsa a Zeezi.

5. Neb wʋsg tagsg yaa wãn to ne a Zeezi karen-biisã rũndã-rũndã?

⁵ Nebã manesem yaa woto rũndã-rũndã bɩ? N-ye. Tũudum taoor dãmb wʋsg sẽn datã yaa tɩ neb yʋy sẽn yi, rakã-rãmba, la neb dũniyã rãmb sẽn get tɩ b yaa yam dãmb wa b tũudmã pʋgẽ. Baa nin-kãensã yel-manesmã la b sẽn vɩ to-to wã pa zems ne Wẽnnaam noyã, tũudum taoor dãmb kãens sakd-b-la b tũudmã pʋgẽ. B pa nand a Zeova nin-buiidã sẽn tar yẽesem, la b tar yel-manesem sẽn yaa sõma wã ye. Bala b pa nin-kãsems dũni-kãngã neb nifẽ ye. Wa a Poll sẽn yeelã, Wẽnnaam yãkda neb nins “nebã sẽn pa nandã.” (1 Kor. 1:26-29) La neb nins fãa sẽn maand sɩd ne a Zeova wã tara yõod wʋsg a nifẽ.

6. Bõe la a Zeezi yeel Matiye 11:25, 26, la wãn to la d tõe n dɩk a togs-n-taare?

⁶ Bõe la d tõe n maan n da wa bas n pa le tẽed a Zeezi? (Karm-y Matiye 11:25, 26.) D da bas tɩ dũniyã nebã sẽn get Wẽnnaam nin-buiidã to-to wã golem d tagsgã ye. D bãng tɩ yaa sik-m-mens rãmbã bal la a Zeova tũnugd ne n maand a raabã. (Yɩɩn. 138:6) Tags-y n ges-y bũmb nins fãa a sẽn tõog n pids ne neb nins dũniyã nebã sẽn pa get tɩ b yaa yam dãmb bɩ bãngdbã maasmã.

7. Bõe yĩng t’a Zeezi yeel tɩ fariziẽ-rãmbã yaa zãmb dãmba, la b manesem yɩɩ wãna?

⁷ A Zeezi talla raood n puk tũudmã taoor dãmb bãongo, bala b ra pa zãmsd nebã sẽn na yɩl tɩ b tũ a Zeova wa sẽn segdã ye. Wala makre, a wilgame tɩ fariziẽ-rãmbã yaa zãmb dãmba, bala ra yaa nusã pɛgb yell n da pak-b n yɩɩd b roagdbã yell gesgo. (Mat. 15:1-11) Tõe t’a Zeezi goamã linga a karen-biisã. B sok-a lame yaa: “Yãmb miime tɩ Fariziẽ-rãmbã sẽn wʋm yãmb goamã, zab-b lame sɩda?” T’a Zeezi leok yaa: “Tɩɩg ning fãa m Ba sẽn be saasẽ wã sẽn pa sele, b na n võog-a lame. Bɩ y bas-ba. B yaa taoor lʋɩtb sẽn yaa zoense. Zoang sã n tɛt zoanga, b yiibã fãa na n lʋɩɩ bokẽ.” (Mat. 15:12-14) A Zeezi pa bas tɩ tũudmã taoor dãmb tags-kɛgã kɩt t’a pa togs-b sɩdã ye.

8. Wãn to la a Zeezi wilg tɩ pa tũudmã fãa n tat Wẽnnaam yam?

⁸ A Zeezi leb n wilgame tɩ tũudmã zãmsg kẽer yaa ziri. A pa yeel tɩ tũudmã fãa tata Wẽnnaam yam ye. A pʋd n yeelame tɩ neb wʋsg n dɩk sor ning sẽn yaa yaleng n debd sãoong zĩigẽ wã, la tɩ neb bilf bal n dɩk sor ning sẽn yaa sẽk n debd vɩɩm zĩigẽ wã. (Mat. 7:13, 14) A wilga vẽeneg tɩ neb kẽer na n yetame tɩ b tũuda Wẽnnaam, n yaool n pa tũud-a ye. A keoog-d lame, n yeel yaa: “Gũus-y y mens ne zirẽ-be-no-rɛɛsdbã. B wata yãmb nengẽ n maand wa piis sẽn pa tar b toorẽ yellã, n yaool n yaa wa we-baas kom sẽn tare. Yaa b biisẽ wã la y na n bãng-b n welge.”—Mat. 7:15-20.

9. Togs-y tũudmã zãmsg kẽer a Zeezi sẽn wilg tɩ yaa ziri.

 ⁹ Bõe la Gʋls-sõamyã yeta? Biiblã ra pĩnd n togsame tɩ Mesi wã ra na n nonga a Zeova roogã hal wʋsgo, tɩ yaa wa bugum sẽn dɩt a sũurẽ wã. (Yɩɩn. 69:10; Zã 2:14-17) Nonglem-kãng n kɩt t’a Zeezi wilg tɩ tũudmã zãmsg kẽer yaa ziri, la tɩ b yel-maandɩ kẽer pa sõma ye. Wala makre, fariziẽ-rãmbã ra tẽedame tɩ ninsaal tara sɩɩg sẽn pa kiidi, la a Zeezi wilgame tɩ sẽn ki-bã yaa wa neb sẽn gõe. (Zã 11:11) Sadiseẽ-rãmbã ra pa tẽed kũum vʋʋgrã, la a Zeezi vʋʋga a Lazaare. (Zã 11:43, 44; Tʋʋ. 23:8) Fariziẽ-rãmbã ra yetame tɩ bũmb fãa yaa Wẽnd pʋlengo, la a Zeezi wilga nebã tɩ ninsaal fãa tõe n yãka yam tũ Wẽnnaam wall a pa tũ-a ye.—Mat. 11:28.

10. Bõe yĩng tɩ rũndã-rũndã, neb wʋsg pa sakd n kelg tõndo?

¹⁰ Nebã manesem yaa woto rũndã-rũndã bɩ? N-ye. Neb wʋsg pa sakd n kelg tõndo, bala d sɛbã sẽn tik Biiblã zugã wilgda tũudmã sẽn zãmsd nebã bũmb nins tɩ yaa ziri wã. Wala makre, tũudmã taoor dãmb zãmsda b nebã tɩ Wẽnnaam sɩbgda nin-wẽnsã bugum yiri. B tũnugda ne zãms-kãngã sẽn yaa ziri wã n na n soog nebã. A Zeova nin-buiidã sẽn tũud Wẽnnaam sẽn yaa nonglmã wilgda nebã tɩ zãms-kãnga yaa ziri. Tũudmã taoor dãmb leb n zãmsda nebã tɩ ninsaal tara sɩɩg sẽn pa kiidi. Tõnd wilgda nebã tɩ yaa sẽn da tũud-b wẽn-faadã n tẽed woto, la tɩ sã n mik tɩ b sẽn tẽedã yaa sɩda, dẽnd pa tɩlɛ tɩ kũum vʋʋgr zĩnd ye. Baa ne tũudum wʋsg sẽn zãmsd nebã tɩ bũmb fãa yaa Wẽnd pʋlengã, tõnd yẽ wilgda nebã tɩ ned fãa tõe n yãka yam n tũ Wẽnnaam. Tũudmã taoor dãmb manesem mi n yaa wãna? Naoor wʋsgo, b sũyã yikdame!

11. Sã n yaa ne a Zeezi goam nins sẽn be Zã 8:45-47 pʋgẽ wã, bõe la Wẽnnaam dat t’a nin-buiidã maane?

¹¹ Bõe la d tõe n maan n da wa bas n pa le tẽed a Zeezi? D sã n nong sɩdã, d segd n saka Wẽnnaam sẽn yet bũmb ningã. (Karm-y Zã 8:45-47.) Tõnd yẽ pa na n  maan wa a Sʋɩtãan ye. D na n kell n gãda sɩdã kãn-kãe. D pa na n tol n maan bũmb sẽn pa zems ne d sẽn tẽed bũmb ninsã ye. (Zã 8:44) Wẽnnaam ratame t’a nin-buiidã ‘kisg sẽn yaa wẽnga,’ la b kell n ‘gãd sẽn yaa sõma wã kãn-kãe’ wa a Zeezi sẽn maanã.—Rom. 12:9; Ebre. 1:9.

12. Bõe yĩng t’a Zeezi kũumã sẽn yɩ to-to wã kɩt tɩ zʋɩf-rãmb wʋsg pa sak n tẽ-a?

¹² Bõe me n kɩt t’a Zeezi wakatẽ wã, zʋɩf-rãmbã pa sak n tẽ-a? Ad a Poll sẽn yeele: “Tõnd moondame n gomd Kiristã b sẽn kʋ ra-luk zugã yelle. Ne Zʋɩf-rãmbã, rẽ yaa bũmb sẽn kɩtd tɩ ned lak n lʋɩ.” (1 Kor. 1:23) Bõe yĩng t’a Zeezi kũumã sẽn yɩ to-to wã pa yɩ zʋɩf-rãmb wʋsg noogo? B sẽn yã tɩ b kaa a Zeezi ra-luk zug wa bi-bɛɛg la yel-wẽn-maandã kɩtame tɩ b pa sak n tẽ tɩ yẽ la Mesi wã ye.—Tõo. 21:22, 23.

13. Bõe la neb nins sẽn pa tẽ a Zeezi wã pa sak n deege?

¹³ Zʋɩf-rãmb nins sẽn pa tẽ a Zeezi wã pa sak n deeg t’a ra pa tar taale, tɩ b rõd-a lame, la tɩ b nams-a-la zaalem yĩng bal ye. Neb nins sẽn kao a Zeezi bʋʋdã pa kao bʋʋdã tɩrg ye. Zʋɩf-rãmbã bʋ-kaoodb sull ning sẽn tar noor n tɩ yɩɩdã yɩɩ yãg-yãg n tigim taaba. Rẽ me, b sẽn kao bʋʋdã to-to wã pa tol n zems ne bʋ-kaoorã noy ye. (Luk 22:54; Zã 18:24) Bʋ-kaoodbã ra segd n maaga b yĩng n kelg nebã sẽn yet bũmb nins n na n ning a Zeezi taalã, la b pa maan woto ye. Bãmb mensã baoo ‘bũmb n na n dõd a Zeezi n paam n kʋ-a.’ La rẽ sẽn pa tõogã, maan-kʋʋdb kãsmã bao n na n kɩtame t’a Zeezi yeel bũmbu, tɩ b paam n wilg t’a tara taale. La woto pa tol n zems baa bilf ne b bʋ-kaoorã noy ye. (Mat. 26:59; Mark 14:55-64) A Zeezi sẽn wa n vʋʋgã poore, bʋ-kaood-kãensã sẽn pa maand sẽn yaa tɩrgã kõo Rom sodaas nins sẽn da gũud a Zeezi yaoogã “wanzuri ligd wʋsgo,” tɩ b sã n wa sok yaoogã sẽn yaa vɩʋʋgã võor bɩ b yag ziri.—Mat. 28:11-15.

14. Bõe la Gʋls-sõamyã ra pĩnd n togs Mesi wã kũumã wɛɛngẽ?

¹⁴ Bõe la Gʋls-sõamyã yeta? Zʋɩf-rãmb  wʋsg ra tagsdame tɩ pa tɩlɛ tɩ Mesi wã ki ye. La ges-y b sẽn da pĩnd n togs bũmb ning Gʋls-sõamyã pʋgẽ wã. B ra yeelame: “Bãmb rɩka b meng n kõ kũum, la b sõda bãmb n naag tʋʋm-beed rãmbã. Dẽ, bãmb deega neb wʋsg yel-wẽna, la bãmb kẽe sʋk n paas zabrã koangdbã yĩnga.” (Eza. 53:12) Dẽnd zʋɩf-rãmbã ra ka bʋʋm n na n zãgs tɩ b kõn tẽ a Zeezi, b sẽn ka-a ra-luk zug wa yel-wẽn-maandã yĩng ye.

15. Bõe la b yet a Zeova Kaset rãmbã zugu, tɩ kɩt tɩ neb kẽer pa sakd n kelg tõndo?

¹⁵ Nebã manesem yaa woto rũndã-rũndã bɩ? Vẽenega! B rõda a Zeezi la b kao a bʋʋd kɛgre. Rũndã-rũndã me, b rõta a Zeova Kaset rãmbã, la b kaood b bʋʋd kɛgre. Ad kibay sẽn wilgd rẽnda: Yʋʋmd 1930 n tãag yʋʋmd 1940 sẽnese, Etazĩni, d kẽnga bʋ-kaoodb taoor naoor wʋsgo, n na n paam sor n tũ d tũudmã tɩ gɩdgr kaẽ ye. Bʋ-kaoodb kẽer ra zoe n ningda tõnd taale, n pa baood n na n kelg-d meng ye. Kebɛk sẽn yaa Kanada tẽng a ye wã pʋgẽ, egiliizã rãmb ne tẽngã taoor dãmb naaga taab n na n gɩdg d tʋʋmdã. B kẽesa koe-moondb wʋsg bãens rotẽ, b sẽn gom Wẽnnaam Rĩungã yell ne b yagsã yĩng bala. Alemayn, Nazi-rãmbã naamã wakatã, kom-bɩɩs wʋsg sẽn maand sɩd ne a Zeova la goosneemã taoor dãmb kɩt tɩ b kʋ. Yʋʋma noorã, d saam-biis wʋsg sẽn be Risi bʋʋd la b kao-yã, n kẽes-b bãens roogo, b sẽn sõs Biiblã zug ne nebã yĩnga, tɩ tẽngã taoor dãmb yaool n yeel tɩ b sẽn maand woto wã yaa bũmb sẽn zẽnd tũudmã yɛlã. B pʋd n gɩdga Dũni-paalgã lebgrã d sẽn yiis ne Risi buud-gomdã, n yeel tɩ yaa sebr sẽn kɩtd tɩ nebã zẽnd tũudmã yɛla, bala yʋʋr ning sẽn yaa Zeova wã bee be.

16. Wa 1 Zã 4:1 sẽn wilgdã, bõe yĩng tɩ d pa segd n tẽ bũmb nins nebã sẽn yet a Zeova Kaset rãmbã zugã?

¹⁶ Bõe la d tõe n maan n da wa bas n pa le tẽed a Zeezi? D bao n bãng yɛlã vɩʋʋgo. A Zeezi sẽn wa n sõsd ne nebã tãngã zugã, a pĩnd n yeela a kɛlgdbã tɩ neb kẽer na n ‘rõd-b-la ne wẽng buud fãa.’ (Mat. 5:11) Rõd-kãensã fãa yita a Sʋɩtãan nengẽ. Yaa yẽ n pirsd nebã tɩ b kãnegd neb nins sẽn nong sɩdã. (Vẽn. 12:9, 10) D pa segd n kelg nebã sẽn yet bũmb ning n na n dõd tõndã ye. D pa segd me n bas tɩ b ziri wã kẽes-d rabeem, la koms d tẽebã ye.—Karm-y 1 Zã 4:1.

17. Wãn to la yɛl nins sẽn maan sẽn deng a Zeezi kũumã ra tõe n kɩt tɩ neb kẽer pa sak n tẽ-a?

¹⁷ A Zeezi kũumã sẽn wa n ket bilfã, a tʋm-tʋmdb 12 wã nin-yend n zãmb-a. Yʋng ning sẽn deng a kũumã, tʋm-tʋmd a to n kɩɩs hal naoor a tãab t’a pa mi a Zeezi ye. Yʋn-kãng me, tʋm-tʋmdbã fãa raag-a lame n base. (Mat. 26:14-16, 47, 56, 75) Rẽ pa ling a Zeezi ye. A ra pĩnd n yeelame meng tɩ na n yɩɩ woto. (Zã 6:64; 13:21, 26, 38; 16:32) Neb kẽer sẽn yã rẽ wã ra tõeeme n pa sak n tẽ-a, n yeel yaa: ‘A Zeezi tʋm-tʋmdbã manesem sã n yaa woto, m pa rat n yɩ a karen-biig ye.’

18. A Zeezi kũumã sẽn wa n ket bilfã, bãngr-gom-bʋs n pids a zugu?

¹⁸ Bõe la Gʋls-sõamyã yeta? Yʋʋm kobs nand t’a Zeezi wa tẽngã zugu, a Zeova ra kɩtame tɩ b togs a Gomdã pʋgẽ tɩ ned n na n zãmb Mesi wã, tɩ b yao-a wanzuri ligd-koeems pis-tã. (Zaka. 11:12, 13) Yaa a Zeezi tʋm-tʋmdbã sʋk nin-yend n da na n zãmb-a. (Yɩɩn. 41:10) No-rɛɛs a Zakari leb n yeelame yaa: “Wẽ pe-kɩɩmã, la piisã na n  sãeegame.” (Zaka. 13:7) Sũ-tɩrs rãmbã ra pa segd n bas tɩ yel-kãensã kɩt tɩ b pa tẽ a Zeezi ye. Bãngr-gom-kãensã fãa sẽn pids a Zeezi zugã pʋd n da segd n kenga b tẽebã.

19. Bõe la pʋ-peelem dãmbã mi?

¹⁹ Nebã manesem yaa woto rũndã-rũndã bɩ? N-ye. Rũndã-rũndã, a Zeova Kaset rãmbã sʋk neb a wãn bal b sẽn mi sõma n bas a Zeova tũubu, n lebg sɩdã kɩɩsdba, la b makd n na n kɩt tɩ neb a taab me bas a Zeova tũubu. B tũnugda ne kiba-kɩtbã la ẽnternetã n yelgd kiba-wẽnse, kibay sẽn pa sɩd zãnga, la ziri a Zeova Kaset rãmbã zugu. La rẽ pa kɩtd tɩ pʋ-peelem dãmbã pa sakd sɩdã ye. B pʋd n miime tɩ Biiblã ra pĩnd n togsame tɩ yel-kãensã buud na n zĩndame.—Mat. 24:24; 2 Pɩy. 2:18-22.

20. Bõe la d tõe n maan tɩ sõng-d tɩ neb nins sẽn bas sɩdã ra wa kɩt tɩ tõnd bas a Zeova tũubu? (2 Tɩmote 4:4, 5)

²⁰ Bõe la d tõe n maan n da wa bas n pa le tẽed a Zeezi? D segd n zãmsda Biiblã wakat fãa, n pʋʋsdẽ n pa basdẽ, la d wɩngd ne tʋʋmd ning a Zeova sẽn kõ tõnd tɩ d tʋmã, tɩ sõng-d tɩ d tẽebã kell n tall pãnga. (Karm-y 2 Tɩmote 4:4, 5.) D sã n bɩɩsd d tẽebã, d pa na n zoe rabeem, d sã n wa wʋm kibay sẽn pa sɩd a Zeova Kaset rãmbã zug ye. (Eza. 28:16) D sã n nong a Zeova, a Gomdã, la d saam-biisã, na n sõng-d lame tɩ neb nins sẽn bas sɩdã ra wa kɩt tɩ tõnd bas a Zeova tũub ye.

21. Baa neb wʋsg sẽn pa sakd n kelg tõnd rũndã-rũndã wã, d tõe n basa d yam ne bõe?

²¹ Pipi kiris-nebã wakatẽ, neb wʋsg pa sak n tẽ a Zeezi ye. La neb a taab n sak n tẽ-a, hal tɩ b sõorã ra yaa wʋsgo. Wala makre, Sãnedrẽ wã nin-yende, la baa “maan-kʋʋdb wʋsg lebga tẽedba.” (Tʋʋ. 6:7; Mat. 27:57-60; Mark 15:43) Rũndã-rũndã me, neb milyõ-rãmb n sak n tũud a Zeezi. Bõe yĩnga? Bala b mii sɩdã sẽn be Gʋls-sõamyã pʋgẽ wã, la b nong rẽ. Wẽnnaam Gomdã yetame: “Sẽn nong-b yãmb tõogã vɩɩ ne bãan meng-menga, la bũmb ka be n tõe n lub bãmb ye.”—Yɩɩn. 119:165.